ຂ່າວການເຄື່ອນໄຫວ – ໜ້າ 5 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມ “ເຜີຍແຜ່ການຄົ້ນຄວ້າ ແລະ ສົນທະນາທາງດ້ານນະໂຍບາຍ: ຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”

ຈໍານວນຜູ້ເຂົ້າຊົມ: 461

ກອງປະຊຸມ “ເຜີຍແຜ່ການຄົ້ນຄວ້າ ແລະ ສົນທະນາທາງດ້ານນະໂຍບາຍ: ຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”

ໃນວັນທີ 10 ຕຸລາ 2025 ທີ່ໂຮງແຮມຄຣາວພາຊ່າ, ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ອົງການຢູນີເຊັບ ປະຈໍາ ສປປ ລາວ, ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໄດ້ຈັດກອງປະຊຸມ “ເຜີຍແຜ່ຜົນການຄົ້ນຄວ້າ ແລະ ສົນທະນາທາງດ້ານນະໂຍບາຍກ່ຽວກັບຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”, ໂດຍການເປັນປະທານຂອງ ທ່ານ ປອ ນ. ແກ້ວວິວອນ ອຸດທະຈັກ ຮອງປະທານ ສວສສຊ ແລະ ທ່ານ ບິນລາລ ອຸລັງ ເຊັບ ດູລານີ ຜູ້ຕາງໜ້າຈາກອົງການຢູນີເຊັບ ປະຈໍາ ສປປ ລາວ, ມີບັນດາທ່ານຈາກຂະແໜງສາທາລະນະສຸກ, ສະພາແຫ່ງຊາດ, ສຶກສາທິການ ແລະ ກິລາ, ການເງິນ, ແຮງງານ ແລະ ສະຫວັດດີການສັງຄົມ, ສູນກາງສະຫະພັນແມ່ຍິງ, ສູນກາງຊາວໜຸ່ມ, ຄູ່ຮ່ວມພັດທະນາ, ຊ່ຽວຊານ ແລະ ຂະແໜງການກ່ຽວຂ້ອງ ເຂົ້າຮ່ວມຫຼາຍກວ່າ 45 ທ່ານ. ຈຸດປະສົງກອງປະຊຸມດັ່ງກ່າວ ແມ່ນເພື່ອປຶກສາຫາລື ແລະ ສົນທະນາທາງດ້ານະໂຍບາຍທີ່ກ່ຽວຂ້ອງກັບການແຕ່ງດອງໃນໄວເດັກໃນ ສປປ ລາວ ເພື່ອຢຸດຕິການແຕ່ງດອງກ່ອນໄວຂອງເດັກ ໃນ ສປປ ລາວ ສະເໜີຕໍ່ລັດຖະບານໃນການວາງນະໂຍບາຍໃນຕໍ່ໜ້າ.

ທ່ານ ປອ. ນາງ ແກ້ວວິວອນ ອຸດທະຈັກ ໄດ້ມີຄຳເຫັນກ່າວເປີດບາງຕອນວ່າ: ປັດຈຸບັນ ການແຕ່ງງານໃນໄວເດັກໃນຫຼາຍປະເທດທົ່ວໂລກມີທ່າອ່ຽງຫຼຸດລົງຢ່າງຕໍ່ເນື່ອງ, ແຕ່ຫຼາຍພື້ນທີ່ຂອງ ສປປ ລາວ ການແຕ່ງງານໃນໄວເດັກຍັງກວມເອົາ 30.5% ກາຍເປັນບັນຫາສັງຄົມໜຶ່ງທີ່ໜ້າເປັນຫ່ວງ; ເດັກເຫຼົ່ານີ້ໄດ້ຮັບຜົນກະທົບມາຈາກຄວາມ ທຸກຍາກ, ຮີດຄອງປະເພນີ ແລະ ດ້ອຍໂອກາດທາງສັງຄົມ ທີ່ກໍ່ໃຫ້ເກີດຄວາມບໍ່ເທົ່າທຽມກັນທາງດ້ານເພດ, ການເຂົ້າເຖິງການສຶກສາ, ການປິ່ນປົວຮັກສາສຸຂະພາບ. ນອກຈາກນັ້ນ ຍັງສົ່ງຜົນກະທົບຢ່າງໃຫຍ່ຫຼວງຕໍ່ເສດຖະກິດຄອບ ຄົວ, ສັງຄົມ ແລະ ປະເທດຊາດ. ສະແດງອອກໃນຜົນການສຶກສາຂອງຫຼາຍເມືອງຂອງແຂວງຜົ້ງສາລີ ແລະ ບໍລິຄໍາໄຊ ໃຫ້ເຫັນວ່າຕົ້ນທຶນທາງເສດຖະກິດທີ່ເກີດຂຶ້ນຈາກການແຕ່ງງານໄວ ແມ່ນການສູນເສຍໂອກາດການສຶກສາ ການຫຼຸດລົງຂອງຜົນຜະລິດຕະພັນພາຍໃນ ແລະ ການເພີ່ມຂຶ້ນຂອງຄ່າໃຊ້ຈ່າຍດ້ານສຸຂະພາບ ແລະ ສັງຄົມ. ສປປ ລາວ ໄດ້ມີຫຼາຍມາດຕະການກຳນົດເຂົົ້າຫຼາຍນະໂຍບາຍ ແລະ ແຜນງານ ເປັນຕົ້ນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ, ຍຸດທະສາດການພັດທະນາເຍົາວະຊົນ ແລະ ໄວໜຸ່ມ, ແຜນປະຕິບັດງານແຫ່ງຊາດກ່ຽວກັບການຕ້ານ ແລະ ລຶບລ້າງຄວາມຮຸນແຮງຕໍ່ແມ່ຍິງ, ແຜນປະຕິບັດງານແຫ່ງຊາດກ່ຽວກັບແມ່ ແລະ ເດັກ, ນະໂຍບາຍທາງດ້ານປະຊາກອນ ແລະ ການພັດທະນາແຫ່ງຊາດ ແລະ ແຜນງານນາງນ້ອຍ ແຕ່ກໍຍັງບໍ່ສາມາດຢຸດຕິການແຕ່ງງານກ່ອນໄວ. ຜົນການຄົ້ນຄວ້ານີ້ ໄດ້ນໍາສະເໜີເຫດຜົນທາງດ້ານເສດຖະກິດທີ່ຊັດເຈນໃນການຢຸດຕິບັນຫາດັ່ງກ່າວ ແລະ ຍັງສະແດງໃຫ້ເຫັນການເຊື່ອມໂຍງລະຫວ່າງການຂາດແຄນໂອກາດດ້ານການສຶກສາ, ການຈຳກັດທາງເລືອກໃນຕະຫຼາດແຮງງານ, ບັນຫາທາງສັງຄົມ ແລະ ວົງຈອນແຫ່ງຄວາມທຸກຍາກທີ່ສືບຕໍ່ກັນໄປ.

ກອງປະຊຸມໄດ້ຮັບຟັງການນໍາສະເໜີຜົນການຄົ້ນຄວ້າກ່ຽວກັບຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ, ການແຕ່ງດອງໃນໄວເດັກ ແລະ ການຖືພາຂອງໄວໝຸ່ມຢຸ່ ສປປ ລາວ ແລະ ການແຕ່ງດອງໃນໄວເດັກ: ຫຼຸດຜ່ອນວົງຈອນຂອງຄວາມທຸກຍາກ, ການປະລະການຮຽນ, ບັນຫາສຸຂະພາບ ແລະ ການສູນເສຍໂອກາດຂອງເດັກໃນ ສປປ ລາວ. ການວິເຄາະຜົນກະທົບທາງດ້ານເສດຖະກິດຂອງການແຕ່ງດອງຂອງເດັກນ້ອຍ ໃນ ສປປ ລາວ ສະແດງໃຫ້ເຫັນວ່າ: ເກືອບ 1/3 ຂອງແມ່ຍິງອາຍຸ 20-24 ປີ (30.5 %) ໄດ້ແຕ່ງດອງກ່ອນອາຍຸ 18 ປີ ເຊິ່ງເປັນອັດຕາທີ່ສູງທີ່ສຸດໃນບັນດາປະເທດສະມາຊິກອາຊຽນ. ການແຕ່ງດອງຂອງເດັກແມ່ນຕິດພັນກັບການເກີດລູກໄວ, ການອອກໂຮງຮຽນ ແລະ ການຫຼຸດຜ່ອນລາຍຮັບຕະຫຼອດຊີວິດ, ການປະກອບສ່ວນເຂົ້າໃນຮອບວຽນຂອງຄວາມທຸກຍາກ ແລະ ຄວາມບໍ່ສະເໝີພາບ. ກອງປະຊຸມໄດ້ພ້ອມກັນປຶກສາຫາລື ແລະ ສົນທະນາຕໍ່ກັບຜົນການສຶກສາກ່ຽວກັບຜົນກະທົບທາງເສດຖະກິດການແຕ່ງງານໃນໄວເດັກຢ່າງກົງໄປກົງມາ, ມີບັນຍາກາດ ແລະ ເປັນເອກະພາບສູງ.

ໃນຕອນທ້າຍກອງປະຊຸມ ທ່ານ ປອ. ນາງ ແກ້ວວິວອນ ອຸດທະຈັກ ໄດ້ກ່າວສະຫຼຸບວ່າ: ການແຕ່ງດອງໃນເດັກ ເຮັດໃຫ້ເດັກຍິງຂາດສິດທິໃນການສຶກສາ, ສຸຂະພາບ ແລະ ເສຍໂອກາດທາງສັງຄົມ. ການລົງທຶນໃນເດັກຍິງ ເປັນການສ້າງກໍາລັງແຮງງານໃນອະນາຄົດ ແລະ ການຂະຫຍາຍຕົວແບບຍືນຍົງຂອງ ສປປ ລາວ. ລັດຖະບານໄດ້ມຸ່ງຫມັ້ນທີ່ຈະເລັ່ງຄວາມພະຍາຍາມໃນທຸກຂະແໜງການ ເພື່ອຮັບປະກັນວ່າເດັກຍິງທຸກຄົນສາມາດບັນລຸຄວາມສາມາດຂອງຕົນ. ການແຕ່ງດອງຂອງເດັກນ້ອຍ ເຮັດໃຫ້ ສປປ ລາວ ເສຍມູນຄ່າທາງເສດຖະກິດເປັນເງິນຫຼາຍ 10 ລ້ານໂດລາຕໍ່ປີ ໂດຍສະເພາະຈາກການສຶກສາ ແລະ ຜະລິດຕະພັນທີ່ຫຼຸດລົງ. ການຢຸດຕິການແຕ່ງດອງກ່ອນໄວສາມາດສ້າງຜົນປະໂຫຍດສູງ 41.2 ລ້ານໂດລາ ຫຼື 790 ຕື້ກີບໃນແຕ່ລະປີ; ໃນນີ້, ຜົນປະໂຫຍດຈາກການຫຼຸດຜ່ອນການອອກໂຮງ ຮຽນເທົ່າກັບ 21.9 ລ້ານໂດລາສະຫະລັດ ຫຼື 473 ຕື້ກີບ, ຜົນປະໂຫຍດຈາກການຫຼຸດການຂາດສານອາຫານແບບຊໍາເຮື້ອໃນເດັກອາຍຸຕໍ່າກວ່າ 5 ປີ ເທົ່າກັບ 13.9 ລ້ານໂດລາສະຫະລັດ ຫຼື 299 ຕື້ກວ່າກີບ ແລະ ຜົນປະໂຫຍດຈາກການຫຼຸດອັດຕາການຕາຍຂອງເດັກຕໍ່າກວ່າ 5 ປີ ເທົ່າກັບ 5.4 ລ້ານໂດລາ ຫຼື 116 ຕື້ກວ່າກີບ.

