ຂ່າວການເຄື່ອນໄຫວ – ໜ້າ 13 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ກອງປະຊຸມລະດົມຄວາມຄິດເຫັນຮ່ວມກັບພາກທຸລະກິດ ກ່ຽວກັບບັນຫາລາຄາສິນຄ້າ ແລະ ອັດຕາແລກປ່ຽນ

ຈໍານວນຜູ້ເຂົ້າຊົມ: 935

ກອງປະຊຸມລະດົມຄວາມຄິດເຫັນຮ່ວມກັບພາກທຸລະກິດ ກ່ຽວກັບບັນຫາລາຄາສິນຄ້າ ແລະ ອັດຕາແລກປ່ຽນ

ຕອນເຊົ້າວັນທີ 2 ສິງຫາ 2024 ນີ້ ຄະນະສະເພາະກິດ ເພື່ອລົງເລິກຄົ້ນຄວ້າບັນຫາ ລາຄາສິນຄ້າ ແລະ ອັດຕາເງິນເຟີ້ທີ່ເພີ້ມຂຶ້ນສູງ ໄດ້ຈັດກອງປະຊຸມລະດົມຄວາມຄິດເຫັນຈາກພາກທຸລະກິດກ່ຽວກັບ ບັນຫາລາຄາ ສິນຄ້າ ແລະ ອັດຕາແລກປ່ຽນເງິນຕາຕ່າງປະເທດ ທີ່ເພີ່ມສູງຂຶ້ນ ຢູ່ຫ້ອງປະຊຸມຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທັງເປັນຫົວຫນ້າຄະນະສະເພາະກິດດັ່ງກ່າວ; ມີບັນດາທ່ານໃນຄະນະສະເພາະກິດ ແລະ ການນໍາຂອງສະຖາບັນຄົ້ນຄວ້າ, ຂະແຫນງການ, ຜູ້ຕາງໜ້າຂອງສະມາຄົມທຸລະກິດ, ນັກທຸລະກິດ ແລະ ແຂກຮັບເຊີນເຂົ້າຮ່ວມ.

ກອງປະຊຸມ ທ່ານ ປອ. ກອງແກ້ວ ໄຊສົງຄາມ ກ່າວວ່າ: ສປປ ລາວ ຂອງພວກເຮົາກໍາລັງປະເຊີນກັບບັນຫາ ຂາດສະຖຽນລະພາບທາງດ້ານເສດຖະກິດມະຫາພາກ ໂດຍສະເພາະການເພີ່ມຂຶ້ນຂອງລາຄາສິນຄ້າ ຫຼື ອັດຕາແລກປ່ຽນເງິນຕາບໍ່ຄົງທີ (ເງິນເຟີ້)ສະພາບເງິນກີບ ຍັງສືບຕໍ່ອ່ອນຄ່າ ເຮັດໃຫ້ຄ່າຄອງຊີບສູງຂຶ້ນ ສົ່ງຜົນກະທົບໂດຍກົງຕໍ່ຊີວິດການເປັນຢູ່ ຂອງພະນັກງານ, ທະຫານ, ຕໍ່າຫຼວດ ແລະ ປະຊາຊົນລາວບັນດາເຜົ່າ, ລວມທັງ ພາກທຸລະກິດ ແລະ ພາກລັດ ຢ່າງ ຫລີກລ້ຽງບໍ່ໄດ້. ສະພາບບັນຫາອັດຕາເງິນເຟີ້ ແລະ ອັດຕາແລກປ່ຽນ ຢູ່ສປປ ລາວ ເພີ່ມຂຶ້ນຢ່າງຕໍ່ເນື່ອງ. ນັບແຕ່ຕົ້ນ ປີ 2022 ຈົນມາຮອດປັດຈຸບັນ ກໍ່ຍັງເຫັນວ່າ ບໍ່ທັນມີຖ່ວງທ່າ ທີ່ຈະສະຫງົບ ແລະ ຫຼຸດລົງ, ເຖິງແມ່ນວ່າ ໃນໄລຍະຜ່ານມາ,ພັກ- ລັດຖະບານ ກໍ່ຄືພາກສ່ວນກ່ຽວຂ້ອງ ໄດ້ມີຄວາມພະຍາຍາມນໍາໃຊ້ຫຼາຍມາດຕະການແກ້ໄຂ ແຕ່ ຍັງບໍ່ສາມາດແກ້ໄຂໄດ້ ຢ່າງຂາດຕົວ. ສືບເນື່ອງມາຈາກຫຼາຍປັດໄຈ ທີ່ເປັນສິ່ງທ້າທາຍ ແລະ ຂໍ້ຈໍາກັດ ທີ່ຕິດພັນກັບບັນຫາໂຄງສ້າງພື້ນຖານ ຂອງເສດຖະກິດລາວ ເຊັ່ນ: ການຜະລິດ ພາຍໃນ ຍັງບໍ່ເຂັ້ມແຂງ ແລະ ບໍ່ຫຼາກຫຼາຍເທົ່າທີ່ຄວນ ຍັງອາໄສແຕ່ການນໍາເຂົ້າສິນຄ້າເປັນສ່ວນໃຫຍ່, ເຮັດໃຫ້ ລາວ ເຮົາຂາດດຸນການຄ້າຢ່າງຕໍ່ເນື່ອງ ສົ່ງຜົນກະທົບໂດຍກົງ ຕໍ່ຄັງສໍາຮອງເງິນຕາຕ່າງປະເທດ ຢູ່ໃນລະດັບບໍ່ພຽງພໍ ກັບຄວາມຕ້ອງການຊໍາລະຕ່າງປະເທດ. ອີກຢ່າງ, ການນໍາໃຊ້ເຄື່ອງມືທາງນະໂຍບາຍການເງິນ ແລະ ເງິນຕາ ໃນການດັດສົມບັນຫາເງິນເຟີ້ ແລະ ອັດຕາແລກປ່ຽນ ຍັງມີຂໍ້ຈໍາກັດຫຼາຍ. ພວກເຮົາຕົກຢູ່ໃນສະພາບຂາດດູນທາງດ້ານງົບປະມານ ຕໍ່ເນື່ອງ ເຮັດໃຫ້ເກີດມີໜີ້ສິນສະສົມ ນັບມື້ນັບເພີ່ມສູງຂຶ້ນ. ນອກນີ້, ລາວເຮົາ ກໍ່ເປັນປະເທດທີ່ນໍາໃຊ້ ຫຼາຍສະກຸນເງິນຕາ ເຂົ້າໃນການຊໍາລະສະສາງ ທັງຢູ່ພາຍໃນ ແລະ ຕ່າງປະເທດ ເຊັ່ນ: ໂດລາ, ບາດ ແລະ ຢວນ ກວມຫຼາຍກວ່າ ເຄິ່ງຫນຶ່ງຂອງປະລິມານເງິນທັງຫມົດ ໃນລະບົບເສດຖະກິດ, ເຮັດໃຫ້ການນໍາໃຊ້ເຄື່ອງມືດ້ານນະໂຍບາຍເງິນຕາຂາດປະສິດທິຜົນ. ເພື່ອຊ່ວຍລົງເລີກຄົ້ນຄວ້າຢ່າງພາວະວິໄສ ແລະ ແທດເຫມາະກັບສະພາບຄວາມເປັນຈິງ, ກໍານົດມາດຕະການແກ້ໄຂບັນຫາອັດຕາເງິນເຟີ້ ແລະ ອັດຕາແລກປ່ຽນ, ລັດຖະບານ ໄດ້ແຕ່ງຕັ້ງຄະນະສະເພາະກິດ 83/ນຍ ປະກອບມີຫຼາຍພາກສ່ວນ ໂດຍມີຄະນະຮັບຜິດຊອບ ທີ່ມາຈາກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ກະຊວງແຜນການ ແລະ ການລົງທຶນ, ກະຊວງອຸດສາຫະກໍາ ແລະ ການຄ້າ, ກະຊວງກະສິກໍາ ແລະ ປ່າໄມ້, ທະນາຄານແຫ່ງ ສປປລາວ, ກະຊວງການເງິນ, ສະຖາບັນຄົ້ນຄວ້າຈາກຂະແຫນງການກ່ຽວຂ້ອງເຂົ້າ ຮ່ວມການຄົ້ນຄວ້າ ເພື່ອກໍານົດບັນດາມາດຕະການແກ້ໄຂ ທັງໄລຍະສັ້ນ, ໄລຍະກາງ ແລະ ໄລຍະຍາວ.

