admin_lases00 – ໜ້າ 2 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມເຜີຍແຜ່ບົດປະເມີນສະພາບເສດຖະກິດມະຫາພາກປະຈໍາປີ 2025 ແລະ ທ່າອຽງປີ 2026

ຈໍານວນຜູ້ເຂົ້າຊົມ: 481

ກອງປະຊຸມເຜີຍແຜ່ບົດປະເມີນສະພາບເສດຖະກິດມະຫາພາກປະຈໍາປີ 2025 ແລະ ທ່າອຽງປີ 2026

ສະຖາບັນຄົ້ນຄວ້າເສດຖະກິດມະຫາພາກ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES) ໄດ້ຈັດກອງປະຊຸມເຜີຍແຜ່ບົດປະເມີນເສດຖະກິດມະຫາພາກຂອງ ສປປ ລາວ ປີ 2025 ແລະ ທ່າອ່ຽງ 2026 ຂຶ້ນໃນຕອນເຊົ້າຂອງວັນທີ 27 ມີນາ 2026 ທີ່ຫ້ອງປະຊຸມສະຖາບັນວິທະຍາສາດເສດຖະກິດ ແລະ ສັງຄົົມແຫ່ງຊາດ ໂດຍການເປັນປະທານຂອງທ່ານ ປອ. ສະຖາບັນດິດ ອິນສີຊຽງໃໝ່, ຮອງເລຂາຄະນະພັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີບັນດາທ່ານຜູ້ຕາງໜ້າຈາກ ບັນດາຂະແໜງການກ່ຽວຂ້ອງພາກລັດ, ພາກເອກະຊົນ ແລະ ອົງການຈັດຕັ້ງສາກົນປະຈໍາ ສປປ ລາວ ເຂົ້າຮ່ວມ 60 ກວ່າທ່ານ.

ກອງປະຊຸມ ໄດ້ຮັບຟັງລາຍງານ ໂດຍທ່ານ ນ. ລັດດາວັນ ຊົງວິໄລ ຫົວໜ້າສະຖາບັນຄົ້ນຄວ້າເສດຖະກິດມະຫາພາກ ເຊິ່ງໄດ້ຍົກໃຫ້ເຫັນສະພາບເສດຖະກິດມະຫາພາກຂອງ ສປປ ລາວ ປະຈຳປີ 2025 ແມ່ນມີທ່າອ່ຽງດີຂຶ້ນ ສາມາດຂະຫຍາຍຕົວໄດ້ໃນລະດັບ 4.8% ສູງກວ່າປີຜ່ານມາ ແລະ ຍັງບັນລຸໄດ້ຕາມແຜນການທີ່ວາງໄວ້. ໃນນັ້ນ, ຂະແໜງການສົ່ງອອກຍັງເປັນຕົວຂັບເຄື່ອນຕົ້ນຕໍໃຫ້ແກ່ການຂະຫຍາຍຕົວຂອງເສດຖະກິດລາວຄືດັ່ງປີຜ່ານມາ ໂດຍສະເພາະການສົ່ງອອກພະລັງງານໄຟຟ້າ, ສິນຄ້າປະເພດອຸດສາຫະກຳ, ກະສິກຳ ແລະ ການທ່ອງທ່ຽວ. ໃນຂະນະດຽວກັນ, ການນຳເຂົ້າສິນຄ້າໄດ້ສະລໍຕົວລົງຕາມທ່າອ່ຽງຄວາມຕ້ອງການພາຍໃນຈາກການປະຕິບັດນະໂຍບາຍຮັດກູມທາງດ້ານການເງິນ-ເງິນຕາຂອງລັດຖະບານ. ເບິ່ງໂດຍພາບລວມແລ້ວ ເຫັນວ່າສະພາບເສດຖະກິດມະຫາພາກ ມີສະຖຽນລະພາບດີຂຶ້ນ ເນື່ອງຈາກວ່າອັດຕາເງິນເຟີ້ໄດ້ຄ່ອຍເລີ່ມສະລໍຕົວລົງ ແລະ ການເໜັງຕີງຂອງອັດຕາແລກປ່ຽນ ມີຄວາມສະຫງົບຂຶ້ນ ຍ້ອນການຈັດຕັ້ງປະຕິບັດຫຼາຍມາດຕະການສຳຄັນຂອງລັດຖະບານ ເຮັດໃຫ້ລາຍໄດ້ຕົວຈິງມີທ່າອ່ຽງເພີ່ມຂຶ້ນ.

ໃນປີ 2026 ນີ້ ຄາດວ່າຈະເປັນອີກປີໜຶ່ງທີ່ຍັງສືບຕໍ່ມີຄວາມທ້າທາຍພໍສົມຄວນ ຈາກສະພາບຄວາມບໍ່ແນ່ນອນຂອງສາກົນ ໂດຍສະເພາະ ບັນຫາສົງຄາມ, ຄວາມຂັດແຍ່ງໃນຕາເວັນອອກກາງ ແລະ ຄວາມຂັດແຍ່ງດ້ານການຄ້າ ເຊິ່ງໄດ້ສົ່ງຜົນກະທົບຕໍ່ເສດຖະກິດໂລກ, ຕ່ອງໂສ້ການຜະລິດສະບຽງອາຫານ ແລະ ພະລັງງານ ໂດຍສະເພາະ ລາຄານ້ຳມັນໃນຕະຫຼາດໂລກ ເຮັດໃຫ້ລາຄານໍ້າມັນພາຍໃນປະເທດເພີ່ມຂຶ້ນສູງ ແລະ ມີບັນຫາດ້ານການສະໜອງບໍ່ທ່ວງທັນກັບຄວາມຕ້ອງການ. ສິ່ງທ້າທາຍເຫຼົ່ານີ້ ຄາດວ່າຈະກະທົບເສດຖະກິດມະຫາພາກຂອງລາວ ຢ່າງຫຼີກລ້ຽງບໍ່ໄດ້ ເປັນຕົ້ນ ອັດຕາເງິນເຟີ້, ການເຕີບໂຕຂອງເສດຖະກິດ, ອັດຕາແລກປ່ຽນ, ການຂາດແຄນແຮງງານ ແລະ ພາລະໜີ້ສິນສາທາລະນະ. ຫຼັງຈາກນັ້ນ, ບັນດາທ່ານຜູ້ເຂົ້າຮ່ວມກອງປະຊຸມ ໄດ້ປະກອບຄໍາເຫັນ ແລະ ແລກປ່ຽນຂໍ້ມູນດ້ານວິຊາການຢ່າງກົງໄປກົງມາ.

ໃນວາລະທ້າຍສຸດຂອງກອງປະຊຸມ ປອ. ສະຖາບັນດິດ ອິນສີຊຽງໃໝ່ ໄດ້ມີຄໍາເຫັນສະຫຼຸບ ໂດຍທ່ານໄດ້ຕີລາຄາສູງຕໍ່ທີມງານນັກຄົ້ນຄວ້າ ແລະ ສະແດງຄວາມຂອບໃຈບັນດາແຂກທີ່ເຂົ້າຮ່ວມແລກປ່ຽນຂໍ້ມູນ ແລະ ຄໍາຄິດເຫັນຢ່າງພາວະວິໄສ. ພ້ອມທັງຮຽກຮ້ອງໃຫ້ທຸກພາກສ່ວນທີ່ເຂົ້າຮ່ວມກອງປະຊຸມໃນມື້ນີ້ ສຶບຕໍ່ມີຄໍາຄິດເຫັນ ແລະ ໃຫ້ຄວາມຮ່ວມມືສະໜອງຂໍ້ມູນຂ່າວສານໃຫ້ນັກຄົ້ນຄວ້າ ເພື່ອລົງເລິກວິເຄາະບັນຫາແຕ່ລະຂົງເຂດເສດຖະກິດໃຫ້ແທດເຖິງ ແລະ ສາມາດເປັນແນວທາງໃຫ້ແກ່ພັກ-ລັດຖະບານ ເຂົ້າໃນການກໍານົດນະໂຍບາຍ ແລະ ແກ້ໄຂບັນດາປະກົດການຫຍໍ້ທໍ້ທາງດ້ານເສດຖະກິດໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ພິທີມອບ-ຮັບໜ້າທີ່ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 561

ພິທີມອບ-ຮັບໜ້າທີ່ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ພິທີລົງນາມມອບ-ຮັບໜ້າທີ່ ລະຫວ່າງ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ເກົ່າ) ແລະ ສະຫາຍ ປອ. ລີເບີ ລີບົວປາວ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ໃໝ່) ໄດ້ຈັດຂຶ້ນໃນຕອນເຊົ້າຂອງວັນທີ 19 ມີນາ 2026 ທີ່ຫ້ອງປະຊຸມໃຫຍ່ ສວສສຊ, ພາຍໃຕ້ການເປັນປະທານຂອງ ສະຫາຍ ປອ. ຄໍາພັນ ເຜີຍຍະວົງ, ກໍາມະການກົມການເມືອງສູນກາງພັກ, ຫົວໜ້າຄະນະໂຄອົບຮົມສູນກາງພັກ, ມີບັນດາຄະນະບໍລິຫານງານພັກ, ຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນ ແລະ ຜູ້ຕາງໜ້າຄະນະຈັດຕັ້ງສູນກາງພັກ, ສະພາແຫ່ງຊາດ ພ້ອມດ້ວຍພະນັກງານລັດຖະກອນທົ່ວ ສວສສຊ ເຂົ້າຮ່ວມ.

ໃນພິທີ ສະຫາຍ ທົງສັກ ກົມມະເມືອງ, ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 13/ກມສພ, ລົງວັນທີ 11 ມີນາ 2026 ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ລັດຖະດໍາລັດຂອງປະທານປະເທດ ສະບັບເລກທີ 038/ປປທ, ລົງວັນທີ 16 ມີນາ 2026 ວ່າດ້ວຍການແຕ່ງຕັ້ງ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍໄດ້ຕົກລົງແຕ່ງຕັ້ງ ສະຫາຍ ປອ. ລີເບີ ລີບົວປາວ, ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ລັດຖະດໍາລັດຂອງປະທານປະເທດ ສະບັບເລກທີ 037/ປປທ, ລົງວັນທີ 16 ມີນາ 2026 ໂດຍຍົກຍ້າຍ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ ໄປຮັບໜ້າທີ່ໃໝ່ຢູ່ສະພາແຫ່ງຊາດ.