ທ່ານ ບິນລາລ ອຸລັງ ເຊັບ ດູລານີ ຜູ້ຕາງໜ້າຈາກອົງການຢູນີເຊັບ ປະຈໍາ ສປປ ລາວ ກ່າວມີຄຳເຫັນວ່າ: ໃນແຕ່ລະປີ ເດັກຍິງທີ່ໄດ້ຮັບການສຶກສາ ແລະ ຮຽນຈົບ ຈະສາມາດເພີ່ມລາຍຮັບຕະຫຼອດຊີວິດ ແລະ ເສີມສ້າງຊຸມຊົນຂອງເຂົາເຈົ້າໃຫ້ເຂັ້ມແຂງ ແລະ ຍືນຍົງ. ນອກຈາກດ້ານເສດຖະກິດ, ການສຶກສາແລ້ວ ເດັກຍິງທີ່ແຕ່ງດອງກ່ອນໄວອັນຄວນ ຍັງປະເຊີນກັບຄວາມສ່ຽງດ້ານສຸຂະພາບທີ່ສູງຂຶ້ນ, ໂອກາດທີ່ຈໍາກັດ ແລະ ອໍານາດໃນການຕັດສິນໃຈຕໍ່າ. ການຢຸດຕິການແຕ່ງດອງຂອງເດັກບໍ່ພຽງແຕ່ແມ່ນບຸລິມະສິດດ້ານສິດທິມະນຸດເທົ່ານັ້ນ ແຕ່ມັນຍັງເປັນການລົງທຶນທີ່ດີ ເພື່ອການພັດທະນາປະເທດຊາດແບບຍືນຍົງ. ອົງການ UNICEF ພ້ອມສະໜັບສະໜູນລັດຖະບານ ແລະ ຄູ່ຮ່ວມງານ ເພື່ອປົກປ້ອງສິດທິຂອງເດັກຍິງ, ຂະຫຍາຍການເຂົ້າເຖິງການສຶກສາ, ສາທາລະນະສຸກ ແລະ ສົ່ງເສີມຄວາມສະເໝີພາບ ສຳລັບທຸກຄົນ.

ຂຽນຂ່າວ: ສຸລິຕາ ສຸກມົນຕີ

ຖ່າຍພາບ: ຄໍາແສນ ໝື່ນຕາແສງ

ສວສສຊ ສຳເລັດການຝຶກອົບຮົມ ວິທີວິທະຍາການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າ

ຈໍານວນຜູ້ເຂົ້າຊົມ: 388

ສວສສຊ ສຳເລັດການຝຶກອົບຮົມ ວິທີວິທະຍາການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າ

ໃນລະຫວ່າງວັນທີ 6-14 ຕຸລາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ສຳ ເລັດຊຸດຝຶກອົບຮົມສໍາລັບນັກຄົ້ນຄວ້າໜຸ່ມ ຊຸດທີ II; ໃຫ້ກຽດເປັນປະທານກ່າວເປີດຂອງ ທ່ານ ປອ. ສະຖາບັນດິດ ອິນສີຊຽງໃໝ່ ຮອງປະທານ ສວສສຊ ແລະ ໃຫ້ກຽດກ່າວປິດຂອງ ທ່ານ ໄຊສົງຄາມ ມະໂນທັມ ຮອງປະທານ ສວສສຊ; ມີບັນດານັກສໍາມະນາກອນຈາກສະຖາບັນຄົ້ນຄວ້າອ້ອມຂ້າງ ສວສສຊ ເຂົ້າຮ່ວມ ຈໍານວນ 24 ທ່ານ.

ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ກ່າວວ່າ: ການຝຶກອົບຮົມໃນຄັ້ງນີ້ ແມ່ນແນ່ໃສ່ສົ່ງເສີມຄວາມອາດສາມາດ ໃຫ້ແກ່ພະນັກງານ-ລັດຖະກອນ, ກໍ່ຄືບັນດານັກຄົ້ນຄວ້າໄວໜຸ່ມຂອງ ສວສສຊ ໃຫ້ມີທັກສະ, ຂີດຄວາມສາມາດທາງດ້ານການຂີດຂຽນບົດຄົ້ນຄວ້າວິທະຍາສາດເສດຖະກິດ ແລະ ສັງຄົມ ຢ່າງມີປະສິດທິພາບ, ປະສິດທິຜົນ ແລະ ຄຸນນະພາບທີ່ສູງຂຶ້ນ, ເຊິ່ງການຝຶກອົບຮົມກໍ່ແມ່ນວຽກງານໜຶ່ງທີ່ຈໍາເປັນ ແລະ ມີຄວາມສໍາຄັນ ສໍາລັບຂະບວນການຮຽນຮູ້ໃນບັນດາຫຼັກການຕ່າງໆ ຂອງການຄົ້ນຄວ້າວິທະຍາສາດ ພ້ອມທັງເປັນການສ້າງຄັງຄວາມຮູ້, ຄວາມເຂົ້າໃຈໃຫ້ເລິກເຊິ່ງໃນການເຮັດວຽກຕົວຈິງຂອງນັກຄົ້ນຄວ້າໄວໜຸ່ມຂອງ ສວສສຊ; ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ເຂົ້າຮ່ວມເອົາໃຈໃສ່ ຫ້າວຫັນແລກປ່ຽນຄໍາຄິດເຫັນ ແລະ ຕັ້ງຄໍາຖາມເຈາະຈີ້ມຖ້າຫາກບັນຫາໃດບໍ່ເຂົ້າໃຈ, ໂດຍອີງໃສ່ບົດຮຽນຕົວຈິງທີ່ໄດ້ປະຕິບັດຢ່າງສ້າງສັນ ແລະ ກົງໄປກົງມາ ສາມາດກໍາແໜ້ນເນື້ອໃນບົດຮຽນ ແລະ ສາມາດນໍາເອົາໄປໃຊ້ເຂົ້າໃນພຶດຕິກໍາຕົວຈິງ ໂດຍສະເພາະການຂຽນໂຄງການຄົ້ນຄວ້າ ໃຫ້ມີປະສິດທິພາບທີ່ສູງຂຶ້ນກວ່າເກົ່າ.

ຊຸດຝຶກອົບຮົມໃນຄັ້ງນີ້ ນັກສໍາມະນາກອນໄດ້ຮຽນຮູ້ກ່ຽວກັບການເກັບກໍາ ແລະ ສ້າງຖານຂໍ້ມູນດ້ານປະລິ ມານ; ການວິເຄາະຂໍ້ມູນແບບພັນລະນາ; ທິດສະດີການປະເມີນຄ່າ; ການທົດສອບສົມມຸດຕິຖານ; ການວິເຄາະຄວາມສໍາພັນ ແລະ ການວິເຄາະເສັ້ນທົດຖອຍແບບງ່າຍດາຍ, ມີການນຳສະເໜີໂຄງຮ່າງບົດສະເໜີການຄົ້ນຄວ້າ, ນັກສໍາມະນາກອນໄດ້ປະຕິບັດຕົວຈິງໃນການຂຽນບົດສະເໜີຫົວຂໍ້ໂຄງການຄົ້ນຄວ້າ ແລະ ມີການແບ່ງກຸ່ມຄົ້ນຄວ້າ ພ້ອມທັງຂຶ້ນນໍາສະເໜີຜົນງານຂອງກຸ່ມຕົນ;

ທ່ານ ໄຊສົງຄາມ ມະໂນທັມ ໄດ້ກ່າວວ່າ: ການຝຶກອົບຮົມຄັ້ງນີ້ ແມ່ນມີຄວາມຈຳເປັນ ແລະ ສຳຄັນເປັນຢ່າງຍິ່ງ, ທັງເປັນການສົ່ງເສີມທັກສະການຄົ້ນຄວ້າວິທະຍາສາດເສດຖະກິດ-ສັງຄົມ ໃຫ້ມີຄຸນນະພາບທີ່ດີຂຶ້ນເທື່ອລະກ້າວ ໂດຍສະເພາະແມ່ນການເສີມສ້າງຄວາມອາດສາມາດໃຫ້ບັນດານັກຄົ້ນຄວ້າໜຸ່ມ ພາຍໃນ ສວສສຊ ໃຫ້ໄດ້ຮັບຮູ້ເຖິງຂະບວນການຄົ້ນຄວ້າ ແລະ ບັນດາໂປຣແກມ ທີ່ນໍາມາໃຊ້ສຳລັບການວິເຄາະຂໍ້ມູນຕ່າງໆ ທີ່ເປັນປະໂຫຍດໃຫ້ແກ່ຜົນຂອງການຄົ້ນຄວ້າ. ບັນດານັກສໍາມະນາກອນ ສາມາດຮັບຮູ້, ເຂົ້າໃຈ ແລະ ກຳໄດ້ເຖິງບົດຮຽນຕ່າງໆທີ່ກ່າວມານັ້ນ ເພື່ອນໍາໄປໝູນໃຊ້ເຂົ້າໃນການຄົ້ນຄວ້າໃນຂົງເຂດທີ່ກ່ຽວຂ້ອງກັບສະຖາບັນຄົ້ນຄວ້າຂອງຕົນໃຫ້ປະກົດຜົນເປັນຈິງ ແລະ ໃນຕອນທ້າຍຂອງພິທີ ທ່ານຍັງໄດ້ໃຫ້ກຽດມອບມອບໃບຢັ້ງຢືນໃຫ້ກັບນັກສຳມະນາກອນທີ່ເຂົ້າຮ່ວມຊຸດຝຶກອົບຮົມອີກດ້ວຍ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ມຸນິນ ພົນສັກດາ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ຣາຊາອານາຈັກກຳປູເຈຍ

