ສິງຫາ 2026 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສວສສຊ ອວຍພອນວັນຊາດຫວຽດນາມ ຄົບຮອບ 81 ປີ

ຈໍານວນຜູ້ເຂົ້າຊົມ: 245

ສວສສຊ ອວຍພອນວັນຊາດຫວຽດນາມ ຄົບຮອບ 81 ປີ

ໃນວັນທີ 27 ສິງຫາ 2026 ທີ່ສະຖາທູດຫວຽດນາມ ປະຈໍາລາວ, ສະຫາຍ ປອ. ລີເບີ ລີບົວປາວ, ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ເຂົ້າພົບສະຫາຍ ຫງວຽນ ມິ່ງ ເຕີມ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ. ຫວຽດນາມ ປະຈຳລາວ ເພື່ອອວຍພອນວັນຊາດ ສສ. ຫວຽດນາມ ຄົບຮອບ 81 ປີ (02 ກັນຍາ 1945- 02 ກັນຍາ 2026) ທີ່ໝູນວຽນມາຮອດ.

ໃນໂອກາດທີ່ມີຄວາມໝາຍສໍາຄັນນີ້, ສະຫາຍ ປອ. ລີເບີ ລີບົວປາວ ໄດ້ກ່າວອວຍພອນໃຫ້ສະຫາຍ ຫງວຽນ ມິ່ງ ເຕີມ ຈົ່ງມີສຸຂະພາບແຂງແຮງ ແລະ ປະສົບຜົນສໍໍາເລັດໃນການປະຕິບັດໜ້າທີ່ຢູ່ ສປປ ລາວ, ສືບຕໍ່ເປັນຂົວຕໍ່ໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງຊາດ, ສອງສະຖາບັນ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດໄປ. ພ້ອມກັນນັ້ນ, ຍັງໄດ້ສົ່ງຄໍາອວຍພອນອັນຈິງໃຈໄປເຖິງພັກ, ລັດຖະບານ ແລະ ປະຊາຊົນຫວຽດນາມ ຈົ່ງປະສົບຜົນສໍໍາເລັດໃນພາລະກິດສ້າງສາ ແລະ ພັດທະນາປະເທດຊາດ ຕາມຈຸດມຸ່ງໝາຍທີ່ວາງໄວ້.

ພ້ອມນີ້, ສະຫາຍ ຫງວຽນ ມິ່ງ ເຕີມ ກໍໄດ້ສະແດງຄວາມຂອບໃຈຢ່າງສຸດຊຶ້ງຕໍ່ຄະນະນຳ ສວສສຊ ທີ່ໄດ້ອວຍພອນ ແລະ ຮ່ວມສະເຫຼີມສະຫຼອງວັນຊາດຫວຽດນາມ ຄົບຮອບ 81 ປີ ຢ່າງມີຄວາມໝາຍ, ທັງຕີລາຄາສູງຕໍ່ມູນເຊື້ອແຫ່ງຄວາມສາມັກຄີແບບພິເສດ ຫວຽດນາມ-ລາວ ໂດຍສະເພາະແມ່ນການຮ່ວມມືດ້ານວິຊາການ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ສະຖາບັນບັນດິດວິທະຍາສາດສັງຄົມຫວຽດນາມ ທີ່ນັບມື້ກ້າວເຂົ້າສູ່ລ່ວງເລິກຢ່າງບໍ່ຢຸດຢັ້ງ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

WhatsApp Image 2026-08-28 at 12.35.23 (1)

ສວສສຊ ແລະ ຄະນະຊ່ຽວຊານຫວຽດນາມ ຮ່ວມກັນປຶກສາຫາລືແກ້ໄຂບັນຫາຄວາມຫຍຸ້ງຍາກເສດຖະກິດ

ຈໍານວນຜູ້ເຂົ້າຊົມ: 261

ສວສສຊ ແລະ ຄະນະຊ່ຽວຊານຫວຽດນາມ ຮ່ວມກັນປຶກສາຫາລືແກ້ໄຂບັນຫາຄວາມຫຍຸ້ງຍາກເສດຖະກິດ

ເພື່ອຜັນຂະຫຍາຍທິດຊີ້ນໍາຂອງພັກ ແລະ ລັດຖະບານໃນການແກ້ໄຂຄວາມຫຍຸ້ງຍາກທາງດ້ານເສດະກິດ-ການເງິນໃຫ້ມີປະສິດທິຜົນ, ໃນຕອນເຊົ້າຂອງວັນທີ 26 ສິງຫາ 2026 ຜ່ານມາ ທີ່ຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ສະຖາບັນດິດ ອິນສີຊຽງໃໝ່, ຮອງປະທານ ສວສສຊ ໄດ້ຕ້ອນຮັບ ທ່ານ ປອ. ກາວ ຫວຽດ ຊິງ, ອະດີດຮອງລັດຖະມົນຕີກະຊວງແຜນການ ແລະ ການລົງທຶນ, ຫົວໜ້າຄະນະຊ່ຽວຊານຫວຽດນາມ ພ້ອມດ້ວຍຄະນະ ເຂົ້າຮ່ວມພົບປະ ເພື່ອປຶກສາຫາລື, ເກັບກໍາຂໍ້ມູນ ແລະ ຄົ້ນຄວ້າຊອກຫາມາດຕະການແກ້ໄຂຄວາມຫຍຸ້ງຍາກທາງດ້ານເສດຖະກິດຂອງລາວ ຊຸກຍູ້ການຂະຫຍາຍຕົວເສດຖະກິດມະຫາພາກຢ່າງໝັ້ນທ່ຽງ ຕາມຄາດໝາຍແຜນພັດທະນາເສດຖະກິດ ແລະ ສັງຄົມແຫ່ງຊາດ ຄັ້ງທີ X ໄດ້ກໍານົດໄວ້.

