douangchai lovan – ໜ້າ 3 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສວສສຊ ຈັດພິທີປາຖະກະຖາວັນຊາດ ແລະ ວັນຄ້າຍວັນເກີດປະທານ ໄກສອນ ພົມວິຫານ

ຈໍານວນຜູ້ເຂົ້າຊົມ: 233

ສວສສຊ ຈັດພິທີປາຖະກະຖາວັນຊາດ ແລະ ວັນຄ້າຍວັນເກີດປະທານ ໄກສອນ ພົມວິຫານ

ໃນຕອນບ່າຍຂອງວັນທີ 20 ພະຈິກ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປາຖະກະຖາວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ເຊິ່ງໄດ້ຮັບກຽດຂຶ້ນປາຖະກະຖາໂດຍບັນດາ ທ່ານ ປອ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ບົວສອນ ບຸບຜາວັນ ອະດີດກໍາມະການກົມການເມືອງສູນກາງພັກ, ອະດີດນາຍົກລັດຖະມົນຕີ ແຫ່ງ ສປປ ລາວ, ທ່ານ ຈັນສີ ໂພສີຄຳ ອະດີດກຳມະການກົມການເມືອງສູນກາງພັກ, ອະດີດຫົວໜ້າຄະນະຈັດຕັ້ງສູນກາງພັກ ແລະ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ປະທານ ສວສສຊ; ມີບັນດາຄະນະພັກ-ຄະນະນໍາ, ບັນດາຫົວໜ້າສະຖາບັນຄົ້ນຄວ້າ, ກົມ, ຫ້ອງການ, ສູນ ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ.

ໃນໂອກາດນີ້ ທ່ານ ປອ. ແກ້ວວິວອນ ອຸດທະຈັກ ຮອງປະທານ ສວສສຊ ໄດ້ຂື້ນກ່າວເປີດພິທີວ່າ: ການປາຖະກະຖາໃນຄັ້ງນີ້ ມີຄວາມໝາຍຄວາມສຳຄັນຢ່າງຍິ່ງ ແລະ ໄດ້ຈັດຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປວງຊົນລາວທັງຊາດ ພວມພ້ອມກັນສືບຕໍ່ຈັດຕັ້ງຜັນຂະຫຍາຍປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ຄັ້ງທີ 9 ເວົ້າລວມ, ເວົ້າສະເພາະແມ່ນກະກຽມສະເຫຼີມສະຫຼອງວັນສະຖາປະນາ ສປປ ລາວ ຄົບ ຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ. ສໍາລັບ ສວສສຊ ພວກເຮົາ ກໍ່ພວມຂຸ້ນຂ້ຽວໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ສະມາຊິກພັກຄັ້ງທີ II ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃຫ້ໄດ້ຮັບຜົນສຳເລັດດີຂຶ້ນເປັນກ້າວໆ; ຈຸດປະສົງການປາຖະກະຖາປະກອບມີສາມເນື້ອໃນສໍາຄັນຄື: ຈະໄດ້ເຊື່ອມຊຶມວັນສະຖາປະນາ ສປປ ລາວ, ວັນຄ້າຍວັນເກີດປະທານ ໄກສອນ ພົມວິຫານ ແລະ ບົດຮຽນການນໍາພາວຽກງານກໍ່ສ້າງພັກ-ພະນັກງານ.

ທ່ານ ປອ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກໄດ້ຂຶ້ນປາຖະກະຖາວັນສະຖາປະນາ ແຫ່ງ ສປປ ລາວ ຄົບຮອບ 50 ປີ ແລະ ການຈັດຕັ້ງການສະເຫຼີມສະຫຼອງ 3 ວັນປະຫວັດສາດ ເຊິ່ງບາງຕອນທ່ານໄດ້ຍົກໃຫ້ເຫັນເຖິງ ປະຫວັດສາດແຫ່ງການຕໍ່ສູ້ກູ້ຊາດທີ່ຍືດເຍື້ອຍາວນານ ແລະ ຄວາມຫຍຸ້ງຍາກລໍາບາກຂອງການນຳ ກໍ່ຄືນັກປະຕິວັດຜູ້ທີ່ມີຄຸນງາມຄວາມດີຕໍ່ປະເທດຊາດ ທີ່ໄດ້ເສຍສະຫຼະເລືືອດເນື້ອເຫື່ອແຮງ ແລະ ສະຕິປັນຍາ ນຳພາປະຊາຊົນລາວຕໍ່ສູ້ກູ້ຊາດ ຈົນເຖິງ ການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍໃນວັນທີ 2 ທັນວາ 1975; ຕະຫຼອດ 50 ປີ ໃນການປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ ໄດ້ເຮັດໃຫ້ ສປປ ລາວ ມີໂສມໜ້າໃໝ່ຂອງປະເທດມີການປ່ຽນແປງໃຫຍ່ຫຼວງ ແລະ ຮອບດ້ານ ເຊິ່ງເຮັດໃຫ້ ສປປ ລາວ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ເສດຖະກິດເຖິງຈະພົບຄວາມຫຍຸ້ງຍາກບາງໄລຍະ, ແຕ່ກໍ່ຍັງສືບຕໍ່ເຕີບໂຕຕໍ່ເນື່ອງ ແລະ ສາມາດຮັກສາໄດ້ບໍ່ໃຫ້ຕົກເຂົ້າສູ່ວິກິດການ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງສະມາ ຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ ກໍ່ຄ່ອຍໆດີຂຶ້ນ, ຄວາມທຸກຍາກຖືກຕີຖອຍເປັນກ້າວໆ ແລະ ເຮັດໃຫ້ຕົວເມືອງ ແລະ ຊົນນະບົດ ຄ່ອຍໆຍັບໃກ້ເຂົ້າຫາກັນ.

