ຂ່າວການເຄື່ອນໄຫວ – ໜ້າ 14 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

WhatsApp Image 2024-06-18 at 11.28.55_8b348c32

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຄື່ອນໄຫວວຽກງານຢູ່ເມືອງຄຳເກີດ ແຂວງບໍລິຄຳໄຊ

ຈໍານວນຜູ້ເຂົ້າຊົມ: 713

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຄື່ອນໄຫວວຽກງານຢູ່ເມືອງຄຳເກີດ ແຂວງບໍລິຄຳໄຊ

ໃນວັນທີ 13 ມິຖຸນາ 2024, ທ່ານ ປອ ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ພ້ອມດ້ວຍຫົວໜ້າຫ້ອງການ, ຫົວໜ້າກົມຈັດຕັ້ງ, ຫົວໜ້າສະຖາບັນຄົ້ນຄ້ວານະໂຍບາຍເສດຖະກິດ-ສັງຄົມ ແລະ ວິຊາການຈຳນວນໜຶ່ງຂອງ ສວສສຊ; ໄດ້ລົງເຄື່ອນໄຫວວຽກງານທີ່ເມືອງຄຳເກີດ, ແຂວງບໍລິຄຳໄຊ; ຈຸດປະສົງຂອງການໄປເຮັດວຽກໃນຄັ້ງນີ້ ແມ່ນເພື່ອເປັນການເກັບກຳຂໍ້ມູນ ແລະ ກໍ່ເພື່ອເຮັດໃຫ້ກຳໄດ້ສະພາບຄວາມເປັນຈິງຂອງການພັດທະນາ ໂດຍສະເພາະແມ່ນຂໍ້ສະດວກ ແລະ ຂໍ້ຫຍຸ້ງຍາກ ຢູ່ເມືອງຄຳເກີດ.

ໃນໂອກາດນີ້; ທ່ານ ເພັດສະໄໝ ໄຊຍະທິຈັກ, ກຳມະການພັກແຂວງ, ເລຂາພັກເມືອງ-ເຈົ້າເມືອງເມືອງຄຳເກີດ ໄດ້ຕາງໜ້າໃຫ້ເແກ່ຄະນະພັກ-ຄະນະນຳຂອງເມືອງ ລາຍງານຫຍໍ້ກ່ຽວກັບສະພາບການພັດທະນາຢູ່ເມືອງຄຳເກີດ ເຊິ່ງມີບາງດ້ານທີ່ພົ້ນເດັ່ນຄື: ເມືອງຄໍາເກີດຕັ້ງຢູ່ທິດຕາເວັນ ອອກສ່ຽງໃຕ້ຂອງແຂວງບໍລິຄໍາໄຊ, ຫ່າງຈາກເທດສະບານແຂວງປະມານ 185 ກິໂລແມັດ, ມີເນື້ອທີ່ຄຸ້ມຄອງທັງໝົດ 2.510 ກິໂລຕາແມັດ, ເປັນເຂດພູດອຍກວມ 2/3 ຂອງເນື້ອທີ່ທັງໝົດ, ມີຊາຍແດນຕິດກັບເມືອງພາຍໃນແຂວງມີເມືອງວຽງທອງ, ເມືອງໄຊຈໍາພອນ ແລະ ຕ່າງແຂວງຕິດກັບເມືອງຄູນຄໍາ, ເມືອງນາກາຍ ແຂວງຄໍາມ່ວນ ແລະ ຕ່າງປະເທດຕິດກັບເມືອງເຮືອງເຊີນ, ເມືອງວູ່ກວາງ ນະຄອນຮ່າຕີ່ງ ສສ. ຫວຽດນາມ, ປະກອບມີ 62 ບ້ານ, ມີ 8 ເຂດ, ມີ 12.817 ຄອບຄົວ ມີພົນລະເມືອງ 77.599 ຄົນ, ຍິງ 37.626 ຄົນ. ໃນນັ້ນ, ເຜົ່າລາວ ກວມ 28,83%, ເຜົ່າມົ້ງ ກວມ 27,97%, ເຜົ່າໄຕ ກວມ 35,2%, ເຜົ່າຜູ້ໄທ ກວມ 12,9%, ເຜົ່າກຶມມຸ ກວມ 2,2%, ເຜົ່າແຊກ ກວມ 1,24% ແລະ ເຜົ່າອື່ນໆ ກວມ 0,76%; ມີບ້ານພັດທະນາ 45 ບ້ານ ກວມ 72,58% ຂອງບ້ານທັງໝົດ, ຄອບຄົວພັດທະນາ ຈໍານວນ 10.361 ຄອບຄົວ, ກວມເອົາ 77,92%, ມີຄອບຄົວພົ້ນທຸກ ກວມ 96,28% ຂອງຈໍານວນຄອບຄົວທັງໝົດ, ຍັງເຫຼືອຄອບຄົວທຸກຍາກ 469 ຄອບຄົວ ແລະ ຄອບຄົວອານາຖາ 9 ຄອບຄົວ; ທົ່ວເມືອງປະກອບມີ 27 ຫ້ອງການ, ມີ 5 ທະນາຄານ, ຫົວໜ່ວຍທຸລະກິດພາຍໃນເມືອງມີ 1.009 ຫົວໜ່ວຍ, ມີກໍາລັງຂັ້ນສູນກາງປະຈໍາຢູ່ເມືອງ 4 ກົມກອງ: ສາງນໍ້າມັນເຊື້ອໄຟເລກ 7, ທະຫານຊ່າງແສງ ຖໍ້າກວນຈັນ, ກອງພັນຂົນສົ່ງ 402, ບໍລິສັດລັດພັດທະນາຊົນນະບົດ; ກໍາລັງຂັ້ນແຂວງ 2 ກົມກອງ: ກອງຮ້ອຍເອກະລາດ 25, ກອງຮ້ອຍທະຫານຊາຍແດນ 253; ມີດ່ານຊາຍດ່ານສາກົນນໍ້າພາວ, ດ່ານສັ່ງນໍ້າໜັກຫຼັກ10, ດ່ານກວດກາປ່າໄມ້ ຂັ້ນແຂວງ, ມີດ່ານກວດກາສະກັດກັ້ນການເຄື່ອນໄຫວທໍາລາຍປ່າໄມ້ ໃນຂອບເຂດອຸທິຍານແຫ່ງຊາດນາກາຍ-ນໍ້າເທີນ 2 ຈຸດ, ປ້ອມຍາມ ປກສ 2 ຈຸດ; ມີລະບົບໄຟຟ້າ, ນໍ້າປະປາ, ນໍ້າລິນ, ລະບົບໂທລະຄົມ-ມະນາຄົມ, ການສື່ສານ ແລະ ເສັ້ນທາງຫຼວງ 8A, 1 E ຜ່ານໃຈກາງເມືອງ ເຮັດໃຫ້ການໄປ-ມາເຊື່ອມຈອດກັບຕ່າງປະເທດ, ຕ່າງແຂວງ ແມ່ນສະດວກດີສົມຄວນ, ຊັບພະຍາກອນ ທໍາມະຊາດ, ປ່າໄມ້, ແຫຼ່ງນໍ້າ, ບໍ່ແຮ່ ຍັງອຸດົມສົມບູນ ປະຊາຊົນບັນດາເຜົ່າມີມູນເຊື້ອດຸໝັ່ນຂະຫຍັນພຽນອອກແຮງງານເຮັດການຜະລິດ; ຄະນະພັກ-ອົງການປົກຄອງທຸກຂັ້ນ, ສະມາຊິກພັກ, ພະນັກງານ-ລັດຖະກອນ ຕະຫຼອດຮອດປະຊາຊົນບັນດາເຜົ່າໄດ້ມີຄວາມສາມັກຄີເປັນຈິດໜຶ່ງໃຈດຽວເຊື້ອໝັ້ນຕໍ່ແນວທາງ ແລະ ການນໍາພາຂອງພັກ, ເປັນເອກະພາບກັນ ສູ້ຊົນບຸກບືນຜ່ານຜ່າອຸປະສັກຕ່າງໆ, ຫັນລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ເພື່ອນໍາເອົາແຜນນະໂຍບາຍຂອງພັກ, ກົດໝາຍ ແລະ ລະບຽບການຕ່າງໆຂອງລັດ ລົງສູ່ຮາກຖານບ້ານ ເຮັດໃຫ້ສະ ພາບລວມທົ່ວເມືອງມີຄວາມສະຫງົບ-ເປັນລະບຽບຮຽບຮ້ອຍດີ.

