ຂ່າວການເຄື່ອນໄຫວ – ໜ້າ 15 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

WhatsApp Image 2024-03-19 at 16.08.10_a3d33d8c

ສວສສຊ ປະກາດການປັບປຸງສັບຊ້ອນພະນັກງານຂັ້ນນຳພາ

ຈໍານວນຜູ້ເຂົ້າຊົມ: 896

ສວສສຊ ປະກາດການປັບປຸງສັບຊ້ອນພະນັກງານຂັ້ນນໍາພາ

ວັນທີ 15 ມີນາ 2024, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີພິທີປະກາດພະນັກງານການນຳອອກພັກການ-ຮັບອຸດໜູນບຳນານ ແລະ ປະກາດການຈັດຕັ້ງສັບຊ້ອນພະນັກງານຂັ້ນກົມ, ຂັ້ນພະແນກຈໍານວນໜຶ່ງ ພາຍໃຕ້ການເປັນປະທານຂອງ ທ່ານ ປອ. ສອນທະນູ ທໍາມະວົງ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີບັນດາທ່ານຮອງປະທານ, ຫົວໜ້າຫ້ອງການ, ກົມ, ສາຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານລັດຖະກອນພາຍໃນ ສວສສຊ ເຂົ້າຮ່ວມ.

ໃນພິທີດັ່ງກ່າວ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ ໄດ້ຂຶ້ນ ຜ່ານມະຕິຕົກລົງສະບັບເລກທີ 37/ຄລສພ, ລົງວັນທີ 05 ກຸມພາ 2024 ແລະ ດຳລັດເລກທີ 120/ນຍ, ລົງວັນທີ 19 ມັງກອນ 2024 ວ່າດ້ວຍການອະນຸມັດໃຫ້ ທ່ານ ປອ. ນ. ອໍາໄພວັນ ຄໍາແສງສີວິໄລ, ຄະນະປະຈຳພັກ, ປະທານກວດກາ, ຮອງປະທານ ສວສສຊ ພະນັກງານການນໍາຂັ້ນສູງຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ອອກພັກການ-ຮັບອຸດໜູນບຳນານ.

ໃນພິທີຍັງໄດ້ມີການສັບຊ້ອນແຕ່ງຕັ້ງພະນັກງານການນໍາຂັ້ນກົມ ແລະ ຂັ້ນພະແນກຈຳນວນໜຶ່ງດັ່ງນີ້: ແຕ່ງຕັ້ງ ທ່ານ ເພັດໃສ ເພຍເທບ ຫົວໜ້າສະຖາບັນຄົ້ນຄວ້າພັດທະນາວິສາຫະກິດ ເປັນຫົວໜ້າຫ້ອງການ ແລະ ເລຂາໜ່ວຍພັກຫ້ອງການ ສວສສຊ; ແຕ່ງຕັ້ງ ທ່ານ ປອ. ນ. ກິນນາລອນ ພິມມະວົງ ຮອງຫົວໜ້າສະຖາບັນຄົ້ນຄວ້າເສດຖະກິດມະຫາພາກ ເປັນວ່າການແທນ ຫົວໜ້າສະຖາບັນຄົ້ນຄວ້າພັດທະນາວິສາຫະກິດ ແລະ ເປັນຮັກສາການເລຂາໜ່ວຍພັກ; ແຕ່ງຕັ້ງ ທ່ານ ປອ. ແກ້ວວິຈິດ ໄຂຄຳພິທູນ ຮອງຫົວໜ້າຫ້ອງການຄຸ້ມຄອງວິທະຍາສາດ ເປັນວ່າການແທນ ຫົວໜ້າສະຖາບັນຄົ້ນຄວ້າການເມືອງວິທະຍາ ແລະ ເປັນຮັກສາການເລຂາໜ່ວຍພັກ; ແຕ່ງຕັ້ງ ທ່ານ ປອ. ທະນົງສອນ ສີບຸນເຮືອງ ວ່າການແທນຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ ເປັນວ່າການແທນ ຫົວໜ້າສະຖາບັນຄົ້ນຄວ້າປະຫວັດສາດ ແລະ ບູຮານວິທະຍາ; ແຕ່ງຕັ້ງ ທ່ານ ອານາຈັນ ສຸກັນຍາ ເປັນຮັກສາການເລຂາໜ່ວຍພັກ ສະຖາບັນຄົ້ນຄວ້າປະຫວັດສາດ ແລະ ບູຮານວິທະຍາ; ແຕ່ງຕັ້ງ ທ່ານ ປອ. ບຸນສີ ພຸດທະວົງ ຮອງຫົວໜ້າສະຖາບັນຄົ້ນຄວ້າສັງຄົມວິທະຍາ ເປັນວ່າການແທນ ຫົວໜ້າສະຖາບັນຄົ້ນຄວ້າສັງຄົມວິທະຍາ ແລະ ເປັນຮັກສາການເລຂາໜ່ວຍພັກ; ແຕ່ງຕັ້ງ ທ່ານ ເດືອນສະຫັວນ ພອນມີໄຊ ຮອງຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ ເປັນວ່າການແທນ ຫົວໜ້າສູນຂໍ້ມູນຂ່າວສານ ແລະ ເປັນຮັກສາການເລຂາໜ່ວຍພັກ; ແຕ່ງຕັ້ງ ທ່ານ ປອ. ເດັງຢາງ ກົງຈີ້ ເປັນຮັກສາການ ຫົວໜ້າສະຖາບັນຄົ້ນຄວ້າວັດທະນາທຳ ແລະ ເປັນຮັກສາການເລຂາໜ່ວຍພັກ; ແຕ່ງຕັ້ງ ທ່ານ ພັນວົງສາ ຄຳປັນຍາ ເປັນຮອງຫົວໜ້າສະຖາບັນຄົ້ນຄວ້າການເມືອງວິທະຍາ; ແຕ່ງຕັ້ງ ທ່ານ ພອນ ວິພົນຮຽນ ເປັນຮອງຫົວໜ້າຫ້ອງການ; ແຕ່ງຕັ້ງ ທ່ານ ແສງດາວ ຢ່າໜາວຕູ້ ເປັນຮອງຫົວໜ້າສະຖາບັນຄົ້ນຄວ້າສັງຄົມວິທະຍາ. ພ້ອມກັນນີ້, ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າພະແນກ 02 ທ່ານ, ຂັ້ນວ່າການແທນຫົວໜ້າພະແນກ 03 ທ່ານ, ວິຊາການຂຶ້ນຮອງພະແນກ 04 ທ່ານ.

ໃນໂອກາດດັ່ງກ່າວນີ້, ທ່ານ ປອ. ສອນທະນູ ທຳມະວົງ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີຄຳເຫັນຕໍ່ກອງປະຊຸມວ່າ: ການປັບປຸງກົງຈັກການຈັດຕັ້ງ ແລະ ສັບຊ້ອນ, ຈັດວາງບຸກຄະລາກອນ ແມ່ນວຽກງານທີ່ສຳຄັນຂອງອົງການການຈັດຕັ້ງພັກເຮົາ ເຊິ່ງເນື້ອແທ້ກໍ່ແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ການຜັນຂະຫຍາຍມະຕິກອງປະຊຸມວຽກງານຈັດຕັ້ງທົ່ວປະເທດມາເປັນອັນລະອຽດ ເປັນຕົ້ນແມ່ນການຈັດຕັ້ງປະຕິບັດຄຳສັ່ງເລກທີ 190 ຂອງຄະນະເລຂາທິການສູນກາງພັກ ແລະ ຄຳແນະນຳ ເລກທີ 01 ຂອງລັດຖະບານ ວ່າດ້ວຍການປັບປຸງການຈັດຕັ້ງຂອງບັນດາກະຊວງ-ອົງການ ແລະ ທ້ອງຖິ່ນ ຕາມທິດ: “ກະທັດຮັດ, ໂປ່ງໃສ ແລະ ສອດຄ່ອງກັບສະພາບຕົວຈິງ”. ໃນແງ່ໜຶ່ງ ກໍ່ແມ່ນເພື່ອເປັນການທົດສອບຄວາມຮູ້, ຄວາມສາມາດ ແລະ ຄວາມສູ້ຊົນອົດທົນຂອງພະນັກງານ. ພ້ອມນັ້ນ ທ່ານຍັງຮຽກຮ້ອງມາຍັງບັນດາສະຫາຍ ທີ່ໄດ້ຮັບການສັບຊ້ອນ ແລະ ແຕ່ງຕັ້ງໃນຄັ້ງນີ້ ຈົ່ງຕັ້ງໃຈປະຕິບັດໜ້າທີ່ ທີ່ໄດ້ຮັບມອບໝາຍໃຫ້ດີທີ່ສຸດ ແລະ ມີຜົນສຳເລັດ

