ຂ່າວການເຄື່ອນໄຫວ – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຜົນສຳເລັດຂອງເວທີສົນທະນາສາກົນສັງຄົມນິຍົມ ຄັ້ງທີ່ XI ພາຍໃຕ້ຫົວຂໍ້ “ລັດທິມາກໃນສະຕະວັດທີ XXI”

ຜົນສຳເລັດຂອງເວທີສົນທະນາສາກົນສັງຄົມນິຍົມ ຄັ້ງທີ່ XI ພາຍໃຕ້ຫົວຂໍ້ “ລັດທິມາກໃນສະຕະວັດທີ XXI”

ຈໍານວນຜູ້ເຂົ້າຊົມ: 159

ຜົນສຳເລັດຂອງເວທີສົນທະນາສາກົນສັງຄົມນິຍົມ ຄັ້ງທີ່ XI ພາຍໃຕ້ຫົວຂໍ້ “ລັດທິມາກໃນສະຕະວັດທີ XXI”

ເວທີສົນທະນາສາກົນສັງຄົມນິຍົມຄັ້ງທີ່ XI ໄດ້ຈັດຂຶ້ນໃນວັນທີ່ 8 ພະຈິກ 2024, ທີ່ ນະຄອນຫຼວງວຽງຈັນ, ສ.ປ.ປ. ລາວ, ພາຍໃຕ້ຫົວຂໍ້: “ລັດທິມາກໃນສັດຕະວັດທີ່ XXI”, ໂດຍການເປັນເຈົ້າພາບຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ; ຂຶ້ນເປັນປະທານຮ່ວມໂດຍ ສະຫາຍ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ; ສະຫາຍ ຮສ. ປອ. ຕະ ມິງ ຕວັນ, ຮອງປະທານ ສະຖາບັນດິດ ວິທະຍາສາດສັງຄົມ ສ.ສ. ຫວຽດນາມ ແລະ ສະຫາຍ ສຈ. ເສີນ ຈື້ກາງ, ຮອງຫົວໜ້າສະຖາບັນຄົ້ນຄວ້າລັດທິມາກ, ສະຖາບັນວິທະຍາສາດສັງຄົມຈີນ.

ເປັນກຽດ ເຂົ້າຮ່ວມເວທີສົນທະນາສາກົນສັງຄົມນິຍົມຄັ້ງນີ້ ມີການນຳຂັ້ນສູງ ຂອງບັນດາກະຊວງ-ອົງການ ແລະ ຂະແໜງການທີ່ກ່ຽວຂ້ອງຈຳນວນໜຶ່ງຂອງ ສ.ປ.ປ. ລາວ, ມີສະຫາຍເອກອັກຄະລັດຖະທູດຜູ້ມີອຳນາດເຕັມ ແຫ່ງ ສ. ກູບາ ປະຈຳ ສ.ປ.ປ. ລາວ, ຜູ້ຕາງໜ້າ ສະຖານທູດ ແຫ່ງ ສສ ຫວຽດນາມ, ຜູ້ຕາງໜ້າຈາກສະຖານທູດ ສ.ປ.ປ. ເກົາຫຼີ ແລະ ຜູ້ມີບັນດານັກຄົ້ນຄວ້າ, ນັກວິທະຍາສາດ, ຄູອາຈານ ຈາກສະຖາບັນຄົ້ນຄວ້າ ແລະ ສະຖາບັນການສຶກສາຂັ້ນສູງ ຂອງ ສ.ປ.ປ. ລາວ ແລະ ມີຜູ້ຕາງໜ້າ ຂອງບັນດາກະຊວງ ແລະ ຂະແໜງການກ່ຽວຂ້ອງ ທັງໝົດ 80 ກວ່າສະຫາຍ.

ເວທີສົນທະນາສາກົນສັງຄົມນິຍົມຄັ້ງນິ້ ດຳເນີນໄປເປັນເວລາ 1 ວັນເຕັມ. ໄດ້ຮັບຟັງການສະເໜີບົດວິທະຍາສາດທີ່ກ່ຽວຂ້ອງທັງໝົດ 23 ບົດ, ຈາກວິທະຍາກອນຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ, ສະຖາບັນດິດວິທະຍາສາດສັງຄົມ ສ.ສ. ຫວຽດນາມ ແລະ ສະຖາບັນວິທະຍາສາດສັງຄົມຈີນ, ໃນເວທີສົນທະນາ ນັກຄົ້ນຄວ້າ, ນັກວິທະຍາສາດ ໄດ້ປະກອບຄຳຄິດຄຳເຫັນ ແລະ ແລກປ່ຽນທັດສະນະເຊິ່ງກັນ ແລະ ກັນ ກ່ຽວກັບ “ສັງຄົມນິຍົມ”. ໂດຍໄດ້ແບ່ງອອກເປັນ 3 ວາລະໃຫຍ່ຄື: ວາລະທີ (1) “ທິດສະດີສັງຄົມນິຍົມທັນສະໄໝຕໍ່ການພັດທະນາແບບກົມກຽວ ແລະ ຍືນຍົງ”. ວາລະທີ (2) “ພືດຕິກຳ ກ່ຽວກັບສັງຄົມນິຍົມທັນສະໄໝ ກັບການພັດທະນາແບບກົມກຽວ ແລະ ຍືນຍົງ” ແລະ ວາລະທີ (3) ໄດ້ຮັບຟັງການສະເໜີບົດວິທະຍາສາດ, ສົນທະນາປຶກສາຫາລື ແລະ ແລກປ່ຽນຄຳຄິດຄຳເຫັນ ເຊິ່ງກັນ ແລະ ກັນ ກ່ຽວກັບ “ການຮ່ວມມື ເພື່ອການພັດທະນາແບບກົມກຽວ ແລະ ຍືນຍົງ”.

ໃນຕອນທ້າຍຂອງເວທີສົນທະນາ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດລາວ ໄດ້ຕາງໜ້າ ຄະນະປະທານເວທີສົນທະນາ ໄດ້ສະຫຼຸບສັງລວມເນື້ອໃນຈິດໃຈ ແລະ ຄຳຄິດຄຳເຫັນ ກ່ຽວກັບເວທີສົນທະນາສາກົນສັງຄົມນິຍົມ ພາຍໃຕ້ຫົວຂໍ້ “ທິດສະດີມາກໃນສັດຕະວັດທີ XXI” ໂດຍຫຍໍ້ຄື: (1) ທິດສະດີມາກ ມີຄວາມສໍາຄັນໃນປະຫວັດສາດຂອງສັງຄົມມະນຸດ, ຍັງມີຊີວິດຊີວາ ແລະ ຮຸ່ງເຮືອງເຫຼືອງເຫຼື້ອມໃນສັດຕະວັດທີ່ XXI, ຫຼາຍປະເທດ, ຫຼາຍພັກການເມືອງ ແລະ ຫຼາຍຂະບວນການເຄື່ອໄຫວທາງການເມືອງ, ເສດຖະກິດ ແລະ ສັງຄົມ ຍັງໝູນໃຊ້ ທິດສະດີດັ່ງກ່າວ ເປັນເຂັມຊີ້ທິດເຍືອງທາງ ໃຫ້ແກ່ການເຄື່ອນໄຫວຂອງຕົນ, (2) ພັກ ແລະ ລັດຖະບານ ຂອງ ສ.ປ.ປ. ລາວ, ສ.ສ. ຫວຽດນາມ ແລະ ສປ. ຈີນ ໄດ້ໝູນໃຊ້ ທິດສະດີມາກ ເປັນທວນໄຟອັນໃສແຈ້ງ ແລະ ເປັນເຂັມຊີ້ທິດເຍື່ອງທາງ ໃນການປົກປັກຮັກສາ ແລະ ສ້າງສາ-ພັດທະນາປະເທດຊາດຂອງຕົນ ເພື່ອກ້າວຂຶ້ນ ສັງຄົມນິຍົມ ເທື່ອລະກ້າວ ຕາມສະພາບຈຸດພິເສດ, ຄຸນຫຼັກສະນະ ແລະ ສີສັນຂອງຕົນ ແລະ (3) ມີແຕ່ການພັດທະນາກຳລັງການຜະລິດໃຫ້ກ້າວໜ້າ, ຂະຫຍາຍຕົວ, ທັນສະໄໝ ແລະ ມີປະສິດທິພາບສູງຂຶ້ນເລື້ອຍໆ ແລະ ສູງກວ່າ ກວ່າໃນລະບອບທຶນນິຍົມເທົ່ານັ້ນ ຈິ່ງຈະເປັນການສ້າງປະຖົມປັດໄຈ ຫຼື ເງື່ອນໄຂໃຫ້ພວກເຮົາ ກ້າວຂຶ້ນສູ່ສັງຄົມນິຍົມໄດ້.

ໂດຍລວມແລ້ວ, ສະພາບເວທີສົນທະນາຄັ້ງນີ້ ແມ່ນໄດ້ດໍາເນີນມາດ້ວຍບັນຍາກາດທີ່ຟົດຟື້ນ, ອົບອຸ່ນ, ເຕັມໄປດ້ວຍໄມຕີຈິດ-ມິດຕະພາບອັນສູງສົງ, ປະສົບຜົນສຳເລັດຕາມລະດັບຄາດໝາຍ ແລະ ໄດ້ສິ້ນສຸດລົງ ໃນເວລາ 17:30ຂອງວັນດຽວກັນ.

