ຂ່າວການເຄື່ອນໄຫວ – ໜ້າ 9 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມໃຫຍ່ສະມາຊິກພັກ ຄັ້ງທີ II ໜ່ວຍພັກຫ້ອງການ ສວສສຊ

ຈໍານວນຜູ້ເຂົ້າຊົມ: 723

ກອງປະຊຸມໃຫຍ່ສະມາຊິກພັກ ຄັ້ງທີ II ໜ່ວຍພັກຫ້ອງການ ສວສສຊ

ກອງປະຊຸມໃຫຍ່ສະມາຊິກພັກ ຄັ້ງທີ II ຂອງໜ່ວຍພັກຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໄຂຂຶ້ນໃນຕອນເຊົ້າຂອງວັນທີ 21 ເມສາ 2025 ທີ່ຫ້ອງປະຊຸມຊັ້ນ 3 ຕຶກການນໍາ ສວສສຊ ໂດຍການເປັນປະທານຂອງ ສະຫາຍ ເພັດໃສ ເພຍເທບ ກໍາມະການຄະນະພັກ, ເລຂາໜ່ວຍພັກຫ້ອງການ, ໃຫ້ກຽດເຂົ້າຮ່ວມມີ ສະຫາຍ ປອ. ກິແກ້ວ ຈັນທະບູຣີ ຄະນະປະຈໍາ, ຮອງເລຂາຄະນະພັກ ສວສສຊ, ມີຜູ້ຕາງໜ້າຈາກບັນດາໜ່ວຍພັກອ້ອມຂ້າງ ສວສສຊ, ຕາງໜ້າຂອງ 3 ອົງການຈັດຕັ້ງມະຫາຊົນ ແລະ ສະມາຊິກພັກສົມບູນ ເຂົ້າຮ່ວມທັງໝົດ 37 ສະຫາຍ.

ກອງປະຊຸມໄດ້ຮັບຟັງ ແລະ ເປັນເອກະພາບຮັບຮອງເອົາເນື້ອໃນຮ່າງບົດລາຍງານການເມືອງ, ແຜນພັດທະນາວຽກງານຂອງຫ້ອງການ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກ ໃນໄລຍະຜ່ານມາ ເຊິ່ງຍົກໃຫ້ເຫັນຜົນສຳເລັດການນໍາພາ-ຊີ້ນໍາ, ການຈັດຕັ້ງປະຕິບັດມະຕິ, ຄໍາສັ່ງຕ່າງໆ ຂອງຄະນະພັກ-ຄະນະນໍາ ເຮັດໃຫ້ໜ່ວຍພັກ, ສະມາຊິກພັກພາຍໃນຫ້ອງການ ມີການພັດທະນາກ້າວໜ້າໃນໜ້າທີ່ວຽກງານ, ກົງຈັກການຈັດຕັ້ງຂອງຫ້ອງການໄດ້ຮັບການບູລະນະປັບປຸງເຂັ້ມແຂງຂຶ້ນ, ການປະຕິບັດວຽກງານວິຊາສະເພາະກໍ່ມີການພັດທະນາດີຂຶ້ນຢ່າງຕໍ່ເນື່ອງ.

ໃນກອງປະຊຸມ ສະມາຊິກພັກສົມບູນໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະ ນະໜ່ວຍພັກຫ້ອງການຊຸດໃໝ່ ບົນພື້ນຖານມາດຖານເງື່ອນໄຂທີ່ກໍານົດໃວ້ ເຊິ່ງມີຜູ້ຮັບສະໝັກເລືອກຕັ້ງ 5 ສະ ຫາຍ ເລືອກເອົາ 3 ສະຫາຍ. ກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາ ສະຫາຍ ເພັດໃສ ເພຍເທບ ເປັນເລຂາໜ່ວຍພັກ; ສະຫາຍ ພອນ ວິພົນຮຽນ ເປັນຮອງເລຂາໜ່ວຍພັກ ແລະ ສະຫາຍ ນາງ ສີອໍາໄພ ພັນທະວອນ ເປັນກໍາມະການໜ່ວຍພັກ ທັງເປັນປະທານກວດກາ.

ໃນໂອກາດດັ່ງກ່າວ ສະຫາຍ ປອ. ກິແກ້ວ ຈັນທະບູຣີ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ຄະນະໜ່ວຍພັກຫ້ອງການຊຸດໃໝ່ ໃຫ້ເອົາໃຈໃສ່ເພີ່ມທະວີສຶກສາອົບຮົມການເມືອງແນວຄິດໃຫ້ສະມາຊິກພັກພະນັກງານ, ສ້າງຄວາມເປັນເອກະພາບຕໍ່ແນວທາງການປ່ຽນແປງໃໝ່ຂອງພັກ; ຍຶດໝັ້ນຫຼັກການລວມສູນປະຊາທິປະໄຕ, ມີ ການແບ່ງໜ້າທີ່ແບ່ງຄວາມຮັບຜິດຊອບຢ່າງລະອຽດ, ປະຕິບັດຫຼັກການຫົວໜ້າດຽວ ເພື່ອເພີ່ມທະວີຄວາມເປັນ ເອກະພາບ, ຄວາມສາມັກຄີໃນຄະນະໜ່ວຍພັກ ແລະ ປັບປຸງພາຍໃນໜ່ວຍພັກໃຫ້ມີຄວາມເຂັ້ມແຂງ; ເອົາໃຈໃສ່ຊຸກຍູ້ວຽກວິຊາສະເພາະ ໂດຍສະເພາະ 5 ວຽກງານຈຸດສຸມ ເພື່ອສ້າງເງື່ອນໄຂສິ່ງອໍານວຍຄວາມສະດວກໃຫ້ ບັນດາສະຖາບັນ, ຫ້ອງການ, ກົມ ແລະ ສູນ ອ້ອມຂ້າງ, ພົວພັນປະສານງານວຽກງານປີ່ນອ້ອມ ສວສສຊ ໃຫ້ວ່ອງໄວ ແລະ ເປັນແບບຢ່າງນໍາໜ້າໃນທຸກດ້ານ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ໜ່ວຍພັກສະຖາບັນຄົ້ນຄວ້າພັດທະນາວິສາຫະກິດ ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II

ຈໍານວນຜູ້ເຂົ້າຊົມ: 644

ໜ່ວຍພັກສະຖາບັນຄົ້ນຄວ້າພັດທະນາວິສາຫະກິດ ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II

ໃນຕອນບ່າຍ ຂອງວັນທີ 9 ເມສາ 2025 ທີ່ຫ້ອງປະຊຸມສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສະຖາບັນຄົ້ນຄວ້າພັດທະນາວິສາຫະກິດ ໄດ້ໄຂກອງປະຊຸມໃຫຍ່ສະມາຊິກພັກ ຄັ້ງທີ II ຂອງຕົນຂຶ້ນພາຍໃຕ້ການເປັນປະທານຂອງ ສະຫາຍ ປອ. ນ. ກິນນະລອນ ພິມມະວົງ ຮັກສາການເລຂາໜ່ວຍພັກ; ເປັນກຽດເຂົ້າຮ່ວມມີ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ ສວສສຊ; ມີບັນດາກຳມະການຄະນະພັກ, ບັນດາເລຂາໜ່ວຍພັກ ທີ່ມາຈາກສະຖາບັນຄົ້ນຄວ້າ, ຫ້ອງການ, ກົມ ແລະ ສູນ, ຜູ້ຕາງໜ້າ 3 ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຜູ້ແທນສົມບູນກອງປະຊຸມເຂົ້າຮ່ວມ ຈໍານວນ 27 ສະຫາຍ.

