ຂ່າວການເຄື່ອນໄຫວ – ໜ້າ 6 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ປະກາດການຈັດຕັ້ງ ຮອງປະທານ ສວສສຊ ຄົນໃໝ່

ຈໍານວນຜູ້ເຂົ້າຊົມ: 692

ປະກາດການຈັດຕັ້ງ ຮອງປະທານ ສວສສຊ ຄົນໃໝ່

ວັນທີ 12 ສິງຫາ 2025 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປະກາດການຈັດຕັ້ງ ໃຫ້ກຽດເປັນປະທານໂດຍສະຫາຍ ປອ. ຄໍາພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ແລະ ໃຫ້ກຽດເຂົ້າຮ່ວມໂດຍ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຮອງປະທານ, ບັນດາຄະນະກົມ, ສະຖາບັນ, ຫ້ອງການ, ສູນ ແລະ ພະນັກງານ-ລັດຖະກອນ ພາຍໃນເຂົ້າຮ່ວມ.

ໃນພິທີທ່ານ ນັນທະພົນ ລີວັດທະນາ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານດຳລັດຂອງນາຍົກລັດຖະມົນຕີ ສະບັບເລກທີ 50/ນຍ, ລົງວັນທີ 4 ສິງຫາ 2025 ວ່າດ້ວຍການແຕ່ງຕັ້ງຮອງປະທານ ສວສສຊ ໂດຍແຕ່ງຕັ້ງທ່ານ ໄຊສົງຄາມ ມະໂນທັມ ເປັນຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ມະຕິຕົກລົງ ວ່າດ້ວຍການແຕ່ງຕັ້ງ ສະຫາຍ ໄຊສົງຄາມ ມະໂນທັມ ເປັນກໍາມະການຄະນະບໍລິຫານງານພັກ, ກໍາມະການປະຈໍາພັກ ສວສສຊ ຕາມມະຕິຕົກລົງ ເລກທີ 663/ຄລສພ, ລົງວັນທີ 28 ກໍລະກົດ 2025.

ໂອກາດດັ່ງກ່າວ, ສະຫາຍ ປອ. ຄໍາພັນ ເຜີຍຍະວົງ ໄດ້ມີຄໍາເຫັນ ແລະ ໂອ້ລົມ ໂດຍທ່ານໃຫ້ຮູ້ວ່າ: ດ້ວຍຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່, ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຈຶ່ງໄດ້ຕົກລົງຈັດວາງ, ສັບຊ້ອນພະນັກງານການນໍາຂັ້ນສູງຂອງພັກ-ລັດ ບາງຕໍາແໜ່ງຄືນໃໝ່ ຊຶ່ງການສັບຊ້ອນ, ຈັດວາງພະນັກງານນໍາພາ ຜ່ານມາກໍ່ໄດ້ດໍາເນີນການສັບປ່ຽນ, ໝູນວຽນໜ້າທີ່ວຽກງານຂອງພະນັກງານນໍາພາໃນລະບົບການຈັດຕັ້ງພັກ-ລັດ, ອົງການຈັດຕັ້ງມະຫາຊົນຢູ່ສູນກາງ ກໍຄືຢູ່ທ້ອງຖິ່ນ ຢ່າງເປັນປົກກະຕິ. ສຳລັບ ສວສສຊ ນັບແຕ່ກາງປີ 2024 ເປັນຕົ້ນມາ ແມ່ນໄດ້ມີການຊັບຊ້ອນ-ຍົກຍ້າຍການນຳ ທັງສະຫາຍ ປະທານສະຖາບັນ-ຮອງປະທານສະຖາບັນຫຼາຍສະຫາຍ (ບາງສະຫາຍກໍໄດ້ຮັບນະໂຍບາຍພັກຜ່ອນຮັບບຳນານ). ການຊັບຊ້ອນສະຫາຍ ໄຊສົງຄາມ ມະໂນທຳ ໃນຄັ້ງນີ້ ກໍ່ແມ່ນຢູ່ໃນໄລຍະທີ່ອົງຄະນະພັກ ສວສສຊ ກຳລັງຂຸ້ນຂ້ຽວສຸມໃສ່ການກະກຽມຮອບດ້ານ ເພື່ອດຳເນີນກອງປະຊຸມໃຫຍ່ ຄັ້ງທີ II ຂອງອົງຄະນະພັກຂອງຕົນ, ເຊິ່ງຄາດວ່າຈະດຳເນີນໃນເດືອນໜ້ານີ້.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມຸນິນ ພົນສັກດາ

ສວສສຊ, ສມປຊ ແລະ ມຊ ຮ່ວມກັນລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມື ແລະ ແລກປ່ຽນທາງວິຊາການ

ຈໍານວນຜູ້ເຂົ້າຊົມ: 769

ສວສສຊ, ສມປຊ ແລະ ມຊ ຮ່ວມກັນລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມື ແລະ ແລກປ່ຽນທາງວິຊາການ

ໃນວັນທີ 06 ສິງຫາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ໄດ້ຈັດພິທີລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມື ແລະ ແລກປ່ຽນທາງວິຊາການ ລະຫວ່າງສະຖາບັນວິທະຍາສາດເສດ ຖະກິດ ແລະ ສັງຄົມແຫ່ງຊາດ, ສະຖາບັນການເມືອງ ແລະ ການປົກຄອງແຫ່ງຊາດ ແລະ ມະຫາວິທະຍາໄລແຫ່ງຊາດ ໂດຍການເຂົ້າຮ່ວມລົງນາມຂອງທ່ານ ປອ. ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ຮສ. ພູວົງ ອຸ່ນຄໍາແສນ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ທ່ານ ສຈ. ປອ. ເດຊານຸລາດ ແສນດວງເດດ ອະທິການບໍດີມະຫາວິທະຍາໄລແຫ່ງຊາດ, ມີບັນດາຮອງປະທານ, ຮອງ ຫົວໜ້າສະຖາບັນ, ຮອງອະທິການບໍດີ ແລະ ບັນດາແຂກທີ່ຖືກເຊີນຈາກທັງ 3 ພາກສ່ວນເຂົ້າຮ່ວມເປັນສັກຂີພະຍານ.

ພິທີລົງນາມບົດບັນທຶກຄວາມເຂົ້າໃຈຄັ້ງນີ້ ມີຈຸດປະສົງເພື່ອສ້າງຄວາມຮ່ວມມືໃນການຊຸກຍູ້ຊ່ວຍເຫຼືອເຊິ່ງກັນ ແລະ ກັນ ໃນການຈັດຕັ້ງປະຕິບັດວຽກງານຕາມພາລະບົດບາດໜ້າທີ່ຂອງອົງການເວົ້າລວມ ເວົ້າສະເພາະກໍແມ່ນວຽກ ງານຄົ້ນຄວ້າວິທະຍາສາດໃຫ້ມີປະສິດທິພາບ ແລະ ປະສິດທິຜົນສູງຂຶ້ນ; ເປັນຈຸດປະສານງານ ແລະ ເຄືອຂ່າຍການຄົ້ນຄວ້າວິທະຍາສາດດ້ານການເມືອງ-ການປົກຄອງ, ເສດຖະກິດ, ສັງຄົມ ແລະ ສິ່ງແວດລ້ອມທີ່ເຂັ້ມແຂງ, ມີຄວາມເປັນເອກະພາບ; ສາມາດສະໜອງຂໍ້ມູນ, ຂໍ້ສະເໜີແນະ ແລະ ໃຫ້ຄໍາປຶກສາທາງດ້ານວິຊາການໃຫ້ແກ່ການພັດທະນາເສດຖະກິດ-ສັງຄົມຢູ່ ສປປ ລາວ ແລະ ເສີມສ້າງຂີດຄວາມອາດສາມາດໃນການຄົ້ນຄວ້າວິທະຍາສາດການເມືອງ-ການປົກຄອງ, ເສດຖະກິດ, ສັງຄົມ ແລະ ສິ່ງແວດລ້ອມ ຂອງ ສປປ ລາວ ໃຫ້ສູງຂຶ້ນຢ່າງບໍ່ຢຸດຢັ້ງ ໃຫ້ເທົ່າທຽມກັບພາກພື້ນ ແລະ ສາກົນເທື່ອລະກ້າວ. ສໍາລັບ ເນື້ອໃນການຮ່ວມມືແມ່ນປະກອບດ້ວຍການກໍ່ສ້າງຊັບພະຍາກອນມະນຸດ, ການແລກປ່ຽນນັກຄົ້ນຄວ້າ, ຄູສອນ ແລະ ຜູ້ບັນຍາຍພິເສດ, ການແລກປ່ຽນຜົນການຄົ້ນຄວ້າ ແລະ ຂໍ້ມູນຂ່າວສານເຊິ່ງກັນ ແລະ ກັນ, ການເຜີຍແຜ່ຜົນການຄົ້ນຄວ້າວິທະຍາສາດຮ່ວມກັນ ແລະ ການຮ່ວມມືກັນຊອກຫາແຫຼ່ງທຶນຈາກແຫຼ່ງຕ່າງໆທັງພາຍໃນ ແລະ ຕ່າງປະເທດ ເພື່ອຮັບໃຊ້ເຂົ້າໃນວຽກງານຄົ້ນຄວ້າວິທະຍາສາດຕາມພາລະບົດ ບາດຂອງແຕ່ລະຝ່າຍ ແລະ ຕາມການມອບໝາຍຂອງຂັ້ນເທິງ ແລະ ຂົງເຂດອື່ນໆ ທີ່ທັງສາມຝ່າຍເຫັນດີເປັນເອກະພາບຮ່ວມກັນ.