ກອງປະຊຸມຄັ້ງນີ້, ບັນດາພາກທຸລະກິດ ໄດ້ລົງເລີກ ສະເຫນີບັນຫາ ແລະ ປຶກສາຫາລື ແລກປ່ຽນຄໍາຄິດເຫັນ ກ່ຽວກັບ ການຫຼຸດຜ່ອນຕົ້ນທຶນການຜະລິດສິນຄ້າ ແລະ ບໍລິການ. ການປະຢັດເງິນຕາ ເພື່ອຫຼຸດຜ່ອນແຮງກົດດັນ ຕໍ່ຄ່າເງິນກີບ ແລະ ບັນຫາອື່ນໆ ປິ່ນອ້ອມບັນຫາລາຄາ ແລະ ອັດຕາແລກປ່ຽນເງິນຕາຕ່າງປະເທດ(ເງິນເຟີ້)ເພື່ອຈະໄດ້ສັງລວມເອົາບັນຫາທັງໝົດໃຫ້ແກ່ຄະນະສະເພາະກິດ ນໍາໄປລົງເລິກຄົ້ນຄວ້າຢ່າງຖີ່ຖ້ວນ ເພື່ອກໍານົດມາດຕະການແກ້ໄຂບັນຫາໄດ້ຢ່າງຖືກຕ້ອງ ແລະ ສອດຄ່ອງ ຕາມສະພາບຕົວຈິງໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ກອງປະຊຸມປະເມີນຜົນການຈັດຕັ້ງປະຕິບັດ ລັດຖະທຳມະນູນ ແຫ່ງ ສປປ ລາວ ສະບັບ ປີ 2015

ຈໍານວນຜູ້ເຂົ້າຊົມ: 837

ກອງປະຊຸມປະເມີນຜົນການຈັດຕັ້ງປະຕິບັດ ລັດຖະທຳມະນູນ ແຫ່ງ ສປປ ລາວ ສະບັບ ປີ 2015

ກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບ ປີ 2015 ທີ່ແຂວງໄຊສົມບູນ ໄດ້ໄຂຂຶ້ນໃນເວລາ 8.00 ນາທີ ຂອງວັນທີ 30 ກໍລະກົດ 2024 ທີ່ສະໂມສອນເມືອງອານຸວົງ ແຂວງໄຊສົມບູນ, ພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທັງເປັນຄະນະກຳມະການລະດັບຊາດ ປັບປຸງລັດຖະທຳມະນູນ, ຮອງຫົວໜ້າອະນຸກຳມະການເນື້ອໃນ. ກອງປະຊຸມໄດ້ຮັບກຽດເຂົ້າຮ່ວມ ຂອງທ່ານ ພອຍຄຳ ຮຸ່ງບຸນຍວງ, ເລຂາພັກແຂວງ ເຈົ້າແຂວງໄຊສົມບູນ, ມີທ່ານ ແດງ ປະທຸມທອງ, ຮອງເລຂາພັກແຂວງ, ປະ ທານຄະນະສະມາຊິກສະພາແຫ່ງຊາດປະຈຳແຂວງ, ປະທານສະພາປະຊາຊົນແຂວງ ພ້ອມດ້ວຍບັນດາທ່ານໃນຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ-ເຈົ້າເມືອງ, ອົງການຈັດຕັ້ງມະຫາຊົນ ແລະ ຜູ້ເຂົ້າຮ່ວມ 70 ກ່ວາທ່ານ. ຈຸດປະສົງຕົ້ນຕໍຂອງກອງປະຊຸມຄັ້ງນີ້, ແມ່ນເພື່ອສະຫຼຸບຕີລາຄາການຈັດຕັ້ງປະຕິບັດລັດຖະທຳມະນູນ ໃນໄລຍະ 9 ປີ ທີ່ຜ່ານມາ ຍົກໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນໃຫ້ແກ່ການຄົ້ນຄວ້າ, ປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດໃຫ້ປະກົດຜົນເປັນຈິງໄດ້.

ທ່ານ ປອ. ກອງແກ້ວ ໄຊສົງຄາມ ໄດ້ກ່າວຕໍ່ກອງປະຊຸມວ່າ: ລັດຖະທຳມະນູນ ສະບັບທໍາອິດຂອງ ສປປ ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນປີ 1991, ມາຮອດປັດຈຸບັນ ເປັນເວລາ 33 ປີ, ໃນໄລຍະຜ່ານມາ ກໍໄດ້ມີການປັບປຸງ 2 ຄັ້ງ ຄື: ການປັບປຸງປີ 2003 ແລະ ປີ 2015. ລັດຖະທໍາມະນູນ ສະບັບປີ 2015 ມາຮອດປັດຈຸບັນ ກໍ່ເປັນເວລາ 9 ປີ ເຊິ່ງໄດ້ເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ແກ່ການສ້າງ ແລະ ປັບປຸງບັນດາກົດໝາຍ ເພື່ອເປັນເຄື່ອງມືຂອງລັດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ສ້າງເງື່ອນໄຂພື້ນຖານ ໃຫ້ແກ່ການສ້າງລັດ ປະຊາທິປະໄຕ ປະຊາຊົນ ຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ. ໃນດ້ານອື່ນ, ເພື່ອຕອບສະໜອງກັບຄວາມຮຽກຮ້ອງຕ້ອງການ ໃນການຈັດຕັ້ງປະຕິບັດແນວທາງປ່ຽນແປງໃໝ່ຢ່າງຮອບດ້ານ ມີຫຼັກການຂອງພັກເຮົາ ໃນໄລຍະໃໝ່, ຄະນະບໍລິຫານງານສູນກາງພັກ ສະໄໝທີ XI ໄດ້ອອກມະຕິ ສະບັບເລກທີ 05/ຄບສພ, ລົງວັນທີ 5 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວ ທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ແລະ ກົມການເມືອງສູນກາງພັກ ກໍໄດ້ອອກມະຕິ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່. ອີກປະການໜຶ່ງ, ປັດຈຸບັນພັກເຮົາພວມຄົ້ນຄວ້າສ້າງໂຄງ ການການເມືອງຂອງພັກ ທີ່ຈະປະກາດໃຊ້ໃນຕໍ່ໜ້ານີ້. ສິ່ງດັ່ງກ່າວໄດ້ຮຽກຮ້ອງ ໃຫ້ລັດເຮົາຕ້ອງປັບປຸງລັດຖະທໍາມະ ນູນ ແຫ່ງ ສປປ ລາວ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດເຮົາ ໃນໄລຍະໃໝ່.

ໃນກອງປະຊຸມ ໄດ້ຮັບຟັງການຜ່ານບົດສະຫຼຸບປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ໂດຍທ່ານ ອິນທະປັນຍາ ຂຽວວົງພະຈັນ, ຮອງຫົວໜ້າຫ້ອງວ່າການປະທານປະເທດ, ທັງເປັນຄະນະກຳມະ ການລະດັບຊາດ ປັບປຸງລັດຖະທຳມະນູນ; ຈາກນັ້ນ ປະທານໄດ້ຕັ້ງຄຳຖາມເຈາະຈີ້ມ ເພື່ອໃຫ້ຄະນະຜູ້ແທນນຳໄປຄົ້ນ ຄ້ວາພິຈາລະນາ; ບັນດາຜູ້ເຂົ້າຮ່ວມ ທີ່ຕາງໜ້າຈາກພາກສ່ວນຕ່າງໆ ກໍ່ໄດ້ປະກອບຄຳເຫັນ ພ້ອມທັງສະເໜີບັນ ຫາຕ່າງໆ ຕໍ່ກັບການປັບປຸງເນື້ອໃນຂອງລັດຖະທຳມະນູນ. ມີການແລກປ່ຽນຄຳຄິດຄຳເຫັນຊຶ່ງກັນ ແລະກັນ. ທຸກຄຳຄິດເຫັນ ລ້ວນແລ້ວແຕ່ເປັນປະໂຫຍດໃຫ້ແກ່ຄະນະຮັບຜິດຊອບ ເພື່ອນຳໄປພິຈາລະນາຄົ້ນຄວ້າປັບປຸງເນື້ອໃນໃຫ້ມີຄວາມສົມບູນຫຼາຍຂຶ້ນກວ່າເກົ່າ. ກອງປະຊຸມດຳເນີນເປັນເວລາ 1 ວັນ ແລະ ອັດລົງດ້ວຍຜົນສຳເລັດອັນຈົບງາມ.