ທັງສອງຝ່າຍໄດ້ສົນທະນາ ແລະ ປຶກສາຫາລື ກ່ຽວກັບບັນດາເອກະສານສຳຄັນຂອງມະຕິ XII ຂອງພັກ ແລະ ແຜນພັດທະນາເສດຖະກິດ ແລະ ສັງຄົມແຫ່ງຊາດ ຄັ້ງທີ X ເວົ້າລວມ, ເວົ້າສະເພາະແມ່ນການແກ້ໄຂປະຕິຮູບເສດຖະກິດຮູບແບບໃໝ່ຂອງລາວ, ທິດທາງການຄວາມເຂັ້ມແຂງ ແລະ ຍືນຍົງ, ການຂຸດຄົ້ນ ແລະ ນຳໃຊ້ທ່າແຮງໃນຂົງເຂດຕ່າງໆ ເພື່ອສ້າງລາຍຮັບໃຫ້ແກ່ປະເທດຊາດ, ຕະຫຼອດຮອດການວິເຄາະບັນດາຂໍ້ຄົງຄ້າງ ແລະ ອຸປະສັກ ທີ່ກີດຂວາງການຂະຫຍາຍຕົວຂອງເສດຖະກິດໃນປັດຈຸບັນ. ພ້ອມດຽວກັນນັ້ນ, ກໍໄດ້ຮັບຂໍ້ມູູນບົດຮຽນຫຼາຍດ້ານຂອງຫວຽດນາມໃນການປັບປຸງນະໂຍບາຍ, ນິຕິກໍາ ແລະ ການຈັດຕັ້ງຄຸ້ມຄອງເສດຖະກິດ ທີ່ມີປະສິດທິຜົນ. ຜົນສໍາເລັດຂອງການປຶກສາຫາລືຄັ້ງນີ້ ຈະເປັນຂໍ້ມູນສ່ວນໜຶ່ງໃນການຄົ້ນຄວ້າ ເພື່ອເປັນຂໍ້ສະເໜີີແນະຕໍ່ລັດຖະບານລາວ ໃນການວາງນະໂຍບາຍ ແລະ ພັດທະນາເສດຖະກິດໃຫ້ໝັ້ນທ່ຽງໃນລະດັບ 6% ຕໍ່ປີ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຍົກລະດັບວຽກງານແຂ່ງຂັນ-ຍ້ອງຍໍ ສູ່ການສ້າງການຫັນປ່ຽນໃໝ່ຢ່າງແຂງແຮງ

ຈໍານວນຜູ້ເຂົ້າຊົມ: 286

ສວສສຊ ຍົກລະດັບວຽກງານແຂ່ງຂັນ-ຍ້ອງຍໍ ສູ່ການສ້າງການຫັນປ່ຽນໃໝ່ຢ່າງແຂງແຮງ

ໃນວັນທີ 18 ສິງຫາ 2026, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມເຜີຍແຜ່ນິຕິກໍາ ວຽກງານແຂ່ງຂັນ-ຍ້ອງຍໍຮັກຊາດ ແລະ ພັດທະນາ ຂຶ້ນ ໂດຍການເປັນປະທານຂອງ ທ່ານ ປອ. ນ. ແກ້ວວິວອນ ອຸດທະຈັກ ຮອງປະທານ ສວສສຊ, ມີບັນດາຫົວໜ້າສະຖາບັນຄົ້ນຄວ້າ, ກົມ, ຫ້ອງການ, ສູນ ພ້ອມດ້ວຍພະນັກງານ-ລັດຖະກອນທົ່ວ ສວສສຊ ເຂົ້າຮ່ວມ.

ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງການເຜີຍແຜ່ເນື້ອໃນເອກະສານສໍາຄັນຄື: ຄຳແນະນຳຂອງ ສວສສຊ ກ່ຽວກັບການຈັດຕັ້ງປະຕິບັດການແຂ່ງຂັນ ແລະ ຍ້ອງຍໍ ສະບັບເລກທີ 69/ສວສສຊ, ລົງວັນທີ 08 ກໍລະກົດ 2025, ຄໍາແນະນໍາກ່ຽວກັບເງື່ອນໄຂ, ມາດຕະຖານການແຂ່ງຂັນ-ຍ້ອງຍໍ ພະນັກງານ-ລັດຖະກອນ, ນັກຄົ້ນຄວ້າ ແລະ ການຈັດຕັ້ງດີເດັ່ນ ປະຈຳປີ ສະບັບເລກທີ 345/ກຈງ, ລົງວັນທີ 10 ກໍລະກົດ 2024 ແລະ ຄໍາແນະນໍາກ່ຽວກັບແບບພິມຕ່າງໆ ໃນການປະເມີນວຽກງານແຂ່ງຂັນຍ້ອງຍໍ ເຊິ່ງນໍາສະເໜີໂດຍກົມຈັດຕັ້ງ ແລະ ພະນັກງານຂອງ ສວສສຊ ແລະ ຕາງໜ້າຈາກກົມແຂ່ງຂັນ-ຍ້ອງຍໍ ຄະນະຈັດຕັ້ງສູນກາງພັກ. ກອງປະຊຸມຍັງໄດ້ເປີດເວທີໃນການແລກປ່ຽນຄໍາຄິດຄໍາເຫັນຕໍ່ກັບຫຼາຍບັນຫາໃນການຈັດຕັ້ງປະຕິບັດນິຕິກໍາ, ການປະເມີນຜົນງານ, ການຕິດຕາມຊຸກຍູ້ ແລະ ການສະເໜີແກ້ໄຂບັນຫາຜົນງານຕົກຫຼົ່ນໃນໄລຍະຜ່ານມາ ເພື່ອລາຍງານໃຫ້ຂັ້ນເທິງກ່ຽວຂ້ອງ.

ໃນໂອກາດດັ່ງກ່າວ ທ່ານ ປອ. ນ. ແກ້ວວີວອນ ອຸດທະຈັກ ໄດ້ມີຄໍາເຫັນໂອ້ລົມ ແລະ ຊີ້ນໍາ ໂດຍໄດ້ເນັ້ນໜັກໃຫ້ທຸກພາກສ່ວນພາຍໃນ ສວສສຊ ເພີ່ມທະວີການນໍາພາ-ຊີ້ນໍາ,ຖືເອົາວຽກງານແຂ່ງຂັນ-ຍ້ອງຍໍເປັນຫຼັກການ ແລະ ເປັນຄວາມຮັບຜິດຊອບຕໍ່ໜ້າທີ່ການເມືອງອັນສູງສົ່ງ ທີ່ຈະຕ້ອງຜັນຂະຫາຍໃຫ້ກາຍເປັນທິດທາງແຜນການເຄື່ອນໄຫວຕົວຈິງຢ່າງຮີບດ່ວນ. ພ້ອມກັນນັ້ນ, ຕ້ອງສືບຕໍ່ຄົ້ນຄວ້າ, ເຊື່ອມຊຶມ ແລະ ກຳໃຫ້ແໜ້ນເນື້ອໃນນິຕິກໍາ ເພື່ອຫັນ ປ່ຽນວິທີເຮັດວຽກ ແລະ ແລະ ປ່ຽນແປງຕົວເອງຢ່າງບໍ່ຢຸດຢັ້ງ ບົນພື້ນຖານຈິດໃຈສ້າງການຫັນປ່ຽນທີ່ແຂງແຮງ, ເລິກ ເຊິ່ງ ແລະ ຮອບດ້ານ ຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ການເມືອງ, ຍົກສູງຄວາມສາມາດ ແລະ ຄຸນນະພາບໃນການນຳພາ-ຊີ້ນຳ ໃນໄລຍະໃໝ່, ໃຫ້ຖືເອົາການຕິດຕາມຊຸກຍູ້, ກວດກາ ແລະ ຕີລາຄາວຽກງານຕິດພັນກັບການຍ້ອງຍໍໃຫ້ຖືກຄົນ, ຖືກວຽກ ແລະ ທັນການ; ເອົາການແຂ່ງຂັນ-ຍ້ອງຍໍເປັນໜຶ່ງໃນບັນດາມາດຕະການກະຕຸ້ນ ເພື່ອສົ່ງ ເສີມຂະບວນການໃຫ້ຂະຫຍາຍຕົວຢ່າງກວ້າງຂວາງ ແລະ ແຂງແຮງ ເຮັດໃຫ້ກາຍເປັນການປຸກລະດົມຄວາມຟົດຟື້ນ, ຫ້າວຫັນ ແນໃສ່ສຸມທຸກກຳລັງແຮງ ເພື່ອຈັດຕັ້ງປະຕິບັດບັນດາຄາດໝາຍທີ່ວາງໄວ້ໃຫ້ປະສົບຜົນສຳເລັດຢ່າງຈົບງາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຮ່ວມມື ກະຊວງເຕັກໂນໂລຊີ ແລະ ການສື່ສານ ສຸມໃສ່ວຽກງານຫັນເປັນດິຈິຕອນ ໄລຍະ 5 ປີ