ຂຽນຂ່າວ ແລະ ຖ່າຍພາບ: ສວສສຊ

ສູນຂໍ້ມູນຂ່າວສານ ແລະ ຝຶກອົບຮົມ ພົບປະແລກປ່ຽນບົດຮຽນກັບ ຖວທ ແຂວງໄຊຍະບູລີ

ສູນຂໍ້ມູນຂ່າວສານ ແລະ ຝຶກອົບຮົມ ພົບປະແລກປ່ຽນບົດຮຽນກັບ ຖວທ ແຂວງໄຊຍະບູລີ

ຈໍານວນຜູ້ເຂົ້າຊົມ: 67

ສູນຂໍ້ມູນຂ່າວສານ ແລະ ຝຶກອົບຮົມ ພົບປະແລກປ່ຽນບົດຮຽນກັບ ຖວທ ແຂວງໄຊຍະບູລີ

ຕອນເຊົ້າຂອງວັນທີ 1 ພະຈິກ 2024, ທີ່ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງໄຊຍະບູລີ, ສູນຂໍ້ມູນຂ່າວສານ ແລະ ຝຶກອົບຮົມ (ສວສສຊ) ໄດ້ເຂົ້າຮ່ວມພົບປະແລກປ່ຽນບົດຮຽນ ກັບ ຖວທ ແຂວງ ໄຊຍະບູລີ; ນໍາພາຄະນະໂດຍ ທ່ານ ນ. ພູຄຽງ ໄຊສິລິ ຮອງຫົວໜ້າ ສຂຝ; ພ້ອມດ້ວຍຫົວໜ້າພະແນກ-ຮອງພະແນກ ແລະ ວິຊາການທີ່ກ່ຽວຂ້ອງທັງໝົດ 7 ທ່ານ; ຕາງໜ້າຕ້ອນຮັບທີມງານສູນຂໍ້ມູນຂ່າວສານ ແລະ ຝຶກອົບຮົມ ໂດຍ ທ່ານ ກອງໄລ ວິໄລພອນ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງໄຊຍະບູລີ ພ້ອມດ້ວຍຫົວໜ້າຂະແໜງ-ຮອງຂະແໜງ ແລະ ຄະນະຮັບຜິດວຽກງານທີ່ກ່ຽວຂ້ອງເຂົ້າຮ່ວມຈໍານວນ 28 ທ່ານ.

ໃນກອງປະຊຸມ ທ່ານ ສຸກນິລັນ ແສງພະຈັນ ຮອງຫົວໜ້າ ສຂຝ ໄດ້ສະເໜີຈຸດປະສົງ, ລາຍງານກ່ຽວກັບພາລະບົດບາດ ແລະ ການເຄື່ອນໄຫວວຽກງານໂດຍຫຍໍ້ບາງຕອນວ່າ: ສູນຂໍ້ມູນຂ່າວສານ ແລະ ຝຶກອົບຮົມ ແມ່ນອົງການວິຊາການໜຶ່ງ ໃນໂຄງປະກອບກົງຈັກການຈັດຕັ້ງຂອງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ມີພາລະບົດບາດເປັນເສນາທິການໃຫ້ກັບ ສວສສຊ ໃນການຄົ້ນຄວ້າສ້າງຖານຂໍ້ມູນຂ່າວສານ, ຝຶກອົບຮົມ, ໃຫ້ບໍລິການ ແລະ ເຜີຍແຜ່ຂໍ້ມູນຂ່າວສານດ້ານວິທະຍາສາດເສດຖະກິດ-ສັງຄົມ ອອກສູ່ພາຍນອກ ໂດຍຜ່ານສື່ຕ່າງໆ ໃນໄລຍະຊຸມປີຜ່ານມາສູນໄດ້ສຸມໃສ່ການພັດທະນາພື້ນຖານໂຄງລ່າງ ແລະ ດ້ານເຕັກນິກຂໍ້ມູນຂ່າວສານການຄຸ້ມຄອງເວບໄຊ ລວມທັງການຜະລິດຂໍ້ມູນຕ່າງໆ ໃວ້ບໍລິການໃຫ້ແກ່ນັກຄົ້ນຄວ້າ; ຈາກນັ້ນ ທ່ານ ກອງໄລ ວິໄລພອນ ກໍ່ໄດ້ລາຍງານພາລະບົດບາດ ແລະ ສະພາບລວມຂອງວຽກງານ ຖວທ ແຂວງ ໄຊຍະບູລີ ວ່າ: ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ໄຊຍະບູລີ ແມ່ນກົງຈັກການຈັດຕັ້ງໜຶ່ງ ຂອງອົງການປົກຄອງແຂວງ, ມີພາລະບົດບາດເປັນເສນາທິການຊ່ວຍອົງການປົກຄອງແຂວງໄຊຍະບູລີ ແລະ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດຖະບານ ກໍ່ຄືແຜນພັດທະນາເສດຖະກິດ-ສັງຄົມ ຂອງແຂວງວາງອອກໃຫ້ປະກົດຜົນເປັນຈິງ. ດ້ວຍການພັດທະນາ ແລະ ປຸກລະດົມຂົນຂວາຍປະຊາຊົນທຸກຊັ້ນຄົນ ປະກອບໃສ່ໃນການຈັດຕັ້ງປະຕິບັດບັນດາຄາດໝາຍຕ່າງໆ ໃຫ້ສໍາເລັດ, ພ້ອມນັ້ນກໍ່ໄດ້ຄຸ້ມຄອງບໍລິການ ແລະ ອອກອະນຸຍາດຕໍ່ການພັດທະນາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໃນຂອບເຂດທົ່ວແຂວງໄຊຍະບູລີ.

ທັງສອງຝ່າຍໄດ້ລົງເລິກແລກປ່ຽນກ່ຽວກັບວຽກງານຂໍ້ມູນຂ່າວສານ, ວຽກງານຫໍສະໝຸດ ແລະ ວຽກງານການບໍລິຫານຈັດການເວັບໄຊ; ເຊິ່ງໄດ້ພ້ອມກັນຮັບຟັງ ແລະ ແລກປ່ຽນຄໍາຄິດເຫັນຢ່າງກົງໄປກົງມາ ດ້ວຍຄວາມຮັບຜິດຊອບສູງ, ເປັນບົດຮຽນອັນສໍາຄັນໃຫ້ແກ່ການປັບປຸງ ແລະ ພັດທະນາວຽກງານຂອງຕົນ ມີທັງຂໍ້ສະດວກ, ຂໍ້ຍຸ້ງຍາກ ແລະ ທິດທາງແຜນການໃນຕໍ່ໜ້າ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ແກ້ວວິວັນ ສີວິໄລ

ສູນຂໍ້ມູນຂ່າວສານ ແລະ ຝຶກອົບຮົມ ໄຂກອງປະຊຸມ ສະມາຊິກກໍາມະບານຮາກຖານຄັ້ງທີ I

ສູນຂໍ້ມູນຂ່າວສານ ແລະ ຝຶກອົບຮົມ ໄຂກອງປະຊຸມ ສະມາຊິກກໍາມະບານຮາກຖານຄັ້ງທີ I

ຈໍານວນຜູ້ເຂົ້າຊົມ: 65

ສູນຂໍ້ມູນຂ່າວສານ ແລະ ຝຶກອົບຮົມ ໄຂກອງປະຊຸມ ສະມາຊິກກໍາມະບານຮາກຖານຄັ້ງທີ I

ວັນທີ 29 ຕຸລາ 2024 ທີ່ຜ່ານມານີ້, ສູນຂໍ້ມູນຂ່າວສານ ແລະ ຝຶກອົບຮົມ ໄດ້ໄຂກອງປະຊຸມ ສະມາຊິກກໍາມະບານຮາກຖານຂອງສູນຂໍ້ມູນຂ່າວສານ ແລະ ຝຶກອົບຮົມ ຄັ້ງທີ I ຂຶ້ນຢ່າງເປັນທາງການ, ໂດຍການເປັນປະຮ່ວມຂອງ ສະຫາຍ ເດືອນສະຫວັນ ພອນມີໄຊ ຮັກສາການເລຂາໜ່ວຍພັກ, ວ່າການແທນຫົວໜ້າ ສຂຝ, ມີ ສະຫາຍ ພອນ ວິພົນຮຽນ ປະທານ ສະຫະພັນກຳມະບານ ສວສສຊ, ສະຫາຍ ສຸກນິລັນ ແສງພະຈັນ ປະທານກໍາມະບານຮາກຖານ ສຂຝ, ມີຮອງປະທານກໍາມະບານຮາກຖານ, ຜູ້ຕາງໜ້າຈາກອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກຳມະບານຮາກຖານ ອ້ອມຂ້າງ ພ້ອມດ້ວຍສະມາຊິກກໍາມະບານຮາກຖານ ສຂຝ ເຂົ້າຮ່ວມ ຈໍານວນ 28 ສະຫາຍ.

ກອງປະຊຸມໄດ້ຜ່ານບົດລາຍງານການເມືອງ ແລະ ຜ່ານບົດສໍາຫຼວດການນໍາພາຂອງຄະນະກໍາມະບານຮາກຖານຊຸດເກົ່າ ເພື່ອສໍາຫລວດ, ກວດກາ ແລະ ຕີລາຄາການນໍາພາ-ຊີ້ນໍາ ທາງດ້ານວຽກງານແນວຄິດ ກໍ່ຄືການເຄື່ອນໄຫວຈັດຕັ້ງປະຕິບັດວຽກງານກໍາມະບານເວົ້າລວມ, ກໍາມະບານປະຕິບັດຂໍ້ແຂ່ງຂັນ 2 ດີ 5 ເປັນເຈົ້າ, ໃນຊຸມປີຜ່ານມາ ແລະ ຄົ້ນຄວ້າກຳນົດວຽກງານຈຸດສຸມຂອງກໍາມະບານຮາກຖານໃນຕໍ່ໜ້າ.