ຄະນະພັກ-ຄະນະນຳ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ວາງພວງມາລາ ຕໍ່ການເສຍຊີວິດຂອງ ເລຂາທິການໃຫຍ່ ພັກກອມມູນິດຫວຽດນາມ

ຈໍານວນຜູ້ເຂົ້າຊົມ: 783

ຄະນະພັກ-ຄະນະນຳ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ວາງພວງມາລາ ຕໍ່ການເສຍຊີວິດຂອງ ເລຂາທິການໃຫຍ່ ພັກກອມມູນິດຫວຽດນາມ

ໃນຕອນບ່າຍຂອງວັນທີ 25 ກໍລະກົດ 2024 ນີ້, ຢູ່ສະຖານທູດ ສສ. ຫວຽດນາມ ປະຈຳ ສປປ ລາວ ຄະນະພັກ-ຄະນະນຳ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນຳໂດຍ ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ພ້ອມດ້ວຍຄະນະ ໄດ້ເຂົ້າວາງພວງມາລາ ຕໍ່ການເສຍຊີວິດຂອງ ສະຫາຍ ຫງວຽນ ຝູ່ ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດຫວຽດນາມ

ໃນພິທີ ສະຫາຍ ກອງແກ້ວ ໄຊສົງຄາມ ໄດ້ຂຽນຄຳໄວ້ອາໄລ ໂດຍມີເນື້້ອໃນສັງລວມ ດັ່ງນີ້: ຄະນະພັກ-ຄະນະນຳ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະແດງຄວາມໂສກເສົ້າສະຫຼົດໃຈຕໍ່ການຈາກໄປ ໂດຍບໍໍ່ມີວັນກັບຄືນມາຂອງສະຫາຍ ຫງວຽນ ຝູ່ ຈ້ອງ ອະດີດເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດ ນາມ ເປັນຜູ້ນໍາປະຕິວັດ ທີ່ອົງອາດກ້າແກ່ນ, ເຊິ່ງຕະຫຼອດຊີວິດ ແຫ່ງການ ເຄື່ອນໄຫວປະຕິວັດ ສະຫາຍ ໄດ້ອຸທິດຊີວິດ, ເຫື່ອແຮງ ແລະ ສະຕິປັນຍາເຂົ້າໃນພາລະກິດປົດປ່ອຍຊາດ, ທ້ອນໂຮມປະເທດຊາດເປັນເອກະພາບ ແລະ ພາລະກິດປ່ຽນ ແປງໃໝ່ຂອງພັກກອມມູນິດຫວຽດນາມ. ໂດຍສະເພາະແມ່ນວຽກງານປັບປຸງກໍ່ສ້າງພັກໃຫ້ເຂັ້ມແຂງ, ປອດໃສ ກໍ່ຄືວຽກງານປ້ອງກັນ, ຕ້ານການສໍ້ລາດບັງຫຼວງ ແລະ ຕ້ານປະກົດການຫຍໍ້ທໍ້ຕ່າງໆ. ສະຫາຍໄດ້ກາຍເປັນວິລະບູລຸດຜູ້ທີ່ໂດດເດັ່ນໃນຍຸກໃໝ່, ເປັນຜູ້ນໍາທີ່ແສນເຄົາລົບຮັກຂອງທົ່ວປວງຊົນຫວຽດນາມ, ເປັນຜູ້ສືບທອດພາລະກິດຂອງ ປະ ທານ ໂຮ່ຈີມິນ ທີ່ໄດ້ປະກອບສ່ວນອັນໃຫຍ່ຫຼວງ, ລໍ້າຄ່າ ແລະ ສໍາຄັນເຂົ້າໃນການເພີ່ມພູນຄູນສ້າງ ສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາ ຊົນສອງຊາດ ລາວ-ຫວຽດນາມ ຫວຽດນາມ-ລາວ ມາໂດຍຕະຫຼອດ.

ພວກຂ້າພະເຈົ້າຮັບຮູ້ເຖິງຄຸນງາມຄວາມດີອັນໃຫຍ່ຫຼວງຂອງສະຫາຍທີ່ມີຕໍ່ພັກ, ລັດ ແລະ ປະຊາຊົນລາວບັນ ດາເຜົ່າ ແລະ ຂໍຈົດຈໍາຄຸນງາມຄວາມດີຂອງສະຫາຍໄວ້ໃນດວງໃຈຕະຫຼອດໄປ. ສະແດງຄວາມອາໄລຮັກຢ່າງສຸດຊຶ້ງ ເຖິງສະຫາຍ ຫງວຽນ ຝູ໋ ຈ້ອງ ແລະ ຂໍໃຫ້ດວງວິຍານຂອງເພີ່ນ ຈົ່ງໄປສູ່ສຸຄະຕິ ດ້ວຍເທີ້ນ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສະຫະພັນແມ່ຍິງ ສວສສຊ ຈັດສໍາມະນາພາຍໃຕ້ຫົວຂໍ້: ”ສິ່ງກີດຂວາງທາງດ້ານຮີດຄອງປະເພນີ ຕໍ່ການພັດທະນາແມ່ຍິງລາວ”

ຈໍານວນຜູ້ເຂົ້າຊົມ: 686

ສະຫະພັນແມ່ຍິງ ສວສສຊ ຈັດສໍາມະນາພາຍໃຕ້ຫົວຂໍ້: ”ສິ່ງກີດຂວາງທາງດ້ານຮີດຄອງປະເພນີ ຕໍ່ການພັດທະນາແມ່ຍິງລາວ”

ຕອນບ່າຍວັນທີ 24 ມິຖຸນາ 2024 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະຫະພັນແມ່ຍິງ ສວສສຊ ໄດ້ຈັດກອງປະຊຸມສໍາມະນາພາຍໃຕ້ຫົວຂໍ້: ”ສິ່ງກີດຂວາງທາງດ້ານຮີດຄອງປະເພນີ ຕໍ່ການພັດທະນາແມ່ຍິງລາວ” ໂດຍການເປັນປະທານຮ່ວມຂອງ ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ; ມີສະຫາຍ ນາງ ລັດດາວັນ ຊົງວິໄລ ຮັກສາການປະທານສະຫະພັນແມ່ຍິງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຂຶ້ນເປັນປະທານຮ່ວມ; ມີບັນດາເລຂາ, ຮັກສາການເລຂາ ແລະ ຜູ້ຕາງໜ້າ ໜ່ວຍພັກຂອງຫ້ອງການ, ສະຖາບັນຄົ້ນຄວ້າ, ສູນ, ສະຫະພັນແມ່ຍິງຮາກຖານອ້ອມຂ້າງ, ພ້ອມດ້ວຍສະມາຊິກແມ່ຍິງທົ່ວ ສວສສຊ ເຂົ້າຮ່ວມຢ່າງພ້ອມພຽງ.

