admin_lases00 – ໜ້າ 5 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສູນຂໍ້ມູນຂ່າວສານ ແລະ ຝຶກອົບຮົມ ລົງຝຶກວິທີການເກັບກຳຂໍ້ມູນພາກສະໜາມທີ່ເມືອງວັງວຽງ, ແຂວງວຽງຈັນ

ຈໍານວນຜູ້ເຂົ້າຊົມ: 683

ສູນຂໍ້ມູນຂ່າວສານ ແລະ ຝຶກອົບຮົມ ລົງຝຶກວິທີການເກັບກຳຂໍ້ມູນພາກສະໜາມທີ່ເມືອງວັງວຽງ, ແຂວງວຽງຈັນ

ພາຍຫຼັງທີ່ໄດ້ຈັດຝຶກອົບຮົມພາກທິດສະດີສໍາເລັດ, ສູນຂໍ້ມູນຂ່າວສານ ແລະ ຝຶກອົບຮົມ ໄດ້ຈັດໃຫ້ມີການລົງເກັບກໍາຂໍ້ມູນຢູ່ພາກສະໜາມໃນພາກປະຕິບັດຕົວຈິງທີ່ເມືອງວັງວຽງ, ແຂວງວຽງຈັນ ລະຫວ່າງວັນທີ 7-9 ກຸມພາ 2024, ນໍາພາໂດຍ ທ່ານ ປອ. ທະນົງສອນ ສີບຸນເຮືອງ, ວ່າການຫົວໜ້າສູນ, ພ້ອມດ້ວຍຄະນະຈໍານວນ 15 ທ່ານ; ໄດ້ເຂົ້າເຮັດວຽກຮ່ວມກັບຫ້ອງການຖະແຫຼ່ງຂ່າວວັດທະນະທໍາ ແລະ ທ່ອງທ່ຽວເມືອງວັງວຽງ, ແຂວງວຽງຈັນ ຕາງໜ້າຕ້ອນຮັບໂດຍ: ທ່ານ ດວງດາລາ ພວງຈັນລາ, ຮອງຫົວໜ້າຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວເມືອງວັງວຽງ ພ້ອມດ້ວຍຄະນະ; ຕາມການລາຍງານສະພາບການທ່ອງທ່ຽວຂອງເມືອງວັງວຽງຈາກ ທ່ານ ດວງດາລາ ພວງຈັນລາ ເພີ່ນໄດ້ໃຫ້ຂໍ້ມູນວ່າ: ສະພາບການທ່ອງທ່ຽວຂອງເມືອງວັງວຽງ ຫຼັງຈາກການແຜ່ລະບາດຂອງພະຍາດໂຄວິດ 19 ໄດ້ເບົາບາງລົງ ກໍ່ໄດ້ເປີດການທ່ອງທ່ຽວຢ່າງເປັນປົກກະຕິ ແລະ ມີນັກທ່ອງທ່ຽວເຂົ້າມາທ່ຽວທັງໝົດໃນປີ 2023 ຈໍານວນ 485.058 ຄົນ; ເຊິ່ງເມືອງວັງວຽງເປັນເມືອງທີ່ມີບຸລິມະສິດໃນການທ່ອງທ່ຽວ ກໍ່ຄືເປັນເມືອງທີ່ນັກທ່ອງທ່ຽວໃຫ້ຄວາມນິຍົມໃນການມາທ່ຽວຫຼາຍ, ເຖິງຈະເປັນເມືອງທີ່ມີຂະໜາດນ້ອຍກໍ່ຕາມ; ຕໍ່ບັນຫາດັ່ງກ່າວທາງແຂວງວຽງຈັນຈຶ່ງໄດ້ສຸມໃສ່ພັດທະນາຢ່າງຕໍ່ເນື່ອງ ເປົ້າໝາຍກໍ່ຄືໃຫ້ກາຍເປັນເມືອງທ່ອງທ່ຽວທໍາມະຊາດທີ່ມີຄວາມຍືນຍົງໃນອາຊຽນ; ທາງຫ້ອງການຖະແຫຼງຂ່າວວັດທະນະທໍາ ແລະ ທ່ອງທ່ຽວ ກໍ່ໄດ້ເອົາໃຈໃສ່ລົງຕິດຕາມຊຸກຍູ້ບັນດາຫົວໜ່ວຍທຸລະກິດຕ່າງໆ ທີ່ໃຫ້ບໍລິການກ່ຽວກັບການທ່ອງທ່ຽວ ເຊິ່ງໄດ້ປະຊຸມຄົ້ນຄວ້າປຶກສາຫາລືທັງພາກລັດ ແລະ ພາກທຸລະກິດ, ພາກລັດກໍ່ຄືຂະແໜງການທີ່ກ່ຽວຂ້ອງ ທີ່ມີຄວາມຈໍາເປັນຕ້ອງໄດ້ຮ່ວມມືກັນໃນການພັດທະນາ; ເຊິ່ງເມືອງວັງວຽງເປັນເມືອງໜຶ່ງທີ່ໄດ້ກໍານົດເອົາວຽກງານທ່ອງທ່ຽວເປັນວຽກງານບູລິມະສິດຂອງເມືອງ ແລະ ໃນໄລຍະຜ່ານມາເມືອງວັງວຽງກໍ່ໄດ້ຮັບທຶນໃນການຊ່ວຍເຫຼືອຈາກພາກສ່ວນຕ່າງໆ ເພື່ອພັດທະນາຖະໜົນຫົນທາງ ໃຫ້ເຂົ້າເຖິງແຫຼ່ງທ່ອງທ່ຽວຢ່າງສະດວກສະບາຍ, ພ້ອມນັ້ນ ຍັງມີການສ້າງໂຮງແຮມສີຂຽວ, ມີຫ້ອງນໍ້າສາທາລະນະອາຊຽນ ແລະ ມີເປົ້າໝາຍສູງສຸດຄືການສ້າງເປັນເມືອງທ່ອງທ່ຽວອາຊຽນ; ນອກນີ້ເມືອງວັງວຽງຍັງໄດ້ຮັບລາງວັນໂຮງແຮມສີຂຽວອາຊຽນ ເຊິ່ງມີ 05 ຫົວໜ່ວຍທຸລະກິດ ແລະ ຍັງມີສະຖານທີ່ທ່ອງທ່ຽວແບບປະຊາຊົນມີສ່ວນຮ່ວມເຊັ່ນ: ການບໍລິການທີ່ພັກແບບເຮືອນພັກແຮມປະຊາຊົນ (ໂຮມສເຕ) , ຖໍ້າປູຄໍາ, ຖໍ້າລົມ ແລະ ຍັງໄດ້ສຸມໃສ່ການຈັດຝຶກອົບຮົມໃຫ້ບັນດາຜູ້ປະກອບການ ກ່ຽວກັບມາດຕະຖານໃນການບໍລິການການທ່ອງທ່ຽວໃນກິດຈະກໍາຕ່າງໆ ທີ່ນອນຢູ່ໃນທຸລະກິດການທ່ອງທ່ຽວ.

ໃນໂອກາດດັ່ງກ່າວ ທ່ານ ປອ. ທະນົງສອນ ສີບຸນເຮືອງ ກໍ່ໄດ້ກ່າວສະແດງຄວາມຂອບໃຈ ຕໍ່ທ່ານ ດວງດາລາ ພວງຈັນລາ ຮອງຫົວໜ້າຫ້ອງການຖະແຫຼ່ງຂ່າວວັດທະນະທໍາ ແລະ ທ່ອງທ່ຽວທີ່ສະໜອງຂໍ້ມູນຕ່າງໆ ທີ່ຕ້ອງການ ພ້ອມທັງແຈ້ງຫົວຂໍ້ໃນການລົງມາເກັບກໍາຂໍ້ມູນໃນຄັ້ງນີ້ ເຊິ່ງໄດ້ແບ່ງເປັນ 4 ກຸ່ມ 4 ຫົວຂໍ້ໃຫຍ່ຄື:

1. ການບໍລິການທີ່ພັກແບບເຮືອນພັກແຮມປະຊາຊົນ. (ໂຮມສເຕ)

2. ການຄຸ້ມຄອງທຸລະກິດການທ່ອງທ່ຽວຂອງໜ່ວຍງານຄຸ້ມຄອງການທ່ອງທ່ຽວເມືອງວັງວຽງ, ແຂວງວຽງຈັນ.

3. ການຂາຍຜະລິດຕະພັນແປຮູບ ຢູ່ເມືອງວັງວຽງ.

4. ພຶດຕິກໍາການຂາຍສິນຄ້າໃນຕະຫຼາດກາງຄືນໃຫ້ນັກທ່ອງທ່ຽວເຂດເມືອງວັງວຽງ.

ໂດຍແຕ່ລະກຸ່ມໄດ້ແບ່ງກັນລົງສໍາພາດ, ຕາມແຕ່ລະຈຸດ ແລະ ເກັບກໍາຂໍ້ມູນຕາມຈຸດປະສົງທີ່ສອດຄ່ອງກັບຫົວຂໍ້ເພື່ອນໍາຂໍ້ມູນມາວິໄຈຕາມຫຼັກການຄົ້ນຄວ້າທີ່ໄດ້ຝຶກອົບຮົມມາ.