ໃນໂອກາດນີ້ ສະຫາຍ ສະຫາຍ ເດືອນສະຫວັນ ພອນມີໄຊ ໄດ້ມີຄໍາເຫັນບາງຕອນຕໍ່ກອງປະຊຸມວ່າ: ກອງປະຊຸມໃຫຍ່ຂອງກຳມະບານຮາກຖານ ສຂຝ ຄັ້ງນີ້ ມີຄວາມໝາຍຄວາມສໍາຄັນຢ່າງຍິ່ງ ໃນຊີວິດການເມືອງຂອງ ສະມາຊິກກຳມະບານ ໃນການຕີລາຄາດ້ານດີ, ດ້ານອ່ອນ ແລະ ຂໍ້ຄົງຄ້າງໃນໄລຍະຜ່ານມາ, ໃນບົດລາຍງານການເມືອງໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານ ແລະ ຄວາມພະຍາຍາມສູ້ຊົນປະຕິບັດໜ້າທີ່ຕາມພາລະບົດບາດຂອງສະມາຊິກກຳມະບານວາງອອກ ໃຫ້ໄດ້ຮັບຜົນສຳເລັດເປັນຢ່າງດີ. ພ້ອມດຽວກັນນັ້ນ ສະຫາຍ ຍັງໄດ້ເນັ້້ນໜັກໃຫ້ກຳມະບານຮາກຖານຊຸດໃໝ່ເອົາໃຈໃສ່ ກໍ່ສ້າງຖັນແຖວສະມາຊິກກໍາມະບານ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ປະຕິບັດພາລາບົດບາດ, ສິດ ແລະ ໜ້າທີ່ຂອງກຳມະບານ, ສ້າງຂະບວນການເຄື່ອນໄຫວຢ່າງເປັນປົກກະຕິ ເພື່ອຍົກສູງຄວາມສາມັກຄີທັງພາຍໃນ ແລະ ພາຍນອກ, ສູ້ຊົນປະຕິບັດຂໍ້ແຂ່ງຂັນ 2 ດີ 5 ເປັນເຈົ້າ ຂອງສະຫະພັນກໍາມະບານລາວ ໃຫ້ປະກົດຜົນເປັນຈິງ; ເອົາໃຈໃສ່ ສືບຕໍ່ກໍ່ສ້າງສະມາຊິກກໍາມະບານ ໃຫ້ກາຍເປັນມະຫາຊົນຜູ້ກ້າວໜ້າທີ່ມີຄວາມຮູ້, ຄວາມສາມາດທາງດ້ານວິຊາການ ຮັບປະກັນຄວາມສໍາເລັດຂອງວຽກງານທີ່ຂັ້ນເທິງມອບໝາຍໃຫ້ເປັນຢ່າງດີທາງປະລິມານ ແລະ ຄຸນນະພາບ.

ກອງປະຊຸມໄດ້ປ່ອນບັດຄັດເລືອກເອົາຄະນະກໍາມະບານຮາກຖານ ສຂຝ ຊຸດໃໝ່ ເຊິ່ງໄດ້ເລືອກເອົາ:

1. ສະຫາຍ ສຸກນິລັນ ແສງພະຈັນ ເປັນປະທານກໍາມະບານຮາກຖານ ສຂຝ.

2.ສະຫາຍ ນ. ດວງໃຈ ໂລວັນ ເປັນຮອງປະທານກໍາມະບານຮາກຖານ ສຂຝ.

3.ສະຫາຍ ທະນົງສຸກ ບຸນປະເສີດ ເປັນຄະນະກໍາມະບານຮາກຖານ ສຂຝ.

ເພື່ອສືບຕໍ່ເສີມຂະຫຍາຍ ບັນດາຄາດໝາຍ ແລະ ຈຸດສຸມແຜນວຽກຂອງກໍາມະບານໃຫ້ກ້າວເຂົ້າສູ່ລົງເລິກ, ຮອບດ້ານ; ສະຫາຍ ພອນວິພົນຮຽນ ປະທານກໍາມະບານ ສວສສຊ ໄດ້ມີຄໍາເຫັນບາງຕອນຕໍ່ກອງປະຊຸມວ່າ: ບັນດາສະຫາຍ ຄະນະກໍາມະບານຮາກຖານຊຸດໃໝ່ ກໍ່ຄືສະມາຊິກກໍາມະບານທຸກສະຫາຍ ແມ່ນກໍາລັງແຮງທີ່ສໍາຄັນຂອງປະເທດຊາດ, ເປັນຜູ້ສືບທອດພາລະກິດຂອງພັກ, ຕ້ອງພ້ອມພຽງກັນຕັ້ງໜ້າຝຶກຝົນຫຼໍ່ຫຼອມ, ຮໍ່າຮຽນເອົາຄຸນສົມບັດສິນທໍາປະຕິວັດ ແລະ ຕັ້ງໜ້າເຄື່ອນໄຫວນໍາພາວຽກງານຂອງຕົນໃຫ້ໄດ້ຮັບຜົນສໍາເລັດ ຮຽນຮູ້ໃນການປຸກລະດົມຄວາມຫ້າວຫັນ ແລະ ພັດທະນາຕົນເອງເພື່ອສ້າງໃຫ້ອົງການກໍາມະບານມີຄວາມເຂັ້ມແຂງ. ພ້ອມດຽວກັນນັ້ນ, ໃຫ້ສືບຕໍ່ເອົາໃຈໃສ່ ຜັນຂະຫຍາຍມະຕິກອງປະຊຸມໃຫຍ່ຜູ້ແທນກໍາມະບານທົ່ວປະເທດຄັ້ງທີ VIII, ມະຕິກອງປະຊຸມໃຫຍ່ຂອງສະມາຊິກພັກ ສວສສຊ, ໃຫ້ປະກົດຜົນເປັນຈິງ, ສ້າງຂະບວນການກະກຽມຕ້ອນຮັບກອງປະຊຸມໃຫຍ່ກໍາມະບານ ສວສສຊ ຄັ້ງທີ I ເຊິ່ງຈະຈັດຂຶ້ນໃນທ້າຍປີ 2024; ພ້ອມທັງເອົາໃຈໃສ່ປະຕິບັດໜ້າທີ່ຂອງຕົນຢ່າງຕັ້ງໜ້າ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ມຸນິນ ພົນສັກດາ

ສວສສຊ ເຜີຍແຜ່ຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ

ສວສສຊ ເຜີຍແຜ່ຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ

ຈໍານວນຜູ້ເຂົ້າຊົມ: 163

ສວສສຊ ເຜີຍແຜ່ຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ

ວັນທີ 22 ຕຸລາ 2024; ທີ່ຜ່ານມານີ້, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ໄດ້ຈັດກອງປະຊຸມເຜີຍແຜ່ເອກະສານການຊຳລະສະສາງຊັບສິນຂອງລັດ ໂດຍການເປັນປະທານຂອງ ທ່ານ ເພັດໃສ ເພຍເທບ, ຫົວໜ້າຫ້ອງການສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີບັນດາຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນ ແລະ ພະນັກງານບໍານານ ຜູ້ທີ່ມີເງື່ອນໄຂໃນການຫັນກຳມະສິດນໍາໃຊ້ລົດຂອງລັດ ມາເປັນກໍາມະສິດນໍາໃຊ້ສ່ວນຕົວ ຕາມນະໂຍບາຍຂອງລັດຖະບານໄດ້ວາງອອກ;

ຈຸດປະສົງຂອງກອງປະຊຸມຄັ້ງນີ້ ເພື່ອເຜີຍແຜ່ ແລະ ເຊື່ອມຊຶມບັນດາເນື້ອໃນເອກະສານສໍາຄັນຂອງລັດຖະ ບານໃຫ້ກັບພະນັກງານບໍານານ ລວມທັງພະນັກງານປະຈໍາການ ທຸກເປົ້າໝາຍທີ່ນໍາໃຊ້ລົດຂອງລັດ ໄດ້ມີຄວາມຮັບຮູ້ ແລະ ເຂົ້າໃຈຖືກຕ້ອງໃນການນໍາໃຊ້ ແລະ ຄຸ້ມຄອງລົດຂອງລັດ ເພື່ອນໍາໄປຈັດຕັ້ງປະຕິບັດຢ່າງເຂັ້ມງວດ ແລະ ເປັນເອກະພາບກັນໃນທົ່ວປະເທດ; ພ້ອມດຽວກັນ ກໍເປັນຊຸກຍູ້ການວາງແຜນ ແລະ ຈັດຕັ້ງປະຕິບັດການສະສາງລົດ ທີ່ຢູ່ ພາຍໃຕ້ການຄຸ້ມຄອງຂອງ ສວສສຊ ໃຫ້ສຳເລັດຕາມຄາດໝາຍໃນປີ 2024.

ໃນກອງປະຊຸມ, ທ່ານ ສົມບູນ ແກ່ນປະເສີດ, ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ໄດ້ຂຶ້ນເຜີຍແຜ່ 3 ເອກະສານສໍາຄັນຄື: 1). ຄຳແນະນຳກ່ຽວກັບການຈັດຕັ້ງປະຕິບັດຕາມຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການສະສາງລົດລັດ ສະບັບ ເລກທີ 169/ນຍ, ລົງວັນທີ 28 ທັນວາ 2023; 2). ດຳລັດວ່າດ້ວຍລົດຂອງລັດ ສະບັບ ເລກທີ 599/ລບ, ລົງວັນທີ 29 ກັນຍາ 2021 ແລະ 3). ປື້ມຄູ່ມືກ່ຽວກັບການສະສາງລົດຂອງລັດ ເຊິ່ງໃນບັນດາເອກະສານດັ່ງກ່າວ ມີເນື້ອໃນແນະນໍາກ່ຽວກັບການຄຸ້ມຄອງ, ນໍາໃຊ້ຊັບສິນຂອງລັດໂດຍລະອຽດຈະແຈ້ງ ກ່ຽວກັບການກໍານົດຫຼັກການ, ເປົ້າໝາຍ, ເງື່ອນໄຂ, ຂັ້ນຕອນການສະສາງ, ການຖອດຄືນລົດຂອງລັດ. ຜ່ານການຮັບຟັງ ບັນດາເອກະສານສໍາຄັນເຫຼົ່ານີ້ ຜູ້ເຂົ້າຮ່ວມໄດ້ມີການແລກປ່ຽນຄຳຄິດຄຳເຫັນ ໃນບາງປະເດັນທີ່ມີຄວາມສົນໃຈ, ສ້າງຄວາມເຂົ້າໃຈຂຶ້ນຕື່ມ ໃຫ້ມີຄວາມເປັນເອກະພາບ ຕໍ່ກັບການຈັດຕັ້ງປະຕິບັດນິຕິກຳດັ່ງກ່າວ, ທັງເປັນບ່ອນອີງໃຫ້ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຫັນເຂົ້າສູ່ໃນການລະບຽບຫຼັກການຄຸ້ມຄອງລົດຂອງລັດ ທີ່ນໍາໃຊ້ໃນປັດຈຸບັນ ໃຫ້ຖືກຕ້ອງຕາມລະບຽບຫຼັກການ.