ທ່ານ ບົວສອນ ບຸບຜາວັນ ອະດີດກໍາມະການກົມການເມືອງສູນກາງພັກ, ອະດີດນາຍົກລັດຖະມົນຕີ ແຫ່ງ ສປປ ລາວ ໄດ້ຂຶ້ນປາຖະກະຖາກ່ຽວກັບຊີວິດ ແລະ ການເຄື່ອນໄຫວປະຕິວັດຂອງ ປະທານ ໄກສອນ ພົມວິຫານ ເຊິ່ງມີຈຸດພິເສດແຕກຕ່າງກັບຜູ້ນຳອື່ນໆໃນໂລກ ເພາະວ່າເພິ່ນເປັນຜູ້ນໍາທີ່ຍ່ງໃຫຍ່, ນັກຄົ້ນຄິດ ແລະ ເປັນນັກປະຕິວັດທີ່ເລີດເດັ່ນ ເປັນວິລະບູລຸດທີ່ປະເທດຊາດຈາລຶກເອົາໄວ້ໃນປະຫວັດສາດ, ເປັນຜູ້ທີ່ເສຍສະຫຼະເພື່ອປະເທດຊາດ ເພື່ອຄວາມຢູ່ດີກີນດີຂອງປະຊາຊົນ; ເປັນຜູ້ທີ່ມີຄວາມສະຫຼາດສ່ອງໃສ, ມີໄຫວພິກ, ມີວາທະສິນໃນການເຈລະຈາ ແລະ ປຸກລະດົມຂົນຂວາຍປະຊາຊົນ ແລະ ຈັດຕັ້ງກໍາລັງປະກອບອາວຸດຕໍ່ສູ້ຕ້ານຈັກກະພັດລ່າເມືອງຂຶ້ນຈົນໄດ້ຮັບໄຊຊະນະ; ເພີ່ນເປັນນັກຄົ້ນຄິດຕະຫຼອດເວລາ, ມັກອ່ານ, ມັກສົນທະນາກັບນັກຄົ້ນຄວ້າ, ຄູອາຈານ ຢູ່ພາຍໃນ ແລະ ຕ່າງປະເທດ ເພື່ອຊອກຫາແນວທາງນະໂຍບາຍໃນການວາງແຜນປ່ຽນແປງໃໝ່ທີ່ດີເໝາະສົມກັບບ້ານເຮົາ; ເພິ່ນເປັນຜູ້ນໍາທີ່ສະດຸ້ງໄວ ແລະ ມີສະຕິສູງຕໍ່ສະພາບການປ່ຽນແປງພາຍໃນ ແລະ ສາກົນ ໂດຍຈັດຕັ້ງນະໂຍບາຍປ່ຽນແປງໃໝ່ ເຊິ່ງໄດ້ກຳນົດ 6 ຫລັກການ, 7 ຄຸນລັກສະນະ ແລະ 9 ປະຖົມປັດໄຈກ້າວສູ່ສັງຄົມນຍົມຂອງພັກມາຮອດປັດຈຸບັນ.

ທ່ານ ຈັນສີ ໂພສີຄຳ ອະດີດກຳມະການກົມການເມືອງສູນກາງພັກ, ອະດີດຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນປາຖະກະຖາກ່ຽວກັບການນໍາພາວຽກງານກໍ່ສ້າງພັກ-ພະນັກງານ ເຊິ່ງເປັນວຽກງານໜຶ່ງທີ່ສໍາຄັນ ແລະ ມັນເປັນວຽກກ່ຽວກັບການກໍ່ສ້າງຄົນ, ການກໍ່ສ້າງພະນັກງານປະຕິວັດ ແລະ ກຳລັງປະກອບອາວຸດ ເພື່ອຮັບໃຊ້ເຂົ້າໃນການຜັນຂະຫຍາຍນະໂຍບາຍຂອງພັກ. ໃນສະພາບການໃໝ່ ການກໍ່ສ້າງພັກ-ພະນັກງານ ຕ້ອງໄດ້ຍຶດໝັ້ນປະຕິບັດກົດລະບຽບຂອງພັກໃຫ້ເຂັ້ມງວດ, ຖືກຕ້ອງ; ໃນນັ້ນ ຕ້ອງເອົາໃຈໃສ່ສາມດ້ານຄື 1) ຕ້ອງຖືເອົາຄຸນນະພາບເປັນກົກ ເພື່ອສ້າງການນໍາພາ; 2) ການຂະຫຍາຍພັກຕ້ອງໃຫ້ຖືກທິດທາງກັບການປະຕິບັດວຽກງານຂອງລັດ, ຕ້ອງໄດ້ມີຂະບວນການ ແລະ ວຽກງານມີຜົນສຳເລັດສູງຂຶ້ນ, ຂະຫຍາຍແລ້ວຕ້ອງຕິດຕາມກວດກາ ແລະ ເດັດຂາດເອົາອອກເມື່ອຜິດລະບຽບວິໄນ; 3) ສ້າງພັກຕ້ອງສ້າງໃນຂະບວນການມະຫາຊົນ ເພື່ອເລືອກຜູ້ທີ່ຫ້າວຫັນ ເຮັດແທ້ທໍາຈິງ. ພ້ອມນັ້ນ ຕ້ອງໄດ້ຮໍ່າຮຽນ ແລະ ຖອດຖອນຈາກຄໍາສັ່ງສອນຂອງຜູ້ນໍາ ເພື່ອຫຼີກເວັ້ນແນວຄິດຊົນຊັ້ນເກົ່າ, ແນວຄິດຫ່າງເຫີນມະຫາຊົນ, ຕົກສູ່ແນວຄິດຫັນປ່ຽນຂອງສັດຕູ ແລະ ຫລົງລືມແນວທາງນະໂຍບາຍ ເຊິ່ງອາດເຮັດໃຫ້ພັກເສຍບົດບາດ ແລະ ຄວາມເຊື່ອໝັ້ນຈາກມະຫາຊົນ.