ຂ່າວ: ພວງເພັດ ຈັນທະລີວົງ

ພາບ: ແກ້ວວິວັນ ສີວິໄລ

ກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານ ລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ

ຈໍານວນຜູ້ເຂົ້າຊົມ: 935

ກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານ ລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ

ໃນຕອນເຊົ້າຂອງວັນທີ 9 ກຸມພາ 2024 ທີ່ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ, ໂດຍການເປັນປະທານຂອງ ທ່ານ ປອ ນ. ຂັນລາສີ ແກ້ວບຸນພັນ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຜູ້ຊີ້ນຳວຽກງານຫ້ອງການ ສວສສຊ; ມີຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພາຍໃນ ສວສສຊ ພ້ອມທັງ ພະນັກງານ-ລັດຖະກອນ ສວສສຊ ເຂົ້າຮ່ວມຫຼາຍກວ່າ 50 ທ່ານ; ກອງປະຊຸມດັ່ງກ່າວໄດ້ເຊື້ອເຊີນວິທະຍາກອນ ຈາກກົມເລຂານຸການ-ການນໍາ, ຫ້ອງວ່າການສູນກາງພັກ, ມາບັນຍາຍໃນຫົວຂໍ້: “ການຍົກລະດັບຄຸນນະພາບວຽກງານເລຂານຸການ, ການປະສານງານ ແລະ ການຈໍລະຈອນເອກະສານພາຍໃນ ສວສສຊ”.

ກອງປະຊຸມໄດ້ຮັບຟັງການເຜີຍແຜ່ຂໍ້ກຳນົດ 415/ຄລສພ, ວ່າດ້ວຍເລຂານຸການຂອງການນໍາ ໂດຍ ທ່ານ ສີສູນໄທ ແກ້ວໂພໄຊ, ກຳມະການພັກ, ຫົວໜ້າກົມເລຂານຸການ-ການນຳ, ຫ້ອງວ່າການສູນກາງພັກ; ເຊິ່ງເປັນນິຕິກຳທີ່ສຳຄັນໃນການກຳນົດຫຼັກການ ແລະ ລະບຽບການ ໃນການຄຸ້ມຄອງ, ເປັນການກຳນົດມາດຕະຖານ, ໜ້າທີ່, ຂອບເຂດສິດ, ລະບອບແບບແຜນວິທີເຮັດວຽກ, ຂໍ້ຫ້າມ ແລະ ອື່ນໆ ທັງເປັນການຫັນເອົາວຽກງານເລຂານຸການໃຫ້ເຂົ້າສູ່ລະບຽບການ ແລະ ເຄື່ອນໄຫວຢ່າງມີປະສິດທິພາບ; ນອກນີ້, ກໍເພື່ອເປັນການຍົກລະດັບຄວາມຮັບຮູ້ ຄວາມເຂົ້າໃຈ ໃຫ້ແກ່ພະນັກງານ-ລັດຖະກອນ ທົ່ວ ສວສສຊ ເຫັນໄດ້ເຖິງພາລະບົດບາດ ແລະ ຄວາມສຳຄັນ ຂອງວຽກງານເລຂານຸການ ໃນການຄົ້ນຄວ້າ-ສັງລວມ, ບັນນາທິການ, ປະສານງານ, ສ້າງແຜນການເຄື່ອນໄຫວແຕ່ລະໄລຍະ ແລະ ອໍານວຍຄວາມສະດວກຮອບດ້ານໃຫ້ແກ່ການນຳ ເວົ້າລວມ, ເວົ້າສະເພາະກໍ ເພື່ອເປັນການສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ຜູ້ທີ່ເຮັດວຽກງານເປັນເສນາທິການ ໃນຂັ້ນຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ໃຫ້ສາມາດປະຕິບັດໜ້າທີ່ວຽກງານຂອງຕົນຖືກຕ້ອງຕາມແນວທາງນະໂຍບາຍຂອງພັກ-ລັດ ແລະ ຮັບປະກັນໃຫ້ແກ່ວຽກງານການປະສານງານລະຫວ່າງຂັ້ນລຸ່ມກັບຂັ້ນເທິງໃຫ້ຖືກຕ້ອງ ສອດຄ່ອງ ແລະ ເປັນເອກະພາບກັນ.

ໃນໂອກາດດັ່ງກ່າວ ທ່ານ ປອ ນ. ຂັນລາສີ ແກ້ວບຸນພັນ, ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງບາງຕອນທ່ານໄດ້ເນັ້ນວ່າ “ເລຂານຸການ-ການນຳ ເຮັດວຽກຕິດພັນກັບຫຼາຍພາກສ່ວນ, ຫຼາຍຂັ້ນ ຫຼາຍລະດັບ ໃນຂອດການປະສານ” ສະນັ້ນ, ວຽກງານເລຂານຸການ ເປັນວຽກງານໜຶ່ງທີ່ສໍາຄັນ ຮັບໃຊ້ອຳນວຍຄວາມສະດວກໃຫ້ແກ່ການປະຕິບັດໜ້າທີ່ວຽກງານຂອງການຈັດຕັ້ງທຸກຂັ້ນ ຈິ່ງຕ້ອງໄດ້ມີການຝຶກຝົນ ແລະ ພັດທະນາຕົວເອງຂຶ້ນໄປເລື້ອຍໆ ນອກຈາກນັ້ນ, ເພີ່ນຍັງໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມ ຈົ່ງພ້ອມກັນຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ເພື່ອປັບປຸງ ແລະ ຍົກລະດັບວຽກງານດັງກ່າວໃຫ້ມີປະສິດທິພາບດີຂຶ້ນກວ່າເກົ່າ.

ຂ່າວ: ເພັດສົມພອນ ທຳມະວົງ

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ຈັດພິທີຮັບສະມາຊິກພັກໃໝ່

ຈໍານວນຜູ້ເຂົ້າຊົມ: 811

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ຈັດພິທີຮັບສະມາຊິກພັກໃໝ່

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ຈັດພິຮັບສະມາຊິກພັກໃໝ່ ຈໍານວນ 4 ສະຫາຍ. ໃນຕອນເຊົ້າຂອງວັນທີ 26 ມັງກອນ 2024 ທີ່ຫ້ອງປະຊຸມໃຫຍ່ ສວສສຊ; ເຂົ້າຮ່ວມໃນພິທີມີ ສະຫາຍ ປອ. ນ. ອໍາໄພວັນ ຄໍາແສງສີວິໄລ ຄະນະປະຈໍາພັກ, ປະທານກວດກາພັກ, ຮອງປະທານ ສວສສຊ; ມີ ສະຫາຍ ປອ. ທະນົງສອນ ສີບຸນເຮືອງ ເລຂາໜ່ວຍພັກ ວ່າການຫົວໜ້າ ສຂຝ ເປັນປະທານຮ່ວມ, ມີກໍາມະການໜ່ວຍພັກ, ຕາງໜ້າໜ່ວຍພັກອ້ອມຂ້າງ ສວສສຊ, 3 ອົງການຈັດຕັ້ງມະຫາຊົນ, ສະມາຊິກພັກ ສຂຝ ເຂົ້າຮ່ວມທັງໝົດ 29 ສະຫາຍ; ໃນພິທີມີ 1 ສະຫາຍ ເລື່ອນຈາກສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ແລະ 3 ສະຫາຍ ຈາກມະຫາຊົນກ້າວໜ້າຮັບເປັນສະມາຊິກພັກສໍາຮອງ;

ໃນພິທີ ສະຫາຍ ປອ. ນ. ອໍາໄພວັນ ຄໍາແສງສີວິໄລ ໄດ້ມີຄໍາເຫັນໂອ້ລົມຕໍ່ສະມາຊິກພັກໃໝ່ ໂດຍໄດ້ກ່າວ ສະແດງຄວາມຊົມເຊີຍຕໍ່ບັນດາສະມາຊິກພັກໃໝ່ ແລະ ຮູ້ສຶກພາກພູມໃຈ ທີ່ໜ່ວຍພັກ ສຂຝ ໄດ້ເອົາໃຈໃສ່ກໍ່ສ້າງບັນດາ 4 ສະຫາຍ ຈົນກ້າວເຂົ້າສູ່ສະມາຊິກພັກ ແລະ ໃຫ້ບັນດາສະຫາຍທີ່ໄດ້ຮັບຄວາມໃວ້ວາງໃຈຈາກຄະນະໜ່ວຍພັກຂອງສູນ, ສະຫາຍ ໄດ້ຮຽກຮ້ອງໃຫ້ບັນດາສະຫາຍສະມາຊິກພັກໃໝ່ ເອົາໃຈໃສ່ຮໍ່າຮຽນເຊື່ອມຊຶມ, ກໍາແໜ້ນກົດລະບຽບຂອງພັກ, ເປັນແບບຢ່າງໃຫ້ແກ່ມະຫາຊົນ ໃຫ້ສົມກັບຄວາມໃວ້ເນື້ອເຊື່ອໃຈຈາກຄະນະໜ່ວຍພັກ; ໃນນັ້ນໃຫ້ກໍາໄດ້ 5 ຫຼັກການ 3 ທິດນໍາຂອງພັກ ແລະ ຕັ້ງໜ້າເອົາໃຈໃສ່ວຽກວິຊາສະເພາະໃຫ້ມີຄວາມກ້າວໜ້າຂຶ້ນເລື້ອຍໆ ນອກນີ້ເພິ່ນຍັງໄດ້ເນັ້ນໃຫ້ຄະນະໜ່ວຍພັກພ້ອມທັງສະມາຊິກພັກທັງໝົດ ສືບຕໍ່ກໍ່ສ້າງໃຫ້ເຂົາເຈົ້າກາຍເປັນສະມາຊິກພັກທີ່ດີເດັ່ນ ເພື່ອປະກອບເຂົ້າໃນໜ່ວຍພັກແຂງ, ປອດໃສ, ໜັກແໜ້ນ ໃນຕໍ່ໜ້າ.