ຈໍານວນຜູ້ເຂົ້າຊົມ: 286

ສວສສຊ ຮ່ວມມື ກະຊວງເຕັກໂນໂລຊີ ແລະ ການສື່ສານ ສຸມໃສ່ວຽກງານຫັນເປັນດິຈິຕອນ ໄລຍະ 5 ປີ

ໃນຕອນເຊົ້າຂອງວັນທີ 13 ສິງຫາ 2026 ທີ່ຜ່ານມາ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມປຶກສາຫາລືເນື້ອໃນຮ່າງບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືດ້ານເຕັກໂນໂລຊີ ແລະ ການສື່ສານ (ກຕສ). ໃຫ້ກຽດເປັນປະທານຮ່ວມໃນກອງປະຊຸມຄັ້ງນີ້ ມີ ທ່ານ ປອ. ລີເບີ ລີບົວປາວ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ທ່ານ ປອ. ສັນຕິສຸກ ສີມມາລາວົງ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ພ້ອມດ້ວຍຄະນະນຳ, ພະນັກງານ ແລະ ວິຊາການທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້ ຈັດຂຶ້ນເພື່ອຮ່ວມກັນຄົ້ນຄວ້າ ແລະ ເປັນເອກະພາບກັນຕໍ່ຮ່າງເນື້ອໃນMOU ໄລຍະ 5 ປີ (2026-2030) ເພື່ອເປັນບ່ອນອີງໃຫ້ແກ່ການຮ່ວມມືໃນອະນາຄົດ. ການຮ່ວມມືຈະສຸມໃສ່ 3 ຂົງເຂດວຽກງານສຳຄັນ ຄື:

1. ການຫັນເປັນດິຈິຕອນ: ການຫັນການພັດທະນາລະບົບຄຸ້ມຄອງ-ບໍລິຫານຫ້ອງການຂອງ ສວສສຊ ໃຫ້ມີຄວາມທັນສະໄໝ.

2. ການໂຄສະນາເຜີຍແຜ່: ການນໍາໃຊ້ເຄື່ອງມືດິຈິຕອນ ເຂົ້າໃນການເຜີຍແຜ່ນະໂຍບາຍ, ກົດໝາຍ ແລະ ຂໍ້ມູນຂ່າວສານຕ່າງໆ ຢ່າງມີປະສິດທິພາບ.

3. ການພັດທະນາຊັບພະຍາກອນມະນຸດ: ຍົກລະດັບຄວາມຮູ້ຄວາມສາມາດ, ແລກປ່ຽນຂໍ້ມູນຂ່າວສານ, ປະສົບການ ພ້ອມທັງການຈັດກອງປະຊຸມສຳມະນາ ແລະ ຝຶກອົບຮົມຮ່ວມກັນ.

ໃນໂອກາດດຽວກັນ, ຍັງໄດ້ມີພິທີມອບ-ຮັບເຄື່ອງຄອມພິວເຕີ ລະຫວ່າງຄະນະນຳຂອງທັງສອງຝ່າຍ, ພ້ອມນັ້ນ ຜູ້ເຂົ້າຮ່ວມຍັງໄດຮັບຟັງການນຳສະເໜີກ່ຽວກັບການຄຸ້ມຄອງ ແລະ ການນຳໃຊ້ລະບົບບໍລິຫານ ແລະ ບໍລິການລັດແບບດິຈິຕອນ ຈາກສູນບໍລິຫານລັດດິຈິຕອນ ກະຊວງ ກຕສ ແລະ ຮ່ວມຮັບຟັງການເຜີຍແຜ່ຮ່າງມະຕິວ່າດ້ວຍບຸກທະລຸການພັດທະນາວິທະຍາສາດເຕັກໂນໂລຊີ, ປະດິດສ້າງ ແລະ ວຽກງານການຫັນເປັນດິຈິຕອນ.

ຜ່ານການປຶກສາຫາລືຢ່າງກົງໄປກົງມາ, ທັງສອງຝ່າຍໄດ້ຕີລາຄາສູງ ແລະ ຕົກລົງເຫັນດີປັບປຸງເນື້ອໃນຮ່າງ MOU ດັ່ງກ່າວ ໃຫ້ມີຄວາມຮັດກຸມ, ສອດຄ່ອງກັບສະພາບການຕົວຈິງ ແລະ ພາລະບົດບາດຂອງແຕ່ລະພາກສ່ວນ ເພື່ອກ້າວໄປສູ່ການຈັດຕັ້ງປະຕິບັດໃນຕໍ່ໜ້າ.