ໂອກາດນີ້ ທ່ານ ປອ. ກອງແກ້ວ ໄຊສົງຄາມ, ປະທານ ສວສສຊ ໄດ້ມີຄໍາເຫັນວ່າ: ການລົງນາມບົດບັນທຶກໃນຄັ້ງນີ້ ກໍເພື່ອຍົກສູງການຮ່ວມມືໃຫ້ເປັນຮູບປະທໍາຫຼາຍຂຶ້ນ ຕາມເນື້ອໃນຈິດໃຈຂົງເຂດການຮ່ວມມື. ນອກນັ້ນ, ຍັງເປັນການປະກອບສ່ວນໃນການສ້າງເວທີ ເພື່ອແລກປ່ຽນຄໍາຄິດຄໍາເຫັນ, ແລກປ່ຽນຜົນການຄົ້ນຄ້ວາ ແລະ ສ້າງເຄືອຂ່າຍນັກຄົ້ນຄ້ວາ, ສ້າງຄວາມສໍາພັນກັນລະຫວ່າງ 3 ສະຖາບັນ ໃນການສຶກສາ, ຄົ້ນຄ້ວາ, ວິໄຈ ເພື່ອສ້າງໃຫ້ໄດ້ກໍາລັງແຮງສັງລວມ ແລະ ຕໍ່ຍອດຜົນງານດ້ານວິທະຍາສາດ ໃຫ້ກາຍເປັນຜະລິດຕະພັນທີ່ມີຄຸນນະພາບ ອອກຮັບໃຊ້ສັງຄົມພາຍໃນ ແລະ ຕ່າງປະເທດໃຫ້ຫຼາຍຂຶ້ນ; ເຮັດໃຫ້ນັກຄົ້ນຄ້ວາ, ນັກວິທະຍາສາດ ເປັນເຈົ້າການ ແລະ ຕັ້ງໜ້າປະກອບສ່ວນຊ່ວຍພັກ-ລັດ ຄົ້ນຄ້ວາຊອກຫາທາງອອກໃນການແກ້ໄຂບັນຫາຄວາມຫຍຸ້ງຍາກຕ່າງໆ ທີ່ປະເຊີນໜ້າແຕ່ລະໄລຍະ ກໍຄືເສັ້ນທາງການພັດທະນາຢູ່ປະເທດເຮົາໃຫ້ຫຼາຍກ່ວາເກົ່າ ເປັນຕົ້ນການແກ້ໄຂບັນຫາເສດຖະກິດ-ການເງິນ-ເງິນຕາ, ນັບທັງການແກ້ໄຂບັນຫາທີ່ຕິດພັນຂອດຂັ້ນການຄຸ້ມຄອງ-ບໍລິຫານຂອງລັດ ແລະ ອື່ນໆ.

ຂຽນຂ່າວ ແລະ ຖ່າຍພາບ: ວິໃຈ ເດດວົງສອນ

ສວສສຊ ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ

ຈໍານວນຜູ້ເຂົ້າຊົມ: 669

ສວສສຊ ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ

ວັນທີ 04 ສິງຫາ 2025, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີສະຫຼຸບຕີລາຄາວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ພ້ອມທັງມອບ-ຮັບໃບຢັ້ງຢືນ ໂດຍການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ, ມີສະຫາຍຄະນະປະຈໍາພັກ, ກຳມະການຄະນະພັກ, ຄະນະໜ່ວຍພັກ ແລະ ສະມາຊິກພັກເຂົ້າຮ່ວມ.

ໃນພິທີ ສະຫາຍ ບຸນລັດ ແກ້ວອາສາ ກຳມະການຄະນະພັກ, ຫົວໜ້າກົມຈັດຕັ້ງ ແລະ ພະນັກງານ ຂຶ້ນຜ່ານບົດລາຍງານສະຫລຸບຕີລາຄາການຈັ້ດຕັ້ງປະຕິບັດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024, ຜ່ານມະຕິຕົກລົງວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ໃຫ້ກັບບັນດາໜ່ວຍພັກ ທີ່ຂຶ້ນກັບອົງຄະນະພັກ ສວສສຊ ປະກອບມີ 10 ໜ່ວຍພັກ ຄື: ໜ່ວຍພັກກົມຈັດຕັ້ງ ແລະ ພະນັກງານ; ໜ່ວຍພັກຫ້ອງການ; ໜ່ວຍພັກຫ້ອງການຄຸ້ມຄອງວິທະຍາສາດ; ໜ່ວຍພັກສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ; ໜ່ວຍພັກສະຖາບັນຄົ້ນຄວ້າພັດທະນາວິສາຫະກິດ; ໜ່ວຍພັກສະຖາບັນຄົ້ນຄວ້າເສດຖະກິດມະຫາພາກ, ໜ່ວຍພັກສະຖາບັນຄົ້ນຄວ້າການເມືອງວິທະຍາ; ໜ່ວຍພັກສະຖາບັນຄົ້ນຄວ້າສັງຄົມວິທະຍາ; ໜ່ວຍພັກສະຖາບັນຄົ້ນຄວ້າວັດທະນະທຳ ແລະ ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ. ຫຼັງຈາກນັ້ນ, ສະຫາຍເລຂາຄະນະພັກ ໄດ້ໃຫ້ກຽດມອບໃບຢັ້ງຢືນໃຫ້ບັນດາໜ່ວຍພັກ ທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ແລະ ບັນດາສະຫາຍເລຂາໜ່ວຍພັກ 11 ພາກສ່ວນ ໄດ້ຂຶ້ນຈັບມືແຂ່ງຂັນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025.

ໃນໂອກາດດັ່ງກ່າວ ສະຫາຍເລຂາຄະນະພັກ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ບັນດາໜ່ວຍພັກກໍຄືສະມາຊິກພັກ, ພະນັກງານ-ລັດຖະກອນທົ່ວ ສວສສຊ ເອົາໃຈໃສ່ປະຕິບັດວຽກງານບາງດ້ານຕື່ມ ເປັນຕົ້ນຕ້ອງຮັບຮູ້, ເຂົ້າໃຈ ແລະ ກຳແໜ້ນ ທີ່ຕັ້ງພາລາບົດບາດ ແລະ ອົງປະກອບທີ່ສຳຄັນຂອງການຈັດຕັ້ງພັກ, ກຳແໜ້ນແຜນການກໍ່ສ້າງໜ່ວຍພັກຂອງຕົນ ໂດຍສະເພາະການຫັນເປັນແຜນລະອຽດ, ການມອບຄວາມຮັບຜິດຊອບ ແລະ ການເຜີຍແຜ່ເຊື່ອມຊຶມແຜນດັ່ງກ່າວໃຫ້ສະມາຊິກພັກ; ເອົາໃຈໃສ່ຕໍ່ວຽກງານຂະຫຍາຍພັກໂດຍໃຫ້ຖືຄຸນນະພາບເປັນກົກ. ສະນັ້ນ, ໃນຕໍ່ໜ້ານີ້ ເພື່ອແກ້ໄຂບັນຫາດັ່ງກ່າວ ພັກເຮົາຕ້ອງໄດ້ປັບປຸງຕົນເອງຄືນໃໝ່ ເພື່ອຍົກສູງຄຸນນະພາບຂອງໜ່ວຍພັກ ແລະ ສະມາ ຊິກພັກໃຫ້ມີການຫັນປ່ຽນຢ່າງຕັ້ງໜ້າດ້ວຍບາດກ້າວບຸກທະລຸໃໝ່ ສາມາດເປັນແກນນຳທີ່ເຂັ້ມແຂງໃນລະບົບການຈັດຕັ້ງ ໂດຍເລີ່ມຈາກການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແນໃສ່ຮັບປະກັນສ້າງພື້ນຖານ ໃນການປະຕິບັດຄໍາຂັວນ ກອງປະຊຸມໃຫຍ່ ຄັ້ງທີ II ທີ່ວາງອອກ “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານວຽກງານຄົ້ນຄວ້າ, ເປັນຄັງປັນຍາທີ່ເຂັ້ມແຂງໃຫ້ແກ່ພັກ ແລະ ລັດຖະບານ, ສ້າງຜະລິດຕະພັນທີ່ມີຄຸນນະພາບອອກສູ່ສັງຄົມທັງພາຍໃນ ແລະ ຕ່າງປະເທດ ”. ເພື່ອເປັນທິດທາງ ແລະ ບ່ອນອີງໃນການຈັດຕັ້ງປະຕິບັດ ແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ໃຫ້ຮັບປະກັນດ້ານຄຸນນະພາບ ໃຫ້ເນັ້ນໜັກເອົາໃຈໃສ່ ຄື: ດ້ານການເມືອງ; ດ້ານແນວຄິດ; ດ້ານການຈັດຕັ້ງ; ດ້ານແບບແຜນການນຳພາ ແລະ ດ້ານນໍາພາປະຕິບັດໜ້າທີ່ການເມືອງ ສືບຕໍ່ຮັດແໜ້ນຄວາມສາມັກຄີພາຍໃນການຈັດຕັ້ງ ໃຫ້ເປັນປຶກແຜ່ນແໜ້ນໜາ ແລະ ບູລະນະການຈັດຕັ້ງໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