ໃນພິທີຕາງໜ້າສະມາຊິກພັກໃໝ່ໄດ້ຂຶ້ນຮັບຄໍາໂອວາດໂດຍມີ 5 ຄໍາປະຕິຍານດັ່ງນີ້:

1. ພວກເຮົາມີຄວາມສະໝັກໃຈຢ່າງສົມບູນ ເຂົ້າເປັນສະມາຊິກພັກປະຊາຊົນປະຕິວັດລາວ.

2. ຈະປົກປັກຮັກສາ ແລະ ປະຕິບັດແນວທາງ, ແຜນນະໂຍບາຍຂອງພັກ, ເຄົາລົບກົດລະບຽບພັກ, ກົດໝາຍ ແລະ ລະບຽບການຂອງລັດ.

3. ຈະປະຕິບັດໜ້າທີ່, ສິດ ແລະ ຂໍ້ຫ້າມຂອງສະມາຊິກພັກ ຢ່າງເຂັ້ມງວດ.

4. ຈະຮັກສາຄວາມລັບຂອງພັກ, ຂອງຊາດ, ຈົງຮັກພັກດີຕໍ່ພັກ ແລະ ປະຊາຊົນ.

5. ພວກເຮົາກຽມພ້ອມເສຍສະຫຼະທຸກຢ່າງ ເພື່ອພັກ, ປະຊາຊາດ ແລະ ປະຊາຊົນ.

ຂ່າວ: ແກ້ວວິວັນ ສີວິໄລ

ພາບ: ພວງເພັດ ຈັນທະລີວົງ

ສູນຂໍ້ມູນຂ່າວສານ ແລະ ຝຶກອົບຮົມເປີດຊຸດຝຶກອົບຮົມເຕັກນິກການຂຽນຂ່າວ

ຈໍານວນຜູ້ເຂົ້າຊົມ: 725

ສູນຂໍ້ມູນຂ່າວສານ ແລະ ຝຶກອົບຮົມ ເປີດຊຸດຝຶກອົບຮົມ "ເຕັກນິກການຂຽນຂ່າວ"

ໃນລະຫວ່າງວັນທີ 24-25 ມັງກອນ 2024 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສູນຂໍ້ມູນຂ່າວສານ ແລະ ຝຶກອົບຮົມ ໄດ້ເປີດຊຸດຝຶກອົບຮົມພາຍໃຕ້ຫົວຂໍ້: ເຕັກນິກການຂຽນຂ່າວ ແລະ ບັນນາທິການຂ່າວ, ມີຜູ້ເຂົ້າຮ່ວມທັງໝົດ 41 ທ່ານ ມາຈາກ 11 ພາກສ່ວນອ້ອມຂ້າງ ສວສສຊ; ໃຫ້ກຽດກ່າວເປີດພິທີໂດຍ ທ່ານ ປອ. ນາງ ອໍາໄພວັນ ຄໍາແສງສີວິໄລ ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.

ການຝຶກອົບຮົມໃນຄັ້ງນີ້ໄດ້ເຊື້ອເຊີນ ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ, ຫົວໜ້າບັນນາທິການໃຫຍ່ ໜັງສືພິມປະຊາຊົນມາຂຶ້ນບັນຍາຍ; ເຊິ່ງທ່ານໄດ້ນໍາສະເໜີທັງພາກທິດສະດີ ແລະ ນໍາພາປະຕິບັດຕົວຈິງໄປນໍາ: ພາກທິດສະດີທ່ານໄດ້ອະທິບາຍກ່ຽວກັບ 5W+1H ເຊິ່ງເປັນອົງປະກອບຫຼັກໃນການຂຽນຂ່າວ ພ້ອມທັງແນະນໍາວິທີການເກັບກໍາຂໍ້ມູນ, ວິທີສໍາພາດ ແລະ ການບັນນາທິການຂ່າວ; ເຮັດໃຫ້ການຝຶກອົບຮົມເຕັມໄປດ້ວຍບັນຍາກາດທີ່ດີ; ຜ່ານມາເຖິງວ່າສູນຈະເຄີຍຈັດຝຶກອົບຮົມມາແລ້ວແຕ່ປີ 2017 ກ່ຽວກັບວຽກງານດັ່ງກ່າວ; ແຕ່ໃນຄັ້ງນີ້ຖືວ່າພິເສດມີໂດດເດັ່ນພໍສົມຄວນ ເພາະໄດ້ຮຽນນໍາ ອາຈານ ທີ່ມີຄວາມຮູ້ສະເພາະດ້ານ, ເຮັດໃຫ້ພວກເຮົາໄດ້ບົດຮຽນອັນໃໝ່ ແລະ ຜູ້ເຂົ້າຮ່ວມໃຫ້ຄວາມສົນໃຈ; ມີການແລກປ່ຽນຄວາມຄິດເຫັນຢ່າງກົງໄປກົງມາ ແລະ ສະແດງຄວາມສາມາດຂຽນຂ່າວຕົວຈິງໂດຍຜ່ານກິດຈະກໍາພາຍໃນຫ້ອງຝຶກອົບຮົມອີກດ້ວຍ.

ໃນໂອກາດດັ່ງກ່າວ ທ່ານ ປອ. ນ. ອໍາໄພວັນ ຄໍາແສງສີວິໄລ ໄດ້ເນັ້ນເຖິງວຽກງານຂຽນຂ່າວ ແລະ ບັນນາທິການຂ່າວ ເປັນວຽກໜຶ່ງທີ່ສໍາຄັນຕໍ່ບຸກຄົນ, ຕໍ່ສັງຄົມກໍ່ຄືປະເທດຊາດ ເຮັດໃຫ້ພວກເຮົາຮູ້ທັນເຫດການທີ່ເກີດຂຶ້ນຢ່າງວ່ອງໄວເວົ້າລວມ, ເວົ້າສະເພາະກໍ່ຄືວຽກສູນຂໍ້ມູນຂ່າວສານ ແລະ ຝຶກອົບຮົມ, ທີ່ມີພາລະບົດບາດເກັບກໍາຂໍ້ມູນຂ່າວສານການເຄື່ອນໄຫວ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ເພື່ອເຜີຍແຜ່ລົງເວັບໄຊ ແລະ ໜັງສີພິມຕ່າງໆ; ນອກນີ້ຍັງຕ້ອງການໃຫ້ 11 ພາກສ່ວນອ້ອມຂ້າງ ສວສສຊ ຂຽນຂ່າວການເຄື່ອນໄຫວຂອງພາກສ່ວນຕົນ ເພື່ອສົ່ງມາໃຫ້ທາງສູນ ເຜີຍແຜ່ລົງເວັບໄຊ ສວສສຊ ແລະ ເພື່ອໃຫ້ການຂຽນຂ່າວມີຄວາມເປັນເອກະພາບຖືກຕ້ອງຕາມຫຼັກການ ຈຶ່ງຮຽກຮ້ອງໃຫ້ບັນດາຜູ້ເຂົ້າຮ່ວມທັງໝົດ ຈົ່ງພ້ອມກັນເອົາໃຈໃສ່ ຄົ້ນຄວ້າປະກອບຄໍາຄິດ-ຄໍາເຫັນ, ເພື່ອໃຫ້ການຝຶກອົບຮົມຂອງພວກເຮົາໃນຄັ້ງນີ້ ໄດ້ຮັບໝາກຜົນທີ່ດີ, ສາມາດນໍາໄປໝູນໃຊ້ໃຫ້ປະກົດຜົນເປັນຈິງຢ່າງມີຄຸນນະພາບ.