ຂຽນຂ່າວ ແລະ ຖ່າຍພາບ: ມຸນິນ ພົນສັກດາ

ປະທານ ສວສສຊ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນຈາກແຂວງຮ່າຕິງ ສສ. ຫວຽດນາມ

ປະທານ ສວສສຊ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນຈາກແຂວງຮ່າຕິງ ສສ. ຫວຽດນາມ

ຈໍານວນຜູ້ເຂົ້າຊົມ: 174

ປະທານ ສວສສຊ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນຈາກແຂວງຮ່າຕິງ ສສ. ຫວຽດນາມ

ໃນວັນທີ 23 ຕຸລາ 2024 ທີ່ຫ້ອງຮັບແຂກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍບັນດາຫົວໜ້າຫ້ອງການ, ກົມ, ຫົວໜ້າສະຖາບັນຄົ້ນຄວ້າທີ່ຂຶ້ນກັບ ສວສສຊ; ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນແຂວງຮ່າຕິງ, ສສ ຫວຽດນາມ ນໍາໂດຍ ສະຫາຍ ຫວໍ ຈ້ອງ ຮ໋າຍ, ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງຮ່າຕິງ, ສສ ຫວຽດນາມ ພ້ອມດ້ວຍຄະນະ;

ໃນໂອກາດນີ້ ສະຫາຍ ປອ. ກອງແກ້ວ ໄຊສົງຄາມ, ໄດ້ລາຍງານບາງຈຸດພິເສດ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດວ່າ: ສວສສຊ ມີພາລະບົດບາດ ເປັນເສນາທິການໃຫ້ແກ່ພັກ ແລະ ລັດຖະບານ ໃນການຄົ້ນຄ້ວາ, ສະໜອງຂໍ້ມູນຂ່າວສານ ທາງດ້ານວິທະຍາສາດເສດຖະກິດ ແລະ ສັງຄົມ, ເພື່ອຮັບໃຊ້ໃນການວາງແນວທາງນະໂຍບາຍຂອງພັກ, ວິໄສທັດ, ແຜນຍຸດທະສາດ, ແຜນພັດທະນາເສດຖະກິດ ແລະ ສັງຄົມ ໃນແຕ່ລະໄລຍະ; ມີໜ້າທີ່ໃນການຄົ້ນຄ້ວາບັນຫາເສດຖະກິດ-ສັງຄົມ, ການເມືອງ ແລະ ບັນຫາອື່ນໆຕາມການມອບໝາຍ; ໃນປັດຈຸບັນ ສວສສຊ ມີປະທານສະຖາບັນ 1 ທ່ານ, ຮອງປະທານ 2 ທ່ານ, ມີໂຄງປະກອບກົງຈັກການຈັດຕັ້ງ ທີ່ທຽບເທົ່າກົມ 11 ຫົວໜ່ວຍ;

ຕາງໜ້າຄະນະຜູ້ແທນແຂວງຮ່າຕິງ, ສສ ຫວຽດນາມ ສະຫາຍ ຫວໍ ຈ້ອງ ຮ໋າຍ, ກໍ່ໄດ້ລາຍງານຜົນສໍາເລັດຂອງການເດີນທາງມາຢ້ຽມຢາມ ແລະ ເຮັດວຽກຂອງຄະນະຜູ້ແທນໃນຄັ້ງນີ້, ພ້ອມທັງກ່າວສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ທີ່ເຕັມໄປດ້ວຍໄມຕີຈິດມິດຕະພາບ ແບບອ້າຍນ້ອງ, ເພື່ອນມິດສະຫາຍ ແລະ ຄວາມຮັກແພງ ທີ່ສະແດງອອກຢ່າງສະເໝີຕົ້ນສະເໝີປາຍ.

ຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ເພື່ອເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ເວົ້າລວມ; ເວົ້າສະເພາະ ແຂວງຮ່າຕິງ, ສສ ຫວຽດນາມ ແລະ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮ່ວມກັນປຶກສາຫາລື ຊອກຫາກາລະໂອກາດການຮ່ວມມື ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາໃນ 2 ປະເທດ ລາວ ແລະ ສສ. ຫວຽດນາມ; ສະຫາຍ ຫວໍ ຈ້ອງ ຮ໋າຍ, ຫົວໜ້າຄະນະຜູ້ແທນແຂວງຮ່າຕິງ, ຍັງໄດ້ກ່າວເຊື້ອເຊີນ ສະຫາຍ ປອ. ກອງແກ້ວ ໄຊສົງຄາມ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ຫາໂອກາດເດີນທາງໄປຢ້ຽມຢາມ ແລະ ເຮັດວຽກຢ່າງເປັນທາງການທີ່ແຂວງຮ່າຕິງ, ສສ ຫວຽດນາມ ໃນເວລາທີ່ສະດວກ ແລະ ເໝາະສົມ ອີກດ້ວຍ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ (ສຂຝ)

ພິທີປະກາດການປະຕິບັດນະໂຍບາຍ ຂອງພະນັກງານຂັ້ນສູງອອກພັກການ-ຮັບອຸດໜູນບໍານານ

ພິທີປະກາດການປະຕິບັດນະໂຍບາຍ ຂອງພະນັກງານຂັ້ນສູງອອກພັກການ-ຮັບອຸດໜູນບໍານານ

ຈໍານວນຜູ້ເຂົ້າຊົມ: 277

ພິທີປະກາດການປະຕິບັດນະໂຍບາຍ ຂອງພະນັກງານຂັ້ນສູງອອກພັກການ-ຮັບອຸດໜູນບໍານານ

ພິທີປະກາດພະນັກງານຂັ້ນນໍາພາສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ອອກພັກການຮັບອຸດໜູນບໍານານ ໄດ້ຈັັດຂຶ້ນໃນຕອນບ່າຍຂອງວັນທີ 14 ຕຸລາ 2024, ພາຍໃຕ້ການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສວສສຊ, ມີຮອງເລຂາຄະນະບໍລິຫານງານພັກ, ບັນດາຄະນະພັກ-ຄະນະນຳສະຖາບັນ, ບັນດາຄະນະໜ່ວຍພັກ, ຫົວໜ້າ-ຮອງຫົວໜ້າຫ້ອງການ, ກົມ, ສະຖາບັນຄົ້ນຄ້ວາ, ສູນ, ຕາງໜ້າອົງການຈັດຕັ້ງມະຫາຊົນ, ພ້ອມທັງພະນັກງານຂັ້ນພະແນກ ເຂົ້າຮ່ວມຈໍານວນ 63 ທ່ານ, ຍີງ 29 ທ່ານ;

ໃນພິທີ ສະຫາຍ ປອ. ນາງ ວິໄລ ພິລາວົງ ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຕົກລົງ ສະບັບເລກທີ 251/ຄລສພ, ລົງວັນທີ 30/08/2024; ຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ ສະຫາຍ ປອ. ນາງ ຂັນລາສີ ແກ້ວບຸນພັນ ກໍາມະການຄະນະພັກ, ຮອງປະ ທານ ສວສສຊ ອອກພັກການ-ຮັບອຸດໜູນບໍານານ.

ໃນໂອກາດນີ້ ສະຫາຍ ປອ.ກອງແກ້ວ ໄຊສົງຄາມ ໄດ້ມີຄໍາເຫັນໂອ້ລົມຕໍ່ພິທີວ່າ: ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປະກາດການປະຕິບັດນະໂຍບາຍຂອງພະນັກງານຂັ້ນນໍາພາ ສວສສຊ ອອກພັກການ-ຮັບອຸດໜູນບໍານານ, ເຊິ່ງເປັນການນຳຂັ້ນສູງ, ເປັນພະນັກງານນຳພາ-ຄຸ້ມຄອງຂັ້ນຍຸດທະສາດຂອງສະຖາບັນ ເຂົ້າພັກການ-ຮັບອຸດໜຸນບຳນານຕາມນະໂຍບາຍ, ລະບຽບການຂອງພັກ ແລະ ລັດຖະບານ; ດັ່ງທີ່ພວກເຮົາຮູ້ນໍາກັນວ່າ ”ພະນັກງານ ແມ່ນກໍາລັງການເມືອງຫຼັກແຫຼ່ງຂອງພັກ”ເປັນຜູ້ຕັດສິນຜົນໄດ້ຜົນເສຍຂອງການຈັດຕັ້ງປະຕິບັດແນວທາງ, ນະໂຍບາຍຂອງພັກ-ລັດ, ໄດ້ຮັບການນໍາພາສຶກສາອົບຮົມຈາກພັກ, ຝຶກຝົນຫລໍ່ຫລອມໃຫ້ເປັນຜູ້ຈົ່ງຮັກພັກດີຮັບໃຊ້ປະຊາຊົນ, ຮັບໃຊ້ປະເທດຊາດດ້ວຍຄວາມບໍລິສຸດໃຈ, ຜ່ອງໃສ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ຖືກມອບໝາຍ; ເຖິງຢ່າງໃດກໍຕາມ, ວຽກງານບັນຈຸ, ຍົກຍ້າຍ, ສັບຊ້ອນ, ຈັດວາງ, ຊັບປ່ຽນບ່ອນປະຈໍາການ ແລະ ການເຂົ້າຮັບນະໂຍບາຍພັກການ-ຮັບອຸດໜຸນບຳນານຂອງພະນັກງານທຸກລະດັບ, ທຸກພາກສ່ວນ ແມ່ນຫລັກການ ແລະ ກໍ່ແມ່ນວຽກປົກກະຕິຂອງພັກເຮົາ ເຊິ່ງມະຕິຄະນະບໍລິຫານງານສູນກາງພັກເລກທີ 04 ວ່າດ້ວຍເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ, ວຽກງານພະນັກງານກໍ່ໄດ້ໃຫ້ທິດນໍາວ່າ ”ຮັບປະກັນຫລັກການ, ມີຂຶ້ນ-ມີລົງ, ມີເຂົ້າ-ມີອອກ ຕໍ່ພະນັກງານທຸກລະດັບ” ອັນນີ້ ເປັນຫຼັກການທີ່ເປັນວິທະຍາສາດຂອງພັກ. ໃນດ້ານລະບຽບການຄຸ້ມຄອງຂອງລັດ, ຕໍ່ກັບລັດຖະກອນ ກໍ່ໄດ້ມີກົດໝາຍວ່າດ້ວຍລັດຖະກອນ ສະບັບເລກທີ 74/ສພຊ ລົງວັນທີ 18 ທັນວາ 2015 ມາດຕາ 70 ກໍ່ໄດ້ລະບຸກ່ຽວກັບການຮັບອຸດໜຸນບຳນານ ໄວ້ຢ່າງຈະແຈ້ງແລ້ວ.

