ຫ້ອງການ ສວສສຊ

1. ຈັດຕັ້ງປະຕິບັດແນວທາງ, ນະໂຍບາຍຂອງພັກ, ກົດໝາຍຂອງລັດ, ວິໄສທັດ, ຍຸດທະສາດ, ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນພັດທະນາວິທະຍາສາດເສດຖະກິດ-ສັງຄົມ ເພື່ອຫັນເປັນແຜນການ, ແຜນງານ ແລະ ໂຄງການລະອຽດຂອງຕົນ ໃນແຕ່ລະໄລຍະ;

2. ຄົ້ນຄວ້າ ແລະ ສັງລວມວຽກງານແຕ່ລະດ້ານທີ່ໄດ້ປະຕິບັດ ແລະ ກຳລັງຈັດຕັ້ງປະຕິບັດໃຫ້ຄະນະນຳ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຈັດກອງປະຊຸມສ່ອງແສງ, ຄຸ້ມຄອງ ແລະ ສຳເນົາເອກະສານ ທັງພາຍໃນ-ພາຍນອກ, ເຮັດບົດສະຫຼຸບ ແລະ ແຜນການປະຈຳເດືອນ, 3 ເດືອນ, 6 ເດືອນ ແລະ ປະຈຳປີ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ;

3. ສ້າງແຜນເຄື່ອນໄຫວ, ອຳນວຍຄວາມສະດວກ ແລະ ສ້າງເງື່ອນໄຂຮອບດ້ານ ໃຫ້ແກ່ການເຄື່ອນໄຫວປະຕິບັດວຽກງານຂອງ ຄະນະນໍາສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ;

4. ເປັນເຈົ້າການໃນການປະສານສົມທົບກັບພາກສ່ວນຕ່າງໆ ທັງພາຍໃນ ແລະ ພາຍນອກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເພື່ອຄົ້ນຄວ້ານຳສະເໜີວຽກງານຕ່າງໆຕໍ່ຄະນະນຳ ແລະ ຮັບເອົາການຕົກລົງ ຫຼື ຄຳເຫັນຊີ້ນຳຕໍ່ວຽກງານເຫຼົ່ານັ້ນມາຈັດຕັ້ງຜັນຂະຫຍາຍຢູ່ໃນແຕ່ລະພາກສ່ວນໃຫ້ປາກົດຜົນເປັນຈິງ;

5. ສ້າງແຜນຄຸ້ມຄອງ, ຂຶ້ນບັນຊີຊັບສິນຂອງລັດ ເຊັ່ນ: ພາຫະນະ, ວັດຖຸອຸປະກອນ, ລະບົບເອເລັກໂຕຼນິກ (ລະບົບ IT) ແລະ ປັບປຸງບູລະນະພື້ນຖານໂຄງລ່າງຢ່າງເປັນລະບົບ ເພື່ອຮັບໃຊ້ເຂົ້າໃນວຽກງານ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃຫ້ທັນສະໄໝເທື່ອລະກ້າວ;

6. ສ້າງແຜນການ ແລະ ແຜນງົບປະມານການລົງທຶນຂອງລັດ, ຈັດສັນງົບປະມານ, ຄຸ້ມຄອງລາຍຮັບ-ລາຍຈ່າຍບໍລິຫານ ແລະ ແຫຼ່ງທຶນສະໜັບສະໜູນການຄົ້ນຄວ້າອື່ນໆ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ;

7. ເປັນໃຈກາງໃນການພົວພັນ ແລະ ຮ່ວມມືກັບບັນດາປະເທດເພື່ອນມິດ, ຄູ່ຮ່ວມພັດທະນາ, ອົງການຈັດຕັ້ງຢູ່ພາຍໃນ ແລະ ຕ່າງປະເທດ, ອົງການຈັດຕັ້ງສາກົນຕ່າງໆ ເພື່ອຍາດແຍ່ງການຊ່ວຍເຫຼືອດ້ານທຶນຮອນ ແລະ ດ້ານວິຊາການ;

8. ສົມທົບກັບພາກສ່ວນກ່ຽວຂ້ອງ ຄົ້ນຄວ້າປະກອບຄຳຄິດຄຳເຫັນກ່ຽວກັບບັນດານະໂຍບາຍ, ກົນໄກ,ລະບອບລະບຽບການຕ່າງໆ ໃຫ້ສອດຄ່ອງກັບສະພາບການຕົວຈິງ ເພື່ອຊຸກຍູ້ສົ່ງເສີມວຽກງານພັດທະນາວິທະຍາສາດເສດຖະກິດ ແລະ ສັງຄົມ ແນໃສ່ໃຫ້ມີການເຄື່ອນໄຫວທີ່ເປັນເອກະພາບ ແລະ ລວມສູນ ພາຍໃນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ;

9. ປະຕິບັດໜ້າທີ່ອື່ນໆ ຕາມການມອບໝາຍ ຂອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.