ຖ່າຍພາບ: ທະນົງສຸກ ບຸນປະເສີດ

ຂຽນຂ່າວ: ສາຍເພັດ ພັດກົມຄຳ

4 ສະຖາບັນຂອງ ລາວ-ຫວຽດນາມ ຮ່ວມກັນສໍາມະນາວິທະຍາສາດກ່ຽວກັບ “ເສດຖະກິດເອກະລາດ ເປັນເຈົ້າຕົນເອງ”

ຈໍານວນຜູ້ເຂົ້າຊົມ: 383

4 ສະຖາບັນຂອງ ລາວ-ຫວຽດນາມ ຮ່ວມກັນສໍາມະນາວິທະຍາສາດກ່ຽວກັບ “ເສດຖະກິດເອກະລາດ ເປັນເຈົ້າຕົນເອງ”

ໃນວັນທີ 05 ສິງຫາ 2026 ທີ່ໂຮງແຮມເມືອງແທ່ງ, ນະຄອນຫຼວງວຽງຈັນ. ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປັນເຈົ້າພາບຈັດກອງປະຊຸມສໍາມະນາວິທະຍາສາດ ລາວ-ຫວຽດນາມ ພາຍໃຕ້ຫົວຂໍ້: “ເສດຖະກິດເອກະລາດ ເປັນເຈົ້າຕົນເອງ: ຂໍ້ລິເລີ່ມຂອງ ສປປ ລາວ ແລະ ບົດຮຽນປະສົບການຂອງ ສສ. ຫວຽດນາມ”. ໂດຍມີບັນດາການນໍາຂັ້ນສູງຂອງສອງພັກ-ສອງລັດ ກໍຄືການນໍາຂອງ 4 ສະຖາບັນເຂົ້າຮ່ວມ, ໃຫ້ກຽດເຂົ້າ ຮ່ວມມີ ທ່ານ ຮສ. ປອ. ດວ່ານ ມິງ ຮວັນ (Doan Minh Huan), ກໍາມະການກົມການເມືອງສູນກາງພັກຄອມມູນິດຫວຽດນາມ, ຫົວໜ້າສະຖາບັນການເມືອງແຫ່ງຊາດໂຮ່ຈີມິນ; ທ່ານ ປອ. ອະນຸພາບ ຕຸນາລົມ, ຄະນະເລຂາທິການສູນກາງພັກປະຊາຊົນປະຕິວັດລາວ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ທ່ານ ປອ. ລີເບີ ລີບົວປາວ, ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ທ່ານ ສຈ. ປອ. ເລ ວັນ ເລີ້ຍ (Le Van Loi), ກໍາມະການຄະນະບໍລິຫານງານສູນກາງພັກຄອມມູນິດຫວຽດນາມ, ປະທານສະຖາບັນບັນດິດວິທະຍາ ສາດສັງຄົມຫວຽດນາມ (VASS), ມີທ່ານເອກອັກຄະລັດຖະທູດ ສສ ຫວຽດນາມ ປະຈໍາ ສປປ ລາວ, ບັນດາການນຳຂອງກະຊວງ, ນັກຊ່ຽວຊານ, ນັກວິທະຍາສາດ ລາວ-ຫວຽດນາມ ແລະ ຜູ້ຕາງໜ້າຈາກຂະແໜງການທີ່ກ່ຽວຂ້ອງເຂົ້າ ຮ່ວມຢ່າງພ້ອມພຽງ.

ກອງປະຊຸມສໍາມະນາວິທະຍາສາດຄັ້ງນີ້ ເປັນຜັນຂະຫຍາຍຄວາມຮ່ວມມືຂອງສອງພັກໃນການຄົ້ນຄວ້ານິຕິກໍາເອກະສານນະໂຍບາຍຂອງພັກ ທີ່ມີລັກສະນະວິທະຍາສາດ ເຊິ່ງເທື່ອນີ້ແມ່ນການຄົ້ນຄວ້າລົງເລິກກ່ຽວກັບມະຕິຂອງກົມການເມືອງສູນກາງພັກ ສະບັບເລກທີ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃຫ້ໄປສູ່ການຈັດຕັ້ງປະຕິບັດເປັນຮູບປະທໍາ ແລະ ຍົກລະດັບການຄົ້ນຄວ້າວິທະຍາສາດທາງດ້ານດ້ານທິດສະດີ ແລະ ພຶດຕິກໍາຕົວຈິງຢ່າງເລິກເຊິ່ງ; ສ້າງພື້ນຖານອັນໜັກແໜ້ນຕໍ່ການນໍາພາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດ ທະນາ (LDC); ໃນໂອກາດນີ້, ທ່ານ ປອ. ລີເບີ ລີບົວປາວ ໄດ້ກ່າວຄໍາເຫັນຕໍ່ປະຊຸມວ່າ: ພັກເຮົາໄດ້ວາງແນວທາງນະໂຍ ບາຍໃນການພັດທະນາປະເທດຕາມທິດຍືນຍົງ ແລະ ສີຂຽວ ບົນພື້ນຖານການນໍາໃຊ້ກາລະໂອກາດ, ທ່າແຮງບົ່ມຊ້ອນ ເປັນກໍາລັງແຮງສັງລວມ ເພື່ອສ້າງບາດກ້າວບຸກທະລຸການເຕີບໂຕເສດຖະກິດໃຫ້ມີຄວາມໝັ້ນທ່ຽງ, ເຂັ້ມແຂງ ໂດຍກໍານົດເປັນນະໂຍບາຍວາງອອກຄື: ການສ້າງເສດຖະກິດເອກະລາດເປັນເຈົ້າຕົນເອງ. ການສ້າງເສດຖະກິດເອກະລາດນີ້ ບໍ່ແມ່ນການປິດປະເທດແບບໂດດດ່ຽວ ແຕ່ແມ່ນການເສີມຂະຫຍາຍຫົວຄິດປະດິດສ້າງ, ຄວາມດຸໝັ່ນຂະຫຍັນພຽນ, ເປັນຜູ້ປະກອບການທີ່ເຂັ້ມແຂງ, ເປັນເຈົ້າຕົນເອງ ດ້ວຍການຍົກສູງສະມັດຕະພາບການຜະລິດ, ເສີມສ້າງສະຕິປັນຍາ, ຄວາມສາມາດຍືນຂຶ້ນ ແລະ ກ້າວເດີນດ້ວຍກໍາລັງແຮງຂອງຕົນຢ່າງເປັນເຈົ້າການ ເຮັດໃຫ້ມີການຍົກລະດັບວິຖີການດໍາລົງຊີວິດແບບໃໝ່, ສ້າງຄ່ານິຍົມ ແລະ ສະຕິຊາດ, ຮູ້ນໍາໃຊ້ຊັບພະຍາກອນ ແລະ ປົກປັກຮັກສາໃຫ້ນໍາໃຊ້ໄດ້ຍາວນານ. ພິ ເສດ ບັນດານັກຄົ້ນຄວ້າວິທະຍາສາດຂອງສອງຝ່າຍຈະໄດ້ແລກປ່ຽນບົດຮຽນ ຜ່ານຜົນສໍາເລັດການປະຕິບັດຕົວຈິງ ເຊິ່ງບົດຮຽນທີີ່ດີໃຫ້ບັນດາຂະແໜງການຂອງລາວ. ພ້ອມນັ້ນ ກໍເປັນສະເຫຼີມສະະຫຼອງວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 64 ປີ, ວັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 49 ປີ ທີ່ພວມ ດໍາເນີນຢູ່ລາວເຮົາ.