ຈໍານວນຜູ້ເຂົ້າຊົມ: 511

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ຣາຊາອານາຈັກກຳປູເຈຍ

ໃນລະຫວ່າງວັນທີ 29-30 ກັນຍາ 2025 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນໍາໂດຍທ່ານ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານ ສວສສຊ ໄດ້ເດີນທາງເຂົ້າຮ່ວມກອງປະຊຸມສໍາມະນາວິທະຍາສາດສາກົນ ຄັ້ງທີ XII ເຊິ່ງຈັດຂຶ້ນທີ່ນະຄອນຫຼວງພະນົມເປັນ ຣາຊາອານາຈັກກຳປູເຈຍ ພາຍໃຕ້ຫົວຂໍ້: “ການພັດທະນາເສດຖະກິດ, ສັງຄົມ ແລະ ວັດທະນະທຳ ທີກົມກຽວ ຢູ່ ລາວ, ຫວຽດນາມ ແລະ ກຳປູ ເຈຍ” ໂດຍການເປັນເຈົ້າພາບຂອງຣາຊະບັນດິດສະພາກໍາປູເຈຍ (RAC). ຄະນະປະທານກອງປະຊຸມປະກອບມີ ທ່ານ Sok Touch ປະທານສະພາບັນດິດ ແຫ່ງຣາຊາອານາຈັກກຳປູເຈຍ (RAC), ທ່ານ ປອ. ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ທ່ານ ປອ. ດັ້ງ ຊວນ ແທ່ງ ຮອງປະທານສະຖາບັນດິດວິທະຍາສາດສັງຄົມຫວຽດນາມ (VASS), ເຊິ່ງເປັນກຽດເຂົ້າເປັນປະທານເປີດກອງປະຊຸມສຳມະນາວິທະຍາສາດສາກົນ ຄັ້ງນີ້ແມ່ນ ທ່ານ ບັນດິດ Hing Thoraxy, ເລຂາທິການແຫ່ງລັດ, ລັດຖະມົນຕີປະຈຳຫ້ອງການສະພາລັດຖະມົນຕີ, ມີບັນດາຄະນະຜູ້ແທນ, ນັກຄົ້ນຄວ້າ, ນັກວິທະຍາສາດຂອງ 3 ສະຖາບັນ, ມະຫາວິທະຍາໄລ, ສະຖາບັນການສຶກສາຂັ້ນສູງ, ສະຖາບັນຄົ້ນຄວ້າຕ່າງໆ, ຜູ້ຕາງໜ້າຈາກບັນດາພາກລັດ ແລະ ຂະແໜງການກ່ຽວຂ້ອງ ຂອງຣາຊາອານາຈັກກຳປູເຈຍ ເຂົ້າຮ່ວມ.

ຈຸດປະສົງ ຂອງກອງປະຊຸມ ສຳມະນາວິທະຍາສາດຄັ້ງນີ້ ແມ່ນເພື່ອປຶກສາຫາລື, ແລກປ່ຽນບົດຮຽນ ແລະ ປະສົບການ ເຊິ່ງກັນ ແລະ ກັນ ກ່ຽວກັບການພັດທະນາເສດຖະກິດ-ສັງຄົມ ທີ່ກົມກຽວ ຢູ່ ສປປ ລາວ, ສສ ຫວຽດນາມ ແລະ ກຳປູເຈຍ.

ທ່ານ Sok Touch, ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງກອງປະຊຸມໃນຄັ້ງນີ້ ຖືເປັນໂອກາດໃໝ່ ທີ່ພວກເຮົາຈະໄດ້ຮ່ວມກັນແລກປ່ຽນຄວາມຄິດເຫັນ ແລະ ຍົກລະດັບຄວາມຮ່ວມມືໃຫ້ມີປະສິດທິຜົນຫຼາຍຂຶ້ນ ທ່າມກາງບໍລິບົດການປ່ຽນແປງ ຂອງ ພູມິລັດທະສາດ ແລະ ຄວາມທ້າທາຍ ທັງພູມິພາກ ແລະ ທົ່ວໂລກ ເຊິ່ງໄດ້ກຳນົດຄວາມທ້າທາຍ ແລະ ໂອກາດໃໝ່ໆ ໃນຄວາມສຳພັນລະຫວ່າງສາມປະເທດ, ການແລກປ່ຽນຄວາມຄິດເຫັນ ແລະ ຍຸດທະສາດ ເພື່ອເສີມສ້າງສັນຕິພາບຄວາມສາມັກຄີ ແລະ ຄວາມໝັ້ນຄົງ, ນຳສະເໜີແນວທາງຄວາມຮ່ວມມື ທີ່ສາມາດປະຕິບັດໄດ້ຈິງ, ສົ່ງເສີມການເຊື່ອມໂຍງ ລະຫວ່າງນັກຄົ້ນຄວ້າ ແລະ ຜູ້ກຳນົດນະໂຍບາຍ, ສ້າງຈິດສຳນຶກ ດ້ານສັນຕິພາບ ແລະ ຄວາມເປັນເອກະພາບ ໃນຫມູ່ປະຊາຊົນ, ເສີມສ້າງຄວາມສຳພັນໃຫ້ເປັນມິດຕະພາບ ແລະ ຄວາມຮ່ວມມືທີ່ຍືນຍົງ, ຜັກດັນເຂດຊາຍແດນ ໃຫ້ເປັນຕົວຢ່າງ ຂອງຄວາມຮ່ວມມື, ສົ່ງເສີມຄວາມສຳພັນທາງວັດທະນະທຳ ເພື່ອສ້າງຄວາມເຂົ້າໃຈ ແລະ ການຢູ່ຮ່ວມກັນຢ່າງກົມກຽວ. ສະນັ້ນຄວາມສຳພັນລະຫວ່າງ ກຳປູເຈຍ–ລາວ–ຫວຽດນາມ ຈິງມີຮາກຖານຜູກພັນ ຢູ່ໃນ 3 ດ້ານຄື: ພູມິສາດ: ມີຊາຍແດນຕິດກັນ ປະຊາຊົນສາມາດເດີນທາງໄປມາຫາກັນໄດ້, ປະຫວັດສາດ: ເຄີຍຮ່ວມກັນຕໍ່ສູ້ເພື່ອອິດສະຫຼະ, ທຳມະຊາດ: ມີແມ່ນ້ຳ ແລະ ພູເຂົາ ຮ່ວມກັນ ເຊັ່ນ ແມ່ນ້ຳໂຂງດັ່ງນັ້ນ; ພວກເຮົາບໍ່ສາມາດແຍກອອກຈາກກັນໄດ້ ແລະ ຈະຕ້ອງສ້າງຄວາມໄວ້ວາງໃຈເຊິ່ງກັນ ແລະ ກັນເພື່ອເສີມສ້າງສັນຕິພາບ ມິດຕະພາບ ແລະ ການພັດທະນາທີ່ຍືນຍົງ

ໃນໂອກາດດັ່ງກ່າວ ທ່ານ ປອ. ກອງແກ້ວ ໄຊສົງຄາມ, ໄດ້ມີຄໍາເຫັນຕໍ່ກອງປະຊຸມບາງຕອນວ່າ ການຈັດກອງປະຊຸມສຳມະນາວິທະຍາສາດສາກົນໃນຄັ້ງນີ້ ແມ່ນເພື່ອປຶກສາຫາລື, ແລກປ່ຽນບົດຮຽນ ແລະ ຄຳຄິດຄຳເຫັນ ເຊິ່ງກັນ ແລະ ກັນ ກ່ຽວກັບທິດສະດີ ແລະ ພຶດຕິກຳຕົວຈິງຂອງການພັດທະນາເສດຖະກິດ-ສັງຄົມ ແລະ ສິ່ງແວດລ້ອມ ທີ່ກົມກຽວ ຢູ່ ສປປ ລາວ, ຫວຽດນາມ ແລະ ກຳປູເຈຍ ປະຈຸບັນນີ້ ສູນກາງພັກ ແລະ ລັດຖະບານ ໄດ້ເຫັນຄວາມສຳຄັນ ອອກນະໂຍບາຍ, ນິຕິກຳ ແລະ ກົນໄກການຄຸ້ມຄອງ ແລະ ໄດ້ກຳນົດເອົາ ການພັດທະນາເສດຖະກິດ-ສັງຄົມ ແລະ ສິ່ງແວດລ້ອມທີ່ກົມກຽວກັນ ເປັນແນວທາງລວມຂອງການພັດທະນາເສດຖະກິດ-ສັງຄົມ ໃຫ້ໄປຕາມທິດທາງດັ່ງ ກ່າວ ອັນໄດ້ເຮັດໃຫ້ ການພັດທະນາເສດຖະກິດ-ສັງຄົມ ຢູ່ ສປປ ລາວ ຕາມແນວທາງດັ່ງກ່າວ ປະສົບຜົນສຳເລັດໃນລະດັບໃດໜຶ່ງ, ເປັນຕົ້ນແມ່ນ ໃນການພັດທະນາທາງດ້ານເສດຖະກິດ ແລະ ຫຼຸດຜ່ອນຄວາມທຸກຍາກ. ຄຽງຄູ່ກັບຜົນສຳເລັດ ກໍ່ຍັງມີຂໍ້ຄົງຄ້າງ ແລະ ສິ່ງທ້າທາຍຫຼາຍຢາງທີ່ຈະຕ້ອງໄດ້ປັບປຸງ ແລະ ແກ້ໄຂ ເປັນຕົ້ນແມ່ນ: ການຂະຫຍາຍຕົວຂອງເສດຖະກິດຍັງມີຫຼັກສະນະກະຕຸກຕົວສູງໃນຂະແໜງການທີ່ຕິດພັນກັບຊັບພະຍາກອນທຳມະຊາດ, ການບົກແຫ້ງຂອງຊັບພະຍາກອນທຳມະຊາດ ແລະ ການເສືອມໂຊມຂອງສິ່ງແວດລ້ອມ, ການເພີ່ມຂຶ້ນຂອງຄວາມບໍ່ສະເໜີພາບໃນສັງຄົມ, ການອະນຸລັກ-ຮັກສາເອກະລັກ ແລະ ວັດທະນາທຳອັນດີງາມຂອງຊາດ.

ກອງປະຊຸມໄດ້ຮັບຟັງການສະເໜີບົດສຳມະນາວິທະຍາສາດ, ສົນທະນາ, ປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ໂດຍແບ່ງອອກເປັນ 3 ວາລະຄື: ວາລະທີ 1: ໄດ້ຮັບຟັງການສະເໜີບົດສຳມະນາວິທະຍາສາດ, ສົນທະນາ, ປືກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນກ່ຽວກັບການ ຊຸກຍູ້ການເຊື່ອມໂຍງເສດຖະກິດພາກພື້ນ ເພື່ອການພັດທະນາເສດຖະກິດ-ສັງຄົມທີກົມກຽວ; ວາລະທີ 2: ກ່ຽວກັບການປົກປັກຮັກສາເອກະລັກຂອງຊາດທາງດ້ານວັດທະນາທຳພາຍໃຕ້ເງື່ອນໄຂການເຊື່ອມໂຍງພາກພື້ນ ແລະ ສາກົນ; ແລະ ວາລະທີ 3: ກ່ຽວກັບນະໂຍບາຍສັງຄົມເພື່ອຊຸກຍູ້ການພັດທະນາເສດຖະກິດ, ສັງຄົມ ແລະ ວັດທະນະທຳ ທີ່ກົມກຽວ ຢູ່ ລາວ, ຫວຽດນາມ ແລະ ກຳປູເຈຍ. ບົດສຳມະນາວິທະຍາສາດ ແລະ ປະກອບຄຳຄິດ ຄໍາເຫັນຂອງບັນດານັກວິທະຍາກອນ ແລະ ສຳມະນາກອນ ໄດ້ຊີ້ໃຫ້ເຫັນກ່ຽວກັບຜົນສຳເລັດ, ຂໍ້ຄົງຄ້າງ, ກາລະລະໂອກາດ, ສິ່ງທ້າຍທາຍ ແລະ ມີຂໍ້ສະເໜີແນະໃນການເພີ່ມທະວີ ການຮ່ວມມືຊຸກຍູ້ການພັດທະນາເສດຖະກິດ-ສັງຄົມ ທີກົມກຽວ ຢູ່ ສປປ ລາວ, ສສ ຫວຽດນາມ ແລະ ຣາຊາອານາຈັກ ກຳປະເຈຍ. ນອກນັ້ນ, ກອງປະຊຸມຍັງໄດ້ປຶກສາຫາລື ແລະ ຕົກລົງເປັນເອກະພາບກັນ ຈະສືບຕໍ່ຈັດກອງປະຊຸມສຳມະນາວິທະຍາສາດສາກົນ ຄັ້ງທີ XIII ພາຍໄຕ້ຫົວຂໍ້: “ການເຊື່ອມໂຍງທາງດ້ານພື້ນຖານໂຄງລ່າງ ລະຫວ່າ ລາວ, ຫວຽດນາມ ແລະ ກຳປູເຈຍ” ໃນລະຫວ່າງເດືອນ ກັນຍາ-ທັນວາ 2026, ຢູ່ທີ່ ສສ ຫວຽດນາມ, ພາຍໃຕ້ການເປັນເຈົ້າພາບ ຂອງ ສະຖາບັນ ບັນດິດວິທະຍາສາດສັງຄົມ ຂອງ ສສ ຫວຽດນາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ພົບປະແລກປ່ຽນບົດຮຽນກັບຄະນະຜູ້ແທນ ສສ. ຫວຽດນາມ