ສະຫາຍ ປອ. ກອງແກ້ວ ໄຊສົງຄາມ ຍັງໄດ້ກ່າວຍ້ອງຍໍຊົມເຊີຍຕໍ່ສະຫາຍ ປອ ນາງ ຂັນລາສີ ແກ້ວບຸນພັນ ວ່າ: ຈົນຮອດອາຍຸກະສຽນພັກການ ຮັບນະໂຍບາຍອຸດໜູນບໍານານ; ສະຫາຍ ຍັງໄດ້ເອົາໃຈໃສ່ສູ້ຊົນປະຕິບັດຈົນສໍາເລັດໜ້າທີ່ ທີ່ພັກ-ລັດ, ການຈັດຕັ້ງ, ໝູ່ຄະນະມອບໝາຍໃຫ້ ຢ່າງບໍ່ຂາດຕົກບົກພ່ອງ ແລະ ມີຄວາມເຊື່ອໝັ້ນຢ່າງສູງວ່າ ດ້ານຄຸນງາມຄວາມດີ, ດ້ານຄຸນສົມບັດສິນທໍາປະຕິວັດ, ຄວາມສັດຊື່ໂປ່ງໃສ ທີ່ສະຫາຍໄດ້ນໍາພາພະນັກງານ-ລັດຖະກອນທົ່ວ ສວສສຊ ໃນໄລຍະຜ່ານມາ ແມ່ນບໍ່ມີວັນລືມໄດ້ ແລະ ຂໍສະແດງຄວາມຊົມເຊີຍ ຕໍ່ຜົນສໍາເລັດທີ່ມີກຽດສະຫງ່າໃນຄັ້ງນີ້ ຢ່າງສຸດອົກສຸດໃຈ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ (ສຂຝ)

ສະຫະພັນແມ່ຍິງ ສວສສຊ ເປີດກອງປະຊຸມທາບທາມບຸກຄະລາກອນ ຮອບທີ I

ສະຫະພັນແມ່ຍິງ ສວສສຊ ເປີດກອງປະຊຸມທາບທາມບຸກຄະລາກອນ ຮອບທີ I

ຈໍານວນຜູ້ເຂົ້າຊົມ: 304

ສະຫະພັນແມ່ຍິງ ສວສສຊ ເປີດກອງປະຊຸມທາບທາມບຸກຄະລາກອນ ຮອບທີ I

ຄະນະບໍລິຫານງານສະຫະພັນແມ່ຍິງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປີດກອງປະຊຸມທາບທາມບຸກຄະລາກອນຮອບທີ I ຂອງກອງປະຊຸມໃຫຍ່ສະມາຊິກສະຫະພັນແມ່ຍິງຮາກຖານອ້ອມຂ້າງ ສວສສຊ ໃນຕອນບ່າຍຂອງວັນທີ 30 ກັນຍາ 2024; ໂດຍການເປັນປະທານຂອງ ສະຫາຍ ນ. ລັດດາວັນ ຊົງວິໄລ ຮັກສາການປະທານສະຫະພັນແມ່ຍິງ ສວສສຊ; ມີບັນດາຄະນະບໍລິຫານງານສະຫະພັນແມ່ຍິງ ສວສສຊ, ບັນດາປະທານສະຫະພັນແມ່ງຍິງຮາກຖານອ້ອມຂ້າງ ພ້ອມດ້ວຍສະມາຊິກແມ່ຍິງທົ່ວ ສວສສຊ ເຂົ້າຮ່ວມ ຈໍານວນ 65 ສະຫາຍ.

ຈຸດປະສົງຂອງກອງປະຊຸມ ເພື່ອຜ່ານຂໍ້ຕົກລົງແບ່ງຄວາມຮັບຜິດຊອບ ຂອງກອງປະຊຸມໃຫຍ່ສະມາຊິກສະຫະພັນແມ່ຍິງ ສວສສຊ ຄັ້ງທີ I ແລະ ຜ່ານມາດຖານເງື່ອນໄຂ ຂອງຄະນະບໍລິຫານງານ ສະຫະພັນແມ່ຍິງ ສວສສຊ; ພ້ອມທັງດໍາເນີນການປ່ອນບັດ ທາມທາບເປີດກ້ວາງ ເລືອກເຟັ້ນເອົາບຸກຂະລາກອນຜູ້ທີ່ມີເງື່ອນໄຂເໝາະສົມ ເຂົ້າໃນຄະນະບໍລິຫານງານສະຫະພັນແມ່ຍິງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍອີງໃສ່ມາດຖານເງື່ອນໄຂຂອງສູນກາງສະຫະພັນແມ່ຍິງລາວດັ່ງນີ້:

1. ດ້ານຄຸນທາດການເມືອງ: ຕ້ອງຍຶດໝັ້ນອຸດົມການສັງຄົມນິຍົມ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ລະບອບປະຊາທິປະໄຕປະຊາຊົນຢ່າງໜັກແໜ້ນ.

2. ດ້ານຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດ: ມີນໍ້າໃຈເສຍສະຫຼະເພື່ອຊາດ, ເພື່ອປະຊາຊົນ ສຸມສະຕິປັນຍາ ແລະ ກໍາລັງວັງຊາຂອງຕົນ ເພື່ອຮັບໃຊ້ປະເທດຊາດ ແລະ ຮັບໃຊ້ປະຊາຊົນດ້ວຍຄວາມບໍລິສຸດໃຈ.

3. ດ້ານຄວາມຮູ້ຄວາມສາມາດ: ມີຄວາມຮູ້ພື້ນຖານກ່ຽວກັບລັດທິມາກ-ເລນິນ, ແວຄິດ ໄກສອນ ພົມວິຫານ, ກໍາແໜ້ນແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດຂອງລັດ.

4. ດ້ານແບບແຜນນໍາພາ ແລະ ວິທີເຮັດວຽກ: ຍຶດໝັ້ນ ແລະ ປະຕິບັດແບບແຜນວິທີເຮັດວຽກຖືກຕ້ອງຕາມຫຼັກການລວມສູນປະຊາທິປະໄຕ.

5. ດ້ານສຸຂະພາບ: ຕ້ອງມີສຸຂະພາບແຂງແຮງສາມາດປະຕິບັດໜ້າທີ່ວຽກງານໄດ້.

ໃນວາລະຕອນທ້າຍ ປະທານກອງປະຊຸມຍັງໄດ້ເນັ້ນຢໍ້າອີກວ່າ: ຈົ່ງສືບຕໍ່ປະຕິບັດແຜນກະກຽມກອງປະຊຸມໃຫຍ່ ຂອງສະຫະພັນແມ່ຍິງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃຫ້ປະສົບຜົນສໍາເລັດ, ພ້ອມນັ້ນ ໃຫ້ເອື້ອຍນ້ອງສະມາຊິກແມ່ຍິງ ສວສສຊ ພວກເຮົາ ຈົ່ງພ້ອມກັນປະຕິບັດ ກົດໝາຍ ແລະ ລະບຽບການ ຂອງສະຫະພັນແມ່ຍິງລາວ ໃຫ້ເຂັ້ມງວດ ແລະ ປະສົບຜົນສໍາເລັດຢ່າງມີປະສິດທິພາບສູງ.

ຖ່າຍພາບ ແລະ ຂຽນຂ່າວ: ພວງເພັດ ຈັນທະລີວົງ

ຄະນະນໍາ (LASES), (VASS), (RAC) ແລະ (KEI) ປຶກສາຫາລືຄັດເລືອກຫົວຂໍ້ ກອງປະຊຸມສໍາມະນາວິທະຍາສາດ ປະຈໍາປີ 2025

ຄະນະນໍາ (LASES), (VASS), (RAC) ແລະ (KEI) ປຶກສາຫາລືຄັດເລືອກຫົວຂໍ້ ກອງປະຊຸມສໍາມະນາວິທະຍາສາດ ປະຈໍາປີ 2025

ຈໍານວນຜູ້ເຂົ້າຊົມ: 283

ຄະນະນໍາ (LASES), (VASS), (RAC) ແລະ (KEI) ປຶກສາຫາລືຄັດເລືອກຫົວຂໍ້ ກອງປະຊຸມສໍາມະນາວິທະຍາສາດ ປະຈໍາປີ 2025

ກອງປະຊຸມ 3 ສະຖາບັນ (LASES), (VASS) ແລະ (RAC) ໄດ້ໄຂຂຶ້ນໃນລະຫວ່າງວັນທີ 25-26 ກັນຍາ 2024, ທີ່ ນະຄອນຫຼວງວຽງຈັນ ສປປ ລາວ; ມີການນໍາຂອງ 3 ສະຖາບັນເຂົ້າຮ່ວມຢ່າງພ້ອມພຽງ; ຝ່າຍ ສ ປປ ລາວ ນໍາໂດຍ: ທ່ານ ປອ. ກອງແກ້ວ ໄຊສົງຄາມ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES) ພ້ອມດ້ວຍຄະນະ, ມີທ່ານ ຮສ. ປອ. ຕ້າ ມິ່ງ ຕວັນ ຮອງປະທານສະຖາບັນບັນດິດວິທະຍາສາດສັງຄົມຫວຽດນາມ (VASS) ພ້ອມດ້ວຍຄະນະ ແລະ ທ່ານ ບັນດິດ ໂສກໂຕ້ຍ ປະທານຣາຊະບັນດິດສະພາແຫ່ງຣາຊະອານາຈັກກຳປູເຈຍ (RAC) ພ້ອມດ້ວຍຄະນະ; ໃນກອງປະຊຸມມີການຕີລາຄາໝາກຜົນ ຂອງກອງປະຊຸມຄັ້ງທີ່ຜ່ານມາ ໂດຍເຫັນວ່າ 3 ສະຖາບັນ ມີການພົວພັນ ຮ່ວມມືຊ່ວຍເຫຼືອເຊິ່ງກັນ ແລະ ກັນ ຢ່າງຮອບດ້ານ ໂດຍສະເພາະແມ່ນການຄົ້ນຄວ້າວິທະຍາສາດຮ່ວມກັນ ແລະ ການຈັດກອງປະຊຸມສໍາມະນາ ຫຼາຍຄັ້ງແມ່ນລ້ວນແຕ່ມີຜົນສໍາເລັດ ແລະ ເປັນປະໂຫຍດ ຢ່າງມະຫາສານ, ສາມາດສະໜອງຂໍ້ມູນວິທະຍາສາດ ໃຫ້ແກ່ລັດຖະບານທັງ 3 ປະເທດ ໃນການວາງແນວທາງຍຸດທະສາດ, ແຜນນະໂຍບາຍໃຫ້ແກ່ການພັດທະນາຮ່ວມກັນຂອງ 3 ຊາດ ສ ປປລາວ-ຫວຽດນາມ ແລະ ກໍາປູເຈຍ.