ໃນໂອກາດດັ່ງກ່າວ ສະຫາຍ ປອ. ຄໍາພັນ ເຜີຍຍະວົງ ຕາງໜ້າໃຫ້ກົມການເມືອງສູນກາງພັກ ໄດ້ມີຄຳເຫັນບາງຕອນໃນພິທີວ່າ: ການມອບ-ຮັບໜ້າທີ່ໃນຄັ້ງນີ້ ສຸດທີ່ມີຄວາມສຳຄັນໃນວຽກງານຄຸ້ມຄອງພະນັກງານ, ການສັບປ່ຽນພະນັກງານການນໍາຂັ້ນສູງແມ່ນວຽກປົກກະຕິອັນໜຶ່ງຂອງພັກເຮົາ ແລະ ເປັນຄວາມຮຽກຮ້ອງຕ້ອງການໜ້າທີ່ການເມືອງຂອງພັກໃນໄລຍະໃໝ່, ເປັນການຍົກລະດັບພະນັກງານການນໍາຂັ້ນສູງໃຫ້ມີຄວາມຮູ້, ຄວາມສາມາດໃນວຽກງານຕົວຈິງຮອບດ້ານຫຼາຍຂຶ້ນ. ພ້ອມດຽວກັນນັ້ນ, ທ່ານຍັງໄດ້ເນັ້ນຢໍ້າເຖິງຄວາມສໍາຄັນຂອງວຽກງານຄົ້ນຄວ້າວິທະຍາສາດເສດຖະກິດ ແລະ ສັງຄົມ ທີ່ມີຕໍ່ການຈັດຕັ້ງປະຕິບັດມະຕິ, ຄຳສັ່ງ ແລະ ນະໂຍບາຍຂອງພັກ ແລະ ລັດຖະບານ. ເຊື່ອໝັ້ນຢ່າງຍິ່ງວ່າ ສະຫາຍ ປອ. ລີເບີ ລີບົວປາວ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ໃໝ່) ຈະສືບຕໍ່ເສີມຂະຫຍາຍຜົນງານໃນຕໍ່ໜ້າຂອງ ສວສສຊ ໃຫ້ມີຜົນ ສຳເລັດນັບມື້ດີຂຶ້ນເປັນກ້າວໆ.

ພາບ-ຂ່າວ: ເພັດທະນູໄຊ ວົງຍະໄຊ

ສວສສຊ ຈັດພິທີສະຫຼຸບວຽກງານປະຈຳປີ

ຈໍານວນຜູ້ເຂົ້າຊົມ: 232

ສວສສຊ ຈັດພິທີສະຫຼຸບວຽກງານປະຈຳປີ

ເພື່ອເປັນການກວດກາຄືນການຈັດຕັ້ງປະຕິບັດວຽກງານໃນໄລຍະໜຶ່ງປີຜ່ານມາ ແລະ ເປັນບ່ອນອີງໃຫ້ແກ່ການວາງທິດທາງໃນໜຶ່ງປີຕໍ່ໜ້າ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປະຈຳປີ 2025 ທີ່ຫ້ອງປະຊຸມໃຫຍ່ຂອງ ສຊສສຊ (ຫຼັກ 6) ໃນຕອນເຊົ້າວັນອັງຄານ 17 ມີນາ 2026 ພາຍໃຕ້ການເປັນປະທານຂອງທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ; ມີບັນດາຮອງປະທານ, ຫົວໜ້າກົມ, ຫ້ອງການ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານ-ລັດຖະກອນທົ່ວ ສວສສຊ ເຂົ້າຮ່ວມ.

ກອງປະຊຸມໄດ້ຮັບຟັງຮ່າງບົດສະຫຼຸບວຽກງານປະຈໍາປີ 2025 ແລະ ທິດທາງແຜນການວຽກງານປະຈໍາປີ 2026 ເຊິ່ງໄດ້ຍົກໃຫ້ເຫັນບັນດາຜົນງານ, ຈຸດດີ, ຈຸດອ່ອນ, ຂໍ້ຄົງຄ້າງ ຕະຫຼອດໄລຍະໜຶ່ງປີຜ່ານມາ ພ້ອມທັງກຳນົດທິດທາງແຜນການໃນປີ 2026; ພ້ອມດຽວກັນນັ້ນ, ກອງປະຊຸມຍັງໄດ້ຮັບຟັງການຜ່ານບົດສະຫຼຸບ ຕີລາຄາວຽກງານແຂ່ງຂັນ-ຍ້ອງຍໍຮັັກຊາດ ແລະ ພັດທະນາປະຈໍາປີ 2025 ແລະ ທິດທາງແຜນການປີ 2026. ໃນພິທີດັ່ງກ່າວ ໄດ້ມີການມອບໃບຍ້ອງຍໍໃຫ້ແກ່ບຸກຄົນ ທີ່ມີຜົນງານປະກອບສ່ວນໃນບັ້ນຮັບໃຊ້ກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສວສສຊ ຈໍານວນ 103 ທ່ານ, ບັ້ນຮັບໃຊ້ສວນສະໜາມ ວັນຊາດທີ 2 ທັນວາ ຄົບຮອບ 50 ປີ ຈໍານວນ 65 ທ່ານ ແລະ ຍ້ອງຍໍບຸກຄົນດີເດັ່ນປະຈໍາປີ 2025 ຈໍານວນທັງໝົດ 182 ທ່ານ; ໃນນັ້ນ ມີປະເພດ I ຈໍານວນ 153 ທ່ານ, ປະເພດ II ຈໍານວນ 29 ທ່ານ ແລະ ຍ້ອງຍໍການຈັດຕັ້ງທີ່ມີຜົນງານດີເດັ່ນປະເພດ I ຈໍານວນ 9 ພາກສ່ວນ, ປະເພດ II ຈໍານວນ 1 ພາກສ່ວນ ແລະ ປະເພດ III ຈໍານວນ 1 ພາກສ່ວນ;

ໃນໂອກາດດັ່ງກ່າວ ທ່ານ ປອ. ກອງແກ້ວ ໄຊສົງຄາມ ໄດ້ກ່າວຍ້ອງຍໍຊົມເຊີຍຄະນະພັກ, ຄະນະນໍາແຕ່ລະຂັ້ນ ແລະ ອົງການຈັດຕັ້ງມະຫາຊົນ, ບຸກຄົນດີເດັ່ນພາຍໃນ ສວສສຊ ທີ່ສາມາດຍາດໄດ້ຜົນສຳເລັດໃນຄັ້ງນີ້. ທ່ານຍັງໄດ້ເນັ້ນໜັກຕື່ມວ່າ: ໃນໜຶ່ງປີຕໍ່ໜ້າ ສວສສຊ ຕ້ອງໄດ້ອອກແຮງປຸກລະດົມກຳລັງແຮງຂອງທຸກພາກສ່ວນ, ເຊີດຊູຈິດໃຈຮັກຊາດ, ເອກະພາບ, ເປັນເຈົ້າຕົນເອງ ເປັນຕົ້ນ ໜຶ່ງ) ຕ້ອງເຊື່ອມຊຶ່ມ ແລະ ກຳແໜ້ນແນວທາງຂອງພັກ, ມະຕິ, ຄຳສັ່ງຂອງຂັ້ນເທິ່ງ ໂດຍສະເພາະມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ແຜນພັດທະເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ຂອງລັດຖະບານ ກໍຄືມະຕິກອງປະຊຸມໃຫຍ່ສະມາຊິກພັກຄັ້ງທີ II ຂອງອົງຄະນະພັກ ແລະ ແຜນພັດທະນາ 5 ປີ ຄັ້ງທີ II ຂອງ ສວສສຊ ໄປພ້ອມກັບການຈັດຕັ້ງ ແລະ ຜັນຂະຫຍາຍໃຫ້ເປັນແຜນການ, ແຜນດໍາເນີນງານ, ໂຄງການອັນລະອຽດຂອງ ສວສສຊ ໃຫ້ເປັນຮູບປະທໍາ, ສອງ) ຕ້ອງສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ຕອບສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນນະພາບການນຳພາໃນໄລຍະໃໝ່, ສາມ) ຕ້ອງຕັ້ງໜ້າເປັນເຈົ້າການ ແລະ ມີຄວາມຮັບຜິດຊອບສ້າງບັນດາຕົວແບບດີເດັ່ນດ້ານຕ່າງໆຢູ່ແຕ່ພາກສ່ວນ ທັງຕ້ອງຮູ້ສະຫລຸບບົດຮຽນຈາກຕົວແບບນັ້ນ; ຖ້າມີຕົວແບບດີເດັ່ນທີ່ດີ ຕ້ອງໄດ້ຮັບການຜັນຂະຫຍາຍອອກສູ່ທຸກການຈັດຕັ້ງຂອງ ສວສສຊ; ອັນນັ້ນ ແມ່ນການສ້າງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກຕົວຈິງ, ສີ່) ຕ້ອງໄດ້ເພີ່ມທະວີການນໍາພາ-ຊີ້ນຳ, ບັນຊາ, ຕິດຕາມ, ກວດກາ, ຕີລາຄາ ແລະ ການຈັດຕັ້ງຜັນຂະຫຍາຍທິດທາງແຜນການເປັນໜຶ່ງໃນບັນດາມາດຕະການກະຕຸ້ນ ເພື່ອສົ່ງເສີມຂະບວນການວຽກງານໃຫ້ກວ້າງຂວາງ, ແຂງແຮງ, ຟົດຟື້ນ ແລະ ຫ້າວຫັນ; ຖືເປັນຫລັກການ ແລະ ເປັນຄວາມຮັບຜິດຊອບໜ້າທີ່ການເມືອງຂອງຕົນ. ຫ້າ) ໃຫ້ຖືເອົາການຕິດຕາມຊຸກຍູ້, ກວດກາ ແລະ ຕີລາຄາວຽກງານ, ວຽກດີຄົນເດັ່ນ ທັງຍ້ອງຍໍໃຫ້ຖືກຄົນ, ຖືກວຽກ ແລະ ທັນການ ເປັນໜຶ່ງໃນບັນດາມາດຕະການກະຕຸ້ນ ເພື່ອຊຸກຍູ້ສົ່ງເສີມຂະບວນການໃຫ້ຂະຫຍາຍຕົວກວ້າງຂວາງ, ແຂງແຮງ ແລະ ມີຄວາມຟົດຟື້ນ, ຫ້າວຫັນແທ້. ພ້ອມດຽວກັນນັ້ນ, ທ່ານຍັງໄດ້ຮຽກຮ້ອງໃຫ້ທຸກພາກສ່ວນ ແລະ ອົງການຈັດຕັ້ງມະຫາຊົນ ຈົ່ງເພີ່ມທະວີການຊີ້ນໍາ-ນໍາພາ, ຕິດຕາມ, ກວດກາການຜັນຂະຫຍາຍທິດທາງແຜນການປີ 2026 ຂອງ ສວສສຊ ໃຫ້ເປັນທິດທາງລວມ ແລະ ທັງເປັນເນື້ອໃນເຂົ້າໃນວຽກງານຂອງຂົງເຂດຕົນຢ່າງເລິກເຊິ່ງ, ຮອບດ້ານ ແລະ ມີຜົນສຳເລັດ.