ສະຫາຍ ນາງ ລັດດາວັນ ຊົງວິໄລ ໄດ້ກ່າວເປີດກອງປະຊຸມວ່າ: ການຈັດກອງປະຊຸມຄັ້ງນີ້ ແມ່ນເພື່ອສະ ເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ (20 ກໍລະກົດ 1955 – 20 ກໍລະກົດ 2024) ພາຍໃຕ້ຫົວຂໍ້: ”ສິ່ງກີດຂວາງທາງດ້ານຮີດຄອງປະເພນີຕໍ່ການພັດທະນາແມ່ຍິງລາວ” ຕະຫຼອດໄລຍະຜ່ານມາ ພັກ ແລະ ລັດ ກໍຄືສູນກາງສະຫະພັນແມ່ຍິງລາວ ໄດ້ມີຄວາມພະຍາຍາມຊຸກຍູ້ສົ່ງເສີມຄວາມອາດສາມາດ ແລະ ຍົກສູງບົດບາດຂອງແມ່ຍິງລາວ ໃຫ້ໄດ້ຮັບໂອກາດໃນການພັດທະນາ; ເຊັ່ນດຽວກັບເອື້ອຍນ້ອງແມ່ຍິງ ສະຖາບັນວິທະຍາ ສາດເສດຖະກິດ ແລະ ສັງຄົມແຫ່ງຊາດຂອງພວກເຮົາ, ຄະນະພັກ-ຄະນະນໍາ ກໍໄດ້ກໍານົດຍຸດທະສາດການພັດທະ ນາຊັບພະຍາກອນມະນຸດຂອງ ສວສສຊ ຮອດປີ 2025 ແລະ ວິໄສທັດຮອດປີ 2030; ໂດຍໄດ້ລະບຸໃວ້ໃນວຽກຈຸດສຸມທີ 2 ວ່າດ້ວຍການຊຸກຍູ້ສົ່ງເສີມຄວາມສະເໝີພາບບົດບາດຍິງ-ຊາຍ; ພ້ອມທັງຖືໂອກາດນີ້ຊຸກຍູ້ສົ່ງເສີມໃຫ້ເອື້ອຍນ້ອງແມ່ຍິງພາຍໃນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີໂອກາດພັດທະນາຕົນເອງ ໂດຍການຂຶ້ນນໍາສະເໜີບົດໃນຫົວຂໍ້ກ່ຽວກັບຄວາມເຂົ້າໃຈຂອງບົດບາດຍິງ-ຊາຍ; ບົດບາດຂອງແມ່ຍິງໃນຄອບ ຄົວ ແລະ ສະພາບຄວາມເປັນຈິງຂອງແມ່ຍິງໃນທົ່ວໂລກປັດຈຸບັນ ແລະ ການຍົກຖານະບົດບາດຂອງແມ່ຍິງໃນການພັດທະນາ;

ໃນກອງປະຊຸມ ຍັງໄດ້ຮັບຟັງຄໍາເຫັນໂອ້ລົມຂອງ ສະຫາຍ ປອ. ກິແກ້ວ ຈັນທະບູຣີ ຕໍ່ເອື້ອຍນ້ອງແມ່ຍິງວ່າ: ຂ້າພະເຈົ້າຮູ້ສຶກເປັນກຽດ ແລະ ອົບອຸ່ນທີ່ໄດ້ຂຶ້ນເປັນປະທານກອງປະຊຸມໃນຄັ້ງນີ້, ຜ່ານການນໍາສະເໜີບົດ ເຫັນວ່າ ບັນດາເອື້ອຍນ້ອງແມ່ຍິງ ຕະຫຼອດເຖິງອ້າຍນ້ອງຊາຍທີ່ເຂົ້າຮ່ວມ ຕ່າງກໍພ້ອມພຽງກັນມີຄໍາເຫັນແລກປ່ຽນສົນທະນາຢ່າງເປັນຂະບວນຟົດຟື້ນ; ເອື້ອຍນ້ອງແມ່ຍິງມີຄວາມກ້າສະແດງອອກຫຼາຍຂຶ້ນ, ມີການພັດທະນາຫຼາຍດ້ານ, ກ້າສະແດງຄວາມຄິດເຫັນໃນທາງສ້າງສັນ ແລະ ບັນດາບົດທີ່ຂຶ້ນນໍາສະເໜີກໍ່ມີຄວາມສໍາຄັນ ຈົ່ງສືບຕໍ່ນໍາໄປຈັດຕັ້ງຜັນຂະຫຍາຍ ເພື່ອໃຫ້ເກີດຜົນປະໂຫຍດອັນສູງສຸດ ແລະ ເນັ້ນໜັກຕໍ່ຜູ້ເຂົ້າຮ່ວມໃຫ້ເອົາໃຈໃສ່ບາງບັນຫາດັ່ງນີ້:

ໜຶ່ງ, ໃຫ້ມີຄວາມສາມັກຄີປອງດອງຮັກແພງຊ່ວຍເຫຼືອເຊິ່ງກັນແລະກັນ, ຍົກສູງກ່ຽວກັບບົດບາດຄວາມສໍາຄັນຂອງແມ່ຍິງ ແລະ ເພີ່ມທະວີຄວາມເປັນເຈົ້າການ ຄຽງບ່າຄຽງໄຫຼ່ກັບເພດຊາຍ, ສຸມໃສ່ວຽກງານຄົ້ນຄວ້າຂອງ ສວສສຊ ໃຫ້ມີຜົນສໍາເລັດເປັນກ້າວໆ.

ສອງ, ເອື້ອຍນ້ອງແມ່ຍິງມີຄວາມຮອບຄອບ, ມີຄວາມລະອຽດອ່ອນ ແລະ ພິຖີພິຖັນ ໃຫ້ນໍາໃຊ້ທ່າແຮງຂອງຕົນ ຜັນຂະຫຍາຍເຂົ້າໃນວຽກງານຄົ້ນຄວ້າໃຫ້ລະອຽດເລິກເຊິ່ງຕື່ມອີກ.

ສາມ, ໃຫ້ຖືສໍາຄັນຕໍ່ວຽກງານແມ່ຍິງ 3 ດີ ແລະ ໃຫ້ກະກຽມເຂົ້າສູ່ຂະບວນການລວມຂອງ ສວສສຊ ໃນການເປີດກອງປະຊຸມໃຫຍ່ຄັ້ງທີ II ຂອງສະຖາບັນວິທະຍາດເສດຖະກິດ ແລະ ສັງຄົມແຫ່ງຊາດ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ເຜີຍແຜ່ວຽກງານກອງທຶນພັດທະນາວິທະຍາສາດ ແລະ ເຕັກໂນໂລຊີ

ຈໍານວນຜູ້ເຂົ້າຊົມ: 695

ເຜີຍແຜ່ວຽກງານກອງທຶນພັດທະນາວິທະຍາສາດ ແລະ ເຕັກໂນໂລຊີ

ໃນຕອນເຊົ້າຂອງວັນທີ 23 ກໍລະກົດ 2024, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ກ່ຽວກັບວຽກງານກອງທຶນພັດທະນາວິທະຍາສາດ ແລະ ເຕັກໂນໂລຊີ ໃຫ້ແກ່ບັນດາສະຖາບັນຄົ້ນຄວ້າພາຍໃນ ສວສສຊ; ໂດຍການເປັນປະທານຂອງ ທ່ານ ປອ. ນາງ ຂັນລາສີ ແກ້ວບຸນພັນ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ມີບັນດາຫົວໜ້າ, ຮອງຫົວໜ້າຫ້ອງການ, ສະຖາບັນຄົ້ນຄວ້າ, ສູນ ພ້ອມດ້ວຍນັກຄົ້ນຄວ້າເຂົ້າຮ່ວມ ຈໍານວນ 46 ທ່ານ;