ຂ່າວ: ພວງເພັດ ຈັນທະລີວົງ

ພາບ: ວິໄຈ ເດດວົງສອນ

ພິທີເປີດຊຸດຝຶກອົບຮົມຫຼັກການຄົ້ນຄວ້າ ແລະ ວິທີເກັບກຳຂໍ້ມູນຢູ່ພາກສະໜາມ

ຈໍານວນຜູ້ເຂົ້າຊົມ: 622

ພິທີເປີດຊຸດຝຶກອົບຮົມ ຫຼັກການຄົ້ນຄວ້າ ແລະ ວິທີເກັບກຳຂໍ້ມູນຢູ່ພາກສະໜາມ

ໃນວັນທີ 23 ມັງກອນ 2024 ສູນຂໍ້ມູນຂ່າວສານ ແລະ ຝຶກອົບຮົມ ໄດ້ເປີດຊຸດຝຶກອົບຮົມໃນຫົວຂໍ້: ຫຼັກການຄົ້ນຄວ້າ ແລະ ວິທີເກັບກໍາຂໍ້ມູນຢູ່ພາກສະໜາມ; ໂດຍການກ່າວເປີດຂອງ ທ່ານ ປອ. ທະນົງສອນ ສີບຸນເຮືອງ ວ່າການຫົວໜ້າ ສຂຝ; ມີນັກຄົ້ນຄວ້າຈາກພາກສ່ວນອ້ອມຂ້າງ ສວສສຊ ແລະ ນັກຄົ້ນຄວ້າພາຍໃນສູນ ເຂົ້າຮ່ວມທັງໝົດ 40 ທ່ານ;

ທ່ານ ປອ. ທະນົງສອນ ສີບຸນເຮືອງມີຄໍາເຫັນວ່າ: ການຝຶກອົບຮົມໃນຄັ້ງນີ້ ຜູ້ເຂົ້າຮ່ວມສ່ວນຫຼາຍລ້ວນແລ້ວແຕ່ໄດ້ຜ່ານການຄົ້ນຄວ້າ, ມີປະສົບການເຂົ້າຮ່ວມໂຄງການຕ່າງໆ ຂອງ ສວສສຊ ແລະ ຜ່ານການສຶກສາຫຼັກການໃນການຄົ້ນຄວ້າມາຈາກມະຫາວິທະຍາໄລແລ້ວ ເຖິງຢ່າງໄດກໍ່ຕາມ ຈຸດປະສົງໃນການຝຶກອົບຮົມໃນຄັ້ງນີ້ແມ່ນເພື່ອຍົກລະດັບນັກຄົ້ນຄວ້າ ສວສສຊ ໃຫ້ກໍາແໜ້ນຕື່ມໃນວິທີການລົງເກັບກໍາຂໍ້ມູນຢູ່ພາກສະໜາມມາວິເຄາະ-ວິໄຈ ໃຫ້ກົງກັບຈຸດປະສົງ ແລະ ເປົ້າໝາຍໃນການຄົ້ນຄວ້າ ຜ່ານມາເຫັນວ່າການລົງເກັບກໍາຂໍ້ມູນຕົວຈິງ ຍັງບໍ່ທັນຄ່ອງຕົວ, ການຕັ້ງຄໍາຖາມເພື່ອເອົາຂໍ້ມູນຍັງບໍ່ເຈາະຈິ້ມຮັດກຸມ ດັ່ງນັ້ນ ຈຶ່ງຮຽກຮ້ອງມາຍັງຜູ້ເຂົ້າຮ່ວມທັງໝົດ ຈົ່ງເອົາໃຈໃສ່, ຍາດແຍ່ງເອົາຄວາມຮູ້ຈາກວິທະຍາກອນ ເພື່ອຈະນໍາເອົາຄວາມຮູ້ໃນການຝຶກອົບຮົມຄັ້ງນີ້ ໄປໝູນໃຊ້ເຂົ້າໃນວຽກງານຄົ້ນຄວ້າ ໃຫ້ມີປະສິດທິພາບສູງຂຶ້ນ;

ທ່ານ ຮສ. ປທ. ນ. ຄໍາຜຸຍ ພົນລືຊາ ອາຈານ ປະຈໍາພາກວິຊາພາສາ-ວັດທະນະທໍາລາວ ຄະນະອັກສອນສາດ ມະຫາວິທະຍາໄລແຫ່ງຊາດ ໃຫ້ກຽດເປັນວິທະຍານິກອນ, ໂດຍທ່ານໄດ້ນໍາສະເໜີເນື້ອໃນ 2 ພາກສໍາຄັນຄື: ພາກທິດສະດີການເກັບກໍາຂໍ້ມູນພາກສະໜາມ ແລະ ຕົວຢ່າງການສ້າງແບບຟອມເກັບກໍາຂໍ້ມູນ ເຊິ່ງການເກັບກໍາຂໍ້ມູນໃນເບື້ອງຕົ້ນ, ເນື່ອງຈາກຂໍ້ມູນພາກສະໜາມໃນການຄົ້ນຄວ້າມີຫຼາຍປະເພດ ດັ່ງນັ້ນຜູ້ສຶກສາຄວນມີເກນໃນການເລືອກຂໍ້ມູນ ເຊິ່ງເກນໃນການເລືອກຂໍ້ມູນ ພາກສະໜາມມີ 4 ຂໍ້ຄື: 1. ເລືອກສຶກສາຂໍ້ມູນທີ່ຜູ້ສຶກສາສົນໃຈ. ການສຶກສາຂໍ້ມູນທີ່ຕົນສົນໃຈຈະເຮັດໃຫ້ການສຶກສາເປັນໄປດ້ວຍຄວາມສຸກ, ມີຄວາມກະຕືລືລົ້ນໃນການສຶກສາຫາຄວາມຮູ້ຈາກຖານຂໍ້ມູນ ແລະ ແລກປ່ຽນຄວາມຮູ້ປະສົບການເຊິ່ງກັນ ແລະ ກັນລະຫວ່າງຜູ້ໃຫ້ຂໍ້ມູນ ກັບຜູ້ສຶກສາຂໍ້ມູນ. 2. ການເລືອກສຶກສາຂໍ້ມູນທີ່ຜູ້ສຶກສາມີຄວາມຖະໜັດ ຈະເຮັດໃຫ້ເຂົ້າໃຈງ່າຍເຊັ່ນ: ຖ້າມີຄວາມສາມາດຂັບລໍາ ກໍ່ຄວນສຶກສາກອນຂັບລໍາ ເພື່ອຈະໄດ້ອະທິບາຍຂໍ້ມູນໄດ້ລະອຽດ ແລ້ວນໍາຂໍ້ມູນອອກມາເຜີຍແຜ່ໃຫ້ເກີດປະໂຫຍດແກ່ສັງຄົມ. 3. ເລືອກສຶກສາຂໍ້ມູນທີ່ສາມາດຫາຜູ້ໃຫ້ຂໍ້ມູນທີ່ດີ, ການສຶກສາຂໍ້ມູນພາກສະໜາມ ຄວນຫາຜູ້ທີ່ໃຫ້ຂໍ້ມູນຊັດເຈນໃນເລື່ອງທີ່ເຮົາສົນໃຈ ຫຼືແມ່ນແຕ່ເລື່ອງນັ້ນເຮົາບໍ່ຖະໜັດ, ແຕ່ຜູ້ໃຫ້ຂໍ້ມູນຊັດເຈນລະອຽດເຮົາກໍ່ຄວນສຶກສາ ແລ້ວນໍາເອົາຜົນຂອງການສຶກສາມານໍາສະເໜີ ແລະ ເຜີຍແຜ່ໃຫ້ຜູ້ທີ່ສົນໃຈໄປສຶກສາຕໍ່. 4. ເລືອກຂໍ້ມູນທີ່ມີຜູ້ສຶກສາໜ້ອຍ ເພາະຢູ່ຕ່າງປະເທດຂໍ້ມູນໄດ້ມີການສຶກສາແລ້ວ. ດັ່ງນັ້ນ ການເລືອກຫົວຂໍ້ທີ່ມີຜູ້ສຶກສາໜ້ອຍກໍ່ມີບົດບາດສໍາຄັນ. ສໍາລັບປະເທດລາວຍັງອຸດົມສົມບູນ ເພາະມີຜູ້ສຶກສາຄົ້ນຄວ້າໜ້ອຍ.

ພາບ-ຂ່າວ: ພວງເພັດ ຈັນທະລີວົງ

ສວສສຊ ຕ້ອນຮັບຄະນະຜູ້ແທນຈາກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ.

ຈໍານວນຜູ້ເຂົ້າຊົມ: 989

ສວສສຊ ຕ້ອນຮັບຄະນະຜູ້ແທນຈາກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ

ເພື່ອເປັນການສືບຕໍ່ແລກປ່ຽນຮ່ວມມືລະຫວ່າງ 2 ສະຖາບັນ ຈີນ-ລາວ ແລະ ເປັນການລິເລີ່ມ ຊຸກຍູ້ການສ້າງສູນຄົ້ນຄວ້າການຮ່ວມມືໃນແຜນແມ່ບົດ ວ່າດ້ວຍການສ້າງຄູ່ຮ່ວມຊະຕາກໍາຈີນ-ລາວ ຂອງພັກກອມມູນິດຈີນ ແລະ ພັກປະຊາຊົນປະຕິວັດລາວ; ໃນວັນທີ 24 ມັງກອນ 2024 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບຄະນະຜູ້ແທນສູນຄົ້ນຄວ້າການຮ່ວມມືຄູ່ຮ່ວມຊະຕາກໍາ ຈີນ-ລາວ, ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ. ຈີນ ທີ່ໄດ້ເດີນທາງມາສືບຕໍ່ວຽກງານຕາມແຜນ; ໂດຍໄດ້ຮັບການຕ້ອນຮັບຈາກ ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ ພ້ອມດ້ວຍຄະນະ; ຝ່າຍຈີນນໍາພາໂດຍ ທ່ານ Li Maoguo, ຮອງເລຂາຄະນະພັກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ ພ້ອມດ້ວຍຄະນະ;

ທ່ານ ປອ. ນ. ຂັນລາສີ ແກ້ວບຸນພັນ ໄດ້ກ່າວສະແດງຄວາມຍິນດີຕ້ອນຮັບຄະນະດັ່ງກ່າວ ທີ່ໄດ້ເດີນທາງມາຢ້ຽມຢາມແລກປ່ຽນບົດຮຽນ ຢູ່ ສປປ ລາວ; ຕາງໜ້າຝ່າຍຈີນກໍ່ສະແດງຄວາມຂອບໃຈ ແລະ ຮູ້ສຶກດີໃຈທີ່ໄດ້ຮັບການຕ້ອນຮັບຢ່າງອົບອຸ່ນຈາກຝ່າຍລາວ; ໃນການພົບປະແລກປ່ຽນທັງສອງ ຝ່າຍໄດ້ປຶກສາຫາລືເຖິງ 4 ບັນຫາສໍາຄັນຄື:

1. ມະຫາວິທະຍາໄລ ແລະ ເສດຖະກິດສາກົນ ສປ ຈີນ ມີຈຸດປະສົງຮ່ວມມື ກັບ ສວສສຊ ເພື່ອສ້າງຕັ້ງສູນຄົ້ນຄວ້າການຮ່ວມມືຄູ່ຮ່ວມຊະຕາກຳ ຈີນ-ລາວ.