ເພື່ອສືບຕໍ່ເພີ່ມພູນຄູນສ້າງ ມູນເຊື້ອຄວາມສາມັກຄີຮັກແພງ, ຊ່ວຍເຫຼືອເຊິ່ງກັນ ແລະ ກັນ ຂອງທັງ 3 ປະເທດເວົ້າລວມ, ເວົ້າສະເພາະແມ່ນ 3 ສະຖາບັນ, ໃຫ້ສືບຕໍ່ໄດ້ຮັບການຈັດຕັ້ງປະຕິບັດ ຢ່າງເປັນປົກກະຕິ, ຕໍ່ເນື່ອງ, ຄະນະນໍາຂອງ 3 ສະຖາບັນ ຈຶ່ງໄດ້ມີການປຶກສາຫາລື ແລະ ມີຄວາມເປັນເອກະພາບ ຈັດກອງປະຊຸມສໍາມະນາວິທະຍາສາດ 3 ສະຖາບັນ ໃນປີ 2025 ພາຍໃຕ້ຫົວຂໍ້: “ຄວາມກົມກຽວທາງດ້ານເສດຖະກິດ ແລະ ວັດທະນະທໍາ ຂອງ 3 ປະເທດ; ລາວ-ຫວຽດນາມ-ກໍາປູເຈຍ” ສ່ວນກອງປະຊຸມ 4 ຝ່າຍ ທີ່ມີ ທ່ານ ຈາງ ຮຸນ ລີ ປະທານສະຖາບັນສິ່ງແວດລ້ອມ ສ. ເກົາຫຼີ (KEI) ເຂົ້າຮ່ວມ ແມ່ນເອກະພາບພາຍໃຕ້ຫົວຂໍ້: “ການປ່ຽນຜັນໄປສູ່ເຕີບໂຕສີຂຽວ ຢູ່ 3 ປະເທດ ລາວ-ຫວຽດນາມ-ກໍາປູເຈຍ ໂດຍນໍາໃຊ້ບົດຮຽນຂອງ ສ. ເກົາຫຼີ.” ເຊິ່ງທັງສອງກອງປະຊຸມຄັ້ງຕໍ່ໄປຈະໄດ້ຈັດຂຶ້ນພາຍໃນເດືອນ ກັນຍາ ປີ 2025 ທີ່ນະຄອນຫຼວງພະນົມເປັນ ປະເທດກໍາປູເຈຍ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ເພັດທະນູໄຊ ວົງຍະໄຊ

“ການຮ່ວມມືພາກພື້ນເພື່ອໂຕ້ຕອບການປ່ຽນແປງ ຂອງສະພາບດິນຟ້າອາກາດຢູ່ ສປປ ລາວ, ສສ. ຫວຽດນາມ, ຣາຊາອານາຈັກ ກຳປູເຈຍ ແລະ ສ. ເກົາຫຼີ”

“ການຮ່ວມມືພາກພື້ນເພື່ອໂຕ້ຕອບການປ່ຽນແປງ ຂອງສະພາບດິນຟ້າອາກາດຢູ່ ສປປ ລາວ, ສສ. ຫວຽດນາມ, ຣາຊາອານາຈັກ ກຳປູເຈຍ ແລະ ສ. ເກົາຫຼີ”

ຈໍານວນຜູ້ເຂົ້າຊົມ: 315

“ການຮ່ວມມືພາກພື້ນເພື່ອໂຕ້ຕອບການປ່ຽນແປງ ຂອງສະພາບດິນຟ້າອາກາດຢູ່ ສປປ ລາວ, ສສ. ຫວຽດນາມ, ຣາຊາອານາຈັກ ກຳປູເຈຍ ແລະ ສ. ເກົາຫຼີ”

ວັນທີ 26 ກັນຍາ, 2024 ທີ່ ນະຄອນຫຼວງວຽງຈັນ, ສປປ ລາວ. 4 ສະຖາບັນໄດ້ໄຂກອງປະຊຸມສໍາມະນາວິທະຍາສາດສາກົນຂຶ້ນ, ພາຍໃຕ້ຫົວຂໍ້: “ການຮ່ວມມືພາກພື້ນເພື່ອໂຕ້ຕອບການປ່ຽນແປງ ຂອງສະພາບດິນຟ້າອາກາດຢູ່ ສປປ ລາວ, ສສ. ຫວຽດນາມ, ກຳປູເຈຍ ແລະ ສ. ເກົາຫຼີ”; ເຊິ່ງເປັນກຽດເຂົ້າຮ່ວມກອງປະຊຸມນໍາໂດຍທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ, ສະຖາບັນສິ່ງແວດລ້ອມ ສ ເກົາຫຼີ (KEI) ນໍາໂດຍ ທ່ານ ຈາງ ຮຸນ ລີ ປະທານ ສະຖາບັນສິ່ງແວດລ້ອມ ສ. ເກົາຫຼີ (KEI); ສະຖາບັນບັນດິດວິທະຍາສາດສັງຄົມຫວຽດນາມ ນໍາໂດຍທ່ານ ຮສ. ປອ. ຕ້າ ມິ່ງ ຕວັນ ຮອງປະທານສະຖາບັນບັນດິດວິທະຍາສາດສັງຄົມຫວຽດນາມ (VASS); ຣາຊະບັນດິດສະພາແຫ່ງຣາຊະອານາຈັກກຳປູເຈຍ ນໍາໂດຍ ທ່ານ ບັນດິດ ໂສກໂຕ້ຍ ປະທານຣາຊະບັນດິດສະພາແຫ່ງຣາຊະອານາຈັກກຳປູເຈຍ (RAC), ມີຜູ້ຕາງໜ້າຈາກບັນດາກະຊວງ-ອົງການ, ຂະແໜງການຕ່າງໆ ບັນດານັກວິທະຍາສາດຂອງຂອງ 4 ສະຖາບັນ, ຜູ້ຕາງໜ້າຈາກອົງການສະຫະປະຊາຊາດເພື່ອການພັດທະນາ (UNDP) ປະຈໍາ ສປປ ລາວ ແລະ ອົງການຈັດຕັ້ງສາກົນທີ່ກ່ຽວຂ້ອງ, ພ້ອມດ້ວຍແຂກຖືກເຊີນເຂົ້າຮ່ວມຢ່າງໜາແໜ້ນ;

ກອງປະຊຸມໃນຄັ້ງນີ້ ມີຈຸດປະສົງເພື່ອສ້າງເວທີສົນທະນາແລກປ່ຽນບົດຮຽນກ່ຽວກັບແຜນຍຸດທະສາດແຫ່ງຊາດ, ລົງເລິກສົນທະນາເພື່ອສ້າງຄວາມເຂົ້າໃຈ ກ່ຽວກັບຜົນກະທົບທາງດ້ານເສດຖະກິດ-ສັງຄົມ ແລະ ພ້ອມກັນຄົ້ນຄວ້າແນວທາງແກ້ໄຂໃນແຕ່ລະຂະແໜງການ ແລະ ການຮ່ວມມືສາກົນ ເພື່ອຮັບມືກັບການປ່ຽນແປງດິນຟ້າອາກາດ; ແລະ ເພື່ອເປັນການຊຸກຍູ້ຄວາມຮັບຜິດຊອບ ໃນຄວາມພະຍາຍາມຮ່ວມມືກັນຈາກທຸກປະເທດທີ່ເຂົ້າຮ່ວມ; ພ້ອມນັ້ນ, ຍັງໄດ້ເກັບກໍາບັນດາຄຳຄິດຄໍາເຫັນຈາກນັກຊ່ຽວຊານ ແລະ ປະສົບການຂອງ ສ.ເກົາຫຼີ, ຫວຽດນາມ, ກຳປູເຈຍ ແລະ ລາວ ມາເປັນແນວທາງໃນການສ້າງແຜນຍຸດທະສາດທີ່ມີປະສິດທິພາບ ເພື່ອຫຼຸດຜ່ອນ ແລະ ສາມາດປັບຕົວເຂົ້າກັບສະພາບແວດລ້ອມຈາກຜົນກະທົບຂອງການປ່ຽນແປງດິນຟ້າອາກາດ ທີ່ສາມາດຮັບປະກັນຄວາມຍືນຍົງ ແລະ ຢືດຢຸ່ນ ຂອງສັງຄົມໃນອະນາຄົດ.