ຂ່າວ: ເພັດທະນູໄຊ ວົງຍະໄຊ

ພາບ: ມຸນິນ ພົນສັກດາ

WhatsApp Image 2024-03-19 at 09.55.30_8d12f809

ສວສສຊ ຈັດຝຶກອົບຮົມວຽກງານພົວພັນຕ່າງປະເທດ

ຈໍານວນຜູ້ເຂົ້າຊົມ: 902

ສວສສຊ ຈັດຝຶກອົບຮົມວຽກງານພົວພັນຕ່າງປະເທດ

ໃນຕອນເຊົ້າຂອງວັນທີ 14 ມີນາ 2024 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມຝຶກອົບຮົມວຽກງານພົວພັນຕ່າງປະເທດ, ໂດຍການເປັນປະທານຂອງ ທ່ານ ປອ. ນ. ຂັນລາສີ ແກ້ວບຸນພັນ, ຮອງປະທານ ສວສສຊ; ມີບັນດາຫົວໜ້າ, ຮອງຫົວໜ້າ, ຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານລັດຖະກອນທົ່ວ ສວສສຊ ເຂົ້າຮ່ວມຫຼາຍກວ່າ 60 ທ່ານ; ຝຶກອົບຮົມຄັ້ງນີ້ຈັດຂຶ້ນເພື່ອຍົກລະດັບຄວາມຮູ້ຄວາມເຂົ້າໃຈ ກ່ຽວກັບວຽກງານພົວພັນຕ່າງປະເທດ ແລະ ວຽກງານພິທີການທູດ ໃຫ້ແກ່ພະນັກງານ ສວສສຊ.

ໄດ້ເຊື້ອເຊີນ ທ່ານ ວັນດີ ພຸດສະດີ, ຮອງຫົວໜ້າຫ້ອງການ, ກະຊວງການຕ່າງປະເທດ ມາເປັນວິທະຍາກອນ; ໃນຊຸດຝຶກອົບຮົມໄດ້ຮັບຟັງ ການນຳສະເໜີກ່ຽວກັບນະໂຍບາຍການຕ່າງປະເທດຂອງ ສປປ ລາວ ໃນແຕ່ລະໄລຍະ ແລະ ປະຕິບັດນະໂຍບາຍ ເປີດກວ້າງການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດຫຼຸດຜ່ອນສັດຕູ” ພ້ອມດຽວກັນນັ້ນ ຍັງໄດ້ຮຽນຮູ້ວຽກງານທາງການທູດດ້ານຕ່າງໆ ເປັນຕົ້ນແມ່ນ ຄວາມຮູ້ພື້ນຖານກ່ຽວກັບພິທີການທູດ, ວຽກງານການພົວພັນການຕ່າງປະເທດ ທັງສອງຝ່າຍ ແລະ ຫຼາຍຝ່າຍ, ວຽກງານການທູດທາງດ້ານເສດຖະກິດ, ວັດທະນາທຳ-ສັງຄົມ, ຄຸນສົມບັດສິນທຳປະຕິວັດ ຂອງນັກການທູດ.

ໃນໂອກາດດັ່ງກ່າວ ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ ໄດ້ມີຄໍາເຫັນໂອ້ລົມຕໍ່ກອງປະຊຸມບາງຕອນວ່າ: “ວຽກງານພົວພັນຕ່າງປະເທດ ແລະ ການທູດ” ເປັນວຽກງານໜຶ່ງທີ່ສໍາຄັນ, ເປັນດ່ານໜ້າໃນການພົບປະແລກປ່ຽນສາຍສຳພັນກັບເພື່ອນມິດທົ່ວໂລກ, ເປັນວຽກທີ່ຊັບຊ້ອນລະອຽດອ່ອນ, ມີວິທະຍາສາດ ແລະ ເຕັມໄປດ້ວຍຮູບແບບລັກສະນະສິນລະປະ. ດັ່ງນັ້ນເພື່ອຮັບປະກັນຄວາມສັນຕິພາບ, ເອກະລາດ, ມິດຕະພາບ ແລະ ການຮ່ວມມື ແບບຕ່າງຝ່າຍຕ່າງໄດ້ຮັບຜົນປະໂຫຍດ, ພວກເຮົາຕ້ອງໄດ້ເຊື່ອມຊຶມ ແລະ ຍຶດໝັ້ນ ໃນແນວທາງການຕ່າງປະເທດຂອງ ສປປ ລາວ ແລະ ຮູ້ຈັກໝູນໃຊ້ເຂົ້າໃນວຽກງານຂອງຕົນຢ່າງຄ່ອງແຄ້ວ ແນໃສ່ຈັດຕັ້ງປະຕິບັດແນວທາງ ນະໂຍບາຍຂອງພັກ-ລັດ ແຜນພັດທະນາເສດຖະກິດ-ສັງຄົມຂອງລັດຖະບານຕໍ່ສາກົນ ໃຫ້ປະກົດຜົນເປັນຈິງ, ຍາດແຍ່ງເອົາການຮ່ວມມື, ການຊ່ວຍເຫຼືອ ຈາກຕ່າງປະເທດ ໃຫ້ໄດ້ຫຼາຍທີ່ສຸດ; ໃນຕອນທ້າຍ ທ່ານຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມ ຈົ່ງພ້ອມໃຈກັນຄົ້ນຄວ້າ ແລະ ແລກປ່ຽນຄໍາຄິດເຫັນຢ່າງກົງໄປກົງມາ ເພື່ອປັບປຸງ ແລະ ຍົກລະດັບວຽກງານດັ່ງກ່າວໃຫ້ມີປະສິດທິພາບດີຂຶ້ນກວ່າເກົ່າ.

ຂ່າວ: ພວງເພັດ ຈັນທະລີວົງ

ພາບ: ມຸນີນ ພົນສັກດາ

ສະຫະພັນແມ່ຍິງ 6 ອົງການ ອ້ອມຂ້າງຫຼັກ 06 ຈັດຕັ້ງພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 114

ຈໍານວນຜູ້ເຂົ້າຊົມ: 781

ສະຫະພັນແມ່ຍິງ 6 ອົງການ ອ້ອມຂ້າງຫຼັກ 06 ຈັດຕັ້ງພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 114