2. ການຮ່ວມມືດ້ານການຄົ້ນຄວ້າວິທະຍາສາດ, ດຳເນີນການຄົ້ນຄວ້າກ່ຽວກັບການຮ່ວມມື ຈີນ-ລາວ ໃນຂອບ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ຂຽນບົດຄົ້ນຄວ້າຮ່ວມກັນ ກ່ຽວກັບການພັດທະນະທາງລົດໄຟ ຈີນ-ລາວ, ການອຳນວຍຄວາມສະດວກດ້ານການຄ້າການສົ່ງອອກສິນຄ້າຂອງລາວໄປຈີນ, ການຮ່ວມມືດ້ານກຳລັງການຜະລິດ ແລະ ການຮ່ວມມືດ້ານການລົງທຶນແບບຍືນຍົງ ຈີນ-ລາວ, ການພົວພັນ ຈີນ-ລາວ.

3. ການຮ່ວມມືດ້ານການສຶກສາ, ສະໜັບສະໜູນ ພະນັກງານລັດຖະກອນ ສວສສຊ ເຂົ້າຮຽນຕໍ່ປະລິນຍາໂທ, ປະລິນຍາເອກ ຫຼື ເຂົ້າຮ່ວມໂຄງການຝຶກອົບຮົມ ເພື່ອເປັນການຝຶກອົບຮົມປະກອບສ້າງໃຫ້ແກ່ (ການສ້າງຄູ່ຮ່ວມຊະຕາກຳ ຈີນ-ລາວ).

4. ເພີ່ມທະວີການຢ້ຽມຢາມເຊິ່ງກັນ ແລະ ກັນ ສອງຝ່າຍສົ່ງເສີມນັກຄົ້ນຄວ້າວິທະຍາສາດ ເພື່ອເຂົ້າຮ່ວມກອງປະຊຸມສຳມະນາທາງວິຊາການ ຫຼື ກອງປະຊຸມສາກົນ ເພື່ອເພີ່ມທະວີການແລກປ່ຽນດ້ານວິຊາການ.

ຜ່ານການປຶກສາຫາລືຮ່ວມມືກໍ່ສ້າງສູນຄົ້ນຄວ້າ ການຮ່ວມມືຄູ່ຮ່ວມຊະຕາກໍາຈີນ-ລາວ, ສອງຝ່າຍຈະດໍາເດີນການຮ່ວມມືຢ່າງມີປະສິດທິຜົນ, ເພີ່ມທະວີການກໍ່ສ້າງໜ່ວຍງານຄັງຄວາມຄິດເຫັນຂອງສອງຝ່າຍ, ປະກອບສ່ວນໃຫ້ຄໍາປຶກສາ ແລະ ຄໍາເຫັນ ເຂົ້າໃນການຮ່ວມມືໃນຂົງເຂດສໍາຄັນ, ການເຊື່ອມໂຍງດ້ານນະໂຍບາຍ, ການຮ່ວມມືດ້ານເສດຖະກິດ, ການແລກປ່ຽນດ້ານວັດທະນະທໍາ ແລະ ຂົງເຂດອື່ນໆ ໃນການກໍ່ສ້າງຄູ່ຮ່ວມຊະຕາກໍາຈີນ-ລາວ, ເພື່ອຊຸກຍູ້ການສ້າງປະຊາຄົມຄູ່ຮ່ວມຊະຕາກໍາຈີນ-ລາວ ໃຫ້ປະກົດຜົນເປັນຈິງ.

ຮູບພາບ-ຂ່າວ: ແກ້ວວິວັນ ສີວິໄລ

ບົດປະເມີນສິ່ງແວດລ້ອມແບບຍຸດທະສາດຕໍ່ຍຸດທະສາດເຕີບໂຕສີຂຽວແຫ່ງຊາດຂອງ ສປປ ລາວ ຮອດປີ 2030

ຈໍານວນຜູ້ເຂົ້າຊົມ: 1,999

ບົດປະເມີນສິ່ງແວດລ້ອມແບບຍຸດທະສາດຕໍ່ຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ຮອດປີ 2030

ເຂົ້າເບິ່ງເອກະສານສະບັບເຕັມໄດ້ທີ່ ຖານຂໍ້ມູນຫໍສະໝຸດເອເລັກໂຕຣນິກ

ເຊື່ອມຊຶມຄຳສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ

ຈໍານວນຜູ້ເຂົ້າຊົມ: 1,503

ເຊື່ອມຊຶມຄຳສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ

ໃນວັນທີ 12 ມັງກອນ 2024 ທີ່ຜ່ານມາ; ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໄດ້ຈັດກອງປະຊຸມເຊື່ອມຊຶມ ຄໍາສັ່ງ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ; ພາຍໃຕ້ການເປັນປະທານຂອງ ສະຫາຍ ປອ. ສອນທະນູ ທໍາມະວົງ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ, ມີບັນດາສະຫາຍຄະນະປະຈໍາພັກ, ບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ ແລະ ສະມາຊິກພັກ ພ້ອມທັງພະນັກງານ-ລັດຖະກອນທົ່ວ ສວສສຊ ເຂົ້າຮ່ວມ.

ຫຼັງຈາກກ່າວເປີດພິທີ ປະທານກອງປຊຸມໄດ້ສືບຕໍ່ຜ່ານຄໍາສັ່ງ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023.

ຈຸດປະສົງລະດັບຄາດໝາຍຂອງການຈັດກອງປະຊຸມ ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນການກໍ່ສ້າງພັກຕາມ 5 ຫຼັກການ ແລະ 3 ທິດນໍາຂອງພັກ, ໃຫ້ຖືກຕ້ອງຕາມກົດລະບຽບຂອງພັກ, ເພື່ອກວດກາ, ຕີລາຄາການຜັນຂະຫຍາຍນໍາພາຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ຖືກຕ້ອງຕາມກົດລະບຽບພັກ, ແຜນພັດທະນາເສດຖະກິດສັງຄົມ 5 ປີ ແຫ່ງລັດຄັ້ງທີ IX ແລະ ເພື່ອຄັດເລືອກບຸກຄະລາກອນ ທີ່ມີມາດຕະຖານ, ເງື່ອນໄຂທີ່ກໍານົດໄວ້ ປະກອບເຂົ້າໃນການຈັດຕັ້ງແຕ່ລະຂັ້ນ, ຍູ້ແຮງການເຄື່ອນໄຫວວຽກງານຮອບດ້ານ ໃນທົ່ວອົງຄະນະພັກ ແລະ ການກະກຽມໃຫ້ແກ່ການດໍາເນີນກອງປະຊຸມໃຫຍ່ຂອງພັກໃນແຕ່ລະຂັ້ນ ເປັນຕົ້ນການກະກຽມດ້ານຂະບວນການ, ດ້ານເນື້ອໃນ ແລະ ດ້ານບຸກຄະລາກອນ.

ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ, ສືບຕໍ່ຜ່ານບົດແນະນໍາ ຂອງຄະນະຈັດຕັ້ງສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ເລກທີ 211/ຄຈສພ, ລົງວັນທີ 16 ສິງຫາ 2023 ແລະ ບົດແນະນໍາຂອງຫ້ອງວ່າການສູນກາງພັກກ່ຽວກັບການກະກຽມຮ່າງລາຍງານການເມືອງ ເລກທີ 05/ຫສພ, ລົງວັນທີ 31 ຕຸລາ 2023; ເຊິ່ງມີເນື້ອໃນແນະນໍາຮັບປະກັນໃຫ້ແກ່ການຈັດຕັ້ງປະຕິບັດເນື້ອໃນຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຖືກຕ້ອງ, ເປັນເອກະພາບ ແລະ ທັນເວລາໃນທົ່ວພັກ, ຄະນະຈັດຕັ້ງສູນກາງພັກ ໃຫ້ກະກຽມດ້ານຂະບວນການ,ເນື້ອໃນ ແລະ ການດໍາເນີນຊີວິດການເມືອງ; ການກະກຽມດ້ານຂະບວນການ ແມ່ນໃຫ້ປະຕິບັດຕາມຄໍາແນະນໍາຂອງຄະນະໂຄສະນາອົບຮົມສູນກາງພັກ; ສ່ວນດ້ານເນື້ອໃນ, ຮ່າງລາຍງານການເມືອງຂອງຄະນະບໍລິຫານງານພັກໃນແຕ່ລະຂັ້ນໃຫ້ປະຕິບັດຕາມຄໍາແນະນໍາຂອງຫ້ອງວ່າການສູນກາງພັກ; ຮ່າງແຜນພັດທະນາເສດຖະກິດສັງຄົມ ໃຫ້ປະຕິບັດຕາມຄໍາແນະນໍາຂອງກະຊວງແຜນການ ແລະ ການລົງທຶນ ແລະ ຮ່າງບົດສໍາຫຼວດການນໍາພາລວມ ແລະ ບຸກຄົນໃນຄະນະບໍລິຫານງານພັກແຕ່ລະຂັ້ນປະຕິບັດຕາມຄໍາແນະນໍາຂອງຄະນະກວດກາສູນກາງພັກ; ສ່ວນບົດແນະນໍາເລກທີ 05/ຫສພ, ມີເນື້ອໃນຈຸດປະສົງ ເພື່ອສ້າງຄວາມຮັບຮູ້ໃຫ້ເປັນອກະພາບຕໍ່ບັນຫາຈໍານວນໜຶ່ງກ່ຽວກັບໂຄງສ້າງ ແລະ ເນື້ອໃນຮ່າງລາຍງານການເມືອງ, ເພື່ອເປັນບ່ອນອີງໃຫ້ຄະນະພັກ, ອະນຸກໍາມະການເນື້ອໃນຄົ້ນຄວ້າ ແລະ ໝູນໃຊ້ເຂົ້າໃນການກະກຽມຮ່າງລາຍງານການເມືອງໃຫ້ມີເນື້ອໃນທີ່ໜັກແໜ້ນ ໃນການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນການຊີ້ນໍາ-ນໍາພາຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກ ຄັ້ງລ່າສຸດ ແລະ ກໍານົດທິດທາງ, ຄາດໝາຍ ແລະ ບັນດາວຽກງານຈຸດສຸມ, ມາດຕະການແກ້ໄຂບັນຫາໃນຊຸມປີຕໍ່ໜ້າ, ສືບຕໍ່ຍູ້ແຮງການຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງອົງຄະນະພັກ.

ໃນວາລະຕອນທ້າຍ ສະຫາຍ ປອ. ສອນທະນູ ທໍາມະວົງ ໄດ້ມີຄໍາເຫັນໂອ້ລົມຕໍ່ກອງປະຊຸມໂດຍເພີ່ນໄດ້ເນັ້ນໜັກເຖິງວຽກງານກະກຽມກອງປະຊຸມ 3 ຂັ້ນຂອງພັກ, ໃຫ້ແຕ່ລະໜ່ວຍພັກອ້ອມຂ້າງ ສວສສຊ ເອົາໃຈໃສ່ເປັນເຈົ້າການຮີບຮ້ອນຈັດຕັ້ງເຊື່ອມຊຶມ, ຜັນຂະຫຍາຍເນື້ອໃນກອງປະຊຸມໃຫຍ່ໃຫ້ແທດເໝາະກັບຈຸດພິເສດ ແລະ ເງື່ອນໄຂຕົວຈິງພາຍໃນຂັ້ນຂອງຕົນ, ໃຫ້ທັນຕາມວັນເວລາທີ່ກໍານົດໃວ້ ແລະ ສະຫຼຸບລາຍງານ, ຖອດຖອນບົດຮຽນພ້ອມຈັດຕັ້ງປະຕິບັດໃຫ້ປະກົດຜົນເປັນຈິງ.

ຂ່າວ: ພວງເພັດ ຈັນທະລີວົງ

ພາບ: ແກ້ວວິວັນ ສີວິໄລ

ສູນຂໍ້ມູນຂ່າວສານ ແລະ ຝຶກອົບຮົມ ຈັດກອງປະຊຸມເປີດຂະບວນການແຂ່ງຂັນຮັກຊາດ ແລະ ພັດທະນາ

ຈໍານວນຜູ້ເຂົ້າຊົມ: 748

ສູນຂໍ້ມູນຂ່າວສານ ແລະ ຝຶກອົບຮົມ ຈັດກອງປະຊຸມເປີດຂະບວນການແຂ່ງຂັນຮັກຊາດ ແລະ ພັດທະນາ

ໃນຕອນເຊົ້າຂອງວັນທີ 15 ມັງກອນ 2024 ສູນຂໍ້ມູນຂ່າວສານ ແລະ ຝຶກອົບຮົມ ໄດ້ເປີດຂະບວນການແຂ່ງຂັນຮັກຊາດ ແລະ ພັດທະນາ ໂດຍການເປັນປະທານຂອງ ສະຫາຍ ປອ. ທະນົງສອນ ສີບຸນເຮືອງ ເລຂາໜ່ວຍພັກ, ວ່າການຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ; ມີກໍາມະການພັກ, ສະມາຊິກພັກ, ຫົວໜ້າພະແນກ, ຮອງພະແນກ, 3 ອົງການຈັດຕັ້ງມະຫາຊົນ, ແຂກຖືກເຊີນຈາກບັນດາພາກສ່ວນອ້ອມຂ້າງ ແລະ ພະນັກງານທັງໝົດ ສຂຝ ເຂົ້າຮ່ວມ ຈໍານວນ 26 ສະຫາຍ; ກອງປະຊຸມໄດ້ຮັບຟັງການຜ່ານຂໍ້ຕົກລົງວ່າດ້ວຍການອະນຸມັດເປີດຂະບວນການແຂ່ງຂັນຮັກຊາດ ແລະ ພັດທະນາ; ຜ່ານຂໍ້ຕົກລົງວ່າດ້ວຍການຮັບຮອງເອົາເນື້ອໃນການແຂ່ງຂັນ ຂອງ ສຂຝ ສະບັບເລກທີ 015/ສວສສຊ.ຄຊຂຍ, ລົງວັນທີ 08 ມັງກອນ 2024; ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານຂະບວນການແຂ່ງຂັນຮັກຊາດ ແລະ ພັດທະນາ ໃນໄລຍະຜ່ານມາ ແລະ ທິດທາງຕໍ່ໜ້າຂອງສູນຂໍ້ມູນຂ່າວສານ ແລະ ຝຶກອົບຮົມ; ໄດ້ສະຫຼຸບຕີລາຄາສະພາບການຈັດຕັ້ງປະຕິບັດວຽກງານແຂ່ງຂັນຮັກຊາດ ແລະ ພັດທະນາ ໃນໄລຍະຜ່ານມາ ຂອງສູນຂໍ້ມູນຂ່າວສານ ແລະ ຝຶກອົບຮົມ, ຄະນະໜ່ວຍພັກ, ຄະນະນຳສູນ ໄດ້ເອົາໃຈໃສ່ວຽກງານສຶກສາອົບຮົມການເມືອງ–ແນວຄິດ ດ້ວຍການນຳພາ ແລະ ປຸກລະດົມສະມາຊິກພັກພະນັກງານ–ລັດຖະກອນພາຍໃນສູນ ເຂົ້າຮ່ວມຮັບຟັງການເຜີຍແຜ່ເຊື່ອມຊຶມແນວທາງນະໂຍບາຍ ແລະ ມະຕິ–ຄຳສັ່ງຂອງພັກ, ກົດໝາຍ ແລະ ລະບຽບການຂອງລັດ ໃນແຕ່ລະໄລຍະທີ່ ສວສສຊ ຈັດຂຶ້ນ. ບົນພື້ນຖານນັ້ນ, ກໍຫັນເປັນແຜນການວຽກງານ ໂດຍຕິດພັນກັບພາລະບົດບາດ, ສິດ, ໜ້າທີ່ຂອງຕົນເຖິງວ່າ ການປັບປຸງພາລະບົດບາດ, ກົງຈັກການຈັດ ຕັ້ງ ແລະ ບຸກຄະລາກອນ ຈະມີການແຍກອອກ ແລະ ໂຮມເຂົ້າກັນຫຼາຍຄັ້ງກໍ່ຕາມ, ແຕ່ສູນຂໍ້ມູນຂ່າວສານ ແລະ ຝຶກອົບຮົມ ກໍ່ໄດ້ປະຕິບັດໜ້າທີ່ການເມືອງ ຕາມພາລະບົດບາດຂອງຕົນ ແລະ ຕາມການມອບໝາຍຂອງ ສວສສຊ ດ້ວຍຜົນສຳເລັດ:

1. ພະນັກງານ-ລັດຖະກອນ ຂອງສູນ ໄດ້ຮັບຍ້ອງຍໍຜົນງານດີເດັ່ນໃນການປະຕິບັດວຽກງານ ປະຈຳປີ 2022 ຈາກ ສວສສຊ ມີທັງໝົດ 22 ຄົນ, ຍິງ 11 ຄົນ; ໃນນີ້, ປະເພດ I ມີ 17 ຄົນ, ຍິງ 10 ທ່ານ ແລະ ປະເພດ II ມີ 5 ຄົນ, ຍິງ 1 ທ່ານ.

