admin_lases00 – ໜ້າ 8 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດ ຈີນ-ອາຊຽນ ຄັ້ງທີ 15

ຈໍານວນຜູ້ເຂົ້າຊົມ: 1,299

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດ ຈີນ-ອາຊຽນ ຄັ້ງທີ 15

ໃນລະຫວ່າງວັນທີ 20-23 ກັນຍາ 2023 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳພາໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດຈີນ-ອາຊຽນ ຄັ້ງທີ 15 ພາຍໃຕ້ຫົວຂໍ້”ຮ່ວມກັນສ້າງສັນຕິພາບ, ຄວາມສະຫງົບ ແລະ ປອດໄພ, ຄວາມຮຸ່ງເຮືອງ ແລະ ມິດຕະພາບ, ສ້າງປະຊາຄົມຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ” ຊຶ່ງໄດ້ຈັດຂຶ້ນທີ່ເມືອງໜານໜິງ, ແຂວງກວາງຊີ, ສປ ຈີນ ໂດຍການເປັນເຈົ້າພາບຮ່ວມຂອງສະຖາບັນວິທະຍາສາດສັງຄົມກວາງຊີ, ຫ້ອງການທີ່ປຶກສາອຳນາດການປົກຄອງຕົນເອງເຜົ່າຈວ້າງກວາງຊີ, ສະຖາບັນຍຸດທະສາດສາກົນ ແລະ ອາຊີປາຊີຟິກ ສປ ຈີນ ແລະ ກອງເລຂາງານວາງສະແດງ ຈີນ-ອາຊຽນ, ກອງເລຂາສະມາຄົມຄັງຄວາມຄິດໃໝ່ສີສັນກວາງຊີ, ມີບັນດາ 10 ປະເທດອາຊຽນ ແລະ ຜູ້ແທນທີ່ຊ່ຽວຊານເຂົ້າຮ່ວມຫຼາຍກວ່າ 200 ທ່ານ.

ກອງປະຊຸມໄດ້ຮັບຟັງການນຳສະເໜີບັນດາຫົວຂໍ້ຍ່ອຍດັ່ງນີ້: 1) ບົດບາດສໍາຄັນຂອງສັນຍາການຮ່ວມມືເສດຖະກິດແບບຮອບດ້ານລະດັບພາກພື້ນ (RCEP) ແລະ ຊຸກຍູ້ການສ້າງເຂດການຄ້າເສລີ ຈີນ-ອາຊຽນ ສະບັບທີ 3.0; 2) ການຮ່ວມມືຈີນ-ອາຊຽນ ໃນການຫັນເປັນດິຈິຕອນ ແລະ ນະວັດຕະກຳທາງດ້ານວິທະຍາສາດ ແລະ ເຕັກໂນໂລຊີ; 3) ສົ່ງເສີມການຫັນເປັນສີຂຽວ ແລະ ການພັດທະນາຍືນຍົງດ້ວຍທາດກາກໂບນິກຕໍ່າ; 4) ສົ່ງເສີມການເຊື່ອມໂຍງເຊື່ອມຈອດພື້ນຖານໂຄງລ່າງ ຈີນ-ອາຊຽນ ດ້ວຍຄຸນນະພາບສູງ; 5) ຊຸກຍູ້ສົ່ງເສີມເປີດກວ້າງການເຄື່ອນໄຫວຂອງບັນດາສະຖາບັນລະດັບສູງ ແລະ ສ້າງເງື່ອນໄຂສິ່ງອຳນວຍໃຫ້ລະບົບຕະຫຼາດພາຍໃນ ແລະ ຕ່າງປະເທດ ໃນການດຳເນີນງານ; 6) ການແລກປ່ຽນວັດທະນະທຳຈີນ-ອາຊຽນ, ການຮຽນຮູ້ເຊິ່ງກັນ ແລະ ກັນ ແລະ ການພັດທະນານະວັດຕະກຳ.

ໃນເວທີດັ່ງກ່າວ, ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຂຶ້ນສະເໜີຫົວຂໍ້ “ບົດບາດສໍາຄັນຂອງສັນຍາຄູ່ຮ່ວມມືເສດຖະກິດແບບຮອບດ້ານລະດັບພາກພື້ນ Regional Comprehensive Economic Partnership (RCEP) ແລະ ສົ່ງເສີມການສ້າງສັນຍາການຄ້າເສລີອາຊຽນ-ສປ ຈີນ ສະບັບທີ 3 ຫຼື ASEAN-China Free Trade (ACFTA) 3.0” ຊຶ່ງທ່ານຍົກໃຫ້ເຫັນວ່າສັນຍາດັ່ງກ່າວ ເປັນສັນຍາເຂດການຄ້າເສລີທີ່ໃຫຍ່, ກວມລວມຮອບດ້ານ ແລະ ທັນສະໄໝທີ່ສຸດໃນປະຈຸບັນ ກວມເອົາປະມານ 30% ຂອງມູນຄ່າການຄ້າໂລກ ແລະ 29,3% ຂອງການລົງທຶນໃນພາກພື້ນ ແລະ ສາກົນ, ເປັນຕະຫຼາດຂະໜາດໃຫຍ່ ແລະ ມີຄວາມສໍາຄັນໃນການຂັບເຄື່ອນເສດຖະກິດ ແລະ ສົ່ງເສີມຂະບວນການຕ່ອງໂສ້ສະໜອງ, ເສດຖະກິດດິຈິຕອນ, ເສດຖະກິດສີຂຽວ ແລະ ອື່ນໆ ຂອງພາກພື້ນ ແລະ ສາກົນ ໂດຍສະເພາະການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ-19 ແລະ ການຖົດຖອຍຂອງສະພາບເສດຖະກິດ ແລະ ການເງິນຂອງໂລກໃນປະຈຸບັນ. ສໍາລັບ ສປປ ລາວ ໃນຖານະເປັນພາຄີ ຂອງສັນຍາ RCEP ແມ່ນມີທັງກາລະໂອກາດ ແລະ ສິ່ງທ້າທາຍຫຼາຍອັນທີ່ຈະຕ້ອງໄດ້ປັບປຸງ ແລະ ພັດທະນາບັນດາລະບຽບການຕ່າງໆພາຍໃນໃຫ້ສອດຄ່ອງ ເພື່ອຮັບປະກັນການຈັດຕັ້ງປະຕິບັດໃຫ້ນໍາມາຊຶ່ງຜົນປະໂຫຍດສູງສຸດໃຫ້ແກ່ ສປປ ລາວ ເວົ້າລວມ ແລະ ເວົ້າສະເພາະໃຫ້ແກ່ພາກທຸລະກິດ ແລະ ຜູ້ປະກອບການ ແລະ ວິສາຫະກິດຂະໜາດນ້ອຍ ແລະ ກາງ. ສະນັ້ນ, ຄວາມເປັນເຈົ້າການ ແລະ ການພິຈາລະນາຮ່ວມມື ໃນແຕ່ລະປະເດັນ ແຕ່ລະຂົງເຂດຢ່າງຮອບດ້ານ ແລະ ເລິກເຊິ່ງ ເຫັນໄດ້ກາລະໂອກາດຄວນຍາດແຍ່ງ ແລະ ສິ່ງທ້າທາຍທີ່ ສປປ ລາວ ຈະຕ້ອງພ້ອມກັນຊອກຫາວິທີແກ້ໄຂ ເພື່ອຫັນສິ່ງທ້າທາຍເຫຼົ່ານັ້ນໃຫ້ກາຍເປັນກາລະໂອກາດນໍາເອົາຜົນປະໂຫຍດສູງສຸດຈາກການເຂົ້າຮ່ວມສັນຍາດັ່ງກ່າວນີ້, ທ່ານຍັງໄດ້ຮຽກຮ້ອງໃຫ້ປະເທດສະມາຊິກຂອງ RCEP ສືບຕໍ່ຮ່ວມມືກັນໃນການຈັດຕັ້ງປະຕິບັດບັນດາພັນທະສັນຍາທີ່ໃຫ້ໄວ້ໃນສັນຍາຕາມຂອບເວລາທີ່ໄດ້ກຳນົດໄວ້ ແລະ ຮຽກຮ້ອງໃຫ້ພາກທຸລະກິດຈົ່ງຊອກຮູ້ ແລະ ນຳໃຊ້ຜົນປະໂຫຍດຈາກສັນຍາດັ່ງກ່າວໃຫ້ມີປະສິດທິຜົນ ແລະ ຫຼາຍຂຶ້ນ ເພື່ອເຮັດໃຫ້ເສດຖະກິດ ແລະ ການຄ້າພາກພື້ນຂອງພວກເຮົາມີການຂະຫຍາຍຕົວ ແລະ ປະຊາຊົນມີຊີວິດທີ່ດີຂຶ້ນກວ່າເກົ່າ.

ໃນໂອກາດນີ້, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກໍໄດ້ສຳເລັດລົງນາມ ຂໍ້ຕົກລົງວ່າດ້ວຍການຮ່ວມມືແລກປ່ຽນທາງດ້ານວິຊາການ ຮ່ວມກັບ ສະຖາບັນວິທະຍາສາດສັງຄົມແຂວງກວາງຊີ ແຫ່ງ ສປ ຈີນ ທັງສອງຝ່າຍໄດ້ຕົກລົງເປັນເອກະພາບຮ່ວມມືກັນໃນການດຳເນີນການຮ່ວມມືຄົ້ນຄວ້າທິດສະດີ ແລະ ການນຳໃຊ້ທີ່ເໝາະສົມກັບຄວາມຕ້ອງການໃນການພັດທະນາປະເທດຂອງທັງສອງຝ່າຍ, ແລກປ່ຽນບົດຮຽນປະສົບການໃນການຄົ້ນຄວ້າ; ທັງສອງຝ່າຍຊ່ວຍເຫຼືອເຊິ່ງກັນ ແລະ ກັນ, ຍົກລະດັບການຮ່ວມມືໃຫ້ແໜ້ນແຟ້ນ (ຮ່ວມກັນປຶກສາຫາລືຫົວຂໍ້ຮ່ວມມືຄົ້ນຄວ້າຕ່າງໆ); ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ແລະ ສະຖາບັນວິທະຍາສາດສັງຄົມແຂວງກວາງຊີແຫ່ງ ສປ ຈີນ ຈະອີງໃສ່ຄວາມສາມາດທ່າແຮງຂອງຕົນເອງ ເພື່ອຊ່ວຍເຫຼືອເຊິ່ງກັນ ແລະ ກັນ ຍົກລະດັບດ້ານການຄົ້ນຄວ້າວິທະຍາສາດ; ທັງສອງຝ່າຍຈະດຳເນີນການແລກປ່ຽນບົດຮຽນທາງດ້ານວິຊາການ, ຮ່ວມມືຈັດກອງປະຊຸມສໍາມະນາວິທະຍາສາດ ແບບສອງຝ່າຍ ຫຼື ຫຼາຍຝ່າຍ ແລະ ພ້ອມກັນແລກປ່ຽນຂ່າວສານການຄົ້ນຄວ້າວິທະຍາສາດ, ແລກປ່ຽນຜົນງານຂອງການຄົ້ນຄວ້າວິທະຍາສາດ ທີ່ສອງຝ່າຍມີຄວາມສົນໃຈ; ຈັດຕັ້ງການແປ ແລະ ພິມຈໍາໜ່າຍຜົນຂອງການຄົ້ນຄວ້າວິທະຍາສາດ ເປັນ ພາສາລາວ ແລະ ພາສາຈີນ ຕາມທີ່ສອງຝ່າຍຕ້ອງການ ໃຫ້ເປັນຮູບປະທຳ ແລະ ຕ່າງຝ່າຍຕ່າງໄດ້ຮັບຜົນປະໂຫຍດສູງສຸດ.

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ “ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ”

ຈໍານວນຜູ້ເຂົ້າຊົມ: 830

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ "ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ"

ວັນທີ 21 ກັນຍາ 2023 ຢູ່ນະຄອນໂຮ່ຈີມິນ ສສ.ຫວຽດນາມ, ທ່ານ ປອ. ສອນທະນູ ທໍາມະວົງ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວໄດ້ນໍາພາຄະນະຜູ້ແທນ ສວສສຊ (LASES) ເຂົ້າຮ່ວມກອງປະຊຸມສໍາມະນາສ້າງຂີດຄວາມສາມາດລວມປະຈໍາປີ 2023 ພາຍໃຕ້ຫົວຂໍ້ “ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ”. ໂດຍມີ ສະຖາບັນບັນດິດວິທະຍາສາດສັງຄົມຫວຽດນາມ (VASS) ເປັນເຈົ້າພາບ, ມີຄະນະຜູ້ແທນຈາກຣາຊາບັນດິດສະພາກໍາປູເຈຍ (RAC), ສະຖາບັນສິ່ງແວດລ້ອມ ສ. ເກົາຫຼີ (KEI), ຕາງໜ້າຄະນະນໍານະຄອນໂຮ່ຈີມິນ ແລະ ຕາງໜ້າບັນດາຂະແໜງການຂອງ ຄະນະກໍາມະການປະຊາຊົນ ນະຄອນໂຮ່ຈີມິນ; ບັນດາຊ່ຽວຊານ, ນັກວິທະຍາສາດ ຈາກ ສປປ ລາວ, ສສ. ຫວຽດນາມ, ຣາຊາອານາຈັກ ກໍາປູເຈຍ, ສ. ເກົາຫຼີ ເຂົ້າຮ່ວມ.

ໃນໂອກາດດັ່ງກ່າວ ທ່ານ ປອ. ສອນທະນູ ທໍາມະວົງ ໄດ້ກ່າວຄໍາເຫັນໃນພິທີເປີດສໍາມະນາ ມີບາງຕອນ ທ່ານໄດ້ກ່າວວ່າ: ສໍາລັບ ສປປ ລາວ, ແນວຄວາມຄິດຂອງການຫັນເປັນຕົວເມືອງອັດສະລິຍະ (Smart City) ໄດ້ຖືກບັນຈຸເຂົ້າໃນແຜນພັດທະນາເສດຖະກິດ–ສັງຄົມ ແຫ່ງຊາດ 05 ປີ ຄັ້ງທີ IX (2021-2025). ເຊິ່ງເປົ້າໝາຍລິເລີ່ມຂອງແຜນພັດທະນາຕົວເມືອງ Smart City ເປັນໜຶ່ງໃນໂຄງການຂະໜາດໃຫຍ່ທີ່ຈະຫັນປະເທດລາວ ຈາກປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມໂຍງ–ເຊື່ອມຈອດ ໂດຍຜ່ານການນໍາໃຊ້ລະບົບເທັກໂນໂລຊີດິຈິຕອນ (ICT) ເຂົ້າໃນການຂັບເຄື່ອນການຂົນສົ່ງ (Logistics-hub) ຕາມນະໂຍບາຍເຕີບໂຕສີຂຽວຍືນຍົງ ແລະ ເປັນມິດຕໍ່ສິ່ງແວດລ້ອມຂອງລັດຖະບານ ເພື່ອເຮັດໃຫ້ຊຸມຊົນທັນສະໄໝຂຶ້ນ ແລະ ເສີມສ້າງຊີວິດການເປັນຢູ່ຂອງທ້ອງຖີ່ນ. ປັດຈຸບັນ, ສປປ ລາວ ມີໂຄງການ Smart City ຫຼາຍໂຄງການ, ສະເພາະຢູ່ນະຄອນຫຼວງວຽງຈັນ ມີ 2 ໂຄງການຂະໜາດໃຫຍ່ ຕັ້ງຢູ່ເມືອງໄຊເສດຖາ ມີເນື້ອທີ່ 1.500 ກວ່າເຮັກຕາ ແລະ ເມືອງຫາດຊາຍຟອງ ນະຄອນຫຼວງວຽງຈັນ ມີເນື້ອທີ່ 2.900 ກວ່າເຮັກຕາ. ຢູ່ທາງພາກເໜືອຂອງລາວ, ມີໂຄງການ Smart-Eco City ທີ່ເມືອງນາໝໍ້, ແຂວງອຸດົມໄຊ, ມີເນື້ອທີ່ 3.150 ກວ່າເຮັກຕາ ແລະ ຢູ່ແຂວງຫຼວງພະບາງ ກໍໄດ້ເລີ່ມກ້າວເຂົ້າສູ່ບາດກ້າວທໍາອິດຂອງການຫັນເປັນຕົວເມືອງອັດສະລິຍະ ໂດຍການລິເລີ່ມຈາກການສ້າງ E-government ແຕ່ປີ 2021.

ສໍາລັບແນວຄວາມຄິດຂອງຄົນລາວ ກ່ຽວກັບຕົວເມືອງອັດສະລິຍະ ສາມາດເປັນໄປໄດ້ດ້ວຍການຂັບເຄື່ອນທາງດ້ານວັດຖຸ ແລະ ຈິດໃຈ, ຊຶ່ງຈະເປັນພື້ນຖານທີ່ດີຕໍ່ການຍົກລະດັບໃນການຈັດສັນຄຸ້ມຄອງຕົວເມືອງ ໃຫ້ຫັນເປັນທັນສະໄໝ ແລະ ຮັບປະກັນສະພາບແວດລ້ອມຕາມທິດສີຂຽວ ຂຶ້ນໄປອີກຂັ້ນ. ເນື່ອງຈາກ, ການຫັນເປັນເມືອງອັດສະລິຍະ ແມ່ນເນັ້ນໃສ່ຈິດໃຈຜູ້ຄົນເປັນສູນກາງ ພວກເຮົາຈຶ່ງມຸ່ງໝັ້ນທີ່ຈະພັດທະນາ ສປປ ລາວ ໃຫ້ເປັນຕົວເມືອງອັດສະລິຍະທີ່ກ້າວໜ້າ, ທັນສະ ໄໝ ແລະ ເໝາະສົມແກ່ການພັກອາໄສຍິ່ງຂຶ້ນ, ເຊິ່ງຈະເປັນປະໂຫຍດຕໍ່ທຸກວິຖີຊີວິດ. ເມືອງອັດສະລິຍະຈະນໍາໃຊ້ເຕັກໂນໂລຊີອັດສະລິຍະ ແລະ ທິດທາງການແກ້ໄຂບັນຫາແບບອັດສະລິຍະ ໂດຍການນໍາໃຊ້ເຕັກໂນໂລຊີດິຈິຕອນ (ICT), ການສື່ສານ, ອິນເຕີເນັດຄວາມໄວສູງ (Internet of things-IOT) ແລະ ຖານຂໍ້ມູນຂະໜາດໃຫຍ່ (Big Data) ເພື່ອເພີ່ມປະສິດທິພາບຂອງການເຮັດວຽກ, ການກວດສອບ, ການຄຸ້ມຄອງ ແລະ ການບໍາລຸງຮັກສາລະບົບຕ່າງໆ ຂອງ ຕົວເມືອງອັດສະລິຍະ. ຄຸນສົມບັດທີ່ສໍາຄັນຂອງການຫັນເປັນເມືອງອັດສະລິຍະ ກໍຄືການນໍາໃຊ້ຊ່ອງທາງໃນການແກ້ໄຂບັນຫາຊີວິດການເປັນຢູ່ ແບບດິຈິຕອນ ແລະ ນໍາໃຊ້ນະວັດຕະກໍາເຕັກໂນໂລຊີທີ່ທັນສະໄໝເພື່ອປັບປຸງ, ຍົກລະດັບ ແລະ ເຮັດໃຫ້ການບໍລິການດ້ານສາທາລະນະຂອງຕົວເມືອງ ມີປະສິດທິພາບ ແລະ ປະສິດທິຜົນສູງຂຶ້ນ ໂດຍມີຈຸດປະສົງເພື່ອປັບປຸງຄຸນນະພາບຊີວິດຂອງປະຊາຊົນ ແລະ ການດໍາເນີນທຸລະກິດຜ່ານແອັບພີເຄຊັນໄອທີ ແລະ ການສື່ສານມວນຊົນ ໃຫ້ທັນກັບສະພາບການ, ການສະໜອງຄວາມຕ້ອງການຂອງຜູ້ຄົນ ແລະ ທຸລະກິດແບບຖືກຈຸດ, ທັນເວລາ ແລະ ມີປະສິດທິພາບ. ຊຶ່ງແນວທາງເຫຼົ່ານັ້ນກໍຕ້ອງຖືກນໍາໄປໃຊ້ຢ່າງຖືກວິທີ ແລະ ມີວິທະຍາສາດ ທີ່ເອີ້ນວ່າ “ວິໄສທັດຕົວເມືອງອັດສະລິຍະ ແລະ ການເຕີບໂຕແບບຍືນຍົງ ຕາມທິດສີຂຽວ” ຊຶ່ງຈະເປັນແນວທາງທີ່ສົ່ງເສີມຕົ້ນທຶນຂອງປະຊາຊົນ ແລະ ສັງຄົມຢ່າງແທ້ຈິງ ຕະຫຼອດເຖິງການສົ່ງເສີມດ້ານວັດທະນາທໍາ ແລະ ຮັກສາສິ່ງແວດລ້ອມ.

ເຖີງຢ່າງໃດກໍຕາມ, ຍັງມີຫຼາຍນິຍາມສໍາລັບແນວຄວາມຄິດ ກ່ຽວກັບຕົວເມືອງອັດສະລິຍະ ແລະ ຮູບແບບການພັດທະນາຕົວເມືອງອັດສະລິຍະກໍມີຫຼາຍຮູບແບບ. ສະນັ້ນ, ເນື່ອງໃນໂອກາດທີ່ ສາມປະເທດ ແລະ ສີ່ສະຖາບັນຂອງພວກເຮົາໄດ້ຮ່ວມກັນປຶກສາຫາລື ກ່ຽວກັບຫົວຂໍ້ “ວິທະຍາສາດໃນການພັດທະນາຕົວເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ” ໃນຄັ້ງນີ້. ຂ້າພະເຈົ້າຫວັງວ່າພວກເຮົາ ຈະສາມາດສ້າງສັນແນວຄຄວາມຄິດໃໝ່ ທີ່ສາມາດນໍາໃຊ້ເຂົ້າໃນການປັບປຸງໂຄງການຕົວເມືອງອັດສະລິຍະ (Smart City) ຂອງພວກເຮົາ ໃຫ້ກ້າວໄປສູ່ຄວາມທັນສະໄໝໃນອານາຄົດ.

ບົດຂ່າວ ແລະ ຖ່າຍພາບ: ທະນົງສອນ ສີບຸນເຮືອງ

ກອງປະຊຸມສຳມະນາສາກົນ ລະຫວ່າງ VASS-LASES-RAC

ຈໍານວນຜູ້ເຂົ້າຊົມ: 813

ກອງປະຊຸມສຳມະນາສາກົນ ລະຫວ່າງ VASS-LASES-RAC

ວັນທີ 20 ກັນຍາ 2023 ຢູ່ທີ່ນະຄອນໂຮ່ຈີມິນ ສສ ຫວຽດນາມ, ສະຖາບັນບັນດິດວິທະຍາສາດສັງຄົມຫວຽດນາມ (VASS) ເປັນເຈົ້າພາບ, ສົມທົບກັບສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ (LASES) ແລະ ຣາຊາບັນດິດສະພາກໍາປູເຈຍ (RAC) ຈັດຕັ້ງກອງປະຊຸມສໍາມະນາສາກົນ ພາຍໃຕ້ຫົວຂໍ້ “ການຮ່ວມມືດ້ານການຄ້າ, ການລົງທຶນລະຫວ່າງ ລາວ, ຫວຽດນາມ, ກໍາປູເຈຍ ໃນສະພາບການເສດຖະກິດດິຈິຕອນ”. ນີ້ເປັນກອງປະຊຸມວິທະຍາສາດສາກົນປະຈໍາປີ ລະຫວ່າງ VASS, LASES ແລະ RAC ໂດຍການຜັດປ່ຽນກັນເປັນເຈົ້າພາບຈັດຢູ່ 3 ປະເທດ ຫວຽດນາມ, ລາວ ແລະ ກໍາປູເຈຍ.

ເຂົ້າຮ່ວມກອງປະຊຸມສໍາມະນາ ມີຜູ້ແທນຈໍາານວນ 100 ທ່ານ ເຊິ່ງມາຈາກບັນດາສະຖາບັນຂອງ 3 ປະເທດ: ຫວຽດນາມ, ລາວ, ກໍາປູເຈຍ. ໂດຍການປະສານສົມທົບຈັດກອງປະຊຸມສໍາມະນາມີ: ທ່ານ ປອ. ຟ່ານ ຈີ ຫຽວ, ປະທານສະຖາບັນບັນດິດວິທະຍາສາດສັງຄົມຫວຽດນາມ; ທ່ານ ປອ. ສອນທະນູ ທໍາມະວົງ, ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ; ທ່ານ ບັນດິດ ສົກໂຕ້ຍ, ປະທານຣາຊາບັນດິດສະພາກໍາປູເຈຍ; ທ່ານ ຮສ.ປອ. ເຢື່ອງ ແອ່ງ ດຶກ, ຮອງປະທານຄະນະກໍາມະການປະຊາຊົນ ນະຄອນໂຮ່ຈີມິນ. ນອກນີ້, ຍັງມີບັນດາຊ່ຽວຊານ, ນັກວິທະຍາສາດ, ນັກບໍລິຫານ-ຄຸ້ມຄອງ ເຂົ້າຮ່ວມກອງປະຊຸມສໍາມະນາໃນຄັ້ງນີ້.

ກອງປະຊຸມສໍາມະນາ ສຸມໃສ່ 3 ບັນຫາສໍາຄັນຄື: ໜຶ່ງ: ທ່າອ່ຽງການພັດທະນາເສດຖະກິດດິຈິຕອນ ແລະ ບົດຮຽນການນໍາໃຊ້ເຕັກໂນໂລຊີດິຈິຕອນເຂົ້າໃນການພັດທະນາການຄ້າ, ການລົງທຶນ ຢູ່ຫວຽດນາມ, ລາວ, ກໍາປູເຈຍ; ສອງ: ໂອກາດ ແລະ ສິ່ງທ້າທາຍ ຈາກຂະບວນການຫັນເປັນດິຈິຕອນ ໃນການຊຸກຍູ້ການຮ່ວມມືການຄ້າ, ການລົງທຶນ ລະຫວ່າງ 3 ປະເທດ; ສາມ: ວິທີການແກ້ໄຂໃນການຊຸກຍູ້ການຮ່ວມມືດ້ານການຄ້າ, ການລົງທຶນ ລະຫວ່າງ ຫວຽດນາມ-ລາວ-ກໍາປູເຈຍ ໃນພື້ນຖານເສດຖະກິດດິຈິຕອນ.

ບົດສໍາມະນາ ແລະ ການສົນທະນາໃນກອງປະຊຸມສໍາມະນາ ຊີ້ໃຫ້ເຫັນທ່າອ່ຽງສໍາຄັນຂອງການຮ່ວມມືດ້ານການຄ້າ, ການລົງທຶນຂອງໂລກ ແລະ ພາກພື້ນ ຕໍ່ກັບຜົນກະທົບຂອງການປະຕິວັດອຸດສາຫະກໍາຄັ້ງທີ 4 (4.0) ແລະ ການພັດທະນາຢ່າງເຂັ້ມແຂງຂອງເຕັກໂນໂລຊີເຕັກນິກດິຈິຕອນ. ເສດຖະກິດດິຈິຕອນ ກໍາລັງກາຍເປັນຈຸດພິເສດ ແລະ ທ່າອ່ຽງການພັດທະນາເສດຖະກິດ, ເຕັກໂນໂລຊີສໍາຄັນທີ່ສຸດໃນປັດຈຸບັນ. ເສດຖະກິດດິຈິຕອນ ກໍາລັງຖືເປັນໜຶ່ງໃນບັນດາກໍາລັງການເຕີບໂຕທີ່ສໍາຄັນທີ່ສຸດຂອງແຕ່ລະປະເທດໃນຊຸມປີທີ່ຈະມາເຖິງ.ໃນການຊຸກຍູ້ເສດຖະກິດດິຈິຕອນ ລັດຖະບານແຕ່ລະປະເທດຖືເປັນໜຶ່ງໃນບັນດາໜ້າທີ່ຈຸດສຸມແນ່ໃສ່ຍູ້ແຮງການປັບປຸງໂຄງສ້າງພື້ນຖານເສດຖະກິດ ຕິດພັນກັບການປ່ຽນແປງໃໝ່ຮູບແບບການເຕີບໂຕ ແລະ ຍົກສູງຄຸນນະພາບການເຕີບໂຕ, ເຮັດໃຫ້ແຕ່ລະປະເທດຫຼຸດພົ້ນອອກຈາກສະພາບການມີລາຍຮັບປານກາງ ແລະ ກ້າວໄປເຖິງເປົ້າໝາຍກາຍເປັນປະເທດອຸດສາຫະກໍາພັດທະນາ. ທ່າອ່ຽງທີ່ກ່າວມາຂ້າງເທິງຈະເປີດໂອກາດ ແຕ່ໃນຂະນະດຽວກັນກໍຈະເກີດມີສິ່ງທ້າທາຍໃນຂະບວນການພັດທະນາ, ເປີດກວ້າງການຮ່ວມມືການລົງທຶນ, ການຄ້າ ໃຫ້ແກ່ແຕ່ລະປະເທດໃນນັ້ນມີ ຫວຽດນາມ, ລາວ ແລະ ກໍາປູເຈຍ. ບົດສໍາມະນາປະກອບສ່ວນຊີ້ໃຫ້ເຫັນສະພາບຕົວຈິງໃນການຮ່ວມມືການຄ້າ ແລະ ການລົງທຶນ ລະຫວ່າງ 3 ປະເທດ ໃນສະພາບການເສດຖະກິດດິຈິຕອນໃນປັດຈຸບັນ.

ທ່າແຮງບົ່ມຊ້ອນໃນການຮ່ວມມືດ້ານການຄ້າ ແລະ ການລົງທຶນ ລະຫວ່າງ ຫວຽດນາມກັບລາວ, ກໍາປູເຈຍ ມີຢ່າງຫຼວງຫຼາຍ, ແຕ່ໝາກຜົນທີ່ບັນລຸໄດ້ໃນໄລຍະທີ່ຜ່ານມາຍັງບໍ່ທັນສົມກັບທ່າແຮງບົ່ມຊ້ອນ, ທ່າໄດ້ປຽບຂອງແຕ່ລະຝ່າຍທີ່ມີຢູ່. ເພື່ອຊຸກຍູ້ການພັດທະນາເສດຖະກິດດິຈິຕອນໃນໄລຍະຕໍ່ໜ້າ, ຫວຽດນາມ, ລາວ, ກໍາປູເຈຍ ຈໍາເປັນຕ້ອງໄດ້ມີການສ້າງເງື່ອນໄຂ ແລະ ສະພາບແວດລ້ອມ ດ້ານລະບອບລະບຽບ, ນິຕິກໍາ ຕອບສະໜອງຄວາມຕ້ອງການຂອງຍຸກແຫ່ງການເຊື່ອມໂຍງສາກົນໃນເງື່ອນໄຂເສດຖະກິດດິຈິຕອນ. ສຸມໃສ່ການລົງທຶນກໍ່ສ້າງພື້ນຖານໂຄງລ່າງ ແລະ ໂປຣແກຣມຊັອບແວ ໃນການຫັນເປັນດິຈິຕອນ ແລະ ການພັດທະນາພື້ນຖານເສດຖະກິດດິຈິຕອນແຫ່ງຊາດ. ພ້ອມກັນນັ້ນ, ແຕ່ລະປະເທດຈໍາເປັນຕ້ອງມີການຍົກສູງຄວາມສາມາດ ແລະ ກໍາລັງແຮງການແຂ່ງຂັນຂອງວິສາຫະກິດ, ໂຄສະນາເຜີຍແຜ່, ສຸມໃສ່ການບໍາລຸງ, ກໍ່ສ້າງຖັນແຖວນັກທຸລະກິດ ເພື່ອຕອບສະໜອງຄວາມຕ້ອງການຂອງເສດຖະກິດດິຈິຕອນ ແລະ ທ່າອ່ຽງຂອງການປະຕິວັດອຸດສາຫະກໍາ 4.0, ກໍຄືການປັບຕົວການເຊື່ອມໂຍງເຂົ້າໃນຕະຫຼາດໂລກໃນຍຸກສະໄໝ. ແຕ່ລະປະເທດກໍຍັງຈໍາເປັນຕ້ອງສົ່ງເສີມ, ສ້າງເງື່ອນໄຂອໍານວຍຄວາມສະດວກ ແລະ ສະໜັບສະໜູນ ວິສາຫະກິດຜູ້ປະກອບການ, ປ່ຽນແປງໃໝ່ການປະດິດສ້າງ, ປັບປຸງເຕັກນິກ, ເຕັກໂນໂລຊີການຜະລິດ, ກໍ່ສ້າງ, ບໍາລຸງ ບຸກຄະລາກອນ ແລະ ຖັນແຖວນັກທຸລະກິດ ໂດຍສະເພາະ, ລັດຖະບານ ຈໍາເປັນຕ້ອງສ້າງໂຄງສ້າງພື້ນຖານເຕັກນິກດິຈິຕອນ ເພື່ອເຮັດໃຫ້ບັນດາວິສາຫະກິດປັບຕົວ ແລະ ກໍາໄດ້ທ່າອ່ຽງ, ທ່າແຮງຂອງສັກກະລາດແຫ່ງເສດຖະກິດດິຈິຕອນ.

ບົດຂ່າວ ແລະ ຖ່າຍພາບ: ທະນົງສອນ ສີບຸນເຮືອງ

ສຂຝ ຈັດຝຶກອົບຮົມການສົ່ງຂໍ້ມູນລົງເວັບໄຊ ສວສສຊ ແລະ ວິທີນຳໃຊ້ຫໍສະໝຸດເອເລັກໂຕຣນິກ

ຈໍານວນຜູ້ເຂົ້າຊົມ: 761

ສຂຝ ຈັດຝຶກອົບຮົມການສົ່ງຂໍ້ມູນລົງເວັບໄຊ ສວສສຊ ແລະ ວິທີນຳໃຊ້ຫໍສະໝຸດເອເລັກໂຕຣນິກ

ວັນທີ 12 ກັນຍາ 2023 ທີ່ ຫ້ອງປະຊຸມ ສວສສຊ (ຕຶກເສດຖະກິດ) ສູນຂໍ້ມູນຂ່າວສານ ແລະ ຝຶກອົບຮົມ ໄດ້ຈັດກອງປະຊຸມຝຶກອົບຮົມການສົ່ງຂໍ້ມູນລົງເວບໄຊ ສວສສຊ ແລະ ວິທີນໍາໃຊ້ຫໍສະໝຸດເອເລັກໂຕນິກ ໂດຍການເປັນປະທານ ຂອງ ທ່ານ ປອ. ທະນົງສອນ ສີບຸນເຮືອງ ວ່າການຫົວໜ້າ ສຂຝ; ມີພະນັກງານວິຊາການຈາກຫ້ອງການ, ກົມ, ສູນ, ສະຖາບັນຄົ້ນຄວ້າອ້ອມຂ້າງເຂົ້າຮ່ວມຈໍານວນ 30 ທ່ານ; ຈຸດປະສົງຂອງການຈັດຝຶກອົບຮົມໃນຄັ້ງນີ້ ເພື່ອເປັນການເຜີຍແຜ່ເວບໄຊ ແລະ ຫໍສະໝຸດເອເລັກໂຕນິກ ສວສສຊ, ພ້ອມທັງໃຫ້ບັນດາຜູ້ເຂົ້າຮ່ວມຈາກແຕ່ລະພາກສ່ວນອ້ອມຂ້າງ ໄດ້ຮັບຮູ້ ແລະ ເຂົ້າໃຈເຖິງຂັ້ນຕອນ, ວິທີການສົ່ງຂໍ້ມູນຂ່າວການເຄື່ອນໄຫວຈາກພາກສ່ວນຂອງຕົນ ແລະ ຜົນງານການຄົ້ນຄວ້າໃຫ້ຄະນະຮັບຜິດຊອບລົງເວບໄຊ ແລະ ເພື່ອຮຽນຮູ້ວິທີການນໍາໃຊ້ຫໍສະໝຸດເອເລັກໂຕນິກ.

ປະທານກອງປະຊຸມໄດ້ມີຄໍາເຫັນ ແລະ ກ່າວເປີດພິທີເຊິ່ງເພີ່ນໄດ້ກ່າວ: ເວບໄຊ ແມ່ນມີຄວາມສໍາຄັນ ແລະ ຈໍາເປັນຫຼາຍສໍາລັບອົງການຕ່າງໆ ໃນຍຸກປັດຈຸບັນ, ໂດຍສະເພາະ ສວສສຊ ເພາະເວບໄຊ ເປັນສື່ກາງໃນການນໍາສະເໜີ, ເຜີຍແຜ່ຂ່າວການເຄື່ອນໄຫວ ແລະ ຜົນງານການຄົ້ນຄວ້າຂອງນັກຄົ້ນຄວ້າ ສວສສຊ ເຮົາ; ຄຽງຄູ່ໄປກັບຫໍສະໝຸດທັນສະໄໝ ເຊິ່ງເປັນເຄື່ອງມືທີ່ຈໍາເປັນໃນການຫາຂໍ້ມູນເພື່ອປະກອບເຂົ້າໃນການຄົ້ນຄວ້າ ດັ່ງນັ້ນ, ສູນຂໍ້ມູນຂ່າວສານ ແລະ ຝຶກອົບຮົມຈຶ່ງໄດ້ສຸມໃສ່ 2 ໜ້າວຽກສໍາຄັນນີ້ຈົນສໍາເລັດ; ຫຼັງຈາກປະທານກອງປະຊຸມມີຄໍາເຫັນ ກໍ່ໄດ້ຮັບຟັງການບັນຍາຍຈາກນັກວິທະຍາກອນ 2 ທ່ານຄື: 1. ທ່ານ ປທ. ນ. ພູຄຽງ ໄຊສິລິ ຫົວໜ້າພະແນກ, ຄະນະຮັບຜິດຊອບໂຄງການພັດທະນາເວບໄຊ ສວສສຊ ບັນຍາຍໃນຫົວຂໍ້: ແນະນໍາການສົ່ງຂໍ້ມູນຂ່າວການເຄື່ອນໄຫວ ແລະ ຂໍ້ມູນບົດຄົ້ນຄວ້າຂອງແຕ່ລະພາກສ່ວນເພື່ອສົ່ງລົງເວບໄຊ; 2. ທ່ານ ປທ. ສິລິສິດ ໄຊສົມແພງ ວິຊາການ ພະແນກຫໍສະໝຸດ ຄະນະຮັບຜິດຊອບໂຄງການຫໍສະໝຸດເອເລັກໂຕນິກ ບັນຍາຍໃນຫົວຂໍ້: ແນະນໍາການນໍາໃຊ້ຫໍສະໝຸດເອເລັກໂຕນິກ; ກອງປະຊຸມໄດ້ກ່າວປິດລົງໃນວັນດຽວກັນ.

ບົດຂ່າວ: ພວງເພັດ ຈັນທະລີວົງ

ຖ່າຍພາບ: ແກ້ວວິວັນ ສີວິໄລ

ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ຫ້ອງການຄຸ້ມຄອງວິທະຍາສາດ ສວສສຊ ແລະ ສະມາຄົມສົ່ງເສີມຊຸມຊົນສີຂຽວ

ຈໍານວນຜູ້ເຂົ້າຊົມ: 1,011

ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ຫ້ອງການຄຸ້ມຄອງວິທະຍາສາດ ສວສສຊ ແລະ ສະມາຄົມສົ່ງເສີມຊຸມຊົນສີຂຽວ

ວັນທີ 25 ສິງຫາ 2023 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ຫ້ອງການຄຸ້ມຄອງວິທະຍາສາດ (ຫຄວ) ໄດ້ເຊັນບົດບັນທຶກຄວາມເຂົ້າໃຈ (MOU) ຮ່ວມກັນກັບສະມາຄົມສົ່ງເສີມຊຸມຊົນສີຂຽວ (ສຊຂ) ປະຈໍາປີ 2023; ກ່ຽວກັບວຽກງານຄຸ້ມຄອງວິທະຍາສາດ; ຝ່າຍ (ຫຄວ) ຕາງໜ້າເຊັນໂດຍ ທ່ານ ປອ. ສາຍຄໍາ ວໍລະເດດ ຫົວໜ້າຫ້ອງການຄຸ້ມຄອງວິທະຍາສາດ ແລະ ຝ່າຍສະມາຄົມສົ່ງເສີມຊຸມຊົນສີຂຽວ (ສຊຂ) ຕາງໜ້າເຊັນໂດຍ ທ່ານ ອອດ ດວງພະຈັນ ປະທານ GCA ໂດຍການເຂົ້າຮ່ວມຂອງ ທ່ານ ປອ. ກິແກ້ວ ຈັນທະບູຣີ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.

ຈຸດປະສົງ ແລະ ເປົ້າໝາຍຫຼັກໃນການເຊັນ (MOU) ຄັ້ງນີ້ແມ່ນ ເພື່ອສ້າງເວທີໃຫ້ບັນດານັກຄົ້ນຄວ້າ ແລະ ສະຖາບັນຄົ້ນຄວ້າຕ່າງໆ ໄດ້ຮັບການນໍາໃຊ້ ເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ຢ່າງມີປະສິດທິພາບ ແລະ ປະສິດທິຜົນສູງເປັນກ້າວໆ, ກອງປະຊຸມແລກປ່ຽນຄໍາຄິດເຫັນການຄົ້ນຄວ້າ ແລະ ນະໂຍບາຍເສດຖະກິດ-ສັງຄົມປະຈໍາປີ 2023 ຈະດໍາເນີນພາຍໃຕ້ຫົວຂໍ້: ການພັດທະນາເສດຖະກິດ-ສັງຄົມພາຍໃຕ້ສະພາບຄວາມຍຸ້ງຍາກ ທາງດ້ານເສດຖະກິດ-ການເງິນ ແລະ ການປ່ຽນແປງໃໝ່ໃນສະຕະວັດທີ 21; ໂດຍເນັ້ນ 3 ຂົງເຂດໃຫຍ່ຄື: (1) ຂົງເຂດເສດຖະກິດແມ່ນຈະສຸມໃສ່ຫົວຂໍ້ທີ່ກ່ຽວຂ້ອງກັບການແກ້ໄຂຄວາມຍຸ້ງຍາກທາງດ້ານເສດຖະກິດ-ການເງິນ, ໂດຍສະເພາະແມ່ນການຮັກສາສະຖຽນລະພາບທາງດ້ານການເງິນ, ເງິນຕາ, ການແກ້ໄຂສາທາລະນະ ແລະ ອື່ນໆ; (2) ຂົງເຂດສັງຄົມ ໂດຍສະເພາະຈະສຸມໃສ່ຜົນກະທົບ ແລະ ການແກ້ໄຂຜົນກະທົບຂອງຄວາມຍຸ້ງຍາກທາງດ້ານເສດຖະກິດ-ການເງິນຕໍ່ການພັດທະນາຂະແໜງການສັງຄົມ ທີ່ມີຄວາມສ່ຽງ ແລະ ຄວາມບອບບາງຕໍ່ຄວາມຫຍຸ້ງຍາກດັ່ງກ່າວ ເຊັ່ນ: ຜົນກະທົບຕໍ່ການຫຼຸດຜ່ອນຄວາມທຸກຍາກ, ການເຄື່ອນຍ້າຍແຮງງານ, ຕໍ່ການດູແລສຸຂະພາບ ແລະ ການເຂົ້າໂຮງຮຽນຂອງເດັກນ້ອຍ ແລະ ເຍົາວະຊົນ ແລະ ອື່ນໆ; (3) ຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມ, ໂດຍສະເພາະແມ່ນຈະສຸມໃສ່ ການຄຸ້ມຄອງນໍາໃຊ້ ແລະ ສ້າງລາຍຮັບຈາກຊັບພະຍາກອນທໍາມະຊາດຢ່າງມີປະສິດທິພາບ, ປະສິດທິຜົນ ແລະ ຄວາມຍືນຍົງ, ການປັບຕົວເຂົ້າກັບສະພາບການປ່ຽນແປງຂອງດິນຟ້າອາກາດ ແລະ ຂາດແຄນນໍ້າ, ເສດຖະກິດໝູນວຽນ, ການຄຸ້ມຄອງສິ່ງເສດເຫຼືອ ຫຼື ສິ່ງແວດລ້ອມໃຫ້ມີຄວາມສົມດຸນກັບການພັດທະນາ ແລະ ອື່ນໆ.

ບົດຂ່າວ: ພວງເພັດ ຈັນທະລີວົງ

ຖ່າຍພາບ: ແກ້ວວິວັນ ສີວິໄລ

ພິທີເປີດຊຸດຝຶກອົບຮົມວຽກງານກວດກາພັກ ແລະ ກວດກາລັດ ໃຫ້ພະນັກງານພາຍໃນ ສວສສຊ

ຈໍານວນຜູ້ເຂົ້າຊົມ: 706

ພິທີເປີດຊຸດຝຶກອົບຮົມວຽກງານກວດກາພັກ ແລະ ກວດກາລັດ ໃຫ້ພະນັກງານພາຍໃນ ສວສສຊ

ຕອນເຊົ້າຂອງວັນທີ 02 ສິງຫາ ປີ 2023 ຢູ່ຫ້ອງປະຊຸມສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີເປີດຊຸດຝຶກອົບຮົມວຽກງານກວດກາພັກ ແລະ ກວດກາລັດ ໃຫ້ພະນັກງານພາຍໃນ ສວສສຊ ໃຫ້ກຽດກ່າວເປີດພິທີໂດຍ ທ່ານ ປອ. ນາງ ອຳໄພວັນ ຄຳແສງສີວິໄລ ຄະນະປະຈຳພັກ, ປະທານກວດກາພັກ, ຮອງປະທານ ສວສສຊ, ເຂົ້າຮ່ວມໃນພິທີຄັ້ງນີ້ ມີຜູ້ຕາງໜ້າຈາກຄະນະກວດກາສູນກາງພັກ ແລະ ອົງກວດກາກວດກາແຫ່ງລັດ, ບັນດາທ່ານ ຫົວໜ້າ, ຮອງຫົວໜ້າ ຫ້ອງການ, ກົມ, ສະຖາບັນຄົ້ນຄວ້າ, ສູນ ແລະ ນັກສຳມະນາກອນທີ່ເປັນພະນັກງານພາຍໃນ ສວສສຊ ເຂົ້າຮ່ວມຢ່າງພ້ອມພຽງ.

ທ່ານ ປອ. ນາງ ອຳໄພວັນ ຄຳແສງສີວິໄລ ໄດ້ກ່າວວ່າ: ວຽກງານກວດກາ ແມ່ນວຽກງານໜຶ່ງທີ່ສຳຄັນ ຊຶ່ງຈະຕ້ອງໄດ້ເຮັດເປັນປົກກະຕິ ແລະ ສິ່ງສຳຄັນວຽກງານກວດກາປົກກະຕິ ເພື່ອຊຸກຍູ້ວຽກງານໃຫ້ປະຕິບັດຕາມແຜນການໃຫ້ສຳເລັດ, ຖ້າມີບ່ອນໃດຫຍຸ້ງຍາກ ຫຼື ບໍ່ສຳເລັດ ກໍຊອກໃຫ້ຮູ້ສາເຫດເພື່ອແກ້ໄຂທັນການ, ການກວດກາ ແມ່ນເພື່ອປົກປ້ອງພະນັກງານສະມາຊິກພັກ, ພະນັກງານລັດຖະກອນ ໃຫ້ມີສະຕິຕໍ່ກົດໝາຍ, ສະຕິການປະຕິບັດກົດລະບຽບຂອງພັກ, ບໍ່ໃຫ້ກະທຳຜິດ. ສະນັ້ນ, ການຝຶກອົບຮົມຄັ້ງນີ້ ປະກອບດ້ວຍ ບົດຮຽນ 15 ບົດ ເຫັນໄດ້ວ່າເປັນບົດຮຽນທີ່ສໍາຄັນຫຼາຍກ່ຽວກັບວຽກງານກວດກາພັກ-ລັດ ທີ່ທາງຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ສ້າງຫຼັກສູດຂຶ້ນມາ ເພື່ອຮັບໃຊ້ວຽກງານກວດກາໃນຂອບເຂດທົ່ວປະເທດ ໄດ້ນໍາໃຊ້ ແລະ ຈັດຕັ້ງຜັນຂະຫຍາຍວຽກງານດັ່ງກ່າວໃຫ້ມີປະສິດທິພາບ. ທ່ານຍັງໄດ້ຮຽກຮ້ອງມາຍັງບັນດາທ່ານນັກສຳມະນາກອນທີ່ເຂົ້າຮ່ວມຝຶກອົບຮົມໃນຄັ້ງນີ້ຈ່ົງພ້ອມກັນເອົາ ໃຈໃສ່ສຸມສະຕິປັນຍາ, ປະຕິບັດໂມງເວລາຢ່າງເຂັ້ມງວດ ແລະ ຍົກສູງຄວາມຮັບຜິດຊອບຂອງຕົນເຂົ້າໃນການຕິດຕາມ, ຮັບຟັງການບັນຍາຍ-ອະທິບາຍ, ຄົ້ນຄວ້າປະກອບຄຳເຫັນ ແລະ ແລກປ່ຽນບົດຮຽນກ່ຽວກັບວຽກງານກວດກາພັກ-ລັດ, ເປັນບົດຮຽນໃນການນຳໄປຈັດຕັ້ງປະຕິບັດໝູນໃຊ້ເຂົ້າໃນວຽກງານຕົວຈິງ ແນໃສ່ເຮັດໃຫ້ບັ້ນຝຶກອົບຮົມໃນຄັ້ງນີ້ເຕັມໄປດ້ວຍບັນຍາກາດ ແລະ ສາມາດບັນລຸຕາມຈຸດປະສົງຄາດໝາຍທີ່ວາງໄວ້.

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ກອງປະຊຸມເຊື່ອມຊຶມມະຕິກອງປະຊຸມສູນກາງ ຄັ້ງທີ 6 ສະໄໝ XI ແລະ ການເຜີຍແຜ່ຍຸດທະສາດການພັດທະນາຊັບພະຍາກອນມະນຸດ ຂອງ ສວສສຊ

ຈໍານວນຜູ້ເຂົ້າຊົມ: 736

ກອງປະຊຸມເຊື່ອມຊຶມມະຕິກອງປະຊຸມສູນກາງ ຄັ້ງທີ 6 ສະໄໝ XI ແລະ ການເຜີຍແຜ່ຍຸດທະສາດການພັດທະນາຊັບພະຍາກອນມະນຸດ ຂອງ ສວສສຊ

ວັນທີ 27 ກໍລະກົດ 2023 ຢູ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມສູນກາງ ຄັ້ງທີ 6 ສະໄໝ XI ແລະ ການເຜີຍແຜ່ຍຸດທະສາດການພັດທະນາຊັບພະຍາກອນມະນຸດ ຂອງ ສວສສຊ ພາຍໃຕ້ການເປັນປະທານກອງປະຊຸມຂອງ ສະຫາຍ ປອ. ສອນທະນູ ທຳມະວົງ ກຳມະການສູນກາງພັກ, ເລຂາຄະນະພັກ, ປະທານ ສວສສຊ, ມີບັນດາຄະນະປະຈຳພັກ, ຄະນະພັກ, ບັນດາຫົວໜ້າຫ້ອງການ, ກົມ, ສະຖາບັນຄົ້ນຄວ້າ ແລະ ສູນ, ຕະຫຼອດຮອດສະມາຊິກພັກ, ພະນັກງານພາຍໃນ ສວສສຊ ເຂົ້າຮ່ວມ.

ໃນກອງປະຊຸມ ທ່ານ ປອ. ສອນທະນູ ທຳມະວົງ ໄດ້ໃຫ້ກຽດເຜີຍແຜ່ມະຕິກອງປະຊຸມຄົບຄະນະຄັ້ງທີ 6 ຂອງຄະນະບໍລິຫານງານສູນກາງພັກສະໄໝທີ XI, ຈາກນັ້ນ, ທ່ານ ປອ. ກິແກ້ວ ຈັນທະບູຣີ ຄະນະປະຈຳພັກ, ຮອງເລຂາຄະນະພັກ, ຮອງປະທານ ສວສສຊ ກໍໄດ້ເຜີຍແຜ່ຍຸດທະສາດການພັດທະນາຊັບພະຍາກອນມະນຸດ ຂອງ ສວສສຊ ຮອດປີ 2025 ເຊິ່ງບັນດາເນື້ອໃນເອກະສານທີ່ກ່າວມານັ້ນ ລ້ວນແລ້ວແຕ່ມີຄວາມໝາຍສຳຄັນ ເພື່ອເຮັດໃຫ້ຄະນະພັກ-ຄະນະນຳ, ສະມາຊິກພັກ, ພະນັກງານຫຼັກແຫຼ່ງນໍາພາ-ຄຸ້ມຄອງ ໃນທົ່ວ ສວສສຊ ມີຄວາມຮັບຮູ້ຄວາມເຂົ້າໃຈ, ກຳແໜ້ນເຊື່ອມຊຶມ ແລະ ເປັນເອກະພາບສູງຕໍ່ບັນດາເນື້ອໃນທີ່ສຳຄັນຂອງມະຕິຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໝທີ XI ກໍຄືຍຸດທະສາດການພັດທະນາຊັບພະຍາກອນມະນຸດ ຮອດປີ 2025 ຂອງ ສວສສຊ ບົນພື້ນຖານນັ້ນ ເພື່ອຫັນມະຕິ ແລະ ຍຸດທະສາດດັ່ງກ່າວ ມາເປັນທິດທາງ, ວຽກງານ ແລະ ແຜນປະຕິບັດງານລະອຽດຂອງຕົນ ແລະ ສືບຕໍ່ຜັນຂະຫຍາຍໝາກຜົນເບື້ອງຕົ້ນ ຂອງກອງປະຊຸມຄົບຄະນະກາງສະໄໝທີ I ຂອງຄະນະບໍລິຫານງານພັກ ສວສສຊ.