ຈໍານວນຜູ້ເຂົ້າຊົມ: 480

ສວສສຊ ພົບປະແລກປ່ຽນບົດຮຽນກັບຄະນະຜູ້ແທນ ສສ. ຫວຽດນາມ

ກອງປະຊຸມພົບປະແລກປ່ຽນ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກັບ ຄະນະຜູ້ແທນຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ສສ. ຫວຽດນາມ ໄດ້ຈັດຂຶ້ນໃນຕອນບ່າຍຂອງວັນທີ 22 ກັນຍາ 2025 ທີ່ ສວສສຊ. ຝ່າຍລາວນຳໂດຍ ປອ. ສາຍຄຳ ວໍລະເດດ ກຳມະການຄະນະພັກ, ຫົວໜ້າຫ້ອງການຄຸ້ມຄອງວິທະຍາສາດ ພ້ອມດ້ວຍຄະນະ, ຝ່າຍຫວຽດນາມນຳໂດຍ ສະຫາຍ ຫງວຽນ ແມ່ງ ດົງ ຮອງຜູ້ອຳນວຍການວິທະຍາຄານການທູດ ກະຊວງການຕ່າງປະເທດ ສສ. ຫວຽດນາມ ພ້ອມດ້ວຍຄະນະຕາງໜ້າຈາກ ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບຫວຽດນາມ ເຂົ້າຮ່ວມ.

ຈຸດປະສົງຂອງການພົບປະໃນຄັ້ງນີ້ ແມ່ນເພື່ອແລກປ່ຽນທັດສະນະທາງດ້ານນະໂຍບາຍການຕ່າງປະເທດຂອງ ລາວຕໍ່ຜົນກະທົບຈາກສະພາບການພາກພື້ນ ແລະ ໂລກ ຕໍ່ບັນຫາດ້ານຄວາມໝັ້ນຄົງ ແລະ ການພັດທະນາຢູ່ພາກພື້ນ ລວມທັງບັນຫາທະເລຈີນໃຕ້ ໃນປັດຈຸບັນ; ທັງສອງຝ່າຍໄດ້ສົນທະນາລົງເລິກໃນຫຼາຍບັນທີ່ສຳຄັນເປັນຕົ້ນແມ່ນການແຂ່ງຂັນລະຫວ່າງບັນດາປະເທດໃຫຍ່ຢູ່ເຂດອາຊີຕາເວັນອອກສ່ຽງໃຕ້, ນະໂຍບາຍການຕ່າງປະເທດຂອງຈີນ, ການພົວພັນລະຫວ່າງອາເມລິກາ-ອາຊີຕາເວັນອອກສ່ຽງໃຕ້, ບົດບາດ ແລະ ການພົວພັນລະຫວ່າງບັນດາປະເທດປານກາງກັບອາຊີຕາເວັນອອກສ່ຽງໃຕ້; ບັນຫາທະເລຈີນໃຕ້, ການຮ່ວມມືແມ່ນ້ຳຂອງ ແລະ ການພົວພັນຮ່ວມມືສອງຝ່າຍ ລະຫວ່າງລາວ-ຫວຽດນາມ ໃນຂົງເຂດຕ່າງໆ. ໃນໂອກາດນີ້ ຕາງໜ້າຜູ້ແທນຝ່າຍລາວ ໄດ້ຢັ້ງຢືນຢ່າງໜັກແໜ້ນ ສປປ ລາວ ຍຶດໝັ້ນແນວທາງການຕ່າງເທດໃນການສ້າງສັນຕິພາບ, ເອກກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປີດກວ້າງການພົວພັນຮ່ວມມືແບບສອງຝ່າຍ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດຫລຸດຜ່ອນສັດຕູ” ເວົ້າລວມ, ເວົ້າສະເພາະກໍຄືການຍົກລະດັບ ແລະ ເສີມຂະຫຍາຍສາຍພົວພັນສາມັກຄີແບບພິເສດ, ຮອບດ້ານ ລະຫວ່າງສອງປະເທດ ລາວ-ຫວຽດນາມ ໃຫ້ໝັ້ນຄົງທະນົງແກ່ນ ແລະ ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ປຶກສາຫາທາງດ້ານວິຊາການ ຕໍ່ບັນຫາແຮງງານ ແລະ ອັດຕາແລກປ່ຽນ

ຈໍານວນຜູ້ເຂົ້າຊົມ: 716

ສວສສຊ ປຶກສາຫາທາງດ້ານວິຊາການ ຕໍ່ບັນຫາແຮງງານ ແລະ ອັດຕາແລກປ່ຽນ

ໃນຕອນເຊົ້າຂອງວັນທີ 19 ກັນຍາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປີດກອງປະຊຸມປຶກສາຫາລືທາງດ້ານວິຊາການ ພາຍໃຕ້ຫົວຂໍ້: ສະພາບບັນຫາແຮງງານໃນ ສປປ ລາວ ແລະ ການເໜັງຕີງຂອງອັດຕາແລກປ່ຽນ ໂດຍການເປັນປະທານຂອງ ທ່ານ ບົວສອນ ບຸບຜາວັນ, ອາດີດກົມການເມືອງສູນກາງພັກ, ອາດີດນາຍົກລັດຖະມົນຕີ; ເຂົ້າຮ່ວມກອງປະຊຸມມີທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ; ທ່ານ ປອ. ສະຖາບັນດິດ ອິນສີຊຽງໃໝ່ ຮອງເລຂາຄະນະພັກ, ຮອງປະທານ ສວສສຊ; ມີບັນດາຫົວໜ້າສະຖາບັນຄົ້ນຄວ້າ ພ້ອມດ້ວຍທີມງານນັກຄົ້ນຄວ້າເຂົ້າຮ່ວມຈໍານວນໜຶ່ງ.

ກອງປະຊຸມໄດ້ຮັບຟັງການນໍາສະເໜີສະພາບການເຄື່ອນຍ້າຍແຮງງານໄວໜຸ່ມໄປເຮັດວຽກຢູ່ຕ່າງປະເທດ; ສະ ພາບການຂາດແຄນແຮງງານ ແລະ ສະພາບການເໜັງຕີງຂອງອັດຕາແລກປ່ຽນໃນລາວ ເຊິ່ງເນື້ອໃນບາງຕອນກ່າວວ່າ: ເສດຖະກິດຂອງລາວລິເລີ່ມຟື້ນຕົວ ແລະ ຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ, ໝັ້ນທ່ຽງ ເປັນປັດໄຈພື້ນຖານອັນສໍາຄັນ ເອື້ອອໍານວຍໃຫ້ແກ່ການພັດທະນາ, ການດໍາເນີນທຸລະກິດ, ການຜະລິດ ແລະ ການບໍລິການ; ໃນນັ້ນ ກໍາລັງແຮງງານຖືວ່າມີຄວາມສຳຄັນຫຼາຍ ໃນການປະກອບສ່ວນຊຸກຍູ້ໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ ແລະ ການຫັນເປັນອຸດສາຫະກໍາທັນສະໄໝເທື່ອລະກ້າວ. ປັດຈຸບັນ, ສປປ ລາວ ລາວມີປະຊາກອນຢູ່ໃນເກນອາຍຸໄວອອກແຮງງານ ຈໍານວນ 5,3 ລ້ານຄົນ. ໃນນັ້ນ, ຜູ້ທີ່ມີວຽກເຮັດງານທໍາກວມເອົາ 2,4 ລ້ານຄົນ ຂອງກໍາລັງແຮງງານທັງໝົດ. ຢ່າງໃດກໍຕາມ ໃນໄລຍະ 2-3 ປີທີ່ຜ່ານມາ ເສດຖະກິດຂອງລາວຍັງມີຄວາມບອບບາງ ແລະ ປະເຊີນກັບຄວາມສ່ຽງຫຼາຍດ້ານ ທັງພາຍໃນ ແລະ ພາຍນອກ ເຊັ່ນ: ບັນຫາໄພເງິນເຟີ້, ອັດຕາແລກປ່ຽນ ແລະ ຄ່າຄອງຊີບທີ່ສູງຂຶ້ນ ເຮັດໃຫ້ຕະຫຼາດແຮງງານພາຍໃນຂະຫຍາຍຕົວຈໍາກັດ ຍ້ອນຄ່າຈ້າງແຮງງານທີ່ຕໍ່າບໍ່ດຸນດ່ຽງກັບຄ່າຄອງຊີບ ຈຶ່ງສົ່ງຜົນກະທົບໂດຍກົງຕໍ່ຜູ້ອອກແຮງງານ ເຮັດໃຫ້ໄວໜຸ່ມ-ໄວອອກແຮງງານຕັດສິນໃຈໄປຂາຍແຮງງານຕ່າງປະເທດສູງເຖິງ 500.000 ກວ່າຄົນ, ໃນປີ 2022-2024 ມີຈໍານວນຜູ້ອອກແຮງງານລົງທະບຽນທີ່ຜ່ານລະບົບທາງການປະມານ 255.700 ຄົນ ແລະ ປະ ມານ 96% ແມ່ນເຄື່ອນຍ້າຍໄປຂາຍແຮງງານຢູ່ປະເທດໄທ, 54% ຂອງແຮງງານແມ່ນເຮັດວຽກຢູ່ໃນຂະແໜງບໍລິການ.