WhatsApp Image 2025-08-01 at 15.48.13_930b85c4

ຄະນະຜູ້ແທນສະຖາບັນວິທະຍາສາດເສດຖະກິດແລະສັງຄົມແຫ່ງຊາດເຂົ້າພົບປະປະທານສະຖາບັນບັນດິດວິທະຍາສາດສັງຄົມຫວຽດນາມ

ຈໍານວນຜູ້ເຂົ້າຊົມ: 570

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າພົບປະ ປະທານ ສະຖາບັນບັນດິດວິທະຍາສາດສັງຄົມ ຫວຽດນາມ

ເພື່ອຜັນຂະຫຍາຍການຮ່ວມມື 2 ສະຖາບັນ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES) ແລະ ສະຖາບັນບັນດິດວິທະຍາສາດສັງຄົມຫວຽດນາມ (VASS) ໃຫ້ໜັກແໜ້ນ, ເລິກເຊິ່ງ ແລະ ຮອບດ້ານ. ໃນຕອນບ່າຍວັນທີ 30 ກໍລະກົດ 2025, ທ່ານ ປອ. ກອງແກ້ວ ໄຊສົງຄາມ ກໍໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ເຂົ້າພົບປະ ທ່ານ ປອ. ຟ່ານ ຈີ ຫຽວ, ປະທານສະຖາບັນບັນດິດວິທະຍາສາດສັງຄົມຫວຽດນາມ ເນື່ອງໃນໂອກາດເດີນທາງເຂົ້າຮ່ວມກອງປະຊຸມສຳມະນາວິທະຍາສາດສາກົນ 2 ຊາດ 4 ສະຖາບັນ ທີ່ ສສ. ຫວຽດນາມ.

ໃນໂອກາດນີ້, ປອ. ກອງແກ້ວ ໄຊສົງຄາມ ໄດ້ລາຍງານສະພາບການເຄື່ອນໄຫວວຽກງານຄົ້ນຄວ້າວິທະຍາສາດຂອງສະຖາບັນ ເຊິ່ງໃນໄລຍະຜ່ານມາແມ່ນສຸມໃສ່ຄົ້ນຄວ້າບັນດາຫົວຂໍ້ຕ່າງໆ ທີ່ມີຄວາມຈໍາເປັນຮີບດ່ວນຕໍ່ການກຳນົດແນວທາງນະໂຍບາຍຂອງພັກ ກໍ່ຄືການຈັດຕັ້ງປະຕິບັດຍຸດທະສາດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ເປັນຕົ້ນການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ. ສຳລັບ ໃນປີ 2025 ແມ່ນຈະສຸມໃສ່ຄົ້ນຄວ້າບັນດາຫົວຂໍ້ທີ່ກ່ຽວຂ້ອງກັບການຜັນຂະຫຍາຍມະຕິຂອງກົມການເມືອງສູນກາງພັກ ກ່ຽວກັບ “ການສ້າງເສດຖະກິດເອກະລາດ ເປັນເຈົ້າຕົນເອງ”. ພ້ອມນັ້ນ ປະທານ ສວສສຊ ຍັງໄດ້ປືກສາຫາລືແລກປ່ຽນບັນຫາເນື້ອໃນທີ່ສຳຄັນຄື: (1) ການຮ່ວມມືດ້ານການຄົົ້ນຄວ້າ, ແລກປ່ຽນບົດຮຽນໃນຫົວຂໍ້ສຳຄັນ ແລະ ເລັ່ງດ່ວນ ເພື່ອຊ່ວຍພັກ-ລັດໃນການວາງນະໂຍບາຍເສດຖະ ກິດ-ສັງຄົມໃນໄລຍະໃໝ່ ເປັນຕົ້ນແມ່ນບົດຮຽນແກ້ໄຂບັນຫາດ້ານເສດຖະກິດ, ການເງິນ, ການສຶກສາ, ຊົນເຜົ່າ; ການເຊື່ອມຕໍ່ຍຸດທະສາດລາວ-ຫວຽດນາມ ໃນສະພາບການໃໝ່. (2) ການຮ່ວມມືເພື່ອສ້າງຄວາມເຂັ້ມແຂງທາງດ້ານວິຊາການໃຫ້ນັກຄົ້ນຄວ້າຂອງ ສວສສຊ ເປັນຕົ້ນແມ່ນສົ່ງຊ່ຽວຊານຫວຽດນາມມາ ເພື່ອຝຶກອົບຮົມວິທີວິທະຍາການຄົົ້ນຄວ້າ ແລະ ເປັນທີ່ປຶກສາການວາງນະໂຍບາຍຊ່ວຍ ສວສສຊ ແລະ ສົ່ງນັກຄົ້ນຄວ້າຂອງ ສວສສຊ ໄປປະຈໍາການ (ໄລຍະສັ້ນ) ຢູ່ສະຖາບັນດິດວິທະຍາສາດສັງຄົມຫວຽດນາມ ເພື່ອຮຽນຮູ້ກ່ຽວກັບການຄົ້ນຄວ້າໃນຂົງເຂດຕ່າງໆ.

ໃນຕອນທ້າຍ, ປອ. ຟ່ານ ຈີ ຫຽວ ໄດ້ສະແດງຄວາມຊົມເຊີຍຕໍ່ຄວາມພະຍາຍາມຂອງ ສວສສຊ ໃນການປະຕິບັດໜ້າທີ່ໃນໄລຍະຜ່ານມາ ແລະ ເຫັນດີເອກະພາບກັບຄຳເຫັນຂອງ ປະທານ ສວສສຊ ໃນການເພີ່ມທະວີການພົວພັນຮ່ວມມືທີ່ດີລະຫວ່າງ 2 ສະຖາບັນ ລາວ-ຫວຽດນາມ ແລະ ຫວຽດນາມ-ລາວ ໃຫ້ຮອບດ້ານ, ກວ້າງຂວາງຍິ່ງຂຶ້ນກວ່າເກົ່າ, ຈະໃຫ້ການສະໜັບສະໜູນໃນການພັດທະນາຊັບພະຍາກອນມະນຸດຂອງລາວໃຫ້ຍົກລະດັບຂຶ້ນຕື່ມອີກກ້າວໜຶ່ງ ແລະ ອວຍພອນຄະນະຜູ້ແທນລາວປະສົບຜົນສຳເລັດໃນການເດີນທາງປະຕິບັດໜ້າທີ່ຄັ້ງນີ້ຢ່າງຈົບງາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ສສ ຫວຽດນາມ

ຈໍານວນຜູ້ເຂົ້າຊົມ: 1,055

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ສສ ຫວຽດນາມ

ໃນລະຫວ່າງວັນທີ 29-30 ກໍລະກົດ 2025 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ນໍາໂດຍທ່ານ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານ ສວສສຊ ໄດ້ເຂົ້າຮ່ວມກອງປະຊຸມສໍາມະນາວິທະຍາສາດສາກົນ 2 ຊາດ 4 ຝ່າຍຄື: ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ສະຖາບັນການເມືອງ ແລະ ການປົກຄອງແຫ່ງຊາດຂອງ ສປປ ລາວ, ສະຖາບັນບັນດິດວິທະຍາສາດສັງຄົມຫວຽດ ນາມ ແລະ ສະຖາບັນການເມືອງແຫ່ງຊາດໂຮ່ຈິມິນ ຂອງ ສສ.ຫວຽດນາມ. ກອງປະຊຸມໄດ້ຈັດຂຶ້ນທີ່ແຂວງນິງບິ່ງ ສສ.ຫວຽດນາມ ພາຍໃຕ້ຫົວຂໍ້: “ການພັດທະນາເສດຖະກິດມໍລະດົກ: ບົດຮຽນຈາກລາວ ແລະ ສສ.ຫວຽດນາມ” ໂດຍການເປັນເຈົ້າພາບຂອງສະຖາບັນການເມືອງແຫ່ງຊາດໂຮ່ຈິມິນ. ກອງປະຊຸມມີ ສະຫາຍ ສຈ. ປອ. ຫວຽນ ຊວັ່ນ ຖັງ, ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ; ສະຫາຍ ປອ. ຟ່ານ ຈີ ຫຽວ, ປະທານສະຖາບັນດິດວິທະຍາສາດສັງຄົມຫວຽດນາມ; ສະຫາຍ ຮຈ ພູວົງ ອຸ່ນຄໍາແສງ, ກໍາມະການສູນກາງພັກ, ເລຂາຄະນະພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ສະຫາຍ ເຈືອງ ກວກ ຮຸຍ ເລຂາຄະນະພັກແຂວງນິງບິ່ງ, ມີນັກວິທະຍາສາດຈາກ 4 ສະຖາບັນເຂົ້າຮ່ວມທັງໝົດ 70 ທ່ານ.