ສະຫາຍ ປອ. ນ. ກິນນະລອນ ພິມມະວົງ ຮັກສາການເລຂາໜ່ວຍພັກ ໄດ້ຂຶ້ນກ່າວເປີດກອງປະຊຸມ ພ້ອມທັງຜ່ານຮ່າງບົດລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກ, ຕະຫຼອດໄລຍະຜ່ານມາ ຄະນະໜ່ວຍພັກໄດ້ຄວາມສຳຄັນ ແລະ ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານເປັນປົກກະຕິ, ຕິດພັນກັບການເຮັດວຽກງານວິຊາສະເພາະຂອງຕົນຢ່າງຕັ້ງໜ້າ ເຊິ່ງບາງຕອນຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນໃນຫຼາຍດ້ານ ເປັນຕົ້ນແມ່ນປະຕິບັດໂຄງການຄົ້ນຄວ້າ, ການຂຽນບົດວິຊາການຕ່າງໆເຂົ້າຮ່ວມກອງປະຊຸມສຳມະນາວິທະຍາສາດຢູ່ພາຍໃນ ແລະ ສາກົນ, ການຂຽນບົດຄວາມລົງວາລະສານ ແລະ ສື່ສິ່ງພິມຕ່າງໆ. ນອກຈາກນັ້ນ ບັນດາສະມາຊິກພັກຍັງໄດ້ພ້ອມປະກອບຄຳຄິດເຫັນໃສ່ 2 ເອກະສານດັ່ງກ່າວ ແລະ ໄດ້ ເປັນເອກະພາບຕີລາຄາດ້ານດີ, ດ້ານອ່ອນ-ຂໍ້ຄົງຄ້າງ, ສາຍເຫດ ແລະ ບົດຮຽນທີ່ຖອດຖອນໄດ້ໃນການຳພາ-ຊີ້ນຳການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ I. ໃນກອງປະຊຸມ ບັນດາຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງໄດ້ເອກະພາບເລືອກເອົາ ສະຫາຍ ປອ. ນ. ກິນນະ ລອນ ພິມມະວົງ ເປັນເລຂາໜ່ວຍພັກ; ສະຫາຍ ນ. ພອນສະຫັວນ ສິດທິເດດ ເປັນຮອງເລຂາໜ່ວຍພັກ ແລະ ສະຫາຍ ຈັນສະໝອນ ວົງໄພສິດ ເປັນກໍາມະການໜ່ວຍພັກ ທັງເປັນປະທານກວດກາ.

ໃນໂອກາດດັ່ງກ່າວ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີຄໍາເຫັນໂອ້ລົມຕໍ່ຄະນະໜ່ວຍພັກຊຸດໃໝ່ ຈົ່ງຮີບຮ້ອນເອົາໃຈໃສ່ຈັດຕັ້ງເຊື່ອມຊຶມກຳແໜ້ນເນື້ອໃນມະຕິກອງປະຊຸມໃນຄັ້ງນີ້ໃຫ້ແກ່ສະມາຊິກພັກ, ຕ້ອງປະຕິບັດລວມສູນປະຊາທິປະໄຕ, ປັບປຸງແບບແຜນນຳພາ ໃນຄະນະໜ່ວຍພັກມີການແບ່ງໜ້າທີ່ຮັບຜິດຊອບໃຫ້ຈະແຈ້ງ, ຖືເອົາການຕຳນິຕິຊົມຕົນເອງ ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ເພື່ອກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັ້ກແໜ້ນ; ຕ້ອງຖືສໍາຄັນການສຶກສາອົບຮົມການເມືອງ-ແນວຄິດຂອງສະມາຊິກພັກ-ພະນັກງານໃຫ້ມີຄວາມ ເຂົ້າ ໃຈຢ່າງຖືກຕ້ອງຕໍ່ແນວທາງນະໂຍບາຍຂອງພັກຢ່າງເລິກເຊິ່ງເຖິງຖອງ; ເອົາໃຈໃສ່ນຳພາ-ຊີ້ນຳ ສ້າງການຫັນປ່ຽນຢ່າງຕັ້ງໜ້າໃນການປະຕິບັດໜ້າທີ່; ເພີ່ມບົດບາດໃນການຄົ້ນຄວ້າວິທະຍາສາດເສດຖະກິດໃຫ້ໄດ້ປະສິດທິພາບ ແລະ ປະສິດທິຜົນ, ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ, ມີຄວາມເຂັ້ມງວດໃນການຈັດຕັ້ງປະຕິບັດບັນດາຫຼັກການ, ລະບຽບການຕ່າງໆ, ເຊີດຊູຄວາມຮັບຜິດຊອບທາງການເມືອງ, ຄວາມເປັນແບບຢ່າງນຳໜ້າ, ນໍ້າໃຈຊ່ວຍ ເຫຼືອເຊິ່ງກັນ ແລະ ກັນ ພ້ອມກັນເຮັດສຳເລັດໜ້າທີ່ການເມືອງທີ່ພັກ ແລະ ລັດຮັບມອບໝາຍໃຫ້ຢ່າງຈົບງາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II ໜ່ວຍພັກສະຖາບັນຄົ້ນຄວ້າການເມືອງວິທະຍາ

ຈໍານວນຜູ້ເຂົ້າຊົມ: 625

ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II ໜ່ວຍພັກສະຖາບັນຄົ້ນຄວ້າການເມືອງວິທະຍາ

ໃນຕອນບ່າຍ ຂອງວັນທີ 08 ເມສາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສະຖາບັນຄົ້ນຄວ້າການເມືອງວິທະຍາ ໄດ້ໄຂກອງປະຊຸມໃຫຍ່ສະມາຊິກພັກ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າການເມືອງວິທະຍາ ພາຍໃຕ້ການເປັນປະທານຂອງ ສະຫາຍ ປອ. ແກ້ວວິຈິດ ໄຂຄຳພິທູນ ຮັກສາການເລຂາໜ່ວຍພັກສະຖາບັນຄົ້ນຄວ້າການເມືອງວິທະຍາ; ໃຫ້ກຽດເຂົ້າຮ່ວມມີ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ ສວສສຊ; ມີບັນດາກຳມະການຄະນະພັກ, ບັນດາເລຂາໜ່ວຍພັກ ທີ່ມາຈາກສະຖາບັນຄົ້ນຄວ້າ, ຫ້ອງການ, ກົມ ແລະ ສູນ, ຜູ້ຕາງໜ້າ 3 ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຜູ້ແທນສົມບູນກອງປະຊຸມເຂົ້າຮ່ວມ ຈໍານວນ 31 ສະຫາຍ.

ສະຫາຍ ປອ. ແກ້ວວິຈິດ ໄຂຄຳພິທູນ ຮັກສາການເລຂາໜ່ວຍພັກ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ພ້ອມທັງສະເໜີຮ່າງບົດລາຍງານການເມືອງ, ຮ່າງບົດສໍາຫຼວດການນໍາພາລວມຂອງຄະນະໜ່ວຍພັກຊຸດເກົ່າ ເຊິ່ງຍົກໃຫ້ເຫັນຜົນສໍາເລັດທີ່ພົ້ນເດັ່ນຫຼາຍດ້ານ ໂດຍສະເພາະຜົນສຳເລັດການປະຕິບັດໂຄງການຄົ້ນຄວ້າ, ການຂຽນບົດວິຊາການເຂົ້າຮ່ວມກອງປະຊຸມສຳມະນາວິທະຍາສາດຢູ່ພາຍໃນ ແລະ ສາກົນ, ການຂຽນບົດຄວາມລົງວາລະສານ ແລະ ສື່ສິ່ງພິມ ແລະ ອື່ນໆ ພ້ອມນັ້ນຍັງຍົກໃຫ້ເຫັນບາງຈຸດອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອສືບແກ້ໄຂໃຫ້ໝົດໄປເທື່ອລະກ້າວໃນຕໍ່ໜ້າ. ກອງປະຊຸມໄດ້ພ້ອມກັນນໍາໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີຜູ້ສະໝັກເລືອກຕັ້ງທັງໝົດ ຈຳນວນ 4 ສະຫາຍ, ຍິງ 1 ສະຫາຍ, ເລືອກເອົາ 3 ສະ ຫາຍ. ໃນກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາ ສະຫາຍ ປອ. ແກ້ວວິຈິດ ໄຂຄຳພິທູນ ເປັນເລຂາໜ່ວຍພັກ, ສະຫາຍ ຫຸມແພງ ວົງສີປະເສີດ ເປັນຮອງເລຂາໜ່ວຍພັກ, ສະຫາຍ ນ. ດາວວົງ ສິມມະວົງ ເປັນກຳມະ ການໜ່ວຍພັກ ທັງເປັນປະທານກວດກາ.