ພາບ-ຂ່າວ: ເພັດ ສາຍທານ

ສວສສຊ ຈັດກອງປະຊຸມສໍາມະນາວິຊາການ ໃນຫົວຂໍ້ ພູມສາດເສດຖະກິດ ແລະ ການປັບຕົວຂອງເສດຖະກິດ

ຈໍານວນຜູ້ເຂົ້າຊົມ: 2,517

ສວສສຊ ຈັດກອງປະຊຸມສໍາມະນາວິຊາການ
ໃນຫົວຂໍ້ ພູມສາດເສດຖະກິດ ແລະ ການປັບຕົວຂອງເສດຖະກິດ

ໃນລະຫວ່າງວັນທີ 11-12 ມີນາ 2026 ທີ່ຜ່ານມາ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮ່ວມກັບສະຖານທູດອົດສະຕຣາລີ ປະຈໍາ ສປປ ລາວ ໄດ້ຈັດກອງປະຊຸມສໍາມະນາວິຊາການ ພາຍໃຕ້ຫົວຂໍ້ “ພູມສາດເສດຖະກິດ ແລະ ການປັບຕົວຂອງເສດຖະກິດ (Geoeconomics and Economic Resilience) ທີ່ໂຮງແຮມສຸພັດຕາ (Souphatta Hotel) ນະຄອນຫຼວງວຽງຈັນ; ມີບັນດານັກຊ່ຽວຊານ, ນັກວິຊາການ, ຫົວໜ້າກົມ, ຮອງກົມ, ອົງການຈັດຕັ້ງສາກົນ, ມະຫາວິທະຍາໄລແຫ່ງຊາດ ແລະ ຜູ້ຕາງໜ້າຈາກພາກສ່ວນເອກະຊົນເຂົ້າຮ່ວມ.

ຈຸດປະສົງຂອງກອງປະຊຸມສໍາມະນາຄັ້ງນີ້ ແມ່ນເພື່ອນໍາສະເໜີບົດຮຽນ ແລະ ຄວາມຮູ້ກ່ຽວກັບທ່າອ່ຽງຂອງພູມສາດເສດຖະກິດໃນລະດັບສາກົນ, ຄວາມໝັ້ນຄົງທາງເສດຖະກິດ ແລະ ການສ້າງຄວາມທົນທານຕໍ່ການປ່ຽນແປງຂອງເສດຖະກິດໂລກ ພ້ອມທັງຝຶກປະຕິບັດຕົວຈິງໃຫ້ນັກສຳມະນາກອນໄດ້ທົດລອງກຳນົດວາງແຜນຍຸດທະສາດ, ມາດຕະການແກ້ໄຂ ແລະ ສ້າງຄວາມທົນທານຕໍ່ເສດຖະກິດຂອງລາວ. ກອງປະຊຸມໄດ້ແບ່ງເປັນສອງວາລະຄື: ວາລະທີໜຶ່ງ ພາຍໃຕ້ການເປັນປະທານຮ່ວມຂອງທ່ານ ນາງ ລັດດາວັນ ຊົງວິໄລ ຫົວໜ້າສະຖາບັນຄົ້ນຄວ້າເສດຖະກິດມະຫາພາກ, ສວສສຊ ແລະ ທ່ານ ນາງ ເບັນນິຕາ ຊຳເມີວິວ (Benita Sommerville) ຮອງເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ; ວາລະທີສອງ ໄດ້ຮັບກຽດເປັນປະທານຮ່ວມຂອງ ທ່ານ ປອ. ສະຖາບັນດິດ ອິນສີຊຽງໃໝ່ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ທ່ານ ນາງ ເບັນນິຕາ ຊຳເມີວິວ ຮອງເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ.

ກອງປະຊຸມຍັງໄດ້ຮັບຟັງການບັນຍາຍພິເສດໃນຫົວຂໍ້ “ນະໂຍບາຍເຊີງຍຸດທະສາດ ແລະ ການປະຕິບັດຕົວຈິງດ້ານຄວາມໝັ້ນຄົງ ແລະ ຄວາມທົນທານທາງດ້ານເສດຖະກິດ’’ ຈາກທ່ານສາດສະດາຈານ ປີເຕີ ແດັບເປີ້ (Professor Peter Draper), ຜູ້ອຳນວຍການບໍລິຫານຂອງສະຖາບັນການຄ້າຕ່າງປະເທດ, ມະຫາວິທະຍາໄລອາເດເລດ (Adelaide University) ປະເທດອົດສະຕຣາລີ ເຊິ່ງເປັນຜູ້ຊ່ຽວຊານລະດັບສາກົນດ້ານນະໂຍບາຍການຄ້າ ແລະ ການລົງທຶນ. ເຊິ່ງທ່ານໄດ້ນໍາພາສົນທະນາ ແລະ ຝຶກປະຕິບັດກ່ຽວກັບການສ້າງຄວາມເຂົ້າໃຈຕໍ່ກັບພູມສາດເສດຖະກິດໃນສະພາບການໃໝ່ຂອງພາກພື້ນ; ແນວທາງ ແລະ ການວາງບູລິມະສິດນະໂຍບາຍການສ້າງຄວາມໝັ້ນຄົງ ແລະ ຄວາມທົນທານທາງດ້ານເສດຖະກິດຂອງປະເທດ ເພື່ອປົກປ້ອງຜົນປະໂຫຍດຂອງປະເທດໃນລະບົບເສດຖະກິດໂລກ ເນື່ອງຈາກປັດຈຸບັນ ທົ່ວໂລກພວມປະເຊີນກັບຄວາມປ່ຽນແປງທາງດ້ານພູມມິລັດຖະສາດ ແລະ ສົງຄາມການຄ້າ ເຊິ່ງສົ່ງຜົນກະທົບໂດຍກົງຕໍ່ຕ່ອງໂສ້ອຸປະທານ ແລະ ສະຖຽນລະພາບເສດຖະກິດຂອງ ສປປ ລາວ.

ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ກ່າວວ່າ: ຄວາມເຂົ້າໃຈທີ່ເລິກເຊິ່ງກ່ຽວກັບພູມສາດເສດຖະກິດ ແລະ ການປັບຕົວຂອງເສດຖະກິດ ຈະເປັນປະໂຫຍດຢ່າງຍິ່ງໃຫ້ແກ່ນັກວາງແຜນນະໂຍບາຍ ໃນການປັບຕົວເຂົ້າກັບສະພາບແວດລ້ອມສາກົນທີ່ຜັນຜວນ ແລະ ຊ່ວຍໃຫ້ ສປປ ລາວ ສາມາດສ້າງຄວາມເຂັ້ມແຂງທາງດ້ານເສດຖະກິດ-ການເງິນ ພ້ອມທັງຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບໃນໄລຍະຍາວ.

ກອງປະຊຸມສຳມະນາດຳເນີນໄປດ້ວຍບັນຍາກາດອັນດີ ແລະ ອຸດົມສົມບູນໄປດ້ວຍເນື້ອໃນ, ຖືເປັນບາດກ້າວທີ່ສໍາຄັນໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືທາງດ້ານວິຊາການລະຫວ່າງ ສປປ ລາວ ແລະ ອົດສະຕຣາລີ ໃຫ້ແໜ້ນແຟ້ນຍິ່ງໆຂຶ້ນ. ໃນໂອກາດດັ່ງກ່າວ, ຄະນະນັກຊ່ຽວຊານຕ່າງປະເທດ ແລະ ນັກວິຊາການລາວ ໄດ້ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນຢ່າງກົງໄປກົງມາ ແລະ ພາວິໄສ ເພື່ອຮ່ວມກັນຊອກຫາທາງອອກ ແລະ ກຽມພ້ອມຮັບມືກັບສິ່ງທ້າທາຍທາງເສດຖະກິດໃນອະນາຄົດ.