ທ່ານ ປອ. ກອງແກ້ວ ໄຊສົງຄາມ, ຄະນະປະທານກອງປະຊຸມ ໄດ້ສະເໜີວ່າ: ກອງປະຊຸມໃນຄັ້ງນີ້ເປັນກອງປະຊຸມ ທີ່ 4 ສະຖາບັນ ໄດ້ພ້ອມກັນຈັດຕັ້ງຂຶ້ນເພື່ອເປັນເວທີສົນທະນາ, ປືກສາຫາລື, ແລກປ່ຽນບົດຮຽນ ແລະ ຄໍາຄິດຄຳເຫັນທາງດ້ານວິທະຍາສາດຮ່ວມກັນ; ໃນກອງປະຊຸມສຳມະນາວິທະຍາສາດປະຈຳປີ 2023 ຜ່ານມາ ທີ່ໄດ້ຈັດຂຶ້ນ ຢູ່ທີ່ນະຄອນໂຮຈີມິນ ຂອງ ສສ. ຫວຽດນາມ, ເຊິ່ງທັງ 4 ສະຖາບັນກໍ່ໄດ້ມີການສົນທະນາ, ປຶກສາຫາລື ແລະ ຕົກລົງເປັນເອກະພາບກັນ ສືບຕໍ່ຈັດກອງປະຊຸມ 4 ສະຖາບັນ ປະຈໍາປີ 2024 ໂດຍມອບໃຫ້ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນເຈົ້າພາບ ພາຍໃຕ້ ຫົວຂໍ້ຫຼັກ: “ການຮ່ວມມືພາກພື້ນເພື່ອຕອບໂຕ້ການປ່ຽນແປງ ຂອງສະພາບດິນຟ້າອາກາດ” ແລະ ເຫັນວ່າ ຫົວຂໍ້ດັ່ງກ່າວ ເປັນຫົວຂໍ້ທີ່ມີສໍາຄັນຫຼາຍ, ເປັນບັນຫາທີ່ໂລກຂອງພວກເຮົາພວມປະເຊີນໜ້າໃນປັດຈຸບັນ.

ການປ່ຽນແປງຂອງ ສະພາບດິນຟ້າອາກາດ ເປັນບັນຫາ ເຄັ່ງຮ້ອນ, ຮີບດ່ວນ ແລະ ຕ້ອງການມີສ່ວນຮ່ວມຂອງທຸກປະເທດ ແລະ ທຸກພາກສ່ວນຂອງສັງຄົມ ເພື່ອຊ່ວຍກັນຫຼຸດຜ່ອນການປ່ຽນແປງ ສະພາບໂລກຮ້ອນ ແລະ ຮັບມືກັບໄພທຳມະຊາດ ທີ່ອາດຈະເກີດຂຶ້ນ ຈາກການປ່ຽນແປງຂອງດິນຟ້າອາກາດ; ເຊິ່ງໄລຍະ 2-3 ອາທິດຜ່ານມາ ຢູ່ຫຼາຍພື້ນທີ່ ຂອງ ສປປ ລາວ ແລະ ສສ ຫວຽດນາມ ກໍ່ໄດ້ຮັບຜົນກະທົບຢ່າງໜັກໜ່ວງ ຈາກພາຍຸ ຢາກິ ເຊິ່ງເຮັດໃຫ້ຝົນຕົກໜັກຕໍ່ເນື່ອງ ພາໃຫ້ເກີດໄພນໍ້າຖ້ວມ, ດິນເຊາະເຈື່ອນ, ນໍ້າປ່າໄຫຼຊຸແຮງ ອັນໄດ້ສົ່ງຜົນໃຫ້ເກີດຄວາມເສຍຫາຍ ຕໍ່ຊີວິດ ແລະ ຊັບສິນ, ພື້ນຖານໂຄງລ່າງ ເສດຖະກິດ ແລະ ກະທົບຕໍ່ຊີວິດການເປັນຢູ່ຂອງ ປະຊາຊົນຢ່າງມະຫາສານ; ການປ່ຽນແປງຂອງ ສະພາບດິນຟ້າອາກາດ, ໂດຍສະເພາະແມ່ນການເພີ່ມຂຶ້ນຂອງອຸນະພູມ(ໂລກຮ້ອນ), ການປ່ຽນແປງປະລິມານນໍ້າຝົນ, ການປ່ຽນແປງລະດູການ, ການເພີ່ມຂຶ້ນຂອງຄວາມຜັນຜວນຂອງອາກາດ ໄດ້ສົ່ງຜົນກະທົບຕໍ່ເສດຖະກິດ, ພື້ນຖານໂຄງລ່າງ, ສຸຂະພາບ ແລະ ການດຳລົງຊີວິດ ຂອງປະຊາຊົນເປັນວົງກວ້າງໃນຂອບເຂດທົ່ວໂລກ.

ເຊິ່ງກອງປະຊຸມໄດ້ແບ່ງອອກເປັນ 3 ວາລະດັ່ງຄື: ວາລະທີ 1: ທ່າອ່ຽງສະພາບການປ່ຽນແປງດິນຟ້າອາກາດ ແລະ ຜົນກະທົບຕໍ່ການພັດທະນາເສດຖະກິດ-ສັງຄົມ; ວາລະທີ 2: ການຮັບມືຕໍ່ກັບການປ່ຽນແປງດິນຟ້າອາກາດ – ຍຸດທະສາດແຫ່ງຊາດ, ແຜນການ, ນະໂຍບາຍ ແລະ ການຈັດຕັ້ງປະຕິບັດ; ວາລະທີ 3: ກໍລະນີສຶກສາ ກ່ຽວກັບ ວິທີການແກ້ໄຂຢູ່ຂະແໜງການ ຕໍ່ກັບການປ່ຽນແປງດິນຟ້າອາກາດ ແລະ ການຮ່ວມມືສາກົນ; ລວມມີ 12 ບົດ ທີ່ຂຶ້ນນໍາສະເໜີ.

ກອງປະຊຸມດັ່ງກ່າວໄດ້ດໍາເນີນໄປເປັນເວລາ 1 ວັນເຕັມ ທີ່ມີບັນຍາກາດອັນຟື້ນ ເຕັມໄປດ້ວຍເນື້ອໃນທີ່ສໍາຄັນ ແລະ ເປັນປະໂຫຍດ, ບັນດານັກຄົ້ນຄວ້າຕ່າງກໍ່ໃຫ້ຄວາມສົນໃຈ ພ້ອມກັນມີຄໍາຄິດຄໍາເຫັນສົນທະນາແລກປ່ຽນຢ່າງກົງໄປກົງມາ ໂດຍສະເພາະບັນຫາທ່າອ່ຽງຄວາມປ່ຽນແປງ ແລະ ຜົນກະທົບຂອງສະພາບດິນຟ້າອາກາດ ຂອງແຕ່ລະປະເທດ ຊ່ວຍກັນຊອກຫາວິທີແກ້ໄຂຮ່ວມກັນໃນຕໍ່ໜ້າ ເປັນຕົ້ນທາງດ້ານການວາງນະໂຍບາຍ, ຍຸດທະສາດ, ແຜນປະຕິບັດການ, ກົນໄກປະສານງານໃນການບັນເທົາ ແລະ ການປັບຕົວເຂົ້າກັບ ສະພາບການປ່ຽນແປງດິນຟ້າອາກາດຕາມສະພາບຈຸດພິເສດຂອງແຕ່ລະປະເທດ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ມຸນີນ ພົນສັກດາ

ກອງປະຊຸມສຳມະນາວິທະຍາສາດສາກົນ ຄັ້ງທີ XI ພາຍໃຕ້ຫົວຂໍ້ ເພີ່ມທະວີການຮ່ວມມື ລາວ, ຫວຽດນາມ ແລະ ກຳປູເຈຍ ພາຍໃຕ້ສະພາບການໃໝ່ຂອງໂລກ

ກອງປະຊຸມສຳມະນາວິທະຍາສາດສາກົນ ຄັ້ງທີ XI ພາຍໃຕ້ຫົວຂໍ້ ເພີ່ມທະວີການຮ່ວມມື ລາວ, ຫວຽດນາມ ແລະ ກຳປູເຈຍ ພາຍໃຕ້ສະພາບການໃໝ່ຂອງໂລກ

ຈໍານວນຜູ້ເຂົ້າຊົມ: 304

ກອງປະຊຸມສຳມະນາວິທະຍາສາດສາກົນ ຄັ້ງທີ XI ພາຍໃຕ້ຫົວຂໍ້ ເພີ່ມທະວີການຮ່ວມມື ລາວ, ຫວຽດນາມ ແລະ ກຳປູເຈຍ ພາຍໃຕ້ສະພາບການໃໝ່ຂອງໂລກ

ວັນທີ 25 ກັນຍາ 2024 ທີ່ນະຄອນຫຼວງວຽງຈັນ, ສປປ ລາວ. ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປັນເຈົ້າພາບໃນການຈັດກອງປະຊຸມສຳມະນາວິທະຍາສາດສາກົນ ຄັ້ງທີ XI ພາຍໃຕ້ຫົວຂໍ້ ເພີ່ມທະວີການຮ່ວມມືລາວ, ຫວຽດນາມ ແລະ ກຳປູເຈຍ ພາຍໃຕ້ສະພາບການໃໝ່ຂອງໂລກ. ໂດຍການເປັນປະທານຮ່ວມຂອງ ທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ບັນດິດ ໂສກໂຕ້ຍ ປະທານຣາຊະບັນດິດສະພາແຫ່ງຣາຊະອານາຈັກກຳປູເຈຍ, ທ່ານ ຮສ. ປອ. ຕ້າ ມິ່ງ ຕວັນ ຮອງປະທານສະຖາບັນດິດວິທະຍາສາດສັງຄົມຫວຽດນາມ. ມີບັນດາຄະນະຜູ້ແທນ, ນັກຄົ້ນຄວ້າ, ນັກວິທະຍາສາດ ຈາກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ສະຖາບັນດິດວິທະຍາສາດສັງຄົມຫວຽດນາມ (VASS), ຣາຊາບັນດິດສະພາ ແຫ່ງຣາຊາອານາຈັກກໍາປູເຈຍ (RAC), ນອກຈາກນີ້ ຍັງມີມະຫາວິທະຍາໄລ, ສະຖາບັນການສຶກສາຂັ້ນສູງ ແລະ ສະຖາບັນຄົ້ນຄວ້າຕ່າງໆຂອງ ສປປ ລາວ ແລະ ຜູ້ຕາງໜ້າຈາກບັນດາກະຊວງ ແລະ ຂະແໜງການກ່ຽວຂ້ອງ ເຂົ້າຮ່ວມຢ່າງຫຼວງຫຼາຍ.

ໃນວາລະເປີດກອງປະຊຸມ ທ່ານ ປອ. ກອງແກ້ວ ໄຊສົງຄາມ ໄດ້ກ່າວວ່າ: ເຖິງແມ່ນວ່າ ສະພາບການຂອງໂລກ ກຳລັງຜັນແປໄປຢ່າງສັບສົນ ແລະ ຄາດຄະເນໄດ້ຍາກ, ໂດຍສະເພາະແມ່ນບັນຫາຂໍ້ຂັດແຍ້ງ ຂອງບັນດາປະເທດມະຫາອຳນາດຂອງໂລກ, ການກີດກັ້ນທາງດ້ານເສດຖະກິດ-ການຄ້າ, ການແຂ່ງຂັນທາງດ້ານເຕັກໂນໂລຊີ-ຂໍ້ມູນຂ່າວສານຢ່າງຮຸນແຮງ, ບັນຫາທາງດ້ານການເມືອງ-ສັງຄົມ, ການຊ່ວງເສັງກັນທາງດ້ານອາວຸດ ແລະ ການປະທະກັນທາງດ້ານກຳລັງປະກອບອາວຸດ ໄດ້ເກີດຂື້ນໃນຫລາຍໆຈຸດຂອງໂລກ; ບັນຫາສົງຄາມ ແລະ ສັນຕິພາບ; ຂໍ້ຂັດແຍ່ງທາງຊາຍແດນ ແລະ ອື່ນໆ ອັນໄດ້ພາໃຫ້ເກີດຄວາມເຄັ່ງຕືງ ແລະ ມີຄວາມສ່ຽງສູງ ທີ່ຈະເກີດມີການປະທະກັນຢ່າງຮ້າຍແຮງ ເຊິ່ງມັນຈະສົ່ງຜົນກະທົບໃສ່ການພັດທະນາເສດຖະກິດ-ສັງຄົມ, ການເມືອງ ແລະ ຄວາມໝັ້ນຄົງ ຂອງທັງ 3 ປະເທດ ຢ່າງຫຼີກລ້ຽງໄດ້ຍາກ; ແຕ່ 3 ປະເທດຂອງພວກເຮົາ ຍັງສືບຕໍ່ຮັກສາໄດ້ມູນເຊື້ອຄວາມສາມັກຄີເປັນປຶກແຜ່ນ, ມີການພົວພັນຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນມາໂດຍຕະຫຼອດ, ພັກ-ລັດຖະບານ ແລະ ປະຊາຊົນ 3 ຊາດ ມີສາຍພົວພັນອັນສະໜິດແໜ້ນ ແລະ ໄປມາຫາສູ່ກັນຢ່າງເປັນປົກກະຕິ ອັນໄດ້ນຳເອົາຜົນປະໂຫຍດມາສູ່ປະຊາຊົນ 3 ຊາດ: ລາວ, ຫວຽດນາມ ແລະ ກຳປູເຈຍຢ່າງມະຫາສານ, ສຳລັບ 3 ສະຖາບັນຂອງພວກເຮົາ ໄດ້ມີການພົວພັນ, ຮ່ວມມື, ຊ່ວຍເຫຼືອກັນ ໃນການຄົ້ນຄ້ວາວິທະຍາສາດ ແລະ ຈັດກອງປະຊຸມສຳມະນາຮ່ວມກັນຫຼາຍຄັ້ງ ທັງໃນລະດັບພະຫຸພາຄີ ແລະ ທະວີພາຄີ ແລະ ໃນຕໍ່ໜ້າ ແມ່ນມີຄວາມຈຳເປັນ ແລະ ຮຽກຮ້ອງໃຫ້ 3 ສະຖາບັນ ຕ້ອງໄດ້ເພີ່ມທະວີການຮ່ວມມື, ປຶກສາຫາລື, ແລກປ່ຽນຂໍ້ມູນ, ຄໍາຄິດເຫັນນຳກັນ ເພື່ອກຽມພ້ອມຮັບມື ແລະ ປ້ອງກັນບັນຫາຕ່າງໆທີ່ອາດຈະເກີດຂຶ້ນ ຈາກການປ່ຽນແປງຂອງສະພາບການໂລກ ແລະ ພາກພື້ນ. ທ່ານປະທານກອງປະຊຸມ ຍັງໄດ້ກ່າວຕື່ມວ່າ ຜົນຂອງກອງປະຊຸມ ສຳມະນາວິທະຍາສາດສາກົນຄັ້ງນີ້ ຈະສາມາດສະໜອງເປັນຂໍ້ມູນ, ຂໍ້ສະເໜີແນະທີ່ສຳຄັນ, ນຳເອົາຜົນປະໂຫຍດອັນໃຫຍ່ຫຼວງຕໍ່ແຜນຍຸດທະສາດ, ແຜນພັດທະນາເສດຖະ ກິດ-ສັງຄົມ ແລະ ແຜນການຮ່ວມມື ຂອງລັດຖະບານ 3 ປະເທດໃນຕໍ່ໜ້າ.

ສຳລັບ ສປປ ລາວ ກອງປະຊຸມສຳມະນາວິທະຍາສາດສາກົນຄັ້ງນີ້ ໄດ້ໄຂຂື້ນໃນໄລຍະ ທີ່ ສປປ ລາວ ເປັນເຈົ້າພາບຈັດກອງປະຊຸມອາຊຽນ, ກອງປະຊຸມປິ່ນອ້ອມສຳຄັນອື່ນໆ ໃນລະດັບພາກພື້ນ ແລະ ຢູ່ໃນໄລຍະສະຫຼຸບ, ສັງລວມ ແລະ ຕີລາຄາຜົນສຳເລັດທ້າຍສະໄໝຂອງການຈັດຕັ້ງຜັນຂະຫຍາຍມະຕິຂອງກອງປະ ຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025) ກໍ່ຄື ການກະກຽມ ກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ເພາະສະນັ້ນ, ຜົນຂອງກອງປະຊຸມສຳມະນາວິທະຍາສາດສາກົນຄັ້ງນີ້ ຈິ່ງມີຄວາມໝາຍຄວາມສຳຄັນເປັນພິເສດ ຕໍ່ການກຳນົດແນວທາງນະໂຍບາຍຂອງພັກ ແລະ ທິດທາງການການພັດທະນາເສດຖະກິດ-ສັງຄົມ ຂອງລັດຖະບານ ກໍ່ຄື ສປປ ລາວ ໃນຕໍ່ໜ້າ.

ກອງປະຊຸມໄດ້ຮັບຟັງການສະເໜີບົດສຳມະນາວິທະຍາສາດ ຈາກນັກວິທະຍາສາດ ທັງ 3 ສະຖາບັນ ໃນ 3 ວາລະ ຄື: ວາລະທີ 1: ທ່າອ່ຽງການປ່ຽນແປງຂອງສະພາບການຂອງໂລກໃນຕໍ່ໜ້າ, ວາລະທີ 2: ໂອກາດ ແລະ ສິ່ງທ້າທາຍຂອງ 3 ປະເທດໃນສະພາບການໃໝ່ຂອງໂລກ ແລະ ວາລະທີ 3: ເພີ່ມທະວີການຮ່ວມມືລະຫວ່າງບັນດາປະເທດລາວ, ຫວຽດນາມ ແລະ ກຳປູເຈຍໃນສະພາບການໃຫມ່ຂອງໂລກ.

ກອງປະຊຸມດໍາເນີນໄປດ້ວຍບັນຍາກາດອັນຟົດຟື້ນ, ສ້າງສັນ ແລະ ມີເນື້ອໃນທີ່ເປັນປະໂຫຍດ, ມີຄວາມເປັນລະບຽບຮຽບຮ້ອຍ; ນັກສໍາມະນາກອນຕ່າງກໍ່ມີຄວາມສົນໃຈ, ເອົາໃຈໃສ່ຕິດຕາມ, ຮັບຟັງການນໍາສະເໜີບົດຂອງວິທະຍາກອນ-ນັກຄົ້ນຄວ້າ, ມີການປຶກສາຫາລື ພ້ອມທັງປະກອບຄໍາເຫັນ ແລະ ແລກປ່ຽນທັດສະນະເຊິ່ງກັນ ແລະກັນ ຢ່າງກົງໄປກົງມາ ມີຈຸດສຸມ ບົນພື້ນຖານຄວາມຮັບຜິດຊອບສູງ.

ກອງປະຊຸມ ໄດ້ມີຜົນສຳເລັດຕາມລະດັບຄາດໝາຍທີ່ວາງໄວ້ ແລະ ໄດ້ປິດລົງ ໃນເວລາ 17:00 ໂມງ ຂອງວັນດຽວກັນ.

ຂ່າວ: ດວງໃຈ ໂລວັນ, ຖ່າຍພາບ: ວິໃຈ ເດດວົງສອນ

ຜົນສຳເລັດຂອງເວທີສົນທະນາສາກົນສັງຄົມນິຍົມ ຄັ້ງທີ່ XI ພາຍໃຕ້ຫົວຂໍ້ “ລັດທິມາກໃນສະຕະວັດທີ XXI”

ສູນຂໍ້ມູນຂ່າວສານ ແລະ ຝຶກອົບຮົມ ພົບປະແລກປ່ຽນບົດຮຽນກັບ ຖວທ ແຂວງໄຊຍະບູລີ

ສູນຂໍ້ມູນຂ່າວສານ ແລະ ຝຶກອົບຮົມ ໄຂກອງປະຊຸມ ສະມາຊິກກໍາມະບານຮາກຖານຄັ້ງທີ I

ສວສສຊ ເຜີຍແຜ່ຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການສະສາງລົດຂອງລັດ

ປະທານ ສວສສຊ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນຈາກແຂວງຮ່າຕິງ ສສ. ຫວຽດນາມ

ພິທີປະກາດການປະຕິບັດນະໂຍບາຍ ຂອງພະນັກງານຂັ້ນສູງອອກພັກການ-ຮັບອຸດໜູນບໍານານ

ສະຫະພັນແມ່ຍິງ ສວສສຊ ເປີດກອງປະຊຸມທາບທາມບຸກຄະລາກອນ ຮອບທີ I

ຄະນະນໍາ (LASES), (VASS), (RAC) ແລະ (KEI) ປຶກສາຫາລືຄັດເລືອກຫົວຂໍ້ ກອງປະຊຸມສໍາມະນາວິທະຍາສາດ ປະຈໍາປີ 2025

ຫົວຂໍ້ທີ່ທ່ານອາດສົນໃຈ