ເພື່ອເຮັດໃຫ້ກອງປະຊຸມຄັ້ງນີ້ ເຕັມໄປດ້ວຍເນື້ອໃນ ແລະ ມີຄວາມໝາຍສໍາຄັນ, ສະຫາຍ ປອ. ກອງແກ້ວ ໄຊສົງ ຄາມ ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໃຫ້ກຽດມີຄຳເຫັນໂອ້ລົມຕໍ່ກອງ ປະຊຸມບາງຕອນວ່າ: ຄະນະໜ່ວຍພັກສະຖາບັນຄົ້ນຄວ້າການເມືອງວິທະຍາຕ້ອງໄດ້ເພີ່ມທະວີສຶກສາອົບຮົມວຽກງານການເມືອງ-ແນວຄິດໃຫ້ກັບສະມາຊິກພັກພະນັກງານໃຫ້ເປັນປົກກະຕິ, ຕໍ່ເນື່ອງ ໂດຍຖືເອົາການປະຕິບັດລະບຽບຂອງພັກ, ກົດໝາຍຂອງລັດທີ່ວາງອອກຢ່າງເຂັ້ມງວດ; ເອົາໃຈໃສ່ປັບປຸງລະບົບການຈັດຕັ້ງພັກ-ລັດ ໃຫ້ມີຄວາມໜັກແໜ້ນເຂັ້ມແຂງ ເປັນຕົ້ນຄວາມສາມັກຄີເປັນເອກະພາບພາຍໃນພັກ, ຖັນແຖວສະມາຊິກພັກ, ພະນັກງານ-ລັດຖະກອນ ໃຫ້ມີຄວາມຫ້າວຫັນ, ປະຕິບັດໜ້າທີ່ດ້ວຍຄວາມຮັບຜິດຊອບສູງ; ເອົາໃຈໃສ່ຊຸກຍູ້ສົ່ງເສີມວຽກງານວິຊາສະເພາະ, ເປັນເຈົ້າການໃນການຄົ້ນຄວ້າ, ມີຄວາມກະຕືລືລົ້ນ, ມີຫົວຄິດປະດິດສ້າງ, ກ້າຕັດສິນໃຈ, ກ້າເຮັດ ແລະ ກ້າຮັບຜິດຊອບ; ການປະຕິບັດໜ້າທີ່ວຽກງານຄົ້ນຄວ້າວິທະຍາສາດການເມືອງ ຕ້ອງຍຶດໝັ້ນຕໍ່ແນວທາງນະໂຍບາຍຂອງພັກ, ກໍາແໜ້ນທັດສະນະ, ອຸດົມການຂອງພັກ, ຮູ້ໝູນໃຊ້ເຂົ້າໃນວຽກງານໂຕຈິງ; ການດຳເນີນໂຄງການຄົ້ນຄວ້າຕ່າງໆ ທັງພາຍໃນ ແລະ ຕ່າງປະເທດ ຕ້ອງຮັບປະກັນດ້ານສະຖຽນລະພາບທາງດ້ານການເມືອງ; ຕ້ອງສຸມໃສ່ຄົ້ນຄວ້າວິທະຍາສາດການເມືອງ ຕາມຫຼັກມູນທິດສະດີມາກ-ເລນິນ, ແນວຄິດ ໄກສອນ ພົມວິຫານ ແລະ ບັນດາແນວຄິດທິດສະດີກ້າວໜ້າຂອງມວນມະນຸດ ເຊິ່ງເປັນທິດສະດີ ແລະ ພຶດຕິກຳຂອງພັກ ເພື່ອຕອບສະໜອງຂໍມູນທາງດ້ານທິດສະດີການເມືອງໃຫ້ແກ່ການວາງແນວທາງຂອງພັກ-ລັດ ໃນແຕ່ລະໄລຍະ.

ຂຽນຂ່າວ ແລະ ຖ່າຍພາບ: ມຸນິນ ພົນສັກດາ

ໜ່ວຍພັກສະຖາບັນຄົ້ນຄວ້າວັດທະນະທໍາ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ຈໍານວນຜູ້ເຂົ້າຊົມ: 688

ໜ່ວຍພັກສະຖາບັນຄົ້ນຄວ້າວັດທະນະທໍາ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ເພື່ອຜັນຂະຫຍາຍ ແລະ ບູລະນະກົງຈັກການຈັດຕັ້ງພັກໃຫ້ມີຄວາມເຂັ້ມແຂງ, ໜັກແໜ້ນ, ແນໃສ່ບັນລຸເປົ້າໝາຍຍຸດທະສາດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຢ່າງຍາວນານ, ໝັ້ນຄົງໃນຕໍ່ໜ້າ. ໃນຕອນເຊົ້າຂອງວັນທີ 9 ເມສາ 2025 ທີ່ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສະຖາບັນຄົ້ນຄວ້າວັດທະນະທໍາ ໄດ້ໄຂກອງປະຊຸມໃຫຍ່ສະມາຊິກພັກຄັ້ງທີ II ຂອງໜ່ວຍພັກຕົນຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ປອ. ເດັ່ງຢ່າງ ກົງຈີ ຮັກສາການເລຂາໜ່ວຍພັກ; ເປັນກຽດເຂົ້າຮ່ວມກອງປະຊຸມມີ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ມີສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ; ມີບັນດາກໍາມະການຄະນະພັກ; ບັນດາເລຂາໜ່ວຍພັກ ມາຈາກໜ່ວຍພັກສະຖາບັນຄົ້ນຄວ້າ, ຫ້ອງການ, ກົມ ແລະ ສູນ, ຜູ້ຕາງໜ້າ 3 ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຜູ້ແທນສົມບູນເຂົ້າຮ່ວມ ຈໍານວນ 29 ສະ ຫາຍ.

ສະຫາຍ ປອ. ເດັ່ງຢ່າງ ກົງຈີ ຮັກສາການເລຂາໜ່ວຍພັກ ໄດ້ຂຶ້ນກ່າວເປີດກອງປະຊຸມ ພ້ອມທັງຜ່ານຮ່າງ ບົດລາຍງານການເມືອງ, ບົດສໍາຫຼວດການນໍາພາລວມຂອງຄະນະຊຸດເກົ່າ ເຊິ່ງຍົກໃຫ້ເຫັນເຖິງບັນດາຜົນສໍາເລັດທີ່ພົ້ນເດັ່ນໃນຫຼາຍດ້ານ ເປັນຕົ້ນແມ່ນປະຕິບັດໂຄງການຄົ້ນຄວ້າ, ການຂຽນບົດວິຊາການຕ່າງໆ, ເຂົ້າຮ່ວມກອງປະຊຸມສຳມະນາພາຍໃນ ແລະ ສາກົນ, ການຂຽນບົດຄວາມລົງວາລະສານ ແລະ ສື່ສິ່ງພິມ ເຊິ່ງເປັນຜົນງານທີ່ສະຖາບັນຄົ້ນຄວ້າວັດທະນະທໍາຍາດມາໄດ້ໃນຊຸມປີຜ່ານມາ ພ້ອມນັ້ນຍັງຍົກໃຫ້ເຫັນຈຸດອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອນໍາໄປປັບປຸງແກ້ໄຂໃນຕໍ່ໜ້າ.

ໃນກອງປະຊຸມຄັ້ງນີ້, ບັນດາຜູ້ແທນສົມບູນໄດ້ນໍາໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີຜູ້ສະໝັກເລືອກຕັ້ງທັງໝົດ 5 ສະຫາຍ ເລືອກເອົາ 3 ສະຫາຍ ແລະ ໄດ້ເອກະພາບເລືອກເອົາ ສະຫາຍ ປອ. ເດັ່ງຢ່າງ ກົງຈີ ເປັນເລຂາໜ່ວຍພັກ; ສະຫາຍ ໄຊສົມພອນ ຫາວັນນະລາດ ເປັນຮອງເລຂາໜ່ວຍພັກ ແລະ ສະຫາຍ ແພງຢ່າງ ເກຍປາວ ເປັນກໍາມະການພັກ ທັງເປັນປະທານກວດກາໜ່ວຍພັກ.