ກອງປະຊຸມສຳມະນາວິທະຍາສາດຈັດແບ່ງອອກເປັນ 3 ວາລະສໍາຄັນ, ເຊິ່ງວາລະທີໜຶ່ງ ນັກວິທະຍາສາດຝ່າຍລາວໄດ້ລົງເລິກນໍາສະເໜີດ້ານທິດສະດີ ແລະ ເນື້ອໃນສໍາຄັນຂອງນະໂຍບາຍການສ້າງເສດຖະກິດເອກະລາດເປັນເຈົ້າຕົນເອງ ແລະ ບາງບົດຮຽນທີີ່ ສປປ ລາວ ໄດ້ລິເລີ່ມຈັດຕັ້ງປະຕິບັດໃນໄລຍະຜ່ານມາ ເປັນຕົ້ນແມ່ນການປັບປຸງບັນເອກະ ສານນິຕິກໍາ, ກົດໝາຍໃຫ້ຮັດກຸມ, ເຂັ້ມງວດຂຶ້ນກວ່າເກົ່າ ເພື່ອຫັນເອົາການຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ ເຊັ່ນ: ການເຊື່ອມຈອດທາງດ້ານການຂົນສົ່ງເສັ້ນທາງ-ລົດໄຟ, ສົ່ງເສີມອຸດສາຫະກໍາປຸງແຕ່ງ ຫຼຸດຜ່ອນການສົ່ງວັດຖຸດິບອອກ, ການໃຊ້ລົດໄຟຟ້າ, ການຫັນເປັນດີຈີຕ້ອນ, ການເກັບອາກອນສຸຂະພາບ ແລະ ການພັດທະນາຄຸນນະ ພາບຂອງແຮງງານ-ຊັບພະຍາກອນມະນຸດ; ວາລະທີສອງ ນັກວິທະຍາສາດຝ່າຍຫວຽດນາມ ໄດ້ລົງເລິກສະເໜີບົດຮຽນທີ່ສໍາຄັນຂອງຫວຽດນາມໃນການດໍາເນີນເສດຖະກິດເອກະລາດເປັນເຈົ້າຕົນເອງ ໂດຍສະເພາະການເຊື່ອມໂຍງສາກົນເຂົ້າກັບການສ້າງເສດຖະກິດເອກະລາດເປັນເຈົ້າຕົນເອງ ຕາມທິດສັງຄົມນິຍົມຢ່າງໝັ້ນທ່ຽງ, ການສ້າງກໍາລັງການຜະລິດທັນສະໄໝ ບົນພື້ນຖານວິທະຍາສາດເຕັກໂນໂລຊີ, ນະວັດຕະກໍາໃໝ່, ຫັນເປັນດີຈີຕ້ອນ ແລະ ສີຂຽວ ດ້ວຍຄວາມເປັນເຈົ້າຕົນເອງ, ພ້ອມນັ້ນ ຍັງໄດ້ສະເໜີທິດທາງ ແລະ ມາດຕະການແກ້ໄຂ ເພື່ອພັດທະນາຄວາມເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ລະຫວ່າງຫວຽດນາມກັບລາວໃນອະນາຄົດ. ສໍາລັບ ໃນວາລະທີສາມ ເປັນເວທີສົນທະນາໃນປະເດັ່ນສໍາຄັນກ່ຽວກັບການປະຕິຮູບການສ້າງເສດຖະກິດເອກະລາດເປັນເຈົ້າຕົນເອງ ໃນບໍລິບົດຂອງບັນຫາຕ່າງໆເຊັ່ນ: ການບໍລິຫານລັດຢ່າງມີປະສິດທິພາບ, ທັນສະໄໝ ດ້ວຍການຫຸດຜ່ອນຂັ້ນຕອນເອກະສານຕ່າງໆ; ການສົ່ງເສີມສິນຄ້າ ແລະ ສ້າງມູນຄ່າເພີ່ມໃຫ້ກັບຊຸມຊົນ ແລະ ທ້ອງຖິ່ນ ໄປສູ່ຊັບສິນທາງປັນຍາຢ່າງເປັນເຈົ້າການ; ການກໍ່ສ້າງແຮງງານ ແລະ ພັດທະນາຊັບພະຍາກອນມະນຸດ, ການແກ້ໄຂບັນຫາອຸບັດຕິເຫດ ດ້ວຍການຍົກສງສະຕິກົດໝາຍ ແລະ ບັນ ຫາອື່ນໆ ໃນຄວາມສົນໃຈຂອງຜູ້ເຂົ້າຮ່ວມອີກຫຼາຍບັນຫາ ເຊິ່ງໄດ້ສ້າງຄວາມຮັບຮູ້ ແລະ ຄວາມເປັນເອກະພາບຕໍ່ສະ ພາບການໃໝ່ ເພື່ອແກ້ໄຂໃຫ້ຖືກຕ້ອງ, ຖືກຈຸດ ແລະ ນໍາເອົາຜົນປະໂຫຍດມາສູ່ປະຊາຊົນ, ປະເທດຊາດ.