ໃນພິທີເປີດ ສະຫາຍ ສຈ. ປອ. ຫວຽນ ຊວັ່ນ ຖັງ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງກອງປະຊຸມ ທີ່ 4 ອົງກອນໄດ້ເສີມຂະຫຍາຍກົນໄກການຮ່ວມມືກັນຢ່າງສະໝໍ່າສະເໜີ ເພື່ອເປັນເວທີແລກປ່ຽນວິທະຍາສາດທີ່ມີຄວາມໝາຍ, ຄວາມສຳຄັນ ແລະ ມີປະສິດທິຜົນ; ທ່ານໄດ້ເນັ້ນໜັກເຖິງຄວາມສຳຄັນຂອງຫົວຂໍ້ກອງປະຊຸມວ່າ ເສດຖະກິດມໍລະດົກແມ່ນຂົງເຂດເສດຖະກິດສະເພາະ, ຖ້າເຮົາຮູ້ຈັກໝູນໃຊ້ຄຸນຄ່າຂອງມໍລະດົກເປັນຊັບພະຍາກອນ ພວກເຮົາຈະສາມາດ ສ້າງຜົນປະໂຫຍດທາງເສດຖະກິດ ໄປຄຽງຄູ່ກັບການປົກປັກຮັກສາ ແລະ ເຜີຍແຜ່ຄຸນຄ່າເຫຼົ່ານັ້ນຢ່າງຍືນຍົງ. ໄລຍະຜ່ານມາ, ສອງພັກ, ສອງລັດ ໄດ້ອອກແນວທາງ, ນະໂຍບາຍ ແລະ ທິດທາງສະເພາະຫຼາຍຢ່າງ ເພື່ອພັດທະນາເສດຖະກິດມໍລະດົກ. ໃນນັ້ນ ມີການຊຸກຍູ້ອຸດສາຫະກຳວັດທະນະທຳ, ການພັດທະນາການທ່ອງທ່ຽວແບບຍືນຍົງ, ການປົກປັກຮັກສາສິ່ງແວດລ້ອມ ແລະ ການຂຸດຄົ້ນຊັບພະຍາກອນຢ່າງສົມເຫດສົມຜົນ. ອັນທີ່ສະແດງໃຫ້ເຫັນຢ່າງຈະແຈ້ງເຖິງການຮ່ວມມືລະຫວ່າງສອງປະເທດ ກໍ່ຄືໃນເດືອນກໍລະກົດ 2025, ອົງການ UNESCO ໄດ້ຮັບຮອງຢ່າງເປັນທາງການ ມໍລະດົກທຳມະຊາດຊາຍແດນຮ່ວມກັນທໍາອິດລະຫວ່າງຫວຽດນາມ ແລະ ລາວ ຊື່ວ່າ “ອຸທະຍານແຫ່ງຊາດ ຟອງ ງ່າ ເກ ບາງ (Phong Nha – Ke Bang) ແລະ ອຸທະຍານແຫ່ງຊາດ ຫີນໜາມໜໍ່ (Hin Namno). ສະນັ້ນ ໃນກອງປະຊຸມພວກເຮົາ ຕ້ອງປຶກສາຫາລືເຮັດໃຫ້ເນື້ອໃນສຳຄັນຕໍ່ໄປນີ້ເລິກເຊິ່ງຂຶ້ນຕື່ມ ເຊັ່ນ: (1) ກົນໄກ, ນະໂຍບາຍ ແລະ ການຄຸ້ມຄອງລັດກ່ຽວກັບເສດຖະກິດມໍລະດົກ, (2) ການວາງຊຸມຊົນທ້ອງຖິ່ນໄວ້ຢູ່ໃຈກາງຂອງການພັດທະນາເສດຖະກິດມໍລະດົກ, (3) ການລົງທຶນທີ່ມີຈຸດສຸມ, ປັບປຸງພື້ນຖານໂຄງລ່າງໃຫ້ທັນສະໄໝ ແລະ ນຳໃຊ້ເຕັກໂນໂລຢີດີຈີຕອນໃນຂົງເຂດມໍລະດົກ, (4) ການພັດທະນາຜະລິດຕະພັນ ແລະ ການບໍລິການທ່ອງທ່ຽວ-ວັດທະນະທຳທີ່ຫຼາກຫຼາຍ, ສ້າງສັນຕິດພັນກັບມໍລະດົກ (5) ການຝຶກອົບຮົມບຸກຄະລາກອນ ແລະ ການຄົ້ນຄວ້າວິທະຍາສາດ ເພື່ອຮັບໃຊ້ເສດຖະກິດມໍລະດົກ, (6) ການຮ່ວມມືສອງຝ່າຍ ແລະ ຫຼາຍຝ່າຍກ່ຽວກັບການພັດທະນາເສດຖະກິດມໍລະດົກ.

ໃນໂອກາດດັ່ງກ່າວ ສະຫາຍ ປອ. ກອງແກ້ວ ໄຊສົງຄາມ ກໍ່ໄດ້ມີຄໍາເຫັນຕໍ່ກອງປະຊຸມວ່າ: ການຈັດກອງປະຊຸມສໍາມະນາວິທະຍາສາດໃນຄັ້ງນີ້ ສຸດທີ່ມີຄວາມໝາຍຄວາມສຳຄັນເປັນຢ່າງຍິ່ງ ແມ່ນເວທີການຮ່ວມມືທາງດ້ານວິທະຍາສາດຂອງສອງປະເທດ ລາວ ແລະ ຫວຽດນາມ ເຊິ່ງຈະໄດ້ສົນທະນາປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນກ່ຽວກັບ “ເສດຖະກິດມໍລະດົກ” ເຂົ້າໃຈກົງກັນວ່າ “ມໍລະດົກ” ໝາຍເຖິງທຸກສິ່ງ, ທຸກຢ່າງທີ່ເປັນວັດຖຸ ແລະ ນິວັດຖຸທີ່ມີຄ່າທີ່ພວກເຮົາໄດ້ຮັບການສືບທອດມາຈາກບັນພະບູລຸດ. ເພາະສະນັ້ນ, “ມໍລະດົກ” ບໍ່ພຽງແຕ່ເປັນເອກະລັກຂອງຊາດເທົ່ານັ້ນ ແຕ່ຍັງເປັນຊັບສິນ ຫຼື ສົມບັດທີ່ມີຄຸນຄ່າທີ່ສາມາດນໍາໃຊ້ເປັນທ່າແຮງໃນການພັດທະນາເສດຖະກິດ-ສັງຄົມຂອງປະເທດ. ສປປ ລາວ ຂອງພວກເຮົາ ມີມໍລະດົກຫຼາຍປະເພດ ເຊິ່ງໃນນັ້ນລວມມີ: (1) ມໍລະດົກທາງທໍາມະຊາດ, (2) ມໍລະດົກທາງປະຫວັດສາດ, (3) ມໍລະດົກທາງວັດທະນະທໍາ, ໂດຍອີງໃສ່ທັດສະນະ ແລະ ແນວທາງນະໂຍບາຍດັ່ງກ່າວຂອງພັກ ສປປ ລາວ ກໍ່ໄດ້ມີຍຸດທະສາດ, ແຜນການ, ກົດໝາຍ ແລະ ກົດລະບຽບຕ່າງໆ ໃນການຄຸ້ມຄອງ ແລະ ນຳໃຊ້ມໍລະດົກດັ່ງກ່າວ ເຂົ້າໃນການພັດທະນາເສດຖະກິດດ້ວຍຫລາຍຮູບການ. ປະຈຸບັນ, ສປປ ລາວ ມີສະຖານທີ່ທ່ອງທ່ຽວສະຖານທາງທຳມະຊາດ, ປະຫວັດສາດ ແລະ ວັດທະນະທຳທີ່ເປີດບໍລິການແລ້ວ 800 ກວ່າແຫ່ງ. ໃນນັ້ນ ລວມມີສະຖານທີ່ທ່ອງທ່ຽວເປັນມໍລະດົກໂລກ 4 ແຫ່ງ (ນະຄອນຫຼວງພະບາງ, ວັດພູຈຳປາສັກ, ທົ່ງໄຫຫີນຊຽງຂວາງ ແລະ ປ່າສະຫງວນແຫ່ງຊາດຫີນໜາມໜໍ່). ແຕ່ເຖິງຢ່າງໃດກໍ່ຕາມ, ການພັດທະນາເສດຖະກິດມໍລະດົກ ຢູ່ ສປປ ລາວ ກໍ່ຍັງມີຂໍ້ຄົງຄ້າງ ແລະ ສິ່ງທ້າທາຍຫຼາຍປະການ ເປັນຕົ້ນແມ່ນ: (1) ການປ່ຽນແປງ ແລະ ຄວາມຍືນຍົງຂອງມໍລະດົກ, (2) ຂໍ້ຂັດແຍ້ງລະຫວ່າງການອະນຸລັກຮັກສາ ແລະ ຄວາມຕ້ອງການຂອງການພັດທະນາໃນໄລຍະໃໝ່, (3) ສປປ ລາວ ຍັງຂາດຊັບພະຍາກອນມະນຸດທີ່ມີຄວາມຮູ້, ຄວາມສາມາດ ແລະ ທຶນຮອນຈຳນວນຫຼວງຫຼາຍໃນການຂຸດຄົ້ນ.