2. ໜ່ວຍອົງການຈັດຕັ້ງມະຫາຊົນຂອງ ສຂຝ ກໍໄດ້ຮັບການຍ້ອງຍໍຜົນງານດີເດັ່ນ ໃນການປະກອບສ່ວນເຄື່ອນໄຫວວຽກງານຂອງຕົນ ໃນໄລຍະຜ່ານມາ ກໍຄືຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ ຕາມສາຍຕັ້ງຂອງຕົນປະຈຳປີ 2022 ເປັນຕົ້ນ ໜ່ວຍສະຫະພັນແມ່ຍິງ ສຂຝ ໄດ້ຮັບການຍ້ອງຍໍຜົນງານດີເດັ່ນ ໃນການປະກອບສ່ວນເຄື່ອນໄຫວວຽກງານ ໃນໄລຍະຜ່ານມາ ກໍຄືຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈໍາປີ 2022 ມີທັງໝົດ 11 ຄົນ, ໜ່ວຍຊາວໜຸ່ມ ສຂຝ ໄດ້ຮັບການຍ້ອງຍໍຜົນງານດີເດັ່ນໃນການປະກອບສ່ວນເຄື່ອນໄຫວວຽກງານ ໃນກໍຄືຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2022 ແລະ ໄດ້ຮັບຫຼຽນກາລະນຶກ 65 ປີ ມີທັງໝົດ 17 ຄົນ, ຍິງ 6 ຄົນ.

ສ່ວນຂໍ້ຄົງຄ້າງແມ່ນການປັບປຸງພາລະບົດບາດ, ກົງຈັກການຈັດຕັ້ງ ແລະ ບຸກຄະລາກອນ, ມີການແຍກອອກ ແລະ ໂຮມເຂົ້າກັນຫຼາຍຄັ້ງ ເຮັດໃຫ້ພະນັກງານ–ລັດຖະກອນຈຳນວນໜຶ່ງບໍ່ອຸ່ນອ່ຽນທຸ່ນທ່ຽງຕໍ່ໜ້າທີ່ວຽກງານ, ຄວາມເປັນເຈົ້າການຕໍ່ ໜ້າທີ່ຮັບຜິດຊອບບໍ່ທັນສູງ, ບໍ່ທັນສຸມສະຕິປັນຍາເຂົ້າໃສ່ວຽກງານທີ່ຖືກມອບໝາຍ, ບັນຍາ ກາດ ແລະ ຂະບວນການຈັດຕັ້ງປະຕິບັດໜ້າທີ່ວຽກງານຍັງບໍ່ຟົດຟື້ນເທົ່າທີ່ຄວນ; ການຝຶກຝົນຫຼໍ່ຫຼອມທາງດ້ານການເມືອງ-ແນວຄິດ, ຄວາມດຸໝັ່ນຫ້າວຫັນ, ຈິດໃຈບຸກບືນຂອງພະນັກງານ-ລັດຖະກອນບາງສະຫາຍຍັງບໍ່ທັນສູງ ແລະ ເອົາຈິງເອົາຈັງເທື່ອ; ທັດສະນະຫຼັກໝັ້ນຊົນຊັ້ນ, ແບບແຜນດຳລົງຊີວິດ, ມານະຈິດມີປະກົດການຫຼຸດໜ້ອຍຖອຍລົງ, ມີພະນັກງານ-ສະເໜີລາອອກການສ້າງເສດຖະກິດຄອບຄົວ; ຂະບວນການປະເມີນຜົນງານພະນັກງານ-ລັດຖະກອນ ໃນໄລຍະ 5 ປີ ແລະ 10 ປີ ທີ່ຜ່ານມາ ບໍ່ໄດ້ຮັບການຈັດຕັ້ງປະຕິບັດ, ເຮັດໃຫ້ພະນັກງານ-ລັດຖະກອນ ບໍ່ມີໂອກາດໄດ້ຮັບຍ້ອງຍໍຜົນງານຈາກລັດຖະບານ.

ຜ່ານການດໍາເນີນກອງປະຊຸມ ໃນວາລະຕອນທ້າຍ ປະທານກອງປະຊຸມໄດ້ມີຄໍາເຫັນໂອ້ລົມວ່າ: ເພື່ອເປັນການຜັນຂະຫຍາຍວຽກງານຂະບວນການແຂ່ງຂັນຮັກຊາດ ແລະ ພັດທະນາຂອງ ສູນຂໍ້ມູນຂ່າວສານ ແລະ ຝຶກອົບຮົມ ແລະ ທັງເປັນການຊຸກຍູ້ໃຫ້ຂະບວນການດັ່ງກ່າວໄດ້ຮັບການຈັດຕັ້ງປະຕິບັດໃຫ້ປະກົດຜົນເປັນຈິງ ແລະ ເພື່ອສືບຕໍ່ແຜນການແຂ່ງຂັນຮັກຊາດ ແລະ ພັດທະນາຂອງສູນແຕ່ນີ້ຮອດ 2025, ໂດຍສະເພາະແມ່ນສູ້ຊົນຈັດຕັ້ງປະຕິບັດບັນດາຄາດໝາຍກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກ ສວສສຊ ແລະ ແຜນພັດທະນາຄົ້ນຄວ້າ 5 ປີ ຄັ້ງທີ I ຂອງ ສວສສຊ ກໍ່ຄືບັນດາຄາດໝາຍຂອງກອງປະຊຸມໃຫຍ່ ຄັ້ງທີ I ຂອງສູນໄດ້ວາງອອກໃຫ້ປະກົດຜົນເປັນຈິງ ທັງເປັນການຜັນຂະຫຍາຍຂະບວນການແຂ່ງຂັນຮັກຊາດ ແລະ ພັດທະນາຂອງ ສວສສຊ ໃຫ້ເປັນອັນລະອຽດຂອງສູນ ພວກເຮົາຕ້ອງໄດ້ເອົາໃຈໃສ່ຢ່າງເລິກເຊິ່ງເຖິງຖອງ ເຊິ່ງການຈັດກອງປະຊຸມໃນຄັ້ງນີ້ເປັນບາດກ້າວທີ່ສໍາຄັນທີ່ສຸດ ຖືເປັນການເປີດບັ້ນແຂ່ງຂັນ ຕາມການຈັດຕັ້ງວາງອອກ ແລະ ບັນດາຫົວໜ້າພະແນກທັງ 5 ພະແນກພາຍໃນສູນກໍ່ໄດ້ຂຶ້ນຈັບມືດ້ວຍຄວາມຫ້າວຫັນ ພ້ອມທີ່ຈະຈັດຕັ້ງປະຕິບັດໃຫ້ປະກົດຜົນເປັນຈິງ.

ຂ່າວ: ພວງເພັດ ຈັນທະລີວົງ

ພາບ: ວັນສະເຫຼີມ ລັດຕະນະ

ປາຖະກະຖາວັນຊາດທີ 2 ທັນວາ ຄົບຮອບ 48 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ແລະ ສະຫຼຸບວຽກງານ 3 ອົງການຈັດຕັ້ງມະຫາຊົນ ປະຈຳປີ 2023 ແລະ ທິດທາງແຜນການປີ 2024

ຈໍານວນຜູ້ເຂົ້າຊົມ: 1,122

ປາຖະກະຖາວັນຊາດທີ 2 ທັນວາ ຄົບຮອບ 48 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ແລະ ສະຫຼຸບວຽກງານ 3 ອົງການຈັດຕັ້ງມະຫາຊົນ ປະຈຳປີ 2023 ແລະ ທິດທາງແຜນການປີ 2024

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ໄດ້ຈັດປາຖະກະຖາວັນຊາດທີ 2 ທັນວາ ຄົບຮອບ 48 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ແລະ ສະຫຼຸບວຽກງານ 3 ອົງການຈັດຕັ້ງມະຫາຊົນ ປະຈໍາປີ 2023 ແລະ ທິດທາງແຜນການປີ 2024; ໃນວັນທີ 26 ທັນວາ 2023 ທີ່ຫ້ອງປະຊຸມໃຫຍ່ ສວສສຊ. ພາຍໃຕ້ການເປັນປະທານຮ່ວມຂອງ ສະຫາຍ ປອ. ກິແກ້ວ ຈັນທະບູລີ, ຮອງເລຂາຄະນະພັກ ຮອງປະທານ ສວສສຊ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ ແລະ ສະຫາຍ ປອ. ນາງ ອໍາໄພວັນ ຄໍາແສງສີວິໄລ ຄະນະປະຈໍາພັກ, ປະທານກວດກາ, ຮອງປະທານ ສວສສຊ , ໂດຍມີບັນດາສະຫາຍເລຂາໜ່ວຍພັກ, ບັນດາສະຫາຍຄະນະບໍລິຫານງານ ຂອງ 3 ອົງການຈັດຕັ້ງມະຫາຊົນ, ບັນດາຫົວໜ້າກົມ, ຫ້ອງການ, ສະຖາບັນຄົ້ນຄວ້າ ແລະ ສູນ ພ້ອມພະນັກງານລັດຖະກອນພາຍໃນ ສວສສຊ ເຂົ້າຮ່ວມຢ່າງພ້ອມພຽງ.