ໃນພິທີ ທ່ານ ປອ. ນາງ ຂັນລາສີ ແກ້ວບຸນພັນ ໄດ້ກ່າວຕໍ່ກອງປະຊຸມວ່າ: ວຽກງານການຄົ້ນຄ້ວາແມ່ນວຽກງານທີ່ສຳຄັນ ແລະ ການຊອກຫາແຫຼ່ງທຶນ ກໍເປັນອີກວຽກງານໜຶ່ງທີ່ມີຈຳເປັນໃນການຄົ້ນຄວ້າ ເພື່ອແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ສັງຄົມ ໂດຍສະເພາະແມ່ນບັນຫາອັດຕາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ. ສະນັ້ນ, ກອງປະຊຸມໃນມື້ນີ້ ຈຶ່ງຖືເປັນໂອກາດດີໃຫ້ທາງທີມງານນັກຄົ້ນຄວ້າຂອງພວກເຮົາ ໄດ້ຮຽນຮູ້ການເຂົ້າເຖິງກອງທຶນພັດທະນາວິທະຍາສາດ ແລະ ເຕັກໂນໂລຊີ ຜ່ານການສະເໜີ ແລະ ແນະນຳຂອງວິທະຍາກອນທີ່ມາຈາກກອງທຶນພັດທະນາວິທະຍາສາດ ແລະ ເຕັກໂນໂລຊີ ຂອງກະຊວງສຶກສາທິການ ແລະ ກິລາ ໂດຍສະເພາະຕໍ່ກັບຂະບວນການປະກອບເອກະສານໂຄງການ, ວິທີການຂຽນ, ຂັ້ນຕອນ ແລະ ເງື່ອນໄຂຕ່າງໆ ໃນການເຂົ້າເຖິງກອງທຶນພັດທະນາວິທະຍາສາດ ແລະ ເຕັກໂນໂລຊີ, ພ້ອມທັງຮຽກຮ້ອງມາຍັງບັນດາທ່ານທີ່ເຂົ້າຮ່ວມ ຈົ່ງຍົກສູງຄວາມເອົາໃຈໃສ່ໃນການຕິດຕາມຮັບຟັງຄໍາແນະນຳດັ່ງກ່າວ ເພື່ອນໍາໄປຈັດຕັ້ງຜັນຂະຫຍາຍໃຫ້ເກີດໝາກອອກຜົນຢ່າງມີປະສິດທິພາບ ແລະ ປະສິດທິຜົນສູງ.

ໃນວາລະກອງປະຊຸມ ທ່ານ ນາງ ແກ້ວໄພວັນ ດວງສະຫວັນ ຫົວໜ້າຫ້ອງການສະພາວິທະຍາສາດແຫ່ງຊາດ ໄດ້ຂຶ້ນນໍາສະເໜີ ຄວາມຮູ້ກ່ຽວກັບວຽກງານກອງທຶນພັດທະນາວິທະຍາສາດ ແລະ ເຕັກໂນໂລຊີ ແລະ ບັນດາຫົວຂໍ້ອື່ນໆຈາກທີມງານກອງທຶນພັດທະນາວິທະຍາສາດ ແລະ ເຕັກໂນໂລຊີ ຂອງກະຊວງສຶກສາທິການ ແລະ ກິລາ ເຊັ່ນ: ການກຳນົດຈຸດສຸມຫົວຂໍ້ຄົ້ນຄ້ວາວິທະຍາສາດ; ການກວດກາ-ຕິດຕາມປະເມີນຜົນ ແລະ ການຈັດການ ແລະ ຄຸ້ມຄອງຫົວຂໍ້ຄົ້ນຄ້ວາ ເຊິ່ງລ້ວນແລ້ວແຕ່ເປັນຫົວຂໍ້ທີ່ສໍາຄັນ ແລະ ເປັນປະໂຫຍດຕໍ່ບັນດານັກຄົ້ນຄວ້າ ເຮັດໃຫ້ບັນດາຜູ້ເຂົ້າຮ່ວມຕ່າງກໍ່ໃຫ້ຄວາມສົນໃຈ ແລະ ມີການແລກປ່ຽນສົນທະນາປະກອບຄໍາຄິດເຫັນຢ່າງມີເນື້ອໃນ.

ຂຽນຂ່າວ: ພວງເພັດ ຈັນທະລີວົງ

ຖ່າຍພາບ: ມຸນິນ ພົນສັກດາ

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຜັນຂະຫຍາຍເນື້ອໃນຈິດໃຈ ວຽກງານກວດກາທົ່ວປະເທດ ປະຈຳປີ 2023

ຈໍານວນຜູ້ເຂົ້າຊົມ: 742

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຜັນຂະຫຍາຍເນື້ອໃນຈິດໃຈ ວຽກງານກວດກາທົ່ວປະເທດ ປະຈຳປີ 2023

ໃນຕອນເຊົ້າ ວັນທີ 11 ກໍລະກົດ 2024 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ເອກະສານຈັດຕັ້ງຜັນຂະຫຍາຍເນື້ອໃນຈິດໃຈວຽກງານກວດກາທົ່ວປະເທດປະຈໍາປີ 2023 ຂຶ້ນຢ່າງເປັນທາງການ ຢູ່ທີ່ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ພາຍໃຕ້ການເປັນປະທານຂອງ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີຄະນະພັກ-ຄະນະນໍາ, ຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານຂັ້ນພະແນກເຂົ້າຮ່ວມ ຈໍານວນ 80 ທ່ານ, ຍິງ 32 ທ່ານ;

ໃນໂອກາດດັ່ງກ່າວ ທ່ານ ປອ. ກິແກ້ວ ຈັນທະບູຣີ ໄດ້ກ່າວຕໍ່ກອງປະຊຸມບາງຕອນວ່າ: ການຈັດຕັ້ງຜັນຂະຫຍາຍເນື້ອໃນຈິດໃຈວຽກງານກວດກາທົ່ວປະເທດປີ 2023 ໃນຄັ້ງນີ້ຈະໄດ້ຮັບຟັງການສະຫຼຸບ ຕີລາຄາຄືນດ້ານດີ, ດ້ານອ່ອນ, ຂໍ້ຄົງຄ້າງ ແລະ ສະຫຼຸບແຕ່ລະບັນຫາໃນການຈັດຕັ້ງປະຕິບັດວຽກງານຕິດຕາມ-ກວດກາ ໃນ 1 ປີຜ່ານມາ ໂດຍຖືເອົາບັນດາຄາດໝາຍ ທີ່ກອງປະຊຸມວຽກງານກວດກາທົ່ວປະເທດປະຈໍາປີ 2022 ໄດ້ວາງອອກເປັນບ່ອນອີງຕົ້ນຕໍ ແລະ ເປົ້າໝາຍຂອງກອງປະຊຸມໃນຄັ້ງນີ້ ກໍ່ເພື່ອສ້າງຄວາມເຂົ້າໃຈໃຫ້ເລິກເຊິ່ງ, ເຖິງຖອງ ສອດຄ່ອງກັບຄວາມເປັນຈິງ ກ່ຽວກັບວຽກງານກວດກາ; ມີຄວາມເອກະພາບສູງຕໍ່ຜົນສຳເລັດທີ່ຍາດມາໄດ້ ພ້ອມກັນຄົ້ນຄວ້າຊອກຫາສາເຫດ ແລະ ບົດຮຽນຕົວຈິງທີ່ຕ້ອງແກ້ໄຂ; ແນໃສ່ສະກັດກັ້ນ ແລະ ຕ້ານການສໍ້ລາດບັງຫຼວງ, ແກ້ໄຂຄໍາຮ້ອງ-ຄໍາສະເໜີ ແລະ ປັບປຸງກົງຈັກ, ບໍາລຸງກໍ່ສ້າງພະນັກງານກວດກາຢູ່ສູນກາງ ແລະ ທ້ອງຖິ່ນໃຫ້ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີການຫັນປ່ຽນດີຂຶ້ນກວ່າເກົ່າ ຊຶ່ງເປັນໄລຍະແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ; ສະນັ້ນ ໃຫ້ພ້ອມກັນຄົ້ນຄວ້າປະກອບຄວາມຄິດຄວາມເຫັນໃຫ້ເລິກເຊິ່ງ ແລະ ເອກະພາບຕໍ່ທິດທາງ, ຫນ້າທີ່ ແລະ ບັນດາວຽກທີ່ຈະຕ້ອງສຸມໃສ່ຈັດຕັ້ງປະຕິບັດໃນປີ 2024; ພ້ອມກັນເປັນເຈົ້າການນໍາເອົາເນື້ອໃນຈິດໃຈຂອງກອງປະຊຸມໃນມື້ນີ້ ໄປເຜີຍແຜ່ຕໍ່ພາກສ່ວນຂອງຕົນຮັບຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ; ພິເສດບັນດາສະຫາຍ ທີ່ຮັບຜິດຊອບວຽກງານກວດກາ ຕ້ອງຄົ້ນຄວ້າກຳແໜ້ນ ແລະ ຫັນເປັນແຜນເຄື່ອນໄຫວລະອຽດໃນແຕ່ລະດ້ານ ເພື່ອເປັນບ່ອນອີງໃນການນໍາພາຈັດຕັ້ງປະຕິບັດ.

