ປະທານ ສວສສຊ ຕ້ອນຮັບ ຄະນະຊ່ຽວຊານ ສສ ຫວຽດນາມ
ໃນຕອນເຊົ້າ ວັນທີ 04 ມິຖຸນາ 2025, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະພັກ-ຄະນະນໍາ ສວສສຊ; ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ, ກະຊວງແຜນການ ແລະ ການລົງທຶນ ແລະ ຄະນະກໍາມາທິການຮ່ວມມືລາວ-ຫວຽດ ໄດ້ຕ້ອນຮັບການມາຢ້ຽມຢາມ ແລະ ເຮັດວຽກຂອງຄະນະຊ່ຽວຊານ ສສ ຫວຽດນາມ ນໍາພາໂດຍ ທ່ານ ກ່າວ ວຽດ ຊິງ ອະດີດຮອງລັດຖະມົນຕີ ກະຊວງແຜນການ ແລະ ການລົງທຶນ ສສ ຫວຽດນາມ, ທັງເປັນຫົວໜ້າຄະນະຊ່ຽວຊານຫວຽດນາມ ທີ່ມາຊ່ວຍສ້າງແຜນຍຸດທະສາດການພັດທະນາເສດຖະກິດ ແລະ ສັງຄົມ (2026-2035) ແລະ ວິໃສທັດຮອດປີ 2045 ຂອງ ສປປ ລາວ ພ້ອມດ້ວຍຄະນະ. ການຢ້ຽມຢາມ ແລະ ເຮັດວຽກໃນຄັ້ງນີ້ ມີຈຸດປະສົງເພື່ອນໍາສະເໜີເນື້ອໃນ ແລະ ປະກອບຄໍາຄິດເຫັນຕໍ່ແຜນຍຸດທະສາດ ແລະ ວິໃສທັດດັ່ງກ່າວ ໃຫ້ມີຄວາມຄົບຖ້ວນສົມບູນ.
ໃນໂອກາດນີ້ ປະທານ ສວສສຊ ໄດ້ຕີລາຄາສູງໃນການມາຢ້ຽມຢາມ ແລະ ເຮັດວຽກຮ່ວມກັບຄະນະຊ່ຽວຊານ ສສ ຫວຽດນາມ ເພື່ອແລກປ່ຽນຄວາມຮູ້, ປະສົບການ ແລະ ບົດຮຽນອັນລໍ້າຄ່າ ຈາກພຶດຕິກຳຕົວຈິງ ແຫ່ງຜົນສຳເລັດ ຂອງພັກ ແລະ ລັດຖະບານ ສສ ຫວຽດນາມ ໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງຄືປັດ ຈຸບັນ. ທັງສອງຄະນະຜູ້ແທນ ໄດ້ແລກປ່ຽນທັດສະນະຕໍ່ກັບບັນດາມາດຕະການ, ວິທີການຈັດຕັ້ງປະຕິບັດ ແລະ ທິດທາງແຜນການໃນການພັດທະນາ ຕາມຮ່າງຍຸດທະຍາສາດການພັດທະນາເສດຖະກິດ-ສັງຄົມ 10 ປີ (2026-2035) ແລະ ວິໄສທັດ ຮອດປີ 2045 ເຊິ່ງສອດຄ່ອງກັບຄວາມເປັນຈິງ ແລະ ສະພາບທີ່ ສປປ ລາວ ປະເຊີນຢູ່. ດ້ວຍຄວາມຮູ້, ຄວາມສາມາດ ແລະ ບົດຮຽນປະສົບການ ເຊື່ອໝັ້ນວ່າຄະນະນັກຊ່ຽວຊານ ສສ ຫວຽດນາມ ແລະ ຄະນະຮັບຜິິດຊອບດັ່ງກ່າວຈະສາມາດບັນລຸຜົນສຳເລັດ ຕາມລະດັບຄາດໝາຍທີ່ວາງໄວ້ທຸກປະການ.
ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ
