ຂ່າວການເຄື່ອນໄຫວ

ສວສສຊ ຕ້ອນຮັບຄະນະຜູ້ແທນຈາກສະຖາບັນວິທະຍາສາດສັງຄົມຈີນ

ຈໍານວນຜູ້ເຂົ້າຊົມ: 653

ສວສສຊ ຕ້ອນຮັບຄະນະຜູ້ແທນຈາກສະຖາບັນວິທະຍາສາດສັງຄົມຈີນ

ໃນວັນທີ 14 ພະຈິກ 2023 ຢູ່ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການມາ ຢ້ຽມຢາມຂອງຄະນະຜູ້ແທນຈາກສະຖາບັນຄົ້ນຄວ້າຍຸດທະສາດອາຊີ-ປາຊີຟິກ ແລະ ສາກົນ, ສະຖາບັນວິທະຍາສາດ ສັງຄົມແຫ່ງຊາດຈີນ ນຳພາໂດຍ ທ່ານ ສຈ. ປອ. ຫຼີ ຊຽງ ຢາງ ຫົວໜ້າ ສະຖາບັນຄົ້ນຄວ້າ ຍຸດທະສາດອາຊີ-ປາຊີຟິກ ແລະ ສາກົນ, ສະຖາບັນວິທະຍາສາດສັງຄົມແຫ່ງຊາດຈີນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດ ວຽກຢູ່ ສປປ ລາວ ໃນລະຫວ່າງວັນທີ 13-14 ພະຈິກ 2023.

ໂອກາດນີ້ ທ່ານ ປອ. ນາງ ຂັນລາສີ ແກ້ວບຸນພັນ ກໍໄດ້ກ່າວຄວາມຂອບໃຈຕ້ອນຮັບ ທ່ານ ສຈ. ປອ. ຫຼີ ຊຽງ ຢາງ ພ້ອມດ້ວຍຄະນະ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້. ພ້ອມນັ້ນ, ທ່ານ ຮອງປະທານ ສວສສຊ ກໍໄດ້ແນະນຳໃຫ້ຊາບກ່ຽວກັບທີ່ຕັ້ງ ແລະ ພາລະບົດບາດຂອງສະຖາບັນວິ ທະຍາສາດເສດຖະກິດ ແລະ ສັງຄົມແຫ່ງຊາດ ຊຶ່ງມີພາລະບົດບາດເປັນເສນາ ທິການໃຫ້ແກ່ສູນກາງພັກ ແລະ ລັດຖະບານ ໃນການຄົ້ນຄວ້າ ແລະ ສະໜອງຂໍ້ມູນຂ່າວສານທາງດ້ານວິທະຍາສາດເສດຖະກິດ ແລະ ສັງຄົມ ເພື່ອຮັບໃຊ້ໃຫ້ແກ່ການວາງແນວທາງນະໂຍບາຍຂອງພັກ, ວິໄສທັດ, ແຜນຍຸດທະສາດ, ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ແລະ ທ່ານຍັງໄດ້ຍົກໃຫ້ເຫັນຜົນງານການຄົ້ນຄວ້າໃນໄລຍະຜ່ານມາຂອງ ສວສສຊ ຊຶ່ງຜ່ານມາໄດ້ຄົ້ນຄວ້າໃນຫົວຂໍ້ກ່ຽວກັບເສດຖະກິດ ຈຳ ນວນ 76 ໂຄງການ ແລະ ຫົວຂໍ້ຄົ້ນຄວ້າກ່ຽວກັບສັງຄົມ ຈຳນວນ 59 ໂຄງການ.

ທ່ານ ສຈ. ປອ. ຫຼີ ຊຽງຢາງ ກໍໄດ້ສະແດງຄວາມຂອບໃຈຕໍ່ ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານ ສວສສຊ ທີ່ໃຫ້ກຽດຕ້ອນຮັບຢ່າງສະໜິດສະໜົມ ແລະ ອົບອຸ່ນ ພ້ອມທັງລາຍງານສະພາບການເຄື່ອນ ໄຫວຂອງຄະນະ, ໄດ້ແຈ້ງຈຸດປະສົງໃນການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ຊາບ ຄືດັ່ງນີ້: ເພື່ອສຳຫຼວດຮ່ວງໂສ້ການຕອບສະໜອງ ແລະ ຄວາມຕ້ອງການໃນອາຊຽນ ມີບົດບາດແນວໃດຕໍ່ການສະໜອງຂອງຈີນ ແລະ ເພື່ອຮັບຊາບ ແລະ ເຂົ້າໃຈບົດຮຽນ, ຂໍ້ຄົງຄ້າງຢູ່ໃນບັນດາປະເທດ ໃນແຖບອິນດູຈີນທີ່ໄດ້ເຂົ້າ ຮ່ວມໃນການສ້າງແລວລະບຽບເສດຖະກິດໃນໂຄງການ “ໜຶ່ງແລວ ໜຶ່ງເສັ້ນທາງ”.

ຈາກນັ້ນ ຄະນະຜູ້ແທນໄດ້ເຂົ້າຮ່ວມກອງປະຊຸມພົບປະສອງຝ່າຍ LASES ແລະ (NIIS, CASS) ຊຶ່ງຝ່າຍລາວ ນຳພາໂດຍ ທ່ານ ພອນ ວິພົນຮຽນ ວ່າການແທນຫົວໜ້າຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ; ຝ່າຍຈີນ ນຳພາໂດຍ ທ່ານ ສຈ. ປອ. ຫຼີ ຊຽງຢາງ ຫົວໜ້າສະຖາບັນຄົ້ນ ຄວ້າຍຸດທະສາດອາຊີ-ປາຊີຟິກ ແລະ ສາກົນ, ສະຖາບັນວິທະຍາສາດສັງຄົມຈີນ ພ້ອມດ້ວຍຄະນະ, ກອງປະຊຸມ ພົບປະສອງຝ່າຍວິຊາການຄັ້ງນີ້ ໄດ້ປຶກສາຫາລືແລກປ່ຽນຄວາມຄິດເຫັນສະພາບການ ຫຼັງຈາກທີ່ໄດ້ເປີດການນໍາໃຊ້ໂຄງການເສັ້ນທາງລົດໄຟລາວ-ຈີນ ໃນປັດຈຸບັນ; ຝ່າຍລາວໄດ້ຍົກບັນຫາຂໍ້ສະດວກ ແລະ ຂໍ້ຄົງຄ້າງໃນການນຳໃຊ້ເສັ້ນທາງລົດໄຟລາວ-ຈີນ ໂດຍສະເພາະ ແມ່ນການນໍາໃຊ້ບໍລິການຕູ້ຂົນສົ່ງສິນຄ້າ ແລະ ການຂົນສົ່ງຜູ້ໂດຍສານ, ຫຼັງຈາກສອງສະຖາບັນໄດ້ປຶກສາແລກປ່ຽນບັນຫາດັ່ງກ່າວແລ້ວ ຝ່າຍຈີນເຫັນດີຈະໄດ້ຮ່ວມກັນຄົ້ນຄວ້າເພື່ອລາຍງານໃຫ້ລັດຖະບານໃນການແກ້ໄຂບັນຫາຮ່ວມກັນໃນຕໍ່ໜ້າ.

ຂ່າວ-ພາບ: ພູຄຽງ ໄຊສິລິ

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສັງຄົມນິຍົມສາກົນ ຄັ້ງທີ 10

ຈໍານວນຜູ້ເຂົ້າຊົມ: 1,240

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ
ເຂົ້າຮ່ວມກອງປະຊຸມສັງຄົມນິຍົມສາກົນ ຄັ້ງທີ 10

ໃນວັນທີ 04 ພະຈິກ 2023 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳພາໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເຂົ້າຮ່ວມກອງປະຊຸມສັງຄົມນິຍົມສາກົນ ຄັ້ງທີ 10 ພາຍໃຕ້ຫົວຂໍ້ “ສັງຄົມນິຍົມທັນສະໄໝ: ທິດສະດີ ແລະ ພຶດຕິກໍາ” ຊຶ່ງໄດ້ຈັດຂຶ້ນທີ່ເມືອງກຸ້ຍຫຼິນ, ແຂວງກວາງຊີ ສປ ຈີນ ໂດຍການເປັນເຈົ້າພາບຮ່ວມຂອງ ສະຖາບັນວິທະຍາສາດສັງຄົມຈີນ, ສູນຄົ້ນຄວ້າລັດທິກອມມູນິດສາກົນ, ສະຖາບັນຄົ້ນຄວ້າລັດທິມາກ; ຄະນະລັດທິມາກ, ມະຫາວິທະຍາໄລສ້າງຄູກວາງຊີ ແລະ ສູນຄົ້ນຄວ້າລັດທິມາກ ແລະ ພຶດຕິກຳ ວິທະຍາສາດສັງຄົມ ແລະ ມະນຸດວິທະຍາ, ສະຖາບັນການສຶກສາຂັ້ນສູງຂອງກວາງຊີ; ມີຄະນະຜູ້ແທນຈາກສະຖາບັນວິທະຍາສາດສັງຄົມຈີນ ນຳພາໂດຍທ່ານ ເຈີ່ນ ຈ້ານໝີນ, ຮອງປະທານ ສະຖາບັນວິທະຍາສາດສັງຄົມຈີນ (CASS) ພ້ອມດ້ວຍຄະນະ, ມີຄະນະຜູ້ແທນຈາກສະຖາບັນບັນດິດວິທະຍາສາດສັງຄົມຫວຽດນາມ ນຳພາໂດຍທ່ານ ຕ້າ ມິງ ຕວັນ, ຮອງປະທານ ສະຖາບັນບັນດິດວິທະຍາສາດສັງຄົມຫວຽດນາມ (VASS) ພ້ອມດ້ວຍຄະນະ, ນັກຄົ້ນຄວ້າ, ຈາກສາມປະເທດ ຈໍານວນ 100 ກວ່າທ່ານ.

ໃນວາລະເປີດກອງປະຊຸມ ປອ. ນາງ ຂັນລາສີ ແກ້ວບຸນພັນ ໄດ້ກ່າວວ່າ ກອງປະຊຸມສັງຄົມນິຍົມສາກົນ ຄັ້ງທີ 10 ໃນຄັ້ງນີ້ ເປັນກອງປະຊຸມທີ່ສໍາຄັນ ແລະ ສອດຄ່ອງເປັນຢ່າງຍິ່ງ ກັບສະພາບການຂອງໂລກໃນປະຈຸບັນ ຊຶ່ງເປັນການເປີດໂອກາດໃຫ້ບັນດາການນໍາ, ນັກຄົ້ນຄວ້າ ແລະ ນັກວິທະຍາສາດ ໄດ້ມີໂອກາດແລກປ່ຽນຄຳເຫັນ, ສະເຫນີແນວຄວາມຄິດ, ສະຫຼຸບ ແລະ ຖອດຖອນບົດຮຽນສຳຄັນຕໍ່ບັນຫາທີ່ເຜັດຮ້ອນຂອງໂລກທີ່ປະເທດສັງຄົມນິຍົມຂອງພວກເຮົາກຳລັງປະເຊີນໃນປະຈຸບັນ ເຊັ່ນ ບັນຫາດ້ານການເມືອງມີ ການຜັນປ່ຽນຢ່າງໄວວາ, ສັບສົນ, ຍາກທີ່ຈະຄາດຄະເນໄດ້ ໃນຂະນະດຽວກັນ ອິດທິກໍາລັງປໍລະປັກ ເວລາໃດກໍ່ຫວັງມ້າງເພທຳລາຍບັນດາປະເທດສັງຄົມນິຍົມ. ສະນັ້ນ ຕ້ອງໄດ້ເດີນໜ້າພ້ອມກັນຄົ້ນຄວ້າຢ່າງມີແຜນທີ່ມີລັກສະນະຍຸດທະສາດຮ່ວມກັນ ຢູ່ໃນສະພາບການສັງຄົມນິຍົມຂອງຍຸກທັນສະໄຫມ, ໂລກາພິວັດ, ການເຊື່ອມໂຍງພາກພື້ນ ແລະ ສາກົນ, ບົນພຶ້ນຖານການກໍ່ສ້າງສັງຄົມນິຍົມຢູ່ໃນໂລກ ໄດ້ມີຫຼາຍຮູບແບບແຕກຕ່າງກັນ ຂຶ້ນກັບຈຸດພິເສດສະເພາະ ແລະ ສະພາບການຂອງແຕ່ລະປະເທດ; ຂຶ້ນກັບການປະດິດສ້າງ ແລະ ປະດິດແຕ່ງ ໝູນໃຊ້ລັດທິມາກ-ເລນິນ ແລະ ບົດຮຽນຂອງແຕ່ລະປະເທດ.