ຜ່ານຂະບວນການຄົ້ນຄວ້າຢ່າງວິທະຍາສາດ, ສາມາດສະຫຼຸບສັງລວມຜົນສໍາເລັດບາງດ້ານດັ່ງນີ້: ນັກວິທະຍາ ສາດລາວ-ຫວຽດນາມ ໄດ້ມີຄວາມເປັນເອກະພາບສູງຕໍ່ນະໂຍບາຍຂອງພັກໃນການສ້າງເສດຖະກິດເອກະລາດເປັນເຈົ້າຕົນເອງ ເພາະເປັນແນວຄິດ, ອຸດົມການ, ທິດທາງ ແລະ ເປົ້າໝາຍພື້ນຖານທີ່ສໍາຄັນໃນການຕິຮູບກໍາລັງການຜະລິດພາຍໃນໃຫ້ມີຄວາມເຂັ້ມແຂງ ເວົ້າລວມແມ່ນຂະແໜງເສດຖະກິດທຸກລະດັບ ໃຫ້ມີການປັບຕົວ ແລະ ເຊື່ອມໂຍງກັບສາກົນ; ການສ້າງເສດຖະກິດເອກະລາດເປັນເຈົ້າຕົນເອງຂອງລາວ ຈໍາເປັນຕ້ອງມີວາງຍຸດທະສາດ, ແຜນການ, ງົບປະມານ ແລະ ພະນັກງານ ເຂົ້າໃນທຸກຂະບວນການ ນັບແຕ່ເລີ່ມການຄົ້ນຄວ້າປະຕິຮູບລະບຽບການ, ນິຕິກໍາ ແລະ ກົດໝາຍ ໄປສູ່ການຄຸ້ມຄອງປະຕິບັດຕົວຈິງ ໂດຍມີການກວດກາປະເມີນຜົນ ແລະ ນໍາໃຊ້ເຕັກໂນໂລຊີເຂົ້າຊ່ວຍ ເພື່ອຍົກລະດັບຄວາມສາ ມາດແຂ່ງຂັນຂອງທຸກພາກສ່ວນໃຫ້ດີຂຶ້ນ; ນອກຈາກນັ້ນແລ້ວ ຍັງຈໍາເປັນຕ້ອງໄດ້ສົ່ງເສີມການຄົ້ນຄວ້າຄວາມເປັນເຈົ້າຕົນເອງ, ການສ້າງຄ່ານິຍົມ, ຄວາມເປັນເອກະລາດ ໃຫ້ກ້ວາງຂວາງ ກວມເອົາທຸກຂົງເຂດວຽກງານ ເພື່ອສ້າງຄວາມເຂົ້າ ໃຈອັນເລິກເຊິ່ງ, ຖືກຕ້ອງ ແລະ ປະຕິບັດໄດ້ຈິງແທ້. ຜົນສຳເລັດດັ່ງກ່າວ ຈະຖືກສັງລວມເປັນຂໍ້ມູນ ແລະ ເປັນບ່ອນອີງອັນໜັກແໜ້ນທາງດ້ານທິດສະດີໃຫ້ພັກ ແລະ ລັດຖະບານ ເພື່ອສ້າງພື້ນຖານເສດຖະກິດໃຫ້ມີຄວາມເຂັ້ມແຂງ, ສະໜັບ ສະໜູນການຈັດຕັ້ງປະຕິບັດເປົ້າໝາຍໃນການນຳພາປະເທດຊາດຫຼຸດພົ້ນອອກຈາກສະຖານະພາບ LDC ຢ່າງມີຄຸນນະ ພາບໃນທ້າຍປີ 2026 ແລະ ສ້າງບາດກ້າວບຸກທະລຸໄປສູ່ການເປັນປະເທດລາຍຮັບປານກາງສູງໃນປີ 2035 ຕາມວິໄສທັດທີ່ວາງໄວ້ຢ່າງສະຫງ່າງາມ.

ກອງປະຊຸມສໍາມະນາປິດລົງດ້ວຍຜົນສໍາເລັດຢ່າງຈົບງາມ ຕາມຄາດໝາຍທີ່ວາງໄວ້ ແລະ ມອບໜ້າທີ່ເຈົ້າພາບໃນປີ 2027 ໃຫ້ແກ່ສະຖາບັນບັນດິດວິທະຍາສາດສັງຄົມ ຫວຽດນາມ (VASS) ເຊິ່ງມີຫົວຂໍ້ກ່ຽວກັບ ການເຫຼີມສະ ຫຼອງວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 65 ປີ, ວັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 50 ປີ.

ຂຽນຂ່າວ ແລະ ຖ່າຍພາບ: ນັກຂ່າວ ສວສສຊ

WhatsApp Image 2026-08-03 at 16.09.06 (1)

ສວສສຊ ຕີລາຄາສູງບົດບາດ IMF ໃນການເສີມສ້າງຄວາມເຂັ້ມແຂງເສດຖະກິດລາວ

ຈໍານວນຜູ້ເຂົ້າຊົມ: 387

ສວສສຊ ຕີລາຄາສູງບົດບາດ IMF ໃນການເສີມສ້າງຄວາມເຂັ້ມແຂງເສດຖະກິດລາວ

ໃນຕອນເຊົ້າວັນທີ 30 ກໍລະກົດ 2026 ຜ່ານມາ, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ທ່ານ ປອ. ສະຖາບັນດິດ ອິນສີຊຽງໃໝ່ ຮອງປະທານ ສວສສຊ ໄດ້ຕ້ອນຮັບການຢ້ຽມຂໍ່ານັບອຳລາພາຍຫຼັງສິ້ນສຸດໜ້າທີ່ການປະຈຳການຢູ່ ສປປ ລາວ ຂອງ ທ່ານ ໂຈເກີນ ສະມິດແມນ, ຜູ້ຕາງໜ້າກອງທຶນການເງິນສາກົນ (IMF) ປະຈໍາ ສປປ ລາວ, ກຳປູເຈຍ ແລະ ຫວຽດນາມ.

ໃນການພົບປະຄັ້ງນີ້, ທັງສອງຝ່າຍ ໄດ້ຮ່ວມກັນຕີລາຄາສູງຕໍ່ຜົນສຳເລັດຂອງການຮ່ວມມືຕະຫຼອດ 3 ປີຜ່ານມາ. ໂອກາດນີ້, ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ແລະ ຄວາມຮັບຜິດຊອບສູງທີ່ໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງລາວ ໂດຍສະເພາະແມ່ນການສະໜັບສະໜູນທາງດ້ານວິຊາການຈາກ IMF ໃນດ້ານການຕິດຕາມ, ການປະເມີນ ແລະ ການແລກປ່ຽນຂໍ້ມູນຂ່າວສານທາງດ້ານເສດຖະກິດ ລວມທັງການຍົກລະດັບການສ້າງຂີດຄວາມສາມາດໃຫ້ແກ່ບຸກຄະລາກອນໃນຂະແໜງການທີ່ກ່ຽວຂ້ອງ. ພ້ອມກັນນັ້ນ, ຍັງໄດ້ແລກປ່ຽນເຖິງພາບລວມຂອງສະພາບເສດຖະກິດມະຫາພາກໃນປັດຈຸບັນ ແລະ ທິດທາງນະໂຍບາຍໃນຕໍ່ໜ້າ ທີ່ເນັ້ນໃສ່ການຮັກສາສະຖຽນລະພາບ ແລະ ການຊຸກຍູ້ການເຕີບໂຕຕາມທິດ “ເສດຖະກິດເອກະລາດ ເປັນເຈົ້າຕົນເອງ” ໃນໄລຍະໃໝ່

ທັງສອງຝ່າຍໄດ້ຢັ້ງຢືນຄວາມມຸ້ງໝັ້ນທີ່ຈະສືບຕໍ່ຮັດແໜ້ນຄວາມຮ່ວມມືໃຫ້ແໜ້ນແຟ້ນຍິ່ງຂຶ້ນ ໃນການເປັນຄູ່ຮ່ວມງານທີ່ສໍາຄັນໃນການໃຫ້ຄໍາປຶກສາ, ວິເຄາະປະເມີນຜົນ ແລະ ແລກປ່ຽນບົດຮຽນທາງດ້ານເສດຖະກິດ ເພື່ອຍົກສູງຂີດຄວາມສາມາດຂອງບຸກຄະລາກອນພາຍໃນ ສວສສຊ ກໍຄືຂອງ ສປປ ລາວ ກ້າວໄປສູ່ລະດັບສາກົນ.