ວັນທີ 12 ມີນາ 2024, ທີ່ຫ້ອງປະຊຸມໃຫຍ່ສໍານັກງານຫ້ອງວ່າການສູນກາງພັກ, ສະຫະພັນແມ່ຍິງ 06 ອົງການອ້ອມຂ້າງຫຼັກ 06 ປະກອບມີ: ສະຫະພັນແມ່ຍິງ ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຄະນະໂຄສະນາອົບຮົມສູນກາງພັກ, ຄະນະພົວພັນຕ່າງປະເທດ ສູນກາງພັກ ແລະ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີສະເຫຼີມສະຫຼອງ ວັນແມ່ຍິງສາກົນ ວັນທີ 8 ມີນາ ຄົບຮອບ 114 ປີ (ວັນທີ 8 ມີນາ 1910-8 ມີນາ 2024); ການຈັດກອງປະຊຸມປາຖະກະຖາ ຫວນຄືນມູນເຊື້ອວັນສໍາຄັນດັ່ງກ່າວ ໃຫ້ກຽດຂຶ້ນປາຖະກະຖາໂດຍ ສະຫາຍ ນາງ ສິລິກິດ ບຸບຜາ, ຮອງປະທານສູນກາງສະຫະພັນແມ່ຍິງລາວ; ມີຄະນະພັກ ຜູ້ຊີ້ນໍາອົງການຈັດຕັ້ງມະຫາຊົນ, ປະທານ, ຮອງປະທານ, ຄະນະສະຫະພັນແມ່ຍິງ, ຕາງໜ້າຄະນະບໍລິຫານງານສະຫະພັນກໍາມະບານ ແລະ ຄະນະບໍລິຫານງານຊາວໜຸ່ມ, ພ້ອມດ້ວຍສະມາຊິກແມ່ຍິງ ທັງ 06 ອົງການ ເຂົ້າຮ່ວມຢ່າງໜາແໜ້ນ.

ກອງປະຊຸມ ໄດ້ຮັບຟັງການເລົ່າມູນເຊື້ອ ແລະ ການເຄື່ອນໄຫວຂະບວນການຂອງແມ່ຍິງທົ່ວໂລກ, ພາກພື້ນ, ອາຊຽນ ແລະ ການເຂົ້າຮ່ວມເຄື່ອນໄຫວ ໃນຂະບວນການດັ່ງກ່າວຂອງສະຫະພັນແມ່ຍິງລາວ ໃນແຕ່ລະໄລຍະ; ຮັບຟັງກ່ຽວກັບບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆ ກ່ຽວກັບແມ່ຍິງລະດັບສາກົນ, ພາກພື້ນ ແລະ ອາຊຽນ; ແລະ ຮັບຟັງນະໂຍບາຍ ແລະ ກົນໄກ ສົ່ງເສີມຄວາມກ້າວໜ້າຂອງແມ່ຍິງ ໃນ ສປປ ລາວ.

ພາຍຫຼັງສໍາເລັດພິທີ, ສະຫະພັນແມ່ຍິງທັງ 6 ອົງການ ໄດ້ສ້າງກິດຈະກໍາແຂ່ງຂັນກິລາມວນຊົນຮ່ວມກັນຢ່າງເປັນຂະບວນຟົດຟື້ນ ເພື່ອເປັນການເຕົ້າໂຮມ ແລະ ຮັດແໜ້ນຄວາມສາມັກຄີຂອງເອື້ອຍນ້ອງແມ່ຍິງ.

ຂ່າວ: ພວງເພັດ ຈັນທະລີວົງ

ພາບ: ມຸນີນ ພົນສັກດາ

ກອງປະຊຸມສະຫຼຸບປີ ແລະ ວຽກງານແຂ່ງຂັນຮັກຊາດ ແລະ ພັດທະນາ ປະຈຳປີ 2023 ແຜນທິດທາງປີ 2024

ຈໍານວນຜູ້ເຂົ້າຊົມ: 768

ກອງປະຊຸມສະຫຼຸບປີ ແລະ ວຽກງານແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແຜນທິດທາງປີ 2024

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈັດກອງປະຊຸມສະຫຼຸບປີ ແລະ ວຽກງານແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ແຜນທິດທາງປີ 2024; ໃນວັນທີ 01 ມີນາ 2024; ໃຫ້ກຽດຂຶ້ນເປັນປະທານໂດຍ ທ່ານ ປອ. ສອນທະນູ ທໍາມະວົງ, ກໍາມະການສູນກາງພັກ, ເລຂາຄະນະພັກ, ປະທານ ສວສສຊ; ມີຫ້ອງການ, ກົມ, ສະຖາບັນຄົ້ນຄວ້າ, ສູນ, ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ 138 ທ່ານ; ຍິງ 50 ທ່ານ.

ກອງປະຊຸມໄດ້ຜ່ານບົດສະຫຼຸບ ຕີລາຄາການຈັດຕັ້ງປະຕິບັດວຽກງານ ປະຈໍາປີ 2023 ແລະ ທິດທາງປີ 2024 ຂອງ ສວສສຊ ໂດຍທ່ານ ພອນ ວິພົນຮຽນ ວ່າການຫົວໜ້າຫ້ອງການ; ເນື້ອໃນບາງຕອນທ່ານໄດ້ຍົກໃຫ້ເຫັນຜົນງານອັນພົ້ນເດັ່ນຂອງ ສວສສຊ ໃນໄລຍະໜຶ່ງປີຜ່ານມາໂດຍສະເພາະວຽກງານຄົ້ນຄວ້າບັນດາໂຄງການຕ່າງໆ, ວຽກງານລົງຊຸກຍູ້ຕິດຕາມ ແລະ ກວດກາການເຄື່ອນໄຫວວຽກພັກ ແລະ ລັດຢ່າງໃກ້ຊິດຢູ່ບັນດາຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ໂດຍສະເພາະວຽກເປີດຂະບວນການແຂ່ງຂັນຮັກຊາດ ແລະ ພັດທະນາປະຈໍາປີ 2023 ແລະ ທິດທາງປີ 2024 ຂອງ ສວສສຊ, ວຽກງານພົວພັນຕ່າງປະເທດການເຂົ້າຮ່ວມກອງປະຊຸມສໍາມະນາສາກົນ ແລະ ລົງເຄື່ອນໄຫວຈັດກອງປະຊຸມແລກປ່ຽນບົດຮຽນການຄົ້ນຄວ້າວິທະຍາສາດເສດຖະກິດ-ສັງຄົມ ຢູ່ບັນດາແຕ່ລະແຂວງ ໃນ ສປປ ລາວ.