ສຳລັບການກໍານົດຮູບແບບສັງຄົມນິຍົມຢູ່ ສປປ ລາວ ກໍ່ເປັນສິ່ງທ້າທາຍອັນໃຫຍ່ຫຼວງ, ເປັນພາລະກິດປະຕິວັດອັນຍິ່ງໃຫຍ່, ເລັ່ງດ່ວນ, ເລິກເຊິ່ງ, ຮອບດ້ານ, ຍາວນານ, ມີຄວາມຫຍຸ້ງຍາກ ແລະ ດຸເດືອດຂ້ຽວຂາດ. ຊຶ່ງປັດຈຸບັນ ສປປ ລາວ ກຳລັງປະເຊີນໜ້າກັບຜົນກະທົບຈາກ ເສດຖະກິດ, ອັດຕາເງິນເຟີ້ ນັບມື້ນັບຮຸນແຮງ ແລະ ບວກກັບຄວາມບອບບາງບໍ່ທັນເຂັ້ມແຂງທາງດ້ານເສດຖະກິດມະຫາພາກ ຂອງ ສປປ ລາວ ທີ່ສະສົມມາຫຼາຍປີຍັງແກ້ໄຂບໍ່ທັນຕົກ ສະນັ້ນສາມາດເວົ້າໄດ້ວ່າສະພາບແວດລ້ອມ ແລະ ເງື່ອນໄຂຂອງການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ຂອງ ສປປ ລາວ ແມ່ນເຕັມໄປດ້ວຍຄວາມຫຍຸ້ງຍາກ ແລະ ມີອຸປະສັກ, ເຫດການທີ່ຫຍໍ້ທໍ້ນີ້ຈະເປັນບົດຮຽນອັນສຳຄັນໃຫ້ຮູ້ໄດ້ສາຍເຫດທີ່ຈະຕ້ອງມີການປັບປຸງບູລະນະທາງດ້ານແນວຄວາມຄິດ, ທິດສະດີ ແລະ ພຶດຕິກຳໃນການກ້າວສູ່ສັງຄົມນິຍົມທີ່ທັນສະໄໝ, ຊຶ່ງ ປະທານໄກສອນ ພົມວິຫານ ໄດ້ສັ່ງສອນວ່າ ‘’ຍິ່ງຍາກ ກໍ່ຍິ່ງອົດທົນ, ຍິ່ງສັບສົນ ກໍ່ຍິ່ງທຸ່ນທ່ຽງ, ຍິ່ງລະອິດລະອ້ຽວຂ້ຽວຂາດ ກໍ່ຍິ່ງສະຫຼາດສ່ອງໃສ’’. ນອກນັ້ນ, ທ່ານຍັງໄດ້ສະແດງຄວາມເຊື່ອໝັ້ນຢ່າງໜັກແຫນ້ນວ່າ ບົດຮຽນດ້ານແນວຄວາມຄິດ, ທິດສະດີ ແລະ ພຶດຕິກໍາ ກ່ຽວກັບ ສັງຄົມນິຍົມທັນສະໄໝ ທີ່ຈະໄດ້ຮັບຈາກກອງປະຊຸມສຳມະນາຄັ້ງນີ້ ຈະເປັນປະໂຫຍດທີ່ສຸດ ສໍາລັບການກ້າວສູ່ສັງຄົມນິຍົມທັນສະໄໝຢູ່ ສປປ ລາວ ກໍຄືການເສີມສ້າງ ແລະ ຮັດແຫນ້ນຄວາມສາມັກຄີລະຫວ່າງບັນດາປະເທດສັງຄົມນິຍົມດ້ວຍກັນ.

ໃນກອງປະຊຸມໄດ້ຮັບຟັງການນຳສະເໜີບັນດາຫົວຂໍ້ທີ່ປີ່ນອ້ອມຫົວຂໍ້ໃຫຍ່ໃນ 3 ວາລະ ຄື: ວາລະທີ 1: ທິດສະດີມາກ ກັບທິດສະດີສະໄໝປັດຈຸບັນ, ວາລະທີ 2: ການຫັນເປັນທັນສະໄໝຂອງຈີນ ແລະ ຂະບວນການເຄື່ອນໄຫວສັງຄົມນິຍົມໂລກ ແລະ ວາລະທີ 3: ກົດເກນທົ່ວໄປຂອງການຫັນເປັນທັນສະໄໝ ແລະ ກົດເກນທົ່ວໄປຂອງການຫັນເປັນທັນສະໄໝທາງສັງຄົມນິຍົມ ທັງໝົດ 32 ຫົວຂໍ້,ໃນນັ້ນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ນຳສະເໜີບົດຈຳນວນ 05 ຫົວຂໍ້ ເພື່ອແລກປ່ຽນສົນທະນາໃນກອງປະຊຸມຄັ້ງນີ້ ຄື: 1) ສ້າງສັງຄົມສາມັກຄີປອງດອງ, ປະຊາທິປະໄຕ, ຍຸດຕິທຳ ແລະ ສີວິໄລ ເພື່ອກ້າວສູ່ສັງຄົມນິຍົມ ນໍາສະເໜີໂດຍ ສະຖາບັນຄົ້ນຄວ້າສັງຄົມວິທະຍາ; 2) ການໝູນໃຊ້ທິດສະດີມາກ-ເລນິນ ເຂົ້າໃນການພັດທະນາກົນໄກເສດຖະກິດຕະຫຼາດໃຫ້ທັນສະໄໝ ແລະ ຍືນຍົງ ຕາມທິດສັງຄົມນິຍົມ ຂອງ ສປປ ລາວ ນຳສະເໜີໂດຍ ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ; 3) ບົດບາດຂອງວັດທະນະທຳໃນການພັດທະນາເພື່ອກ້າວສູ່ສັງຄົມນິຍົມ ແລະ ທັນສະໄໝ ນໍາສະເໜີໂດຍ ສະຖາບັນຄົ້ນຄວ້າວັດທະນະທຳ; 4) ການກໍ່ສ້າງພັກໃນເງື່ອນໄຂເຊື່ອມໂຍງສາກົນ ສິ່ງທ້າທາຍໃນການກ້າວສູ່ສັງຄົມນິຍົມທັນສະໄໝຂອງ ສປປ ລາວ ນຳສະເໜີໂດຍ ສະຖາບັນຄົ້ນຄວ້າການເມືອງວິທະຍາ ແລະ 5) ໝູນໃຊ້ແນວຄິດ ໄກສອນ ພົມວິຫານ ເຂົ້າໃນຂົງເຂດວຽກງານການເມືອງ-ແນວຄິດ ຂອງພັກປະຊາຊົນ ປະຕິວັດລາວ ເພື່ອກ້າວສູ່ຄວາມທັນສະໄໝ ນໍາສະເໜີໂດຍ ສະຖາບັນຄົ້ນຄວ້າປະຫວັດສາດ ແລະ ບູຮານວິທະຍາ. ໃນຕອນທ້າຍກອງປະຊຸມ ທັງສາມຝ່າຍ CASS-VASS-LASES ໄດ້ຕົກລົງເຫັນດີເປັນເອກະພາບກ່ຽວກັບການກຳນົດຫົວຂໍ້ກອງປະຊຸມສັງຄົມນິຍົມສາກົນ ຄັ້ງທີ 11 ທີ່ ສປປ ລາວ ກໍຄືສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນເຈົ້າພາບ ໃນປີ 2024 ທີ່ຈະມາເຖິງນີ້ ຊຶ່ງຫົວຂໍ້ຄາດຄະເນແມ່ນ “100 ປີ ແຫ່ງການປ່ຽນແປງ-ການຂະຫຍາຍຕົວຂອງທິດສະດີມາກ-ເລນິນໃນສັດຕະວັດທີ 21”.

ຂ່າວ-ພາບ: ພູຄຽງ ໄຊສິລິ

ກອງປະຊຸມສຳມະນາສາກົນກ່ຽວກັບ ການຮ່ວມມືຄຸນນະພາບສູງ “ໜຶ່ງແລວໜຶ່ງເສັ້ນທາງ”

ຈໍານວນຜູ້ເຂົ້າຊົມ: 987

ກອງປະຊຸມສຳມະນາສາກົນກ່ຽວກັບ ການຮ່ວມມືຄຸນນະພາບສູງ "ໜຶ່ງແລວໜຶ່ງເສັ້ນທາງ"

ໃນລະຫວ່າງວັນທີ 27-29 ຕຸລາ 2023 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳພາໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສຳມະນາສາກົນກ່ຽວກັບ ການຮ່ວມມືຄຸນນະພາບສູງ “ໜຶ່ງແລວໜຶ່ງເສັ້ນທາງ” ພາຍໃຕ້ຫົວຂໍ້: ຜົນສໍາເລັດ ແລະ ຄວາມຄາດຫວັງ, ຊຶ່ງໄດ້ຈັດຂຶ້ນທີ່ນະຄອນຫຼວງປັກກິ່ງ ສປ ຈີນ. ໂດຍການເປັນເຈົ້າພາບຂອງ ສະຖາບັນຄົ້ນຄວ້າຍຸດທະສາດອາຊີ-ປາຊີຟິກ ແລະ ສາກົນ, ສະຖາບັນວິທະຍາສາດສັງຄົມຈີນ (CASS). ກອງປະຊຸມໃນຄັ້ງນີ້ໄດ້ຈັດຂຶ້ນເປັນຄັ້ງທີ 3, ຊຶ່ງເປັນປີຄົບຮອບ 10 ປີ ຂອງການປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງທ່ານ ສີຈິ້ນຜິງ ປະທານປະເທດແຫ່ງ ສປ ຈີນ, ໂດຍມີບັນດາ 10 ປະເທດອາຊຽນ, ອົງການຈັດຕັ້ງສາກົນປະຈໍານະຄອນປັກກິ່ງ ແລະ ຜູ້ແທນທີ່ຊ່ຽວຊານເຂົ້າຮ່ວມຫຼາຍກວ່າ 100 ທ່ານ.

ກອງປະຊຸມໄດ້ຮັບຟັງການນຳສະເໜີບັນດາຫົວຂໍ້ຍ່ອຍດັ່ງນີ້: 1) ຮ່ວມກັນພັດທະນາ “ໜຶ່ງແລວໜຶ່ງເສັ້ນທາງ”: ການເຊື່ອມຈອດພື້ນຖານໂຄງລ່າງ ແລະ ການຮ່ວມມືທາງດ້ານເສດຖະກິດ ແລະ ການຄ້າ, 2) ຮ່ວມກັນພັດທະນາ “ໜຶ່ງແລວໜຶ່ງເສັ້ນທາງ”: ການວາງນະໂຍບາຍ ແລະ ການຄຸ້ມຄອງດ້ານນະວັດຕະກຳ, 3) ຮ່ວມກັນພັດທະນາ “ໜຶ່ງແລວໜຶ່ງເສັ້ນທາງ”: ການແລກປ່ຽນວັດທະນະທຳ ແລະ ການສ້າງຄວາມເຊື່ອໝັ້ນ.

ໃນເວທີກອງປະຊຸມດັ່ງກ່າວ, ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຂຶ້ນກ່າວຄຳປາໄສ ຫົວຂໍ້ “ການເຊື່ອມຈອດດ້ານພື້ນຖານໂຄງລ່າງ ແລະ ການຮ່ວມມືດ້ານເສດຖະກິດ-ການຄ້າ”. ທ່ານໄດ້ມີຄຳເຫັນວ່າ ທົ່ວໂລກກຳລັງກ້າວເຂົ້າສູ່ຍຸກໃຫມ່ທີ່ເຕັມໄປດ້ວຍຄວາມຫຍຸ້ງຍາກອັນໜັກໜ່ວງນັບຕັ້ງແຕ່ການແຜ່ລະບາດຂອງພະຍາດໂຄວິດ-19, ຄວາມວຸ້ນວາຍທາງດ້ານການເມືອງ, ການແຕກແຍກຂອງຕ່ອງໂສ້ການສະໜອງ ແລະ ເສດຖະກິດຖົດຖອຍ. ສະນັ້ນ ການເຊື່ອມໂຍງ ແລະ ການຮ່ວມມື ຈຶ່ງເປັນກຸນແຈທີ່ຈະຊ່ວຍໃຫ້ພວກເຮົາຮັບມືກັບສິ່ງທ້າທາຍເຫຼົ່ານີ້ໄດ້ດີຂຶ້ນ ແລະ ແກ້ໄຂຄວາມບໍ່ແນ່ນອນໃນໂລກທີ່ແຕກແຍກໃນປະຈຸບັນ. ຊຶ່ງພວກເຮົາໄດ້ຮັບການພິສູດໃຫ້ເຫັນແລ້ວວ່າ “ໜຶ່ງແລວໜຶ່ງເສັ້ນທາງ” ແມ່ນຂໍ້ລິເລີ່ມການຮ່ວມມືທີ່ເປີດກ້ວາງ ແລະ ຮອບດ້ານ, ໂດຍສາມາດເວົ້າໄດ້ຢ່າງຫນັກແຫນ້ນວ່າ ການເປີດກວ້າງນັ້ນນໍາໄປສູ່ຄວາມກ້າວຫນ້າ ແລະ ປິດຕ້ານຄວາມຫຼ້າຫລັງ. ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ກາຍເປັນເວທີການຮ່ວມມືລະຫວ່າງປະເທດທີ່ໃຫຍ່ທີ່ສຸດໃນໂລກ ອີງຕາມການລາຍງານສະຖິຕິ ສປ ຈີນ ໄດ້ລົງນາມການຮ່ວມມືພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຫຼາຍກວ່າ 200 ສະບັບກັບ 150 ປະເທດ ແລະ ກັບອົງການສາກົນຫຼາຍກວ່າ 30 ອົງການໃນ 5 ທະວີບ, ໄດ້ເປີດໂຄງການຮ່ວມມືພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຫຼາຍກວ່າ 3,000 ໂຄງການ ເປັນມູນຄ່າຫຼາຍກວ່າ 1 ພັນຕື້ໂດລາສະຫະລັດ. ສຳລັບ ສປປ ລາວ ໜຶ່ງໃນໂຄງການຂໍລິເລີ່ມ “ໜຶ່ງແລວໜຶ່ງເສັ້ນທາງ” ທີ່ສຳເລັດແມ່ນໂຄງການລົດໄຟລາວ-ຈີນ ທີ່ໄດ້ເປີດນໍາໃຊ້ໃນວັນທີ 2 ທັນວາ 2021 ເປັນຕົ້ນມາ ຊຶ່ງມີແຜນຈະກາຍເປັນຈຸດເຊື່ອມຕໍ່ໃນພາກພື້ນອາຊີຕາເວັນອອກສ່ຽງໃຕ້ ຄືເສັ້ນທາງລົດໄຟ ປະເທດສິງກະໂປ – ຄຸນໝິງ ໂດຍຜ່ານ ສປປ ລາວ, ໄທ ແລະ ມາເລເຊີຍ ເອີ້ນເສັ້ນທາງນີ້ວ່າ Pan–Asia ຈາກຕາໜ່າງການເຊື່ອມຕໍ່ດັັ່ງກ່າວ ທາງລົດໄຟສາຍໜຶ່ງຈະເຊື່ອມຕໍ່ປະເທດໄທ ແລະ ຫວຽດນາມ ຜ່ານແຂວງສະຫວັນນະເຂດ, ສ່ວນເສັ້ນທາງທີສອງຈະແລ່ນຈາກແຂວງສະຫວັນນະເຂດ ໄປຮອດປາກເຊ. ສາຍທີສາມຈະແລ່ນໄປຕາມລຽບຊາຍແດນ ລາວ-ໄທ ຈາກວຽງຈັນ ຫາ ທ່າແຂກ ແລະ ສາຍສຸດທ້າຍຈະເຊື່ອມຕໍ່ ອີກສາຍໜຶ່ງ ຈາກທ່າແຂກ ຫາ ວັງແອງ ຂອງຫວຽດນາມ. ອີກໜຶ່ງ ຜົນສຳເລັດ ແລະ ໝາກຜົນຂອງໂຄງການໜຶ່ງແລວໜຶ່ງເສັ້ນທາງ ກໍ່ຄືການເປີດວິທະຍາໄລເຕັກນິກ-ວິຊາຊີບການລົດໄຟ ໃນວັນທີ 12 ຕຸລາ 2023 ທີ່ຜ່ານມາ ໂດຍໄດ້ຮັບການຊ່ວຍເຫຼືອຈາກ ລັດຖະບານຂອງ ສປ ຈີນ ແລະ ເປັນກຽດໃນພິທີເປີດນໍາໃຊ້ວິທະຍາໄລເຕັກນິກ-ວິຊາຊີບການລົດໄຟ ໂດຍພະນະທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ເພື່ອສ້າງບຸກຄະລາກອນລາວ ເມື່ອຈົບການສຶກສາຢູ່ວິທະຍາໄລດັ່ງກ່າວສາມາດສະໝັກເຂົ້າເຮັດວຽກນໍາບໍລີສັດລົດໄຟ ລາວ-ຈີນໄດ້. ນອກນັ້ນທ່ານກໍ່ໄດ້ຍົກໃຫ້ເຫັນ ການຮ່ວມມືດ້ານເສດຖະກິດ-ການຄ້າ ຂອງ ຈີນ-ອາຊຽນ ເປັນຕົ້ນແມ່ນຄວນເອົາໃຈໃສ່ໃນການປະຕິບັດສັນຍາຄູ່ຮ່ວມມືເສດຖະກິດແບບຮອບດ້ານລະດັບພາກພື້ນ Regional Comprehensive Economic Partnership (RCEP) ແລະ ສົ່ງເສີມການສ້າງສັນຍາການຄ້າເສລີອາຊຽນ-ສປ ຈີນ ສະບັບທີ 3 ຫຼື ASEAN–China Free Trade (ACFTA) 3.0 ທີ່ເຫັນວ່າເປັນຜົນປະໂຫຍດໃຫ້ແກ່ພາກທຸລະກິດ, ຜູ້ປະກອບການ ແລະ ວິສາຫະກິດຂະໜາດນ້ອຍ ແລະ ກາງ.

ໃນຕອນທ້າຍທ່ານ ສະຫຼຸບວ່າ ທາງລົດໄຟລາວ-ຈີນ ພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ໄດ້ມີບົດບາດສຳຄັນທີ່ບໍ່ພຽງແຕ່ສາມາດຜ່ານຜ່າສິ່ງທ້າທາຍໃນການເຊື່ອມຕໍ່ພື້ນຖານໂຄງລ່າງເທົ່ານັ້ນ, ຫາກຍັງປະກອບສ່ວນເຂົ້າໃນການຄົມມະນາຄົມໃນພາກພື້ນ ແລະ ກ້າວໄປສູ່ການກາຍເປັນສູນກາງຄົມມະນາຄົມຂອງພາກພື້ນໃນອະນາຄົດ ຊຶ່ງເປັນການປ່ຽນແປງຈາກປະເທດທີ່ບໍ່ມີຊາຍແດນຕິດຈອດກັບທະເລໃຫ້ເປັນປະເທດເຊື່ອມໂຍງເຊື່ອມຕໍ່ກັບສາກົນ ເຮັດໃຫ້ການພັດທະນາເສດຖະກິດ-ສັງຄົມ ເຕີບໂຕເປັນກ້າວໆ.

ຂ່າວ-ພາບ: ພອນສຸກ ຄຳວັນທອງ

ກອງປະຊຸມເຊື່ອມຊຶມ ແລະ ຜັນຂະຫຍາຍຜົນສຳເລັດຂອງກອງປະຊຸມຄົບຄະນະກາງສະໄໝຂອງສູນກາງພັກ ສະໄໝທີ XI ແລະ ເປີດຂະບວນການແຂ່ງຂັນຮັກຊາດ ແລະ ພັດທະນາ

ຈໍານວນຜູ້ເຂົ້າຊົມ: 782

ກອງປະຊຸມເຊື່ອມຊຶມ ແລະ ຜັນຂະຫຍາຍຜົນສຳເລັດຂອງກອງປະຊຸມຄົບຄະນະກາງສະໄໝຂອງສູນກາງພັກ ສະໄໝທີ XI ແລະ ເປີດຂະບວນການແຂ່ງຂັນຮັກຊາດ ແລະ ພັດທະນາ

ໃນວັນທີ 20 ຕຸລາ 2023 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍຜົນສຳເລັດຂອງກອງປະຊຸມກາງສະໄໝຂອງຄະນະບໍລິຫານງານສູນກາງພັກ ສະໄໝ ທີ XI ແລະ ເປີດຂະບວນການແຂ່ງຂັນຮັກຊາດ ແລະ ພັດທະນາ ໂດຍການເປັນປະທານຂອງ ທ່ານ ປອ. ສອນທະນູ ທຳມະວົງ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີບັນດາຄະນະພັກ-ຄະນະນຳ ສວສສຊ, ບັນດາຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານລັດຖະກອນທົ່ວ ສວສສຊ ເຂົ້າຮ່ວມ.

ໃນກອງປະຊຸມ ທ່ານ ປອ. ສອນທະນູ ທຳມະວົງ ປະທານ ສວສສຊ ກໍ່ໄດ້ເຜີຍແຜ່ ຜົນສຳເລັດການດຳເນີນກອງປະຊຸມ ຄົບຄະນະບໍລິຫານງານສູນກາງພັັກ ກາງສະໄໝທີ XI. ຫຼັງຈາກນັ້ນກອງປະຊຸມຍັງໄດ້ຮັບຟັງການເຜີຍແຜ່ບັນດານິຕິກຳທີ່ກ່ຽວຂ້ອງກັບວຽກງານແຂ່ງຂັນ-ຍ້ອງຍໍຂອງພັກ ແລະ ລັດຖະບານໂດຍສະເພາະ ມະຕິເລກທີ 01 ຂອງກົມການເມືອງສູນກາງພັກ ວ່າດ້ວຍການເພີ່ມທະວີວຽກງານແຂ່ງຂັນ-ຍ້ອງຍໍໃນໄລຍະໃໝ່, ລັດຖະດຳລັດ ເລກທີ 011 ຂອງປະທານປະເທດ ວ່າດ້ວຍການເປີດຂະບວນການແຂ່ງຂັນ-ຍ້ອງຍໍທົ່ວປະເທດໃນໄລຍະໃໝ່ ໂດຍ ທ່ານ ປອ. ນາງ ອຳໄພວັນ ຄຳແສງສີວິໄລ, ຄະນະປະຈຳພັກ, ປະທານກວດກາພັກ, ຮອງ ປະທານ ສວສສຊ; ດຳລັດ 116 ຂອງລັດຖະບານ ວ່າດ້ວຍການແຂ່ງຂັນ ແລະ ຍ້ອງຍໍ, ຂໍ້ຕົກລົງ ເລກທີ 54 ຂອງຄະນະຊີ້ນໍາລະດັບຊາດ ກ່ຽວກັບການແຂ່ງຂັນ ແລະ ຍ້ອງຍໍ ຮັກຊາດ ແລະ ພັດທະນາ ໂດຍ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ ແລະ ຮັບຟັງການເຜີຍແຜ່ ແຈ້ງການ ເລກທີ 01 ຂອງຄະນະຊີ້ນຳລະດັບຊາດ ກ່ຽວກັບການແຂ່ງຂັນ ແລະ ຍ້ອງຍໍຮັກຊາດ ແລະ ພັດທະນາ, ຂໍ້ຕົກລົງເລກທີ 54 ຂອງຄະນະຊີ້ນໍາລະດັບຊາດ ກ່ຽວກັບການແຂ່ງຂັນ ແລະ ຍ້ອງຍໍ ຮັກຊາດ ແລະ ພັດທະນາ ໂດຍ ທ່ານ ບຸນລັດ ແກ້ວອາສາ, ຄະນະພັກ, ຮອງປະທານ ຄຊຂຍ-ສວສສຊ, ຫົວໜ້າກອງເລຂາ ຄຊຂຍ-ສວສສຊ, ຫົວໜ້າກົມຈັດຕັ້ງ ແລະ ພະນັກງານ ພ້ອມທັງຂຶ້ນຜ່ານ ບົດສະຫຼຸບ ຕີລາຄາສະພາບການການຈັດຕັ້ງປະຕິບັດວຽກງານ ແຂ່ງຂັນ-ຍ້ອງຍໍໃນໄລຍະຜ່ານມາ ແລະ ທິດທາງແຕ່ນີ້ຮອດປີ 2025 ສວສສຊ, ແຜນການແຂ່ງຂັນຮັກຊາດ ແລະ ພັດທະນາ ແຕ່ນີ້ຮອດປີ 2025 ຂອງ ສວສສຊ ສະບັບເລກທີ 102, ລົງວັນທີ 11 ກັນຍາ 2023, ເນື້ອໃນການແຂ່ງຂັນຮັກຊາດ ແລະ ພັດທະນາ ແຕ່ນີ້ຮອດປີ 2025 ຂອງ ສວສສຊ, ສະບັບເລກທີ 103, ລົງວັນທີ 11 ກັນຍາ 2023, ຂໍ້ຕົກລົງ ເລກທີ 285 ຂອງຄະນະຊີ້ນໍາການແຂ່ງຂັນ-ຍ້ອງຍໍຮັກຊາດ ແລະ ພັດທະນາ ສວສສຊ ວ່າດ້ວຍການຮັບຮອງເອົາເນື້ອໃນການແຂ່ງຂັນ ຮັກຊາດ ແລະ ພັດທະນາ ແຕ່ນີ້ຮອດປີ 2025 ຂອງ ສວສສຊ. ຈາກນັ້ນ ບັນດາຫົວໜ້າຫ້ອງການ, ກົມ ສະຖາບັນຄົ້ນຄວ້າ, ສູນ ແລະ ຫົວໜ້າ 3 ອົງການຈັດຕັ້ງມະຫາຊົນ ພາຍໃນ ສວສສຊ ໄດ້ຂຶ້ນຈັບມືແຂ່ງຂັນກັນ.

ໃນຕອນທ້າຍກອງປະຊຸມ ທ່ານ ປອ. ສອນທະນູ ທຳມະວົງ ໄດ້ເນັ້ນໜັກໃຫ້ເອົາໃຈໃສ່ຕໍ່ວຽກງານດັ່ງກ່າວເພື່ອນຳໄປຄົ້ນຄວ້າຜັນຂະຫຍາຍເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາຂອງ ສວສສຊ ພ້ອມທັງຮຽກຮ້ອງໃຫ້ ຄະນະໜ່ວຍພັກ, ຄະນະນຳ ພ້ອມດ້ວຍສະມາຊິກພັກ-ພະນັກງານຫຼັກແຫຼ່ງຂອງ ສວສສຊ ສືບຕໍ່ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ພ້ອມກັນຈັດຕັ້ງຜັນຂະຫຍາຍມະຕິ, ຄຳສັ່ງຂອງພັກ, ຂອງລັດ ກ່ຽວກັບວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ຢ່າງຈິງຈັງ ໃນນັ້ນຕ້ອງໄດ້ ຮ່ວມຈິດຮ່ວມໃຈ ສາມັກຄີ ເປັນນ້ຳໜຶ່ງໃຈດຽວກັນ ເຮັດໃຫ້ບັນດາຄາດໜາຍຕ່າງໆ ບັນລຸໄດ້ຜົນສຳເລັດໃໝ່ ຢ່າງເປັນຮູບປະທຳ.

ຂ່າວ-ພາບ: ແກ້ວວິວັນ ສີວິໄລ

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມໂຕະມົນ ຈີນ-ອາຊຽນ ກ່ຽວກັບການພັດທະນາແບບຍືນຍົງ ປະຈຳປີ 2023

ຈໍານວນຜູ້ເຂົ້າຊົມ: 753

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມໂຕະມົນ ຈີນ-ອາຊຽນ ກ່ຽວກັບການພັດທະນາແບບຍືນຍົງ ປະຈຳປີ 2023

ໃນລະຫວ່າງວັນທີ 17-19 ຕຸລາ 2023 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳພາໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມໂຕ໋ະມົນ ຈີນ-ອາຊຽນ ກ່ຽວກັບການພັດທະນາແບບຍືນຍົງ ປະຈຳປີ 2023 ພາຍໃຕ້ການເປັນຄູ່ຮ່ວມຍຸດທະສາດຮອບດ້ານ ຈີນ-ອາຊຽນ ໃນຫົວຂໍ້: “ເຄືອຂ່າຍຄວາມຮູ້ສຳລັບການຮ່ວມມືທີ່ໄດ້ຜົນປະໂຫຍດທັງສອງຝ່າຍ ແລະ ຮ່ວມກັນສ້າງຍຸກໃໝ່ ເພື່ອການພັດທະນາທີ່ຍືນຍົງ” ຊຶ່ງໄດ້ຈັດຂຶ້ນທີ່ເມືອງໜານໜິງ, ແຂວງກວາງຊີ, ສປ ຈີນ ໂດຍການເປັນເຈົ້າພາບຮ່ວມຂອງ ສູນພັັດທະນາຄວາມຮູ້ສາກົນ, ສູນຄົ້ນຄວ້າການພັດທະນາຂອງສະພາແຫ່ງລັດເຂດປົກຄອງຕົນເອງເຜົ່າຈ້ວງກວາງຊີ ແລະ ຄະນະກຳມະການກຳນົດມາດຕະການຂອງເຂດປົກຄອງຕົນເອງເຜົ່າຈ້ວງກວາງຊີ, ກອງເລຂາສະມາຄົມຄັງຄວາມຄິດໃໝ່ສີສັນກວາງຊີ, ມີບັນດາ 10 ປະເທດອາຊຽນ ແລະ ຜູ້ແທນທີ່ຊ່ຽວຊານເຂົ້າຮ່ວມຫຼາຍກວ່າ 100 ທ່ານ.

ກອງປະຊຸມໄດ້ຮັບຟັງການນຳສະເໜີ 2 ບັນຫາໃຫຍ່ ດັ່ງນີ້: 1) ການປະຕິບັດຂໍ້ລິເລີ່ມການພັດທະນາໂລກ (Global Development Initiative: GDI) ແລະ ການປະຕິບັດວາລະການພັດທະນາແບບຍືນຍົງຂອງອົງການສະຫະປະຊາຊາດ ປີ 2023 ພາຍໃຕ້ການເປັນຄູ່ຮ່ວມຍຸດທະສາດຮອບດ້ານ ຈີນ-ອາຊຽນ ແລະ 2) ໂອກາດ ແລະ ສິ່ງທ້າທາຍ ສຳລັບການຮ່ວມມືທາງດ້ານອຸດສະຫະກຳລົດຍົນ ເພື່ອຊຸກຍູ້ການພັດທະນາລົດຍົນພະລັງງານໃຫມ່ ຈີນ-ອາຊຽນ ພາຍໃຕ້ການຟື້ນຟູຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງ ລະດັບໂລກ. ນອກນັ້ນຍັງໄດ້ປຶກສາຫາລືກ່ຽວກັບການຮ່ວມມືຍຸດທະສາດຮອບດ້ານ, ຊຸກຍູ້ການສ້າງປະຊາຄົມ ຈີນ-ອາຊຽນ ທີ່ມີອະນາຄົດຮ່ວມກັນ, ເສດຖະກິດດິຈິຕ໋ອນ, ການພັດທະນາແບບຍືນຍົງສີຂຽວ ແລະ ກາກບອນຕໍ່າ, ການນໍາໃຊ້ແລວທາງທະເລຕາເວັນຕົກໃໝ່ ເພື່ອຮັບໃຊ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໃຫ້ໄດ້ຮັບຜົນດີຂຶ້ນ ແລະ ເພື່ອເປັນການຊຸກຍູ້ເອື້ອອຳນວຍຄວາມສະດວກໃນການຮຽນຮູ້ ແລກປ່ຽນວັດທະນະທຳ ຈີນ-ອາຊຽນ.

ໃນກອງປະຊຸມດັ່ງກ່າວ, ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຂຶ້ນສະເໜີຫົວຂໍ້ “ການຮ່ວມມືດ້ານເສດຖະກິດດິຈິຕ໋ອນອາຊຽນ-ຈີນ” ຊຶ່ງທ່ານໄດ້ຍົກໃຫ້ເຫັນວ່າ ເສດຖະກິດດິຈິຕ໋ອນໄດ້ກາຍມາເປັນກຳລັງແຮງໃນການຂັບເຄື່ອນການພັດທະນາແບບຍືນຍົງ ທີ່ເປັນປັນຍາປະດິດ ແລະ ຫົວຄິດປະດິດສ້າງໃນການແກ້ໄຂສິ່ງທ້າທາຍ ດ້ານສິ່ງແວດລ້ອມ, ສັງຄົມ ແລະ ເສດຖະກິດ. ເສດຖະກິດດິຈິຕ໋ອນໄດ້ກວມເອົາການນຳໃຊ້ເຕັກໂນໂລຊີດິຈິຕ໋ອນ, ການເຊື່ອມຕໍ່ ແລະ ນະວັດຕະກໍາທີ່ຂັບເຄື່ອນດ້ວຍຂໍ້ມູນເພື່ອຫັນເປັນອຸດສາຫະກຳ ແລະ ອຳນວຍຄວາມສະດວກໃຫ້ແກ່ການເຕີບໂຕຂອງເສດຖະກິດ. ສຳລັບ ສປປ ລາວ ໄດ້ມີຄວາມພະຍາຍາມຢ່າງຕັ້ງໜ້າ ເພື່ອສ້າງຄວາມເຂັ້ມແຂງທາງດ້ານເສດຖະກິດ ໂດຍສະເພາະເສດຖະກິດດິຈິຕ໋ອນ ຕາມສະຖິຕິ ສປປ ລາວ ມີປະຊາກອນຫຼາຍກວ່າ 80% ມີໂທລະສັບມືຖື ແລະ ຜູ້ໃຊ້ອິນເຕີເນັດມີເຖິງ 3.8 ລ້ານຄົນ ຫຼື 51% ຂອງປະຊາກອນທັງໝົດ, ມີການຂະຫຍາຍ ຕົວ 7.5% ໃນປີ 2022. ອີງຕາມບົດລາຍງານຂອງທະນາຄານໂລກ (2022) ຂໍ້ມູນສະແດງໃຫ້ເຫັນວ່າເສດຖະ ກິດດິຈິຕ໋ອນໃນ ສປປ ລາວ ຢູ່ທີ່ປະມານ 3% ຂອງ GDP, ຄາດຄະເນວ່າຈະເຕີບໂຕຮອດ 10% ຂອງ GDP ໃນປີ 2040. ເສດຖະກິດດິຈິຕ໋ອນຂອງ ສປປ ລາວ ແມ່ນໃກ້ຄຽງກັບຂະໜາດຂອງຂະແຫນງການຜະລິດອື່ນໆ. ເຖິງຢ່າງໃດກໍຕາມ ເສດຖະກິດດິຈິຕ໋ອນ ເປັນສິ່ງໃໝ່ສຳລັບ ສປປ ລາວ ຖ້າທຽບໃສ່ບັນດາປະເທດໃນອາຊຽນ ແລະ ສປ ຈີນ. ເຖິງແມ່ນວ່າ ສປປ ລາວ ບໍ່ມີທາງອອກສູ່ທະເລ ແຕ່ເຕັກໂນໂລຊີດິຈິຕ໋ອນໄດ້ສົ່ງຜົນປະໂຫຍດອັນຫຼວງຫຼາຍໃຫ້ແກ່ປະຊາຊົນລາວ ແລະ ວິສາຫະກິດໃຫ້ມີຊ່ອງທາງໃໝ່ໃນການເຊື່ອມຕໍ່ກັບຕະຫຼາດພາຍໃນ ແລະ ສາກົນ ແຕ່ກົງກັນຂ້າມການຄ້າ E-commerce ແມ່ນຍັງຢູ່ໃນຂັ້ນເລີ່ມຕົ້ນຂອງ ສປປ ລາວ ແລະ ການດຳເນີນທຸລະກິດ E-commerce ແມ່ນຂ້ອນຂ້າງໃໝ່ສຳລັບຄົນລາວ, ການຮັບຮູ້ E-commerce ຂອງຜູ້ບໍລິໂພກ ແລະ ພາກທຸລະກິດພາຍໃນປະເທດຍັງຖືກຈໍາກັດ. ນອກຈາກນັ້ນ ສປປ ລາວ ຍັງປະສົບກັບຄວາມຫຍຸ້ງຍາກໃນການຮັບປະກັນການເຊື່ອມຕໍ່ກັບພື້ນຖານໂຄງລ່າງດິຈິຕ໋ອນ ແລະ ຂອບກົດໝາຍ.

ນອກນັ້ນ ທ່ານຍັງໄດ້ຕີລາຄາສູງຕໍ່ກັບບັນດາຄວາມຄືບໜ້າໃນຂົງເຂດຕ່າງໆຂອງແຜນການດຳເນີນງານ ອາຊຽນ-ຈີນ 2021-2025 ໂດຍສະເພາະແມ່ນຂົງເຂດເສດຖະກິດດິຈິຕ໋ອນ ແລະ ຍັງໄດ້ມີຂໍສະເຫນີໃຫ້ອາຊຽນ-ຈີນ ຄວນເພີ່ມທະວີການຮ່ວມມືດ້ານນະໂຍບາຍ, ສ້າງສະພາບແວດລ້ອມທີ່ດີໃຫ້ແກ່ການພັດທະນາອຸດສາຫະກຳດິຈິຕ໋ອນ ເພື່ອຫັນປະເທດເຂົ້າສູ່ເສດຖະກິດດິຈິຕ໋ອນຢ່າງເຕັມຕົວ ແລະ ຊຸກຍູ້ວິສາຫະກິດຂະຫນາດນ້ອຍ ແລະຂະຫນາດກາງ ໃຫ້ໄດ້ນຳໃຊ້ເຕັກໂນໂລຊີດິຈິຕ໋ອນເຂົ້າໃນຂະບວນການຜະລິດໃຫ້ເກີດຜົນຜະໂຫຍດສູງສຸດ ຕ່າງຝ່າຍຕ່າງໄດ້ຮັບຜົນ.

ບົດຂ່າວ ແລະ ຖ່າຍພາບ: ພອນສຸກ ຄຳວັນທອງ

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະລົງເຮັດວຽກທີ່ແຂວງຄຳມ່ວນ

ຈໍານວນຜູ້ເຂົ້າຊົມ: 748

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະລົງເຮັດວຽກທີ່ແຂວງຄຳມ່ວນ

ໃນລະຫວ່າງວັນທີ 10-11 ຕຸລາ 2023 ຜ່ານມານີີ້, ຄະນະນໍາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ(ສວສສຊ) ນໍາໂດຍ ທ່ານ ປອ ສອນທະນູ ທໍາມະວົງ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມຄະນະ ໄດ້ເຄື່ອນໄຫວເຮັດວຽກຢູ່ແຂວງຄໍາມ່ວນ ໂດຍໄດ້ຮັບການຕ້ອນຮັບຈາກ ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ ທີ່ຫ້ອງວ່າການແຂວງ ໃນໂອກາດທີ່ໄດ້ເດີນທາງມາເຮັດວຽກທີ່ແຂວງຄຳມ່ວນ ເພື່ອເຜີຍແຜ່ດຳລັດຂອງທ່ານນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະບັບເລກທີ 559/ນຍ ລົງວັນທີ 7 ກັນຍາ 2021, ໂອກາດນີ້, ທ່ານເຈົ້າແຂວງຄໍາມ່ວນ ກໍໄດ້ກ່າວສະແດງຄວາມຕ້ອນຮັບ ຕໍ່ການມາເຮັດວຽກຂອງຄະນະນໍາ ສວສສຊ ພ້ອມທັງແຈ້ງສະພາບ, ຈຸດພິເສດຂອງແຂວງ, ການພັດທະນາເສດຖະກິດສັງຄົມ ໃນໄລຍະຜ່ານມາໂດຍຫຍໍ້ ລວມເຖິງບາງສະພາບ ແລະ ບາງບັນຫາທີ່ຍັງມີຄວາມຫຍຸ້ງຍາກຕໍ່ການພັດທະນາຢູ່ພາຍໃນແຂວງຄໍາມ່ວນ ໂດຍສະເພາະແມ່ນບັນຫາຄົມມະນາຄົມ, ປ້ອງກັນຕາຝັ່ງເຈື່ອນ, ການສະໜອງລະບົບໄຟຟ້າໃຫ້ແກ່ບໍລິສັດລົງທຶນຂະໜາດໃຫຍ່ ແລະ ອື່ນໆ ເພື່ອໃຫ້ ສວສສຊ ຊ່ວຍຊຸກຍູ້ ພັກດັນ ແລະ ສະເໜີຕໍ່ໄປຍັງລັດຖະບານຊ່ວຍຄົ້ນຄວ້າແກ້ໄຂໃນຕໍ່ໜ້າພ້ອມນີ້ທ່ານເຈົ້າແຂວງຄໍາມ່ວນຍັງໄດ້ສະເໜີໃຫ້ ສວສສຊ ລົງເກັບກໍາສະພາບການຕ່າງໆຢູ່ພາຍໃນແຂວງ ເພື່ອເປັນຂໍ້ມູນໃນການຄົ້ນຄວ້າ ຮັບໃຊ້ການພັດທະນາເສດຖະກິດ-ສັງຄົມຢູ່ແຂວງຄໍາມ່ວນຕື່ມອີກ. ໃນໂອກາດດຽວກັນນີ້ ທ່ານປະທານ ສວສສຊ ໄດ້ສະແດງຄວາມຮູ້ບຸນຄຸນ ແລະ ຂອບໃຈຕໍ່ທ່ານເຈົ້າແຂວງຄໍາມ່ວນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນການລົງມາເຮັດວຽກທີ່ແຂວງຄຳມ່ວນໃນຄັ້ງນີ້ ພ້ອມທັງໄດ້ມອບປຶ້ມຈຳນວນໜຶ່ງທີ່ເປັນຜົນງານການຄົ້ນຄວ້າຂອງ ສວສສຊ ໃຫ້ກັບທ່ານເຈົ້າແຂວງ.

ໃນຕອນເຊົ້າຂອງວັນດຽວກັນ ທີ່ສະໂມສອນຫ້ອງວ່າການແຂວງ ໄດ້ຈັດກອງປະຊຸມ ແລກປ່ຽນການຄົ້ນຄວ້າວິທະຍາສາດ ແລະ ການພັດທະນາ ລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ແຂວງຄຳມ່ວນ ໂດຍການເປັນປະທານຮ່ວມຂອງທ່ານ ປອ ສອນທະນູ ທຳມະວົງ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ທ່ານ ປອ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ຜູ້ຊີ້ນໍາຂົງເຂດເສດຖະກິດ, ມີພະແນກການອ້ອມຂ້າງແຂວງ, ການນໍາຂັ້ນເມືອງ,ໂຮງຮຽນທິດສະດີການເມືອງ-ການປົກແຂວງ ແລະ ໂຮງຮຽນວິຊາຊີບ ພ້ອມດ້ວຍແຂກຖືກເຊີນເຂົ້າຮ່ວມ. ໃນວາລະກອງປະຊຸມ ທ່ານຮອງເຈົ້າແຂວງໄດ້ລາຍງານສະພາບໂດຍລວມຂອງເສດຖະກິດ-ສັງຄົມຂອງແຂວງ ໂດຍໄດ້ຍົກໃຫ້ເຫັນເຖິງການກໍານົດແຜນພັດທະນາເສດຖະກິດ-ສັງຄົມ ຂອງແຂວງ ຕາມ 3 ທ່າແຮງຄື: ທ່າແຮງດ້ານກະສິກໍາ, ທ່າແຮງທາງດ້ານອຸດສາຫະກໍາ ພະລັງງານ-ບໍ່ແຮ່ ແລະ ທ່າແຮງທາງດ້ານການບໍລິການ ແລະ ການທ່ອງທ່ຽວ.

ໃນວາລະດັ່ງກ່າວ ທ່ານ ປອ ສອນທະນູ ທຳມະວົງ ປະທານ ສວສສຊ ກໍໄດ້ເຜີຍແຜ່ ດຳລັດຂອງນາຍົກລັດຖະມົນຕີວ່າດ້ວຍການຈັດຕັ້ງ ແລະ ເຄື່ອນໄຫວຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະບັບເລກທີ 559/ນຍ ລົງວັນທີ 7 ກັນຍາ 2021 ແລະ ເຜີຍແຜ່ບາງຜົນສໍາເລັດຂອງການຄົ້ນຄວ້າທີ່ພົ້ນເດັ່ນໃນໄລຍະຜ່ານມາ. ນອກນັ້ນ ກໍຍັງຖືໂອກາດ ແລກປ່ຽນຄຳຄິດເຫັນກ່ຽວກັບການພັດທະນາເສດຖະກິດ – ສັງຄົມ ຢູ່ແຂວງຄຳມ່ວນ ແລະ ແລກປ່ຽນບົດຮຽນໃນການຄົ້ນຄ້ວາວິທະຍາສາດເສດຖະກິດ ແລະ ສັງຄົມ ຖືເອົາໂອກາດດັ່ງກ່າວເປັນການມາຢ້ຽມຢາມ ແລະ ສ້າງຄວາມສຳພັນອັນດີລະຫວ່າງ ສວສສຊ ແລະ ແຂວງຄຳມ່ວນໃຫ້ສະໜິດສະໜົມແໜ້ນແຟ້ນຂຶ້ນກວ່າເກົ່າ. ໃນໂອກາດດັ່ງກ່າວ ທ່ານ ປະທານ ສວສສຊ ໄດ້ຕີລາສູງກ່ຽວກັບສະພາບເສດຖະກິດ-ສັງຄົມຂອງແຂວງຄຳມ່ວນ ເຊິ່ງເປັນແຂວງທີ່ມີທ່າແຮງທາງດ້ານເສດຖະກິດຂອງປະເທດ ພ້ອມທັງໄດ້ມອບຜົນງານຂອງການຄົ້ນຄວ້າໃຫ້ທ່ານຮອງເຈົ້າແຂວງ ພ້ອມດ້ວຍພາກສ່ວນທີ່ກ່ຽວຂ້ອງອີກດ້ວຍ.

ບົດຂ່າວ ແລະ ຖ່າຍພາບ: ສິລິສິດ ໄຊສົມແພງ

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ລົງເຄື່ອນໄຫວວຽກງານຢູ່ແຂວງສະຫວັນນະເຂດ

ຈໍານວນຜູ້ເຂົ້າຊົມ: 778

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ລົງເຄື່ອນໄຫວວຽກງານຢູ່ແຂວງສະຫວັນນະເຂດ

ໃນລະຫວ່າງວັນທີ 02–04 ຕຸລາ 2023 ທີ່ຜ່ານມາ ທ່ານ ປອ. ນາງ ອໍາໄພວັນ ຄໍາແສງສີວິໄລ ຄະນະປະຈຳພັກ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ, ໄດ້ລົງເຄື່ອນໄຫວວຽກງານຢູ່ແຂວງຫວັນນະເຂດ, ໂດຍການຕ້ອນຮັບຂອງ ທ່ານ ປອ. ແສນສັກ ສຸລິສັກ ຄະນະປະຈຳພັກ, ຮອງເຈົ້າແຂວງສະຫວັນນະເຂດ; ທາງຄະນະໄດ້ແຈ້ງຈຸດປະສົງໃນການລົງມາເຄື່ອນໄຫວວຽກງານໃນຄັ້ງນີ້, ພ້ອມທັງມອບປຶ້ມຈຳນວນໜຶ່ງທີ່ເປັນຜົນງານການຄົ້ນຄວ້າຂອງ ສວສສຊ ໃຫ້ກັບແຂວງສະຫວັນນະເຂດ.