ພ້ອມດຽວກັນນັ້ນ, ທ່ານເຈົ້າເມືອງຄຳເກີດກໍ່ໄດ້ລາຍງານສະພາບຄວາມຫຍຸ້ງຍາກຈຳນວນໜຶ່ງ ເປັນຕົ້ນແມ່ນ: ດ້ານເສດຖະກິດ ເຖິງຈະມີການຂະຫຍາຍຕົວ ແຕ່ກໍ່ຍັງໄດ້ຮັບຜົນກະທົບຈາກສະພາບລວມທາງດ້ານເສດຖະກິດໃນທົ່ວໂລກ ການຜັນຜວນຂອງອັດຕາແລກປ່ຽນ, ບັນຫາລາຄາສິນຄ້າແພງ, ເຊິ່ງກະທົບຕໍ່ຊີວິດການເປັນຢູ່ຂອງປະຊາຊົນຢ່າງໜັກໜ່ວງ, ບັນຫາຂີ້ລັກງັດແງະ, ບັນຫາຢາເສບຕິດສິ່ງມືນເມົາໃນຮູບແບບໃໝ່ເປັນຕົ້ນ: ນ້ຳກະທ່ອມ, ຄໍລາເຈັ່ນ ແລະ ອື່ນໆ ເຊິ່ງກາຍເປັນບັນຫາເລັ່ງດ່ວນທີ່ຈະໄດ້ເອົາໃຈໃສ່ແກ້ໄຂໃຫ້ທັນການ.

ເຊິ່ງທັງໝົດເຫຼົ່ານັ້ນ, ໄດ້ກາຍເປັນຂໍ້ມູນທີ່ສໍາຄັນໃນການຮັບໃຊ້ການຄົ້ນຄ້ວາວິທະຍາສາດ ແລະ ທ່ານປະທານ ສວສສຊ ຍັງໄດ້ໃຫ້ຄຳຄິດຄຳເຫັນ ຕໍ່ການພັດທະນາເສດຖະກິດ-ສັງຄົມຮອບດ້ານຢູ່ເມືອງຕື່ມອີກ.

ຂຽນຂ່າວ ແລະ ພາບຖ່າຍ: ເມກດາລິນ ສີແສງຈັນ

WhatsApp Image 2024-06-17 at 13.41.34_96517bc8

ຮອງປະທານ ສວສສຊ ລົງເຄື່ອນໄຫວວຽກງານທີ່ ແຂວງຈຳປາສັກ

ຈໍານວນຜູ້ເຂົ້າຊົມ: 798

ຮອງປະທານ ສວສສຊ ລົງເຄື່ອນໄຫວວຽກງານທີ່ ແຂວງຈຳປາສັກ

ໃນລະຫວ່າງວັນທີ 11 -12 ມິຖຸນາ 2024 ທີ່ຜ່ານມາ ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ລົງເຄື່ອນໄຫວເຮັດວຽກຢູ່ແຂວງຈຳປາສັກ ໂດຍໃຫ້ກຽດຕ້ອນຮັບຈາກ ທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຈຳປາສັກ ທີ່ຫ້ອງວ່າການແຂວງ. ໃນໂອກາດນີ້ ທ່ານ ອາລຸນໄຊ ສູນນະລາດ ໄດ້ກ່າວສະແດງຄວາມຍິນດີຕ້ອນຮັບຕໍ່ການມາເຮັດວຽກຂອງ ສວສສຊ ພ້ອມທັງແຈ້ງສະພາບຈຸດພິເສດວຽກງານວັດທະນາທຳ-ສັງຄົມຂອງແຂວງໂດຍຫຍໍ້ ເພື່ອໃຫ້ ສວສສຊ ຊ່ວຍຄົ້ນຄວ້າໃນຕໍ່ໜ້າ. ພ້ອມດຽວກັນນີ້ ທ່ານ ປອ. ນາງ ຂັນລາສີ ແກ້ວບຸນພັນ ໄດ້ສະແດງຂອບໃຈຕໍ່ທ່ານເຈົ້າແຂວງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໄດ້ມອບປື້ມຈໍານວນໜຶ່ງ ທີ່ເປັນຜົນງານການຄົ້ນຄ້ວາຂອງ ສວສສຊ ໃຫ້ກັບທ່ານເຈົ້າແຂວງ. ຈຸດປະສົງຂອງການລົງເຄື່ອນໄຫວວຽກງານໃນຄັ້ງນີ້ ເພື່ອຈັດກອງປະຊຸມເຜີຍແຜ່ຜົນຂອງການຄົ້ນຄວ້າວິທະຍາສາດຂອງ ສວສສຊ ແລະ ຜົນການສຶກສາຄຸນລັກສະນະສະເພາະຜ້າໄໝສະຜ່າຍ ເພື່ອກຽມຈົດທະບຽນຖິ່ນກຳເນີດທີ່ແຂວງຈໍາປາສັກ.

ກອງປະຊຸມເຜີຍແຜ່ຜົນຂອງການຄົ້ນຄວ້າວິທະຍາສາດ ໄດ້ຈັດຂຶ້ນທີ່ຫ້ອງປະຊຸມມະຫາວິທະຍາໄລຈໍາປາສັກ ໃນວັນທີ 11 ມິຖຸນາ 2024 ພາຍໃຕ້ການເປັນປະທານຂອງທ່ານ ອາລຸນໄຊ ສູນນະລາດ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆ ຈຳປາສັກ, ມີບັນດາທ່ານຄະນະບໍດີ, ຮອງຄະນະບໍດີ, ບັນດາຫົວໜ້າ, ຮອງຫົວໜ້າ ແລະ ຜູ້ຕາງໜ້າຈາກຫ້ອງການ, ພະແນກອ້ອມຂ້າງແຂວງຈຳປາສັກ, ຄູອາຈານ, ນັກສຶກສາ ມະຫາວິທະຍາໄລຈໍາປາສັກ ແລະ ຄະນະຈາກສູນກາງເຂົ້າຮ່ວມຫຼາຍກວ່າ 70 ທ່ານ. ກອງປະຊຸມໄດ້ຮັບຟັງການລາຍງານຫຍໍ້ສະພາບລວມ ກ່ຽວກັບແຜນພັດທະນາເສດຖະ ກິດ-ສັງຄົມຂອງແຂວງ ທີ່ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໂດຍສັງເຂບ ແລະ ລາຍງານຫຍໍ້ກ່ຽວກັບຜົນການຄົ້ນຄວ້າວິທະຍາສາດຂອງມະຫາວິທະຍາໄລຈຳປາສັກ, ດຳລັດວ່າດ້ວຍການຈັດ ຕັ້ງ ແລະ ການເຄື່ອນໄຫວຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະບັບເລກທີ 559/ນຍ, ລົງວັນທີ 07 ກັນຍາ 2021 ແລະ ຜົນການຄົ້ນຄວ້າຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນ ຕົ້ນການນໍາສະເໜີຜົນການຄົ້ນຄວ້າວິທະຍາສາດທາງດ້ານການເມືອງວິທະຍາ, ວັດທະນາທຳ, ປະຫວັດສາດ-ບູຮານວິທະຍາ ແລະ ນໍາສະເໜີກ່ຽວກັບການນຳໃຊ້ຊັບສິນທາງປັນຍາຕໍ່ກັບຜົນການຄົ້ນຄວ້າວິທະຍາສາດ, ເສດຖະກິດ, ສັງຄົມ ແລະ ເຕັກໂນໂລຊີ ເພື່ອເປັນການຊຸກຍູ້, ສົ່ງເສີມ, ສ້າງຄວາມເຂົ້າໃຈໃຫ້ແກ່ບັນດານັກຄົ້ນຄວ້າ, ການປະດິດສ້າງ ແລະ ປະດິດແຕ່ງຂອງຄົນລາວ ທີ່ມີຫົວຄິດອັນລ້ຳເລີດ ແລະ ການປົກປ້ອງສິດຊັບສິນທາງປັນຍາ ໃຫ້ມີຄວາມເຂົ້າໃຈເລິກເຊິ່ງຕໍ່ກັບບັນຫາດັ່ງກ່າວ ເປົ້າໝາຍອັນໜຶ່ງອັນດຽວກໍເພື່ອສ້າງສາ ແລະ ພັດທະນາປະເທດຊາດ ຕາມທິດສີຂຽວ ແລະ ຍືນຍົງ. ພ້ອມນັ້ນ, ສວສສຊ ແລະ ມະຫາວິທະຍາໄລຈຳປາສັກ ຍັງໄດ້ມີການແລກປ່ຽນຄຳຄິດຄໍາເຫັນຢ່າງສ້າງສັນ ໂດຍສະເໜີຫົວຂໍ້ຄົ້ນຄວ້າວິທະຍາສາດຮ່ວມກັນໃນຕໍ່ໜ້າ ແລະ ຍັງໄດ້ມອບຜົນງານການຄົ້ນຄວ້າ, ວາລະສານວິທະຍາສາດເສດຖະກິດ ແລະ ສັງຄົມ ໃຫ້ກັບຄະນະນຳແຂວງ ແລະ ຫໍສະໝຸດມະຫາວິທະຍາ ໄລຈຳປາສັກ ລວມທັງໝົດ 120 ເຫຼັ້ມ.