ບັນດານັກຄົ້ນຄວ້າໄດ້ພ້ອມກັນປຶກສາຫາລື ແລະ ແລກປ່ຽນຄຳຄິດຄໍາເຫັນຕໍ່ກັບສະພາບບັນຫາແຮງງານໃນ ລາວ ແລະ ການເໜັງຕີງຂອງອັດຕາແລກປ່ຽນຢ່າງກົງໄປກົງມາ, ມີການຄົ້ນຄວ້າ, ວິເຄາະ, ໄຈ້ແຍກ ແລະ ຕັ້ງຄໍາຖາມ ເພື່ອຊອກຫາວິທີການແກ້ໄຂສະເໜີຕໍ່ຂັ້ນເທິງ ນໍາໄປຈັດຕັ້ງຜັນຂະຫຍາຍເປັນນະໂຍບາຍ ແລະ ມາດຕະການໃຫ້ແທດ ເໝາະຕາມສະພາບການຕົວຈິງໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ກອງປະຊຸມໃຫຍ່ສະມາຊິກພັກ ຄັ້ງທີ II ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 805

ກອງປະຊຸມໃຫຍ່ສະມາຊິກພັກ ຄັ້ງທີ II
ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມໃຫຍ່ສະມາຊິກພັກ ຄັ້ງທີ II ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໄຂຂຶ້ນຢ່າງເປັນທາງການໃນ, ວັນທີ 03 ກັນຍາ 2025 ແລະ ດໍາເນີນເປັນເວລາ 1 ວັນເຕັມ, ໂດຍຈັດຂຶ້ນຢູ່ຫ້ອງປະຊຸມໃຫຍ່ຂອງຫ້ອງວ່າການສູນກາງພັກ, ນະຄອນຫຼວງວຽງຈັນ ພາຍໃຕ້ຄຳຂວັນ “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານວຽກງານຄົ້ນຄວ້າ, ເປັນຄັງປັນຍາທີ່ເຂັ້ມແຂງໃຫ້ແກ່ພັກ ແລະ ລັດຖະບານ, ສ້າງຜະລິດຕະພັນທີ່ມີຄຸນນະພາບອອກສູ່ສັງຄົມທັງພາຍໃນ ແລະ ຕ່າງປະເທດ” ໂດຍການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ, ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ; ມີບັນດາການນໍາພັກ-ລັດ, ອະດີດການນໍາພັກ-ລັດ, ພະນັກງານອາວຸໂສ-ບໍານານ, ຄະນະປະຈໍາພັກ, ກຳມະການຄະນະພັກ, ສະມາຊິກພັກສົມບູນ ແລະ ສຳຮອງ ພ້ອມດ້ວຍແຂກຖືກເຊີນຈາກຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ຫ້ອງວ່າການສູນກາງພັກ, ຄະນະກວດກາສູນກາງພັກ, ຄະນະພົວພັນການຕ່າງປະເທດສູນກາງພັກ ເຂົ້າຮ່ວມທັງໝົດຈຳນວນ 183ສະຫາຍ, ຍິງ 75 ສະຫາຍ. ໃນນີ້ ມີຜູ້ແທນກອງປະຊຸມ 148 ສະຫາຍ, ຍິງ 65 ສະຫາຍ. ກອງປະຊຸມໃຫຍ່ຄັ້ງນີ້ ເປັນເຫດການປະຫວັດສາດໜຶ່ງ ທີ່ມີຄວາມໝາຍຄວາມສໍາຄັນຂອງການຈັດຕັ້ງນໍາພາວຽກງານຮອບດ້ານ ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເປັນການທົບທວນຜົນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງຕົນໃນສະໄໝທີ່ຜ່ານມາ ແລະ ວາງແຜນກຳນົດທິດທາງ, ເປົ້າໝາຍ ໃນການຈັດຕັ້ງປະຕິບັດແນວທາງນະໂຍບາຍຂອງພັກຂອງລັດໃນຊຸມປີຕໍ່ໜ້າ.

ກອງປະຊຸມໃຫຍ່ໄດ້ດຳເນີນໄປພາຍໃຕ້ບັນຍາກາດແຫ່ງຄວາມສາມັກຄີ, ຄວາມເປັນເອກະພາບ ແລະ ຄວາມຮັບຜິດຊອບສູງໃນການຄົ້ນຄວ້າບັນຫາສຳຄັນ ແລະ ຕົກລົງຮັບຮອງຢ່າງເອກະສັນ ທີ່ກອງປະຊຸມໄດ້ຍົກຂຶ້ນໃນຮ່າງບົດລາຍງານການເມືອງ, ແຜນພັດທະນາວຽກງານຄົ້ນຄວ້າວິທະຍາສາດຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າຢ່າງເລິກເຊິ່ງ, ກົງໄປກົງມາ ເຊິ່ງໄດ້ຕີລາຄາຜົນສຳເລັດ, ຜົນງານອັນພົ້ນເດັ່ນຮອບດ້ານທີ່ຍາດມາໄດ້ໄລຍະຜ່ານມາ ເປັນຕົ້ນການຄົ້ນຄວ້າປັບປຸງເນື້ອໃນລັດຖະທຳມະນູນ ສປປ ລາວ, ການແກ້ໄຂສະພາບເງິນເຟີ້ ແລະ ການເໜັງຕີງຂອງອັດຕາແລກປ່ຽນ, ການຕິດຕາມສະພາບເສດຖະກິດມະຫາພາກຂອງ ສປປ ລາວ, ໂຄງການຄົ້ນຄວ້າຂອງສະພາທິດສະດີສູນກາງພັກ, ສະພາວິທະຍາສາດແຫ່ງຊາດ ແລະ ອື່ນໆ ທີ່ນອນໃນພາລະບົດບາດຂອງສະຖາບັນ ຈຳນວນ 81 ຫົວຂໍ້ (ໂຄງການ) ເຊິ່ງໄດ້ສ້າງໜໍ່ແໜງສໍາຄັນ ໃນການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານຕໍ່ວຽກງານຄົ້ນຄວ້າວິທະຍາສາດເທື່ອລະກ້າວໃນຊຸມປີຂ້າງໜ້າ. ໄປຄຽງຄູ່ກັນ ກອງປະຊຸມຍັງໄດ້ເປັນເອກະພາບຢ່າງພາວະວິໄສຕໍ່ດ້ານຂໍ້ຄົງຄ້າງ, ຂໍ້ຂາດຕົກບົກພ່ອງໃນການນໍາພາ-ຊີ້ນໍາຂອງຄະນະພັກ ເຊິ່ງເຮັດໃຫ້ວຽກງານຈຸດສຸມບາງດ້ານບໍ່ສາມາດບັນລຸຜົນສຳເລັດຕາມຄາດໝາຍທີ່ວາງອອກ, ພ້ອມທັງຊີ້ໃຫ້ເຫັນບັນດາສາເຫດຕົ້ນຕໍ ເພື່ອກຳນົດທິດທາງມາດຕະການແກ້ໄຂທີ່ສອດຄ່ອງ ແລະ ແທດເໝາະ ຮັບປະກັນໃຫ້ແກ່ການຈັດຕັ້ງປະຕິບັດໃນຕໍ່ໜ້າມີປະສິດທິພາບ ແລະ ປະສິດທິຜົນສູງຂຶ້ນ. ເພື່ອຍູ້ແຮງການຫັນປ່ຽນຢ່າງຕັ້ງໜ້າ ກອງປະຊຸມໄດ້ຮັບຮອງເອົາບົດຮຽນທີ່ສຳຄັນຈາກພຶດຕິກຳຕົວຈິງ ເພື່ອເປັນບ່ອນອີງໃນການປັບປຸງການນໍາພາ-ຊີ້ນໍາ ແລະ ຈັດຕັ້ງປະຕິບັດນະໂຍບາຍຂອງຄະນະພັກ ເປັນຕົ້ນແມ່ນການຍົກສູງຄວາມສາມາດນໍາພາຂອງຄະນະພັກແຕ່ລະຂັ້ນ, ການປັບປຸງແບບແຜນວິທີນໍາພາ-ວິທີເຮັດວຽກ, ການຈັດວາງ ແລະ ຄຸ້ມຄອງບຸກຄະລາກອນ ຕ້ອງໄດ້ຮັບການຈັດຕັ້ງໃຫ້ຄົບຖ້ວນ ແລະ ເປັນລະບົບ, ມີການບໍາລຸງກໍ່ສ້າງສືບທອດປ່ຽນແທນຢ່າງເໝາະສົມ; ການປັບປຸງຄຸນນະພາບວຽກງານຄົ້ນຄວ້າວິທະຍາສາດຕ້ອງສົມທົບແໜ້ນລະຫວ່າງການຈັດຕັ້ງປະຕິບັດໂຄງການຢ່າງເຂັ້ມງວດ ກັບການຍົກລະດັບຄວາມຮູ້ຄວາມສາມາດທາງດ້ານວິຊາການຂອງນັກຄົ້ນຄວ້າໃຫ້ສູງຂຶ້ນ, ມີຈຸດສຸມ, ມີກົນໄກທີ່ເໝາະສົມ ແລະ ສາມາດສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ເປັນເຈົ້າຕົນເອງ; ມີການຮ່ວມມື ແລະ ມີລະບົບເຄືອຂ່າຍຄົ້ນຄວ້າທີ່ມີຄວາມເຂັ້ມແຂງ ສາມາດສະໜອງຂໍ້ມູນຂ່າວສານ, ຜົນງານຄົ້ນຄວ້າ ແລະ ແລກປ່ຽນບົດຮຽນທາງດ້ານວິຊາການຢູ່ພາຍໃນ ແລະ ຕ່າງປະເທດກວ້າງຂວາງຍິ່ງຂຶ້ນ ຮັບປະກັນໃຫ້ສະຖາບັນກາຍເປັນຄັງປັນຍາທີ່ເຂັ້ມແຂງຂອງພັກ ແລະ ລັດຖະບານຢ່າງແທ້ຈິງ.