ສືບຕໍ່ຜ່ານຂໍ້ຕົກລົງ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ວ່າດ້ວຍການຍ້ອງຍໍພະນັກງານຜູ້ທີ່ມີຜົນງານຮັບໃຊ້ກອງປະຊຸມໃຫຍ່ສະມາຊິກພັກຄັ້ງທີ I ແລະ ກອງປະຊຸມກາງສະໄໝອົງຄະນະພັກ ສວສສຊ ໂດຍມີຕາງໜ້າ 11 ພາກສ່ວນຂຶ້ນຮັບໃບຍ້ອງຍໍ; ໃນວາລະຕອນທ້າຍກອງປະຊຸມ ທ່ານ ປອ. ສອນທະນູ ທໍາມະວົງ ໄດ້ມີຄໍາເຫັນໂອ້ລົມໂດຍເພີ່ນໄດ້ກ່າວສະແດງຄວາມພາກພູມໃຈ ແລະ ປິຕິຊົມຊື່ນເປັນຢ່າງຍິ່ງ ທີ່ໄດ້ເຂົ້າຮ່ວມກອງປະຊຸມໃນຄັ້ງນີ້ ແລະ ໄດ້ມີໂອກາດພົບປະກັບບັນດາການນໍາ ຂັ້ນຕ່າງໆ , ສະມາຊິກພັກ, ພະນັກງານ-ລັດຖະກອນ ແລະ ບຸກຄົນດີເດັ່ນ ພາຍໃນ ສວສສຊ ທີ່ເຂົ້າຮ່ວມກອງປະຊຸມສໍາຄັນໃນມື້ນີ້; ທ່ານເຫັນວ່າໃນໜຶ່ງປີຜ່ານມາ ສວສສຊ ພວກເຮົາໄດ້ມີຜົນງານອັນພົ້ນເດັ່ນຫຼາຍດ້ານ, ກອງປະຊຸມໃນຄັ້ງນີ້ຖືເປັນການສະຫຼຸບຕີລາຄາໝາກຜົນຕົວຈິງ ໃນການຈັດຕັ້ງປະຕິບັດວຽກງານຕາມການມອບໝາຍ ແລະ ຕາມພາລະບົດບາດຂອງຕົນ ເພື່ອປະເມີນຮອບດ້ານ ອັນທີ່ພວກເຮົາສາມາດຈັດຕັ້ງປະຕິບັດໄດ້ ແລະ ບັນຫາທີ່ຍັງຄົງຄ້າງ ຢ່າງພາວະວິໄສ ແນໃສ່ການປັບປຸງແກ້ໄຂເພື່ອໃຫ້ໄດ້ຮັບຜົນດີຂຶ້ນກວ່າເກົ່າ; ທ່ານໄດ້ສະແດງຄວາມເອກະພາບສູງ ຕໍ່ເນື້ອໃນບົດສະຫຼຸບ ສວສສຊ ປະຈໍາປີ 2023, ວຽກຂະບວນການແຂ່ງຂັນຍ້ອງຍໍຮັກຊາດ ແລະ ພັດທະນາ; ເຊິ່ງທ່ານໄດ້ເນັ້ນໜັກເຖິງຜົນສໍາເລັດອັນໃຫຍ່ຫຼວງກວ່າໝູ່ແມ່ນປະເທດຊາດຂອງພວກເຮົາຍັງສືບຕໍ່ຮັບປະກັນສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ຄວາມເປັນເອກະລາດ, ອໍານາດອະທິປະໄຕຂອງຊາດ ໄດ້ຮັບການປົກປັກຮັກສາຢ່າງໝັ້ນຄົງ; ເຖິງກອງປະຊຸມຈະສໍາເລັດລົງ ແຕ່ໜ້າທີ່ຄວາມຮັບຜິດຊອບຂອງບັນດາສະຫາຍຍັງໜັກໜ່ວງ ມີທັງເງື່ອນໄຂສະດວກ, ໂອກາດ ແລະ ສິ່ງທ້າທາຍ ສະນັ້ນ ຈົ່ງພ້ອມກັນຮັກສາຄວາມສາມັກຄີເປັນປຶກແຜ່ນ ກ້າວຜ່ານອຸປະສັກຄວາມຫຍຸ້ງຍາກ ແລະ ພ້ອມກັນຍາດແຍ່ງຜົນສໍາເລັດໃຫ້ໄດ້ຮັບໝາກຜົນຂຶ້ນດີກວ່າເກົ່າ.

ຂ່າວ: ພວງເພັດ ຈັນທະລີວົງ

ພາບ: ມູນີນ ພົນສັກດາ

ສວສສຊ ຈັດປາຖະກະຖາວັນສ້າງຕັ້ງສະຫະພັນກໍາມະບານລາວ ຄົບຮອບ 68 ປີ

ຈໍານວນຜູ້ເຂົ້າຊົມ: 714

ສວສສຊ ຈັດປາຖະກະຖາວັນສ້າງຕັ້ງສະຫະພັນກໍາມະບານລາວ ຄົບຮອບ 68 ປີ

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈັດປາຖະກະຖາວັນສ້າງຕັ້ງສະຫະພັນກໍາມະບານລາວ ຄົບຮອບ 68 ປີ (1 ກຸມພາ 1956-1 ກຸມພາ 2024) ໃນວັນທີ 01 ມີນາ 2024; ໃຫ້ກຽດເລົ່າມູນເຊື້ອໂດຍ: ທ່ານ ປອ. ກິແກ້ວ ຈັນທະບູຣີ, ຮອງເລຂາຄະນະພັກ, ຮອງປະທານ ສວສສຊ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນມີ ທ່ານ ພອນ ວິພົນຮຽນ, ປະທານສະຫະພັນກໍາມະບານ ສວສສຊ ຄະນະປະທານກໍາມະບານຮາກຖານອ້ອມຂ້າງ ສວສສຊ ແລະ ສະມາຊິກກໍາມະບານ ກໍ່ຄືພະນັກງານທົ່ວ ສວສສຊ ເຂົ້າຮ່ວມ ຈໍານວນ138 ທ່ານ; ຍິງ 50 ທ່ານ;

ການຈັດພິທີໃນຄັ້ງນີ້ ເພື່ອເປັນການຫວນຄືນມູນເຊື້ອ ແລະ ສຶກສາອົບຮົມໃຫ້ພະນັກງານສະມາຊິກກໍາມະບານພາຍໃນ ສວສສຊ ມີຄວາມເຂົ້າໃຈ ກ່ຽວກັບປະຫວັດແຫ່ງການເຕີບໃຫຍ່ຂະຫຍາຍຕົວ ຂອງສະຫະພັນກໍາມະບານລາວ, ໂດຍມີບາງຕອນສໍາຄັນທ່ານໄດ້ຍົກໃຫ້ເຫັນ ກ່ຽວກັບຜົນງານດີເລີດຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າ ເຊິ່ງໄດ້ຮ່ວມກັນຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະໄລຍະປ່ຽນແປງໃໝ່ຮອບດ້ານຢ່າງມີຫຼັການ.

ຂ່າວ: ພວງເພັດ ຈັນທະລີວົງ

ພາບ: ມຸນິນ ພົນສັກດາ

ກອງປະຊຸມເຜີຍແຜ່ການຄົ້ນຄວ້າປະຈຳປີ ສ່ອງແສງຫົນທາງວິທີແກ້ໄຂບັນຫາການຂາດສານອາຫານຢູ່ ສປປ ລາວ ໂດຍນຳໃຊ້ຖານຂໍ້ມູນຂ່າວສານ

ຈໍານວນຜູ້ເຂົ້າຊົມ: 718

ກອງປະຊຸມເຜີຍແຜ່ຜົນການຄົ້ນຄວ້າປະຈຳປີ ສ່ອງແສງຫົນທາງວິທີແກ້ໄຂບັນຫາການຂາດສານອາຫານ ຢູ່ ສປປ ລາວ ໂດຍນຳໃຊ້ຖານຂໍ້ມູນຂ່າວສານ