ໃນຕອນທ້າຍພິທີ ທ່ານ ປອ. ກອງແກ້ວ ໄຊສົງຄາມ ໄດ້ກ່າວສະແດງຄວາມຮູ້ບຸນຄຸນຢ່າງລົ້ນເຫຼືອມາຍັງ ອະດີດການນໍາ ທີ່ໄດ້ເສຍສະຫຼະເວລາອັນມີຄ່າມາປາຖະກະຖາເລົ່າມູນເຊື້ອ, ເຖິງຈະເປັນເວລາສັ້ນ ແຕ່ເຕັມໄປດ້ວຍເນື້ອໃນທີ່ສໍາຄັນ ເຊິ່ງຕະຫຼອດໄລຍະ 50 ປີ ພາຍໃຕ້ການນໍາພາຂອງພັກ ສາມາດນໍາພາສ້າງສາ ແລະ ປົກປັກຮັກສາປະເທດຊາດໃຫ້ໝັ້ນຄົງຖາວອນ, ເສດຖະກິດມີການພັດທະນາເຂັ້ມແຂງ, ນໍາເອົາຊີວິດການເປັນຢູ່ທີ່ດີມາສູ່ປະຊາຊົນບັນດາເຜົ່າ; ປະເທດຊາດຮັ່ງມີ, ເຂັ້ມແຂງ ແລະ ສັງຄົມມີຄວາມສີວິໄລກ້າວໜ້າ ດັ່ງສັດຈະທຳທີ່ວ່າ “ໄດ້ກິນເຂົ້າ ບໍ່ລືມຄຸນນາ, ໄດ້ກິນປາບໍ່ລືມຄຸນຕ້ອນ” ຫຼື “ມີວັນນັ້ນ ຈຶ່ງມີວັນນີ້” ພວກເຮົາໃນນາມນັກວິທະຍາສາດ ຕ້ອງໄດ້ກໍາແໜ້ນ ແລະ ນໍາເອົາຄວາມຮູ້ໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສະຫາຍ ຫຼີ ຊູ ເລີຍ ເດີນທາງມາຢ້ຽມຢາມ ສປປ ລາວ ຢ່າງເປັນທາງການ

ຈໍານວນຜູ້ເຂົ້າຊົມ: 462

ສະຫາຍ ຫຼີ ຊູ ເລີຍ ເດີນທາງມາຢ້ຽມຢາມ ສປປ ລາວ ຢ່າງເປັນທາງການ

ຕອນເຊົ້າວັນທີ 10 ພະຈິກ 2025 ທີ່ນະຄອນຫຼວງວຽງຈັນ, ສະຫາຍ ຫຼີ ຊູ ເລີຍ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນ ພ້ອມດ້ວຍຄະນະ ໄດ້ເດີນທາງມາເຖິງສະໜາມບິນສາກົນວັດໄຕ ເພື່ອມາຢ້ຽມຢາມ ແລະ ເຂົ້າຮ່ວມກອງປະຊຸມສໍາມະນາທິດສະດີສອງພັກລາວ – ຈີນ ຄັ້ງທີ XIII ທີ່ຈັດຂຶ້ນໃນລະຫວ່າງວັນທີ 10-11 ພະຈິກ 2025 ນີ້.

ເປັນກຽດຕ້ອນຮັບຢູ່ສະໜາມບິນ ຄະນະຝ່າຍລາວ ນໍາໂດຍ ສະຫາຍ ກອງແກ້ວ ໄຊສົງຄາມ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຮອງປະທານສະພາທິດສະດີສູນກາງພັກ, ມີສະຫາຍ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ນາງ ຝາງຫົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ປະຈຳ ສປປ. ລາວ ພ້ອມດ້ວຍຄະນະທັງສອງຝ່າຍ.

ກອງປະຊຸມສຳມະນາຄັ້ງນີ້ແມ່ນຈະຈັດຂຶ້ນທີ່ແຂວງຈຳປາສັກ ພາຍໃຕ້ຫົວຂໍ້ “ນໍາໃຊ້ແຜນການໄລຍະກາງ-ໄລຍະຍາວ ຊຸກຍູ້ການພັດທະ ນາເສດຖະກິດ-ສັງຄົມ: ບົດຮຽນຂອງລາວ ແລະ ຈີນ” ເຊິ່ງເປັນຫົວຂໍ້ທີ່ມີຄວາມໝາຍສໍາຄັນທາງດ້ານທິດສະດີແລະ ພຶດຕິກຳ ທີ່ມີລັກສະນະຍຸດທະສາດ, ສະແດງອອກເຖິງບົດບາດການນໍາພາຮອບດ້ານຂອງພັກຕໍ່ກັບການພັດທະນາເສດຖະກິດ-ສັງຄົມ ໂດຍສະເພາະໃນໄລຍະທີ່ ສປປ ລາວ ກໍາລັງກະກຽມຮ່າງບົດສະຫຼຸບແຜນພັດທະນາເສດ ຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ແລະ ວາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030).

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ປະກາດແຕ່ງຕັ້ງພະນັກງານນໍາພາຂັ້ນກົມ

ຈໍານວນຜູ້ເຂົ້າຊົມ: 418

ສວສສຊ ປະກາດແຕ່ງຕັ້ງພະນັກງານນໍາພາຂັ້ນກົມ

ວັນທີ 04 ພະຈິກ 2025 ທີ່ຜ່ານມາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ປະກາດການຈັດຕັ້ງແຕ່ງ ແລະ ຊັບຊ້ອນພະນັກງານຂັ້ນກົມ ໂດຍເປັນປະທານຂອງ ປອ ສະຖາບັນດິດ ອິນສີຊຽງໃໝ່ ຮອງເລຂາຄະນະພັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີຄະນະປະຈໍາພັກ, ຄະນະພັກ, ແລະ ບັນດາຄະນະຫ້ອງການ, ກົມ, ສາຖາບັນຄົ້ນຄວ້າ ແລະ ສູນ ເຂົ້າຮ່ວມ.