ໃນໂອກາດທີ່ມີຄວາມໝາຍສໍາຄັນດັ່ງກ່າວ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີຄໍາເຫັນໂອ້ລົມຕໍ່ກອງປະຊຸມບາງຕອນວ່າ: ບັນດາສະຫາຍໃນຄະນະໜ່ວຍພັກຊຸດໃໝ່ ຕ້ອງໄດ້ຖືສຳຄັນ ແລະ ເອົາໃຈໃສ່ສຶກສາອົບຮົມ, ບໍາລຸງກໍ່ສ້າງຖັນແຖວສະມາຊິກພັກພະນັກງານ ກໍຄືຖັນແຖວນັກຄົ້ນຄວ້າຂອງຕົນ ໃຫ້ມີແນວຄິດການການເມືອງ, ຄຸນສົມບັດ ສິນທໍາປະຕິວັດ, ຄວາມຮູ້ຄວາມສາມາດສູງຂຶ້ນ ແລະ ໄດ້ຮັບຄວາມເຊື່ອໝັ້ນໄວ້ວາງໃຈຈາກຂັ້ນເທິງ; ເອົາໃຈໃສ່ນໍາພາຊີ້ນຳ ແລະ ສ້າງການຫັນປ່ຽນຢ່າງຕັ້ງໜ້າ ໃນການປະຕິບັດໜ້າທີ່ວິຊາສະເພາະດ້ວຍການກໍານົດຈຸດສຸມເປົ້າໝາຍຂອງການຄົ້ນຄວ້າໃຫ້ຈະແຈ້ງຂຶ້ນຕື່ມ; ເອົາໃຈໃສ່ກໍ່ສ້າງໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງໜັກແໜ້ນ ທີ່ມີການພັດທະນາຢ່າງແຂງແຮງ; ປຸກລະດົມເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ; ມີການປັບປຸງແບບແຜນວິທີນຳພາ, ແບບແຜນວິທີເຮັດວຽກ ແລະ ເຂັ້ມງວດໃນການຊຸກຍູ້ຕິດຕາມ, ກວດກາ ແລະ ປະເມີນຜົນເປັນປົກກະຕິ; ພ້ອມດຽວກັນນັ້ນ ພາຍໃນຄະນະໜ່ວຍພັກຕ້ອງມີການແບ່ງວຽກ, ແບ່ງຄວາມຮັບຜິດຊອບໃຫ້ລະອຽດຈະແຈ້ງ ເພື່ອເຊີດຊູຄວາມສາມັກຄີ, ຄວາມຮັບຜິດຊອບຕໍ່ໜ້າທີ່ການເມືອງ, ຄວາມເປັນແບບຢ່າງນຳໜ້າໃນການປະຕິບັດໜ້າທີ່ການເມືອງທີ່ຂັ້ນເທິງມອບໝາຍໃຫ້ນັ້ນສຳເລັດຢ່າງຈົບງາມ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ມຸນິນ ພົນສັກດາ

ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II ໜ່ວຍພັກສະຖາບັນຄົ້ນຄວ້າເສດຖະກິດມະຫາພາກ

ຈໍານວນຜູ້ເຂົ້າຊົມ: 534

ສໍາເລັດກອງປະຊຸມໃຫຍ່ສະມາຊິກພັກຄັ້ງທີ II ໜ່ວຍພັກສະຖາບັນຄົ້ນຄວ້າເສດຖະກິດມະຫາພາກ

ຕອນເຊົ້າຂອງວັນທີ 7 ເມສາ 2025 ທີ່ຫ້ອງປະຊຸມຕຶກການນໍາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສະຖາບັນຄົ້ນຄວ້າເສດຖະກິດມະຫາພາກ ໄດ້ໄຂກອງປະຊຸມໃຫຍ່ສະມາຊິກພັກຄັ້ງທີ II ໜ່ວຍພັກຂອງຕົນຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ນາງ ລັດດາວັນ ຊົງວິໄລ ເລຂາໜ່ວຍພັກ ສະຖາບັນຄົ້ນຄວ້າເສດຖະກິດມະຫາພາກ; ເປັນກຽດເຂົ້າຮ່ວມມີ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ; ມີບັນດາກໍາມະການຄະນະພັກ, ເລຂາໜ່ວຍພັກ ສະຖາບັນຄົ້ນຄວ້າ, ຫ້ອງການ, ກົມ ແລະ ສູນ, ຕາງໜ້າອົງການຈັດຕັ້ງມະຫາຊົນ ພ້ອມທັງຜູ້ແທນກອງປະຊຸມ ເຂົ້າຮ່ວມທັງໝົດ 33 ສະຫາຍ.

ສະຫາຍ ນາງ ລັດດາວັນ ຊົງວິໄລ ເລຂາໜ່ວຍພັກ ສຄສພ ໄດ້ຂຶ້ນກ່າວເປີດກອງປະຊຸມພ້ອມທັງຜ່ານຮ່າງບົດລາຍງານການເມືອງ, ບົດສໍາຫຼວດການນໍາພາລວມຂອງຄະນະຊຸດເກົ່າ ເຊິ່ງບາງຕອນຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນໃນຫຼາຍດ້ານ ໂດຍສະເພາະດ້ານການເມືອງແນວຄິດ, ຄວາມສາມັກຄີປອງດອງ, ແບບແຜນນໍາພາວິທີເຮັດວຽກ ພ້ອມທັງຍົກໃຫ້ເຫັນຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນໄລຍະຜ່ານມາ. ກອງປະຊຸມໄດ້ນໍາໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີໄດ້ເລືອກເອົາ ສະຫາຍ ນາງ ລັດດາວັນ ຊົງວິໄລ ເປັນເລຂາໜ່ວຍພັກ; ສະຫາຍ ປອ. ວັນໄຊ ໄຊຍະວົງ ເປັນຮອງເລຂາໜ່ວຍພັກ ແລະ ສະຫາຍ ສຸລະໄຊ ບຸນທິເດດ ເປັນກໍາມະການພັກ ທັງເປັນປະທານກວດກາໜ່ວຍພັກ.

ໃນກອງປະຊຸມ ໄດ້ຮັບຟັງຄໍາໂອ້ລົມຈາກ ສະຫາຍ ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ ສວສສຊ ເຊິ່ງສະຫາຍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນຫຼາຍດ້ານ ທີ່ສະແດງອອກໃນໄລຍະຜ່ານມາ ພ້ອມທັງໃຫ້ຊີ້ທິດເຍືອງທາງໃຫ້ແກ່ໜ່ວຍພັກສະຖາບັນຄົ້ນຄວ້າເສດຖະກິດມະຫາພາກ ຈົ່ງພ້ອມກັນເສີມຂະຫຍາຍ, ສຶກສາອົບຮົມການເມືອງແນວຄິດໃຫ້ສະມາຊິກພັກໃຫ້ເລິກເຊິ່ງ, ຕໍ່ເນື່ອງ ເໝືອນຝົນຝອຍທີ່ ເຮັດໃຫ້ດິນມີຄວາມຊຸ່ມຊື່ນ ພ້ອມກັນປັບປຸງໜ່ວຍພັກໃຫ້ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ເອົາ ໃຈໃສ່ປັບປຸງແກ້ໄຂຈຸດອ່ອນ-ຂໍ້ຄົງຄ້າງໃຫ້ໝົດໄປ ແລະ ສືບຕໍ່ຈັດຕັ້ງຜັນຂະຫຍາຍຄາດໝາຍສູ້ຊົນແຜນ 5 ປີໃນແຕ່ລະດ້ານໃຫ້ປະກົດຜົນເປັນຈິງ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ສວສສຊ ເຂົ້າວາງພວງມະລາໄວ້ອາໄລເຖິງສະຫາຍ ພົນເອກ ຄຳໄຕ ສີພັນດອນ

ຈໍານວນຜູ້ເຂົ້າຊົມ: 576

ສວສສຊ ເຂົ້າວາງພວງມະລາໄວ້ອາໄລເຖິງສະຫາຍ ພົນເອກ ຄຳໄຕ ສີພັນດອນ

ຕອນບ່າຍ ວັນທີ 4 ເມສາ 2025 ເວລາ 14ໂມງ30 ທີ່ຫໍປະຊຸມແຫ່ງຊາດ. ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ນໍາພາຄະນະພັກ-ຄະນະນຳ ເຂົ້າຮ່ວມພິທີວາງພວງມະລາ ແລະ ໄວ້ອາໄລ ເຖິງສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດແຫ່ງ ສປປ ລາວ ເພື່ອສະແດງຄວາມເຄົາລົບຮັກ ແລະ ເປັນການແບ່ງເບົາຄວາມໂສກເສົ້າຕໍ່ຄອບຄົວສີພັນດອນ.

