ກອງປະຊຸມເຜີຍແຜ່ກົດໝາຍວ່າດ້ວຍຊັບສິນຂອງລັດ ແລະ ເຜີຍແຜ່ຄຳແນະນຳກ່ຽວກັບການຄຸ້ມຄອງ ແລະ ນຳໃຊ້ລົດບໍລິຫານລັດ
![](https://lases.gov.la/wp-content/uploads/2024/03/Untitled02-768x512.jpeg)
ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈັດກອງປະຊຸມເຜີຍແຜ່ 02 ເອກະສານສໍາຄັນໃນວັນທີ 29 ກຸມພາ 2024; ໂດຍການເປັນປະທານຂອງ ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ, ມີບັນດາຫົວໜ້າ–ຮອງຫົວໜ້າ, ຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ; ກອງປະຊຸມໄດ້ຮັບຟັງການເຜີຍແຜ່ ດໍາລັດວ່າດ້ວຍລົດຂອງລັດ ສະບັບເລກທີ 599/ລບ, ລົງວັນທີ 29 ກັນຍາ 2021 (ບາງມາດຕາ) ແລະ ເຜີຍແຜ່ຄໍາແນະນໍາກ່ຽວກັບການຄຸ້ມຄອງ ແລະ ນໍາໃຊ້ລົດບໍລິຫານລັດ, ສະບັບເລກທີ 0393/ກງ, ລົງວັນທີ 04 ກຸມພາ 2022 ໂດຍການເຜີຍແຜ່ຂອງທ່ານ ສົມບູນ ແກ່ນປະເສີດ, ຫົວໜ້າພະແນກ, ກົມຄຸ້ມຄອງຊັບສິນລັດ, ກະຊວງການເງິນ; ທັງສອງເອກະສານມີເນື້ອໃນແນະນໍາກ່ຽວກັບການຄຸ້ມຄອງນໍາໃຊ້ຊັບສິນຂອງລັດໂດຍລະອຽດຈະແຈ້ງ ກ່ຽວກັບການກໍານົດຫຼັກການ, ລະບຽບການສະເພາະກ່ຽວກັບການຈັດສັນ, ປະກອບ, ຈັດຊື້, ຄຸ້ມຄອງ, ນໍາໃຊ້, ປົກປັກຮັກສາ, ສະສາງ ແລະ ກວດກາລົດບໍລິຫານລັດ.
ທ່ານ ປອ. ນ. ຂັນລາສີ ແກ້ວບຸນພັນ ຮອງປະທານ ສວສສຊ ມີຄໍາເຫັນຕໍ່ກອງປະຊຸມໂດຍທ່ານໄດ້ກ່າວວ່າ: ວຽກງານຄຸ້ມຄອງຊັບສິນລັດ ເປັນວຽກງານໜຶ່ງທີ່ສຳຄັນ, ດັ່ງນັ້ນ, ຄະນະພັກ-ຄະນະນໍາຂອງ ສວສສຊ ຈຶ່ງໄດ້ຄົ້ນຄວ້າ ແລະ ຕົກລົງອະນຸມັດເປີດກອງປະຊຸມເຜີຍແຜ່ຕໍ່ວຽກງານດັ່ງກ່າວ ໂດຍໄດ້ເຊີນເອົານັກວິທະຍາກອນຈາກກະຊວງການເງິນມາຂຶ້ນບັນຍາຍ ເຊິ່ງເປັນບົດຮຽນອັນລໍ້າຄ່າໃຫ້ພະນັກງານ ສວສສຊ ຂອງພວກເຮົາ ແນໃສ່ເປັນບ່ອນອີງໃນການຈັດຕັ້ງປະຕິບັດ ແລະ ໃຫ້ເຂົ້າໃຈຢ່າງເລິກເຊິ່ງ ກ່ຽວກັບການນຳໃຊ້ ແລະ ຄຸ້ມຄອງ ຊັບສິນຂອງລັດ ໃຫ້ມີປະສິດທິຜົນສູງ ແລະ ເປັນເອກະພາບກັນໃນຂອບເຂດທົ່ວປະເທດ.
![](https://lases.gov.la/wp-content/uploads/2024/03/Untitled-768x512.jpeg)
ຂ່າວ: ພວງເພັດ ຈັນທະລີວົງ
ພາບ: ມຸນິນ ພົນສັກດາ