ໃນໂອກາດນີ້ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ ສວສສຊ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ຄະນະໜ່ວຍພັກຊຸດໃໝ່ ຈະຕ້ອງເອົາໃຈໃສ່ເພີ່ມທະວີສຶກສາອົບຮົມການເມືອງແນວຄິດ ໃຫ້ບັນດາຫົວໜ່ວຍການຈັດຕັ້ງ ແລະ ສະມາຊິກພັກ ຍຶດໝັ້ນອຸດົມການ, ທາດແທ້ ແລະ ມູນເຊື້ອປະຕິວັດຂອງພັກ, ດໍາເນີນການປັບປຸງບູລະນະກົງຈັກການຈັດຕັ້ງ ແລະ ກົນໄກບໍລິຫານຄຸ້ມຄອງໃຫ້ເຂັ້ມແຂງ. ໃນນັ້ນ ຕ້ອງເອົາໃຈໃສ່ຮັບປະ ກັນ 5 ດ້ານຄື:  ໜຶ່ງ) ກົງຈັກບໍ່ໃຫຍ່ໂຕ, ຕໍາແໜ່ງງານເໝາະສົມ, ພາລະບົດບາດຈະແຈ້ງຄົບຖ້ວນ, ບໍ່ຊ້ໍາຊ້ອນກ້າວກ່າຍກັນ; ສອງ) ສ້າງລະບົບກົນໄກ ແລະ ມີແບບແຜນວິທີເຮັດວຽກທີ່ດີ, ມີລັກສະນະໂລ່ງລ່ຽນ, ວ່ອງໄວມີປະສິດທິພາບ; ສາມ) ສາມາດຂັບເຄື່ອນແນວທາງ, ແຜນນະໂຍບາຍ ແລະ ລະບຽບກົດໝາຍໃຫ້ບັນລຸຕາມແຜນການທີ່ວາງໄວ້; ສີ່) ສ້າງຄວາມປອດໃສ ແລະ ຫ້າ) ບໍລິການຮັບໃຊ້ປະຊາຊົນຢ່າງສຸດໃຈ, ບໍ່ອາດຍາສິດ. ບົນພື້ນຖານການຄົ້ນຄວ້າ ແລະ ກໍານົດມາດຕະການສັບຊ້ອນພະນັກງານຢ່າງລະອຽດ ຈະຊ່ວຍຫລຸດຜ່ອນຕໍາແໜ່ງງານ ແລະ ຈໍານວນຄົນໃນຂົງເຂດບໍລິຫານລົງຢ່າງເໝາະສົມ ເພື່ອຫັນເປັນທັນສະໄໝ ແລະ ຫັນພະນັກງານຈາກຂົງເຂດບໍລິຫານໄປເພີ່ມເຂົ້າໃນຂົງເຂດຄົ້ນຄວ້າວິໄຈໃຫ້ພຽງພໍ ເພື່ອເຊີດຊູບົດບາດໜ້າທີ່ຂອງສະຖາບັນໃຫ້ສູງຍິ່ງຂຶ້ນ.