ທ່ານ ຄຳສຸກ ພອນໄຊສະຫວັດ ຮອງຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານຂໍ້ຕົກລົງຂອງປະທານ ສວສສຊ ວ່າດ້ວຍການແຕ່ງຕັ້ງຂັ້ນກົມ ຈຳນວນ 02 ສະຫາຍ ດັ່ງນີ້: 1) ແຕ່ງຕັ້ງ ທ່ານ ນ. ດອກຟ້າ ສີໂຍທາ ຫົວໜ້າພະແນກ ເປັນຮອງຫົວໜ້າສະຖາບັນຄົ້ນຄວ້າພັດທະນາວິສາຫະກິດ; 2) ແຕ່ງຕັ້ງ ທ່ານ ທຳມະໄລ ຄຳມຸງຄຸນ ຫົວໜ້າພະແນກ ເປັນຮອງຫົວໜ້າສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ

ໃນໂອກາດດັ່ງກ່າວນີ້, ທ່ານ ປອ ສະຖາບັນດິດ ອິນສີຊຽງໃໝ່ ມີຄຳເຫັນໂອ້ລົມຕໍ່ພະນັກງານຂັ້ນນໍາໃໝ່ວ່າ: ການແຕ່ງຕັ້ງ, ຍົກຍ້າຍ, ສັບຊ້ອນໜ້າທີ່ໃໝ່ ແມ່ນເປັນວຽກປົກກະຕິ ແລະ ເປັນນະໂຍບາຍຂອງພັກ ແລະ ລັດເຮົາ ເພື່ອປັບປຸງ ແລະ ຍົກສູງບົດບາດການຊີ້ນໍາ-ນໍາພາຂອງພັກ, ການຄຸ້ມຄອງບໍລິຫານຂອງລັດ ແລະ ທັງເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ສະມາຊິກພັກຄັ້ງທີ II ຂອງອົງຄະນະພັກ ສວສສຊ ໃຫ້ເຂົ້າສູ່ລວງເລິກ ໂດຍສະເພາະແມ່ນວຽກງານພັກ ແລະ ພະນັກງານ, ການປັບປຸງກົງຈັກການຈັດຕັ້ງ ແລະ ສັບຊ້ອນ, ຈັດວາງບຸກຄະລາກອນ ແມ່ນວຽກງານທີ່ສຳຄັນຂອງແນວທາງການຈັດຕັ້ງຂອງພັກເຮົາຊຶ່ງເນື້ອແທ້ກໍ່ແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ການຜັນຂະຫຍາຍມະຕິກອງປະຊຸມວຽກງານຈັດຕັ້ງທົ່ວປະເທດມາເປັນອັນລະອຽດ ເປັນຕົ້ນແມ່ນການຈັດຕັ້ງປະຕິບັດຕາມ ຄຳສັ່ງເລກທີ 190 ຂອງຄະນະເລຂາທິການສູນກາງພັກ ແລະ ຄໍາແນະນໍາ ເລກທີ 01 ຂອງລັດຖະບານ ວ່າດ້ວຍການປັບປຸງການຈັດຕັ້ງຂອງບັນດາກະຊວງ-ອົງການ ແລະ ທ້ອງຖິ່ນ ຕາມທິດ: “ກະທັດຮັດ, ໂປ່ງໃສ ແລະ ສອດຄ່ອງກັບສະພາບຕົວຈິງ”, ໃນດ້ານໜຶ່ງ ກໍ່ເພື່ອເປັນການທົດສອບຄວາມຮູ້, ຄວາມສາມາດ ແລະ ຄວາມສູ້ຊົນອົດທົນຂອງພະນັກງານພ້ອມນັ້ນ ຮຽກຮ້ອງມາຍັງບັນດາສະຫາຍທີ່ໄດ້ຮັບການສັບຊ້ອນ ແລະ ແຕ່ງຕັ້ງຄັ້ງນີ້ ຈົ່ງໄດ້ຕັ້ງໃຈປະຕິບັດໜ້າທີ່ ທີ່ໄດ້ຮັບມອບໝາຍໃຫ້ດີທີ່ສຸດ ແລະ ມີຜົນສຳເລັດ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຕ້ອນຮັບສະຖາບັນຄົ້ນຄວ້າວັນນະຄະດີຊົນເຜົ່າ, ສະຖາບັນວິທະຍາສາດສັງຄົມ ແຂວງ ຢູນນານ ສປ ຈີນ

ຈໍານວນຜູ້ເຂົ້າຊົມ: 340

ສວສສຊ ຕ້ອນຮັບສະຖາບັນຄົ້ນຄວ້າວັນນະຄະດີຊົນເຜົ່າ, ສະຖາບັນວິທະຍາສາດສັງຄົມ ແຂວງ ຢູນນານ ສປ ຈີນ

ໃນຕອນບ່າຍວັນທີ 30 ຕຸລາ 2025 ທີ່ຜ່ານມາ ທ່ານ ປອ. ເດັ້ງຢ່າງ ກົງຈີ ຫົວໜ້າສະຖາບັນຄົ້ນຄວ້າວັດທະນະທໍາ ຕາງໜ້າຄະນະນໍາ ສວສສຊ ໄດ້ຕ້ອນຮັບທ່ານ ສາດສະດາຈານ ຫວັງ ຈຸນ (Prof. Wang Jun) ຫົວໜ້າສະຖາບັນຄົ້ນຄວ້າວັນນະຄະດີຊົນເຜົ່າ, ສະຖາບັນວິທະຍາສາດສັງຄົມ ແຂວງຢຸນນານ ສປ.ຈີນ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ແລກປ່ຽນບົດຮຽນຢູ່ ສປປ ລາວ.