ໃນວາລະຕອນທ້າຍ ສະຫາຍ ສຈ. ປອ. ຫວຽນ ຊວັ່ນ ຖັງ ໃນນາມເຈົ້າພາບຈັດກອງປະຊຸມໄດ້ກ່າວສະຫຼຸບວ່າ: ກອງປະຊຸມຂອງພວກເຮົາໃນຄັ້ງນີ້ ແມ່ນດໍາເນີນໄປດ້ວຍບັນຍາກາດຟົດຟື້ນ, ມີເນື້ອໃນທີ່ອຸດົມສົມບູນ ແລະ ມີຄວາມຮັບຜິດຊອບສູງ, ບັນດານັກວິທະຍາສາດທີ່ເຂົ້າຮ່ວມກອງປະຊຸມ ໄດ້ສຸມຈິດສຸມໃຈຮັບຟັງ ແລະ ພ້ອມກັນປະກອບຄໍາຄິດຄໍາເຫັນ, ສົນທະນາແລກປ່ຽນບົດຮຽນ ແຕ່ລະບັນຫາດ້ວຍຄວາມຈິງໃຈ ແລະ ກົງໄປກົງມາ ເຊິ່ງໄດ້ສ້າງຄວາມກະຈ່າງແຈ້ງ ທັງໃນແງ່ທິດສະດີ ແລະ ພຶດຕິກໍາ ຢ່າງມີຊີວິດຊີວາ, ມີຄວາມໝາຍສໍາຄັນທາງດ້ານທິດສະດີ ແລະ ພຶດຕິກໍາໃຫ້ແກ່ສອງພັກ, ສອງລັດ ແລະ ປະຊາຊົນສອງຊາດ ເປັນຕົ້ນແມ່ນ (1) ຄວາມຮັບຮູ້ລວມກ່ຽວກັບການພັດທະນາເສດຖະກິດມໍລະດົກ, (2) ຄວາມສໍາຄັນຂອງຄວາມກົມກຽວລະຫວ່າງການອະນຸລັກ ແລະ ການພັດທະນາເສດຖະກິດມໍລະດົກ, (3) ບົດບາດຂອງກົນໄກ, ນະໂຍບາຍ ແລະ ຊັບພະຍາກອນມະນຸດ, (4) ບົດບາດຂອງຊຸມຊົນ ແລະ ການຮ່ວມມືສາກົນ. ຈາກຜົນສຳເລັດ ແລະ ຂໍ້ສະເໜີຂອງກອງປະຊຸມສໍາມະນາຈະຖືກນໍາສະເໜີຕໍ່ການນໍາພັກ-ລັດຂອງສອງປະເທດ, ປະກອບສ່ວນເຂົ້າໃນການກໍານົດນະໂຍບາຍທີ່ຖືກຕ້ອງ ເພື່ອບັນລຸເປົ້າໝາຍການພັດທະນາເສດຖະກິດ-ສັງຄົມຂອງຫວຽດນາມ ແລະ ລາວ ຮອດປີ 2030, ວິໄສທັດຮອດປີ 2045 ຢ່າງສໍາເລັດຜົນ. ກອງປະຊຸມສໍາມະນາຂອງ 4 ຝ່າຍ ໃນຄັ້ງນີ້ໄດ້ປະສົບຜົນສໍາເລັດຢ່າງສະງ່າງາມ ແລະ ໄດ້ເອກະພາບກັນນໍາເອົາບົດຄົ້ນຄວ້າ ຈໍານວນ 12 ບົດ ທີ່ຂຶ້ນນໍາສະເໜີ ແລະ ບົດທີ່ບໍ່ໄດ້ຂຶ້ນນໍາສະເໜີຈໍານວນ 37 ບົດ ມາຈັດລຽງເພື່ອເຜີຍແຜ່ສູ່ສັງຄົມ; ສຳລັບກອງປະຊຸມຄັ້ງຕໍ່ໄປແມ່ນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນເຈົ້າພາບ ເຊິ່ງຄາດວ່າຈະຈັດຂຶ້ນໃນກາງປີ 2026 ທີ່ ສປປ ລາວ ພາຍໃຕ້ຫົວຂໍ້ “ສ້າງ ແລະ ພັັັດທະນາເສດຖະກິດເອກະລາດ ເປັນເຈົ້າຕົນເອງ: ບົດຮຽນ ແລະ ປະສົບການຈາກ ລາວ-ຫວຽດນາມ”.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສະຫະພັນແມ່ຍິງ ສວສສຊ ຈັດກອງປະຊຸມທາບທາມຮອບເປີດກວ້າງ ຄະນະບໍລິຫານງານ ສສຍລ ສະໄໝທີ IX

ຈໍານວນຜູ້ເຂົ້າຊົມ: 622

ສະຫະພັນແມ່ຍິງ ສວສສຊ ຈັດກອງປະຊຸມທາບທາມຮອບເປີດກວ້າງ ຄະນະບໍລິຫານງານ ສສຍລ ສະໄໝທີ IX

ໃນຕອນບ່າຍ ຂອງວັນທີ 22 ກໍລະກົດ 2025 ທີ່ຜ່ານມາ ຄະນະບໍລິຫານງານສະຫະພັນແມ່ຍິງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປີດກອງປະຊຸມທາບທາມບຸກຄະລາກອນ ຮັບສະໝັກເລືອກຕັ້ງເຂົ້າໃນຄະນະບໍລິຫານງານ ສສຍລ ສະໄໝທີ IX ຮອບເປີດກວ້າງ ຮອບທີ 1 ແລະ ຜ່ານເນື້ອໃນເອກະສານກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ, ພາຍໃຕ້ການເປັນປະທານຂອງ ສະຫາຍ ປອ. ນາງ ແກ້ວວິວອນ ອຸດທະຈັກ ກໍາມະການຄະນະພັກ ຜູ້ຊີ້ນໍາວຽກງານສະຫະພັນແມ່ຍິງ ສວສສຊ; ມີສະຫາຍ ນາງ ລັດດາວັນ ຊົງວິໄລ, ປະ ທານສະຫະພັນແມ່ຍິງ ສວສສຊ, ທ່ານ ຄໍາສຸກ ພອນໄຊສະຫວັດ ຮອງຫົວໜ້າກົມຈັດຕັ້ງ ແລະ ພະນັກງານ, ຄະນະບໍລິຫານງານສະຫະພັນແມ່ຍິງ, ຄະນະສະຫະພັນແມ່ຍິງຮາກຖານອ້ອມຂ້າງ ພ້ອມດ້ວຍສະມາຊິກແມ່ຍິງທົ່ວ ສວສສຊ ເຂົ້າຮ່ວມຈໍານວນ 66 ສະຫາຍ.

ກອງປະຊຸມໄດ້ຮັບຟັງການຜ່ານຮ່າງບົດລາຍງານການເມືອງ, ຮ່າງແຜນພັດທະນາແມ່ຍິງລາວ, ຮ່າງກົດລະບຽບແມ່ຍິງລາວ ສະບັບປັບປຸງ ຂອງຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ໃນໄລຍະໜຶ່ງສະໄໝຜ່ານມາ ໂດຍຍົກໃຫ້ເຫັນຜົນສໍາເລັດຂອງວຽກງານໃນແຕ່ລະດ້ານ, ຕີລາຄາດ້ານດີ-ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ລວມເຖິງຄາດໝາຍສູ້ຊົນ, ທິດທາງວຽກງານ ຂອງສະຫະພັນແມ່ຍິງ 5 ປີໃນຕໍ່ໜ້າ (2026-2030). ພ້ອມກັນນີ້ ກອງປະຊຸມຍັງໄດ້ຮັບຟັງການປະກອບຄຳຄິດຈາກບັນດາສະມາຊິກແມ່ຍິງຕໍ່ 03 ເອກະສານດັ່ງກ່າວຢ່າງມີວິທະຍາສາດ ແລະ ເລິກເຊິງ. ຈາກນັ້ນ, ຄະນະຮັບຜິດຊອບໄດ້ຂຶ້ນຜ່ານມາດຕະຖານ ແລະ ເງື່ອນໄຂ ຜູ້ອອກຮັບສະໝັກເລືອກຕັ້ງຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX ເພື່ອເປັນບ່ອນອີງໃຫ້ແກ່ຜູ້ແທນກອງປະຊຸມໄດ້ຄົ້ນຄວ້າ ແລະ ເລືອກເຟັ້ນເອົາຄະນະບໍລິຫານງານສູນກາງສະຫະພັນແມ່ຍິງລາວ (ຊຸດໃໝ່) ໃຫ້ໄດ້ຜູ້ມີມາດຕະຖານ, ເງື່ອນໄຂຄົບຖ້ວນ ຕາມທີ່ໄດ້ກາໍນົດໄວ້.