ກອງປະຊຸມໄດ້ຮັບຟັງລາຍງານ ແລະ ບົດປະກອບຄຳເຫັນຈາກຜູ້ຕາງໜ້າຂອງ 3 ອົງການຈັດຕັ້ງມະຫາຊົນ ແລະ ຜູ້ຕາງໜ້າຈາກຂົງເຂດການຄົ້ນຄວ້າ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ. ການລາຍງານ ແລະ ປະກອບຄຳຄິດເຫັນສ່ວນຫຼາຍໄດ້ລົງເລິກ ລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກ ຄັ້ງທີ I ແລະ ເປັນເອກະພາບຕໍ່ມະຕິກອງປະຊຸມໃຫຍ່ສະມາຊິກພັກ ຄັ້ງທີ II ຂອງ ສວສສຊ ເຂົ້າໃນຂົງເຂດການຄົ້ນຄວ້າວິທະຍາສາດເສດຖະກິດ ແລະ ສັງຄົມ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງຕາມມາດຕະຖານເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກເລືອກຕັ້ງທັງໝົດ 13 ສະຫາຍ ແລະ ເລືອກໄດ້ 11 ສະຫາຍ, ຍິງ 2 ສະຫາຍ; ໃນກອງປະຊຸມຄົບຄະນະຄັ້ງປະຖົມມະລຶກຂອງຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປັນເອກະສັນກັນເລືອກເອົາເລຂາ, ຮອງເລຂາຄະນະພັກ ດັ່ງນີ້: ເລືອກເອົາ

(1) ສະຫາຍ ປອ. ກອງແກ້ວ ໄຊສົງຄາມ ເປັນເລຂາ;

(2) ສະຫາຍ ປອ. ສະຖາບັນດິດ ອິນສີຊຽງໃໝ່ ເປັນຮອງເລຂາ;

ເລືອກເອົາປະທານ ແລະ ຮອງປະທານກວດກາພັກ ດັ່ງນີ້:

1) ສະຫາຍ ປອ. ໄຊສົງຄາມ ມະໂນທັມ ເປັນປະທານກວດກາ;

2) ສະຫາຍ ບຸນລັດ ແກ້ວອາສາ ເປັນຮອງປະທານກວດກາ

3) ສະຫາຍ ຄຳປະເສີດ ທຳມະວົງ ເປັນຄະນະກວດກາ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກສະຫາຍ ນາງ ສີໃສ ລືເດດມູນສອນ, ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງໄດ້ຕີລາຄາສູງຕໍ່ຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ໄດ້ມີຄວາມເອົາໃຈໃສ່ໃນການຈັດຕັ້ງຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງຂອງພັກ ເຂົ້າສູ່ວຽກງານຂະແໜງການຂອງຕົນ ເວົ້າລວມ, ເວົ້າສະເພາະແມ່ນ ການຄົ້ນຄວ້າວິທະຍາສາດເສດຖະກິດ ແລະ ສັງຄົມ ຮັບໃຊ້ເຂົ້າໃນການຄົ້ນຄວ້າທິດສະດີຂອງພັກ, ຊຸກຍູ້ການປະຕິບັດແຜນພັດທະນາເສດຖະກິດ ແລະ ສັງຄົມແຫ່ງຊາດຂອງລັດ, ແກ້ໄຂ ແລະ ສ້າງສະຖຽນລະພາບທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ, ນໍາພາປະເທດຊາດຫລຸດພົ້ນຈາກສະຖານະປະເທດດ້ອຍພັດທະນາ, ປະເທດຊາດຮັ່ງມີເຂັ້ມແຂງຂຶ້ນເທື່ອລະກ້າວ. ເພື່ອປະຕິບັດໜ້າທີ່ການເມືອງດັ່ງກ່າວໃຫ້ສໍາເລັດ ແລະ ປະກອບສ່ວນບູລະນະແນວທາງນະໂຍບາຍຂອງພັກ ຄື ປົກປັກຮັກສາ ແລະ ສ້າງສາພັດທະນາປະເທດຊາດ ກ້າວຂຶ້ນສູ່ຈຸດໝາຍສັງຄົມນິຍົມນັ້ນ ຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ຜູ້ແທນກອງປະຊຸມ ຈະຕ້ອງໄດ້ກຳແໜ້ນບາງບັນຫາສຳຄັນ ດັ່ງນີ້:

ໜຶ່ງ: ຄະນະພັກຊຸດໃໝ່ ຕ້ອງເພີ່ມທະວີການສຶກສາອົບຮົມການເມືອງແນວຄິດໃຫ້ສະມາຊິກພະນັກງານ, ນັກຄົ້ນຄວ້າ, ນັກວິທະຍາສາດ ໃຫ້ຮັບຮູ້ເຂົ້າໃຈເຖິງແນວທາງນະໂຍບາຍຂອງພັກ, ກົດລະບຽບ, ກົດໝາຍ ແລະ ລະບຽບການຕ່າງໆ; ປັບປຸງການຈັດຕັ້ງພັກແຕ່ລະຂັ້ນໃຫ້ເຂັ້ມແຂງ, ຄົບຖ້ວນ ແລະ ມີຫຼາຍຮຸ່ນ ເພື່ອກໍ່ສ້າງຮຸ່ນສືບທອດປ່ຽນແທນ; ປັບປຸງກົງຈັກ, ຕໍາແໜ່ງງານໃຫ້ກະທັດຮັດ, ມີປະສິດທິພາບ, ຍົກສູງຄວາມຮັບຜິດຊອບໜ້າທີ່ການເມືອງ ແລະ ປະຕິບັດໜ້າທີ່ວຽກງານຢ່າງມີຜົນສຳເລັດ; ເອົາໃຈໃສ່ຕິດຕາມກວດກາການຜັນແປຂອງສະພາບແນວຄິດຂອງສະມາຊິກພັກ, ພະນັກງານລັດຖະກອນ ເພື່ອມີວິທີການນໍາພາ, ແກ້ໄຂທີ່ຖືກຕ້ອງ ແລະ ທັນການກໍ່ສ້າງສະມາຊິກພັກພະນັກງານມີຄວາມປອດໃສ, ເຂັ້ມແຂງ ແລະ ໜັກແໜ້ນຍິ່ງຂຶ້ນ;

ສອງ: ຄະນະພັກຊຸດໃໝ່ ຕ້ອງຍຶດໝັ້ນຫຼັກການຂອງພັກຢ່າງໜັກແໜ້ນ, ປະຕິບັດຫຼັກການລວມສູນປະຊາທິປະໄຕ, ມີການແບ່ງໜ້າທີ່ຄວາມຮັບຜິດຊອບຢ່າງລະອຽດ, ຈະແຈ້ງ; ປັບປຸງແບບແຜນວິທີນໍາພາ-ວິທີເຮັດວຽກໃຫ້ຮັດກຸມ, ມີປະສິດທິພາບ; ເອົາໃຈໃສ່ວຽກງານຕິດຕາມ-ກວດກາພັກ, ກວດກາລັດ, ການສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ເປັນປົກກະຕິ ເພື່ອກວດຄືນບັນດາຄາດໝາຍ ກໍຄືການຈັດຕັ້ງປະຕິບັດບັນດາມະຕິ, ຄຳສັ່ງ, ໜ້າທີ່ວຽກງານຕ່າງໆ ທີ່ຂັ້ນເທິງ ແລະ ຄະນະພັກຂັ້ນຂອງຕົນວາງອອກແຕ່ລະໄລຍະ; ປັບປຸງວຽກງານອົງການຈັດຕັ້ງມະຫາຊົນຂອງພັກໃຫ້ເຂັ້ມແຂງ, ສ້າງເງື່ອນໄຂໃຫ້ແຕ່ລະອົງການເຄື່ອນໄຫວປະຕິບັດໜ້າທີ່ຖືກຕ້ອງຕາມພາລະບົດບາດຂອງຕົນ ເພື່ອເປັນກຳລັງແຮງທີ່ສຳຄັນໃຫ້ແກ່ຄະນະພັກແຕ່ລະຂັ້ນ;

ສາມ: ເພື່ອຮັກສາມູນເຊື້ອອັນດີ ແລະ ເສີມຂະຫຍາຍຜົນສໍາເລັດດ້ານການຄົ້ນຄວ້າໃຫ້ຍິ່ງໃຫຍ່ກວ່າເກົ່າ, ຄະນະພັກ ສວສສຊ ຕ້ອງເພີ່ມທະວີການຈັດຕັ້ງນໍາພາ-ຊີ້ນໍາ ແລະ ສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານວຽກງານການຄົ້ນຄວ້າວິທະຍາສາດໃນຕໍ່ໜ້າໃຫ້ມີຄວາມໜັກແໜ້ນ, ເຂັ້ມແຂງ ໃຫ້ເປັນຄັງປັນຍາທີ່ເຂັ້ມແຂງໃຫ້ແກ່ພັກ ແລະ ລັດຖະບານ; ເສີມຂະຫຍາຍຢ່າງແຂງແຮງດ້ານສະຕິປັນຍາ ແລະ ຫົວຄິດປະດິດສ້າງ ໃຫ້ມີການຫັນປ່ຽນການຄົ້ນຄວ້າໄປສູ່ຄຸນນະພາບໃໝ່, ນໍາພາ-ຊີ້ນໍາການຄົ້ນຄວ້າຢ່າງມີວິທະຍາສາດ ແລະ ມີຄຸນນະພາບສູງ, ເຜີຍແຜ່ຜົນການຄົ້ນຄວ້າວິທະຍາສາດເສດຖະກິດ-ສັງຄົມ ເພື່ອຮັບໃຊ້ເຂົ້າໃນການວາງແນວທາງນະໂຍບາຍຂອງພັກ, ຍຸດທະສາດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ; ການຄົ້ນຄວ້າວິທະຍາສາດໃນຕໍ່ໜ້າຕ້ອງຫັນໄປສູ່ການຄົ້ນຄວ້ານໍາໃຊ້ ແລະ ພັດທະນາໃຫ້ຫຼາຍຂຶ້ນ ຕິດພັນກັບການຫັນເປັນທັນສະໄໝ, ຫັນເປັນດີຈີຕອນ ແລະ ປັນຍາປະດິດ;

ສີ່: ຕ້ອງຖືສຳຄັນ ແລະ ເອົາໃຈໃສ່ໃນການບໍາລຸງກໍ່ສ້າງພະນັກງານບຸກຄະລາກອນໃຫ້ມີລະດັບຄວາມຮູ້ຄວາມສາມາດສູງ ເພື່ອກໍ່ສ້າງຖັນແຖວນັກຄົ້ນຄວ້າ, ນັກຊ່ຽວຊານ, ນັກວິທະຍາສາດໃຫ້ມີຄວາມເຂັ້ມແຂງ, ສາມາດຄົ້ນຄວ້າທາງດ້ານທິດສະດີ, ພຶດຕິກຳ ແລະ ການປະຍຸກນໍາໃຊ້ ຮັບໃຊ້ການວາງແຜນ ແລະ ຈັດຕັ້ງປະຕິບັດໃຫ້ສຳເລັດຜົນ; ສ້າງແຫຼ່ງການຮຽນຮູ້ ແລະ ສະໜອງເຕັກນິກວິຊາການ, ບົດຮຽນທີ່ດີໃຫ້ແກ່ພາກສ່ວນກ່ຽວຂ້ອງ ແລະ ສັງຄົມ ໂດຍມີການປະສານສົມທົບເຊິ່ງກັນ ແລະ ກັນ ເພື່ອເປັນກໍາລັງແຮງຊຸກຍູ້ໃຫ້ແກ່ການຂະຫຍາຍຕົວຢ່າງໝັ້ນທ່ຽງ ແລະ ຍືນຍົງໃນຕໍ່ໜ້າ.

ຫ້າ: ເພີ່ມທະວີການພົວພັນຮ່ວມມືກັບບັນດາປະເທດເພື່ອນມິດ, ພາກພື້ນ ແລະ ສາກົນ ໃຫ້ກວ້າງຂວາງ, ເລິກເຊິ່ງ ແລະ ຫຼາຍຮູບແບບ ໂດຍສະເພາະການຮ່ວມມືດ້ານການຄົ້ນຄວ້າວິທະຍາສາດເສດຖະກິດ-ສັງຄົມ, ເຕັກໂນໂລຊີ ແລະ ອື່ນໆ ກັບບັນດາສະຖາບັນຄົ້ນຄວ້າ, ອົງການສາກົນ ແລະ ອົງການທາງສັງຄົມ ເພື່ອແລກປ່ຽນ-ຖອດຖອນບົດຮຽນ ແລະ ສຶກສາເອົາຜົນຄົ້ນຄວ້າຕ່າງໆ ທີ່ເປັນຜົນປະໂຫຍດມາໝູນໃຊ້ເຂົ້າໃນການພັດທະນາຂອງລາວ ໃຫ້ມີໝາກຜົນສູງ.