ໃນວັນດຽວກັນ ກໍ່ໄດ້ເປີດກອງປະຊຸມ, ທີ່ຫ້ອງປະຊຸມຂອງຫ້ອງວ່າການແຂວງ, ໂດຍການເປັນປະທານຂອງ ທ່ານ ປອ. ນາງ ອຳໄພວັນ ຄຳແສງສີວິໄລ, ເຊິ່ງມີຜູ້ເຂົ້າຮ່ວມ 75 ທ່ານ ຍິງ 22 ທ່ານ, ຈາກບັນດາພະແນກການຕ່າງໆຂອງແຂວງພ້ອມທັງອົງການຈັດຕັ້ງມະຫາຊົນຂອງແຂວງກໍ່ໄດ້ເຂົ້າຮ່ວມ, ທ່ານ ນາງ ປອ. ອຳໄພວັນ ຄຳແສງສີວິໄລ ເຜີຍແຜ່ດຳລັດ 559/ນຍ, ສະບັບລົງວັນທີ 07 ກັນຍາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ສວສສຊ, ເຊິ່ງທ່ານໄດ້ຍົກໃຫ້ເຫັນຄວາມສຳຄັນຂອງດຳລັດສະບັບດັ່ງກ່າວໂດຍປັບປຸງຕາມທິດຊີ້ນຳຂອງຂັ້ນເທິງວ່າດ້ວຍການໂຮມສະຖາບັນຄົ້ນຄວ້າເສດຖະກິດແຫ່ງຊາດ ແລະ ສະຖາບັນວິທະຍາສາດສັງຄົມແຫ່ງຊາດ ເຂົ້າເປັນອົງການດຽວເຊິ່ງເອີ້ນວ່າ: ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ(ສວສສຊ); ທ່ານ ປອ ຄໍາແພງ ທິບມູນຕາລີ, ກໍາມະການຄະນະພັກ ສວສສຊ, ຫົວໜ້າສະຖາບັນຄົ້ນຄວ້າສັງຄົມສາດ ຂຶ້ນເຜີຍແຜ່ຜົນງານການຄົ້ນຄວ້າວິທະຍາສາດທີ່ພົ້ນເດັ່ນຂອງ ສວສສຊ ໃນໄລຍະຜ່ານມາຈົນເຖິງປັດຈຸບັນ; ທ່ານ ປອ. ນາງ ກິນນາລອນ ພິມມະວົງ ຮອງຫົວໜ້າສະຖາບັນຄົ້ນຄວ້າເສດຖະກິດມະຫາພາກ ນໍາສະເໜີສະພາບເສດຖະກິດມະຫາພາກ ທີ່ພົ້ນເດັ່ນປະຈຳປີ 2023 ກ່ຽວກັບບັນຫາເງິນກີບອ່ອນຄ່າແຮງ, ອັດຕາແລກປ່ຽນເງິນຕາທີ່ປັ່ນປ່ວນ, ໜີ້ສິນຕ່າງປະເທດ, ລາຄານໍ້າມັນເຊື້ອໄຟ ແລະ ລາຄາສິນຄ້າທີ່ເພີ່ມຂຶ້ນສູງ; ເຊິ່ງໄດ້ຍົກແຕ່ປະເດັນເຄັ່ງຮ້ອນທີ່ເກີດຂຶ້ນມາສົນທະນາ, ຜູ້ເຂົ້າຮ່ວມຕ່າງກໍ່ໃຫ້ຄວາມສົນໃຈ ຕໍ່ບັນຫາດັ່ງກ່າວເພາະສົ່ງຜົນກະທົບຢ່າງວົງກວ້າງ.

ໃນໂອກາດນີ້ ທ່ານ ຄຳຜຸຍ ສີບຸນເຮືອງ ກຳມະການພັກແຂວງ, ຫົວໜ້າພະແນກແຜນການ ແລະ ການລົງທຶນແຂວງ ໄດ້ຂຶ້ນລາຍງານການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຂອງແຂວງສະຫວັນນະເຂດໃນໄລຍະກາງສະໄໝ 2,5 ປີຜ່ານມາ ແລະ ທິດທາງແຜນວຽກຈຸດສຸມທ້າຍສະໄໝ ໂດຍມີເນື້ອໃນຫຍໍ້ເວົ້າເຖິງສະພາບເງື່ອນໄຂພາຍໃນແຂວງຫຼາຍດ້ານຍັງບໍ່ທັນເອື້ອອຳນວຍ ເປັນຕົ້ນ ການແຜ່ລະບາດຂອງພະຍາດໂຄວິດ-19, ເງິນກີບອ່ອນຄ່າແຮງ, ລາຄານໍ້າມັນເຊື້ອໄຟ ແລະ ລາຄາສິນຄ້າເພີ່ມສູງຂຶ້ນ, ໄພຂົ່ມຂູ່ທາງທໍາມະຊາດ, ເຮັດໃຫ້ຊີວິດການເປັນຢູ່ຂອງປະຊາຊົນມີຄວາມຝືດເຄື່ອງ ແລະ ບັນຫາປະກົດການຫຍໍ້ທໍ້ຕ່າງໆ ກໍ່ຍັງປະກົດມີໃຫ້ເຫັນ ແລະ ມີລັກສະນະເພີ່ມຂຶ້ນ, ຊຶ່ງໄດ້ສົ່ງຜົນກະທົບທັງທາງກົງ ແລະ ທາງອ້ອມຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນ ໄລຍະກາງສະໄໝຂອງແຂວງ.

ທິດທາງແຜນວຽກຈຸດສຸມທ້າຍສະໄໝແຂວງສະຫວັນນະເຂດແຕ່ປີ 2023-2025 ໄດ້ສຸມໃສ່ສືບຕໍ່ສູ້ຊົນເຮັດໃຫ້ເສດຖະກິດ (GDP) ຂະຫຍາຍຕົວ ຢູ່ໃນລະດັບສະເລ່ຍ 7,72% ຕໍ່ປີ (ແຜນການ 5 ປີ ໃຫ້ຂະຫຍາຍຕົວຢູ່ໃນລະຫວ່າງ 7,5-8%) ໃນນັ້ນ: ແຜນປີ 2024 ຂະຫຍາຍຕົວ 7,85%, ມີມູນຄ່າ 29.130,98 ຕື້ກີບ ແລະ ແຜນປີ 2025 ຂະຫຍາຍຕົວ 8%, ມີມູນຄ່າ 31.887,73 ຕື້ກີບ, ປີ 2025 ສະເລ່ຍລາຍໄດ້ຕໍ່ຫົວຄົນ 28,05 ລ້ານກີບ.

ກອງປະຊຸມໄດ້ປິດລົງໃນເວລາ 11:30 ໂມງ ຂອງວັນດຽວກັນ; ຕອນບ່າຍທາງຄະນະ ສວສສຊ ກໍ່ຍັງໄດ້ລົງເກັບກຳຂໍ້ມູນ ແລະ ຢ້ຽມຢາມສູນພັດທະນາ ແລະ ບໍລິການກະສິກຳ – ປ່າໄມ້ ໜອງເຕົ່າຂອງແຂວງສະຫວັນນະເຂດ.

ບົດຂ່າວ ແລະ ຖ່າຍພາບ: ແກ້ວວິວັນ ສີວິໄລ

ກອງປະຊຸມພົບປະສອງຝ່າຍ ລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ກັບ ສະຖາບັນວິທະຍາສາດສັງຄົມແຂວງກວາງຊີ ແຫ່ງ ສປ ຈີນ

ຈໍານວນຜູ້ເຂົ້າຊົມ: 997

ກອງປະຊຸມພົບປະສອງຝ່າຍ ລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ກັບ ສະຖາບັນວິທະຍາສາດສັງຄົມແຂວງກວາງຊີ ແຫ່ງ ສປ ຈີນ

ໃນວັນທີ 23 ກັນຍາ 2023 ທີ່ສະຖາບັນວິທະຍາສາດສັງຄົມແຂວງກວາງຊີ ໄດ້ມີກອງປະຊຸມພົບປະສອງຝ່າຍລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ກັບ ສະຖາບັນວິທະຍາສາດສັງຄົມແຂວງກວາງຊີ ແຫ່ງ ສປ ຈີນ ນຳໂດຍທ່ານ ເສີນ ລີ້ ເຊີ່ງ ປະທານສະຖາບັນວິທະຍາສາດສັງຄົມແຫ່ງຊາດ ພ້ອມດ້ວຍຄະນະ.

ໃນໂອກາດນີ້, ທ່ານ ເສີນ ລີ້ ເຊີ່ງ ໄດ້ກ່າວຕ້ອນຮັບຢ່າງອົບອຸ່ນ ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ ທ່ານ ປອ. ນາງ ຂັນລາສີ ແກ້ວບຸນພັນ ພ້ອມດ້ວຍຄະນະ ທີ່ໄດ້ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດ ຈີນ-ອາຊຽນ ຄັ້ງທີ 15 ທີ່ເມືອງໜານໜິງ, ແຂວງ ກວາງຊີ ສປ ຈີນ, ທ່ານ ປອ. ນາງ ຂັນລາສີ ແກ້ວບຸນພັນ ກໍໄດ້ສະແດງຄວາມຂອບໃຈຢ່າງສູງຕໍ່ ທ່ານ ເສີນ ລີ້ ເຊີ່ງ ທີ່ໄດ້ໃຫ້ການຕ້ອນຮັບອັນອົບອຸ່ນ, ເຕັມໄປດ້ວຍໄມຕີຈິດມິດຕະພາບ ຖານເພື່ອນມິດສະຫາຍ, ຄູ່ຮ່ວມຊະຕາກຳ ແລະ ທ່ານຍັງນຳເອົາຄໍາຢື້ຢາມຖາມຂ່າວຢ່າງຈິງໃຈຂອງ ທ່ານ ປອ. ສອນທະນູ ທໍາມະວົງ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ມາເຖິງທ່ານ ແລະ ບັນດາສະຫາຍຄະນະພັກ, ຄະນະນໍາ ພ້ອມດ້ວຍພະນັກງານທົ່ວ ສະຖາບັນວິທະຍາສາດສັງຄົມແຂວງກວາງຊີ. ການພົບປະໃນຄັ້ງນີ້ໄດ້ຮັບຟັງການລາຍງານສະພາບການຈັດຕັ້ງ ແລະ ການເຄື່ອນໄຫວຂອງສະຖາບັນຕົນ ພ້ອມທັງຕີລາຄາການຮ່ວມມືຂອງສະຖາບັນໃນໄລຍະຜ່ານມາ ແລະ ທິດທາງແຜນການຮ່ວມມືໃນຕໍ່ໜ້າ ເຊິ່ງທັງສອງຝ່າຍໄດ້ແລກປ່ຽນ ແລະ ເຫັນດີເປັນເອກະພາບຮ່ວມກັນ ດັ່ງນີ້: 1) ຍົກລະດັບການຮ່ວມມືໃນການສ້າງແຜນການໃນໄລຍະສັ້ນ, ກາງ, ຍາວ ໃຫ້ມີເປົ້າໝາຍຢ່າງຊັດເຈນຖືກຕ້ອງຕາມຄວາມຕ້ອງການຂອງແຕ່ລະຝ່າຍ; 2) ຊອກຫາແຫຼ່ງທຶນ ເພື່ອເຮັດໂຄງການຄົ້ນຄວ້າວິທະຍາສາດສັງຄົມ ຮ່ວມກັນ; 3) ການສ້າງຄວາມເຂັ້ມແຂງທາງດ້ານວິຊາການໃຫ້ແກ່ນັກຄົ້ນຄວ້າຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ໃຫ້ໄດ້ມີໂອກາດຮຽນຮູ້ ແລະ ຖອດຖອນບົດຮຽນ ແລະ ປະສົບການໃນການຈັດຕັ້ງປະຕິບັດວຽກງານຄົ້ນຄວ້າ; 4) ສະຖາບັນວິທະຍາສາດສັງຄົມກວາງຊີ ຊ່ວຍປະສານກັບພາກສ່ວນກ່ຽວຂ້ອງຂອງ ສປ ຈີນ ໃນການໃຫ້ທຶນການສຶກສາຍົກລະດັບວິຊາສະເພາະໃນລະດັບຕ່າງໆ ແກ່ນັກຄົ້ນຄວ້າ ສປປ ລາວ ເປັນຕົ້ນແມ່ນຊາວໜຸ່ມຂອງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ.

ຕອນທ້າຍກອງປະຊຸມ, ຕາງໜ້າໃຫ້ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທ່ານ ປອ. ນາງ ຂັນລາສີ ແກ້ວບຸນພັນ ຍັງໄດ້ສະແດງຄວາມຂອບໃຈຕໍ່ສະຖາບັນວິທະຍາສາດສັງຄົມແຂວງກວາງຊີ ທີ່ຍາມໃດກໍເອົາໃຈໃສ່ໃຫ້ການຊ່ວຍເຫຼືອ ໃນການສ້າງຄວາມເຂັ້ມແຂງ ທາງດ້ານວິຊາການ ແລະ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອຫຼາຍຂຶ້ນໃນຕໍ່ໜ້າ ແລະ ສະເໜີໃຫ້ຄະນະວິຊາການ ສືບຕໍ່ປະສານກັນກ່ຽວກັບລາຍລະອຽດຂອງແຕ່ລະກິດຈະກຳທີ່ຈະໄດ້ສ້າງແຜນວຽກປະຈຳປີຮ່ວມກັນ ເພື່ອຜັນຂະຫຍາຍການຈັດຕັ້ງປະຕິບັດຂໍ້ຕົກລົງການຮ່ວມມືໃຫ້ປະສົບຜົນສຳເລັດຢ່າງຈົບງາມ.