ສະຫາຍ ປອ. ນາງ ແກ້ວວິວອນ ອຸດທະຈັກ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ສະມາຊິກແມ່ຍິງທຸກສະຫາຍ ຕ້ອງເອົາໃຈໃສ່ໃນການຄົ້ນຄວ້າບັນດາມາດຕະຖານ ແລະ ເງື່ອນໄຂຂອງບຸກຄະລາກອນ ທີ່ຈະປະກອບເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX ໃຫ້ມີຄວາມໜັກແໜ້ນ ແນໃສ່ຮັບປະກັນໃຫ້ສາມາດ ສືບຕໍ່ນໍາພາ-ຊີ້ນໍາວຽກງານແມ່ຍິງມີຜົນສໍາເລັດອັນໃໝ່ຍິ່ງໃຫຍ່ກວ່າເກົ່າ. ພ້ອມນັ້ນ ສະຫາຍຍັງເນັ້ນໜັກໃສ່ບາງບັນຫາໃຫ້ຜູ້ທີ່ຈະຮັບສະໝັກເປັນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX ຈະຕ້ອງເປັນຜູ້ກໍາແໜ້ນແນວທາງຂອງພັກ, ເປັນຜູ້ມີທັດສະນະຫຼັກໝັ້ນການເມືອງໝັກແໜ້ນ, ມີຄຸນສົມບັດສິນທໍາປະຕິວັດ, ທັດສະນະມະຫາຊົນຖືກຕ້ອງ, ມີຄວາມຮັບຜິດຊອບສູງ ສາມາດບັນລຸຜົນສຳເລັດໜ້າທີ່ການເມືອງຂອງສະຫະພັນແມ່ຍິງວາງອອກເປັນຢ່າງດີ. ຈາກນັ້ນ ກອງປະຊຸມໄດ້ດາໍເນີນການປ່ອນບັດທາບທາມບຸກຄະລາກອນທີ່ຈະອອກສະໝັກຮັບ ເລືອກຕັ້ງເອົາ ເພື່ອກະກຽມຄວາມພ້ອມໃສ່ກອງປະຊຸມໃຫຍ່ຂອງຄະນະບໍລິຫານງານ ສູນກາງສະຫະພັນແມ່ຍິງລາວ ສະໄໝທີ IX ທີ່ຈະມາເຖິງນີ້.

ຂຽນຂ່າວ: ຈັນທູ ແກ້ວອ່ອນວົງໄຊ

ຖ່າຍພາບ: ມູນິນ ພົນສັກດາ

ກອງປະຊຸມສຳມະນາວິທະຍາສາດ ຂໍ່ານັບຮັບຕ້ອນກອງປະຊຸມໃຫຍ່ສະມາຊິກພັກ ສະໄໝທີ II ຂອງອົງຄະນະພັກ ສວສສຊ

ຈໍານວນຜູ້ເຂົ້າຊົມ: 469

ກອງປະຊຸມສຳມະນາວິທະຍາສາດ ຂໍ່ານັບຮັບຕ້ອນກອງປະຊຸມໃຫຍ່ສະມາຊິກພັກ ສະໄໝທີ II ຂອງອົງຄະນະພັກ ສວສສຊ

ໃນວັນທີ 25 ກໍລະກົດ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມສຳມະນາວິທະຍາສາດ ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ; ມີຄະນະປະຈຳພັກ, ກຳມະການຄະນະພັກ, ຄະນະໜ່ວຍພັກຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານລັດຖະກອນ ເຂົ້າຮ່ວມ.

ກອງປະຊຸມຄັ້ງນີ້ແມ່ນມີຈຸດປະສົງ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ສະມາຊິກພັກ ສະໄໝທີ II ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ຈະໄຂຂຶ້ນໃນມໍ່ໆນີ້ ທັງເປັນການສ້າງເວທີໃຫ້ນັກຄົ້ນຄວ້າໝຸ່ມໄດ້ສະແດງຄວາມຮູ້, ຄວາມສາມາດ ແລະ ນໍາສະເໜີຜົນງານການຄົ້ນຄວ້າຂອງຕົນ ເພື່ອຝຶກຝົນຫຼໍ່ຫຼອມໃຫ້ນັກຄົ້ນຄວ້າໜຸ່ມມີຄວາມໜັກແໜ້ນທາງດ້ານວິຊາການ ເປັນເສນາທິການທີ່ເຂັ້ມແຂງໃຫ້ແກ່ຄະນະພັກ-ຄະນະນໍາສະຖາບັນ ໃນການຄົ້ນຄວ້າວິິທະຍາສາດເສດຖະກິດ ແລະ ສັງຄົມ ເຊິ່ງບັນດາບົດຄົ້ນຄວ້າທີ່ນໍາສະເໜີໃນກອງປະຊຸມຄັ້ງນີ້ ປະກອບມີ 10 ບົດ ທີ່ໄດ້ຄັດເລືອກມາຈາກ 11 ພາກສ່ວນທີ່ຂື້ນກັບ ສວສສຊ.

ໃນໂອກາດນີ້, ປອ. ກອງແກ້ວ ໄຊສົງຄາມ ໄດ້ມີຄໍາເຫັນໂອ້ລົມຕໍ່ສຳມະນາວິທະຍາສາດວ່າ: ບັນດາບົດທີ່ນໍາສະເໜີເປັນຫົວຂໍ້ທີ່ໜ້າສົນໃຈ ແລະ ເປັນຂໍ້ມູນການຄົ້ນຄວ້າພື້ນຖານທີ່ດີ ຂໍໃຫ້ໃຫ້ສືບຕໍ່ຝຶກຝົນຫຼໍ່ຫຼອມ ແລະ ສ້າງຜົນງານການຄົ້ນຄວ້າຂອງຕົນ ເພື່ອໃຫ້ກາຍເປັນນັກຄົ້ນຄວ້າໝຸ່ມຜູ້ທີ່ມີຄວາມເຂັ້ມແຂງທາງດ້ານວິຊາການ ແລະ ເປັນເສນາທິການທີ່ດີໃນວຽກງານການຄົ້ນຄວ້າໃຫ້ແກ່ຄະນະພັກ-ຄະນະນໍາໃນຕໍ່ໜ້າ. ສະນັ້ນ, ຈຶ່ງຮຽກຮ້ອງໃຫ້ບັນດາສະຖາບັນຄົ້ນຄວ້າ ກໍ່ຄືບັນດາສະມາຊິກຂອງ 03 ອົງການຈັດຕັ້ງມະຫາຊົນ ສືບຕໍ່ສ້າງຜົນງານການຄົ້ນຄວ້າ ເພື່ອໃຫ້ມີມາປະກອບສ່ວນນໍາສະເໜີໃນເວທີດັ່ງກ່າວ ໃຫ້ມີຄວາມເລິກເຊິ່ງ ແລະ ຫຼາກຫຼາຍຫົວຂໍ້, ແນໃສ່ເພື່ອສືບຕໍ່ສ້າງຄວາມເຂັ້ມແຂງໃຫ້ນັກຄົ້ນຄວ້າ-ນັກວິຊາການພວກເຮົາໃຫ້ເຂັ້ມແຂງ ແລະ ຫຼາຍຂຶ້ນກວ່າເກົ່າ. ຫວັງຢ່າງຍິ່ງວ່າ ໃນຕໍ່ໜ້າພວກເຮົາຈະມີກອງປະຊຸມລັກສະນະນີ້ຕື່ມ ໂດຍກຳນົດເຮັດໃນແຕ່ລະປີ ແລະ ອາດຈະກຳນົດໃຫ້ມີຊື່ຫົວຂໍ້ສະເພາະ (Theme) ໃນແຕ່ລະປີ ຕາມຄວາມຮຽກຮ້ອງຕ້ອງການໃນແຕ່ລະໄລຍະ. ທ່ານຍັງໄດ້ໃຫ້ກຽດມອບໃບຢັ້ງຢືນ ແລະ ລາງວັນຊົມເຊີຍ ໃຫ້ແກ່ຜູ້ກອບສ່ວນໃນກອງປະຊຸມຄັ້ງນີ້ອີກດ້ວຍ.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນິນ ພົນສັກດາ