ທັງສອງຝ່າຍໄດ້ລາຍງານຜົນສຳເລັດຂອງການຮ່ວມມືລະຫວ່າງລາວ-ຈີນໃນຊຸມປີຜ່ານມາ ໂດຍສະເພາະໃນດ້ານວັດທະນະທຳ, ການສຶກສາ ແລະ ມໍລະດົກວັດທະນະທຳ; ຄວາມເຂົ້າໃຈທີ່ເປັນເອກະລັກຂອງລາວຕໍ່ຂໍ້ລິເລີ່ມອາລະຍະທຳຂອງໂລກ, ຂອງລາວ-ຈີນ ເພື່ອຫຼຸດຜ່ອນຄວາມທຸກຍາກ ລວມທັງທິດທາງ ແລະ ວິໄສທັດການຮ່ວມມືໃນອະນາຄົດ ລະຫວ່າງລາວ-ຈີນ. ນອກຈາກນັ້ນ ຍັງໄດ້ປຶກສາຫາລືກັນໃນການຮ່ວມມືຄົ້ນຄວ້າແລກປ່ຽນບົດຮຽນດ້ານການຄຸ້ມຄອງວັດທະນະທໍາ, ວັນນະຄະດີຂອງຊົນເຜົ່າ ແລະ ບໍາລຸງກໍ່ສ້າງທາງດ້ານວິິຊາການລະຫວ່າງນັກຄົ້ນຄວ້າທັງສອງຝ່າຍ ເພື່ອຜັນຂະຫຍາຍຍຸດທະສາດ, ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ ກໍຄືຂົງເຂດການຄົ້ນຄວ້າໃຫ້ມີຜົນສຳ ເລັດສູງຂຶ້ນຢ່າງຮອບດ້ານ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສະຖາບັນຄົ້ນຄວ້າສັງຄົມວິທະຍາ ຕ້ອນຮັບຄະນະຜູ້ແທນ ສະຖາບັນຄົ້ນຄວ້າສາສະໜາ ແຂວງຢູນນານ ສປ. ຈີນ

ຈໍານວນຜູ້ເຂົ້າຊົມ: 319

ສະຖາບັນຄົ້ນຄວ້າສັງຄົມວິທະຍາ ຕ້ອນຮັບຄະນະຜູ້ແທນ ສະຖາບັນຄົ້ນຄວ້າສາສະໜາ ແຂວງຢູນນານ ສປ. ຈີນ

ໃນຕອນເຊົ້າວັນອັງຄານ 28 ຕຸລາ 2025 ທີ່ຜ່ານມານີ້, ຢູ່ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ບຸນສີ ພຸດທະວົງ ຫົວໜ້າສະຖາບັນຄົ້ນຄວ້າສັງຄົມວິທະຍາ ໄດ້ໃຫ້ກຽດຕ້ອນຮັບ ທ່ານ ນາງ ຫຼຽງ ສຽວເຟີນ (Liang Xiaofen), ຫົວໜ້າສະຖາບັນຄົ້ນຄວ້າສາສະໜາ, ສະຖາບັນວິທະຍາສາດສັງຄົມ ແຂວງຢູນນານ ພ້ອມຄະນະ ເນື່ອງໃນໂອກາດເດີນທາງມາຢ້ຽມຢາມພົບປະແລກ ປ່ຽນບົດຮຽນຢູ່ ສປປ ລາວ. ໃນໂອກາດນີ້ ທັງສອງຝ່າຍໄດ້ແລກປ່ຽນກ່ຽວກັບບັນຫາການຄົ້ນຄວ້າສາສະໜາ ແລະ ຊົນເຜົ່າຢູ່ ສປປ ລາວ ເປັນຕົ້ນສາສະໜາພຸດ, ສາສະໜາຄຣິດ ແລະ ການວາງນະໂຍບາຍການຄຸ້ມຄອງສາສະໜາທີ່ປະຊາຊົນໃຫ້ຄວາມເຄົາລົບນັບຖື. ພ້ອມນັ້ນ ສອງສະຖາບັນຍັງໄດ້ເຫັນດີເປັນເອກະພາບຮ່ວມມືກັນໃນການພົວພັນຢ້ຽມຢາມເຊິ່ງກັນແລະກັນ, ການຈັດສຳມະນາແລກປ່ຽນທາງດ້ານວິຊາການ ແລະ ການຄົ້ນຄວ້າໃນອະນາຄົດ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສະຖາບັນຄົ້ນຄວ້າສັງຄົມວິທະຍາ ຕ້ອນຮັບຄະນະຜູ້ແທນ ແຂວງຢູນນານ ສປ ຈີນ

ຈໍານວນຜູ້ເຂົ້າຊົມ: 523

ສະຖາບັນຄົ້ນຄວ້າສັງຄົມວິທະຍາ ຕ້ອນຮັບຄະນະຜູ້ແທນ ແຂວງຢູນນານ ສປ ຈີນ

ໃນຕອນບ່າຍຂອງວັນທີ 23 ຕຸລາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ບຸນສີ ພຸດທະວົງ ຫົວໜ້າສະຖາບັນຄົ້ນຄວ້າສັງຄົມວິທະຍາ ໄດ້ຕ້ອນຮັບ ທ່ານ ນາງ ຕ້ວນ ຢຽນນານ (Mrs. Duan Yanna) ຮອງຫົວໜ້າສະຖາບັນຄົ້ນຄວ້າສັງຄົມສາດ ແຂວງຢູນນານ, ສປ. ຈີນ ພ້ອມຄະນະທີ່ໄດ້ເດີນທາງມາພົບປະແລກປ່ຽນບົດຮຽນທາງດ້ານວິຊາການຢູ່ ສປປ ລາວ.