ກອງປະຊຸມໄດ້ເຫັນດີຮັບຮອງ ແລະ ຍົກບັດລົງປະຊາມະຕິຢ່າງເປັນເອກະສັນຕໍ່ມະຕິກອງປະຊຸມໃຫຍ່ສະມາຊິກພັກ ຄັ້ງທີ II ແລະ ຮຽກຮ້ອງມາຍັງບັນດາສະມາຊິກພັກ, ພະນັກງານ-ລັດຖະກອນທົ່ວສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈົ່ງນໍາເອົາຜົນສໍາເລັດ ແລະ ເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງນີ້ ໄປຈັດຕັ້ງຄົ້ນຄວ້າ, ເຊື່ອມຊຶມ, ກໍາແໜ້ນ ແລະ ຜັນຂະຫຍາຍເປັນແຜນການ, ແຜນງານລະອຽດ ພ້ອມກັນເຊີດຊູສະຕິປັນຍາ ແລະ ຄວາມຮັບຜິດຊອບ, ຄວາມເປັນເຈົ້າຈັດຕັ້ງປະຕິບັດໃຫ້ເກີດໝາກຜົນຕົວຈິງ.

ຂຽນຂ່າວ ແລະ ຖ່າຍພາບ: ສູນຂໍ້ມູນຂ່າວສານ ແລະ ຝຶກອົບຮົມ

ສວສສຊ ວາງກະຕ່າດອກໄມ້ອະນຸສອນສະຖານ ປະທານ ໄກສອນ ພົມວິຫານ

ຈໍານວນຜູ້ເຂົ້າຊົມ: 598

ສວສສຊ ວາງກະຕ່າດອກໄມ້ອະນຸສອນສະຖານ ປະທານ ໄກສອນ ພົມວິຫານ

ເນື່ອງໃນໂອກາດກະກຽມເຂົ້າສູ່ການດໍາເນີນກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຊິ່ງຈະໄດ້ຈັດຂຶ້ນໃນວັນທີ 03 ກັນຍາ 2025 ນີ້. ຕາງໜ້າຄະນະຜູ້ແທນກອງປະຊຸມນໍາໂດຍ ສະຫາຍ ປອ. ກອງແກ້ວ ໄຊ ສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ ພ້ອມດ້ວຍຄະນະປະຈໍາພັກ, ກໍາມະການຄະນະພັກ, ຄະນະໜ່ວຍພັກ ແລະ ສາມອົງການຈັດຕັ້ງມະຫາຊົນ ໄດ້ເຂົ້າໄດ້ວາງກະຕ່າດອກໄມ້ຢູ່ຕໍ່ໜ້າຮູບປັ້ນຫຼໍ່ປະທານ ໄກສອນ ພົມວິຫານ ທີ່ຫໍພິພິດຕະພັນ ປະທານໄກສອນພົມ ວິຫານ ເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຕໍ່ຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິດຕົນໃນພາລະ ກິດປະຕິວັດຢ່າງອົງອາດກ້າຫານ. ພາຍໃຕ້ການນຳພາ-ຊີ້ນຳທີ່ສະຫຼາດສ່ອງໃສ ແລະ ປີຊາສາມາດຂອງພັກປະຊາ ຊົນປະຕິວັດລາວ, ສະມາຊິກພັກ-ພະນັກງານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດຂໍຈົດຈຳລຳລຶກ, ກະຕັນຍູຮູ້ບຸນຄຸນຢ່າງເລິກເຊິ່ງ ແລະ ຈະພ້ອມກັນສືບທອດພາລະກິດຂອງພັກ, ຂອງລັດ ແລະ ຂອງປະຊາ ຊົນ ໂດຍເຮັດທຸກຢ່າງເພື່ອພັກ, ເພື່ອລັດ ແລະ ເພື່ອປະຊາຊົນ ປະກອບສ່ວນຢ່າງຕັ້ງໜ້າເຂົ້າໃນການສ້າງສາ ແລະ ພັດທະນາປະເທດຊາດໃຫ້ມີຄວາມຈະເລີນຮຸ່ງເຮື່ອງສີວິໄລ, ນຳພາປະເທດຊາດກ້າວເດີນສູ່ຈຸດໝາຍສັງຄົມນິຍົມຢ່າງມີໄຊ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ຈັດຕັ້ງທາບທາມບຸກຄະລາກອນ ຮອບທີ 2

ຈໍານວນຜູ້ເຂົ້າຊົມ: 514

ສວສສຊ ຈັດຕັ້ງທາບທາມບຸກຄະລາກອນ ຮອບທີ 2

ກອງປະຊຸມທາບທາມບຸກຄະລາກອນ ຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງ ຄົມແຫ່ງຊາດ ສະໄໝທີ II ຮອບທີ 2 ໄດ້ຈັດຂຶ້ນໃນວັນທີ 21 ສິງຫາ 2025 ທີ່ຫ້ອງປະຊຸມ ສວສສຊ ພາຍໃຕ້ການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ; ມີບັນດາສະຫາຍຄະນະປະຈຳພັກ, ກໍາມະການຄະນະພັກ, ເລຂາໜ່ວຍພັກ ແລະ ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກ ພ້ອມດ້ວຍສະມາຊິກພັກສົມບູນ ແລະ ສຳຮອງ ເຂົ້າຮ່ວມ.

ກອງປະຊຸມຄັ້ງນີ້ ໄດ້ຮັບຟັງການຜ່ານຮ່າງບົດລາຍງາຍການເມືອງ, ແຜນພັດທະນາວຽກງານຄົ້ນຄວ້າ 5 ປີ (2026-2030) ແລະ ບົດສໍາຫຼວດການນໍາພາລວມຂອງອົງຄະນະພັກ ສວສສຊ ສະໄໝທີ I. ພ້ອມກັນນີ້, ກອງປະຊຸມຍັງໄດ້ຮັບຟັງການປະກອບຄຳຄິດຈາກບັນດາສະມາຊິກພັກ ໂດຍສະເພາະແມ່ນບັນຫາທີ່ຍັງຄົງຄ້າງ ທີ່ຈະໄດ້ພ້ອມກັນສືບຕໍ່ແກ້ໄຂ ແລະ ເຮັດໃຫ້ສຳເລັດໃນຕໍ່ໜ້າ. ຈາກນັ້ນ ທ່ານ ນ. ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານມາດຕະຖານ ແລະ ເງື່ອນໄຂຂອງຜູ້ອອກຮັບສະໝັກເລືອກຕັ້ງຄະນະບໍລິ ຫານງານພັກ ສວສສຊ ຊຸດໃໝ່ ເພື່ອເປັນບ່ອນອີງໃຫ້ແກ່ຜູ້ແທນກອງປະຊຸມໄດ້ນຳໄປຄົ້ນຄວ້າເລືອກເຟັ້ນເອົາຜູ້ມີມາດ ຕະຖານເງື່ອນໄຂຄົບຖ້ວນ ຕາມທີ່ໄດ້ກໍານົດໄວ້ ເຂົ້າໃນກອງປະຊຸມໃຫຍ່.

ໂອກາດນີ້, ສະຫາຍ ປອ. ກອງແກ້ວ ໄຊສົງຄາມ ໄດ້ຮຽກຮ້ອງມາຍັງສະມາຊິກພັກພະນັກງານທີ່ເຂົ້າຮ່ວມກອງປະຊຸມ ຈົ່ງຍົກສູງສະຕິຄວາມຮັບຜິດຊອບການເມືອງ ແລະ ນຳໃຊ້ສິດປະຊາທິປະໄຕ ປ່ອນບັດທາບທາມຜູ້ສະໝັກເລືອກຕັ້ງ ເຂົ້າໃນຄະນະບໍລິຫານງານພັກ ສວສສຊ ສະໄໝທີ II ໃນຄັ້ງນີ້ ໃຫ້ຖືກຕ້ອງຕາມລະບຽບຫຼັກການ ຮັບ ປະກັນທາງດ້ານເພດ-ເຜົ່າ, ໃຫ້ມີລຸ້ນອາວຸໂສ, ລຸ້ນກາງ ແລະ ລຸ້ນໜຸ່ມ, ເປັນຜູ້ທີ່ມີຜົນງານດີເດັ່ນ, ມີຄວາມຮູ້ຄວາມສາມາດ ແລະ ມີວິໄສທັດ ໃນການນໍາພາຈັດຕັ້ງນໍາພາວຽກງານຄົ້ນຄວ້າວິທະຍາສາດໃນຕໍ່ໜ້າ. ຈາກນັ້ນ ຄະນະຮັບຜິດ ຊອບກອງປະຊຸມໄດ້ດໍາເນີນການປ່ອນບັດທາບທາມບຸກຄະລາກອນ ຮອບທີ 2 ສຳເລັດຕາມແຜນທີ່ວາງໄວ້.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນິນ ພົນສັກດາ

ການນຳ ສວສສຊ ອວຍພອນວັນຊາດ ຫວຽດນາມ

ຈໍານວນຜູ້ເຂົ້າຊົມ: 574

ການນຳ ສວສສຊ ອວຍພອນວັນຊາດ ຫວຽດນາມ

ໃນວັນທີ 20 ສິງຫາ 2025 ຄະນະນໍາສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳໂດຍ ສະຫາຍ ນ. ແກ້ວວິວອນ ອຸດທະຈັກ ຄະນະປະຈຳພັກ ຮອງປະທານ ສວສສຊ ພ້ອມຄະນະ ໄດ້ເຂົ້າອວຍພອນ ທ່ານ ຫງວຽນ ມິງ ເຕີມ ເອກອັກຄະລັດຖະທູດ ສສ ຫວຽດນາມ ປະຈຳລາວ ເນື່ອງໃນໂອກາດສະເຫຼີມສະຫຼອງ ວັນສະຖາປານາ ສາທາລະນະລັດ ສັງຄົມນິຍົມຫວຽດນາມ ຄົບຮອບ 80 ປີ (2/9/1945-2/9/2025).

ໂອກາດນີ້ ທ່ານ ນ. ແກ້ວວິວອນ ອຸດທະຈັກ ໄດ້ຕາງໜ້າໃຫ້ຄະນະພັກ ສວສສຊ ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດອັນໃຫຍ່ຫຼວງຮອບດ້ານ ມີຄວາມໝາຍປະຫັວດສາດ ທີ່ປະຊາຊົນຫວຽດນາມຍາດມາໄດ້ຕະຫຼອດໄລຍະ 80 ປີ ຜ່ານມາ, ພາຍໃຕ້ການນຳພາອັນປີຊາສາມາດ ຖືກຕ້ອງ ສະຫຼາດສ່ອງໃສ ຂອງພັກກອມມູນິດຫວຽດນາມ ອັນເຮັດໃຫ້ ສສ ຫວຽດນາມ ສືບຕໍ່ມີສະຖຽນລະພາບ ທາງດ້ານການເມືອງ ຢ່າງໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ວຽກງານປ້ອງກັນຊາດ-ປ້ອງກັນຄວາມສະຫງົບມີຄວາມໝັ້ນທ່ຽງເຂັ້ມແຂງ ສັງຄົມມີຄວາມເປັນລະບຽບຮຽບຮ້ອຍ ຊີວິດການເປັນຢູ່ຂອງປະຊາຊົນຫວຽດນາມໄດ້ຮັບການປັບປຸງດີຂຶ້ນເປັນກ້າວໆ.