ຂຽນຂ່າວ ແລະ ຖ່າຍພາບ: ສາຍເພັດ ພັດກົມຄຳ

ສວສສຊ ພົບປະສະຖານທູດຫວຽດນາມ ເພື່ອກຽມເປັນເຈົ້າພາບຈັດກອງປະຊຸມສຳມະນາວິທະຍາສາດສາກົນລະດັບສູງ ພາຍໃຕ້ຫົວຂໍ້ “ເສດຖະກິດເອກະລາດ ເປັນເຈົ້າຕົນເອງ”

ຈໍານວນຜູ້ເຂົ້າຊົມ: 382

ສວສສຊ ພົບປະສະຖານທູດຫວຽດນາມ ເພື່ອກຽມເປັນເຈົ້າພາບຈັດກອງປະຊຸມສຳມະນາວິທະຍາສາດສາກົນລະດັບສູງ ພາຍໃຕ້ຫົວຂໍ້ “ເສດຖະກິດເອກະລາດ ເປັນເຈົ້າຕົນເອງ”

ທ່ານ ປອ. ລີເບີ ລີບົວປາວ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະ ກິດ ແລະ ສັງຄົມແຫ່ງຊາດ ໄດ້ຕ້ອນຮັບ ທ່ານ ຫງວຽນ ມິງ ເຕີມ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສປປ ລາວ ໃນຕອນເຊົ້າວັນທີ 30 ກໍລະກົດ 2026 ທີ່ຜ່ານມາ, ຢູ່ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ໃນໂອກາດນີ້, ປະທານ ສວສສຊ ໄດ້ລາຍງານສະພາບການເຄື່ອນໄຫວວຽກງານຄົ້ນຄວ້າວິທະຍາສາດໂດຍຫຍໍ້ ແລະ ລາຍງານການກະກຽມຕ້ອນຮັບຄະນະຜູ້ແທນຂັ້ນສູງ ສສ. ຫວຽດນາມ ທີ່ຈະເດີນທາງມາຮ່ວມກອງປະຊຸມສຳມະນາວິທະຍາສາດ 02 ຊາດ 04 ສະຖາບັນ ປະຈຳປີ 2026 ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ສະຖາບັນບັນດິດວິທະຍາສາດສັງຄົມຫວຽດນາມ (VASS), ສະຖາບັນການເມືອງ ແລະ ການປົກຄອງແຫ່ງຊາດ ( NAPPA) ແລະ ສະຖາບັນການເມືອງໂຮຈີມິນ (HCMA) ທີ່ນະຄອນຫຼວງວຽງຈັນ ໃນລະຫວ່າງວັນທີ 4-6 ສິງຫາ 2026. ພ້ອມດຽວກັນນີ້ ຍັງໄດ້ປືກສາຫາລືກ່ຽວກັບການຜັນຂະຫຍາຍແຜນການຮ່ວມມືສອງຝ່າຍໃນຕໍ່ໜ້າ ໃຫ້ສອດຄ່ອງກັບຄວາມຈໍາເປັນຮີບດ່ວນໃນການກຳນົດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ; ແລະ ຄວາມເປັນໄປໄດ້ໃນການຊ່ວຍເຫຼືອຂອງລັດຖະບານ ສສ.ຫວຽດນາມ ຕໍ່ໂຄງການກໍ່ສ້າງຕຶກອາຄານຫໍພິພິຕະພັນຊົນເຜົ່າຂອງ ສວສສຊ ເພື່ອຈັດວາງສະແດງ ແລະ ການອະນຸລັກວັດທະນະທໍາລາວ.

ກອງປະຊຸມສຳມະນາວິທະຍາສາດ 2 ຊາດ ລາວ-ຫວຽດນາມຄັ້ງນີ້ ຈະສຸມໃສ່ການຄົ້ນຄວ້າພາຍໃຕ້ຫົວຂໍ້: “ເສດຖະກິດເອກະລາດ ເປັນເຈົ້າຕົນເອງ: ຂໍ້ລິເລີ່ມຂອງລາວ ແລະ ບົດຮຽນປະສົບການຂອງຫວຽດນາມ”. ເພື່ອແລກ ປ່ຽນບົດຮຽນຕົວຈິງທາງດ້ານທິດສະດີ ແລະ ພຶດຕິກໍາທີ່ສໍາຄັນ ໃນການສ້າງຄວາມເຂັ້ມແຂງໃຫ້ແກ່ພຶ້ນຖານເສດຖະກິດໃນລາວ ໂດຍການຖອດຖອນບົດຮຽນຈາກຜົນສໍາເລັດຂອງຫວຽດນາມໃນໄລຍະຜ່ານ.

ປະທານ ສວສສຊ ໄດ້ສະແດງຄວາມເຊື່ອໝັ້ນວ່າ ການພົບປະກັນສອງຝ່າຍໃນຄັ້ງນີ້ ຈະເປັນຂີດໝາຍໃໝ່ໃນການຍົກລະດັບການພົວພັນຮ່ວມມືລະຫວ່າງສອງປະເທດ ໃຫ້ກ້າວສູ່ລະດັບໃໝ່ທີ່ສູງກວ່າເກົ່າ ເພື່ອຜົນປະໂຫຍດຮ່ວມກັນຂອງທັງສອງຊາດ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຫວນຄືນມູນເຊື້ອປະທານ ສຸພານຸວົງ ແລະ ວັນມິດຕະພາບລາວ-ຫວຽດນາມ

ຈໍານວນຜູ້ເຂົ້າຊົມ: 247

ສວສສຊ ຫວນຄືນມູນເຊື້ອປະທານ ສຸພານຸວົງ ແລະ ວັນມິດຕະພາບລາວ-ຫວຽດນາມ

ໃນຕອນບ່າຍຂອງວັນທີ 28 ກໍລະກົດ 2026, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດພິທີປາຖະກະຖາຄັ້ງສໍາຄັນ ເພື່ອສະເຫຼີມສະຫຼອງ ແລະ ຫວນຄືນມູນເຊື້ອ 3 ວັນປະຫວັດສາດ ຄື: ວັນຄ້າຍວັນເກີດ ປະທານສຸພານຸວົງ ຜູ້ນໍາທີ່ແສນເຄົາລົບຮັກ ຄົບຮອບ 117 ປີ, ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 49 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 46 ປີ. ໂດຍໃຫ້ກຽດເປັນປະທານຂອງ ທ່ານ ປອ. ລີເບີ ລີບົວປາວ ກໍາມະການສູນກາງພັກ, ປະທານ ສວສສຊ; ມີບັນດາຄະນະພັກ-ຄະນະນໍາ, ບັນດາຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນ ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ.