ສວສສຊ ຈັດຕັ້ງກອງປະຊຸມທາບທາມບຸກຄະລາກອນ

ຈໍານວນຜູ້ເຂົ້າຊົມ: 378

ສວສສຊ ຈັດຕັ້ງກອງປະຊຸມທາບທາມບຸກຄະລາກອນ

ວັນທີ 23 ກໍລະກົດ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມທາບທາມບຸກຄະລາກອນ ຮອບທີ 1 ເພື່ອຮັບສະໝັກເລືອກຕັ້ງເຂົ້າໃນກອງຊຸມໃຫຍ່ສະມາຊິກພັກ ຄັ້ງທີ II ຂອງ ສວສສຊ ພາຍໃຕ້ການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ, ມີສະຫາຍຄະນະປະຈຳພັກ, ຄະນະໜ່ວຍພັກ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກ ພ້ອມດ້ວຍສະມາຊິກພັກເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການສະເໜີຮ່າງບົດລາຍງານການເມືອງໂດຍສະຫາຍ ປອ. ບຸນສີ ພຸດທະວົງ, ຮ່າງແຜນພັດທະນາວຽກງານຄົ້ນຄວ້າ 5 ປີ ໂດຍສະຫາຍ ປອ. ສາຍຄຳ ວໍລະເດດ ແລະ ຮ່າງບົດສໍາຫຼວດການນໍາພາລວມ ໂດຍສະຫາຍ ບຸນລັດ ແກ້ວອາສາ ເຊິ່ງໄດ້ຕີລາຄາຜົນສຳເລັດຂອງການນໍາພາຊີ້ນໍາ ແລະ ການຈັດຕັ້ງປະຕິບັດວຽກງານຂອງ ສວສສຊ ໃນໄລຍະຜ່ານມາ ທັງຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ ເພື່ອສືບຕໍ່ວາງທິດທາງປັບປຸງແກ້ໄຂໃນຊຸມປີຕໍ່ໜ້າ. ກອງປະຊຸມໄດ້ຮັບຟັງການປະກອບຄຳຄິດຈາກບັນດາສະມາຊິກພັກຢ່າງກົງໄປກົງມາ, ມີວິທະຍາສາດ ແລະ ເລິກເຊິ່ງ ເປັນປະໂຫຍດຕໍ່ການປັບປຸງເນື້ອໃນໃຫ້ອຸດົມສົມບູນ, ຄົບຖ້ວນຍິ່ງຂຶ້ນກວ່າເກົ່າ. ຈາກນັ້ນ ສະຫາຍ ບຸນລັດ ແກ້ວອາສາ ກຳມະການຄະນະພັກ, ຫົວໜ້າກົມຈັດຕັ້ງ ແລະ ພະນັກງານ ໄດ້ສະເໜີຜ່ານມາດຕະຖານ ແລະ ເງື່ອນໄຂຂອງຄະນະບໍລິຫານງານພັກ ສວສສຊ ຊຸດໃໝ່ ເພື່ອເປັນບ່ອນອີງໃຫ້ແກ່ສະມາຊິກພັກໄດ້ຄົ້ນຄວ້າພິຈາລະນາທາບທາມເລືອກເອົາຄະນະບໍລິຫານງານພັກ, ເລຂາ-ຮອງເລຂາ, ຄະນະປະຈຳ ແລະ ຄະນະກວດກາພັກ ໃນຮອບທີ 1 ຕາມແຜນທີ່ໄດ້ກໍານົດໄວ້.

ໃນໂອກາດນີ້, ສະຫາຍ ປອ. ກອງແກ້ວ ໄຊສົງຄາມ ໄດ້ມີຄຳເຫັນຕໍ່ກອງປະຊຸມ ໂດຍຍົກໃຫ້ເຫັນຄວາມສຳຄັນການດຳເນີນກອງປະຊູມໃຫຍ່, ການຄັດເລືອກອົງຄະນະພັກຊຸດໃໝ່ ແລະ ເນັ້ນໜັກໃຫ້ສະມາຊິກພັກທີ່ເຂົ້າກອງປະຊຸມ ຈົ່ງກໍາແໜ້ນເນື້ອໃນມາດຖານເງື່ອນໄຂຂອງຜູ້ທີ່ຈະຮັບສະໝັກເຂົ້າໃນຄະນະພັກ ຕ້ອງເປັນຜູ້ມີຄຸນທາດການເມືອງໜັກແໜ້ນ, ມີຄຸນສົມບັດສນທຳປະຕິວັດ, ມີຄວາມຮູ້ຄວາມສາມາດ ແລະ ມີຜົນສຳເລັດໃນການເຄື່ອນໄຫວວຽກງານໃນໄລຍະຜ່ານມາ ທັງຮຽກຮ້ອງໃຫ້ເອົາໃຈໃສ່ ແລະ ເປັນເຈົ້າການໃນການລົງຄະແນນສຽງທາບທາມບຸກຄະລາກອນເທື່ອນີ້ ໃຫ້ຖືກຕ້ອງຕາມລະບຽບຫຼັກການ ແລະ ຄວາມເປັນຈິງ. ຈາກນັ້ນ, ຄະນະຮັບຜິດຊອບກໍ່ໄດ້ດໍາເນີນການປ່ອນບັດທາບທາມບຸກຄະລາກອນຮອບທີ 1 ສຳເລັດຢ່າງຈົບງາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຢ້ຽມຢາມທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫລວງວຽງຈັນ

ຈໍານວນຜູ້ເຂົ້າຊົມ: 470

ສວສສຊ ຢ້ຽມຢາມທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫລວງວຽງຈັນ

ເພື່ອເປັນການສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ II ຂອງອົງຄະນະພັກ ສວສສຊ ທີ່ຈະມາເຖິງນີ້. ໃນຕອນເຊົ້າຂອງວັນທີ 19 ກໍລະກົດ 2025 ທີ່ຜ່ານມາ, ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ນໍາພາຄະນະພັກ-ຄະນະນຳຂອງບັນດາຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍສະມາຊິກພັກ, ພະນັກງານລັດຖະກອນ ໄປຢ້ຽມຢາມ ບໍລິສັດທ່າບົກທ່ານາແລ້ງ (THANALENG DRY PORT Sole CO., LTD). ຈຸດປະສົງຂອງການຢ້ຽມຢາມໃນຄັ້ງນີ້ ເພື່ອຮັບຟັງການດຳເນີນວຽກງານຄຸ້ມຄອງນໍາເຂົ້າ-ສົ່ງອອກສິນຄ້າ ແລະ ການຂົນສົ່ງສິນຄ້າພາຍໃນ-ຕ່າງປະເທດ ທັງເກັບກຳຂໍ້ມູນ, ຄຳສະເໜີນໍາໄປຄົ້ນຄວ້າ ແລະ ຮັບໃຊ້ເຂົ້າໃນການແກ້ໄຂສະພາບເສດຖະກິດ-ການເງິນຂອງລາວໃຫ້ຂາດຕົວ.

ໃນໂອກາດນີ້, ທ່ານ ສີລາ ວຽງແກ້ວ. ປະທານສະພາບໍລິຫານ ບໍລິສັດປີໂຕຣລ້ຽມເທຣດດິ້ງລາວ ມະຫາຊົນ ໄດ້ກ່າວຕ້ອນຮັບ ແລະ ສະເໜີປະຫວັດຄວາມເປັນມາຂອງບໍລິສັດໂດຍຫຍໍ້ ບາງຕອນວ່າ: ການສ້າງທ່າບົກທ່ານາແລ້ງ ແມ່ນໂຄງການໜຶ່ງທີ່ສຳຄັນຂອງລັດຖະບານ ເພື່ອຍົກລະດັບການຄຸ້ມຄອງນໍາເຂົ້າ-ສົ່ງອອກສິນຄ້າໃຫ້ມີປະສິດທິພາບ, ສ້າງແຫຼ່ງລາຍຮັບທີ່ສໍາຄັນເຂົ້າລັດ ໂດຍການຮ່ວມມືກັບພາກເອກະຊົນໃນການລົງທຶນ ແລະຄຸ້ມຄອງດໍາເນີນ ທຸລະກິດ. ໂຄງການດັ່ງກ່າວກວມມີເນື້ອທີ່ທັງໝົດ 418 ເຮັກຕາ. ໃນນັ້ນ ສ້າງເປັນຈະເຂດໂລຊິດສະຕິກ ກວມ 327 ເຮັກຕາ ແລະ ເຂດທ່າບົກທ່ານາແລ້ງ ກວມ 98 ເຮັກຕາ ຄາດຄະເນມູນຄ່າການລົງທຶນ 527 ລ້ານໂດລາສະຫະລັດ. ມາຮອດປັດຈຸບັນ ບໍລິສັດໄດ້ສຳເລັດການພັດທະນາໂຄງການໄລຍະທີ I ແລະ ຈະສືບຕໍ່ປະຕິບັດໂຄງການໄລຍະທີ II ໃນການກໍ່ສ້າງເຂດໂລຊິດສະຕິກ ເຊິ່ງປະກອບມີ 8 ເຂດພັດທະນາຄື: ເຂດສາງເກັບມ້ຽນນໍ້າມັນເຊື້ອໄຟ, ເຂດຜະລິດສົ່ງອອກ (ເຂດອຸດສາຫະກໍາເບົາ), ເຂດໂລຊິດສະຕິກພາກ (ເຂດສາງສິນຄ້າ ແລະ ສາງເຢັນ), ເຂດການຄ້າເສລີ, ເຂດເຕັກໂນໂລຊີ, ເຂດການເງິນ, ເຂດໂຮງງານກັ່ນ ແລະ ຫຼອມຄໍາ ແລະ ເຂດກັກກັນພືດ-ສັດ, ຄາດໝາຍການກໍ່ສ້າງຈະໃຫ້ສຳເລັດພາຍໃນ 3 ປີຂ້າງໜ້າ.