ໂອກາດນີ້ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ ຕາງໜ້າສະມາຊິກພັກ-ພະນັກງານ ເຊັນປື້ມໄວ້ອາໄລ ມີເນື້ອໃນວ່າ: ຂໍສະແດງຄວາມເສຍໃຈ ແລະ ອາໄລອາວອນຢ່າງສຸດຊື້ງ ຕໍ່ການຈາກໄປຢ່າງບໍ່ມີວັນຫວນກັບຄືນມາຂອງສະຫາຍ ພົນເອກ ຄຳໄຕ ສີພັນດອນ ເປັນການສູນເສຍທີ່ໃຫຍ່ຫຼວງຂອງພັກ-ລັດ, ຊົນຊັ້ນກຳມະກອນ ແລະ ຊາວຜູ້ອອກແຮງງານບັນດາເຜົ່າ, ທ່ານເປັນຜູ້ນຳທີ່ໄດ້ວາງແນວທາງຂອງພັກ ແລະ ຮາກຖານການເມືອງຂອງປະເທດ, ເປັນຜູ້ລີເລີ່ມ ແລະ ຊີ້ນຳຫຼາຍໆຂົງເຂດ; ໃນນັ້ນ, ການຄົ້ນຄວ້າທິດສະດີ ແລະ ພຶດຕິກຳ ກໍ່ຄືຂົງເຂດການຄົ້ນຄວ້າວິທະຍາສາດເສດຖະກິດ-ສັງຄົມຂອງຊາດ ຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ.

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຂໍສະແດງຄວາມຮູ້ບູນຄຸນ, ເຄົາລົບຮັກທ່ານ ແລະ ຈະສືບຕໍ່ບູລະນະແນວທາງຕາມເຈດຕະນາລົມຂອງທ່ານໃນພາລະກິດປົກປັກຮັກສາ ແລະ ພັດທະນາປະເທດຊາດຕະຫຼອດໄປ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສໍາເລັດກອງປະຊຸມໃຫຍ່ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າສັງຄົມວິທະຍາ

ຈໍານວນຜູ້ເຂົ້າຊົມ: 739

ສໍາເລັດກອງປະຊຸມໃຫຍ່ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າສັງຄົມວິທະຍາ

ເພື່ອຈັດຕັ້ງຜັນຂະຫຍາຍແຜນຍຸດທະສາດ, ແຜນພັດທະນາວຽກງານຄົ້ນຄວ້າວິທະຍາສາດຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໃຫ້ປະກົດຜົນເປັນຈິງ ກໍຄືການກໍ່ສ້າງປັບປຸງວຽກງານພັກໃຫ້ມີຄວາມໜັ້ກແໜ້ນ, ເຂັ້ມແຂງຂຶ້ນເທື່ອລະກ້າວ. ໜ່ວຍພັກສະຖາບັນຄົ້ນຄວ້າສັງຄົມວິທະຍາຈຶ່ງໄດ້ຈັດກອງປະຊຸມໃຫຍ່ສະມາຊິກພັກ ຄັ້ງທີ II ຂອງຕົນຂຶ້ນຢ່າງເປັນທາງການໃນວັນທີ 04 ເມສາ 2025 ທີ່ຜ່ານມາ, ພາຍໃຕ້ການເປັນປະທານຂອງ ສະຫາຍ ປອ. ບຸນສີ ພຸດທະວົງ ຮັກສາການເລຂາໜ່ວຍພັກ ສະຖາບັນຄົ້ນຄວ້າສັງຄົມວິທະຍາ, ໃຫ້ກຽດເຂົ້າຮ່ວມຂອງສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍບັນດາກຳມະການຄະນະພັກ, ເລຂາໜ່ວຍພັກຈາກບັນດາສະຖາບັນຄົ້ນຄວ້າ, ຫ້ອງການ, ກົມ; ຜູ້ຕາງໜ້າ 3 ອົງການຈັດຕັ້ງມະຫາຊົນ ແລະ ຜູ້ແທນສົມບູນເຂົ້າຮ່ວມ ທັງໝົດ 27 ສະຫາຍ.

ກອງປະຊຸມໄດ້ຮັບຟັງການຜ່ານຮ່າງບົດລາຍງານການເມືອງ ທັງສອງພາກ, ແຜນພັດທະນາ ສຄສ 5 ປີ ຄັ້ງທີ II ແລະ ບົດສໍາຫຼວດການນໍາພາລວມ ຂອງຄະນະໜ່ວຍພັກ ເຊິ່ງໄດ້ຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນຫຼາຍດ້ານ ໂດຍສະເພາະດ້ານການເມືອງ-ແນວຄິດ, ການຈັດຕັ້ງ, ແບບແຜນນຳພາ-ວິທີເຮັດວຽກ, ການນໍາພາຈັດຕັ້ງປະຕິບັດພາລະບົດບາດ, ໜ້າທີ່, ສິດ ແລະ ຄວາມຮັບຜິດຊອບຕໍ່ໜ້າທີ່ການເມືອງ ແລະ ວຽກງານຂະບວນການຕ່າງໆ ພ້ອມທັງຍົກໃຫ້ເຫັນບັນດາຈຸດອ່ອນຂໍ້ຄົງຄ້າງ ແລະ ສາເຫດທີ່ພາໃຫ້ມີຈຸດດີ-ຈຸດອ່ອນຂໍ້ຄົງຄ້າງ ໃນການນໍາພາ-ຊີ້ນຳຂອງຄະນະໜ່ວຍພັກໃນໄລຍະທີ່ຜ່ານມາ. ໃນກອງປະຊຸມຍັງໄດ້ນໍາໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງໃນກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາ ສະຫາຍ ປອ. ບຸນສີ ພຸດທະວົງ ເປັນເລຂາໜ່ວຍພັກ, ສະຫາຍ ປທ. ທັດປານີ ແພງຄໍາສີ ເປັນຮອງເລຂາໜ່ວຍພັກ, ສະຫາຍ ປອ. ນ. ເກດມະນີ ອິນທະວົງ ເປັນກໍາມະການ ທັງເປັນປະທານກວດກາໜ່ວຍພັກ.

ໂອກາດນີ້ ສະຫາຍ ປອ. ກອງແກ້ວ ໄຊສົງຄາມ ໄດ້ໃຫ້ກຽດມີຄຳເຫັນໂອ້ລົມ ແລະ ເນັ້ນໜັກໃຫ້ຄະນະໜ່ວຍພັກຊຸດໃໝ່ ເອົາໃຈໃສ່ຈັດຕັ້ງເຜີຍແຜ່, ເຊື່ອມຊືມ, ກຳແໜ້ນເນື້ອໃນມະຕິກອງປະຊຸມໃຫ່ຍຄັ້ງນີ້ ໃຫ້ໜັກແໜ້ນ, ເລິກ ເຊິ່ງ ເພື່ອເປັນບ່ອນອີງໃນການສ້າງເປັນແຜນງານ, ໂຄງການ ຕິດພັນກັບວຽກງານວິຊາສະເພາະຂອງສະຖາບັນໃນແຕ່ລະໄລຍະ ໂດຍຖືເອົາການຄົ້ນຄວ້າວິທະຍາສາດໃຫ້ເປັນໃຈກາງ ແລະ ເປັນບັນຫາຕົ້ນຕໍທີ່ສໍາຄັນ ປະກອບສ່ວນເຂົ້າໃນການວາງແນວທາງນະໂຍບາຍຂອງພັກ-ລັດ; ເພີ່ມທະວີການສຶກສາອົບຮົມສະມາຊິກພັກພະນັກງານໃຫ້ເຂົ້າໃຈແນວທາງນະ ໂຍບາຍຂອງພັກ, ລະບຽບກົດໝາຍຂອງລັດ ຢ່າງເປັນປົກກະຕິ, ຕໍ່ເນື່ອງ; ເປັນເຈົ້າການຝຶກຝົນຫຼໍ່ຫຼອມຕົນເອງ ໃຫ້ມີທັດສະນະຫຼັກໝັ້ນ ການເມືອງໜັກແໜ້ນ ແລະ ເສີມຂະຫຍາຍຫົວຄິດປະດິດສ້າງ ເຂົ້າໃນການປັບປຸງວຽກງານວິຊາສະ ເພາະຂອງຕົນໃຫ້ນັບມື້ນັບດີຂື້ນ. ພ້ອມດຽວກັນນັ້ນ, ຕ້ອງເອົາໃຈໃສ່ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ ແລະ ຮັກສາມູນເຊື້ອການເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດຕໍ່ກັນຢ່າງຕໍ່ເນື່ອງຕະຫຼອດໄປ. ຖືເອົາການປັບປຸງແບບແຜນນໍາພາ, ວິທີເຮັດວຽກ ໂດຍຍຶດໝັ້ນຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ມີການແບ່ງງານ ແລະ ຄວາມຮັບຜິດຊອບໃຫ້ທຸກຄົນຢ່າງຈະແຈ້ງ, ເຊີດຊູຄວາມຮັບຜິດຊອບທາງການເມືອງໃຫ້ສູງຂຶ້ນ, ຮັກສາຄວາມເປັນແບບຢ່າງນໍາໜ້າ, ຮ່ວມແຮງຮ່ວມໃຈກັນ ແລະ ຊ່ວຍເຫຼືອກັນ ເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ. ເອົາໃຈໃສ່ນຳພາ-ຊີ້ນຳ ແລະ ຊຸກຍູ້ໃຫ້ອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດໜ້າທີ່ ຂອງແຕ່ລະອົງການ, ເພື່ອເປັນກຳລັງແຮງໃຫ້ຄະນະໜ່ວຍພັກ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ II ຂອງສະຖາບັນຄົ້ນຄວ້າສັງຄົມວິທະຍາ ກໍ່ຄືມະຕິກອງປະຊຸມໃຫ່ຍຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງ ຄົມແຫ່ງຊາດ ໃຫ້ປະກົດຜົນເປັນຈິງ, ກອງປະຊຸມໄດ້ປິດລົງດ້ວຍຜົນສຳເລັດຢ່າງຈົບງາມ ຕາມຄາດໝາຍທີ່ວາງໄວ້