ພາບ-ຂ່າວ: ມູນິນ ພົນສັກດາ

ສະຫະພັນແມ່ຍິງ ສວສສຊ ຈັດກິດຈະກຳສະເຫຼີມສະຫຼອງວັນແມ່ຍິງສາກົນ

ຈໍານວນຜູ້ເຂົ້າຊົມ: 298

ສະຫະພັນແມ່ຍິງ ສວສສຊ ຈັດກິດຈະກຳສະເຫຼີມສະຫຼອງວັນແມ່ຍິງສາກົນ

ເພື່ອເປັນການສ້າງຂະບວນການ ຂໍ່ານັບຊົມເຊີຍ ວັນແມ່ຍິງສາກົນ ຄົບຮອບ 116 ປີ (08 ມີນາ 1910 – 08 ມີນາ 2026) ໃຫ້ມີບັນຍາກາດຟົດຟື້ນ, ໃນວັນທີ 06 ມີນາ 2026 ທີ່ຜ່ານມາ ສະຫະພັນແມ່ຍິງຂອງສະຖາບັນວິທະ ຍາສາດເສດຖະກິດ ແລະ ສັງຄົມແຫ່ງຊາດ ຮ່ວມກັບບໍລິສັດໂຄລາວ ດີວິລັອບພິງ ໄດ້ເດີນທາງໄປມອບອຸປະກອນການຮຽນໃຫ້ນ້ອງໆນັກຮຽນ ທີ່ໂຮງຮຽນປະຖົມນາລາດ ແລະ ໂຮງຮຽນປະຖົມເພຍລາດ, ເມືອງສັງທອງ, ນະຄອນຫຼວວງວຽງຈັນ; ເຂົ້າຮ່ວມໃນກິດຈະກໍາຄັ້ງນີ້ມີ ທ່ານ ປອ. ສະຖາບັນດິດ ອີນສີຊຽງໃໝ່ ຮອງເລຂາຄະນະພັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ທ່ານ ນ. ລັດດາວັນ ຊົງວິໄລ ປະທານສະຫະພັນແມ່ຍິງ ສວສສຊ, ຜູ້ຕາງໜ້າ ບໍລິສັດໂຄລາວ ດີວິລັອບພິງ, ທ່ານ ດວງປີ ສີຄໍາມ່ວນ ກໍາມະການພັກເມືອງ, ຫົວໜ້າຫ້ອງການສຶກສາເມືອງ ພ້ອມດ້ວຍຄະນະສະມາຊິກແມ່ຍິງ ສວສສຊ, ອໍານວຍການໂຮງຮຽນ, ຄູອາ ຈານ ແລະ ນ້ອງໆນັກຮຽນ ເຊິ່ງເຄື່ອງທີ່ນໍາມາມອບປະກອບມີອຸປະກອນການຮຽນ, ເຄື່ອງອຸປະໂພກ-ບໍລິໂພກ 300 ກວ່າຊຸດ ລວມມູນຄ່າ 48,000,000 ກີບ ໂດຍການສະໜັບສະໝູນຂອງບໍລິສັດໂຄລາວ ດີວິລັອບພິງ ແລະ ປະກອບສ່ວນບັນດາສະມາຊິກຂອງອົງການຈັດຕັ້ງມະຫາຊົນ ສວສສຊ.

ໃນໂອກາດດັ່ງກ່າວ ທ່ານ ນ. ລັດດາວັນ ຊົງວິໄລ ປະທານຄະນະບໍລິຫານງານສະຫະພັນແມ່ຍິງ ສວສສຊ ໄດ້ກ່າວວ່າ: ການສຶກສາແມ່ນຮາກຖານອັນສຳຄັນຂອງການພັດທະນາໃນທຸກລະດັບ, ປະເທດຊາດຈະມີຄວາມຈະເລີນ ແລະ ສັງຄົມຈະມີສີວິໄລ ກໍແມ່ນຍ້ອນທຸກຄົນໄດ້ຮັບການສຶກສາ ແລະ ການສົ່ງເສີມການສຶກສາກໍແມ່ນໜ້າທີ່ຂອງໝົດທຸກຄົນໃນສັງຄົມ ທີ່ຕ້ອງໄດ້ຊ່ວຍກັນສະໜັບສະໝູນ. ສະນັ້ນ, ຄະນະແມ່ຍິງ ສວສສຊ ຈຶ່ງໄດ້ລະດົມວັດຖຸປັດໄຈ ເພື່ອຊື້ອຸປະກອນການສຶກສາມອບໃຫ້ແກ່ຄູອາຈານ ແລະ ນ້ອງນ້ອຍນັກຮຽນໃນຄັ້ງນີ້. ເຖິງແມ່ນວ່າມູນຄ່າທາງດ້ານວັດຖຸສິ່ງຂອງເຫຼົ່ານີ້ອາດຈະບໍ່ຫຼາຍ, ແຕ່ກໍ່ເຕັມປ່ຽມໄປດ້ວຍຄຸນຄ່າທາງດ້ານຈິດໃຈ, ຄວາມຮັກແພງ, ຄວາມຫ່ວງໃຍ ແລະ ການແບ່ງປັນນໍ້າໃຈຈາກພວກເຮົາໝົດທຸກຄົນ ທີ່ຢາກປະກອບສ່ວນໃນວັນສຳຄັນກໍຄືວັນແມ່ ຍິງສາກົນ 08 ມີນາ ຄົບຮອບ 116 ປີ ທີ່ຈະມາເຖິງນີ້ ແລະ ກໍເປັນການໃຫ້ກໍາລັງໃຈໃຫ້ຄູ-ອາຈານທຸກທ່ານ ທີ່ອຸທິດເຫື່ອແຮງ, ຄວາມຮູ້ສະຕິປັນຍາ ແລະ ຄວາມເສຍສະຫຼະ ເພື່ອເຮັດໜ້າທີ່ເປັນແມ່ພິມຂອງຊາດ ສົ່ງຕໍ່ຄວາມຮູ້ໃຫ້ແກ່ລູກຫຼານຂອງພວກເຮົາ ແລະ ເປັນຂອງຂວັນແທນກຳລັງໃຈໃຫ້ນ້ອງໆນັກ ຮຽນທຸກຄົນຈົ່ງຕັ້ງໃຈສຶກສາຮໍ່າຮຽນ, ໝັ່ນຊອກສະແຫວງຫາຄວາມຮູ້, ເປັນລູກທີ່ດີຂອງພໍ່ແມ່ ແລະ ເປັນລູກສິດທີ່ດີຂອງຄູອາຈານ. ຂໍໃຫ້ມີຄວາມກ້າຫານ, ມີຄວາມຝັນ ແລະ ເຊື່ອໝັ້ນໃນຕົນເອງ ບໍ່ວ່າພວກເຮົາຈະເກີດຢູ່ໃສ ກໍສາມາດເຕີບໃຫຍ່ກາຍເປັນຜູ້ນຳ, ຜູ້ບໍລິຫານ, ນັກທຸລະກິດ, ນັກຄົ້ນຄວ້າ ແລະ ອາຊີບອື່ນໆ ຂໍພຽງແຕ່ບໍ່ຢຸດທີ່ຈະຮຽນຮູ້ ແລະ ພັດທະນາຕົນເອງ. ຫຼັງຈາກນັ້ນໄດ້ມີການຈັດກິດຈະກໍາມ່ວນຊື່ນ ເຊິ່ງສ້າງຂະບວນການຢ່າງຟົດຟື້ນ.

ຖ່າຍພາບ: ມູນິນ ພົນສັກດາ

ຂຽນຂ່າວ: ສະຫະພັນແມ່ຍິງ ສວສສຊ

ກອງປະຊຸມໃຫຍ່ສະມາຊິກພັກ ຄັ້ງທີ II ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 812

ກອງປະຊຸມໃຫຍ່ສະມາຊິກພັກ ຄັ້ງທີ II
ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມໃຫຍ່ສະມາຊິກພັກ ຄັ້ງທີ II ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໄຂຂຶ້ນຢ່າງເປັນທາງການໃນ, ວັນທີ 03 ກັນຍາ 2025 ແລະ ດໍາເນີນເປັນເວລາ 1 ວັນເຕັມ, ໂດຍຈັດຂຶ້ນຢູ່ຫ້ອງປະຊຸມໃຫຍ່ຂອງຫ້ອງວ່າການສູນກາງພັກ, ນະຄອນຫຼວງວຽງຈັນ ພາຍໃຕ້ຄຳຂວັນ “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານວຽກງານຄົ້ນຄວ້າ, ເປັນຄັງປັນຍາທີ່ເຂັ້ມແຂງໃຫ້ແກ່ພັກ ແລະ ລັດຖະບານ, ສ້າງຜະລິດຕະພັນທີ່ມີຄຸນນະພາບອອກສູ່ສັງຄົມທັງພາຍໃນ ແລະ ຕ່າງປະເທດ” ໂດຍການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ, ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ; ມີບັນດາການນໍາພັກ-ລັດ, ອະດີດການນໍາພັກ-ລັດ, ພະນັກງານອາວຸໂສ-ບໍານານ, ຄະນະປະຈໍາພັກ, ກຳມະການຄະນະພັກ, ສະມາຊິກພັກສົມບູນ ແລະ ສຳຮອງ ພ້ອມດ້ວຍແຂກຖືກເຊີນຈາກຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ຫ້ອງວ່າການສູນກາງພັກ, ຄະນະກວດກາສູນກາງພັກ, ຄະນະພົວພັນການຕ່າງປະເທດສູນກາງພັກ ເຂົ້າຮ່ວມທັງໝົດຈຳນວນ 183ສະຫາຍ, ຍິງ 75 ສະຫາຍ. ໃນນີ້ ມີຜູ້ແທນກອງປະຊຸມ 148 ສະຫາຍ, ຍິງ 65 ສະຫາຍ. ກອງປະຊຸມໃຫຍ່ຄັ້ງນີ້ ເປັນເຫດການປະຫວັດສາດໜຶ່ງ ທີ່ມີຄວາມໝາຍຄວາມສໍາຄັນຂອງການຈັດຕັ້ງນໍາພາວຽກງານຮອບດ້ານ ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນການທົບທວນຜົນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງຕົນໃນສະໄໝທີ່ຜ່ານມາ ແລະ ວາງແຜນກຳນົດທິດທາງ, ເປົ້າໝາຍ ໃນການຈັດຕັ້ງປະຕິບັດແນວທາງນະໂຍບາຍຂອງພັກຂອງລັດໃນຊຸມປີຕໍ່ໜ້າ.