ໃນຕອນເຊົ້າວັນທີ 12 ມິຖຸນາ 2024 ທີ່ຫ້ອງວ່າການແຂວງ ໄດ້ຈັດກອງປະຊຸມເຜີຍແຜ່ໂຄງການສຶກສາຄຸນລັກ ສະນະສະເພາະຜ້າໄໝສະຜ່າຍແຂວງຈຳປາສັກ ເພື່ອກະກຽມຈົດທະບຽນຖິ່ນກຳເນີດ ໂດຍການເປັນປະທານຮ່ວມຂອງທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານ ສວສສຊ ແລະ ທ່ານ ໂສມ ບຸດຕະກູນ, ຄະນະປະຈໍາພັກແຂວງ, ຮອງເຈົ້າແຂວງ ຜູ້ຊີ້ນໍາວຽກງານວັດທະນາທຳ-ສັງຄົມ ແລະ ການປົກຄອງ, ມີບັນດາພະແນກ, ບັນດາເຈົ້າ ເມືອງ, ບັນດາກຸ່ມສະຫະກອນ ແລະ ຫົວໜ່ວຍຫັດຖະກຳຜ້າໄໝ ອ້ອມຂ້າງແຂວງຈຳປາສັກ ຫຼາຍກວ່າ 70 ທ່ານ. ກອງປະຊຸມໄດ້ຮັບຟັງການລາຍງານຫຍໍ້ກ່ຽວກັບຂັ້ນຕອນການກະກຽມຈົດທະບຽນຖິ່ນກຳເນີດຜ້າໄໝສະຜ່າຍ ແລະ ກໍານົດຊື່, ຂອບເຂດພູມສັນຖານ, ສິນຄ້າຖິ່ນກຳເນີດ ແລະ ສ້າງຕັ້ງຄະນະຂົນຂວາຍສະມາຄົມຖິ່ນກຳເນີດ. ເປີດກວ້າງໃຫ້ຜູ້ເຂົ້າຮ່ວມໄດ້ມີຄວາມເຂົ້າໃຈຫຼາຍຂຶ້ນກ່ຽວກັບວຽກງານຖິ່ນກໍາເນີດ ເພື່ອເປັນບາດກ້າວເລີ່ມຕົ້ນໃນການກະກຽມຄວາມ ພ້ອມ ໃຫ້ແກ່ການຈົດທະບຽນຖິ່ນກຳເນີດຜ້າໄໝສະຜ່າຍແຂວງຈໍາປາສັກ. ພ້ອມນັ້ນ ຍັງເປັນເວທີສຳຄັນໃນການຄົ້ນຄວ້າ ແລະ ແລກປ່ຽນບົດຮຽນ-ປະສົບການກ່ຽວກັບວຽກງານຖິ່ນກຳເນີດ ເພື່ອປົກປ້ອງຊື່ສຽງ ແລະ ເອກະລັກສະເພາະຂອງຜ້າໄໝ ທີ່ເປັນໜຶ່ງດຽວໃນໂລກ ມີປະຫວັດຄວາມເປັນມາທີ່ຍາວນານ, ມີຄວາມຕິດພັນກັບວັດທະນະທໍາ ແລະ ວິຖີການດໍາລົງຊີວິດຂອງຊາວຈຳປາສັກ ທີ່ມີມາໄດ້ຫຼາຍສະຕະວັດແລ້ວ ເຊິ່ງພວກເຮົາສາມາດເວົ້າໄດ້ວ່າ: ເປັນການປົກປັກຮັກສາ ແລະ ປົກປ້ອງພູມປັນຍາທ້ອງຖິ່ນ ທີ່ເປັນມໍລະດົກທາງວັດທະນະທໍາສືບທອດຈາກບັນພະບູລຸດສູ່ຄົນລຸ້ນປະຈຸບັນ. ການຈົດທະບຽນຖິ່ນກໍາເນີດຜ້າໄໝສະຜ່າຍແຂວງຈຳປາສັກ ຈະເປັນການຊ່ວຍໃຫ້ມີການອະນຸລັກຮັກສາເອກະລັກສະເພາະຂອງຜ້າໄໝສະຜ່າຍໄວ້ຢ່າງຍືນຍົງ ເພາະພາຍໃຕ້ລະບົບຖິ່ນກໍາເນີດ ຈະມີການກວດກາທຸກຂັ້ນຕອນການຜະລິດ ເພື່ອຮັບປະກັນໃຫ້ຖືກຕ້ອງຕາມຂັ້ນຕອນການຜະລິດແບບດັ້ງເດີມ ທີ່ເປັນປັດໄຈພາໃຫ້ຜ້າໄໝສະຜ່າຍ ມີເອກະລັກສະເພາະໃນຕົວ.

ໃນໂອກາດນີ້ ທ່ານ ປອ. ນາງ ຂັນລາສີ ແກ້ວບຸນພັນ ໄດ້ຮຽກຮ້ອງໃຫ້ບັນດາທ່ານ ທີ່ເຂົ້າຮ່ວມໃນກອງປະຊຸມຄັ້ງນີ້ ຈົ່ງພ້ອມໃຈກັນຄົ້ນຄວ້າ ແລະ ແລກປ່ຽນຢ່າງກົງໄປກົງມາກ່ຽວກັບວຽກງານຖິ່ນກໍາເນີດ ເພື່ອສ້າງເງື່ອນໄຂໃຫ້ຜ້າໄໝແຂວງຈຳປາສັກຂອງພວກເຮົາ ສາມາດຈົດທະບຽນຖິ່ນກໍາເນີດ ແລະ ໄດ້ຮັບການປັກປ້ອງຕາມກົດໝາຍວ່າດ້ວຍຊັບສິນທາງປັນຍາ ເພື່ອສ້າງມູນຄ່າເພີ່ມໃຫ້ກັບສິນຄ້າລາວ ນໍາລາຍໄດ້ເຂົ້າສູ່ປະເທດ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ

ຈໍານວນຜູ້ເຂົ້າຊົມ: 733

ສວສສຊ ຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ

ເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນທີ່ໝູນວຽນຄົບຮອບມາອີກວາລະໜຶ່ງ; ໃນວັນທີ 07 ມິຖຸນາ 2024, ທີ່ຜ່ານມານີ້, ສວສສຊ ໄດ້ສ້າງຂະບວນການຈັດກິດຈະກຳປູກຕົ້ນໄມ້ ອ້ອມຂ້າງອາຄານສໍານັກງານຫ້ອງການຂອງ ສວສສຊ ເຊິ່ງໃນພິທີດັ່ງກ່າວ ໄດ້ຮັບກຽດກ່າວເປີດພິທີໂດຍ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສວສສຊ; ພ້ອມດ້ວຍຄະນະພັກ-ຄະນະນໍາ, ບັນດາຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນ ຕະຫຼອດເຖິງພະນັກງານທົ່ວ ສວສສຊ ເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ປອ. ກອງແກ້ວ ໄຊສົງຄາມ ໄດ້ກ່າວເຖິງຄວາມສຳຄັນຂອງວັນປູກຕົ້ນໄມ້ວ່າ: ພາຍຫຼັງ ສປປ ລາວ ໄດ້ຮັບການສະຖາປະນາເອກະລາດ, ໃນວັນທີ 9 ເດືອນ ກຸມພາ ປີ 1980 ປະທານ ໄກສອນ ພົມວິຫານ ໄດ້ອອກມະຕິຕົກລົງ ສະບັບເລກທີ 48/ສພລຖ ວ່າດ້ວຍການກຳນົດເອົາວັນທີ 01 ມິຖຸນາ ເຊິ່ງກົງກັບວັນເດັກນ້ອຍສາກົນ ເປັນວັນປູກຕົ້ນໄມ້ແຫ່ງຊາດຂອງ ສປປ ລາວ; ເປົ້າໝາຍການກໍານົດເອົາວັນດັ່ງກ່າວ ເປັນວັນປູກຕົ້ນໄມ້ແຫ່ງຊາດ ແມ່ນແນໃສ່ປູກຈິດສຳນຶກໃຫ້ແກ່ອະນຸຊົນ ແລະ ເຍົາວະຊົນຂອງຊາດ ກໍຄືລູກຫຼານຜູ້ເກີດໃໝ່ໃຫຍ່ລຸນ ໃຫ້ມີສະຕິຕື່ນຕົວຮັກ ແລະ ຫວງແຫນປ່າໄມ້ ແລະ ຊັບພະຍາກອນປ່າໄມ້; ປຸກລະດົມຂົນຂວາຍໃຫ້ທົ່ວປວງຊົນເຂົ້າຮ່ວມໃນການຄຸ້ມຄອງ, ປົກປັກຮັກສາ ແລະ ພັດທະນາປ່າໄມ້ ແນໃສ່ເຮັດໃຫ້ປ່າໄມ້ມີຄວາມອຸດົມສົມບູນ, ກາຍເປັນທ່າແຮງ ແລະ ເປັນອົງປະກອບທີ່ສໍາຄັນຢູ່ໃນໂຄງປະກອບເສດຖະກິດແຫ່ງຊາດ. ພ້ອມກັນນີ້ ໃນເດືອນມິ ຖຸນາ ຍັງມີວັນສຳຄັນຕ່າງໆ ເຊັ່ນ: ວັນສິ່ງແວດລ້ອມແຫ່ງຊາດ ແລະ ວັນສິ່ງແວດລ້ອມໂລກ ວັນທີ 05 ມິຖຸນາ, ວັນຄ້າຍວັນເກີດ ປະທານ ສຸພານຸວົງ ວັນທີ 13 ກໍລະກົດ ຄົບຮອບ 115 ປີ ແລະ ວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ, ວັນສ້າງຕັ້ງສະຫະພັນແມ່ຍິງລາວ ວັນທີ 20 ກໍລະກົດ ຄົບຮອບ 69 ປີ.