ໃນພິທີປາຖະກະຖາໃນຄັ້ງນີ້, ທ່ານ ໄຊສົງຄາມ ມະໂນທັມ, ຄະນະປະຈຳພັກ, ຮອງປະທານ ສວສສຊ ໄດ້ຫວນຄືນມູນເຊື້ອອັນເລີດລ້ຳຂອງ ປະທານ ສຸພານຸວົງ ເຊິ່ງເພີ່ນແມ່ນນັກປັນຍາຊົນຜູ້ຍິ່ງໃຫຍ່ ແລະ ວິລະບູລຸດຂອງຊາດ. ຕະຫຼອດຊີວິດຂອງເພີ່ນ ແມ່ນໄດ້ອຸທິດສະຕິປັນຍາ ແລະ ຫົວຄິດປະດິດສ້າງເຂົ້າໃນພາລະກິດປົດປ່ອຍຊາດ, ເປັນຜູ້ນຳຮຸ່ນທຳອິດທີ່ຢຶດໝັ້ນໃນອຸດົມການປະຕິວັດ ແລະ ເປັນບຸກຄົນສຳຄັນໃນການເຕົ້າໂຮມຄວາມສາມັກຄີທົ່ວປວງຊົນເພື່ອຍາດເອົາເອກະລາດມາໃຫ້ປະເທດຊາດ. ພ້ອມກັນນັ້ນ, ທ່ານ ປອ. ສະຖາບັນດິດ ອິນສີຊຽງໃໝ່, ຮອງເລຂາຄະນະພັກ, ຮອງປະທານ ສວສສຊ ໄດ້ຍົກໃຫ້ເຫັນເຖິງຄວາມສຳຄັນຂອງສາຍພົວພັນມິດຕະພາບ ລາວ-ຫວຽດນາມ ໂດຍສະເພາະແມ່ນວັນເຊັນສົນທິສັນ ຍາມິດຕະພາບ ແລະ ການຮ່ວມມື ຄົບຮອບ 49 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 64 ປີ. ສາຍພົວພັນນີ້ແມ່ນພື້ນຖານກົດໝາຍອັນໜັກແໜ້ນໃນການຮັດແໜ້ນຄວາມສາມັກຄີຮ່ວມສູ້ຮົບ ແລະ ການຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ.

ໃນໂອກາດນີ້, ທ່ານ ປອ. ລີເບີ ລີບົວປາວ ໄດ້ມີຄຳເຫັນໂອ້ລົມຕໍ່ພະນັກງານທົ່ວສະຖາບັນວ່າ: ຈົ່ງຮໍ່າຮຽນເອົາຄຸນສົມບັດສິນທຳປະຕິວັດອັນສູງສົ່ງ ໂດຍສະເພາະແມ່ນຄຸນສົມບັດສິນທໍາປະຕິວັດ, ຈິດໃຈຮັກຊາດ ແລະ ການຍອມເສຍສະຫຼະທຸກສິ່ງທຸກຢ່າງເພື່ອປະເທດຊາດ ແລະ ປະຊາຊົນ ຂອງປະທານ ສຸພານຸວົງ ເພື່ອເປັນການສະແດງເຖິງຄວາມກະຕັນຍູຮູ້ບຸນຄຸນຕໍ່ການນຳຮຸ່ນກໍ່ຕັ້ງ ພາຍໃຕ້ຄຳຂວັນ: “ຍ້ອນມີເພີ່ນໃນວັນນີ້ ຈຶ່ງມີພວກເຮົາໃນມື້ນີ້”. ພ້ອມກັນນັ້ນ, ທ່ານຍັງໄດ້ຊີ້ນຳໃຫ້ສືບຕໍ່ເສີມຂະຫຍາຍສາຍພົວພັນແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ກ້າວເຂົ້າສູ່ລ່ວງເລິກ, ໂດຍນຳເອົາໝາກຜົນຂອງການພົວພັນຮ່ວມມືທາງດ້ານວິຊາການ ແລະ ການຄົ້ນຄວ້າວິທະຍາ ສາດກັບບັນດາສະຖາບັນຄູ່ຮ່ວມມືຈາກ ສສ.ຫວຽດນາມ ມາຜັນຂະຫຍາຍເຂົ້າໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະ ກິດ, ບົນພື້ນຖານການສ້າງເສດຖະກິດເອກະລາດ ແລະ ເປັນເຈົ້າຕົນເອງໃນໄລຍະໃໝ່ ໃຫ້ມີປະສິດທິຜົນສູງສຸດ.

ການຫວນຄືນປະຫວັດສາດ ແລະ ມູນເຊື້ອຂອງຊາດ, ຂອງຜູ້ນໍາຄັ້ງນີ້ ເປັນການປຸກຈິດສຳນຶກໃຫ້ພະນັກງານ-ລັດຖະກອນທົ່ວ ສວສສຊ ໃຫ້ມີສະຕິຊາດ, ຍຶດໝັ້ນໃນອຸດົມການ ແລະ ເສືມຂະຫຍາຍມູນເຊື້ອອັນລ້ຳຄ່າ ແລະ ບົດຮຽນແຫ່ງສາຍພົວພັນພິເສດ ລາວ-ຫວຽດນາມ ມາເປັນແຮງຊຸກດັນໃນການປະຕິບັດໜ້າທີ່ວິຊາສະເພາະ ໂດຍສະ ເພາະແມ່ນການຍົກສູງຄຸນນະພາບການຄົ້ນຄວ້າວິທະຍາສາດ ເພື່ອຮ່ວມກັນແກ້ໄຂບັນຫາຄວາມຫຍຸ້ງຍາກທາງດ້ານເສດ ຖະກິດ ແລະ ສ້າງສາພັດທະນາປະເທດຊາດ ໃຫ້ຮຸ່ງເຮືອງສີວິໄລ ຕາມອຸດົມການທີ່ບັນດາທ່ານຜູ້ນຳຮຸ່ນກໍ່ຕັ້ງໄດ້ວາງຮາກ ຖານເອົາໄວ້ຢ່າງໝັ້ນຄົງ.