ທ່ານ ສາຄອນ ພິລາງາມ, ຜູ້ອຳນວຍການໃຫຍ່ບໍລິສັດທ່າບົກທ່ານາແລ້ງ ໄດ້ລາຍງານການພັດທະນາໂຄງການຕື່ມວ່າ: ໂຄງການນີ້ເປັນການຜັນຂະຫຍາຍແນວທາງນະໂຍບາຍ, ແຜນຍຸດທະສາດຂອງພັກ ແລະ ລັດຖະບານໃນການສ້າງປະເທດລາວໃຫ້ກາຍເປັນທາງຜ່ານເຊື່ອມໂຍງເຊື່ອມຈອດອອກສູ່ສາກົນ ຜ່ານທາງບົກ, ທາງເຮືອ ແລະ ທາງອາກາດ (3 Links) ເພື່ອຍົກລະດັບມູນຄ່າເພີ່ມ ແລະ ແຂ່ງຂັນວຽກງານບໍລິການ, ການຂົນສົ່ງ, ການຄ້າຂອງລາວ ແລະ ບັນດາປະເທດໃກ້ຄຽງ ຕາມແລວທາງເສັ້ນທາງລົດໂຟລາວ-ຈີນ ໃຫ້ມີຄວາມສະດວກ, ວ່ອງໄວ ແລະ ມີປະສິດທິຜົນ, ເປັນທ່າບົກທີ່ໄດ້ມາດຕະຖານສາກົນຈາກອົງການສະຫະປະຊາຊາດ. ບໍລິສັດຍັງໄດ້ສຶກສາ ແລະ ລົງທຶນໃນເຂດໂລຊິດສະຕິກລິ້ງ ເຊັ່ນ: ເຂດໂລຊິດສະຕິກຢູ່ແຂວງບໍ່ແກ້ວ, ແຂວງຄຳມ່ວນ ແລະ ເຂດໂລຊິດສະຕິກຢູ່ນະຄອນຫຼວງວຽງຈັນ, ທ່າເຮືອຫວຸງອ່າງ ສສ ຫວຽດນາມ ແລະ ເສັ້ນທາງລົດໄຟວຽງຈັນ-ຮ່າໂນ້ຍ ທັງໝົດນີ້ຈະເຮັດໃຫ້ລາວສາມາດເຊື່ອມໂຍງ ກາຍເປັນປະເທດທາງຜ່ານອອກສູ່ທະເລ ແລະ ປາຊີຟິກ ຊ່ວຍຊຸກຍູ້ການຜະລິດເປັນສິນຄ້າ, ການຄ້າ, ການລົງທຶນ ແລະ ການທ່ອງທ່ຽວໃຫ້ສູງຂຶ້ນໃນອະນາຄົດ. ຜ່ານການເປີດໃຫ້ບໍລິການນັບແຕ່ປີ 2021 ເຖິງປັດຈຸບັນ ສາມາດສ້າງລາຍຮັບລວມທັງໝົດ 114.5 ພັນຕື້ກີບ, ສຳລັບ 6 ເດືອນຕົ້ນປີ 2025 ບັນລຸໄດ້ 7 ພັນຕື້ກວ່າກີບ ເພີ່ມຂຶ້ນ 27% ຂອງແຜນທີ່ວາງໄວ້.

ຕໍ່ກັບຜົນສຳເລັດຂອງບໍລິສັດທີ່ຍາດມາໄດ້ນັ້ນ, ທ່ານ ປອ. ກອງແກ້ວ ໄຊສົງຄາມ ປະທານ ສວສສຊ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ການຕ້ອນຮັບອັນອົບອຸ່ນ ຈາກຄະນະບໍລິສັດທ່າບົກທ່ານາແລ້ງ ທີ່ໄດ້ລາຍງານສະພາບຄວາມເປັນມາ, ວິໄສທັດ ແລະ ການດຳເນີນວຽກງານໂລຊິດສະຕິກຂອງບໍລິສັດ ເຊິ່ງເປັນຂໍ້ມູນ, ເປັນບົດຮຽນທີ່ດີໃຫ້ແກ່ນັກຄົ້ນຄວ້າຂອງສະຖາບັນ ໄດ້ນໍາໄປຜັນຂະຫຍາຍເປັນແນວທາງການຄົ້ນຄວ້າວິທະຍາສາດໃນຂົງເຂດທີ່ກ່ຽວຂ້ອງໃຫ້ເລິກເຊິ່ງຍິ່ງຂຶ້ນໃນຕໍ່ໜ້າ, ທັງສອງຝ່າຍຍັງໄດ້ແລກປ່ຽນຄຳຄິດຄຳເຫັນ ແລະ ລົງເລິກຫຼາຍປະເດັ່ນທີ່ສໍາຄັນກ່ຽວກັບນິຕິກຳ ແລະ ລະບຽບການຄຸ້ມຄອງໂລຊິດສະຕິກ, ການດຶງດູດການລົງທຶນ, ການສ້າງຄວາມເຂັ້ມແຂງໃຫ້ພາກທຸລະກິດ ເພື່ອສົ່ງອອກ, ການສ້າງເຂດການຄ້າເສລີ ເປັນຕົ້ນ. ພາຍຫຼັງສຳເລັດການພົບປະຄະນະບໍລິສັດໄດ້ນໍາພາໄປຢ້ຽມຢາມໂຄງລ່າງພື້ນຖານຂອງບໍລິສັດ ເຊັ່ນ: ລະບົບການຄຸ້ມຄອງຕິດຕາມພາຫະນະຂົນສົ່ງ, ລະບົບແຈ້ງເອກະສານ ແລະ ເສຍພາສີອາກອນ, ລະບົບສາງເກັບມ້ຽນຄຽນຖ່າຍສິນຄ້າ-ຕູ້ສິນຄ້າ ແລະ ສິ່ງອໍານວຍຄວາມສະດວກອື່ນໆ.

ຂຽນຂ່າວ ແລະ ຖ່າຍພາບ: ວິໃຈ ເດດວົງສອນ

ຄະນະພັກ-ຄະນະນຳ ສວສສຊ ວາງພວງມາລາຕໍ່ຄອບຄົວພະນັກງານບໍານານ

ຈໍານວນຜູ້ເຂົ້າຊົມ: 394

ຄະນະພັກ-ຄະນະນຳ ສວສສຊ ວາງພວງມາລາຕໍ່ຄອບຄົວພະນັກງານບໍານານ

ຕອນເຊົ້າຂອງວັນທີ 12 ກໍລະກົດ 2024 ທີ່ຜ່ານນີ້, ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະພັກ-ຄະນະນໍາ, ພະນັກງານລັດຖະກອນ ທີ່ມາຈາກພາກສ່ວນຕ່າງໆພາຍໃນ ສວສສຊ ໄດ້ເຂົ້າວາງພວງມາລາ ແລະ ຮ່ວມກິນທານຕໍ່ການເສຍຊີວິດຂອງ ສະຫາຍ ບຸນຍັງ ໄຊຊະນະວົງ ເຊິ່ງເປັນຄອບຄົວຂອງ ສະຫາຍ ປອ. ນ. ອຳໄພວັນ ຄໍາແສງສີວິໄລ ພະນັກງານບຳນານ, ອະດີດຄະນະປະຈໍາພັກ, ອະດີດກຳມະການຄະນະພັກ, ອະດີດຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ນະໂອກາດດັ່ງກ່າວນີ້ ຄະນະພັກ-ຄະນະນໍາ ພ້ອມ ດ້ວຍພະນັກງານລັດຖະກອນທຸກສະຫາຍ ຂໍສະແດງຄວາມເສຍໃຈຢ່າງສຸດຊຶ້ງ ແລະ ຂໍແບ່ງເບົາຄວາມໂສກເສົ້າມາ ຍັງຄອບຄົວໄຊຊະນະວົງ, ຄອບຄົວຄໍາແສງສີວິໄລ ດ້ວຍ.