ປ່າໄມ້ ແລະ ຊັບພະຍາກອນປ່າໄມ້ ແມ່ນມີຄວາມໝາຍຄວາມສໍາຄັນຫຼາຍຕໍ່ກັບການພັດທະນາເສດຖະກິດ-ສັງຄົມຂອງຊາດ, ການປົກປັກຮັກສາສິ່ງແວດລ້ອມ ກໍ່ຄືການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ. ໃນວາລະຕອນທ້າຍ, ທ່ານຍັງໄດ້ຮຽກຮ້ອງໃຫ້ພະນັກງານລັດຖະກອນທົ່ວ ສວສສຊ ຈົ່ງເອົາ ໃຈໃສ່ປົກປັກຮັກສາ ແລະ ຖະໜອມບໍາລຸງຕົ້ນໄມ້ທີ່ໄດ້ປູກໃນມື້ນີ້ ກໍ່ຄືການປົກປັກຮັກສາຊັບພະຍາກອນປ່າໄມ້ ອັນເປັນມໍລະດົກຂອງຊາດໃຫ້ນັບມື້ນັບສົມບູນຂຶ້ນ, ປະກອບສ່ວນສໍາຄັນໃນການພັດທະນາເສດຖະກິດຂອງຊາດ ແລະ ສ້າງສິ່ງແວດລ້ອມ, ສ້າງອາກາດບໍລິສຸດໃຫ້ແກ່ມວນມະນຸດ. ຫຼັງຈາກນັ້ນກໍ່ໄດ້ຮ່ວມປູກຕົ້ນໄມ້, ໃສ່ຝຸ່ນ, ຫົດນໍ້າ ກັບແຕ່ລະພາກສ່ວນຢ່າງເປັນຂະບວນຟົດຟື້ນ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ ຕ້ອນຮັບການເຂົ້າພົບປະ ແລະ ເຮັດວຽກ ຂອງ ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມລາວ

ຈໍານວນຜູ້ເຂົ້າຊົມ: 778

ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ ຕ້ອນຮັບການເຂົ້າພົບປະ ແລະ ເຮັດວຽກ ຂອງ ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມລາວ

ຕອນເຊົ້າຂອງວັນທີ 4 ມິຖຸນາ 2024, ທີ່ຫ້ອງຮັບແຂກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສຫ. ປອ. ກິແກ້ວ ຈັນທະບູຣີ ຮອງເລຂາຄະນະບໍລິຫານງານພັກ, ຮອງປະທານ ສວສສຊ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ ພ້ອມທັງ ສຫ. ນ. ກຽງຄໍາ ກັນຫາວົງ, ກໍາມະການສູນກາງຊາວໜຸ່ມລາວ, ເລຂາຄະນະບໍລິຫານງານຊາວໜຸ່ມ ສວສສຊ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະ ແລະ ເຮັດວຽກຂອງ ສຫ. ມອນໄຊ ລາວມົວຊົ່ງ, ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາ ຊົນປະຕິວັດລາວ ພ້ອມດ້ວຍຄະນະກົມພາຍໃນສູນກາງຊາວໜຸມ.

ການເຄື່ອນໄຫວ ແລະ ເຮັດວຽກໃນຄັ້ງນີ້ ສຫ. ມອນໄຊ ລາວມົວຊົ່ງ ໄດ້ລາຍງານສະພາບການຈັດຕັ້ງປະຕິບັດວຽກງານຊາວໜຸ່ມຢູ່ແຕ່ລະຂັ້ນ ນັບແຕ່ຂັ້ນທ້ອງຖິ່ນຫາສູນກາງ ແລະ ຖືໂອກາດອັນສໍາຄັນນີ້ ປຶກສາຫາລືເຖິງວິທີແກ້ໄຂປະກົດການຫຍໍ້ທໍ້ຂອງຊາວໜຸ່ມໃນສັງຄົມລາວ; ພ້ອມດຽວກັນນັ້ນ, ກໍ່ຂໍຝາກເຖິງຄະນະພັກ-ຄະນະນໍາ ສວສສຊ ເອົາໃຈໃສ່ຊຸກຍູ້ສົ່ງເສີມຕໍາແໜ່ງ, ໜ້າທີ່, ວຽກງານຂອງຄະນະບໍລິຫານງານຊາວໜຸ່ມ ເພື່ອອໍານວຍຄວາມສະດວກໃຫ້ຄະນະຊາວໜຸ່ມ ສວສສຊ ໄດ້ມີບົດບາດ, ພ້ອມທັງມີໂອກາດເຂົ້າຮ່ວມປຶກສາຫາລືວຽກງານທີ່ສໍາຄັນຕ່າງໆ ຂອງຊາວໜຸ່ມ ໃນກອງປະຊຸມຂອງຄະນະພັກ-ຄະນະນໍາ ສວສສຊ ອີກດ້ວຍ.

ຫຼັງຈາກນັ້ນ ສຫ. ມອນໄຊ ລາວມົວຊົ່ງ ໄດ້ສືບຕໍ່ເຂົ້າຮ່ວມເປັນປະທານກອງປະຊຸມ, ປຶກສາຫາລືກັບຄະນະບໍລິຫານງານຊາວໜຸ່ມ ສວສສຊ; ໂດຍ ສຫ. ນ. ກຽງຄໍາ ກັນຫາວົງ ເລຂາຄະນະບໍລິຫານງານຊາວໜຸ່ມ ໄດ້ລາຍງານສະພາບຈຸດພິເສດ, ການເຄື່ອນໄຫວວຽກງານຂະບວນການ, ວຽກງານວິຊາສະເພາະ ແລະ ຜົນງານຕ່າງໆ ທີ່ຊາວໜຸ່ມ ສວສສຊ ຍາດມາໄດ້ໃນໄລຍະຜ່ານ; ໃນໂອກາດດັ່ງກ່າວ ສຫ. ມອນໄຊ ລາວມົວຊົ່ງ ໄດ້ຊີ້ນໍາ, ຊຸກຍູ້ການກະກຽມຈັດຕັ້ງກອງປະຊຸມໃຫຍ່ຂອງຄະນະຊາວໜຸ່ມ ສວສສຊ ໂດຍທ່ານໄດ້ເນັ້ນໃຫ້ພ້ອມກັນເອົາໃຈໃສ່ກະກຽມຄວາມພ້ອມໃນການເປີດກອງປະຊຸມໃຫຍແຕ່ລະຂັ້ນຂອງຕົນ ໂດຍສະເພາະວຽກງານຂະບວນການທີ່ຕິດພັນກັບຄາດໝາຍສູ້ຊົນໃນຕໍ່ໜ້າ ແລະ ຂະບວນການປີ່ນອ້ອມ ເພື່ອຮັບປະກັນດ້ານເນື້ອໃນໃຫ້ຖືກຕ້ອງ, ຊັດເຈນ, ຄົບຖ້ວນ, ສົມບູນ; ໃນນັ້ນ, ໃຫ້ຮີບຮ້ອນໃນການຈັດແບ່ງໜ້າທີ່ຄວາມຮັບຜິດຊອບແຕ່ລະວຽກງານຂອງກອງປະຊຸມໃຫ້ເໝາະສົມ; ຖືສໍາຄັນວຽກງານບຸກຄະລາກອນ ທີ່ກໍ່ສ້າງມາຈາກຜົນງານຕົວຈິງ ແລະ ເປັນຜູ້ທີ່ມີຄຸນສົມບັດສິນທໍາປະຕິວັດ, ທັງໝົດນີ້ກໍ່ເພື່ອເປັນການກະກຽມກອງປະຊຸມໃຫຍ່ໃຫ້ບັນລຸໄປຕາມຈຸດປະສົງ ແລະ ເປົ້າໝາຍທີ່ວາງໃວ້.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

WhatsApp Image 2024-05-22 at 14.00.33_b0051ef0

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຕ້ອນຮັບເອກອັກຄະລັດຖະທູດແຫ່ງ ສາທາລະນະລັດເບລາຣຸດ ປະຈໍາ ສປປ ລາວ

ຈໍານວນຜູ້ເຂົ້າຊົມ: 965

ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຕ້ອນຮັບເອກອັກຄະລັດຖະທູດແຫ່ງ ສາທາລະນະລັດເບລາຣຸດ ປະຈໍາ ສປປ ລາວ

ໃນຕອນບ່າຍຂອງວັນທີ 20 ພຶດສະພາ 2024 ທີ່ຜ່ານມານີ້ ທີ່ຫ້ອງຮັບແຂກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບການມາຢ້ຽມຢາມ ແລະ ພົບປະຂອງທ່ານ ອຸລັສຊີເມ ບາຣາວິໂຄ (Uladzimir Baravukou) ເອກອັກຄະລັດຖະທູດແຫ່ງສາທາລະນະລັດເບລາຣຸດ ປະຈໍາ ສປປ ລາວ.