ໃນໂອກາດນີ້ ທັງສອງຝ່າຍໄດ້ໄດ້ປຶກສາຫາລືເຖິງບັນຫາສໍາຄັນກ່ຽວກັບສະພາບປະຊາກອນ ແລະ ນະໂຍບາຍປະຊາກອນຂອງລາວ; ການຮ່ວມມືດ້ານການສຶກສາລະຫວ່າງຈີນ-ລາວ; ຜົນກະທົບຂອງການເປີດນຳໃຊ້ທາງລົດໄຟຈີນ-ລາວ ຕໍ່ການພັດທະນາເສດຖະກິດ-ສັງຄົມຂອງລາວ ເຊິ່ງເປັນໂຄງການສັນຍາລັກຂອງ “ໜຶ່ງແລວໜຶ່ງເສັ້ນທາງ” ທີ່ທັນສະໄໝເຊື່ອມຕໍ່ສອງປະເທດ; ສະພາບການດຳເນີນທຸລະກິດ ແລະ ການຈ້າງງານຂອງວິສາຫະກິດຈີນໃນລາວ ທີ່ນັບມື້ນັບເຂົ້າມາລົງທຶນ ແລະ ດຳເນີນທຸລະກິດໃນລາວ. ພ້ອມນັ້ນ ຍັງມີຄວາມສົນໃຈຕໍ່ການແລກປ່ຽນບົດຮຽນເຊິ່ງກັນແລະກັນ ແລະ ສະໜອງຂໍ້ມູນຂ່າວ ສານການຄົ້ນຄວ້າທາງວິຊາການໃນອະນາຄົດ ເພື່ອຮັບໃຊ້ການພັດທະນາເສດຖະກິດ-ສັງຄົມ; ເຊື່ອໝັ້ນຢ່າງຍິ່ງວ່າສອງສະຖາບັນຄົ້ນຄວ້າຈະສາມາດມີບົດບາດຢ່າງຕັ້ງໜ້າຫຼາຍຂຶ້ນໃນການສົ່ງເສີມການຮ່ວມມືທາງວິຊາການລະຫວ່າງລາວ-ຈີນ ແລະ ເສີມຂະຫຍາຍສາຍພົວພັນຂອງສອງປະເທດໃຫ້ສູງຂຶ້ນ.

ຂຽນຂ່າວ ແລະ ຖ່າຍພາບ: ມູນນິນ ພົນສັກດາ

ສວສສຊ ສຳມະນາກ່ຽວກັບທ່າອ່ຽງເສດຖະກິດ ແລະ ການປ່ຽນແປງທາງການຄ້າຂອງພາກພື້ນ

ຈໍານວນຜູ້ເຂົ້າຊົມ: 378

ສວສສຊ ສຳມະນາກ່ຽວກັບທ່າອ່ຽງເສດຖະກິດ ແລະ ການປ່ຽນແປງທາງການຄ້າຂອງພາກພື້ນ

ໃນວັນທີ 24 ຕຸລາ 2025 ທີ່ຜ່ານມານີ້, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມສໍາມະນາໃນຫົວຂໍ້: ທ່າອ່ຽງເສດຖະກິດ ແລະ ການປ່ຽນແປງທາງການຄ້າຂອງພາກພື້ນ (Geoeconomics and Regional Trade Dynamics) ຂຶ້ນທີ່ໂຮງແຮມ ຄຣາວພາຣາຊ່າ ໂດຍສະຖາບັນຄົ້ນຄວ້າເສດຖະກິດມະຫາພາກ ເຊິ່ງໄດ້ຮັບການສະໜັບສະໜູນຈາກສະຖານທູດອົດສະຕຣາລີປະຈໍາລາວ ແລະ ສະມາຄົມມິດຕະພາບລາວ-ອົດສະຕຣາລີ, ພາຍໃຕ້ການເປັນປະທານຮ່ວມຂອງ ທ່ານ ປອ. ສະຖາບັນດິດ ອິນສີຊຽງໃໝ່ ຮອງປະທານ ສວສສຊ ແລະ ທ່ານ ນາງ ເມແກນ ຈອນສ (Megan Jones), ເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ພ້ອມດ້ວຍຄະນະຈາກມະຫາວິທະຍາໄລແຫ່ງຊາດອົດສະຕຣາ, ມີບັນດາຫົວໜ້າກົມ, ຮອງຫົວໜ້າກົມຂອງບັນດາກະຊວງຂະແໜງການທີ່ກ່ຽວຂ້ອງ, ຜູ້ຕາງໜ້າຈາກອົງການຈັດຕັ້ງສາກົນ, ມະຫາວິທະຍາໄລແຫ່ງຊາດ ແລະ ພາກເອກະຊົນເຂົ້າຮ່ວມ.