ນະຄອນຫຼວງວຽງຈັນ, ວັນທີ 5 ມີນາ 2024, ລັດຖະບານ ແຫ່ງ ສປປ ລາວ ແລະ ຄູ່ຮ່ວມພັດທະນາ ໄດ້ ຈັດກອງປະຊຸມ ເຜີຍແຜ່ຜົນການຄົ້ນຄວ້າປະຈໍາປີ ດ້ານໂພຊະນາການແຫ່ງຊາດ ຄັ້ງທີ V ເພື່ອປຶກສາຫາລືກ່ຽວກັບ ຜົນການຄົ້ນຄວ້າໃໝ່ລ່າສຸດຂອງວຽກງານໂພຊະນາການ ເພື່ອຊອກຫາມາດຕະການ ແລະ ຊຸກຍູ້ວຽກງານແກ້ໄຂບັນຫາການຂາດສານອາຫານຢູ່ ສປປ ລາວ. ຕາງໜ້າຈາກຂະແໜງການຕ່າງໆ, ລວມເຖິງລັດຖະບານ, ນັກວິຊາການ, ອົງການຈັດຕັ້ງທີ່ບໍ່ຂຶ້ນກັບລັດຖະບານ ເເລະ ອື່ນໆ ຜັດປ່ຽນກັນຂຶ້ນເວທີກອງປະຊຸມ ເພື່ອນໍາສະເໜີຜົນການຄົ້ນຄວ້າລ່າສຸດກ່ຽວກັບໂພຊະນາການໃນປະເທດ ໃຫ້ເເກ່ການນໍາຂັ້ນສູງຈາກລັດຖະບານ ແລະ ຄູ່ຮ່ວມພັດທະນາ, ລວມເຖິງ ການລາຍງານຜົນຈາກການສໍາຫຼວດ ດັດຊະນີໝາຍສັງຄົມລາວ ຄັ້ງທີ III (LSIS III), ເຊີ່ງເປັນການສໍາຫຼວດ ລະດັບຊາດຄັ້ງທໍາອິດກ່ຽວກັບເດັກນ້ອຍ ແລະ ແມ່ຍິງລາວ ນັບຕັ້ງແຕ່ມີການລະບາດຂອງພະຍາດ ໂຄວິດ-19, ຄຽງຄູ່ກັບການລາຍງານຜົນການສໍາຫຼວດເຝົ້າລະວັງດ້ານໂພຊະນາການແຫ່ງຊາດ ຮອບທີ II ແລະ ຜົນການຄົ້ນຄວ້າອື່ນໆ. ທ່ານ ປອ. ສະຖາບັນດິດ ອິນສີຊຽງໃໝ່, ຮອງລັດຖະມົນຕີກະຊວງແຜນການ ແລະ ການລົງທຶນ ເເລະ ປະທານກອງປະຊຸມ ໄດ້ກ່າວວ່າ: “ເພື່ອແກ້ໄຂບັນຫາການຂາດສານອາຫານໃນ ສປປ ລາວ ໃຫ້ມີປະສິດຕິຜົນຫຼາຍຂຶ້ນ, ພວກເຮົາຕ້ອງນໍາໃຊ້ຖານຂໍ້ມູນຂ່າວສານ ເພື່ອ ເປັນທິດຊີ້ນໍາໃຫ້ເເກ່ການວາງຍຸດທະສາດ ແລະ ການແຊກແຊງຕ່າງໆ ກ່ຽວກັບການປັບປຸງໂພຊະນາການຂອງເດັກ ເເລະ ເເມ່ຍິງ, ສະນັ້ນ ຈື່ງເປັນເຫດຜົນທີ່ພວກເຮົາໄດ້ຈັດຕັ້ງໂຄງການ NIPN ຂຶ້ນ; ໃນປີ 2018 ແລະ ກອງປະຊຸມເຜີຍແຜ່ຜົນການຄົ້ນຄວ້າດ້ານໂພຊະນາການ ແຫ່ງຊາດ ໃນເເຕ່ລະປີ;.” ທ່ານ ປອ. ສະຖາບັນດິດ ອິນສີຊຽງໃໝ່ ຍັງໄດ້ເນັ້ນໃຫ້ ເຫັນອີກເຖິງຄວາມຈໍາເປັນໃນການເພີ່ມທະວີ ການຈັດຕັ້ງປະຕິບັດວຽກງານເເກ້ໄຂບັນຫາການຂາດສານອາຫານຢ່າງຮີບດ່ວນ ໂດຍອີງໃສ່ຜົນການຄົ້ນຄວ້າລ່າສຸດທີ່ໄດ້ຖືກເຜີຍເເຜ່ໃນກອງປະຊຸມຄັ້ງນີ້.

ທ່ານ ປອ. ກິແກ້ວ ຈັນທະບູຣີ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີຄໍາເຫັນຕໍ່ກອງປະຊຸມວ່າ: ຂໍ້ຄວາມສໍາຄັນ ຈາກການຄົ້ນຄວ້າ ແມ່ນຈະຕ້ອງໄດ້ລົງທຶນໃສ່ໂພຊະນາການຂອງແມ່ໂດຍການເຮັດໃຫ້ພວກເຂົາສາມາດເຂົ້າເຖິງອາຫານທີ່ມີຄຸນນະພາບ ແລະ ມີໂພຊະນາການ. ສຸມໃສ່ການປັບປຸງຄຸນະພາບການບໍລິການດ້ານສາທາລະນະສຸກເພີ່ມຕື່ມ ເພື່ອໃຫ້ເດັກທີ່ເກີດມີສຸຂະພາບແຂງແຮງສົມບູນ ສະນັ້ນຈຶ່ງມີຄວາມຕ້ອງການໃນການລົງທຶນໃສ່ມາດຕະການຂອງຂະແໜງການ ແລະ ຊຸມຊົນ ເພື່ອພັດທະນາຄຸນນະພາບຂອງການບໍລິໂພກອາຫານຂອງເດັກ ເພື່ອປັອງກັນ ແລະ ຫຼີກລ້ຽງການຂາດສານອາຫານ. ກອງປະຊຸມເຜີຍແຜ່ຜົນການຄົ້ນຄວ້າດ້ານໂພຊະນາການແຫ່ງຊາດປະຈໍາປີ;ຄັ້ງທີ V ເປັນສ່ວນໜຶ່ງຂອງກອງປະຊຸມແຫ່ງຊາດດ້ານໂພຊະນາການ ຄັ້ງທີ IX ທີ່ໄດ້ຈັດຂຶ້ນໃນວັນທີ 6 ມີນາ 2024, ເຊິ່ງເປັນກອງປະຊຸມດ້ານໂພຊະນາການປະຈໍາປີ; ໂດຍມີການເຂົ້າຮ່ວມ ປຶກສາຫາລືກັບບັນດາຜູ້ມີສ່ວນຮ່ວມຢູ່ທົ່ວປະເທດ ກ່ຽວກັບບຸລິມະສິດ ແລະ ສິ່ງທ້າທາຍ ດ້ານໂພຊະນາການຂອງ ສປປ ລາວ.

ຂ່າວ: ພວງເພັດ ຈັນທະລີວົງ

ພາບ: ມຸນິນ ພົນສັກດາ

ກອງປະຊຸມເຜີຍແຜ່ກົດໝາຍວ່າດ້ວຍຊັບສິນຂອງລັດ ແລະ ເຜີຍແຜ່ຄຳແນະນຳກ່ຽວກັບການຄຸ້ມຄອງ ແລະ ນຳໃຊ້ລົດບໍລິຫານລັດ

ຈໍານວນຜູ້ເຂົ້າຊົມ: 881

ກອງປະຊຸມເຜີຍແຜ່ກົດໝາຍວ່າດ້ວຍຊັບສິນຂອງລັດ ແລະ ເຜີຍແຜ່ຄຳແນະນຳກ່ຽວກັບການຄຸ້ມຄອງ ແລະ ນຳໃຊ້ລົດບໍລິຫານລັດ

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈັດກອງປະຊຸມເຜີຍແຜ່ 02 ເອກະສານສໍາຄັນໃນວັນທີ 29 ກຸມພາ 2024; ໂດຍການເປັນປະທານຂອງ ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ, ມີບັນດາຫົວໜ້າ–ຮອງຫົວໜ້າ, ຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ; ກອງປະຊຸມໄດ້ຮັບຟັງການເຜີຍແຜ່ ດໍາລັດວ່າດ້ວຍລົດຂອງລັດ ສະບັບເລກທີ 599/ລບ, ລົງວັນທີ 29 ກັນຍາ 2021 (ບາງມາດຕາ) ແລະ ເຜີຍແຜ່ຄໍາແນະນໍາກ່ຽວກັບການຄຸ້ມຄອງ ແລະ ນໍາໃຊ້ລົດບໍລິຫານລັດ, ສະບັບເລກທີ 0393/ກງ, ລົງວັນທີ 04 ກຸມພາ 2022 ໂດຍການເຜີຍແຜ່ຂອງທ່ານ ສົມບູນ ແກ່ນປະເສີດ, ຫົວໜ້າພະແນກ, ກົມຄຸ້ມຄອງຊັບສິນລັດ, ກະຊວງການເງິນ; ທັງສອງເອກະສານມີເນື້ອໃນແນະນໍາກ່ຽວກັບການຄຸ້ມຄອງນໍາໃຊ້ຊັບສິນຂອງລັດໂດຍລະອຽດຈະແຈ້ງ ກ່ຽວກັບການກໍານົດຫຼັກການ, ລະບຽບການສະເພາະກ່ຽວກັບການຈັດສັນ, ປະກອບ, ຈັດຊື້, ຄຸ້ມຄອງ, ນໍາໃຊ້, ປົກປັກຮັກສາ, ສະສາງ ແລະ ກວດກາລົດບໍລິຫານລັດ.

ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ ມີຄໍາເຫັນຕໍ່ກອງປະຊຸມໂດຍທ່ານໄດ້ກ່າວວ່າ: ວຽກງານຄຸ້ມຄອງຊັບສິນລັດ ເປັນວຽກງານໜຶ່ງທີ່ສຳຄັນ, ດັ່ງນັ້ນ, ຄະນະພັກ-ຄະນະນໍາຂອງ ສວສສຊ ຈຶ່ງໄດ້ຄົ້ນຄວ້າ ແລະ ຕົກລົງອະນຸມັດເປີດກອງປະຊຸມເຜີຍແຜ່ຕໍ່ວຽກງານດັ່ງກ່າວ ໂດຍໄດ້ເຊີນເອົານັກວິທະຍາກອນຈາກກະຊວງການເງິນມາຂຶ້ນບັນຍາຍ ເຊິ່ງເປັນບົດຮຽນອັນລໍ້າຄ່າໃຫ້ພະນັກງານ ສວສສຊ ຂອງພວກເຮົາ ແນໃສ່ເປັນບ່ອນອີງໃນການຈັດຕັ້ງປະຕິບັດ ແລະ ໃຫ້ເຂົ້າໃຈຢ່າງເລິກເຊິ່ງ ກ່ຽວກັບການນຳໃຊ້ ແລະ ຄຸ້ມຄອງ ຊັບສິນຂອງລັດ ໃຫ້ມີປະສິດທິຜົນສູງ ແລະ ເປັນເອກະພາບກັນໃນຂອບເຂດທົ່ວປະເທດ.

ຂ່າວ: ພວງເພັດ ຈັນທະລີວົງ

ພາບ: ມຸນິນ ພົນສັກດາ

ກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານ ລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ

ຈໍານວນຜູ້ເຂົ້າຊົມ: 931

ກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານ ລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ

ໃນຕອນເຊົ້າຂອງວັນທີ 9 ກຸມພາ 2024 ທີ່ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ, ໂດຍການເປັນປະທານຂອງ ທ່ານ ປອ ນ. ຂັນລາສີ ແກ້ວບຸນພັນ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຜູ້ຊີ້ນຳວຽກງານຫ້ອງການ ສວສສຊ; ມີຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພາຍໃນ ສວສສຊ ພ້ອມທັງ ພະນັກງານ-ລັດຖະກອນ ສວສສຊ ເຂົ້າຮ່ວມຫຼາຍກວ່າ 50 ທ່ານ; ກອງປະຊຸມດັ່ງກ່າວໄດ້ເຊື້ອເຊີນວິທະຍາກອນ ຈາກກົມເລຂານຸການ-ການນໍາ, ຫ້ອງວ່າການສູນກາງພັກ, ມາບັນຍາຍໃນຫົວຂໍ້: “ການຍົກລະດັບຄຸນນະພາບວຽກງານເລຂານຸການ, ການປະສານງານ ແລະ ການຈໍລະຈອນເອກະສານພາຍໃນ ສວສສຊ”.

ກອງປະຊຸມໄດ້ຮັບຟັງການເຜີຍແຜ່ຂໍ້ກຳນົດ 415/ຄລສພ, ວ່າດ້ວຍເລຂານຸການຂອງການນໍາ ໂດຍ ທ່ານ ສີສູນໄທ ແກ້ວໂພໄຊ, ກຳມະການພັກ, ຫົວໜ້າກົມເລຂານຸການ-ການນຳ, ຫ້ອງວ່າການສູນກາງພັກ; ເຊິ່ງເປັນນິຕິກຳທີ່ສຳຄັນໃນການກຳນົດຫຼັກການ ແລະ ລະບຽບການ ໃນການຄຸ້ມຄອງ, ເປັນການກຳນົດມາດຕະຖານ, ໜ້າທີ່, ຂອບເຂດສິດ, ລະບອບແບບແຜນວິທີເຮັດວຽກ, ຂໍ້ຫ້າມ ແລະ ອື່ນໆ ທັງເປັນການຫັນເອົາວຽກງານເລຂານຸການໃຫ້ເຂົ້າສູ່ລະບຽບການ ແລະ ເຄື່ອນໄຫວຢ່າງມີປະສິດທິພາບ; ນອກນີ້, ກໍເພື່ອເປັນການຍົກລະດັບຄວາມຮັບຮູ້ ຄວາມເຂົ້າໃຈ ໃຫ້ແກ່ພະນັກງານ-ລັດຖະກອນ ທົ່ວ ສວສສຊ ເຫັນໄດ້ເຖິງພາລະບົດບາດ ແລະ ຄວາມສຳຄັນ ຂອງວຽກງານເລຂານຸການ ໃນການຄົ້ນຄວ້າ-ສັງລວມ, ບັນນາທິການ, ປະສານງານ, ສ້າງແຜນການເຄື່ອນໄຫວແຕ່ລະໄລຍະ ແລະ ອໍານວຍຄວາມສະດວກຮອບດ້ານໃຫ້ແກ່ການນຳ ເວົ້າລວມ, ເວົ້າສະເພາະກໍ ເພື່ອເປັນການສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ຜູ້ທີ່ເຮັດວຽກງານເປັນເສນາທິການ ໃນຂັ້ນຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ໃຫ້ສາມາດປະຕິບັດໜ້າທີ່ວຽກງານຂອງຕົນຖືກຕ້ອງຕາມແນວທາງນະໂຍບາຍຂອງພັກ-ລັດ ແລະ ຮັບປະກັນໃຫ້ແກ່ວຽກງານການປະສານງານລະຫວ່າງຂັ້ນລຸ່ມກັບຂັ້ນເທິງໃຫ້ຖືກຕ້ອງ ສອດຄ່ອງ ແລະ ເປັນເອກະພາບກັນ.

ໃນໂອກາດດັ່ງກ່າວ ທ່ານ ປອ ນ. ຂັນລາສີ ແກ້ວບຸນພັນ, ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງບາງຕອນທ່ານໄດ້ເນັ້ນວ່າ “ເລຂານຸການ-ການນຳ ເຮັດວຽກຕິດພັນກັບຫຼາຍພາກສ່ວນ, ຫຼາຍຂັ້ນ ຫຼາຍລະດັບ ໃນຂອດການປະສານ” ສະນັ້ນ, ວຽກງານເລຂານຸການ ເປັນວຽກງານໜຶ່ງທີ່ສໍາຄັນ ຮັບໃຊ້ອຳນວຍຄວາມສະດວກໃຫ້ແກ່ການປະຕິບັດໜ້າທີ່ວຽກງານຂອງການຈັດຕັ້ງທຸກຂັ້ນ ຈິ່ງຕ້ອງໄດ້ມີການຝຶກຝົນ ແລະ ພັດທະນາຕົວເອງຂຶ້ນໄປເລື້ອຍໆ ນອກຈາກນັ້ນ, ເພີ່ນຍັງໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມ ຈົ່ງພ້ອມກັນຄົ້ນຄວ້າ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ເພື່ອປັບປຸງ ແລະ ຍົກລະດັບວຽກງານດັງກ່າວໃຫ້ມີປະສິດທິພາບດີຂຶ້ນກວ່າເກົ່າ.

ຂ່າວ: ເພັດສົມພອນ ທຳມະວົງ

ສວສສຊ ຕ້ອນຮັບຄະນະຜູ້ແທນຈາກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ.

