ໃນພິທີອັນມີຄວາມໝາຍນີ້, ສະຫາຍ ປອ. ລີເບີ ລີບົວປາວ ໄດ້ຕາງໜ້າໃຫ້ຄະນະພັກ ແລະ ຄະນະນຳ ສວສສຊ ກ່າວອວຍພອນໄຊອັນປະເສີດ ຕໍ່ສະຫາຍ ຫງວຽນ ມິ່ງ ເຕີມ ຈົ່ງມີສຸຂະພາບແຂງແຮງ ສືບຕໍ່ເປັນຂົວຕໍ່ໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງຊາດ, ສອງສະຖາບັນ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດໄປ. ພ້ອມກັນນັ້ນ, ຍັງໄດ້ຝາກຄໍາອວຍພອນອັນຈິງໃຈໄປເຖິງພັກ, ລັດຖະບານ ແລະ ປະຊາຊົນຫວຽດນາມ ໃຫ້ປະສົບຜົນສໍາເລັດໃນພາລະກິດສ້າງສາ ແລະ ພັດທະນາປະເທດຊາດຢ່າງສະຫງ່າງາມ.

        ພ້ອມນີ້, ສະຫາຍ ຫງວຽນ ມິ່ງ ເຕີມ ກໍ່ໄດ້ສະແດງຄວາມຂອບໃຈຢ່າງສຸດຊຶ້ງ ຕໍ່ຄະນະນຳ ສວສສຊ  ທີ່ເຫັນໄດ້ຄວາມໝາຍຄວາມສຳຄັນ ແລະ ຮ່ວມສະຫຼອງວັນຊາດຫວຽດນາມ ທີ່ໝູນວຽນມາ ຄົບຮອບ 81 ປີ ຢ່າງມີຄວາມໝາຍ, ສະຫາຍຍັງໄດ້ ຕີລາຄາສູງຕໍ່ມູນເຊື້ອແຫ່ງຄວາມສາມັກຄີແບບພິເສດ ລາວ-ຫວຽດນາມ ໂດຍສະເພາະແມ່ນການຮ່ວມມືດ້ານວິຊາການ ແລະ ວິທະຍາສາດ ລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ສະຖາບັນບັນດິດວິທະຍາສາດສັງຄົມຫວຽດນາມ ທີ່ຍາມໃດ ກໍໄດ້ຮັບການຮັດແໜ້ນຄວາມຮ່ວມມື ແລະ ນັບມື້ກ້າວເຂົ້າສູ່ລ່ວງເລິກຢ່າງບໍ່ຢຸດຢັ້ງ.