ພາຍໃນກອງປະຊຸມໄດ້ມີການນໍາສະເໜີທ່າອ່ຽງສະພາບເສດຖະກິດຂອງອາຊີ, ສະພາບເສດຖະກິດຂອງລາວ, ຕ່ອງໂສ້ມູນຄ່າເພີ່ມຂອງຂະແໜງການປຸງແຕ່ງໄມ້ລາວໃນພາກພື້ນ ແລະ ຜົນກະທົບຕ່າງໆຕໍ່ພາກພື້ນ ແລະ ສປປ ລາວ ຂອງບັນດານັກຄົ້ນຄວ້າສອງຝ່າຍ. ກອງປະຊຸມສົນທະນາປືກສາຫາລືກ່ຽວກັບສິ່ງທ້າທາຍໃນການເຊື່ອມໂຍງເສດຖະກິດສາກົນທີ່ບໍ່ມີຄວາມແນ່ນອນຢູູ່ໃນສາກົນ ແລະ ພາກພື້ນ ທີ່ເປັນສິ່ງທ້າທາຍຕໍ່ເສດຖະກິດໂລກ ເປັນຕົ້ນຄວາມຂັດແຍ່ງທາງດ້ານການທະຫານ, ຄວາມບໍ່ສະຫງົບໃນຂົງເຂດຕາເວັນອອກກາງ ແລະ ບັນຫາສົງຄາມການຄ້າທີ່ຮຸນແຮງຂຶ້ນ ຈາກນະໂຍບາຍການຄ້າຂອງປະເທດມະຫາອໍານາດ ທີ່ກະທົບຕໍ່ການຄ້າ ແລະ ການລົງທຶນຢູ່ໃນຫຼາຍຂົງເຂດ ລວມທັງ ສປປ ລາວ. ນອກຈາກນັ້ນ ຍັງມີສິ່ງທ້າທາຍທາງດ້ານການປ່ຽນແປງສະພາບດິນຟ້າອາກາດ ເຊັ່ນ: ໄພນໍ້າຖ້ວມ, ພາຍຸ ແລະ ແຜ່ນດິນໄຫວ. ສຳລັບ ສປປ ລາວ ໄດ້ຕັ້ງໜ້າແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ໂດຍສະເພາະບັນຫາໜີ້ສິນ, ການເໜັງຕີງຂອງອັດຕາແລກປ່ຽນ ແລະ ບັນຫາລາຄາສິນຄ້າທີ່ຍັງຢູ່ໃນລະດັບສູງ ໄດ້ສ້າງຄວາມທ້າທາຍໃນການຄຸ້ມຄອງເສດຖະກິດມະຫາພາກພໍສົມຄວນ.

ໃນໂອກາດນີ້, ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ສະແດງຄວາມຂອບໃຈຕໍ່ການຮ່ວມມືຄັ້ງນີ້ວ່າ: ການພົວພັນມິດຕະພາບລະຫວ່າງລາວ ແລະ ອົດສະຕຣາລີ ແມ່ນນັບມື້ນັບເຂັ້ມແຂງໃນຫຼາຍຂົງເຂດ ເຊັ່ນ: ດ້ານການຄ້າ, ການລົງທຶນ, ການສຶກສາ ແລະ ໂຄງການພັດທະນາອື່ນໆ. ໃນນັ້ນ, ການສ້າງຕັ້ງສະມາຄົມມິດຕະພາບລາວ-ອົດສະຕຣາລີ ໄດ້ເປັນກົນໄກໜຶ່ງທີ່ຂັບເຄື່ອນການຮ່ວມມືພົວພັນມິດຕະພາບລາວ-ອົດສະຕຣາລີ ຜ່ານການເຄື່ອນໄຫວກິດຈະກຳຈຳນວນໜຶ່ງໃຫ້ແໜ້ນແຟ້ນຍິ່ງຂຶ້ນ. ສະນັ້ນ, ການຈັດກອງປະຊຸມສຳມະນາໃນຄັ້ງນີ້ ກໍ່ເປັນອີກການຮ່ວມມືໜຶ່ງໃນດ້ານການແລກປ່ຽນຄວາມຮູ້ວິຊາການຂອງສອງຝ່າຍ ເຊິ່ງຈະໄດ້ເສີມຂະຫຍາຍໃຫ້ມີຄວາມຮອບດ້ານຍິ່ງໆຂຶ້ນໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ມອບປື້ມໃຫ້ກະຊວງປ້ອງກັນຄວາມສະຫງົບ

ຈໍານວນຜູ້ເຂົ້າຊົມ: 453

ສວສສຊ ມອບປື້ມໃຫ້ກະຊວງປ້ອງກັນຄວາມສະຫງົບ

ເພື່ອຈັດຕັ້ງຜັນຂະຫຍາຍຜົນສຳເລັດຂອງການຄົ້ນຄວ້າວິທະຍາສາດເສດຖະກິດ ແລະ ສັງຄົມ ໃຫ້ສັງຄົມໄດ້ຮັບຮູ້ ແລະ ສົ່ງເສີມການອ່ານໃຫ້ມີຄວາມຫຼາກຫຼາຍ, ກວ້າງຂວາງ ແລະ ເຂົ້າເຖິງສະດວກ. ໃນວັນທີ 14 ຕຸລາ 2025 ທີ່ຜ່ານມາ, ສະຫາຍ ເພັດໃສ ເພຍເທບ, ຄະນະພັກ ສວສສຊ, ຫົວໜ້າຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ນຳເອົາປື້ມ, ວາລະສານ ແລະ ສິ່ງພິມຕ່າງໆ ຈໍານວນ 1853 ຫົວ ໄປມອບໃຫ້ກົມຄົ້ນຄວ້າວິທະຍາສາດ ແລະ ປະຫວັດສາດ, ກະຊວງປ້ອງກັນຄວາມສະຫງົບ. ໃນໂອກາດນີ້, ສະຫາຍ ພົຈວ ປອ. ຄຳແຝງ ວັນດີໄຊ ຄະນະພັກກະຊວງ ຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ໄດ້ກ່າວຮັບ ແລະ ສະແດງຄວາມຂອບໃຈມາຍັງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ໄດ້ນຳເອົາປື້ມຈຳນວນດັ່ງກ່າວ ທີ່ມີຄຸນຄ່າສູງ ຖືວ່າເປັນສົມບັດທາງປັນຍາອັນລ້ຳຄ່າ ມາມອບໃຫ້ກົມຄົ້ນຄວ້າວິທະຍາສາດ ແລະ ປະຫວັດສາດ ພ້ອມທັງໃຫ້ຄໍາໝັ້ນສັນຍາວ່າ ຈະນຳເອົາປື້ມດັ່ງກ່າວໄປໝູນໃຊ້ໃຫ້ເກີດປະໂຫຍດສູງສຸດ ໂດຍຈະຮີບໂຮມໄວ້ໃນຫໍສະໝຸດ ປກສ ເພື່ອໃຫ້ພະນັກງານ-ນັກຣົບໃນຖັນແຖວ ປກສ ແລະ ປັນຍາຊົນທົ່ວໄປໄດ້ມາຄົ້ນຄວ້າສຶກສາຮ່ຳຮຽນ. ໃນຕອນທ້າຍ ທັງສອງຝ່າຍໄດ້ຖ່າຍຮູບຮ່ວມກັນ ແລະ ຈະເພິ່ມທະວີການຮ່ວມມືເຊິ່ງກັນ ແລະ ກັນ ໃຫ້ແໜ້ນແຟັນຂຶ້ນກວ່າເກົ່າໃນຕໍ່ໜ້າ.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ທະນົງສຸກ ບຸນປະເສີດ