ຈໍານວນຜູ້ເຂົ້າຊົມ: 988

ສວສສຊ ຕ້ອນຮັບຄະນະຜູ້ແທນຈາກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ

ເພື່ອເປັນການສືບຕໍ່ແລກປ່ຽນຮ່ວມມືລະຫວ່າງ 2 ສະຖາບັນ ຈີນ-ລາວ ແລະ ເປັນການລິເລີ່ມ ຊຸກຍູ້ການສ້າງສູນຄົ້ນຄວ້າການຮ່ວມມືໃນແຜນແມ່ບົດ ວ່າດ້ວຍການສ້າງຄູ່ຮ່ວມຊະຕາກໍາຈີນ-ລາວ ຂອງພັກກອມມູນິດຈີນ ແລະ ພັກປະຊາຊົນປະຕິວັດລາວ; ໃນວັນທີ 24 ມັງກອນ 2024 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບຄະນະຜູ້ແທນສູນຄົ້ນຄວ້າການຮ່ວມມືຄູ່ຮ່ວມຊະຕາກໍາ ຈີນ-ລາວ, ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ. ຈີນ ທີ່ໄດ້ເດີນທາງມາສືບຕໍ່ວຽກງານຕາມແຜນ; ໂດຍໄດ້ຮັບການຕ້ອນຮັບຈາກ ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ ພ້ອມດ້ວຍຄະນະ; ຝ່າຍຈີນນໍາພາໂດຍ ທ່ານ Li Maoguo, ຮອງເລຂາຄະນະພັກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ ພ້ອມດ້ວຍຄະນະ;

ທ່ານ ປອ. ນ. ຂັນລາສີ ແກ້ວບຸນພັນ ໄດ້ກ່າວສະແດງຄວາມຍິນດີຕ້ອນຮັບຄະນະດັ່ງກ່າວ ທີ່ໄດ້ເດີນທາງມາຢ້ຽມຢາມແລກປ່ຽນບົດຮຽນ ຢູ່ ສປປ ລາວ; ຕາງໜ້າຝ່າຍຈີນກໍ່ສະແດງຄວາມຂອບໃຈ ແລະ ຮູ້ສຶກດີໃຈທີ່ໄດ້ຮັບການຕ້ອນຮັບຢ່າງອົບອຸ່ນຈາກຝ່າຍລາວ; ໃນການພົບປະແລກປ່ຽນທັງສອງ ຝ່າຍໄດ້ປຶກສາຫາລືເຖິງ 4 ບັນຫາສໍາຄັນຄື:

1. ມະຫາວິທະຍາໄລ ແລະ ເສດຖະກິດສາກົນ ສປ ຈີນ ມີຈຸດປະສົງຮ່ວມມື ກັບ ສວສສຊ ເພື່ອສ້າງຕັ້ງສູນຄົ້ນຄວ້າການຮ່ວມມືຄູ່ຮ່ວມຊະຕາກຳ ຈີນ-ລາວ.

2. ການຮ່ວມມືດ້ານການຄົ້ນຄວ້າວິທະຍາສາດ, ດຳເນີນການຄົ້ນຄວ້າກ່ຽວກັບການຮ່ວມມື ຈີນ-ລາວ ໃນຂອບ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ຂຽນບົດຄົ້ນຄວ້າຮ່ວມກັນ ກ່ຽວກັບການພັດທະນະທາງລົດໄຟ ຈີນ-ລາວ, ການອຳນວຍຄວາມສະດວກດ້ານການຄ້າການສົ່ງອອກສິນຄ້າຂອງລາວໄປຈີນ, ການຮ່ວມມືດ້ານກຳລັງການຜະລິດ ແລະ ການຮ່ວມມືດ້ານການລົງທຶນແບບຍືນຍົງ ຈີນ-ລາວ, ການພົວພັນ ຈີນ-ລາວ.

3. ການຮ່ວມມືດ້ານການສຶກສາ, ສະໜັບສະໜູນ ພະນັກງານລັດຖະກອນ ສວສສຊ ເຂົ້າຮຽນຕໍ່ປະລິນຍາໂທ, ປະລິນຍາເອກ ຫຼື ເຂົ້າຮ່ວມໂຄງການຝຶກອົບຮົມ ເພື່ອເປັນການຝຶກອົບຮົມປະກອບສ້າງໃຫ້ແກ່ (ການສ້າງຄູ່ຮ່ວມຊະຕາກຳ ຈີນ-ລາວ).

4. ເພີ່ມທະວີການຢ້ຽມຢາມເຊິ່ງກັນ ແລະ ກັນ ສອງຝ່າຍສົ່ງເສີມນັກຄົ້ນຄວ້າວິທະຍາສາດ ເພື່ອເຂົ້າຮ່ວມກອງປະຊຸມສຳມະນາທາງວິຊາການ ຫຼື ກອງປະຊຸມສາກົນ ເພື່ອເພີ່ມທະວີການແລກປ່ຽນດ້ານວິຊາການ.

ຜ່ານການປຶກສາຫາລືຮ່ວມມືກໍ່ສ້າງສູນຄົ້ນຄວ້າ ການຮ່ວມມືຄູ່ຮ່ວມຊະຕາກໍາຈີນ-ລາວ, ສອງຝ່າຍຈະດໍາເດີນການຮ່ວມມືຢ່າງມີປະສິດທິຜົນ, ເພີ່ມທະວີການກໍ່ສ້າງໜ່ວຍງານຄັງຄວາມຄິດເຫັນຂອງສອງຝ່າຍ, ປະກອບສ່ວນໃຫ້ຄໍາປຶກສາ ແລະ ຄໍາເຫັນ ເຂົ້າໃນການຮ່ວມມືໃນຂົງເຂດສໍາຄັນ, ການເຊື່ອມໂຍງດ້ານນະໂຍບາຍ, ການຮ່ວມມືດ້ານເສດຖະກິດ, ການແລກປ່ຽນດ້ານວັດທະນະທໍາ ແລະ ຂົງເຂດອື່ນໆ ໃນການກໍ່ສ້າງຄູ່ຮ່ວມຊະຕາກໍາຈີນ-ລາວ, ເພື່ອຊຸກຍູ້ການສ້າງປະຊາຄົມຄູ່ຮ່ວມຊະຕາກໍາຈີນ-ລາວ ໃຫ້ປະກົດຜົນເປັນຈິງ.

ຮູບພາບ-ຂ່າວ: ແກ້ວວິວັນ ສີວິໄລ

ເຊື່ອມຊຶມຄຳສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ

ຈໍານວນຜູ້ເຂົ້າຊົມ: 1,498

ເຊື່ອມຊຶມຄຳສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ

ໃນວັນທີ 12 ມັງກອນ 2024 ທີ່ຜ່ານມາ; ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໄດ້ຈັດກອງປະຊຸມເຊື່ອມຊຶມ ຄໍາສັ່ງ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ; ພາຍໃຕ້ການເປັນປະທານຂອງ ສະຫາຍ ປອ. ສອນທະນູ ທໍາມະວົງ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ, ມີບັນດາສະຫາຍຄະນະປະຈໍາພັກ, ບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ ແລະ ສະມາຊິກພັກ ພ້ອມທັງພະນັກງານ-ລັດຖະກອນທົ່ວ ສວສສຊ ເຂົ້າຮ່ວມ.

ຫຼັງຈາກກ່າວເປີດພິທີ ປະທານກອງປຊຸມໄດ້ສືບຕໍ່ຜ່ານຄໍາສັ່ງ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023.