ກອງປະຊຸມໃຫຍ່ໄດ້ດຳເນີນໄປພາຍໃຕ້ບັນຍາກາດແຫ່ງຄວາມສາມັກຄີ, ຄວາມເປັນເອກະພາບ ແລະ ຄວາມຮັບຜິດຊອບສູງໃນການຄົ້ນຄວ້າບັນຫາສຳຄັນ ແລະ ຕົກລົງຮັບຮອງຢ່າງເອກະສັນ ທີ່ກອງປະຊຸມໄດ້ຍົກຂຶ້ນໃນຮ່າງບົດລາຍງານການເມືອງ, ແຜນພັດທະນາວຽກງານຄົ້ນຄວ້າວິທະຍາສາດຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າຢ່າງເລິກເຊິ່ງ, ກົງໄປກົງມາ ເຊິ່ງໄດ້ຕີລາຄາຜົນສຳເລັດ, ຜົນງານອັນພົ້ນເດັ່ນຮອບດ້ານທີ່ຍາດມາໄດ້ໄລຍະຜ່ານມາ ເປັນຕົ້ນການຄົ້ນຄວ້າປັບປຸງເນື້ອໃນລັດຖະທຳມະນູນ ສປປ ລາວ, ການແກ້ໄຂສະພາບເງິນເຟີ້ ແລະ ການເໜັງຕີງຂອງອັດຕາແລກປ່ຽນ, ການຕິດຕາມສະພາບເສດຖະກິດມະຫາພາກຂອງ ສປປ ລາວ, ໂຄງການຄົ້ນຄວ້າຂອງສະພາທິດສະດີສູນກາງພັກ, ສະພາວິທະຍາສາດແຫ່ງຊາດ ແລະ ອື່ນໆ ທີ່ນອນໃນພາລະບົດບາດຂອງສະຖາບັນ ຈຳນວນ 81 ຫົວຂໍ້ (ໂຄງການ) ເຊິ່ງໄດ້ສ້າງໜໍ່ແໜງສໍາຄັນ ໃນການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານຕໍ່ວຽກງານຄົ້ນຄວ້າວິທະຍາສາດເທື່ອລະກ້າວໃນຊຸມປີຂ້າງໜ້າ. ໄປຄຽງຄູ່ກັນ ກອງປະຊຸມຍັງໄດ້ເປັນເອກະພາບຢ່າງພາວະວິໄສຕໍ່ດ້ານຂໍ້ຄົງຄ້າງ, ຂໍ້ຂາດຕົກບົກພ່ອງໃນການນໍາພາ-ຊີ້ນໍາຂອງຄະນະພັກ ເຊິ່ງເຮັດໃຫ້ວຽກງານຈຸດສຸມບາງດ້ານບໍ່ສາມາດບັນລຸຜົນສຳເລັດຕາມຄາດໝາຍທີ່ວາງອອກ, ພ້ອມທັງຊີ້ໃຫ້ເຫັນບັນດາສາເຫດຕົ້ນຕໍ ເພື່ອກຳນົດທິດທາງມາດຕະການແກ້ໄຂທີ່ສອດຄ່ອງ ແລະ ແທດເໝາະ ຮັບປະກັນໃຫ້ແກ່ການຈັດຕັ້ງປະຕິບັດໃນຕໍ່ໜ້າມີປະສິດທິພາບ ແລະ ປະສິດທິຜົນສູງຂຶ້ນ. ເພື່ອຍູ້ແຮງການຫັນປ່ຽນຢ່າງຕັ້ງໜ້າ ກອງປະຊຸມໄດ້ຮັບຮອງເອົາບົດຮຽນທີ່ສຳຄັນຈາກພຶດຕິກຳຕົວຈິງ ເພື່ອເປັນບ່ອນອີງໃນການປັບປຸງການນໍາພາ-ຊີ້ນໍາ ແລະ ຈັດຕັ້ງປະຕິບັດນະໂຍບາຍຂອງຄະນະພັກ ເປັນຕົ້ນແມ່ນການຍົກສູງຄວາມສາມາດນໍາພາຂອງຄະນະພັກແຕ່ລະຂັ້ນ, ການປັບປຸງແບບແຜນວິທີນໍາພາ-ວິທີເຮັດວຽກ, ການຈັດວາງ ແລະ ຄຸ້ມຄອງບຸກຄະລາກອນ ຕ້ອງໄດ້ຮັບການຈັດຕັ້ງໃຫ້ຄົບຖ້ວນ ແລະ ເປັນລະບົບ, ມີການບໍາລຸງກໍ່ສ້າງສືບທອດປ່ຽນແທນຢ່າງເໝາະສົມ; ການປັບປຸງຄຸນນະພາບວຽກງານຄົ້ນຄວ້າວິທະຍາສາດຕ້ອງສົມທົບແໜ້ນລະຫວ່າງການຈັດຕັ້ງປະຕິບັດໂຄງການຢ່າງເຂັ້ມງວດ ກັບການຍົກລະດັບຄວາມຮູ້ຄວາມສາມາດທາງດ້ານວິຊາການຂອງນັກຄົ້ນຄວ້າໃຫ້ສູງຂຶ້ນ, ມີຈຸດສຸມ, ມີກົນໄກທີ່ເໝາະສົມ ແລະ ສາມາດສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ເປັນເຈົ້າຕົນເອງ; ມີການຮ່ວມມື ແລະ ມີລະບົບເຄືອຂ່າຍຄົ້ນຄວ້າທີ່ມີຄວາມເຂັ້ມແຂງ ສາມາດສະໜອງຂໍ້ມູນຂ່າວສານ, ຜົນງານຄົ້ນຄວ້າ ແລະ ແລກປ່ຽນບົດຮຽນທາງດ້ານວິຊາການຢູ່ພາຍໃນ ແລະ ຕ່າງປະເທດກວ້າງຂວາງຍິ່ງຂຶ້ນ ຮັບປະກັນໃຫ້ສະຖາບັນກາຍເປັນຄັງປັນຍາທີ່ເຂັ້ມແຂງຂອງພັກ ແລະ ລັດຖະບານຢ່າງແທ້ຈິງ.

ກອງປະຊຸມໄດ້ຮັບຟັງລາຍງານ ແລະ ບົດປະກອບຄຳເຫັນຈາກຜູ້ຕາງໜ້າຂອງ 3 ອົງການຈັດຕັ້ງມະຫາຊົນ ແລະ ຜູ້ຕາງໜ້າຈາກຂົງເຂດການຄົ້ນຄວ້າ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ. ການລາຍງານ ແລະ ປະກອບຄຳຄິດເຫັນສ່ວນຫຼາຍໄດ້ລົງເລິກ ລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກ ຄັ້ງທີ I ແລະ ເປັນເອກະພາບຕໍ່ມະຕິກອງປະຊຸມໃຫຍ່ສະມາຊິກພັກ ຄັ້ງທີ II ຂອງ ສວສສຊ ເຂົ້າໃນຂົງເຂດການຄົ້ນຄວ້າວິທະຍາສາດເສດຖະກິດ ແລະ ສັງຄົມ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງຕາມມາດຕະຖານເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກເລືອກຕັ້ງທັງໝົດ 13 ສະຫາຍ ແລະ ເລືອກໄດ້ 11 ສະຫາຍ, ຍິງ 2 ສະຫາຍ; ໃນກອງປະຊຸມຄົບຄະນະຄັ້ງປະຖົມມະລຶກຂອງຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປັນເອກະສັນກັນເລືອກເອົາເລຂາ, ຮອງເລຂາຄະນະພັກ ດັ່ງນີ້: ເລືອກເອົາ

(1) ສະຫາຍ ປອ. ກອງແກ້ວ ໄຊສົງຄາມ ເປັນເລຂາ;

(2) ສະຫາຍ ປອ. ສະຖາບັນດິດ ອິນສີຊຽງໃໝ່ ເປັນຮອງເລຂາ;

ເລືອກເອົາປະທານ ແລະ ຮອງປະທານກວດກາພັກ ດັ່ງນີ້:

1) ສະຫາຍ ປອ. ໄຊສົງຄາມ ມະໂນທັມ ເປັນປະທານກວດກາ;

2) ສະຫາຍ ບຸນລັດ ແກ້ວອາສາ ເປັນຮອງປະທານກວດກາ

3) ສະຫາຍ ຄຳປະເສີດ ທຳມະວົງ ເປັນຄະນະກວດກາ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກສະຫາຍ ນາງ ສີໃສ ລືເດດມູນສອນ, ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງໄດ້ຕີລາຄາສູງຕໍ່ຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ໄດ້ມີຄວາມເອົາໃຈໃສ່ໃນການຈັດຕັ້ງຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງຂອງພັກ ເຂົ້າສູ່ວຽກງານຂະແໜງການຂອງຕົນ ເວົ້າລວມ, ເວົ້າສະເພາະແມ່ນ ການຄົ້ນຄວ້າວິທະຍາສາດເສດຖະກິດ ແລະ ສັງຄົມ ຮັບໃຊ້ເຂົ້າໃນການຄົ້ນຄວ້າທິດສະດີຂອງພັກ, ຊຸກຍູ້ການປະຕິບັດແຜນພັດທະນາເສດຖະກິດ ແລະ ສັງຄົມແຫ່ງຊາດຂອງລັດ, ແກ້ໄຂ ແລະ ສ້າງສະຖຽນລະພາບທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ, ນໍາພາປະເທດຊາດຫລຸດພົ້ນຈາກສະຖານະປະເທດດ້ອຍພັດທະນາ, ປະເທດຊາດຮັ່ງມີເຂັ້ມແຂງຂຶ້ນເທື່ອລະກ້າວ. ເພື່ອປະຕິບັດໜ້າທີ່ການເມືອງດັ່ງກ່າວໃຫ້ສໍາເລັດ ແລະ ປະກອບສ່ວນບູລະນະແນວທາງນະໂຍບາຍຂອງພັກ ຄື ປົກປັກຮັກສາ ແລະ ສ້າງສາພັດທະນາປະເທດຊາດ ກ້າວຂຶ້ນສູ່ຈຸດໝາຍສັງຄົມນິຍົມນັ້ນ ຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ຜູ້ແທນກອງປະຊຸມ ຈະຕ້ອງໄດ້ກຳແໜ້ນບາງບັນຫາສຳຄັນ ດັ່ງນີ້:

ໜຶ່ງ: ຄະນະພັກຊຸດໃໝ່ ຕ້ອງເພີ່ມທະວີການສຶກສາອົບຮົມການເມືອງແນວຄິດໃຫ້ສະມາຊິກພະນັກງານ, ນັກຄົ້ນຄວ້າ, ນັກວິທະຍາສາດ ໃຫ້ຮັບຮູ້ເຂົ້າໃຈເຖິງແນວທາງນະໂຍບາຍຂອງພັກ, ກົດລະບຽບ, ກົດໝາຍ ແລະ ລະບຽບການຕ່າງໆ; ປັບປຸງການຈັດຕັ້ງພັກແຕ່ລະຂັ້ນໃຫ້ເຂັ້ມແຂງ, ຄົບຖ້ວນ ແລະ ມີຫຼາຍຮຸ່ນ ເພື່ອກໍ່ສ້າງຮຸ່ນສືບທອດປ່ຽນແທນ; ປັບປຸງກົງຈັກ, ຕໍາແໜ່ງງານໃຫ້ກະທັດຮັດ, ມີປະສິດທິພາບ, ຍົກສູງຄວາມຮັບຜິດຊອບໜ້າທີ່ການເມືອງ ແລະ ປະຕິບັດໜ້າທີ່ວຽກງານຢ່າງມີຜົນສຳເລັດ; ເອົາໃຈໃສ່ຕິດຕາມກວດກາການຜັນແປຂອງສະພາບແນວຄິດຂອງສະມາຊິກພັກ, ພະນັກງານລັດຖະກອນ ເພື່ອມີວິທີການນໍາພາ, ແກ້ໄຂທີ່ຖືກຕ້ອງ ແລະ ທັນການກໍ່ສ້າງສະມາຊິກພັກພະນັກງານມີຄວາມປອດໃສ, ເຂັ້ມແຂງ ແລະ ໜັກແໜ້ນຍິ່ງຂຶ້ນ;

ສອງ: ຄະນະພັກຊຸດໃໝ່ ຕ້ອງຍຶດໝັ້ນຫຼັກການຂອງພັກຢ່າງໜັກແໜ້ນ, ປະຕິບັດຫຼັກການລວມສູນປະຊາທິປະໄຕ, ມີການແບ່ງໜ້າທີ່ຄວາມຮັບຜິດຊອບຢ່າງລະອຽດ, ຈະແຈ້ງ; ປັບປຸງແບບແຜນວິທີນໍາພາ-ວິທີເຮັດວຽກໃຫ້ຮັດກຸມ, ມີປະສິດທິພາບ; ເອົາໃຈໃສ່ວຽກງານຕິດຕາມ-ກວດກາພັກ, ກວດກາລັດ, ການສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ເປັນປົກກະຕິ ເພື່ອກວດຄືນບັນດາຄາດໝາຍ ກໍຄືການຈັດຕັ້ງປະຕິບັດບັນດາມະຕິ, ຄຳສັ່ງ, ໜ້າທີ່ວຽກງານຕ່າງໆ ທີ່ຂັ້ນເທິງ ແລະ ຄະນະພັກຂັ້ນຂອງຕົນວາງອອກແຕ່ລະໄລຍະ; ປັບປຸງວຽກງານອົງການຈັດຕັ້ງມະຫາຊົນຂອງພັກໃຫ້ເຂັ້ມແຂງ, ສ້າງເງື່ອນໄຂໃຫ້ແຕ່ລະອົງການເຄື່ອນໄຫວປະຕິບັດໜ້າທີ່ຖືກຕ້ອງຕາມພາລະບົດບາດຂອງຕົນ ເພື່ອເປັນກຳລັງແຮງທີ່ສຳຄັນໃຫ້ແກ່ຄະນະພັກແຕ່ລະຂັ້ນ;

ສາມ: ເພື່ອຮັກສາມູນເຊື້ອອັນດີ ແລະ ເສີມຂະຫຍາຍຜົນສໍາເລັດດ້ານການຄົ້ນຄວ້າໃຫ້ຍິ່ງໃຫຍ່ກວ່າເກົ່າ, ຄະນະພັກ ສວສສຊ ຕ້ອງເພີ່ມທະວີການຈັດຕັ້ງນໍາພາ-ຊີ້ນໍາ ແລະ ສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານວຽກງານການຄົ້ນຄວ້າວິທະຍາສາດໃນຕໍ່ໜ້າໃຫ້ມີຄວາມໜັກແໜ້ນ, ເຂັ້ມແຂງ ໃຫ້ເປັນຄັງປັນຍາທີ່ເຂັ້ມແຂງໃຫ້ແກ່ພັກ ແລະ ລັດຖະບານ; ເສີມຂະຫຍາຍຢ່າງແຂງແຮງດ້ານສະຕິປັນຍາ ແລະ ຫົວຄິດປະດິດສ້າງ ໃຫ້ມີການຫັນປ່ຽນການຄົ້ນຄວ້າໄປສູ່ຄຸນນະພາບໃໝ່, ນໍາພາ-ຊີ້ນໍາການຄົ້ນຄວ້າຢ່າງມີວິທະຍາສາດ ແລະ ມີຄຸນນະພາບສູງ, ເຜີຍແຜ່ຜົນການຄົ້ນຄວ້າວິທະຍາສາດເສດຖະກິດ-ສັງຄົມ ເພື່ອຮັບໃຊ້ເຂົ້າໃນການວາງແນວທາງນະໂຍບາຍຂອງພັກ, ຍຸດທະສາດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ; ການຄົ້ນຄວ້າວິທະຍາສາດໃນຕໍ່ໜ້າຕ້ອງຫັນໄປສູ່ການຄົ້ນຄວ້ານໍາໃຊ້ ແລະ ພັດທະນາໃຫ້ຫຼາຍຂຶ້ນ ຕິດພັນກັບການຫັນເປັນທັນສະໄໝ, ຫັນເປັນດີຈີຕອນ ແລະ ປັນຍາປະດິດ;

ສີ່: ຕ້ອງຖືສຳຄັນ ແລະ ເອົາໃຈໃສ່ໃນການບໍາລຸງກໍ່ສ້າງພະນັກງານບຸກຄະລາກອນໃຫ້ມີລະດັບຄວາມຮູ້ຄວາມສາມາດສູງ ເພື່ອກໍ່ສ້າງຖັນແຖວນັກຄົ້ນຄວ້າ, ນັກຊ່ຽວຊານ, ນັກວິທະຍາສາດໃຫ້ມີຄວາມເຂັ້ມແຂງ, ສາມາດຄົ້ນຄວ້າທາງດ້ານທິດສະດີ, ພຶດຕິກຳ ແລະ ການປະຍຸກນໍາໃຊ້ ຮັບໃຊ້ການວາງແຜນ ແລະ ຈັດຕັ້ງປະຕິບັດໃຫ້ສຳເລັດຜົນ; ສ້າງແຫຼ່ງການຮຽນຮູ້ ແລະ ສະໜອງເຕັກນິກວິຊາການ, ບົດຮຽນທີ່ດີໃຫ້ແກ່ພາກສ່ວນກ່ຽວຂ້ອງ ແລະ ສັງຄົມ ໂດຍມີການປະສານສົມທົບເຊິ່ງກັນ ແລະ ກັນ ເພື່ອເປັນກໍາລັງແຮງຊຸກຍູ້ໃຫ້ແກ່ການຂະຫຍາຍຕົວຢ່າງໝັ້ນທ່ຽງ ແລະ ຍືນຍົງໃນຕໍ່ໜ້າ.

ຫ້າ: ເພີ່ມທະວີການພົວພັນຮ່ວມມືກັບບັນດາປະເທດເພື່ອນມິດ, ພາກພື້ນ ແລະ ສາກົນ ໃຫ້ກວ້າງຂວາງ, ເລິກເຊິ່ງ ແລະ ຫຼາຍຮູບແບບ ໂດຍສະເພາະການຮ່ວມມືດ້ານການຄົ້ນຄວ້າວິທະຍາສາດເສດຖະກິດ-ສັງຄົມ, ເຕັກໂນໂລຊີ ແລະ ອື່ນໆ ກັບບັນດາສະຖາບັນຄົ້ນຄວ້າ, ອົງການສາກົນ ແລະ ອົງການທາງສັງຄົມ ເພື່ອແລກປ່ຽນ-ຖອດຖອນບົດຮຽນ ແລະ ສຶກສາເອົາຜົນຄົ້ນຄວ້າຕ່າງໆ ທີ່ເປັນຜົນປະໂຫຍດມາໝູນໃຊ້ເຂົ້າໃນການພັດທະນາຂອງລາວ ໃຫ້ມີໝາກຜົນສູງ.

ກອງປະຊຸມໄດ້ເຫັນດີຮັບຮອງ ແລະ ຍົກບັດລົງປະຊາມະຕິຢ່າງເປັນເອກະສັນຕໍ່ມະຕິກອງປະຊຸມໃຫຍ່ສະມາຊິກພັກ ຄັ້ງທີ II ແລະ ຮຽກຮ້ອງມາຍັງບັນດາສະມາຊິກພັກ, ພະນັກງານ-ລັດຖະກອນທົ່ວສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈົ່ງນໍາເອົາຜົນສໍາເລັດ ແລະ ເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງນີ້ ໄປຈັດຕັ້ງຄົ້ນຄວ້າ, ເຊື່ອມຊຶມ, ກໍາແໜ້ນ ແລະ ຜັນຂະຫຍາຍເປັນແຜນການ, ແຜນງານລະອຽດ ພ້ອມກັນເຊີດຊູສະຕິປັນຍາ ແລະ ຄວາມຮັບຜິດຊອບ, ຄວາມເປັນເຈົ້າຈັດຕັ້ງປະຕິບັດໃຫ້ເກີດໝາກຜົນຕົວຈິງ.