ໃນວາລະກອງປະຊຸມ ສືບຕໍ່ໂດຍ ທ່ານ ເພັດໃສ ເພຍເທບ, ກໍາມະການຄະນະພັກ, ຫົວໜ້າຫ້ອງການ ສວສສຊ ຂຶ້ນຜ່ານບົດສະຫຼຸບ-ຕີລາຄາ ການເຄື່ອນໄຫວວຽກງານກວດກາທົ່ວປະເທດ ປີ 2023 ແລະ ທິດທາງແຜນການ ປີ 2024 ສະບັບເລກທີ 147/ຄກສພ, ລົງວັນທີ 14 ມີນາ 2024 ໂດຍເນື້ອໃນບາງຕອນໄດ້ຍົກໃຫ້ເຫັນຄວາມສຳຄັນຂອງວຽກງານກວດກາ ເພື່ອສ້າງຄວາມຮັບຮູ້ເຂົ້າໃຈຂອງຖັນແຖວສະມາຊິກພັກ, ພະນັກງານ-ລັດຖະກອນ ຕໍ່ບົດບາດຂອງວຽກງານກວດກາ. ຜ່ານການເຄື່ອນໄຫວກວດກາຕົວຈິງເຫັນໄດ້ວ່າ ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້, ເຂົ້າໃຈຢ່າງຖືກຕ້ອງຕໍ່ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ສະແດງອອກມີສະຕິຕໍ່ການຈັດຕັ້ງ, ເຄົາລົບລະບຽບຂອງພັກ ແລະ ກົດໝາຍຂອງລັດຢ່າງເຂັ້ມງວດ, ມີຄວາມຕື່ນຕົວ ແລະ ໃຫ້ການຮ່ວມມືເປັນຢ່າງດີຕໍ່ວຽກງານກວດກາ; ພ້ອມດຽວກັນນັ້ນ ທ່ານ ຄຳສຸກ ອອຍຍະວົງ, ກໍາມະການຄະນະພັກ, ຫົວໜ້າກົມຈັດຕັ້ງ-ພະນັກງານ, ຄະນະກວດກາສູນກາງພັກ ໄດ້ຂຶ້ນເຜີຍແຜ່ເອກະສານຄຳແນະນຳ ຂອງຄະນະກວດກາສູນກາງພັກ ເລກທີ 379/ຄກສພ, ລົງວັນທີ 07 ພະຈິກ 2023 ກ່ຽວກັບການປັບປຸງການຈັດ ຕັ້ງຄະນະກວດກາພັກ ແລະ ອົງການກວດກາແຕ່ລະຂັ້ນ ແລະ ເອກະສານຄຳແນະນຳ ຂອງອົງການກວດກາແຫ່ງລັດ ເລກທີ 311/ອກຫລ, ລົງວັນທີ 03 ຕຸລາ 2023 ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການກວດກາລັດ (ສະບັບປັບປຸງ).

ຂຽນຂ່າວ ແລະ ຖ່າຍພາບ: ມຸນນິນ ພົນສັກດາ

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຕ້ອນຮັບການເຂົ້າຢ້ຽມອໍາລາຂອງຜູ້ຕາງໜ້າອົງການອຸຍນີເຊັບປະຈໍາລາວ

ຈໍານວນຜູ້ເຂົ້າຊົມ: 788

ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຕ້ອນຮັບການເຂົ້າຢ້ຽມອໍາລາຂອງຜູ້ຕາງໜ້າອົງການອຸຍນີເຊັບປະຈໍາລາວ

ໃນຕອນເຊົ້າ ຂອງວັນທີ 9 ກໍລະກົດ 2024, ທີ່ຫ້ອງຮັບແຂກ ສວສສຊ, ທ່ານ ປອ ກິແກ້ວ ຈັນທະບູຣີ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການເຂົ້າຢ້ຽມອໍາລາ ຂອງທ່ານ ນາງ ເພຍ ເຣເບນໂລ ບຣິດໂຕ ໃນນາມເປັນຜູ້ຕາງໜ້າຫ້ອງການອົງການອຸຍນີເຊັບ (UNICEF Representative) ປະຈຳລາວ ສປປ ລາວ.

ໃນໂອກາດນີ້, ທ່ານ ປອ ກິແກ້ວ ຈັນທະບູຣີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ທ່ານນາງ ເພຍ ເຣເບນໂລ ບຣິດໂຕ ທີ່ປະສົບຜົນສຳເລັດໃນການປະຕິບັດໜ້າທີ່ວຽກງານ ຂອງອົງການອຸຍນີເຊັບ ປະຈຳ ລາວ ແລະ ເຄີຍໃຫ້ການສະໜັບສະໜູນ ແລະ ຮ່ວມມືກັບສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຕະຫຼອດໄລຍະຜ່ານມາ; ທ່ານ ນາງ ເພຍ ເຣເບນໂລ ບຣິດໂຕ ກໍ່ໄດ້ສະແດງຄວາມຂອບໃຈ ຕໍ່ທ່ານ ປອ ກິແກ້ວ ຈັນທະບູຣີ ພ້ອມທັງຄະນະ ທີ່ໃຫ້ການຕ້ອນຮັບຢ່າງອົບອຸ່ນ ແລະ ການສະໜັບສະໜູນວຽກງານຂອງອົງການອຸຍນີເຊັບ ໂດຍສະເພາະໂຄງການສ້າງຖານຂໍ້ມູນແຫ່ງຊາດ ດ້ານໂພຊະນາການ NIPN ເຊິ່ງໄດ້ມີການຄົ້ນຄວ້າ, ວິເຄາະວິໄຈ ແລະ ການເຜີຍແຜ່ຂໍ້ມູນຂ່າວສານທີ່ຕິດພັນກັບວຽກງານດ້ານໂພຊະນາການ ຢ່າງມີຜົນສໍາເລັດຫຼາຍດ້ານ ແລະ ໄດ້ມອບເຄື່ອງທີ່ລະນຶກເພື່ອສະແດງຄວາມຮູ້ບຸນຄຸນ ພ້ອມທັງກ່າວຄໍາອວຍພອນໃຫ້ ທ່ານ ປອ. ກິແກ້ວ ຈັນທະບູຣີ ພ້ອມດ້ວຍຄະນະ ຈົ່ງປະສົບຜົນສໍາເລັດໃນໜ້າທີ່ວຽກງານໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ພຸດຈິນດາ ພົມປັນຍາ

ພິທີປະກາດເລື່ອນຕຳແໜ່ງຂັ້ນກົມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 975

ພິທີປະກາດເລື່ອນຕໍາແໜ່ງຂັ້ນກົມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ໃນຕອນເຊົ້າຂອງວັນທີ 08 ກໍລະກົດ 2024 ທີ່ ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປະກາດການຈັດຕັ້ງຂຶ້ນພາຍໃຕ້ການເປັນປະທານຂອງ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ມີ ຄະນະພັກ-ຄະນະນໍາ, ຫ້ອງການ, ກົມ, ສະຖາບັນຄົ້ນຄວ້າ ແລະ ສູນ ພ້ອມດ້ວຍພະນັກງານເຂົ້າຮ່ວມ ຈໍານວນ 80 ທ່ານ, ຍີງ 34 ທ່ານ;

ໃນພິທີ ທ່ານ ບຸນລັດ ແກ້ວອາສາ, ກໍາມະການພັກ, ຫົວໜ້າກົມຈັດຕັ້ງ ແລະ ພະນັກງານ, ໄດ້ຂຶ້ນຜ່ານຂໍ້ຕົກລົງຂອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ວ່າດ້ວຍການແຕ່ງຕັ້ງຮອງຫົວໜ້າກົມ ເຊິ່ງມີທັງໝົດຈໍານວນ 07 ທ່ານຄື: ແຕ່ງຕັ້ງ ທ່ານ. ອາກຸ້ຍ ລໍວັນໄຊ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າຫ້ອງການ ສວສສຊ; ທ່ານ ປອ. ວັນໄຊ ໄຊຍະວົງ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສະຖາບັນຄົ້ນຄວ້າເສດຖະກິດມະຫາພາກ; ທ່ານ ປອ. ນ. ເກດມະນີ ອິນທະວົງ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສະຖາບັນຄົ້ນຄວ້າສັງຄົມວິທະຍາ; ທ່ານ ໄຊສົມພອນ ຫາວັນນະລາດ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສະຖາບັນຄົ້ນຄວ້າວັດທະນະທໍາ; ທ່ານ ແພງຢ່າງ ເກຍປາວ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສະຖາບັນຄົ້ນຄວ້າວັດທະນະທໍາ; ທ່ານ ນ. ພູຄຽງ ໄຊສິລິ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ ແລະ ທ່ານ ສຸກນິລັນ ແສງພະຈັນ ຫົວໜ້າພະແນກ ເລື່ອນຂຶ້ນເປັນຮອງຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ.