ສະຫາຍ ຫງວຽນ ມິງ ເຕີມ ໄດ້ສະແດງຄວາມຂອບໃຈຕໍ່ ສະຫາຍ ນ. ແກ້ວວິວອນ ອຸດທະຈັກ ທີ່ໄດ້ນຳພາຄະນະມາອວຍພອນໃນໂອກາດ ວັນສະຖາປານາ ສສ ຫວຽດນາມ ຄົບຮອບ 80ປີ. ພ້ອມທັງຕີລາຄາສູງ ຕໍ່ການພົວພັນຮ່ວມມືລະຫວ່າງ ສອງພັກ ຊຶ່ງນັບມື້ນັບກ້າວໜ້າເຂົ້າສູ່ລວງເລິກ ແລະ ເປັນພື້ນຖານອັນສຳຄັນ ໃຫ້ແກ່ການພົວພັນຮ່ວມມືໃນຂົງເຂດຕ່າງໆ ຂອງສອງປະເທດ; ຕີລາຄາສູງຕໍ່ການປະສານສົມທົບຢ່າງແໜ້ນແຟ້ນ ລະຫວ່າງສະຖານທູດຫວຽດນາມ ແລະ ສວສສຊ ອັນໄດ້ປະກອບສ່ວນໃນການເພີ່ມພູນຄູນສ້າງ ສາຍສຳພັນອັນເປັນມູນເຊື້ອ, ຄວາມສາມັກຄີພິເສດ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນ ທີ່ມະຫາວິທະຍາໄລແຫ່ງຊາດລາວ

ຈໍານວນຜູ້ເຂົ້າຊົມ: 558

ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນ ທີ່ມະຫາວິທະຍາໄລແຫ່ງຊາດລາວ

ວັນທີ 16 ສິງຫາ 2025 ທີ່ຜ່ານມາ ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນໍາໂດຍ ປອ. ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເຂົ້າຮ່ວມກອງປະຊຸມສໍາມະນາວິທະຍາສາດສາກົນ ຄັ້ງທີ VI ພາຍໃຕ້ຫົວຂໍ້: “ບົດຮຽນການກຳອຳນາດຂອງພັກການເມືອງທີ່ຖືທິດສະດີມາກ-ເລນິນ” ເຊິ່ງຈັດຂຶ້ນຢູ່ມະຫາວິທະຍາໄລແຫ່ງຊາດລາວ ໂດຍການເປັນເຈົ້າພາບຂອງມະຫາວິທະຍາໄລແຫ່ງຊາດລາວ, ມີບັນດາຄູ ອາຈານ, ນັກຄົ້ນຄວ້າ, ວິທະຍາກອນ ແລະ ແຂກຖືກເຊີນມາຈາກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະພາບັນດິດວິທະຍາສາດສັງຄົມຫວຽດນາມ, ສະມາຄົມປັດຊະຍາຫວຽດນາມ, ມະຫາວິທະຍາໄລກວາງຊີ ແລະ ມະຫາວິທະຍາໄລຊານຕົງ ສປ. ຈີນ ເຂົ້າຮ່ວມຈຳນວນ 120 ທ່ານ.

ໃນພິທີ ທ່ານ ປອ. ກອງແກ້ວ ໄຊສົງຄາມ ໃຫ້ຮູ້ວ່າ: ພັກປະຊາຊົນປະຕິວັດລາວ ຍຶດໝັ້ນ ລັດທິມາກ-ເລນິນ, ແນວຄິດໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນພື້ນຖານແນວຄິດ, ທິດສະດີຂອງພັກ, ເປັນເຂັມຊີ້ທິດ ໃຫ້ການຈັດຕັ້ງ ແລະ ການ ເຄື່ອນໄຫວຂອງພັກ. ເປັນພັກກໍາອໍານາດ, ເປັນແກນນໍາໃນລະບົບການເມືອງ ຂອງລະບອບປະຊາທິປະໄຕປະຊາຊົນ, ນຳພາປະຊາຊົນບັນດາເຜົ່າ ປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ກໍ່ສ້າງລະ ບອບປະຊາທິປະໄຕປະຊາຊົນ ຕາມຈຸດໝາຍສັງຄົມນິຍົມ, ພັກປະຊາຊົນປະຕິວັດລາວ ກໍ່ສ້າງ ແລະ ປັບປຸງຕົນເອງ ຕາມ 5 ຫຼັກການ, 3 ທິດນໍາ

ແຕ່ເຖິງຢ່າງໃດກໍ່ຕາມ, ການປ່ຽນແປງໃໝ່ດັ່ງກ່າວ ຂອງພັກ ປະຊາຊົນ ປະຕິວັດ ລາວ ແມ່ນໄດ້ດຳເນີນ ບົນພື້ນຖານຫຼັກການ ຢືດໝັ້ນໃນລັດທິມາກ-ເລນິນ ແລະ ແນວທາງການກ້າວ ຂຶ້ນສູ່ສັງຄົມນິຍົມ ຢ່າງໝຽວແໜ້ນ. ເຊິ່ງເປັນອັນພົ້ນເດັ່ນ ແຕກຕ່າງ ກັບ ການປ່ຽນແປງໃໝ່ ຂອງລາຍປະເທດ ອະດີດສັງຄົມນິຍົມ ຢູ່ ທະວີບ ເອີລົບ.

ຜ່ານ ການຄົ້ນຄວ້າ ແລະ ໝູນໃຊ້ ທິດສະດີ ມາກ-ເລນິນ ເຂົ້າໃນພາລະກິດ ຕໍ່ສູ້ກູ້ຊາດ ກໍ່ຄື ໃນການປົກປັກຮັກສາ ແລະ ພັດທະນາປະເທດຊາດ ຂອງພັກປະຊາຊົນປະຕິວັດລາວ ສາມາດຖອດຖອນໄດ້ບາງບົດຮຽນ ໄດ້ຄື:

ໜື່ງ:ພັກປະຊາຊົນປະຕິວັດລາວ ເປັນຜູ້ນໍາພາໂດຍກົງ-ຮອບດ້ານ, ເດັດຂາດ ເປັນແກນກາງ ໃນລະບົບການເມືອງ ແລະ ການປົກຄອງ ຢູ່ ສປປ ລາວ ເພື່ອຮັບປະກັນ ການບູລະນະລະບອບປະຊາທິປະໄຕ ປະຊາຊົນຕາມເສັ້ນທາງກ້າວຂຶ້ນສັງຄົມນິຍົມ ຢູ່ ສປປ ລາວ; ສອງ: ຢືດໝັ້ນ ລັດທິມາກ-ເລນິນ ແລະ ແນວທາງ ກ້າວຂຶ້ນສູ່ສັງຄົມນິຍົມ ຢ່າງໜັກແໜ້ນ ໂດຍບໍ່ ຫວັ່ນໄຫວ ຄອນແຄນ ຕໍ່ສະພາບການປ່ຽນແປງໃດໆຂອງພາກພື້ນ, ຂອງໂລກ; ສາມ: ໝູນໃຊ້ ທິດສະດີມາກ-ເລນິນ ຢ່າງມີຫົວຄິດປະດິດສ້າງ, ແທດເໝາະກັບສະພາບການຕົວຈິງຂອງໂລກ ແລະ ສະພາບການພາຍໃນປະເທດ ແຕ່ລະໄລຍະ; ຫຼີກລ້ຽງ ການນຳໃຊ້ ທິດສະດີດັ່ງກ່າວ ແບບອັດຕະວິໄສ, ຄຳພີຕາຍຕົວ; ສີ່: ສຸມໃສ່ພັດທະນາກຳລັງການຜະລິດໃຫ້ເຕີບໃຫຍ່ຂະຫຍາຍຕົວຢ່າງແຂງແຮງ ແລະ ວ່ອງໄວ ເພື່ອຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນຢ່າງບໍ່ຢຸດຢັ້ງ ສ້າງປະຖົມປັດໃຈ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ ເທື່ອລະກ້າວ ດ້ວຍຫຼາຍຮູບການ, ຫຼາຍວິທີການ ແລະ ມາດຕາການ.

ສະຫຼຸບແລ້ວ ໃນຕະຫຼອດປະຫວັດສາດການເມືອງຂອງພັກການເມືອງ ທີ່ຍຶດຖືລັັດທິມາກ-ເລນິນ ຍາມໃດກໍ່ລ້ວນແຕ່ໄດ້ຍຶດໝັ້ນທິດສະດີວິທະຍາສາດເປັນທິດຊີ້ນຳ, ອີງໃສ່ຈຸດຢືນຂອງປະຊາຊົນເປັນພື້ນຖານ, ແລະ ໄດ້ຍຶດໝັ້ນທິດທາງພັດທະນາຂອງຕົນ ໃນຍຸກສະໄໝ. ບໍ່ວ່າຈະຢູ່ໃສ, ຄວາມມຸ່ງມາດປາດຖະໜາ ແລະ ພາລະກິດ ອັນສະເໝີຕົ້ນສະເໝີປາຍຂອງ ພັກການເມືອງ ທີ່ຍຶດຖືລັັດທິມາກ-ເລນິນ ກໍ່ແມ່ນການສະແຫວງຫາຄວາມຜາສຸກໃຫ້ແກ່ປະຊາຊົນ ແລະ ການພັດທະນາຂອງປະເທດນັ້ນໆ. ບົດຮຽນພຶດຕິກໍາຕົວຈິງ ແລະ ແນວຄິດທິດສະດີ, ທີ່ໄດ້ແບ່ງປັນຈາກນັກສຳມະນາກອນໃນຄັ້ງນີ້ ສະແດງໃຫ້ເຫັນຄວາມມີຊີວິດຊີວາ ໃນຄົ້ນຄວ້າບົດຮຽນການກຳອຳນາດຂອງພັກການເມືອງ ທີ່ຍຶດຖືລັັດທິມາກ-ເລນິນ ແລະ ກໍ່ໄດ້ສ້າງຂົວມິດຕະພາບອັນໝັ້ນແກ່ນໃນການແລກປ່ຽນຢ່າງເລິກເຊິ່ງໃນເວທີວິຊາການສາກົນ. ການຊຸກຍູ້ການກໍ່ສ້າງປະຊາຄົມຮ່ວມຊາຕາກຳ ຂອງຈີນ, ລາວ ແລະ ຫວຽດນາມ ບໍ່ພຽງແຕ່ແມ່ນການນຳໃຊ້ແນວຄວາມຄິດຂອງ ລັດທິມາກ-ເລນິນ ໃນຄວາມເວົ້າທີ່ວ່າ “ຄອບຄົວດຽວກັນໃນໂລກນີ້” ເທົ່ານັ້ນ, ແຕ່ຍັງເປັນທາງເລືອກທີ່ແນ່ນອນຂອງຜົນປະໂຫຍດລວມຂອງປະຊາຊົນບັນດາປະເທດ.