ໃນວາລະທີ 1: ສະຫາຍ ປອ. ນາງ ອໍາໄພວັນ ຄໍາແສງສີວິໄລ ໄດ້ໃຫ້ກຽດປະຖະກະຖາ ວັນຊາດທີ 2 ທັນວາ ຄົບຮອບ 48 ປີ ຊຶ່ງເພີ່ນໄດ້ຍົກໃຫ້ເຫັນມູນເຊື້ອ ແລະ ຄວາມໝາຍສໍາຄັນຂອງວັນຊາດ, ບັນດາເຫດການ ແລະ ໄຊຊະນະອັນຍິ່ງໃຫຍ່ຂອງກອງທັບ ແລະ ປະຊາຊົນລາວ ໃນຂະບວນຕໍ່ສູ້ກູ້ຊາດ, ຜົນສໍາເລັດຂອງການປະຕິບັດ 2 ໜ້າທີ່ຍຸດທະສາດ, ສືບຕໍ່ເສີມຂະຫຍາຍມູນເຊື້ອວັນຊາດທີ 2 ທັນວາ ເຂົ້າໃນການພັດທະນາປະເທດຊາດ; ວັນຊາດທີ 2 ທັນວາ 1975 ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດຂອງຊາດລາວເຮົາ, ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ທັງເປັນວັນແຫ່ງການກ້າວສູ່ຍຸກສະ ໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ. ນອກນັ້ນ, ຍັງໄດ້ສືບຕໍ່ປາຖະກະຖາ ວັນເກີດ ຂອງປະທານ ໄກສອນ ພົມວິຫານ ຄົບຮອບ 103 ປີ (13 ທັນວາ 1920-13 ທັນວາ 2023), ຊຶ່ງໄດ້ຍົກໃຫ້ເຫັນຊີວິດ ແລະ ການເຄື່ອນໄຫວປະຕິວັດ ຂອງປະທານ ໄກສອນ ພົມວິຫານ, ແບບຢ່າງອັນດີເລີດຂອງເພີ່ນ ເພື່ອນໍາມາເປັນແບບຢ່າງ ແລະ ສືບທອດພາລະກິດຂອງພັກໃນໄລຍະໃໝ່.

ວາລະທີ2: ໃນກອງປະຊຸມໄດ້ຮັບຟັງການຜ່ານບົດສະຫຼຸບປະຈຳປີ 2023 ແລະ ທິດທາງແຜນການ ປີ 2024 ຈາກປະທານກໍາມະບານ, ປະທານສະຫະພັນແມ່ຍິງ ແລະ ຮັກສາການເລຂາຄະນະບໍລິຫານງານຊາວໜຸ່ມ ເຊິ່ງໄດ້ຍົກໃຫ້ເຫັນການຕີລາຄາສະພາບການຈັດຕັ້ງປະຕິບັດວຽກງານໃນ 1 ປີຜ່ານມາ, ບັນດາຜົນສຳເລັດໃນແຕ່ລະດ້ານ, ດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້, ວິທີການແກ້ໄຂ ແລະ ທິດທາງແຜນການໃນການຈັດຕັ້ງປະຕິບັດ ໂດຍລວມ 3 ອົງການຈັດຕັ້ງມະຫາຊົນ ກໍຄືພະນັກງານທົ່ວ ສວສສຊ ຍາມໃດກໍຖືເອົາວຽກວິຊາສະເພາະຕິດພັນກັບວຽກຂະບວນການ ເປັນກົນໄກອັນສໍາຄັນໃນການຈັດຕັ້ງ ແລະ ເຄື່ອນໄຫວວຽກງານ; ພ້ອມດຽວກັນນັ້ນ ຍັງໄດ້ຖືຄວາມສໍາຄັນກ່ຽວກັບວັນສໍາຄັນຂອງຊາດ ມີການຈັດກອງປະຊຸມປາຖະກະຖາເລົ່າມູນເຊື້ອຂອງວັນສໍາຄັນຕ່າງໆ ຕາມການນໍາພາຊີ້ນໍາຂອງຄະນະພັກຢ່າງເປັນປົກກະຕິ; ມີຄວາມສາມັກຄີຈູບຈ້າວຫ້າວຫັ້ນ ຕັ້ງໜ້າພັດທະນາຕົນເອງຢູ່ສະເໝີ ເອົາໃຈໃສ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນນັກຄົ້ນຄວ້າໜຸ່ມເພື່ອເປັນກໍາລັງແຮງຂອງ ສວສສຊ ໃນອານາຄົດ; ສ່ວນທິດທາງແຜນການໃນປີ 2024 ຈະເອົາໃຈໃສ່ລົງເລິກນໍາພາຊີ້ນໍາຢ່າງໃກ້ຊິດ, ເອົາໃຈໃສ່ຄົ້ນຄວ້າຕິດຕາມ ແລະ ແກ້ໄຂບັນຫາວຽກງານຕ່າງໆ ໃຫ້ລຸລ່ວງໄປດ້ວຍດີ, ເຕົ້າໂຮມປຸກລະດົມຄວາມສາມັກຄີພາຍໃນໃຫ້ເປັນປຶກແຜ່ນ, ສ້າງເງື່ອນໄຂສະພາບແວດລ້ອມທີ່ດີໃນການເຄື່ອນໄຫວວຽກງານຂະບວນການ ແລະ ປະຕິບັດນະໂຍບາຍຕໍ່ສະມາຊິກຜູ້ທີ່ມີຜົນງານໃຫ້ໄດ້ທົ່ວເຖິງ; ສິ່ງສໍາຄັນຜູ້ເຂົ້າຮ່ວມໄດ້ເອົາໃຈໃສ່ປະກອບຄໍາຄິດເຫັນຕໍ່ບົດສະຫຼຸບທັງ 3 ວຽກງານເຮັດໃຫ້ມີເນື້ອໃນທີ່ສົມບູນຂຶ້ນຕື່ມ.

ໃນຕອນທ້າຍກອງປະຊຸມ ສະຫາຍ ປອ. ກິແກ້ວ ຈັນທະບູຣີ ໄດ້ສະແດງຄວາມຊົມເຊີຍຕໍ່ຜົນງານທີ່ທັງສາມອົງການຈັດຕັ້ງມະຫາຊົນຍາດມາໄດ້ ແລະ ທັງເນັ້ນໃຫ້ເອົາໃຈໃສ່ໃນການຊີ້ນຳ-ນຳພາຂອງຄະນະບໍລິຫານງານໃນແຕ່ລະຂັ້ນ, ມີຫົວຄິດປະດິດສ້າງໃນການສ້າງຂະບວນການເຄື່ອນໄຫວຕ່າງໆໃຫ້ເປັນຂະບວນຟົດຟື້ນ, ສ້າງຜົນງານໃຫ້ຂອງແຕ່ລະອົງການໃຫ້ປະກົດຜົນເປັນຈິງຕາມຂໍ້ແຂ່ງຂັນ 5 ເປັນເຈົ້າ, 3 ດີ ແລະ 4 ບຸກ, ຄະນະໜ່ວຍພັກກໍຕ້ອງໄດ້ເອົາໃຈໃສ່ຊຸກຍູ້ໃຫ້ແຕ່ລະອົງການໄດ້ເຄື່ອນໄຫວຕາມພາລະບົດບາດຂອງແຕ່ລະອົງການ, ທ່ານຍັງໄດ້ເນັ້ນຕື່ມໃຫ້ເພີ່ມທະວີການສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ ສະມາຊິກທັງສາມອົງການຈັດຕັ້ງໃຫ້ມີຄຸນສົມບັດສິນທຳປະຕິວັດ, ມີຫຼັກໝັ້ນການເມືອງໜັກແໜ້ນ, ມີຄວາມຈົງຮັກພັກດີຕໍ່ປະເທດຊາດ, ມີຄວາມສັດຊື່ບໍລິສຸດ, ມີຄວາມສາມັກຄີ ແລະ ມີແບບແຜນດໍາລົງຊີວິດປອດໃສກ້າວໜ້າ; ເອົາໃຈໃສ່ສືບຕໍ່ປັບປຸງ-ພັດທະນາການຈັດຕັ້ງຂອງຕົນໃຫ້ກວ້າງຂວາງ ແລະ ແຂງແຮງກວ່າເກົ່າ, 3 ອົງການຈັດຕັ້ງມະຫາຊົນຕ້ອງຍຶດໝັ້ນແບບແຜນວິທີເຮັດວຽກຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບ, ມີລະບອບປະຊູມສ່ອງແສງປົກກະຕິ, ກອງປະຊຸມຕ້ອງມີເນື້ອໃນຈະແຈ້ງ, ມີການປຶກສາຫາລື, ມີການອອກມະຕິ ເພື່ອຕົກລົງຮັບຮອງແລ້ວ ຕ້ອງມີການເຜີຍແຜ່ໃຫ້ສະມາຊິກເຂົ້າໃຈ ແລະ ນຳໄປຈັດຕັ້ງປະຕິບັດຕາມມະຕິວາງອອກໃຫ້ທັນກັບສະພາບການ; ເອົາໃຈໃສ່ເພີ່ມທະວີການສົ່ງເສີມ, ປົກປ້ອງສິດຜົນປະໂຫຍດອັນຊອບທຳຂອງສະມາຊິກໃນ 3 ອົງການຈັດຕັ້ງທຸກສະຫາຍ ແລະ ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະຂອງຕົນ ໃນການເປັນເສນາທິການໃຫ້ແກ່ຄະນະພັກ-ຄະນະນຳ, ບັນດາກົມ, ຫ້ອງການ, ສະຖາບັນຄົ້ນຄວ້າ ແລະ ສູນ ສາມາດເຄື່ອນໄຫວວຽກງານໄດ້ຢ່າງມີປະສິດ ທິພາບ ແລະ ປະສິດທິຜົນ.