ບົດຂ່າວ: ພູຄຽງ ໄຊສິລິ

ຖ່າຍພາບ: ແກ້ວວິວັນ ສີວິໄລ

ສະຫະພັນແມ່ຍິງ ສວສສຊ ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 68 ປີ

ຈໍານວນຜູ້ເຂົ້າຊົມ: 724

ສະຫະພັນແມ່ຍິງ ສວສສຊ ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 68 ປີ

ເນື່ອງໃນໂອກາດ ສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (ວັນທີ 20 ກໍລະກົດ 1955 ຫາ ວັນທີ 20 ກໍລະກົດ 2023) ສະຫະພັນແມ່ຍິງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຂຶ້ນໃນວັນທີ 25 ກໍລະກົດ 2023; ຢູ່ທີ່ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຫຼັກ 6). ໃຫ້ກຽດເຂົ້າຮ່ວມພິທີໃນຄັ້ງນີ້ໂດຍ ທ່ານ ປອ. ກິແກ້ວ ຈັນທະບູຣີ, ຄະນະປະຈໍາພັກ, ຮອງເລຂາຄະນະພັກ, ຮອງປະທານ ສວສສຊ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ມີຄະນະພັກ-ຄະນະນຳ ສວສສຊ, ບັນດາຄະນະນໍາຂອງຫ້ອງການ, ກົມ, ສະຖາບັນຄົ້ນຄວ້າ, ສູນ, ຜູ້ຕາງໜ້າອົງການຈັດ ຕັ້ງກໍາມະບານ, ຊາວໝຸ່ມ, ສະມາຊິກແມ່ຍິງທົ່ວ ສວສສຊ ເຂົ້າຮ່ວມທັງໝົດ 94 ທ່ານ.

ໃນພິທີ, ທ່ານ ນ. ອໍາທິລໍ ລັດຖະຍອດ, ປະທານ ສະຫະພັນແມ່ຍິງ ສວສສຊ ໄດ້ເລົ່າມູນເຊື້ອປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງສະຫະພັນແມ່ຍິງລາວໃນໄລຍະຜ່ານມາ ເພື່ອຫວນຄືນມູນເຊື້ອ ພາລະກໍາປະຫວັດສາດ ແລະ ບົດບາດຂອງເອື້ອຍນ້ອງແມ່ຍິງລາວໃນການປະກອບສ່ວນຕໍ່ພາລະກິດຕໍ່ສູ້ກູ້ຊາດ ກໍຄືໃນໄລຍະແຫ່ງການສ້າງສາ ແລະ ພັດທະນາປະເທດຊາດ. ນອກຈາກນີ້ ກໍຍັງໄດ້ຈັດໃຫ້ມີເວທີເສວະນາ ແລະ ແລກປ່ຽນຄໍາຄິດເຫັນພາຍໃຕ້ຫົວຂໍ້: “ບົດບາດຂອງແມ່ຍິງລາວໃນການອະນຸລັກຮັກສາ ແລະ ສົ່ງເສີມວັດທະນະທໍາໃນຍຸກສະໄໝໃໝ່” ໂອກາດນີ້ ທ່ານ ປອ ນ. ອໍາໄພວັນ ຄໍາແສງສີວິໄລ ຄະນະປະຈຳພັກ, ປະທານກວດກາພັກ, ຮອງປະທານ ສວສສຊ ກໍໄດ້ໃຫ້ກຽດປະກອບຄໍາເຫັນກ່ຽວກັບສິ່ງທີ່ຄວນເອົາໃຈໃສ່ຕໍ່ໜ້າໃນການຮັກສາ ແລະ ອະນຸຮັກວັດທະນະທໍາ, ນອກນີ້ ທ່ານ ປອ ນ. ຂັນລາສີ ແກ້ວບຸນພັນ ກໍາມະການຄະນະພັກ, ຮອງປະທານ ສວສສຊ ກໍໄດ້ໃຫ້ກຽດປະກອບຄໍາເຫັນກ່ຽວກັບການສົ່ງເສີມພູມປັນຍາທ້ອງຖິ່ນແບບດັ້ງເດີມຂອງແມ່ຍິງລາວ.

ໃນໂອກາດນີ້ ທ່ານ ປອ. ກິແກ້ວ ຈັນທະບູຣີ ໄດ້ສະແດງຄວາມຍ້ອງຍໍຊົມເຊີຍ ແລະ ອວຍພອນເອື້ອຍນ້ອງແມ່ຍິງ ພ້ອມທັງມີຄໍາເຫັນໂອ້ລົມກ່ຽວກັບການເສີມຂະຫຍາຍມູນເຊື້ອອັນດີງາມຂອງແມ່ຍິງລາວ ແລະ ໄດ້ເນັ້ນໃຫ້ຄະນະນໍາສະຫະພັນແມ່ຍິງ ເອົາໃຈໃສ່ໃນການສຶກສາອົບຮົມການເມືອງແນວຄິດໃຫ້ແກ່ສະມາຊິກແມ່ຍິງຢ່າງກວ້າງຂວາງ ເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆໃນໄລຍະທີ່ປະເທດຊາດພວມຕົກຢູ່ໃນສະພາບຄວາມຫຍຸ້ງຍາກດ້ານເສດ ຖະກິດ-ການເງິນ, ສ້າງເງື່ອນໄຂ ແລະ ກາລະໂອກາດ ໃຫ້ເອື້ອຍນ້ອງແມ່ຍິງ ໄດ້ປະກອບສ່ວນໃນວຽກງານຂອງພັກ-ລັດໃຫ້ຫຼາຍຂຶ້ນກວ່າເກົ່າ, ຄຽງຄູ່ກັບການອະນຸຮັກວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ກໍຄືຂອງເອື້ອຍນ້ອງແມ່ຍິງລາວແລ້ວເອື້ອຍນ້ອງແມ່ຍິງທຸກຄົນກໍຕ້ອງເປັນເຈົ້າການໃນການສ້າງຄວາມເຂັ້ມແຂງໃຫ້ຕົນເອງ, ຊອກຮູ້ຮໍ່າຮຽນ, ຍົກລະດັບຄວາມຮູ້ຄວາມສາມາດໃຫ້ສູງຂຶ້ນເທື່ອລະກ້າວ.

ພ້ອມກັນນີ້ ເພື່ອເຮັດໃຫ້ພີທີສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປິ, ເປັນຂະບວນຟົດຟື້ນ ແລະ ມີສີສັນ ຄະນະສະຫະພັນແມ່ຍິງ ແລະ ບັນດາໜ່ວຍແມ່ຍິງ ອ້ອມຂ້າງ ສວສສຊ ຍັງໄດ້ຈັດງານວາງສະແດງສິນຄ້າ ແລະ ອາຫານ ຢູ່ທີ່ ສວສສຊ.

ບົດຂ່າວ:

ຖ່າຍພາບ: ສິລິສິດ ໄຊສົມແພງ

ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສວສສຊ ສະໄໝທີ I

ຈໍານວນຜູ້ເຂົ້າຊົມ: 804

ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສວສສຊ ສະໄໝທີ I

ໃນວັນທີ 14 ກໍລະກົດ 2023 ຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໄດ້ດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະໄໝທີ I ຂຶ້ນທີ່ ຫ້ອງປະຊຸມໃຫຍ່ຂອງສະຖາບັນ, ໂດຍການໃຫ້ກຽດເຂົ້າຮ່ວມຊີ້ນຳ ໂດຍສະຫາຍ ປອ. ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກປະທານສະພາທິດສະດີສູນກາງພັກ, ມີສະຫາຍ ປອ. ສອນທະນູ ທຳມະວົງ ກຳມະການສູນກາງພັກ ເລຂາຄະນະພັກ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີບັນດາສະຫາຍຄະນະປະຈຳພັກ, ຄະນະບໍລິຫານງານພັກ ສວສສຊ ແລະ ພາກສ່ວນກ່ຽວຂ້ອງເຂົ້າຮ່ວມ.

ສະຫາຍ ສອນທະນູ ທຳມະວົງ ໄດ້ກ່າວວ່າ: “ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສວສສຊ ສະໄໝທີ I ໄດ້ເປີດຂຶ້ນ ໃນທ່າມກາງບັນດາກາດທີ່ທົ່ວພັກ, ທົ່ວກຳລັງປະກອບອາວຸດ ທົ່ວປວງຊົນລາວ ທັງຊາດ ພວມຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IX ໃນໄລຍະກາງສະໄໝ ຢ່າງເປັນຂະບວນຟົດຟື້ນ” ເວົ້າສະເພາະແມ່ນຢູ່ໃນໄລຍະການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຊຶ່ງຈຸດປະສົງຫຼັກ ຂອງກອງປະຊຸມໃນຄັ້ງນີ້, ເພື່ອທົບທວນ, ຕີລາຄາຄືນ ການນຳພາ-ຊີ້ນຳ ຂອງຄະນະບໍລິຫານງານພັກ ສວສສຊ ຕະຫຼອດໄລຍະເຄິ່ງສະໄໝ ນັບແຕ່ກອງປະຊຸມໃຫຍ່ຜ່ານມາ ແລະ ກຳນົດທິດທາງສູ້ຊົນ ໃນທ້າຍສະໄໝ. ກອງປະຊຸມຄັ້ງນີ້, ໄດ້ມີການທາບທາມຄວາມໃວ້ວາງໃຈ ຕໍ່ການນຳພາລວມ ແລະ ບຸກຄົນ ໃນຄະນະບໍລິຫານງານພັກ ສວສສຊ ຈາກບັນດາສະຫາຍພະນັກງານຫຼັກແຫຼ່ງ ພາຍໃນ ສວສສຊ. ໃນໂອກາດນີ້ສະຫາຍ ສອນທະນູ ທຳມະວົງ ຍັງໄດ້ຍົກໃຫ້ເຫັນ ຄວາມໝາຍຄວາມສຳຄັນ ຂອງກອງປະຊຸມໃນຄັ້ງນີ້, ຕໍ່ການນຳພາຂອງພັກເພື່ອກໍ່ສ້າງໃຫ້ການຈັດຕັ້ງພັກ-ລັດ ໃຫ້ມີຄວາມເຂັ້ມແຂງ, ຕີຖອຍທຸກປະກົດການຫຍໍ້ທໍ້ຕ່າງໆ ແລະ ປະຕິບັດຄາດໝາຍທີ່ໄດ້ຮັບການມອບໝາຍໃຫ້ສຳເລັດ ຕາມທີ່ໄດ້ກຳນົດໃວ້, ໃນມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິບັດລາວ.

ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສວສສຊ ສະໄໝທີ I ໃນຄັ້ງນີ້ຍັງໄດ້ຮັບຟັງການໂອ້ລົມ ຊີ້ນຳຂອງສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ນຳອີກ.

ບົດຂ່າວ:

ຖ່າຍພາບ: ສິລິສິດ ໄຊສົມແພງ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາສາກົນ ຢູ່ ສສ ຫວຽດນາມ

ຈໍານວນຜູ້ເຂົ້າຊົມ: 822

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາສາກົນຢູ່ ສສ ຫວຽດນາມ

ໃນວັນທີ 29 ມີຖຸນາ 2023 ທີ່ຜ່ານມານີ້ ຄະນະນຳຜູ້ແທນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເຂົ້າຮ່ວມກອງປະຊຸມສຳມະນາສາກົນ ພາຍໃຕ້ຫົວຂໍ້ “ການລະດົມ ແລະ ນຳໃຊ້ທຶນ ແລະ ເຕັກໂນໂລຊີຢ່າງມີປະສິດທິຜົນຮັບປະກັນການພັດທະນາຢູ່ລາວ ແລະ ຫວຽດນາມ” ທີ່ ແຂວງລາວກາຍ ສສ. ຫວຽດນາມ ໂດຍການນໍາພາຂອງ ທ່ານ ປອ. ສອນທະນູ ທຳມະວົງ ປະທານສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ; ພ້ອມດ້ວຍຄະນະຈໍາ ນວນ 15 ທ່ານ.

ກອງປະຊຸມນັກສໍາມະນາກອນໄດ້ຜັດປ່ຽນກັນຂຶ້ນນຳສະເໜີບົດມີທັງໝົດ 40 ຫົວຂໍ້ ແລະ ໄດ້ແບ່ງເປັນ 3 ວາລະຄື: ວາລະທີ 1: ທຶນສໍາລັບການພັດທະນາຢູ່ລາວ ແລະ ຫວຽດນາມ, ວາລະທີ 2: ເຕັກໂນໂລຊີຕໍ່ກັບການພັດທະນາຢູ່ລາວ-ຫວຽດນາມ ແລະ ວາລະທີ 3 ສົນທະນາໂຕະມົນ ບົດຮຽນຂອງສາກົນ ແລະ ວິທີການແກ້ໄຂຊຸກຍູ້ການລະດົມ, ນຳໃຊ້ທຶນ ແລະ ເຕັກໂນໂລຊີໃນ ການພັດທະນາ, ທັງ 3 ວາລະບັນດານັກວິທະຍາສາດ 4 ຝ່າຍທີ່ມາຈາກສະຖາບັນດິດວິທະຍາສາດສັງຄົມຫວຽດນາມ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ, ສະຖາບັນການເມືອງແຫ່ງຊາດໂຮ່ຈີມິນ ແລະ ສະຖາບັນການເມືອງ ແລະ ການປົກຄອງແຫ່ງຊາດລາວ, ໄດ້ລາຍງານບົດ, ປຶກສາຫາລື, ວິເຄາະ, ແລກປ່ຽນບົດ ຮຽນເຊິ່ງກັນ ແລະ ກັນກ່ຽວກັບການລະດົມ, ນຳໃຊ້ທຶນ ແລະ ນຳໃຊ້ເຕັກໂນໂລຊີເຂົ້າໃນການພັດທະນາປະເທດຊາດ ແມ່ນຄວາມ ຮຽກຮ້ອງຕ້ອງການແຫ່ງການພັດທະນາໃນຍຸກສະໄໝໃໝ່ເວົ້າລວມ, ຢູ່ ສປປ ລາວ ເວົ້າສະເພາະ. ໃນການ “ສ້າງການຫັນປ່ຽນອັນເປັນພື້ນຖານ ແລະ ແຂງແຮງໃນການດຶງດູດການລົງທຶນພາຍໃນ ແລະ ຕ່າງປະເທດ”; ດ້ວຍການ ປັບປຸງໂຄງປະກອບການລົງທຶນ, ສຸມໃສ່ບັນດາໂຄງການພັດທະນາດ້ານພື້ນຖານໂຄງລ່າງ ທີ່ມີປະສິດທິຜົນອັນແທ້ຈິງຕາມບໍລິເວນເຂດ ແຄວ້ນ, ໂດຍສະເພາະໂຄງການທີ່ຈຳເປັນ, ເປັນໄມ້ງັດໃຫ້ແກ່ການພັດທະນາເສດຖະກິດ-ສັງຄົມ ແລະ ປ້ອງກັນຊາດ, ປ້ອງກັນຄວາມ ສະຫງົບ, ລວມທັງການລົງທຶນພັດທະນາພື້ນຖານໂຄງລ່າງ-ວັດຖຸເຕັກນິກ ອັນຈຳເປັນໃນເຂດຈຸດສຸມຜະລິດສິນຄ້າ. ລັດໄດ້ມີນະໂຍ ບາຍສົ່ງເສີມໃຫ້ທຸກພາກສ່ວນເສດຖະກິດ ແລະ ຜູ້ປະກອບການຈາກພາຍໃນ ແລະ ຕ່າງປະເທດຂະຫຍາຍບັນດາກິດຈະການລົງທຶນ ໃນທຸກຂົງເຂດ ແລະ ທຸກລະດັບ.

ກອງປະຊຸມໄດ້ຍົກໃຫ້ເຫັນບັນຫາສໍາຄັນ ໃນການນຳໃຊ້ທຶນເຂົ້າໃນການພັດທະນານັ້ນ, ໂດຍການ “ສົ່ງເສີມການຄົ້ນຄວ້າ ແລະ ນຳໃຊ້ຜົນສຳເລັດການຄົ້ນຄວ້າວິທະຍາສາດ, ເຕັກໂນໂລຊີ, ເຕັກນິກວິຊາການ, ນະວັດຕະກຳໃໝ່ ແລະ ພູມປັນຍາເຂົ້າໃນການຊຸກຍູ້ ການພັດທະນາເສດຖະກິດ-ສັງຄົມ”. ດ້ວຍການຮັບຮູ້ແຈ້ງວ່າ: ເຕັກໂນໂລຊີ ແມ່ນຂະບວນການຫັນປ່ຽນຊັບພະຍາກອນໃຫ້ກາຍເປັນ ຜະລິດຕະພັນ ເພື່ອຮັບໃຊ້ສັງຄົມດ້ວຍການນຳໃຊ້ລະບົບເຄື່ອງມື, ພະລັງງານ, ພາຫະນະ, ວິທີການ ແລະ ກຳມະວິທີການຜະລິດສະ ເພາະ. ປະເທດໃດບໍ່ສາມາດປັບໂຕທັນ ແລະ ນຳໃຊ້ເຕັກໂນໂລຊີເຂົ້າໃນການພັດທະນາຢ່າງມີປະສິດທິຜົນ ແມ່ນບໍ່ສາມາດຕາມທັນຍຸກ ສະໄໝໄດ້. ບົນຈິດໃຈດັ່ງກ່າວ, ການລະດົມ, ນຳໃຊ້ທຶນ ແລະ ນຳໃຊ້ເຕັກໂນໂລຊີເຂົ້າໃນການພັດທະນາ ສປປ ລາວ ແມ່ນໄດ້ຮັບການ ຈັດຕັ້ງຜັນຂະຫຍາຍມີຜົນສຳເລັດໃນຫຼາຍດ້ານ, ການລະດົມ ແລະ ນຳໃຊ້ທຶນຈາກການລົງທຶນຂອງລັດ, ການລົງທຶນຂອງເອກະຊົນ ແລະ ທຶນຊ່ວຍເຫຼືອທາງການເພື່ອການພັດທະນາ (ODA).

ໃນການຮ່ວມມືດ້ານການລົງທຶນລະຫວ່າງລາວ ແລະ ຫວຽດນາມແມ່ນໄດ້ຮັບການເສີມຂະຫຍາຍ ແລະ ໄດ້ຮັບໝາກຜົນທີ່ພົ້ນ ເດັ່ນແບບກ້າວກະໂດດ, ນັບແຕ່ປີ 1989 ເຖິງປີ 2021 ສອງປະເທດໄດ້ມີການລົງທຶນຮ່ວມກັນທັງໝົດ 410 ໂຄງການ, ມູນຄ່າການ ລົງທຶນ 4,1 ຕື້ໂດລາສະຫະລັດ ເຊິ່ງຈັດຢູ່ໃນອັນດັບທີ 3 ໃນຈໍານວນ 54 ປະເທດ ແລະ ເຂດແຄວ້ນທີ່ມີການລົງທຶນຢູ່ ສປປ ລາວ, ກອງປະຊຸມໄດ້ປິດລົງດ້ວຍຜົນສຳເລັດອັນຈົບງາມ.