ວັນທີ 4 ມີຖູນາ 2025 ຜ່ານມາ ທີ່ຫ້ອງປະຊຸມຂອງພະແນກແຜນການ ແລະ ການລົງທຶນ ແຂວງອຸດົມໄຊ. ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສວສສຊ  ຮ່ວມກັບອົງການ UNICEF ໄດ້ຈັດກອງປະຊຸມເຜີຍແຜ່ຜົນໄດ້ຮັບຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໃຫ້ແກ່ບັນດາຜູ້ແທນສະພາປະຊາຊົນຂັ້ນແຂວງ 9 ແຂວງພາກເໜືອ ແລະ ພາກກາງ ພາຍໃຕ້ການເປັນປະທານຂອງ ທ່ານ ຄໍາເຜີຍ ງອນວັນຄໍາ ຄະນະປະຈຳພັກແຂວງ, ຮອງປະທານສະພາແຂວງອຸດົມໄຊ ແລະ ເຂົ້າເປັນປະທານຮ່ວມຂອງ ທ່ານ ປອ ນ. ແກ້ວວິວອນ ອຸດທະຈັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ທ່ານ Dr. Kovalan Kumaran ຜູ້ຕາງໜ້າຈາກອົງການ UNICEF ປະຈຳ ສປປ ລາວ, ມີຜູ້ແທນຂັ້ນສູນກາງເຂົ້າຮ່ວມຈາກ ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສວສສຊ, ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ກະຊວງແຜນການ ແລະ ການລົງທຶນ, ສູນໂພຊະນາການແຫ່ງຊາດ ແລະ ມີຜູ້ແທນຈາກສະພາຂັ້ນແຂວງ, ຜູ້ຕາງໜ້າຈາກພະແນກສາທາລະນາສຸກ 9 ແຂວງພາກເໜືອ ແລະ ພາກກາງ: ຜົ້ງສາລີ, ອຸດົມໄຊ, ບໍ່ແກ້ວ, ຫຼວງນ້ໍາທາ, ຫຼວງພະບາງ, ໄຊຍະບູລີ, ຊຽງຂວາງ ແລະ ແຂວງວຽງຈັນ. ພ້ອມກັບ 4 ພະແນກການຄື: ພະແນກແຜນການ ແລະ ການລົງທຶນ, ພະແນກສຶກສາທິການ ແລະ ກິລາ, ພະແນກກະສິກຳ ແລະ ປ່າໄມ້ ແລະ ພະແນກສາທາລະນະສຸກ; ພ້ອມດ້ວຍ 3 ອົງການຈັດຕັ້ງມາຫາຊົນ ແລະ  ອົງການຈັດຕັ້ງສາກົນພາຍໃນແຂວງອຸດົມໄຊ ເຂົ້າຮ່ວມຫຼາຍກວ່າ 50 ທ່ານ. ຈຸດປະສົງຂອງກອງປະຊຸມຄັ້ງນີ້ ແມ່ນເຜີຍແຜ່ຜົນໄດ້ຮັບຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໃຫ້ແກ່ຜູ້ແທນສະພາປະຊາຊົນຂັ້ນແຂວງ 9 ແຂວງພາກເໜືອ ແລະ ພາກກາງ.