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ຈໍານວນຜູ້ເຂົ້າຊົມ: 667

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ກອງປະຊຸມໃຫຍ່ສະມາຊິກພັກ ຄັ້ງທີ II ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໄດ້ສໍາເລັດລົງຢ່າງເປັນທາງການໃນ ວັນທີ 28 ມີນາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ຜ່ານມາ ພາຍໃຕ້ການເປັນປະທານຂອງ ສະຫາຍ ເດືອນສະຫວັນ ພອນມີໄຊ ຮັກສາການເລຂາໜ່ວຍພັກ ສູນຂໍ້ມູນຂ່າວສານ ແລະ ຝຶກອົບຮົມ; ໃຫ້ກຽດເຂົ້າຮ່ວມຂອງສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະປະຈໍາພັກ, ກຳມະການຄະນະພັກ, ເລຂາໜ່ວຍພັກຈາກບັນດາສະຖາບັນຄົ້ນຄວ້າ, ຫ້ອງການ, ກົມ ແລະ ຜູ້ແທນສົມບູນເຂົ້າຮ່ວມ ທັງໝົດ 30 ກວ່າສະຫາຍ.

ກອງປະຊຸມໄດ້ຮັບຟັງການຜ່ານຮ່າງບົດລາຍງານການເມືອງ ທັງສອງພາກ, ຮ່າງແຜນພັດທະນາ ສຂຝ 5 ປີ ຄັ້ງທີ II ແລະ ຮ່າງບົດສໍາຫຼວດການນໍາພາລວມຂອງຄະນະໜ່ວຍພັກ ເຊິ່ງໄດ້ຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນຫຼາຍດ້ານ ໂດຍສະເພາະດ້ານການເມືອງ-ແນວຄິດ, ການຈັດຕັ້ງ, ແບບແຜນນຳພາ-ວິທີເຮັດວຽກ, ການນຳພາຈັດຕັ້ງປະຕິບັດວຽກງານຕາມພາລະບົດບາດ, ໜ້າທີ່, ສິດ ແລະ ຄວາມຮັບຜິດຊອບຕໍ່ໜ້າທີ່ການເມືອງ ແລະ ຂະບວນການຕ່າງໆ. ພ້ອມທັງຍົກໃຫ້ເຫັນບັນຫາທີ່ຍັງຄົງຄ້າງ ແລະ ສາເຫດທີ່ພາໃຫ້ມີຈຸດດີ – ຈຸດອ່ອນຂໍ້ຄົງຄ້າງ ໃນການນໍາພາ-ຊີ້ນຳ ຂອງຄະນະໜ່ວຍພັກໃນໄລຍະທີ່ຜ່ານມາ.

ກອງປະຊຸມໄດ້ນໍາໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີຜູ້ສະໝັກເລືອກຕັ້ງທັງໝົດ ຈຳນວນ 5 ສະຫາຍ, ຍິງ 2 ສະຫາຍ, ເລືອກເອົາ 3 ສະຫາຍ. ໃນກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາ ສະຫາຍ ເດືອນສະຫວັນ ພອນມີໄຊ ເປັນເລຂາໜ່ວຍພັກ, ສະຫາຍ ນ. ພູຄຽງ ໄຊສີລິ ເປັນຮອງເລຂາໜ່ວຍພັກ, ສະຫາຍ ສຸກນິລັນ ແສງພະຈັນ ເປັນກຳມະການ ທັງເປັນປະທານກວດກາໜ່ວຍພັກ.

ໃນໂອກາດດັ່ງກ່າວນີ້ ສະຫາຍ ປອ. ກອງແກ້ວ ໄຊສົງຄາມ ໄດ້ໃຫ້ກຽດມີຄຳເຫັນໂອ້ລົມ ແລະ ເນັ້ນໜັກໃຫ້ຄະນະໜ່ວຍພັກຊຸດໃຫມ່ ຈົ່ງເອົາໃຈໃສ່ວຽກງານສຶກສາອົບຮົມນຳພາ-ການເມືອງແນວຄິດໃຫ້ແກ່ສະມາຊິກພັກ-ພະນັກ ງານພາຍໃຕ້ການຄຸ້ມຄອງຂອງຕົນໃຫ້ເປັນປົກກະຕິ, ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະທີ່ໄດ້ກຳນົດໃນບົດລາຍງານການເມືອງກໍ່ຄືແຜນການສູ້ຊົນ 5 ປີ ໃຫ້ປະກົດຜົນເປັນຈິງ, ປັບປຸງແບບແຜນວິທີເຮັດວຽກວິທີນໍາພາ-ຄຸ້ມຄອງໃຫ້ໜັກແໜ້ນ, ເຂັ້ມແຂງ, ເອົາໃຈໃສ່ໃກ້ຊິດຕິດແທດກັບສະມາຊິກພັກພະນັກງານ, ເຕົ້າໂຮມຄວາມສາມາມັກຄີພາຍໃນພັກໃຫ້ເປັນປຶກແຜນ. ຄະນະໜ່ວຍພັກຕ້ອງເອົາໃຈໃສ່ນຳພາຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນແຕ່ລະປີ ຕິດພັນກັບການນໍາພາຊຸກຍູ້ວຽກງານ 3 ອົງການຈັດຕັ້ງມະຫາຊົນ, ເພີ່ມທະວີວຽກງານກວດກາໃຫ້ເຂັ້ມແຂງກວ່າເກົ່າ ໂດຍສະເພາະແມ່ນການກຳແໜ້ນແນວຄິິດຂອງສະມາຊິກພັກພະນັກງານ, ການແບ່ງຄວາມຮັບຜິດຊອບໃຫ້ແຕ່ລະບຸກຄົນຢ່າງລະອຽດຈະແຈ້ງ, ການຍົກສູງຄວາມຮັບຜິດຊອບຂອງຕົນ, ການສຸມສະຕິປັນ ຍາຄວາມຮູ້, ຄວາມສາມາດ ເພື່ອເປັນກຳລັງແຮງໃນການຈັດຕັ້ງປະຕິບັດວຽກງານໃຫ້ສຳເລັດຕາມຄາດໝາຍທີ່ກຳນົດໄວ້.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນນິນ ພົນສັກດາ

ກອງປະຊຸມວິຊາການລະດົມຄວາມຄິດເຫັນ ຕໍ່ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ

ຈໍານວນຜູ້ເຂົ້າຊົມ: 724

ກອງປະຊຸມວິຊາການລະດົມຄວາມຄິດເຫັນ ຕໍ່ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ

ໃນວັນທີ 5 ມີນາ 2025 ທີ່ຜ່ານມາ ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສວສສຊ ຮ່ວມກັບອົງການ ສະຫະປະຊາຊາດ ສໍາລັບເດັກ (UNICEF), ໄດ້ຈັດກອງປະຊຸມວິຊາການລະດົມຄວາມຄິດເຫັນ ໃສ່ກອບເນື້້ອໃນການຄົ້ນຄວ້າ ຫົວຂໍ້ “ສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ” ພາຍໃຕ້ການເປັນປະທານຂອງ ທ່ານ ປອ. ນາງ ແກ້ວວິວອນ ອຸດທະຈັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ທ່ານ ບິນລາລ ອູແຣັງ ເຊັບ ດູຣານິ ຜູ້ຕາງໜ້າຈາກອົງການສະຫະປະຊາຊາດ ສໍາລັບເດັກ ພ້ອມດ້ວຍແຂກທີ່ຖືກເຊີນເຂົ້າຮ່ວມຈາກບັນດາຂະແໜງການຕ່າງໆເປັນຕົ້ນແມ່ນ: ກະຊວງສາທາລະນະສຸກ, ສະພາແຫ່ງຊາດ, ກະຊວງສຶກສາທິການ ແລະ ກິລາ, ກະຊວງການເງິນ, ກະຊວງແຜນການ ແລະ ການລົງທຶນ, ແນວລາວສ້າງຊາດ, ສະຫະພັນແມ່ຍິງ, ສູນກາງຊາວໜຸ່ມ, ຄະນະກໍາມະທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແລະ ຂະແໜງການອື່ນໆທີ່ກ່ຽວຂ້ອງ; ນອກນັ້ນຍັງມີຜູ້ຕາງໜ້າຈາກອົງການ UNICEF, ອົງການສະຫະປະຊາຊາດ ສໍາລັບປະຊາກອນ (UNFPA), ສະຖານທູດອົດສະຕາລີ ປະຈໍາ ສປປ ລາວ, ຊ່ຽວຊານຕ່າງປະເທດ ແລະ ພະນັກງານສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ເຂົ້າຮ່ວມຫຼາຍກວ່າ 30 ທ່ານ.