ໃນໂອກາດດັ່ງກ່າວ, ທ່ານ ປອ. ກອງແກ້ວ ໄຊສົງຄາມ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການພົບປະຢ້ຽມຢາມໃນຄັ້ງນີ້, ເປັນການປະກອບສ່ວນຮັດແໜ້ນສາຍພົວພັນທີ່ເປັນມູນເຊື້ອອັນດີ ງາມມາແຕ່ດົນນານລະຫວ່າງສອງປະເທດລາວ-ເບລາລຸດ. ພ້ອມດຽວກັນນັ້ນ, ທ່ານຍັງໄດ້ກ່າວເຖິງສາຍພົວພັນຮ່ວມມືຂອງສອງຝ່າຍວ່າ: ສາທາລະນະລັດເບລາຣຸດ ແລະ ສປປ ລາວ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 7 ກຸມພາ ປີ 1994. ມາຮອດປັດຈຸບັນ ກໍ່ພໍດີຄົບຮອບ 30 ປີ ເຊິ່ງໄລຍະຜ່ານມາ ສອງຝ່າຍກໍ່ໄດ້ສືບຕໍ່ຜັນຂະຫຍາຍສາຍພົວພັນຮ່ວມມືກັນໃນຫຼາຍດ້ານເຊັ່ນ: ການແລກປ່ຽນຄະນະຜູ້ແທນໃນລະດັບສູງ, ຂັ້ນລັດຖະມົນຕີການຕ່າງປະເທດ. ພິເສດ ໃນປີ 2013 ພະນະທ່ານ ຈູມມະລີ ໄຊຍະສອນ, ອາດີດປະທານປະເທດ ແຫ່ງ ສປປ ລາວ ໄດ້ເດີນທາງໄປຢ້ຽມຢາມເບລາຣຸດຢ່າງເປັນທາງການ ແລະ ຕໍ່ມາກໍ່ມີຫຼາຍຄະນະຜູ້ແທນຂອງ ສປປ ລາວ ໄປຢ້ຽມຢາມ ແລະ ເຮັດວຽກຢູ່ເບລາຣຸດ ແລະ ຝ່າຍເບລາຣຸດກໍ່ໄດ້ສົ່ງຄະນະຜູ້ແທນຂອງຕົນມາຢ້ຽມຢາມ ສປປ ລາວ ຫຼາຍຄັ້ງເຊັ່ນກັນ. ອັນພິເສດທີ່ສຸດ ໃນເດືອນມັງກອນ ປີ 2023 ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ຕົກລົງສ້າງຕັ້ງສະມາຄົມມິດຕະພາບລາວ-ເບລາຣຸດຂຶ້ນ, ສິ່ງນີ້ໄດ້ເປັນການຢັ້ງຢືນວ່າ ການພົວພັນຮ່ວມມືລະຫວ່າງສອງປະເທດພວກເຮົາ ໄດ້ນັບມື້ນັບສືບຕໍ່ເພີ່ມພູນຄູນສ້າງ ແລະ ມີຜົນສຳເລັດໃຫຍ່ຫຼວງ; ພ້ອມທັງສະເໜີໃຫ້ຝ່າຍເບລາຣຸດ ສືບຕໍ່ພົວພັນຮ່ວມມືກັບ ສປປ ລາວ ຢ່າງຮອບດ້ານຫຼາຍຂຶ້ນກ່ວາເກົ່າ ໂດຍສະເພາະກັບ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນການສ້າງໂຄງການຄົ້ນຄ້ວາຮ່ວມກັນ, ການສະໜອງທຶນການສຶກສາເພື່ອພັດທະນານັກຄົ້ນຄ້ວາຂອງ ສວສສຊ ໃນຂະແໜງການຕ່າງໆ ທີ່ມີຄວາມສຳຄັນ.

ໃນຂະນະດຽວກັນ, ທ່ານ ອຸລັສຊີເມ ບາຣາວິໂຄ ກໍ່ໄດ້ກ່າວສະແດງຄວາມຂອບອົກຂອບໃຈ ຕໍ່ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ກ່າວເຖິງຈຸດປະສົງໃນການເດີນທາງມາພົບປະໃນຄັ້ງນີ້ແມ່ນເພື່ອເປັນການແນະນໍາຄວາມຮູ້ຈັກທັງສອງຝ່າຍໃຫ້ຫຼາຍຂຶ້ນ, ເປັນພື້ນຖານທີ່ສໍາຄັນໃນການຕິດຕໍ່ພົວພັນຮ່ວມມືໃນຂົງເຂດວຽກງານຄົ້ນຄວ້າໃນອານາຄົດ ເປົ້າໝາຍຄືການຈັດກອງປະຊຸມຮ່ວມກັນ, ສ້າງຫົວຂໍ້ຄົ້ນຄວ້າຮ່ວມກັນ, ແລກປ່ຽນຜົນງານການຄົ້ນຄວ້າເຊິ່ງກັນ ແລະ ກັນ ຢ່າງສະໝໍ່າສະເໝີ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

WhatsApp Image 2024-05-13 at 14.14.19_80a7366c

ພິທີມອບ-ຮັບໜ້າທີ່ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 1,445

ພິທີມອບ-ຮັບໜ້າທີ່ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ພິທີລົງນາມມອບ-ຮັບໜ້າທີ່ ລະຫວ່າງ ສະຫາຍ ປອ. ສອນທະນູ ທໍາມະວົງ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ເກົ່າ) ແລະ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດແຫ່ງຊາດ (ຜູ້ໃໝ່) ໄດ້ຈັດຂຶ້ນໃນຕອນເຊົ້າຂອງວັນທີ 10 ພຶດສະພາ 2024 ທີ່ຫ້ອງປະຊຸມໃຫຍ່ ສວສສຊ, ພາຍໃຕ້ການເປັນປະທານຂອງ ສະຫາຍ ປອ. ຄໍາພັນ ພົມມະທັດ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ; ມີການນໍາຂັ້ນສູງ, ບັນດາຮອງປະທານ, ອາດີດຮອງປະທານ, ພະນັກງານບໍານານ, ບັນດາຄະນະບໍລິຫານງານພັກ, ຫົວໜ້າຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານລັດຖະກອນທົ່ວ ສວສສຊ ເຂົ້າຮ່ວມ.

ໃນພິທີ ສະຫາຍ ດອນ ໄພວົງ, ຄະນະພັກ, ຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານ ມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 12/ກມສພ, ລົງວັນທີ 30 ເມສາ 2024 ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ລັດຖະດໍາລັດຂອງປະທານປະເທດ ສະບັບເລກທີ 069/ປປທ, ວ່າດ້ວຍການແຕ່ງຕັ້ງ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍໄດ້ຕົກລົງແຕ່ງຕັ້ງ ສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ຍົກຍ້າຍ ສະຫາຍ ປອ. ສອນທະນູ ທໍາມະວົງ ກຳມະການສູນກາງພັກ ໄປຮັບໜ້າທີ່ໃໝ່ ເປັນເລຂາຄະນະບໍລິຫານງານພັກແຂວງ, ຮັກສາການເຈົ້າແຂວງບໍລິຄໍາໄຊ.

