ກອງປະຊຸມ ໄດ້ຮັບຟັງການບັນຍາຍພິເສດຈາກ ທ່ານ ຫວງ ຜິງ ເຊິ່ງທ່ານໄດ້ເນັ້ນໜັກວ່າ ຄວາມທັນສະໄໝແມ່ນໝາກຜົນຂອງໂລກ ແລະ ເປັນບົດຮຽນທີ່ແຕ່ລະປະເທດສາມາດຮຽນຮູ້, ແລກປ່ຽນ ແລະ ນຳໄປໝູນໃຊ້ຢ່າງປະ ດິດສ້າງ; ໂດຍມີການພັດທະນາຊັບພະຍາກອນມະນຸດ ເປັນປັດໄຈຕົ້ນຕໍ ແລະ ເປັນຖານຮອງຮັບການຂະຫຍາຍຕົວທາງເສດຖະກິດ, ການເຊື່ອມໂຍງອຸດສາຫະກຳ ແລະ ການຜັນຂະຫຍາຍການເປັນຄູ່ຮ່ວມຊາຕາກຳ ລາວ-ຈີນ ໃນລະດັບສູງ. ພ້ອມດຽວກັນ, ຍັງໄດ້ຮັບຟັງການບັນຍາຍພິເສດຈາກ ທ່ານ ນາງ ແສງເດືອນ ໄຊຍະສອນ, ຮອງປະທານຜູ້ປະຈຳການຄະ ນະກຳມະການຮ່ວມມື ລາວ-ຈີນ ໄດ້ລົງເລິກສະພາບລວມການຮ່ວມມືດ້ານເສດຖະກິດ-ເຕັກນິກ, ການຄ້າ ແລະ ການລົງທຶນ ລາວ-ຈີນ ປີ 2026 ແລະ ທິດທາງປີ 2027. ໃນນັ້ນ, ໄດ້ຍົກໃຫ້ເຫັນເຖິງການເຕີບໂຕຂອງມູນຄ່າການຄ້າສອງຝ່າຍ ແລະ ຜົນສໍາເລັດຂອງໂຄງການຍຸດທະສາດ ເຊັ່ນ: ເສັ້ນທາງລົດໄຟ ລາວ-ຈີນ ທີ່ໄດ້ຂົນສົ່ງຜູ້ໂດຍສານແລ້ວກວ່າ 80 ລ້ານເທື່ອຄົນ ແລະ ຂົນສົ່ງສິນຄ້າກວ່າ 90 ລ້ານໂຕນ.

        ກອງປະຊຸມໄດ້ລົງເລິກສົນທະນາ-ແລກປ່ຽນໃນການວິເຄາະການເຊື່ອມໂຍງທາງດ້ານເສດຖະກິດ, ການຄ້າ ແລະ ການລົງທຶນ ພາຍໃຕ້ກອບ RCEP ແລະ ແລວທາງເສດຖະກິດ ລາວ-ຈີນ, ໂດຍເນັ້ນໃສ່ການສ້າງມູນຄ່າເພີ່ມໃນທ້ອງຖິ່ນ, ການປະສານງານດ້ານອຸດສາຫະກຳ ແລະ ກົນໄກການເງິນ-ການຊຳລະທີ່ທັນສະໄໝ, ຄວບຄູ່ໄປກັບການປະເມີນຜົນສຳເລັດຂອງການພັດທະນາໂຄງລ່າງພື້ນຖານຄົມມະນາຄົມ ແລະ ເສັ້ນທາງລົດໄຟ ລາວ-ຈີນ ທີ່ເປັນກຳລັງຂັບເຄື່ອນຕົ້ນຕໍ; ພ້ອມກັນນັ້ນ ຍັງໄດ້ຍົກໃຫ້ເຫັນເຖິງຄວາມສຳຄັນຂອງການພັດທະນາຊັບພະຍາກອນມະນຸດ, ການສຶກສາວິຊາຊີບ ແລະ ການແລກປ່ຽນທາງດ້ານວິທະຍາສາດ ເພື່ອຮອງຮັບການຂະຫຍາຍຕົວທາງເສດຖະກິດ ບົນພື້ນຖານທັດສະນະທີ່ວ່າຄວາມທັນສະໄໝແມ່ນໝາກຜົນຂອງໂລກ, ບັນດາຜົນໄດ້ຮັບ ແລະ ສິ່ງທ້າທາຍຕົວຈິງ ເຊັ່ນ: ຂໍ້ຈຳກັດດ້ານເຄືອຂ່າຍໂຄງລ່າງ, ການອຳນວຍຄວາມສະດວກຂອງພາກລັດ, ແລະ ຕົ້ນທຶນຄ່າຂົນສົ່ງ ເພື່ອສັງລວມເປັນຂໍ້ສະເໜີແນວທາງດ້ານທິດສະດີ ແລະ ນະໂຍບາຍ ທີ່ຈະນຳໄປຜັນຂະຫຍາຍສູ່ພາກປະຕິບັດຕົວຈິງໃຫ້ປະກົດຜົນເປັນຮູບປະທຳ. 

​          ຜົນການສໍາມະນາຄັ້ງນີ້ ບໍ່ພຽງແຕ່ເປັນຄັງຄວາມຮູ້ອັນມີຄຸນຄ່າເທົ່ານັ້ນ, ແຕ່ຍັງເປັນການປະກອບສ່ວນອັນສຳຄັນເຂົ້າໃນການເສີມສ້າງຄວາມເຂົ້າໃຈ, ເພີ່ມທະວີຄວາມເຊື່ອໝັ້ນ ແລະ ຜັນຂະຫຍາຍການເປັນຄູ່ຮ່ວມຊາຕາກຳ ລາວ-ຈີນ ໃຫ້ມີຄວາມແໜ້ນແຟ້ນ ແລະ ເປັນຮູບປະທຳ, ສ່ອງແສງເຖິງຄວາມສາມັກຄີຮັກແພງ ແລະ ຄວາມເຊື່ອມໂຍງຢ່າງແໜ້ນແຟ້ນລະຫວ່າງສອງພັກ, ສອງລັດ, ສອງຊາດ ແລະ ສອງສະຖາບັນຄັງປັນຍາ. ຜົນສໍາເລັດດັ່ງກ່າວ ຈະສັງລວມເປັນຂໍ້ມູນລາຍງານສະເໜີຕໍ່ພາກສ່ວນກ່ຽວຂ້ອງ ເພື່ອໃຊ້ເປັນພື້ນຖານດ້ານທິດສະດີ ແລະ ເປັນບ່ອນອີງໃນການວາງນະໂຍບາຍ ສູ່ການປະຕິບັດຕົວຈິງຢ່າງມີປະສິດທິຜົນ.