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດ ຈີນ-ອາຊຽນ ຄັ້ງທີ 15

ຈໍານວນຜູ້ເຂົ້າຊົມ: 1,295

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດ ຈີນ-ອາຊຽນ ຄັ້ງທີ 15

ໃນລະຫວ່າງວັນທີ 20-23 ກັນຍາ 2023 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳພາໂດຍທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສົນທະນາຍຸດທະສາດຄັງຄວາມຄິດຈີນ-ອາຊຽນ ຄັ້ງທີ 15 ພາຍໃຕ້ຫົວຂໍ້”ຮ່ວມກັນສ້າງສັນຕິພາບ, ຄວາມສະຫງົບ ແລະ ປອດໄພ, ຄວາມຮຸ່ງເຮືອງ ແລະ ມິດຕະພາບ, ສ້າງປະຊາຄົມຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ” ຊຶ່ງໄດ້ຈັດຂຶ້ນທີ່ເມືອງໜານໜິງ, ແຂວງກວາງຊີ, ສປ ຈີນ ໂດຍການເປັນເຈົ້າພາບຮ່ວມຂອງສະຖາບັນວິທະຍາສາດສັງຄົມກວາງຊີ, ຫ້ອງການທີ່ປຶກສາອຳນາດການປົກຄອງຕົນເອງເຜົ່າຈວ້າງກວາງຊີ, ສະຖາບັນຍຸດທະສາດສາກົນ ແລະ ອາຊີປາຊີຟິກ ສປ ຈີນ ແລະ ກອງເລຂາງານວາງສະແດງ ຈີນ-ອາຊຽນ, ກອງເລຂາສະມາຄົມຄັງຄວາມຄິດໃໝ່ສີສັນກວາງຊີ, ມີບັນດາ 10 ປະເທດອາຊຽນ ແລະ ຜູ້ແທນທີ່ຊ່ຽວຊານເຂົ້າຮ່ວມຫຼາຍກວ່າ 200 ທ່ານ.

ກອງປະຊຸມໄດ້ຮັບຟັງການນຳສະເໜີບັນດາຫົວຂໍ້ຍ່ອຍດັ່ງນີ້: 1) ບົດບາດສໍາຄັນຂອງສັນຍາການຮ່ວມມືເສດຖະກິດແບບຮອບດ້ານລະດັບພາກພື້ນ (RCEP) ແລະ ຊຸກຍູ້ການສ້າງເຂດການຄ້າເສລີ ຈີນ-ອາຊຽນ ສະບັບທີ 3.0; 2) ການຮ່ວມມືຈີນ-ອາຊຽນ ໃນການຫັນເປັນດິຈິຕອນ ແລະ ນະວັດຕະກຳທາງດ້ານວິທະຍາສາດ ແລະ ເຕັກໂນໂລຊີ; 3) ສົ່ງເສີມການຫັນເປັນສີຂຽວ ແລະ ການພັດທະນາຍືນຍົງດ້ວຍທາດກາກໂບນິກຕໍ່າ; 4) ສົ່ງເສີມການເຊື່ອມໂຍງເຊື່ອມຈອດພື້ນຖານໂຄງລ່າງ ຈີນ-ອາຊຽນ ດ້ວຍຄຸນນະພາບສູງ; 5) ຊຸກຍູ້ສົ່ງເສີມເປີດກວ້າງການເຄື່ອນໄຫວຂອງບັນດາສະຖາບັນລະດັບສູງ ແລະ ສ້າງເງື່ອນໄຂສິ່ງອຳນວຍໃຫ້ລະບົບຕະຫຼາດພາຍໃນ ແລະ ຕ່າງປະເທດ ໃນການດຳເນີນງານ; 6) ການແລກປ່ຽນວັດທະນະທຳຈີນ-ອາຊຽນ, ການຮຽນຮູ້ເຊິ່ງກັນ ແລະ ກັນ ແລະ ການພັດທະນານະວັດຕະກຳ.

ໃນເວທີດັ່ງກ່າວ, ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຂຶ້ນສະເໜີຫົວຂໍ້ “ບົດບາດສໍາຄັນຂອງສັນຍາຄູ່ຮ່ວມມືເສດຖະກິດແບບຮອບດ້ານລະດັບພາກພື້ນ Regional Comprehensive Economic Partnership (RCEP) ແລະ ສົ່ງເສີມການສ້າງສັນຍາການຄ້າເສລີອາຊຽນ-ສປ ຈີນ ສະບັບທີ 3 ຫຼື ASEAN-China Free Trade (ACFTA) 3.0” ຊຶ່ງທ່ານຍົກໃຫ້ເຫັນວ່າສັນຍາດັ່ງກ່າວ ເປັນສັນຍາເຂດການຄ້າເສລີທີ່ໃຫຍ່, ກວມລວມຮອບດ້ານ ແລະ ທັນສະໄໝທີ່ສຸດໃນປະຈຸບັນ ກວມເອົາປະມານ 30% ຂອງມູນຄ່າການຄ້າໂລກ ແລະ 29,3% ຂອງການລົງທຶນໃນພາກພື້ນ ແລະ ສາກົນ, ເປັນຕະຫຼາດຂະໜາດໃຫຍ່ ແລະ ມີຄວາມສໍາຄັນໃນການຂັບເຄື່ອນເສດຖະກິດ ແລະ ສົ່ງເສີມຂະບວນການຕ່ອງໂສ້ສະໜອງ, ເສດຖະກິດດິຈິຕອນ, ເສດຖະກິດສີຂຽວ ແລະ ອື່ນໆ ຂອງພາກພື້ນ ແລະ ສາກົນ ໂດຍສະເພາະການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ-19 ແລະ ການຖົດຖອຍຂອງສະພາບເສດຖະກິດ ແລະ ການເງິນຂອງໂລກໃນປະຈຸບັນ. ສໍາລັບ ສປປ ລາວ ໃນຖານະເປັນພາຄີ ຂອງສັນຍາ RCEP ແມ່ນມີທັງກາລະໂອກາດ ແລະ ສິ່ງທ້າທາຍຫຼາຍອັນທີ່ຈະຕ້ອງໄດ້ປັບປຸງ ແລະ ພັດທະນາບັນດາລະບຽບການຕ່າງໆພາຍໃນໃຫ້ສອດຄ່ອງ ເພື່ອຮັບປະກັນການຈັດຕັ້ງປະຕິບັດໃຫ້ນໍາມາຊຶ່ງຜົນປະໂຫຍດສູງສຸດໃຫ້ແກ່ ສປປ ລາວ ເວົ້າລວມ ແລະ ເວົ້າສະເພາະໃຫ້ແກ່ພາກທຸລະກິດ ແລະ ຜູ້ປະກອບການ ແລະ ວິສາຫະກິດຂະໜາດນ້ອຍ ແລະ ກາງ. ສະນັ້ນ, ຄວາມເປັນເຈົ້າການ ແລະ ການພິຈາລະນາຮ່ວມມື ໃນແຕ່ລະປະເດັນ ແຕ່ລະຂົງເຂດຢ່າງຮອບດ້ານ ແລະ ເລິກເຊິ່ງ ເຫັນໄດ້ກາລະໂອກາດຄວນຍາດແຍ່ງ ແລະ ສິ່ງທ້າທາຍທີ່ ສປປ ລາວ ຈະຕ້ອງພ້ອມກັນຊອກຫາວິທີແກ້ໄຂ ເພື່ອຫັນສິ່ງທ້າທາຍເຫຼົ່ານັ້ນໃຫ້ກາຍເປັນກາລະໂອກາດນໍາເອົາຜົນປະໂຫຍດສູງສຸດຈາກການເຂົ້າຮ່ວມສັນຍາດັ່ງກ່າວນີ້, ທ່ານຍັງໄດ້ຮຽກຮ້ອງໃຫ້ປະເທດສະມາຊິກຂອງ RCEP ສືບຕໍ່ຮ່ວມມືກັນໃນການຈັດຕັ້ງປະຕິບັດບັນດາພັນທະສັນຍາທີ່ໃຫ້ໄວ້ໃນສັນຍາຕາມຂອບເວລາທີ່ໄດ້ກຳນົດໄວ້ ແລະ ຮຽກຮ້ອງໃຫ້ພາກທຸລະກິດຈົ່ງຊອກຮູ້ ແລະ ນຳໃຊ້ຜົນປະໂຫຍດຈາກສັນຍາດັ່ງກ່າວໃຫ້ມີປະສິດທິຜົນ ແລະ ຫຼາຍຂຶ້ນ ເພື່ອເຮັດໃຫ້ເສດຖະກິດ ແລະ ການຄ້າພາກພື້ນຂອງພວກເຮົາມີການຂະຫຍາຍຕົວ ແລະ ປະຊາຊົນມີຊີວິດທີ່ດີຂຶ້ນກວ່າເກົ່າ.

ໃນໂອກາດນີ້, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກໍໄດ້ສຳເລັດລົງນາມ ຂໍ້ຕົກລົງວ່າດ້ວຍການຮ່ວມມືແລກປ່ຽນທາງດ້ານວິຊາການ ຮ່ວມກັບ ສະຖາບັນວິທະຍາສາດສັງຄົມແຂວງກວາງຊີ ແຫ່ງ ສປ ຈີນ ທັງສອງຝ່າຍໄດ້ຕົກລົງເປັນເອກະພາບຮ່ວມມືກັນໃນການດຳເນີນການຮ່ວມມືຄົ້ນຄວ້າທິດສະດີ ແລະ ການນຳໃຊ້ທີ່ເໝາະສົມກັບຄວາມຕ້ອງການໃນການພັດທະນາປະເທດຂອງທັງສອງຝ່າຍ, ແລກປ່ຽນບົດຮຽນປະສົບການໃນການຄົ້ນຄວ້າ; ທັງສອງຝ່າຍຊ່ວຍເຫຼືອເຊິ່ງກັນ ແລະ ກັນ, ຍົກລະດັບການຮ່ວມມືໃຫ້ແໜ້ນແຟ້ນ (ຮ່ວມກັນປຶກສາຫາລືຫົວຂໍ້ຮ່ວມມືຄົ້ນຄວ້າຕ່າງໆ); ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ແລະ ສະຖາບັນວິທະຍາສາດສັງຄົມແຂວງກວາງຊີແຫ່ງ ສປ ຈີນ ຈະອີງໃສ່ຄວາມສາມາດທ່າແຮງຂອງຕົນເອງ ເພື່ອຊ່ວຍເຫຼືອເຊິ່ງກັນ ແລະ ກັນ ຍົກລະດັບດ້ານການຄົ້ນຄວ້າວິທະຍາສາດ; ທັງສອງຝ່າຍຈະດຳເນີນການແລກປ່ຽນບົດຮຽນທາງດ້ານວິຊາການ, ຮ່ວມມືຈັດກອງປະຊຸມສໍາມະນາວິທະຍາສາດ ແບບສອງຝ່າຍ ຫຼື ຫຼາຍຝ່າຍ ແລະ ພ້ອມກັນແລກປ່ຽນຂ່າວສານການຄົ້ນຄວ້າວິທະຍາສາດ, ແລກປ່ຽນຜົນງານຂອງການຄົ້ນຄວ້າວິທະຍາສາດ ທີ່ສອງຝ່າຍມີຄວາມສົນໃຈ; ຈັດຕັ້ງການແປ ແລະ ພິມຈໍາໜ່າຍຜົນຂອງການຄົ້ນຄວ້າວິທະຍາສາດ ເປັນ ພາສາລາວ ແລະ ພາສາຈີນ ຕາມທີ່ສອງຝ່າຍຕ້ອງການ ໃຫ້ເປັນຮູບປະທຳ ແລະ ຕ່າງຝ່າຍຕ່າງໄດ້ຮັບຜົນປະໂຫຍດສູງສຸດ.