ໃນໂອກາດດັ່ງກ່າວ ສະຫາຍ ປອ. ຄໍາພັນ ພົມມະທັດ ຕາງໜ້າໃຫ້ກົມການເມືອງສູນກາງພັກ ໄດ້ມີຄຳເຫັນ ບາງຕອນໃນພິທີວ່າ: ການມອບ-ຮັບໜ້າທີ່ໃນຄັ້ງນີ້ ສຸດທີ່ມີຄວາມສຳຄັນ ໃນວຽກງານຄຸ້ມຄອງພະນັກງານ, ການ ສັບປ່ຽນພະນັກງານການນໍາຂັ້ນສູງແມ່ນວຽກປົກກະຕິອັນໜຶ່ງຂອງພັກເຮົາ ແລະ ເປັນຄວາມຮຽກຮ້ອງຕ້ອງການ ໜ້າທີ່ການເມືອງຂອງພັກໃນໄລຍະໃໝ່, ເປັນການຍົກລະດັບພະນັກງານການນໍາຂັ້ນສູງໃຫ້ມີຄວາມຮູ້, ຄວາມສາມາດ ໃນວຽກງານຕົວຈິງຮອບດ້ານຫຼາຍຂຶ້ນ. ພ້ອມດຽວກັນນັ້ນ ທ່ານຍັງໄດ້ເນັ້ນຢໍ້າເຖິງຄວາມສໍາຄັນຂອງວຽກງານຄົ້ນຄວ້າວິທະຍາສາດເສດຖະກິດ ແລະ ສັງຄົມ ທີ່ມີຕໍ່ການຈັດຕັ້ງປະຕິບັດມະຕິ, ຄຳສັ່ງ ແລະ ນະໂຍບາຍຂອງພັກ ແລະ ລັດຖະບານ. ເຊື່ອໝັ້ນຢ່າງຍິ່ງວ່າ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ໃໝ່) ຈະສືບຕໍ່ເສີມຂະຫຍາຍຜົນງານໃນຕໍ່ໜ້າຂອງ ສວສສຊ ໃຫ້ມີຜົນສຳເລັດນັບມື້ດີຂຶ້ນເປັນກ້າວໆ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

WhatsApp Image 2024-05-02 at 09.43.59_e07c5b80

ກອງປະຊຸມຜັນຂະຫຍາຍເນື້ອໃນກອງປະຊຸມຈັດຕັ້ງທົ່ວປະເທດປະຈຳປີ 2023 ແລະ ພິທີມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023

ຈໍານວນຜູ້ເຂົ້າຊົມ: 866

ກອງປະຊຸມຜັນຂະຫຍາຍເນື້ອໃນກອງປະຊຸມຈັດຕັ້ງທົ່ວປະເທດປະຈຳປີ 2023 ແລະ ພິທີມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023

ໃນວັນທີ 09 ເມສາ 2024 ທີ່ຜ່ານມາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດຕັ້ງກອງປະຊຸມຜັນຂະຫຍາຍເນື້ອໃນກອງປະຊຸມຈັດຕັ້ງທົ່ວປະເທດປະຈຳປີ 2023 ແລະ ມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023 ເປັນປະທານໂດຍ ທ່ານ ປອ. ສອນທະນູ ທຳມະວົງ ກຳມະການສູນກາງພັກ, ເລຂາຄະນະພັກ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີຄະນະພັກ, ຄະນະນໍາ ສວສສຊ ແລະ ມີບັນດາຫົວໜ້າສະຖາບັນຄົ້ນຄວ້າ, ຫ້ອງການ, ກົມ ແລະ ສູນ ພ້ອມດ້ວຍພະນັກງານ-ລັດຖະກອນທົ່ວ ສວສສຊ ເຂົ້າຮ່ວມ.

ວາລະກອງປະຊຸມໃນຕອນເຊົ້າ ໄດ້ຮັບຟັງການເຜີຍແຜ່ບັນດາມະຕິ, ຄຳສັ່ງ, ຄຳແນະນຳ ຂອງຂັ້ນເທິງກ່ຽວກັບການຈັດຕັ້ງປະຕິບັດ ມະຕິຂອງກົມການເມືອງສູນກາງພັກ ຄື: ຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດ ມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ ສະບັບເລກທີ 14/ຄຈສພ, ລົງວັນທີ 11/01/2024 ແລະ ຄໍາແນະນໍາ ຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍການເລືອກເຟັ້ນ, ແຕ່ງຕັ້ງ, ສັບປ່ຽນໜ້າທີ່ຂອງພະນັກງານນຳພາ-ຄຸ້ມຄອງ ສະບັບເລກທີ 13/ກມສພ, ລົງວັນທີ 11/01/2024 ໂດຍ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ; ຈາກນັ້ນ ທ່ານ ຄຳສຸກ ພອນໄຊສະຫວັດ, ຮອງຫົວໜ້າກົມຈັດຕັ້ງ ແລະ ພະນັກງານ ໄດ້ຜ່ານບົດສະຫຼຸບຕີລາຄາ ການຈັດຕັ້ງປະຕິບັດ ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈຳປີ 2023 ແລະ ທິດທາງແຜນການປີ 2024 ຂອງ ສວສສຊ;

ວາລະກອງປະຊຸມໃນຕອນບ່າຍ ທ່ານ ບຸນລັດ ແກ້ວອາສາ ຄະນະພັກ ຫົວໜ້າກົມຈັດຕັ້ງ ແລະ ພະນັກງານ ໄດ້ຜ່ານບົດສະຫຼຸບການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023 ແລະ ຜ່ານມະຕິຕົກລົງວ່າດ້ວຍການຮັບຮອງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2023 ຈຳນວນ 11 ໜ່ວຍພັກ, ໃນນັ້ນຮັບຮອງ 9 ໜ່ວຍພັກ ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ 01 ໜ່ວຍພັກເປັນໜ່ວຍພັກ ປະເພດກາງ, ໂດຍໃຫ້ກຽດມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ໂດຍ ທ່ານ ປອ. ສອນທະນູ ທຳມະວົງ ກຳມະການສູນກາງພັກ, ເລຂາຄະນະພັກ, ປະທານ ສວສສຊ. ພ້ອມນັ້ນ, ກອງປະຊຸມຍັງໄດ້ຮັບຟັງການຜ່ານມະຕິຕົກລົງແຕ່ງຕັ້ງຄະນະຮັບຜິດຊອບກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ແຜນກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2024 ແລະ ບັນດາໜ່ວຍພັກໄດ້ຂຶ້ນຈັບມືແຂ່ງຂັນກັນຢູ່ເທິງໜ້າເວທີກອງປະຊຸມ.

ໃນຕອນທ້າຍກອງປະຊຸມ ທ່ານ ປອ. ສອນທະນູ ທຳມະວົງ ໄດ້ສະແດງຄວາມຊົມເຊີຍຕໍ່ຄວາມຮັບຜິດຊອບສູງຂອງສະມາຊິກພັກທົ່ວ ສວສສຊ ທີ່ເຮັດໃຫ້ກອງປະຊຸມໄດ້ດຳເນີນດ້ວຍບັນຍາກາດຟົດຟື້ນ ຖືກຕ້ອງຕາມຄຳສັ່ງ ແລະ ຄຳແນະນຳຂອງຄະນະຈັດຕັ້ງສູນກາງພັກ, ລະບຽບ ແລະ ວາລະ ມີຜົນສໍາເລັດຢ່າງຈົບງາມ. ເຖິງວ່າໃນ 1 ປີຜ່ານມາ ປະເທດຂອງພວກເຮົາໄດ້ປະເຊີນກັບບັນຫາຄວາມຫຍຸ້ງຍາກຫຼາຍຢ່າງ ແຕ່ພາຍໃຕ້ການນຳພາ-ຊີ້ນໍາ ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຜ່ານຜ່າຂໍ້ຫຍຸ້ງຍາກ ແລະ ສ້າງໄດ້ການຫັນປ່ຽນຢ່າງຕັ້ງ ໜ້າ, ຄຸນນະພາບການຄົ້ນຄວ້າວິທະຍາສາດໄດ້ຮັບການປັບປຸງດີຂຶ້ນເທື່ອລະກ້າວ, ພະນັກງານ-ສະມາຊິກພັກໄດ້ຮັບການ ກໍ່ສ້າງ-ບຳລຸງທາງດ້ານທິດສະດີການເມືອງ, ວິຊາສະເພາະຢູ່ພາຍໃນ ແລະ ຕ່າງປະເທດ, ກາຍເປັນພະນັກງານນຳພາຫຼັກແຫຼ່ງ, ພະນັກງານສືບທອດຢູ່ໃນບັນດາຫ້ອງການ, ກົມ, ສະຖາບັນຄົ້ນຄວ້າ ແລະ ສູນ. ໃນນັ້ນ, ມີຫຼາຍສະຫາຍໄດ້ຖືກສັບຊ້ອນ, ບັນຈຸເຂົ້າໃນຕຳແໜ່ງບໍລິຫານຂັ້ນຕ່າງໆ ຢູ່ພາຍໃນສະຖາບັນ; ເຮັດໃຫ້ກົງຈັກການຈັດຕັ້ງຮາກຖານພັກ ໄດ້ຮັບການປັບປຸງຕາມທິດສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ກົງຈັກບໍລິຫານ ກໍໄດ້ຮັບການປັບປຸງໃຫ້ກະທັດຮັດ ແລະ ມີປະສິດທິຜົນຂຶ້ນຕື່ມ. ທ່ານຍັງໄດ້ເນັ້ນໜັກຕື່ມວ່າ ການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ມີຄຸນນະພາບ ແຕ່ລະໜ່ວຍພັກຕ້ອງເອົາໃຈໃສ່ປະຕິບັດທິດທາງ, ບັນດາຄາດໝາຍສູ້ຊົນ, ໜ້າທີ່ຈຸດສຸມ 5 ດ້ານ ດັ່ງຕໍ່ໄປນີ້: 1) ວຽກງານສ້າງພັກທາງດ້ານການເມືອງແນວຄິດ, 2) ວຽກງານການກໍ່ສ້າງພັກດ້ານການຈັດຕັ້ງ, 3) ວຽກງານການກໍ່ສ້າງພັກທາງດ້ານແບບແຜນວິທີນຳພາ, 4) ວຽກງານພະນັກງານ ແລະ 5) ວຽກງານປັບປຸງການຈັດຕັ້ງ.