ໃນໂອກາດດັ່ງກ່າວ ທ່ານ ປອ. ກິແກ້ວ ຈັນທະບູຣີ ໄດ້ໂອ້ລົມຕໍ່ພິທີບາງຕອນວ່າ: ການປັບປຸງກົງຈັກການຈັດຕັ້ງ, ການເລື່ອນຊັ້ນຕໍາແໜ່ງ ແມ່ນວຽກປົກກະຕິຂອງພັກ ແລະ ປະຕິບັດຕາມແຜນກໍານົດຕໍາແໜ່ງງານຂອງ ສວສສຊ ເຊິ່ງໄດ້ອີງໃສ່ການຄົ້ນຄວ້າພິຈາລະນາ, ການປະເມີນຜົນ ແລະ ການສະເໜີຂອງບັນດາພາກສ່ວນທີ່ກ່ຽວຂ້ອງ ເພື່ອກໍ່ສ້າງຫັນປ່ຽນຢ່າງແຂງແຮງ ແລະ ເລິກເຊິ່ງ ໃນທຸກຂອດວຽກງານພະນັກງານ ໃຫ້ມີຄວາມໜັກແໜ້ນ, ເຂັ້ມແຂງ ແລະ ສືບຕໍ່ຈັດຕັ້ງດໍາເນີນພາລະກິດທີ່ສໍາຄັນຂອງພັກ-ຂອງລັດໄດ້ວາງອອກ, ສໍາລັບຜູ້ທີ່ໄດ້ຮັບການເລື່ອນຕໍາແໜ່ງໃນຄັ້ງນີ້ ຈົ່ງຕັ້ງໜ້າຍົກສູງຖານະບົດບາດຂອງ ສວສສຊ ໃຫ້ພົ້ນເດັ່ນ ໂດຍສະເພາະຄວາມຮູ້ຄວາມສາມາດ, ຄວາມສາມັກຄີ, ຄວາມເອກະພາບສູງພາຍໃນ ພ້ອມກັນບຸກບືນປັບປຸງຕົນເອງໃຫ້ກ້າວໄປສູ່ ຄຸນນະພາບ ແລະ ເສີມຂະຫຍາຍບົດບາດການນໍາພາຂອງພັກໃຫ້ນັບມື້ນັບສູງຂຶ້ນ; ໃນຕອນທ້າຍພິທີ ຕາງໜ້າໃຫ້ບັນດາຮອງຫົວໜ້າກົມໃໝ່ ໄດ້ປະຕິຍານ ແລະ ໃຫ້ຄໍາໝັ້ນສັນຍາວ່າ: ຈະຕັ້ງໜ້າພັດທະນາຕົນເອງ ແລະ ນໍາເອົາຄໍາໂອວາດ ຂອງປະທານກອງປະຊຸມ ໄປຜັນຂະຫຍາຍເຂົ້າໃນໜ້າທີ່ວຽກງານ ໃຫ້ມີປະສິດທິພາບ ແລະ ປະສິດທິຜົນສູງສຸດ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ປະທານ ສວສສຊ ຕ້ອນຮັບຄະນະຜູ້ແທນຂັ້ນສູງ ສະຖາບັນບັນດິດວິທະຍາສາດສັງຄົມ ຫວຽດນາມ

ຈໍານວນຜູ້ເຂົ້າຊົມ: 958

ປະທານ ສວສສຊ ຕ້ອນຮັບຄະນະຜູ້ແທນຂັ້ນສູງ ສະຖາບັນບັນດິດວິທະຍາສາດສັງຄົມ ຫວຽດນາມ

ໃນຕອນບ່າຍ ວັນທີ 25 ມິຖຸນາ 2024, ທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບ ສະຫາຍ ປອ. ຟ່ານຈີຫຽວ ປະທານສະຖາບັນບັນດິດວິທະຍາສາດສັງຄົມຫວຽດນາມ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມສຳມະນາວິທະຍາສາດລະຫວ່າງສອງຊາດ ລາວ-ຫວຽດນາມ 4 ສະຖາບັນຄື: ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະຖາບັນການເມືອງການປົກຄອງແຫ່ງຊາດ, ສະຖາບັນບັນດິດວິທະຍາສາດສັງຄົມຫວຽດນາມ ແລະ ສະຖາບັນການເມືອງແຫ່ງຊາດໂຮ່ຈີມິນ ເຊິ່ງຈະຈັດຂຶ້ນໃນວັນທີ 27 ມິຖຸນາ 2024 ທີ່ແຂວງຫຼວງພະບາງ.

ໃນໂອກາດນີ້ ປະທານ ສວສສຊ ໄດ້ຕີລາສູງຕໍ່ການຮ່ວມມືລະຫວ່າງ ສວສສຊ ແລະ ສວສຊ ຫວຽດນາມ ທີ່ໄດ້ຮ່ວມມືກັນຈັດຕັ້ງປະຕິບັດນັບແຕ່ປີ 2006 ຈົນມາເຖິງປັດຈຸບັນ ເຊີ່ງມີຜົນສຳເລັດພົ້ນເດັ່ນຫຼາຍດ້ານ ເປັນຕົ້ນແມ່ນໂຄງການກໍ່ສ້າງສູນຂໍ້ມູນຂ່າວສານ, ຫໍສະໝຸດ ແລະ ອາຄານເຮັດວຽກຂອງພະນັກງານວິຊາການ, ການຈັດຕັ້ງກອງປະຊຸມສໍາມະນາສາກົນຫຼາຍຝ່າຍປະຈໍາປີ, ໂຄງການຄົ້ນຄວ້າວິທະຍາສາດ ແລະ ຊ່ວຍເຫຼືອກໍ່ສ້າງນັກວິຊາການ-ນັກຄົ້ນຄວ້າໃຫ້ ສວສສຊ ໃນລະດັບປະລິນຍາໂທ ແລະ ປະລິນຍາເອກ ຈຳນວນ 15 ທ່ານ. ພ້ອມດຽວກັນນັ້ນ, ທັງສອງຝ່າຍຍັງໄດ້ແລກປ່ຽນກ່ຽວກັບທິດທາງການຮ່ວມມືໃນຕໍ່ໜ້າ ເຊັ່ນ: ການຈັດຕັ້ງໂຄງການຄົ້ນຄວ້າວິທະຍາສາດຮ່ວມກັນ, ການຈັດກອງປະຊຸມສໍາມະນາປະຈໍາປີສອງຝ່າຍ ແລະ ຫຼາຍຝ່າຍ, ການພົບປະແລກປ່ຽນຄະນະວິຊາການ, ຄະນະຊາວໜຸ່ມເພື່ອແລກປ່ຽນບົດຮຽນເຊິ່ງກັນແລະກັນ, ການແລກປ່ຽນຜະລິດຕະພັນການຄົ້ນຄວ້າ, ປຶ້ມ, ວາລະສານ; ການຈັດຕັ້ງຝຶກອົບຮົມວິທີວິທະຍາໃນການຄົ້ນຄວ້າ, ການຝຶກອົບຮົມພາສາຫວຽດນາມ ເພື່ອຮັບໃຊ້ການແປເອກະສານທາງການ ລວມທັງການຍົກລະດັບວິຊາສະເພາະໃນລະດັບປະລິນຍາໂທ ແລະ ປະລິນຍາເອກ ໃຫ້ພະນັກງານຂອງ ສວສສຊ.