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ “ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ”

ຈໍານວນຜູ້ເຂົ້າຊົມ: 826

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ "ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ"

ວັນທີ 21 ກັນຍາ 2023 ຢູ່ນະຄອນໂຮ່ຈີມິນ ສສ.ຫວຽດນາມ, ທ່ານ ປອ. ສອນທະນູ ທໍາມະວົງ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວໄດ້ນໍາພາຄະນະຜູ້ແທນ ສວສສຊ (LASES) ເຂົ້າຮ່ວມກອງປະຊຸມສໍາມະນາສ້າງຂີດຄວາມສາມາດລວມປະຈໍາປີ 2023 ພາຍໃຕ້ຫົວຂໍ້ “ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ”. ໂດຍມີ ສະຖາບັນບັນດິດວິທະຍາສາດສັງຄົມຫວຽດນາມ (VASS) ເປັນເຈົ້າພາບ, ມີຄະນະຜູ້ແທນຈາກຣາຊາບັນດິດສະພາກໍາປູເຈຍ (RAC), ສະຖາບັນສິ່ງແວດລ້ອມ ສ. ເກົາຫຼີ (KEI), ຕາງໜ້າຄະນະນໍານະຄອນໂຮ່ຈີມິນ ແລະ ຕາງໜ້າບັນດາຂະແໜງການຂອງ ຄະນະກໍາມະການປະຊາຊົນ ນະຄອນໂຮ່ຈີມິນ; ບັນດາຊ່ຽວຊານ, ນັກວິທະຍາສາດ ຈາກ ສປປ ລາວ, ສສ. ຫວຽດນາມ, ຣາຊາອານາຈັກ ກໍາປູເຈຍ, ສ. ເກົາຫຼີ ເຂົ້າຮ່ວມ.

ໃນໂອກາດດັ່ງກ່າວ ທ່ານ ປອ. ສອນທະນູ ທໍາມະວົງ ໄດ້ກ່າວຄໍາເຫັນໃນພິທີເປີດສໍາມະນາ ມີບາງຕອນ ທ່ານໄດ້ກ່າວວ່າ: ສໍາລັບ ສປປ ລາວ, ແນວຄວາມຄິດຂອງການຫັນເປັນຕົວເມືອງອັດສະລິຍະ (Smart City) ໄດ້ຖືກບັນຈຸເຂົ້າໃນແຜນພັດທະນາເສດຖະກິດ–ສັງຄົມ ແຫ່ງຊາດ 05 ປີ ຄັ້ງທີ IX (2021-2025). ເຊິ່ງເປົ້າໝາຍລິເລີ່ມຂອງແຜນພັດທະນາຕົວເມືອງ Smart City ເປັນໜຶ່ງໃນໂຄງການຂະໜາດໃຫຍ່ທີ່ຈະຫັນປະເທດລາວ ຈາກປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມໂຍງ–ເຊື່ອມຈອດ ໂດຍຜ່ານການນໍາໃຊ້ລະບົບເທັກໂນໂລຊີດິຈິຕອນ (ICT) ເຂົ້າໃນການຂັບເຄື່ອນການຂົນສົ່ງ (Logistics-hub) ຕາມນະໂຍບາຍເຕີບໂຕສີຂຽວຍືນຍົງ ແລະ ເປັນມິດຕໍ່ສິ່ງແວດລ້ອມຂອງລັດຖະບານ ເພື່ອເຮັດໃຫ້ຊຸມຊົນທັນສະໄໝຂຶ້ນ ແລະ ເສີມສ້າງຊີວິດການເປັນຢູ່ຂອງທ້ອງຖີ່ນ. ປັດຈຸບັນ, ສປປ ລາວ ມີໂຄງການ Smart City ຫຼາຍໂຄງການ, ສະເພາະຢູ່ນະຄອນຫຼວງວຽງຈັນ ມີ 2 ໂຄງການຂະໜາດໃຫຍ່ ຕັ້ງຢູ່ເມືອງໄຊເສດຖາ ມີເນື້ອທີ່ 1.500 ກວ່າເຮັກຕາ ແລະ ເມືອງຫາດຊາຍຟອງ ນະຄອນຫຼວງວຽງຈັນ ມີເນື້ອທີ່ 2.900 ກວ່າເຮັກຕາ. ຢູ່ທາງພາກເໜືອຂອງລາວ, ມີໂຄງການ Smart-Eco City ທີ່ເມືອງນາໝໍ້, ແຂວງອຸດົມໄຊ, ມີເນື້ອທີ່ 3.150 ກວ່າເຮັກຕາ ແລະ ຢູ່ແຂວງຫຼວງພະບາງ ກໍໄດ້ເລີ່ມກ້າວເຂົ້າສູ່ບາດກ້າວທໍາອິດຂອງການຫັນເປັນຕົວເມືອງອັດສະລິຍະ ໂດຍການລິເລີ່ມຈາກການສ້າງ E-government ແຕ່ປີ 2021.

ສໍາລັບແນວຄວາມຄິດຂອງຄົນລາວ ກ່ຽວກັບຕົວເມືອງອັດສະລິຍະ ສາມາດເປັນໄປໄດ້ດ້ວຍການຂັບເຄື່ອນທາງດ້ານວັດຖຸ ແລະ ຈິດໃຈ, ຊຶ່ງຈະເປັນພື້ນຖານທີ່ດີຕໍ່ການຍົກລະດັບໃນການຈັດສັນຄຸ້ມຄອງຕົວເມືອງ ໃຫ້ຫັນເປັນທັນສະໄໝ ແລະ ຮັບປະກັນສະພາບແວດລ້ອມຕາມທິດສີຂຽວ ຂຶ້ນໄປອີກຂັ້ນ. ເນື່ອງຈາກ, ການຫັນເປັນເມືອງອັດສະລິຍະ ແມ່ນເນັ້ນໃສ່ຈິດໃຈຜູ້ຄົນເປັນສູນກາງ ພວກເຮົາຈຶ່ງມຸ່ງໝັ້ນທີ່ຈະພັດທະນາ ສປປ ລາວ ໃຫ້ເປັນຕົວເມືອງອັດສະລິຍະທີ່ກ້າວໜ້າ, ທັນສະ ໄໝ ແລະ ເໝາະສົມແກ່ການພັກອາໄສຍິ່ງຂຶ້ນ, ເຊິ່ງຈະເປັນປະໂຫຍດຕໍ່ທຸກວິຖີຊີວິດ. ເມືອງອັດສະລິຍະຈະນໍາໃຊ້ເຕັກໂນໂລຊີອັດສະລິຍະ ແລະ ທິດທາງການແກ້ໄຂບັນຫາແບບອັດສະລິຍະ ໂດຍການນໍາໃຊ້ເຕັກໂນໂລຊີດິຈິຕອນ (ICT), ການສື່ສານ, ອິນເຕີເນັດຄວາມໄວສູງ (Internet of things-IOT) ແລະ ຖານຂໍ້ມູນຂະໜາດໃຫຍ່ (Big Data) ເພື່ອເພີ່ມປະສິດທິພາບຂອງການເຮັດວຽກ, ການກວດສອບ, ການຄຸ້ມຄອງ ແລະ ການບໍາລຸງຮັກສາລະບົບຕ່າງໆ ຂອງ ຕົວເມືອງອັດສະລິຍະ. ຄຸນສົມບັດທີ່ສໍາຄັນຂອງການຫັນເປັນເມືອງອັດສະລິຍະ ກໍຄືການນໍາໃຊ້ຊ່ອງທາງໃນການແກ້ໄຂບັນຫາຊີວິດການເປັນຢູ່ ແບບດິຈິຕອນ ແລະ ນໍາໃຊ້ນະວັດຕະກໍາເຕັກໂນໂລຊີທີ່ທັນສະໄໝເພື່ອປັບປຸງ, ຍົກລະດັບ ແລະ ເຮັດໃຫ້ການບໍລິການດ້ານສາທາລະນະຂອງຕົວເມືອງ ມີປະສິດທິພາບ ແລະ ປະສິດທິຜົນສູງຂຶ້ນ ໂດຍມີຈຸດປະສົງເພື່ອປັບປຸງຄຸນນະພາບຊີວິດຂອງປະຊາຊົນ ແລະ ການດໍາເນີນທຸລະກິດຜ່ານແອັບພີເຄຊັນໄອທີ ແລະ ການສື່ສານມວນຊົນ ໃຫ້ທັນກັບສະພາບການ, ການສະໜອງຄວາມຕ້ອງການຂອງຜູ້ຄົນ ແລະ ທຸລະກິດແບບຖືກຈຸດ, ທັນເວລາ ແລະ ມີປະສິດທິພາບ. ຊຶ່ງແນວທາງເຫຼົ່ານັ້ນກໍຕ້ອງຖືກນໍາໄປໃຊ້ຢ່າງຖືກວິທີ ແລະ ມີວິທະຍາສາດ ທີ່ເອີ້ນວ່າ “ວິໄສທັດຕົວເມືອງອັດສະລິຍະ ແລະ ການເຕີບໂຕແບບຍືນຍົງ ຕາມທິດສີຂຽວ” ຊຶ່ງຈະເປັນແນວທາງທີ່ສົ່ງເສີມຕົ້ນທຶນຂອງປະຊາຊົນ ແລະ ສັງຄົມຢ່າງແທ້ຈິງ ຕະຫຼອດເຖິງການສົ່ງເສີມດ້ານວັດທະນາທໍາ ແລະ ຮັກສາສິ່ງແວດລ້ອມ.

ເຖີງຢ່າງໃດກໍຕາມ, ຍັງມີຫຼາຍນິຍາມສໍາລັບແນວຄວາມຄິດ ກ່ຽວກັບຕົວເມືອງອັດສະລິຍະ ແລະ ຮູບແບບການພັດທະນາຕົວເມືອງອັດສະລິຍະກໍມີຫຼາຍຮູບແບບ. ສະນັ້ນ, ເນື່ອງໃນໂອກາດທີ່ ສາມປະເທດ ແລະ ສີ່ສະຖາບັນຂອງພວກເຮົາໄດ້ຮ່ວມກັນປຶກສາຫາລື ກ່ຽວກັບຫົວຂໍ້ “ວິທະຍາສາດໃນການພັດທະນາຕົວເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ” ໃນຄັ້ງນີ້. ຂ້າພະເຈົ້າຫວັງວ່າພວກເຮົາ ຈະສາມາດສ້າງສັນແນວຄຄວາມຄິດໃໝ່ ທີ່ສາມາດນໍາໃຊ້ເຂົ້າໃນການປັບປຸງໂຄງການຕົວເມືອງອັດສະລິຍະ (Smart City) ຂອງພວກເຮົາ ໃຫ້ກ້າວໄປສູ່ຄວາມທັນສະໄໝໃນອານາຄົດ.

ສວສສຊ ຕ້ອນຮັບຄະນະຜູ້ແທນຈາກສະຖາບັນວິທະຍາສາດສັງຄົມຈີນ

ສວສສຊ ຕ້ອນຮັບຄະນະຜູ້ແທນຈາກສະຖາບັນວິທະຍາສາດສັງຄົມຈີນ

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສັງຄົມນິຍົມສາກົນ ຄັ້ງທີ 10

ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ
ເຂົ້າຮ່ວມກອງປະຊຸມສັງຄົມນິຍົມສາກົນ ຄັ້ງທີ 10

ກອງປະຊຸມສຳມະນາສາກົນກ່ຽວກັບ ການຮ່ວມມືຄຸນນະພາບສູງ “ໜຶ່ງແລວໜຶ່ງເສັ້ນທາງ”

ກອງປະຊຸມສຳມະນາສາກົນກ່ຽວກັບ ການຮ່ວມມືຄຸນນະພາບສູງ "ໜຶ່ງແລວໜຶ່ງເສັ້ນທາງ"

ຂ່າວ-ພາບ: ພອນສຸກ ຄຳວັນທອງ

ຂ່າວ-ພາບ: ແກ້ວວິວັນ ສີວິໄລ

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະລົງເຮັດວຽກທີ່ແຂວງຄຳມ່ວນ

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະລົງເຮັດວຽກທີ່ແຂວງຄຳມ່ວນ

ບົດຂ່າວ ແລະ ຖ່າຍພາບ: ສິລິສິດ ໄຊສົມແພງ

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ລົງເຄື່ອນໄຫວວຽກງານຢູ່ແຂວງສະຫວັນນະເຂດ

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ລົງເຄື່ອນໄຫວວຽກງານຢູ່ແຂວງສະຫວັນນະເຂດ

ບົດຂ່າວ ແລະ ຖ່າຍພາບ: ແກ້ວວິວັນ ສີວິໄລ

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ບົດຂ່າວ ແລະ ຖ່າຍພາບ: ພູຄຽງ ໄຊສິລິ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ “ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ”

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາ "ເມືອງອັດສະລິຍະເພື່ອເປົ້າໝາຍການເຕີບໂຕສີຂຽວ"

ບົດຂ່າວ ແລະ ຖ່າຍພາບ: ທະນົງສອນ ສີບຸນເຮືອງ

ຫົວຂໍ້ທີ່ທ່ານອາດສົນໃຈ