ຂ່າວ: ເພັດທະນູໄຊ ວົງຍະໄຊ

ພາບ: ມູນິນ ພົນສັກດາ

WhatsApp Image 2024-04-10 at 09.07.27_b72b6ddb

ຮອງປະທານ ສວສສຊ ຕ້ອນຮັບການເຂົ້າພົບປະຢ້ຽມຢາມ ຂອງສະຖາບັນການເມືອງໂຮຈິມິນ ສສ ຫວຽດນາມ

ຈໍານວນຜູ້ເຂົ້າຊົມ: 874

ຮອງປະທານ ສວສສຊ ຕ້ອນຮັບການເຂົ້າພົບປະຢ້ຽມຢາມ ຂອງ ສະຖາບັນການເມືອງໂຮຈິມິນ ສສ ຫວຽດນາມ

ໃນຕອນເຊົ້າຂອງວັນທີ 28 ມີນາ 2024; ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທ່ານ ປອ. ນ. ຂັນລາສີ ແກ້ວບຸນພັນ, ຄະນະພັກ, ຮອງປະທານ ສວສສຊ ໄດ້ຕ້ອນຮັບການເຄື່ອນໄຫວຢ້ຽມຢາມ ແລະ ການມາເຮັດວຽກຂອງ ທ່ານ ຮສ. ປອ. ດິງ ງັອກ ຊາງ, ຫົວໜ້າກົມຄຸ້ມຄອງວິທະຍາສາດ, ສະຖາບັນການເມືອງໂຮຈິມິນ ສສ ຫວຽດນາມ ພ້ອມດ້ວຍຄະນະຜູ້ແທນ.

ທ່ານ ປອ. ນ. ຂັນລາສີ ແກ້ວບຸນພັນ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາສູງຕໍ່ການມາຢ້ຽມຢາມຂອງຄະນະຜູ້ແທນ ສສ ຫວຽດນາມ ໃນຄັ້ງນີ້ ເຊິ່ງເປັນການເສີມສ້າງສາຍພົວພັນອັນຮ່ວມມືອັນສະໜິດສະໜົມຂອງສອງຝ່າຍລາວ-ຫວຽດນາມ ໃຫ້ເກີດປະສິດທິຜົນ ແລະ ອວຍພອນໃຫ້ຄະນະຜູ້ແທນມາຢ້ຽມ ຢາມເຮັດວຽກຢູ່ ສປປ ລາວ ມີຜົນສຳເລັດ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

ໃນໂອກາດດັ່ງກ່າວ ທ່ານ ຮສ. ປອ. ດິງ ງັອກ ຊາງ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງລາຍງານຈຸດປະສົງຂອງການມາຢ້ຽມຢາມເຮັດວຽກໃນຄັ້ງນີ້ ເພື່ອປຶກສາຫາລືກ່ຽວກັບແນວທາງການປ່ຽນແປງໃໝ່ຂອງພັກປະຊາຊັນປະຕິວັດລາວ ນັບແຕ່ກອງປະຊຸມໃຫຍ່ຄັ້ງທີ IV ເປັນຕົ້ນມາ.

ພາຍຫຼັງສຳເລັດການພົບປະຮອງປະທານ ສວສສຊ, ຄະນະຜູ້ແທນທັງສອງຝ່າຍ ເຊິ່ງນໍາພາໂດຍ ທ່ານ ປອ. ສາຍຄໍາ ວໍລະເດດ, ຫົວໜ້າຫ້ອງການຄຸ້ມຄອງວິທະຍາສາດ ສວສສຊ ແລະ ທ່ານ ຮສ. ປອ. ດິງ ງັອກ ຊາງ, ຫົວໜ້າກົມຄຸ້ມຄອງວິທະຍາສາດ, ສະຖາບັນການເມືອງໂຮຈິມິນ ສສ ຫວຽດນາມ ກໍໄດ້ເຂົ້າຮ່ວມກອງປະຊຸມແລກປ່ຽນບົດຮຽນທາງດ້ານວິຊາການຮ່ວມກັນກ່ຽວກັບແນວທາງການປ່ຽນແປງໃໝ່ຂອງພັກປະຊາຊົນປະຕິວັດລາວ ນັບແຕ່ກອງປະຊຸມໃຫຍ່ຄັ້ງທີ IV ຈົນເຖິງປັດຈຸບັນເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດຜ່ານມາ. ນອກຈາກນີ້ ຍັງໄດ້ປຶກສາຫາລືກ່ຽວກັບການແກ້ໄຂບັນຫາການຊໍາລະໜີ້ສິນສາທາລະນະ, ວິກິດການເສດຖະກິດ-ການເງິນ, ສະພາບການດດໍາລົງຊີວິດຂອງປະຊາຊົນພາຍຫຼັງການແຜ່ລະບາດຂອງພະຍາດໂຄວິດ-19 ຕື່ມອີກ.

ຂຽນຂ່າວ-ຖ່າຍພາຍ: ພວງເພັດ ຈັນທະລີວົງ

ກອງປະຊຸມແລກປ່ຽນຄຳຄິດເຫັນ ຮ່ວມກັບອົງການປົກຄອງແຂວງສະຫວັນນະເຂດ ຕໍ່ກັບບັນຫາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ

ຈໍານວນຜູ້ເຂົ້າຊົມ: 941

ກອງປະຊຸມແລກປ່ຽນຄຳຄິດເຫັນ ຮ່ວມກັບອົງການປົກຄອງແຂວງສະຫວັນນະເຂດ ຕໍ່ກັບບັນຫາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ

ໃນຕອນເຊົ້າວັນທີ 29 ມີນາ 2024 ທີ່ຜ່ານມານີ້, ທ່ານ ປອ. ສອນທະນູ ທຳມະວົງ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຫົວໜ້າຄະນະສະເພາະກິດ 44/ນຍ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງສະຫວັນນະເຂດ ເພື່ອເຂົ້າຮ່ວມກອງປະຊຸມແລກປ່ຽນຄຳຄິດເຫັນຕໍ່ກັບບັນຫາເງິນເຟີ ແລະ ລາຄາສິນຄ້າທີ່ເພີ້ມສູງຂຶ້ນ ໂດຍໄດ້ຮັບການຕ້ອນຮັບຈາກ ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ທີ່ຫ້ອງວ່າການປົກຄອງແຂວງ. ໃນໂອກາດນີ້, ທ່ານ ບຸນໂຈມ ອຸບົນປະເສີດ ກໍ່ໄດ້ກ່າວສະແດງຄວາມຕ້ອນຮັບຕໍ່ການມາເຮັດວຽກຂອງຄະນະນຳ ສວສສຊ ຫຼື ຄະນະສະເພາະກິດ 44/ນຍ ພ້ອມທັງແຈ້ງສະພາບຈຸດພິເສດ, ການພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາໂດຍຫຍໍ້ ລວມເຖິງບາງບັນຫາທີ່ຍັງມີຄວາມຫຍຸ້ງຍາກຕໍ່ການພັດທະນາຢູ່ພາຍໃນແຂວງ ເພື່ອໃຫ້ ສວສສຊ ຊ່ວຍຄົ້ນຄວ້າ, ຊຸກຍູ້ ແລະ ສະເໜີຕໍ່ລັດຖະບານຊ່ວຍແກ້ໄຂໃນຕໍ່ໜ້າ. ພ້ອມດຽວກັນນີ້ ທ່ານ ປອ. ສອນທະນູ ທຳມະວົງ ກໍໄດ້ສະແດງຂອບໃຈຕໍ່ທ່ານເຈົ້າແຂວງສະຫວັນນະເຂດ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນການລົງມາເຮັດວຽກທີ່ແຂວງສະຫວັນນະເຂດໃນຄັ້ງນີ້ ແລະ ໄດ້ມອບປຶ້ມຈຳນວນໜຶ່ງທີ່ເປັນຜົນງານການຄົ້ນຄວ້າຂອງ ສວສສຊ ໃຫ້ກັບທ່ານເຈົ້າແຂວງ.