ຈຸດປະສົງກອງປະຊຸມ ເພື່ອລະດົມຄວາມຄິດເຫັນຈາກບັນດາພາກສ່ວນທີ່ກ່ຽວຂ້ອງ ໃສ່ກອບແນວຄວາມຄິດໃນການຄົ້ນຄວ້າ ແລະ ບັນດາເຄື່ອງມື ເພື່ອຮັບປະກັນໃຫ້ການຄົ້ນຄວ້າມີປະສິດທິພາບ, ປະສິດທິຜົນ ແລະ ບັນລຸຕາມຈຸດປະສົງ ແລະ ເປົ້າໝາຍໃນການຄົ້ນຄວ້າ. ພ້ອມທັງປຶກສາຫາລືລະດົມຄວາມຄິດເຫັນຕໍ່ການມີສ່ວນຮ່ວມຂອງທຸກພາກສ່ວນເຂົ້າໃນການປະກອບບຸກຄະລາກອນໃສ່ທີມງານຄົ້ນຄວ້າອີກດ້ວຍ; ເຊິ່ງບົດສະເໜີທີ່ສໍາຄັນນຳມາສະ ເໜີຄັ້ງນີ້ມີ: 1). ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ, ນໍາສະເໜີໂດຍ ທ່ານ ລາດຊະວົງ ບຸນສີພົມ, ຮອງຫົວໜ້າສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ ແລະ 2). ພາບລວມຂອງອົງປະກອບດ້ານຄຸນນະພາບຂອງການສຶກສາ ແລະ ເຄື່ອງມືໃນການເກັບກຳຂໍ້ມູນ ນໍາສະເໜີໂດຍ ທ່ານ ນ. ສຸລິຕາ ສຸກມົນຕີ, ຮອງຫົວໜ້າພະແນກສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ.

ຈາກຂໍ້ມູນເບື້ອງຕົ້ນພົບວ່າ: ສປປ ລາວ ມີອັດຕາການແຕ່ງງານໃນໄວເດັກສູງທີ່ສຸດໃນບັນດາປະເທດສະມາຊິກອາຊຽນ. ໃນຂະນະດຽວກັນ, ຄວາມຄືບຫນ້າໃນການຈັດຕັ້ງປະຕິບັດຍັງມີໜ້ອຍໃນທົດສະວັດທີ່ຜ່ານມາ ເຊິ່ງ ສປປ ລາວ ກໍຄືຫຼາຍປະເທດ ທີ່ໄດ້ປະສົບກັບວິກິດການຢ່າງຕໍ່ເນື່ອງ ເຮັດໃຫ້ມີຄວາມສ່ຽງ ຫຼື ຜົນກະທົບຮ້າຍແຮງຕໍ່ເດັກຍິງ ແລະ ເດັກຊາຍ ໃນ ສປປ ລາວ. ໃນນີ້, ການແຕ່ງງານກ່ອນໄວອັນຄວນຍັງມີການແຜ່ຫຼາຍ ໂດຍສະເພາະແມ່ນເດັກຍິງບາງຊົນເຜົ່າ ທີ່ມີອັດຕາສ່ວນການແຕ່ງງານໃນໄວເດັກຈໍານວນຫຼາຍ ແລະ ມີຄວາມແຕກຕ່າງກັນໄປໃນແຕ່ລະເຂດພື້ນທີ່ຂອງ ສປປ ລາວ ໂດຍເຫັນໄດ້ວ່າ ອັດຕາສ່ວນແມ່ຍິງອາຍຸ 20-24 ປີ ທີ່ແຕ່ງງານກ່ອນອາຍຸ 18 ປີ ສູງທີ່ສຸດ ແມ່ນຢູ່ເຂດພາກເໜືອ ກວມ 40.4% ແລະ ເຂດຫ່າງໄກສອກຫຼີກກວມ 36.3%, ເຊິ່ງນອນຢູ່ໃນແຂວງຫົວພັນ ກວມ 53.2%, ແຂວງໄຊສົມບູນ ກວມ 42.9%, ແຂວງຫຼວງພະບາງ ກວມ 42.2%, ແຂວງອຸດົມໄຊ ກວມ 41.7%, ແຂວງຜົ້ງສາລີ ກວມ 39.7% ແລະ ແຂວງບໍລິຄໍາໄຊ ກວມ 38.2%.

ການປຶກສາຫາລືດັ່ງກ່າວ ໄດ້ຮັບຄວາມສົນໃຈ ແລະ ມີບັນຍາກາດຟົດຟື້ນ ບັນດາແຂກທີ່ເຂົ້າຮ່ວມໄດ້ເອົາໃຈໃສ່ປະກອບຄຳຄິດຄຳເຫັນຢ່າງກົງໄປກົງມາ, ມີເນື້ອໃນ ແລະ ມີຄວາມຮັບຜິດຊອບສູງ ແນໃສຮັບປະກັນໃຫ້ ຜົນການຄົ້ນຄວ້າມີຄຸນນະພາບ, ສາມາດນໍາໄປເປັນແນວທາງໃນການຈັດຕັ້ງປະຕິບັດ ແລະ ນໍາເອົາຜົນປະໂຫຍດ ມາສູ່ການພັດທະນາເສດຖະກິດ-ສັງຄົມຂອງ ສປປ ລາວ.

ການສຶກສາຄັ້ງນີ້ ເປັນການຮ່ວມມືກັນກັບອົງການ UNICEF ເພື່ອສຶກສາຄົ້ນຄວ້າດ້ານນະໂຍບາຍ ໂດຍໄດ້ຮັບການສະໜັບສະໜູນງົບປະມານ ແລະ ການຊ່ວຍເຫຼືອທາງດ້ານວິຊາການ ຈາກອົງການ UNICEF ປະຈໍາ ສປປ ລາວ.

ຂຽນຂ່າວ: ອານຸວົງ ຫຼວງໄຊ, ສຄນສ, ສວສສຊ.