ຈຸດປະສົງລະດັບຄາດໝາຍຂອງການຈັດກອງປະຊຸມ ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນການກໍ່ສ້າງພັກຕາມ 5 ຫຼັກການ ແລະ 3 ທິດນໍາຂອງພັກ, ໃຫ້ຖືກຕ້ອງຕາມກົດລະບຽບຂອງພັກ, ເພື່ອກວດກາ, ຕີລາຄາການຜັນຂະຫຍາຍນໍາພາຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ຖືກຕ້ອງຕາມກົດລະບຽບພັກ, ແຜນພັດທະນາເສດຖະກິດສັງຄົມ 5 ປີ ແຫ່ງລັດຄັ້ງທີ IX ແລະ ເພື່ອຄັດເລືອກບຸກຄະລາກອນ ທີ່ມີມາດຕະຖານ, ເງື່ອນໄຂທີ່ກໍານົດໄວ້ ປະກອບເຂົ້າໃນການຈັດຕັ້ງແຕ່ລະຂັ້ນ, ຍູ້ແຮງການເຄື່ອນໄຫວວຽກງານຮອບດ້ານ ໃນທົ່ວອົງຄະນະພັກ ແລະ ການກະກຽມໃຫ້ແກ່ການດໍາເນີນກອງປະຊຸມໃຫຍ່ຂອງພັກໃນແຕ່ລະຂັ້ນ ເປັນຕົ້ນການກະກຽມດ້ານຂະບວນການ, ດ້ານເນື້ອໃນ ແລະ ດ້ານບຸກຄະລາກອນ.

ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ, ສືບຕໍ່ຜ່ານບົດແນະນໍາ ຂອງຄະນະຈັດຕັ້ງສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ເລກທີ 211/ຄຈສພ, ລົງວັນທີ 16 ສິງຫາ 2023 ແລະ ບົດແນະນໍາຂອງຫ້ອງວ່າການສູນກາງພັກກ່ຽວກັບການກະກຽມຮ່າງລາຍງານການເມືອງ ເລກທີ 05/ຫສພ, ລົງວັນທີ 31 ຕຸລາ 2023; ເຊິ່ງມີເນື້ອໃນແນະນໍາຮັບປະກັນໃຫ້ແກ່ການຈັດຕັ້ງປະຕິບັດເນື້ອໃນຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຖືກຕ້ອງ, ເປັນເອກະພາບ ແລະ ທັນເວລາໃນທົ່ວພັກ, ຄະນະຈັດຕັ້ງສູນກາງພັກ ໃຫ້ກະກຽມດ້ານຂະບວນການ,ເນື້ອໃນ ແລະ ການດໍາເນີນຊີວິດການເມືອງ; ການກະກຽມດ້ານຂະບວນການ ແມ່ນໃຫ້ປະຕິບັດຕາມຄໍາແນະນໍາຂອງຄະນະໂຄສະນາອົບຮົມສູນກາງພັກ; ສ່ວນດ້ານເນື້ອໃນ, ຮ່າງລາຍງານການເມືອງຂອງຄະນະບໍລິຫານງານພັກໃນແຕ່ລະຂັ້ນໃຫ້ປະຕິບັດຕາມຄໍາແນະນໍາຂອງຫ້ອງວ່າການສູນກາງພັກ; ຮ່າງແຜນພັດທະນາເສດຖະກິດສັງຄົມ ໃຫ້ປະຕິບັດຕາມຄໍາແນະນໍາຂອງກະຊວງແຜນການ ແລະ ການລົງທຶນ ແລະ ຮ່າງບົດສໍາຫຼວດການນໍາພາລວມ ແລະ ບຸກຄົນໃນຄະນະບໍລິຫານງານພັກແຕ່ລະຂັ້ນປະຕິບັດຕາມຄໍາແນະນໍາຂອງຄະນະກວດກາສູນກາງພັກ; ສ່ວນບົດແນະນໍາເລກທີ 05/ຫສພ, ມີເນື້ອໃນຈຸດປະສົງ ເພື່ອສ້າງຄວາມຮັບຮູ້ໃຫ້ເປັນອກະພາບຕໍ່ບັນຫາຈໍານວນໜຶ່ງກ່ຽວກັບໂຄງສ້າງ ແລະ ເນື້ອໃນຮ່າງລາຍງານການເມືອງ, ເພື່ອເປັນບ່ອນອີງໃຫ້ຄະນະພັກ, ອະນຸກໍາມະການເນື້ອໃນຄົ້ນຄວ້າ ແລະ ໝູນໃຊ້ເຂົ້າໃນການກະກຽມຮ່າງລາຍງານການເມືອງໃຫ້ມີເນື້ອໃນທີ່ໜັກແໜ້ນ ໃນການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນການຊີ້ນໍາ-ນໍາພາຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກ ຄັ້ງລ່າສຸດ ແລະ ກໍານົດທິດທາງ, ຄາດໝາຍ ແລະ ບັນດາວຽກງານຈຸດສຸມ, ມາດຕະການແກ້ໄຂບັນຫາໃນຊຸມປີຕໍ່ໜ້າ, ສືບຕໍ່ຍູ້ແຮງການຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງອົງຄະນະພັກ.

ໃນວາລະຕອນທ້າຍ ສະຫາຍ ປອ. ສອນທະນູ ທໍາມະວົງ ໄດ້ມີຄໍາເຫັນໂອ້ລົມຕໍ່ກອງປະຊຸມໂດຍເພີ່ນໄດ້ເນັ້ນໜັກເຖິງວຽກງານກະກຽມກອງປະຊຸມ 3 ຂັ້ນຂອງພັກ, ໃຫ້ແຕ່ລະໜ່ວຍພັກອ້ອມຂ້າງ ສວສສຊ ເອົາໃຈໃສ່ເປັນເຈົ້າການຮີບຮ້ອນຈັດຕັ້ງເຊື່ອມຊຶມ, ຜັນຂະຫຍາຍເນື້ອໃນກອງປະຊຸມໃຫຍ່ໃຫ້ແທດເໝາະກັບຈຸດພິເສດ ແລະ ເງື່ອນໄຂຕົວຈິງພາຍໃນຂັ້ນຂອງຕົນ, ໃຫ້ທັນຕາມວັນເວລາທີ່ກໍານົດໃວ້ ແລະ ສະຫຼຸບລາຍງານ, ຖອດຖອນບົດຮຽນພ້ອມຈັດຕັ້ງປະຕິບັດໃຫ້ປະກົດຜົນເປັນຈິງ.

ຂ່າວ: ພວງເພັດ ຈັນທະລີວົງ

ພາບ: ແກ້ວວິວັນ ສີວິໄລ

ສວສສຊ ປະກາດການປັບປຸງສັບຊ້ອນພະນັກງານຂັ້ນນໍາພາ

ສວສສຊ ຈັດຝຶກອົບຮົມວຽກງານພົວພັນຕ່າງປະເທດ

ສະຫະພັນແມ່ຍິງ 6 ອົງການ ອ້ອມຂ້າງຫຼັກ 06 ຈັດຕັ້ງພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 114

ກອງປະຊຸມສະຫຼຸບປີ ແລະ ວຽກງານແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແຜນທິດທາງປີ 2024

ສວສສຊ ຈັດປາຖະກະຖາວັນສ້າງຕັ້ງສະຫະພັນກໍາມະບານລາວ ຄົບຮອບ 68 ປີ

ກອງປະຊຸມເຜີຍແຜ່ກົດໝາຍວ່າດ້ວຍຊັບສິນຂອງລັດ ແລະ ເຜີຍແຜ່ຄຳແນະນຳກ່ຽວກັບການຄຸ້ມຄອງ ແລະ ນຳໃຊ້ລົດບໍລິຫານລັດ

ກອງປະຊຸມເຜີຍແຜ່ວຽກງານເລຂານຸການ ແລະ ຂອດການປະສານງານ ລະຫວ່າງ ການນຳ ກັບ ພາກສ່ວນກ່ຽວຂ້ອງ ພາຍໃນ ສວສສຊ

ສວສສຊ ຕ້ອນຮັບຄະນະຜູ້ແທນຈາກ ມະຫາວິທະຍາໄລທຸລະກິດ ແລະ ເສດຖະສາດສາກົນ ສປ ຈີນ

ເຊື່ອມຊຶມຄຳສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ

ຫົວຂໍ້ທີ່ທ່ານອາດສົນໃຈ