ຂຽນຂ່າວ ແລະ ຖ່າຍພາບ: ສູນຂໍ້ມູນຂ່າວສານ ແລະ ຝຶກອົບຮົມ

ສວສສຊ ວາງກະຕ່າດອກໄມ້ອະນຸສອນສະຖານ ປະທານ ໄກສອນ ພົມວິຫານ

ຈໍານວນຜູ້ເຂົ້າຊົມ: 601

ສວສສຊ ວາງກະຕ່າດອກໄມ້ອະນຸສອນສະຖານ ປະທານ ໄກສອນ ພົມວິຫານ

ເນື່ອງໃນໂອກາດກະກຽມເຂົ້າສູ່ການດໍາເນີນກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຊິ່ງຈະໄດ້ຈັດຂຶ້ນໃນວັນທີ 03 ກັນຍາ 2025 ນີ້. ຕາງໜ້າຄະນະຜູ້ແທນກອງປະຊຸມນໍາໂດຍ ສະຫາຍ ປອ. ກອງແກ້ວ ໄຊ ສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ ພ້ອມດ້ວຍຄະນະປະຈໍາພັກ, ກໍາມະການຄະນະພັກ, ຄະນະໜ່ວຍພັກ ແລະ ສາມອົງການຈັດຕັ້ງມະຫາຊົນ ໄດ້ເຂົ້າໄດ້ວາງກະຕ່າດອກໄມ້ຢູ່ຕໍ່ໜ້າຮູບປັ້ນຫຼໍ່ປະທານ ໄກສອນ ພົມວິຫານ ທີ່ຫໍພິພິດຕະພັນ ປະທານໄກສອນພົມ ວິຫານ ເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຕໍ່ຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິດຕົນໃນພາລະ ກິດປະຕິວັດຢ່າງອົງອາດກ້າຫານ. ພາຍໃຕ້ການນຳພາ-ຊີ້ນຳທີ່ສະຫຼາດສ່ອງໃສ ແລະ ປີຊາສາມາດຂອງພັກປະຊາ ຊົນປະຕິວັດລາວ, ສະມາຊິກພັກ-ພະນັກງານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດຂໍຈົດຈຳລຳລຶກ, ກະຕັນຍູຮູ້ບຸນຄຸນຢ່າງເລິກເຊິ່ງ ແລະ ຈະພ້ອມກັນສືບທອດພາລະກິດຂອງພັກ, ຂອງລັດ ແລະ ຂອງປະຊາ ຊົນ ໂດຍເຮັດທຸກຢ່າງເພື່ອພັກ, ເພື່ອລັດ ແລະ ເພື່ອປະຊາຊົນ ປະກອບສ່ວນຢ່າງຕັ້ງໜ້າເຂົ້າໃນການສ້າງສາ ແລະ ພັດທະນາປະເທດຊາດໃຫ້ມີຄວາມຈະເລີນຮຸ່ງເຮື່ອງສີວິໄລ, ນຳພາປະເທດຊາດກ້າວເດີນສູ່ຈຸດໝາຍສັງຄົມນິຍົມຢ່າງມີໄຊ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ຈັດຕັ້ງທາບທາມບຸກຄະລາກອນ ຮອບທີ 2

ຈໍານວນຜູ້ເຂົ້າຊົມ: 519

ສວສສຊ ຈັດຕັ້ງທາບທາມບຸກຄະລາກອນ ຮອບທີ 2

ກອງປະຊຸມທາບທາມບຸກຄະລາກອນ ຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງ ຄົມແຫ່ງຊາດ ສະໄໝທີ II ຮອບທີ 2 ໄດ້ຈັດຂຶ້ນໃນວັນທີ 21 ສິງຫາ 2025 ທີ່ຫ້ອງປະຊຸມ ສວສສຊ ພາຍໃຕ້ການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ; ມີບັນດາສະຫາຍຄະນະປະຈຳພັກ, ກໍາມະການຄະນະພັກ, ເລຂາໜ່ວຍພັກ ແລະ ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກ ພ້ອມດ້ວຍສະມາຊິກພັກສົມບູນ ແລະ ສຳຮອງ ເຂົ້າຮ່ວມ.

ກອງປະຊຸມຄັ້ງນີ້ ໄດ້ຮັບຟັງການຜ່ານຮ່າງບົດລາຍງາຍການເມືອງ, ແຜນພັດທະນາວຽກງານຄົ້ນຄວ້າ 5 ປີ (2026-2030) ແລະ ບົດສໍາຫຼວດການນໍາພາລວມຂອງອົງຄະນະພັກ ສວສສຊ ສະໄໝທີ I. ພ້ອມກັນນີ້, ກອງປະຊຸມຍັງໄດ້ຮັບຟັງການປະກອບຄຳຄິດຈາກບັນດາສະມາຊິກພັກ ໂດຍສະເພາະແມ່ນບັນຫາທີ່ຍັງຄົງຄ້າງ ທີ່ຈະໄດ້ພ້ອມກັນສືບຕໍ່ແກ້ໄຂ ແລະ ເຮັດໃຫ້ສຳເລັດໃນຕໍ່ໜ້າ. ຈາກນັ້ນ ທ່ານ ນ. ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານມາດຕະຖານ ແລະ ເງື່ອນໄຂຂອງຜູ້ອອກຮັບສະໝັກເລືອກຕັ້ງຄະນະບໍລິ ຫານງານພັກ ສວສສຊ ຊຸດໃໝ່ ເພື່ອເປັນບ່ອນອີງໃຫ້ແກ່ຜູ້ແທນກອງປະຊຸມໄດ້ນຳໄປຄົ້ນຄວ້າເລືອກເຟັ້ນເອົາຜູ້ມີມາດ ຕະຖານເງື່ອນໄຂຄົບຖ້ວນ ຕາມທີ່ໄດ້ກໍານົດໄວ້ ເຂົ້າໃນກອງປະຊຸມໃຫຍ່.

ໂອກາດນີ້, ສະຫາຍ ປອ. ກອງແກ້ວ ໄຊສົງຄາມ ໄດ້ຮຽກຮ້ອງມາຍັງສະມາຊິກພັກພະນັກງານທີ່ເຂົ້າຮ່ວມກອງປະຊຸມ ຈົ່ງຍົກສູງສະຕິຄວາມຮັບຜິດຊອບການເມືອງ ແລະ ນຳໃຊ້ສິດປະຊາທິປະໄຕ ປ່ອນບັດທາບທາມຜູ້ສະໝັກເລືອກຕັ້ງ ເຂົ້າໃນຄະນະບໍລິຫານງານພັກ ສວສສຊ ສະໄໝທີ II ໃນຄັ້ງນີ້ ໃຫ້ຖືກຕ້ອງຕາມລະບຽບຫຼັກການ ຮັບ ປະກັນທາງດ້ານເພດ-ເຜົ່າ, ໃຫ້ມີລຸ້ນອາວຸໂສ, ລຸ້ນກາງ ແລະ ລຸ້ນໜຸ່ມ, ເປັນຜູ້ທີ່ມີຜົນງານດີເດັ່ນ, ມີຄວາມຮູ້ຄວາມສາມາດ ແລະ ມີວິໄສທັດ ໃນການນໍາພາຈັດຕັ້ງນໍາພາວຽກງານຄົ້ນຄວ້າວິທະຍາສາດໃນຕໍ່ໜ້າ. ຈາກນັ້ນ ຄະນະຮັບຜິດ ຊອບກອງປະຊຸມໄດ້ດໍາເນີນການປ່ອນບັດທາບທາມບຸກຄະລາກອນ ຮອບທີ 2 ສຳເລັດຕາມແຜນທີ່ວາງໄວ້.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນິນ ພົນສັກດາ

ການນຳ ສວສສຊ ອວຍພອນວັນຊາດ ຫວຽດນາມ

ຈໍານວນຜູ້ເຂົ້າຊົມ: 578

ການນຳ ສວສສຊ ອວຍພອນວັນຊາດ ຫວຽດນາມ

ໃນວັນທີ 20 ສິງຫາ 2025 ຄະນະນໍາສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳໂດຍ ສະຫາຍ ນ. ແກ້ວວິວອນ ອຸດທະຈັກ ຄະນະປະຈຳພັກ ຮອງປະທານ ສວສສຊ ພ້ອມຄະນະ ໄດ້ເຂົ້າອວຍພອນ ທ່ານ ຫງວຽນ ມິງ ເຕີມ ເອກອັກຄະລັດຖະທູດ ສສ ຫວຽດນາມ ປະຈຳລາວ ເນື່ອງໃນໂອກາດສະເຫຼີມສະຫຼອງ ວັນສະຖາປານາ ສາທາລະນະລັດ ສັງຄົມນິຍົມຫວຽດນາມ ຄົບຮອບ 80 ປີ (2/9/1945-2/9/2025).

ໂອກາດນີ້ ທ່ານ ນ. ແກ້ວວິວອນ ອຸດທະຈັກ ໄດ້ຕາງໜ້າໃຫ້ຄະນະພັກ ສວສສຊ ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດອັນໃຫຍ່ຫຼວງຮອບດ້ານ ມີຄວາມໝາຍປະຫັວດສາດ ທີ່ປະຊາຊົນຫວຽດນາມຍາດມາໄດ້ຕະຫຼອດໄລຍະ 80 ປີ ຜ່ານມາ, ພາຍໃຕ້ການນຳພາອັນປີຊາສາມາດ ຖືກຕ້ອງ ສະຫຼາດສ່ອງໃສ ຂອງພັກກອມມູນິດຫວຽດນາມ ອັນເຮັດໃຫ້ ສສ ຫວຽດນາມ ສືບຕໍ່ມີສະຖຽນລະພາບ ທາງດ້ານການເມືອງ ຢ່າງໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ວຽກງານປ້ອງກັນຊາດ-ປ້ອງກັນຄວາມສະຫງົບມີຄວາມໝັ້ນທ່ຽງເຂັ້ມແຂງ ສັງຄົມມີຄວາມເປັນລະບຽບຮຽບຮ້ອຍ ຊີວິດການເປັນຢູ່ຂອງປະຊາຊົນຫວຽດນາມໄດ້ຮັບການປັບປຸງດີຂຶ້ນເປັນກ້າວໆ.