ຖ່າຍພາບ: ມູນິນ ພົນສັກດາ

ສວສສຊ ຈັດພິທີປະກາດການຈັດຕັ້ງຂັ້ນກົມ

ຈໍານວນຜູ້ເຂົ້າຊົມ: 646

ສວສສຊ ຈັດພິທີປະກາດການຈັດຕັ້ງຂັ້ນກົມ

ເພື່ອຜັນຂະຫຍາຍຍຸດທະສາດ ແລະ ແຜນພັດທະນາວຽກງານຄົ້ນຄວ້າວິທະຍາສາດເສດຖະກິດ-ສັງຄົມ ໃຫ້ມີການຫັນປ່ຽນຢ່າງເລິກເຊິ່ງ, ຮອບດ້ານ ແລະ ເຂັ້ມແຂງ ໃນຕໍ່ໜ້າພ້ອມທັງເປັນການກະກຽມບຸກຄະລາກອນໃນການດຳເນີນກອງປະຊຸມໃຫຍ່ 2 ຂັ້ນ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ໃນວັນທີ 5 ມີນາ2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີພີທີປະກາດການຈັດຕັ້ງພະນັກງານ ນໍາພາຂັ້ນກົມ ພາຍໃຕ້ການເປັນປະທານຂອງທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ; ມີທ່ານ ປອ. ນາງ ແກ້ວວິວອນ ອຸດທະຈັກ ຄະນະປະຈໍາ, ຮອງປະທານ ສວສສຊ, ມີກໍາມະການຄະນະພັກ, ຄະນະໜ່ວຍພັກ ພ້ອມດ້ວຍສະມາຊິກພັກ-ພະນັກງານລັດຖະກອນ ຈາກ 11 ພາກສ່ວນເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ບຸນລັດ ແກ້ວອາສາ, ກຳມະການພັກ, ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານເອກະສານດຳລັດຂອງນາຍົກລັດຖະມົນຕີ ຈຳນວນ 6 ສະບັບ ແລະ ມະຕິຕົກລົງຂອງເລຂາຄະນະພັກ ສວສສຊ ຈຳນວນ 1 ສະບັບ ດັ່ງນີ້: 1) ດຳລັດວ່າດ້ວຍການແຕ່ງຕັ້ງ ທ່ານ ປອ. ແກ້ວວິຈິດ ໄຂຄຳພິທູນ ເປັນຫົວໜ້າສະຖາບັນການເມືອງວິທະຍາ; 2) ດຳລັດວ່າດ້ວຍການແຕ່ງຕັ້ງ ທ່ານ ປອ. ບຸນສີ ພຸດທະວົງ ເປັນຫົວໜ້າສະຖາບັນສັງຄົມວິທະຍາ; 3) ດຳລັດວ່າດ້ວຍການແຕ່ງຕັ້ງ ທ່ານ ປອ. ເດັ່ງຢ່າງ ກົງຈີ ເປັນຫົວໜ້າສະຖາບັນຄົ້ນຄວ້າວັດທະ ນະທຳ; 4) ດຳລັດວ່າດ້ວຍການແຕ່ງຕັ້ງ ທ່ານ ປອ. ນາງ ກິນນະລອນ ພິມມະວົງ ເປັນຫົວໜ້າສະຖາບັນຄົ້ນຄວ້າພັດ ທະນາວິສາຫະກິດ; 5) ດຳລັດວ່າດ້ວຍການແຕ່ງຕັ້ງ ທ່ານ ປອ. ວິໄລວອນ ພົມມະຈັນ ເປັນຫົວໜ້າສະຖາບັນຄົ້ນຄວ້າປະຫວັດສາດ ແລະ ບູຮານ; 6) ດຳລັດວ່າດ້ວຍການແຕ່ງຕັ້ງ ທ່ານ ເດືອນສະຫວັນ ພອນມີໄຊ ເປັນຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ; 7) ມະຕິຕົກລົງວ່າດ້ວຍການແຕ່ງຕັ້ງ ທ່ານ ປອ. ວິໄລວອນ ພົມມະຈັນ ເປັນຮັກສາການເລຂາໜ່ວຍພັກ ສະຖາບັນຄົ້ນຄວ້າປະຫວັດສາດ ແລະ ບູຮານ.

ທ່ານ ປອ. ກອງແກ້ວ ໄຊສົງຄາມ ໄດ້ກ່າວວ່າ: ໂດຍອິງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ-ລັດໃນໄລຍະໃໝ່ ກໍຄືຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີຄວາມຈຳເປັນຕ້ອງໄດ້ມີການປັບປຸງກົງຈັກການຈັດຕັ້ງ, ປັບປຸງພາລະບົດບາດ ແລະ ສັບຊ້ອນຈັດວາງຕໍາແໜ່ງພະນັກງານຄືນໃໝ່ ໂດຍສະເພາະແມ່ນພະນັກງານນຳພາຂັ້ນຕ່າງໆໃຫ້ເປັນລະບົບຄົບຊຸດ. ເຫດຜົນທີ່ສໍາຄັນອັນໜຶ່ງແມ່ນເພື່ອກະກຽມບຸກຄະລາກອນເຂົ້າສູ່ກອງປະຊຸມໃຫຍ່ ຄັ້ງທີ 2 ຂອງອົງຄະນະພັກ ສວສສຊ ທີ່ຈະຈັດຂຶ້ນໃນທ້າຍປີນີ້ ເຊິ່ງບັນດາສະຫາຍທີ່ໄດ້ຮັບການແຕ່ງຕັ້ງໜ້າທີ່ໃໝ່ນີ້ ລ້ວນແລ້ວແຕ່ເປັນຜູ້ທີ່ມີຄວາມຮູ້ຄວາມສາມາດ, ມີປະສົບການ ແລະ ມີຜົນງານຫຼາຍດ້ານໃນໄລຍະຜ່ານມາທັງເປັນຜູ້ທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ມີຄວາມດຸໝັ່ນອົດທົນ, ມີຄວາມສາມັກຄີ, ມີລະບຽບວິໄນ ແລະ ເຄົາລົບກົດລະບຽບຂອງພັກ, ກົດໝາຍຂອງລັດໄດ້ດີ ຈຶ່ງໄດ້ຮັບຄວາມເຊື່ອໝັ້ນ ແລະ ໄວ້ວາງໃຈຈາກຄະນະພັກ-ຄະນະນຳ ສະເໜີໃຫ້ຂັ້ນເທິງພິຈາລະນາແຕ່ງຕັ້ງ ແລະ ສັບຊ້ອນບັນດາສະຫາຍເຂົ້າຮັບໜ້າທີ່ຕຳແໜ່ງທີ່ມີຄວາມສຳຄັນດັ່ງກ່າວ. ການແຕ່ງຕັ້ງຄັ້ງນີ້ ເປັນການມອບໝາຍໜ້າທີ່ຄວາມຮັບ ຜິດຊອບສູງຂຶ້ນກວ່າເກົ່າແລ້ວຍັງເປັນການທົດສອບ, ຝຶກຝົນຫຼໍ່ຫຼອມກໍ່ສ້າງພະນັກງານນໍາພາໃຫ້ມີຄວາມຮູ້, ປະສົບການ ແລະ ບົດຮຽນຈາກພຶດຕິກຳຕົວຈິງ ເພື່ອນໍາພາພະນັກງານໃນການຄຸ້ມຄອງຂອງຕົນປະຕິບັດໜ້າທີ່ໃຫ້ສໍາເລັດ.

ພ້ອມດຽວກັນນັ້ນ, ທ່ານຍັງໄດ້ມີບາງຄຳເຫັນໂອ້ລົມຕໍ່ຜູ້ທີ່ໄດ້ຮັບການແຕ່ງຕັ້ງຕື່ມວ່າ: ກ່ອນອື່ນໝົດ ບັນດາສະຫາຍຕ້ອງໄດ້ກຳແໜ້ນ ແລະ ຄົ້ນຄວ້າພາລະບົດບາດຂອງຕົນໃຫ້ເຂົ້າໃຈເລິກເຊິ່ງ, ມີຄວາມເປັນເອກະພາບສູງ ຕໍ່ການກຳນົດທິດທາງ ແລະ ເປົ້າໝາຍຂອງວຽກງານໃນແຕ່ລະໄລຍະ; ຕ້ອງຍຶດໝັ້ນຕາມຫຼັກການລວມສູນປະຊາທິ ປະໄຕ, ມີການແບ່ງງານແບ່ງຄວາມຮັບຜິດຊອບ, ປະຕິບັດຕາມມະຕິ ແລະ ສຽງສ່ວນຫຼາຍທີ່ໄດ້ຕົກລົງກັນ, ສ້າງຄວາມສາມັກຄີກັບໝູ່ເພື່ອນໃຫ້ໜັກແໜ້ນ, ເອົາໃຈໃສ່ສຶກສາອົບຮົມແນວຄິດການເມືອງໃຫ້ກັບພະນັກງານ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ, ມີແບບແຜນໃນການດຳລົງຊີວິດທີ່ດີ, ປະພຶດຕົນເປັນແບບຢ່າງ ແລະ ຍົກສູງຄວາມຮູ້ຄວາມສາມາດ, ຊ່ວຍເຫຼືອເຊິ່ງກັນແລະກັນຢ່າງຈິງໃຈ, ຍຸຕິທຳ. ພ້ອມທັງຮຽກຮ້ອງໃຫ້ສະມາຊິກພັກ, ພະ ນັກງານລັດຖະກອນທົ່ວ ສວສສຊ ຈົ່ງໃຫ້ຄວາມຮ່ວມມື, ຊ່ວຍເຫຼືອ ແລະ ສະໜັບສະໜູນຜູ້ທີ່ໄດ້ຮັບການແຕ່ງຕັ້ງໃໝ່ ສາມາດປະຕິບັດໜ້າທີ່ຢ່າງສະດວກ.