ໃນວັນດຽວກັນ ທີ່ຫ້ອງວ່າການແຂວງ ໄດ້ຈັດກອງປະຊຸມແລກປ່ຽນຄຳເຫັນກ່ຽວກັບບັນຫາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ ໂດຍການເປັນປະທານຮ່ວມຂອງທ່ານ ປອ. ສອນທະນູ ທໍາມະວົງ ປະທານ ສວສສຊ, ຫົວໜ້າຄະນະສະເພາະກິດ44/ນຍ ແລະ ທ່ານ ປອ. ແສນສັກ ສຸລິສັກ, ກຳມະການພັກແຂວງ, ຮອງເຈົ້າແຂວງສະຫວັນນະເຂດ ຜູ້ຊີ້ນຳຂົງເຂດເສດຖະກິດ, ມີພະແນກການອ້ອມຂ້າງແຂວງ ແລະ ພາກທຸລະກິດເຂົ້າຮ່ວມ. ຈຸດປະສົງຕົ້ນຕໍຂອງກອງປະຊຸມແມ່ນເພື່ອປຶກສາຫາລື ແລະ ແລກປ່ຽນຄຳຄິດເຫັນ ກ່ຽວກັບບັນຫາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ ໃນໄລຍະຜ່ານມາ. ໂດຍສະເພາະຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງແຂວງ ໂດຍ ລວມ.

ໃນກອງປະຊຸມ ທ່ານ ອູສະຫວັນ ທ່ຽງເທບວົງສາ, ຫົວໜ້າສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ຄະນະສະເພາະກິດ 44/ນຍ ໄດ້ຂຶ້ນລາຍງານສະພາບ, ນະໂຍບາຍ, ມາດຕະການຄຸ້ມຄອງເງິນເຟີ້ ແລະ ລາຄາສິນຄ້າ, ພ້ອມຍົກໃຫ້ເຫັນມາດຕະການແກ້ໄຂໃນໄລຍະຜ່ານມາ ແລະ ບາງທັດສະນະຕໍ່ການແກ້ໄຂບັນຫາເງິນເຟີ້ ແລະ ອັດຕາແລກປ່ຽນໃນຕໍ່ໜ້າ. ບັນດາພະແນກການ, ພາກທຸລະກິດຕ່າງໆ ໄດ້ປະກອບຄຳເຫັນ, ປຶກສາຫາລືແລກປ່ຽນ ກ່ຽວກັບບັນຫາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ ໃນໄລຍະຜ່ານມາ ຍົກໃຫ້ເຫັນຈຸດດີ, ຈຸດອ່ອນ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີການແກ້ໄຂຢ່າງກົງໄປກົງມາ ດ້ວຍຄວາມຮັບຜິດຊອບສູງ.

ໃນຕອນທ້າຍ, ທ່ານ ປອ. ສອນທະນູ ທຳມະວົງ ໄດ້ໃຫ້ຄຳເຫັນຕໍ່ກອງປະຊຸມວ່າ ແຂວງສະຫວັນນະເຂດ ເປັນແຂວງທີ່ມີການພັດທະນາຢ່າງຕໍ່ເນື່ອງ ແລະ ໝັ້ນທ່ຽງ ເປັນແຂວງທີ່ມີທ່າແຮງໃນການພັດທະນາຢ່າງຫຼວງຫຼາຍ ແຕ່ຂະນະດຽວກັນແຂວງສະຫວັນນະເຂດ ກໍ່ພົບຄວາມຫຍຸ້ງຍາກບໍ່ໜ້ອຍຈາກສະພາບເສດຖະກິດຝຶດເຄື່ອງ, ຄວາມຫຍຸ້ງ ຍາກທາງດ້ານເສດຖະກິດ-ການເງິນ ແລະ ບັນຫາລາຄາສິນຄ້າທີ່ເພີ່ມຂື້ນສູງ ເຊິ່ງໄດ້ກະທົບຕໍ່ຊີວິດການເປັນຢູ່ຂອງປະຊາຊົນຊາວສະຫວັນນະເຂດບໍ່ໜ້ອຍ. ບັນດາຄຳຄິດເຫັນ ແລະ ບົດຮຽນຂອງແຂວງສະຫວັນນະເຂດ ຈະກາຍເປັນຂໍ້ມູນໃນການຄົ້ນຄວ້າ, ວິເຄາະວິໄຈ, ຊອກຫາແນວທາງ ແລະ ມາດຕະການໃນການແກ້ໄຂບັນຫາອັດຕາເງິນເຟີ້ ແລະ ສິນຄ້າທີ່ເພີ່ມສູງຂຶ້ນໃນປະຈຸບັນ ໃຫ້ມີວິທະຍາສາດ ສາມາດນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ. ປະທານກອງປະຊຸມ ໄດ້ຕີລາຄາສູງຕໍ່ຜົນສຳເລັດຂອງກອງປະຊຸມທີ່ບັນລຸຕາມຈຸດປະສົງ ແລະ ລະດັບຄາດໝາຍທີ່ໄດ້ຕັ້ງໄວ້.

ຂ່າວ: ເພັດທະນູໄຊ ວົງຍະໄຊ

ພາບ: ວິໄຈ ເດດວົງສອນ

WhatsApp Image 2024-03-21 at 16.06.38_e70fa780

ສວສສຊ ສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ

ຈໍານວນຜູ້ເຂົ້າຊົມ: 887

ສວສສຊ ສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ

ເພື່ອກຽມຄວາມພ້ອມໃນການກະກຽມ ແລະ ດໍາເນີນກອງປະຊຸມໃຫຍ່ສະມາຊິກພັກຄັ້ງທີ II ຂອງອົງຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ໃນວັນທີ 15 ມີນາ 2024 ທີ່ຜ່ານມານີ້ ທີ່ຫ້ອງປະຊຸມໃຫຍ່ຂອງ ສວສສຊ ໄດ້ເປີດກອງປະຊຸມສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກຂຶ້ນ ໂດຍການເປັນປະທານຂອງ ສະຫາຍ ສອນທະນູ ທໍາມະວົງ, ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສວສສຊ; ມີຮອງເລຂາຄະນະບໍລິຫານງານພັກ, ປະທານກວດກາພັກ, ຄະນະບໍລິຫານງານພັກ, ບັນດາເລຂາໜ່ວຍພັກ-ຮອງເລຂາໜ່ວຍພັກອ້ອມຂ້າງ ພ້ອມດ້ວຍສະມາຊິກພັກ ແລະ ພະນັກງານລັດຖະກອນທົ່ວ ສວສສຊ ເຂົ້າຮ່ວມ.

ກອງປະຊຸມໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍສະຫາຍ ປອ. ສາຍຄໍາ ວໍລະເດດ, ເລຂາໜ່ວຍພັກ, ຫົວໜ້າຫ້ອງການຄຸ້ມຄອງວິທະຍາສາດ ເຊິ່ງໄດ້ຍົກໃຫ້ເຫັນວຽກງານພົ້ນເດັ່ນຂອງພັກ ໃນການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກ ສວສສຊ ໄດ້ມີຜົນສໍາເລັດຫຼາຍດ້ານ ເປັນຕົ້ນດ້ານວຽກງານກໍ່ສ້າງພັກ, ວຽກງານປັບປຸງການຈັດຕັ້ງ, ວຽກງານບໍາລຸງ-ກໍ່ສ້າງພະນັກງານ, ວຽກງານກວດກາ, ວຽກງານປ້ອງກັນພັກ, ປ້ອງກັນພາຍໃນ, ວຽກງານອົງການຈັດຕັ້ງມະຫາຊົນ ແລະ ວຽກງານຄົ້ນຄວ້າວິທະຍາສາດ ເຊິ່ງມີທັງດ້ານດີ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຊຸມປີຕໍ່ໜ້າ.

ໃນໂອກາດດັ່ງກ່າວ ສະຫາຍ ສອນທະນູ ທໍາມະວົງ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ການຈັດກອງປະຊຸມຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ໃນຄັ້ງນີ້ ແມ່ນເພື່ອເປີດໂອກາດໃຫ້ບັນດາໜ່ວຍພັກ ທີ່ຂຶ້ນກັບອົງຄະນະພັກ ສວສສຊ, ຕະຫຼອດເຖິງສະມາຊິກພັກທົ່ວ ສວສສຊ ໄດ້ມີສ່ວນຮ່ວມໃນການປະກອບຄໍາຄິດເຫັນໃສ່ບົດສະຫຼຸບດັ່ງກ່າວ ແລ້ວສົ່ງໃຫ້ຄະນະຮັບຜິດຊອບສັງລວມປັບປຸງໃຫ້ມີເນື້ອໃນທີ່ສົມບູນຂຶ້ນຕື່ມ; ພ້ອມດຽວກັນນັ້ນ, ກໍ່ເພື່ອເປັນການທົບທວນຄືນໃຫ້ແກ່ການກະກຽມກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສວສສຊ ແລະ ກະກຽມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ ທີ່ຈະຈັດຂຶ້ນໃນຊຸມປີຂ້າງໜ້າ.