ສະຫາຍ ຫງວຽນ ມິງ ເຕີມ ໄດ້ສະແດງຄວາມຂອບໃຈຕໍ່ ສະຫາຍ ນ. ແກ້ວວິວອນ ອຸດທະຈັກ ທີ່ໄດ້ນຳພາຄະນະມາອວຍພອນໃນໂອກາດ ວັນສະຖາປານາ ສສ ຫວຽດນາມ ຄົບຮອບ 80ປີ. ພ້ອມທັງຕີລາຄາສູງ ຕໍ່ການພົວພັນຮ່ວມມືລະຫວ່າງ ສອງພັກ ຊຶ່ງນັບມື້ນັບກ້າວໜ້າເຂົ້າສູ່ລວງເລິກ ແລະ ເປັນພື້ນຖານອັນສຳຄັນ ໃຫ້ແກ່ການພົວພັນຮ່ວມມືໃນຂົງເຂດຕ່າງໆ ຂອງສອງປະເທດ; ຕີລາຄາສູງຕໍ່ການປະສານສົມທົບຢ່າງແໜ້ນແຟ້ນ ລະຫວ່າງສະຖານທູດຫວຽດນາມ ແລະ ສວສສຊ ອັນໄດ້ປະກອບສ່ວນໃນການເພີ່ມພູນຄູນສ້າງ ສາຍສຳພັນອັນເປັນມູນເຊື້ອ, ຄວາມສາມັກຄີພິເສດ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນ ທີ່ມະຫາວິທະຍາໄລແຫ່ງຊາດລາວ

ຈໍານວນຜູ້ເຂົ້າຊົມ: 562

ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນ ທີ່ມະຫາວິທະຍາໄລແຫ່ງຊາດລາວ

ວັນທີ 16 ສິງຫາ 2025 ທີ່ຜ່ານມາ ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນໍາໂດຍ ປອ. ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເຂົ້າຮ່ວມກອງປະຊຸມສໍາມະນາວິທະຍາສາດສາກົນ ຄັ້ງທີ VI ພາຍໃຕ້ຫົວຂໍ້: “ບົດຮຽນການກຳອຳນາດຂອງພັກການເມືອງທີ່ຖືທິດສະດີມາກ-ເລນິນ” ເຊິ່ງຈັດຂຶ້ນຢູ່ມະຫາວິທະຍາໄລແຫ່ງຊາດລາວ ໂດຍການເປັນເຈົ້າພາບຂອງມະຫາວິທະຍາໄລແຫ່ງຊາດລາວ, ມີບັນດາຄູ ອາຈານ, ນັກຄົ້ນຄວ້າ, ວິທະຍາກອນ ແລະ ແຂກຖືກເຊີນມາຈາກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະພາບັນດິດວິທະຍາສາດສັງຄົມຫວຽດນາມ, ສະມາຄົມປັດຊະຍາຫວຽດນາມ, ມະຫາວິທະຍາໄລກວາງຊີ ແລະ ມະຫາວິທະຍາໄລຊານຕົງ ສປ. ຈີນ ເຂົ້າຮ່ວມຈຳນວນ 120 ທ່ານ.

ໃນພິທີ ທ່ານ ປອ. ກອງແກ້ວ ໄຊສົງຄາມ ໃຫ້ຮູ້ວ່າ: ພັກປະຊາຊົນປະຕິວັດລາວ ຍຶດໝັ້ນ ລັດທິມາກ-ເລນິນ, ແນວຄິດໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນພື້ນຖານແນວຄິດ, ທິດສະດີຂອງພັກ, ເປັນເຂັມຊີ້ທິດ ໃຫ້ການຈັດຕັ້ງ ແລະ ການ ເຄື່ອນໄຫວຂອງພັກ. ເປັນພັກກໍາອໍານາດ, ເປັນແກນນໍາໃນລະບົບການເມືອງ ຂອງລະບອບປະຊາທິປະໄຕປະຊາຊົນ, ນຳພາປະຊາຊົນບັນດາເຜົ່າ ປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ກໍ່ສ້າງລະ ບອບປະຊາທິປະໄຕປະຊາຊົນ ຕາມຈຸດໝາຍສັງຄົມນິຍົມ, ພັກປະຊາຊົນປະຕິວັດລາວ ກໍ່ສ້າງ ແລະ ປັບປຸງຕົນເອງ ຕາມ 5 ຫຼັກການ, 3 ທິດນໍາ

ແຕ່ເຖິງຢ່າງໃດກໍ່ຕາມ, ການປ່ຽນແປງໃໝ່ດັ່ງກ່າວ ຂອງພັກ ປະຊາຊົນ ປະຕິວັດ ລາວ ແມ່ນໄດ້ດຳເນີນ ບົນພື້ນຖານຫຼັກການ ຢືດໝັ້ນໃນລັດທິມາກ-ເລນິນ ແລະ ແນວທາງການກ້າວ ຂຶ້ນສູ່ສັງຄົມນິຍົມ ຢ່າງໝຽວແໜ້ນ. ເຊິ່ງເປັນອັນພົ້ນເດັ່ນ ແຕກຕ່າງ ກັບ ການປ່ຽນແປງໃໝ່ ຂອງລາຍປະເທດ ອະດີດສັງຄົມນິຍົມ ຢູ່ ທະວີບ ເອີລົບ.

ຜ່ານ ການຄົ້ນຄວ້າ ແລະ ໝູນໃຊ້ ທິດສະດີ ມາກ-ເລນິນ ເຂົ້າໃນພາລະກິດ ຕໍ່ສູ້ກູ້ຊາດ ກໍ່ຄື ໃນການປົກປັກຮັກສາ ແລະ ພັດທະນາປະເທດຊາດ ຂອງພັກປະຊາຊົນປະຕິວັດລາວ ສາມາດຖອດຖອນໄດ້ບາງບົດຮຽນ ໄດ້ຄື:

ໜື່ງ:ພັກປະຊາຊົນປະຕິວັດລາວ ເປັນຜູ້ນໍາພາໂດຍກົງ-ຮອບດ້ານ, ເດັດຂາດ ເປັນແກນກາງ ໃນລະບົບການເມືອງ ແລະ ການປົກຄອງ ຢູ່ ສປປ ລາວ ເພື່ອຮັບປະກັນ ການບູລະນະລະບອບປະຊາທິປະໄຕ ປະຊາຊົນຕາມເສັ້ນທາງກ້າວຂຶ້ນສັງຄົມນິຍົມ ຢູ່ ສປປ ລາວ; ສອງ: ຢືດໝັ້ນ ລັດທິມາກ-ເລນິນ ແລະ ແນວທາງ ກ້າວຂຶ້ນສູ່ສັງຄົມນິຍົມ ຢ່າງໜັກແໜ້ນ ໂດຍບໍ່ ຫວັ່ນໄຫວ ຄອນແຄນ ຕໍ່ສະພາບການປ່ຽນແປງໃດໆຂອງພາກພື້ນ, ຂອງໂລກ; ສາມ: ໝູນໃຊ້ ທິດສະດີມາກ-ເລນິນ ຢ່າງມີຫົວຄິດປະດິດສ້າງ, ແທດເໝາະກັບສະພາບການຕົວຈິງຂອງໂລກ ແລະ ສະພາບການພາຍໃນປະເທດ ແຕ່ລະໄລຍະ; ຫຼີກລ້ຽງ ການນຳໃຊ້ ທິດສະດີດັ່ງກ່າວ ແບບອັດຕະວິໄສ, ຄຳພີຕາຍຕົວ; ສີ່: ສຸມໃສ່ພັດທະນາກຳລັງການຜະລິດໃຫ້ເຕີບໃຫຍ່ຂະຫຍາຍຕົວຢ່າງແຂງແຮງ ແລະ ວ່ອງໄວ ເພື່ອຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນຢ່າງບໍ່ຢຸດຢັ້ງ ສ້າງປະຖົມປັດໃຈ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ ເທື່ອລະກ້າວ ດ້ວຍຫຼາຍຮູບການ, ຫຼາຍວິທີການ ແລະ ມາດຕາການ.

ສະຫຼຸບແລ້ວ ໃນຕະຫຼອດປະຫວັດສາດການເມືອງຂອງພັກການເມືອງ ທີ່ຍຶດຖືລັັດທິມາກ-ເລນິນ ຍາມໃດກໍ່ລ້ວນແຕ່ໄດ້ຍຶດໝັ້ນທິດສະດີວິທະຍາສາດເປັນທິດຊີ້ນຳ, ອີງໃສ່ຈຸດຢືນຂອງປະຊາຊົນເປັນພື້ນຖານ, ແລະ ໄດ້ຍຶດໝັ້ນທິດທາງພັດທະນາຂອງຕົນ ໃນຍຸກສະໄໝ. ບໍ່ວ່າຈະຢູ່ໃສ, ຄວາມມຸ່ງມາດປາດຖະໜາ ແລະ ພາລະກິດ ອັນສະເໝີຕົ້ນສະເໝີປາຍຂອງ ພັກການເມືອງ ທີ່ຍຶດຖືລັັດທິມາກ-ເລນິນ ກໍ່ແມ່ນການສະແຫວງຫາຄວາມຜາສຸກໃຫ້ແກ່ປະຊາຊົນ ແລະ ການພັດທະນາຂອງປະເທດນັ້ນໆ. ບົດຮຽນພຶດຕິກໍາຕົວຈິງ ແລະ ແນວຄິດທິດສະດີ, ທີ່ໄດ້ແບ່ງປັນຈາກນັກສຳມະນາກອນໃນຄັ້ງນີ້ ສະແດງໃຫ້ເຫັນຄວາມມີຊີວິດຊີວາ ໃນຄົ້ນຄວ້າບົດຮຽນການກຳອຳນາດຂອງພັກການເມືອງ ທີ່ຍຶດຖືລັັດທິມາກ-ເລນິນ ແລະ ກໍ່ໄດ້ສ້າງຂົວມິດຕະພາບອັນໝັ້ນແກ່ນໃນການແລກປ່ຽນຢ່າງເລິກເຊິ່ງໃນເວທີວິຊາການສາກົນ. ການຊຸກຍູ້ການກໍ່ສ້າງປະຊາຄົມຮ່ວມຊາຕາກຳ ຂອງຈີນ, ລາວ ແລະ ຫວຽດນາມ ບໍ່ພຽງແຕ່ແມ່ນການນຳໃຊ້ແນວຄວາມຄິດຂອງ ລັດທິມາກ-ເລນິນ ໃນຄວາມເວົ້າທີ່ວ່າ “ຄອບຄົວດຽວກັນໃນໂລກນີ້” ເທົ່ານັ້ນ, ແຕ່ຍັງເປັນທາງເລືອກທີ່ແນ່ນອນຂອງຜົນປະໂຫຍດລວມຂອງປະຊາຊົນບັນດາປະເທດ.