ໃນຕອນທ້າຍ ທ່ານ ປອ. ກອງແກ້ວ ໄຊສົງຄາມ ຍັງໄດ້ອວຍພອນການຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມ 4 ຝ່າຍ ຂອງ ຄະນະຜູ້ແທນຂັ້ນສູງ ສະຖາບັນບັນດິດວິທະຍາສາດສັງຄົມຫວຽດນາມໃນຄັ້ງນີ້ ຈົ່ງໄດ້ຮັບຜົນສຳເລັດຢ່າງສະຫງ່າງາມປະກອບສ່ວນເຂົ້າໃນການເພີ່ມທະວີການພົວພັນຮ່ວມມືທີ່ດີລະຫວ່າງ 2 ປະເທດພວກເຮົາໃຫ້ໄດ້ຮັບການຍົກລະດັບຂຶ້ນຕື່ມອີກກ້າວໜຶ່ງ.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ພວງເພັດ ຈັນທະລີວົງ

WhatsApp Image 2024-06-20 at 08.56.09_24f55ec4

ສວສສຊ ສໍາເລັດການຝຶກອົບຮົມ ແລະ ມອບ-ຮັບໃບຢັ້ງຢືນໃຫ້ແກ່ນັກສໍາມະນາກອນ

ຈໍານວນຜູ້ເຂົ້າຊົມ: 886

ສວສສຊ ສໍາເລັດການຝຶກອົບຮົມ ແລະ ມອບ-ຮັບໃບຢັ້ງຢືນໃຫ້ແກ່ນັກສໍາມະນາກອນ

ໃນຕອນເຊົ້າຂອງວັນທີ 18 ມິຖຸນາ 2024 ຜ່ານມານີ້, ທີ່ຫ້ອງປະຊຸມໃຫຍ່ ສວສສຊ ໄດ້ຈັດພິທີປິດ ແລະ ມອບ-ຮັບ ໃບຢັ້ງຢືນສໍາເລັດການຝຶກອົບຮົມໃນຫົວຂໍ້: ການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າວິທະຍາສາດເສດຖະກິດ ແລະ ສັງຄົມ ສໍາລັບນັກຄົ້ນຄວ້າໜຸ່ມຊຸດທີ I; ໃນພິທີດັ່ງກ່າວ, ໃຫ້ກຽດຂຶ້ນເປັນປະທານກ່າວປິດພິທີ ແລະ ມອບໃບຢັ້ງຢືນໂດຍ ທ່ານ ປອ. ນ. ຂັນລາສີ ແກ້ວບຸນພັນ, ຄະນະພັກ, ຮອງປະທານ ສວສສຊ; ມີຫົວໜ້າຫ້ອງການຄຸ້ມຄອງວິທະຍາສາດ, ຫົວໜ້າຄົ້ນຄວ້ານະໂຍບາຍເສດຖະກິດ-ສັງຄົມ, ວ່າການແທນຫົວໜ້າສູນ, ບັນດາຮອງຫົວໜ້າ, ພ້ອມດ້ວຍພະນັກງານ-ນັກຄົ້ນຄວ້າໜຸ່ມຜູ້ທີ່ສໍາເລັດການຝຶກອົບຮົມເຂົ້າຮ່ວມ ຈໍານວນ 26 ທ່ານ;

ໃນວາລະດໍາເນີນພິທີ ທ່ານ ປອ. ສາຍຄໍາ ວໍລະເດດ ຫົວໜ້າຫ້ອງການຄຸ້ມຄອງວິທະຍາສາດ ໄດ້ຂຶ້ນຜ່ານຂໍ້ຕົກລົງວ່າດ້ວຍການເປີດຝຶກອົບຮົມ ຫົວຂໍ້: ການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າວິທະຍາສາດເສດຖະກິດ ແລະ ສັງຄົມ ສໍາລັບນັກຄົ້ນຄວ້າໜຸ່ມຊຸດທີ I ພ້ອມທັງລາຍງານຜົນການຝຶກອົບຮົມ ເຊິ່ງເລີ່ມແຕ່ວັນທີ 10-14 ມິຖຸນາ 2024, ໂດຍມີນັກສໍາມະນາກອນເຂົ້າຮ່ວມທັງໝົດ 20 ທ່ານ; ໃນນັ້ນ, ມີນັກວິທະຍາກອນ 3 ທ່ານ ແລະ ບົດຮຽນທີ່ນໍາມາຝຶກອົບຮົມປະກອບມີ 5 ບົດ ຄື: ບົດນໍາວິທີວິທະຍາການຄົ້ນຄວ້າ; ວິທີເກັບຂໍ້ມູນດ້ານປະລິມານ ແລະ ການສ້າງຖານຂໍ້ມູນ; ການວິເຄາະຂໍ້ມູນແບບພັນລະນາ; ທິດສະດີການປະເມີນຄ່າ ແລະ ການທົດສອບສົມມຸດຕິຖານ.

ໃນວາລະຕອນທ້າຍພິທີ ທ່ານ ປອ. ນ. ຂັນລາສີ ແກ້ວບຸນພັນ ໄດ້ມີຄໍາເຫັນໂອ້ລົມວ່າ: ການຝຶກອົບຮົມໃນຄັ້ງນີ້ ແມ່ນເພື່ອສົ່ງເສີມຄວາມອາດສາມາໃຫ້ແກ່ພະນັກງານ ສວສສຊ ທາງດ້ານທັກສະການຂີດຂຽນບົດຄົ້ນຄວ້າວິທະຍາສາດເສດຖະກິດ-ສັງຄົມ ໃຫ້ມີຄຸນນະພາບທີ່ສູງຂຶ້ນ, ເປັນຂະບວນການຮຽນຮູ້ໃນການສ້າງທັກສະເຂົ້າໃນການເຮັດວຽກຕົວຈິງຂອງພະນັກງານ ໂດຍສະເພາະນັກຄົ້ນຄວ້າໜຸ່ມນ້ອຍ ໃຫ້ມີໂອກາດໄດ້ຮຽນຮູ້ວິທີວິທະຍາ, ຮູ້ວິເຄາະຂໍ້ມູນ ໃນການຄົ້ນຄວ້າທີ່ຖືກຕ້ອງຕາມຫຼັກການ ເພື່ອສ້າງພື້ນຖານທີ່ດີໃນການເປັນນັກຄົ້ນຄວ້າໃນອານາຄົດ. ສະນັ້ນ, ເພື່ອຢັ້ງຢືນຜົນສໍາເລັດການເຂົ້າຮ່ວມຝືກອົບຮົມໃນຫຼັກສູດດັ່ງກ່າວ ຂ້າພະເຈົ້າຂໍສະແດງຄວາມຊົມເຊີຍມາຍັງຄະນະຮັບຜິດຊອບ, ນັກວິທະຍາກອນທຸກທ່ານທີ່ໄດ້ຈັດຊຸດອົບຮົມນີ້ຂຶ້ນ ຈົນໄດ້ຮັບຜົນສໍາເລັດ, ຂໍຊົມເຊີຍ ນັກສໍາມະນາກອນທຸກທ່ານ ທີ່ຕັ້ງໃຈສືກສາຮໍ່າຮຽນເອົາຄວາມຮູ້ໃນຄັ້ງນີ້ ແລະ ຂ້າພະເຈົ້າຫວັງຢ່າງຍິງວ່າການຈັດຝຶກອົບຮົມ ຈະບໍ່ສິ້ນສຸດແຕ່ພຽງເທົ່ານີ້ ຍັງຈະສືບຕໍ່ຈັດຂຶ້ນໃນຄັ້ງຕໍ່ໆໄປ ໃຫ້ເປັນວຽກປົກກະຕິ.