ກອງປະຊຸມ “ເຜີຍແຜ່ການຄົ້ນຄວ້າ ແລະ ສົນທະນາທາງດ້ານນະໂຍບາຍ: ຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”

ຈໍານວນຜູ້ເຂົ້າຊົມ: 454

ກອງປະຊຸມ “ເຜີຍແຜ່ການຄົ້ນຄວ້າ ແລະ ສົນທະນາທາງດ້ານນະໂຍບາຍ: ຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”

ໃນວັນທີ 10 ຕຸລາ 2025 ທີ່ໂຮງແຮມຄຣາວພາຊ່າ, ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ອົງການຢູນີເຊັບ ປະຈໍາ ສປປ ລາວ, ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໄດ້ຈັດກອງປະຊຸມ “ເຜີຍແຜ່ຜົນການຄົ້ນຄວ້າ ແລະ ສົນທະນາທາງດ້ານນະໂຍບາຍກ່ຽວກັບຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ”, ໂດຍການເປັນປະທານຂອງ ທ່ານ ປອ ນ. ແກ້ວວິວອນ ອຸດທະຈັກ ຮອງປະທານ ສວສສຊ ແລະ ທ່ານ ບິນລາລ ອຸລັງ ເຊັບ ດູລານີ ຜູ້ຕາງໜ້າຈາກອົງການຢູນີເຊັບ ປະຈໍາ ສປປ ລາວ, ມີບັນດາທ່ານຈາກຂະແໜງສາທາລະນະສຸກ, ສະພາແຫ່ງຊາດ, ສຶກສາທິການ ແລະ ກິລາ, ການເງິນ, ແຮງງານ ແລະ ສະຫວັດດີການສັງຄົມ, ສູນກາງສະຫະພັນແມ່ຍິງ, ສູນກາງຊາວໜຸ່ມ, ຄູ່ຮ່ວມພັດທະນາ, ຊ່ຽວຊານ ແລະ ຂະແໜງການກ່ຽວຂ້ອງ ເຂົ້າຮ່ວມຫຼາຍກວ່າ 45 ທ່ານ. ຈຸດປະສົງກອງປະຊຸມດັ່ງກ່າວ ແມ່ນເພື່ອປຶກສາຫາລື ແລະ ສົນທະນາທາງດ້ານະໂຍບາຍທີ່ກ່ຽວຂ້ອງກັບການແຕ່ງດອງໃນໄວເດັກໃນ ສປປ ລາວ ເພື່ອຢຸດຕິການແຕ່ງດອງກ່ອນໄວຂອງເດັກ ໃນ ສປປ ລາວ ສະເໜີຕໍ່ລັດຖະບານໃນການວາງນະໂຍບາຍໃນຕໍ່ໜ້າ.

ທ່ານ ປອ. ນາງ ແກ້ວວິວອນ ອຸດທະຈັກ ໄດ້ມີຄຳເຫັນກ່າວເປີດບາງຕອນວ່າ: ປັດຈຸບັນ ການແຕ່ງງານໃນໄວເດັກໃນຫຼາຍປະເທດທົ່ວໂລກມີທ່າອ່ຽງຫຼຸດລົງຢ່າງຕໍ່ເນື່ອງ, ແຕ່ຫຼາຍພື້ນທີ່ຂອງ ສປປ ລາວ ການແຕ່ງງານໃນໄວເດັກຍັງກວມເອົາ 30.5% ກາຍເປັນບັນຫາສັງຄົມໜຶ່ງທີ່ໜ້າເປັນຫ່ວງ; ເດັກເຫຼົ່ານີ້ໄດ້ຮັບຜົນກະທົບມາຈາກຄວາມ ທຸກຍາກ, ຮີດຄອງປະເພນີ ແລະ ດ້ອຍໂອກາດທາງສັງຄົມ ທີ່ກໍ່ໃຫ້ເກີດຄວາມບໍ່ເທົ່າທຽມກັນທາງດ້ານເພດ, ການເຂົ້າເຖິງການສຶກສາ, ການປິ່ນປົວຮັກສາສຸຂະພາບ. ນອກຈາກນັ້ນ ຍັງສົ່ງຜົນກະທົບຢ່າງໃຫຍ່ຫຼວງຕໍ່ເສດຖະກິດຄອບ ຄົວ, ສັງຄົມ ແລະ ປະເທດຊາດ. ສະແດງອອກໃນຜົນການສຶກສາຂອງຫຼາຍເມືອງຂອງແຂວງຜົ້ງສາລີ ແລະ ບໍລິຄໍາໄຊ ໃຫ້ເຫັນວ່າຕົ້ນທຶນທາງເສດຖະກິດທີ່ເກີດຂຶ້ນຈາກການແຕ່ງງານໄວ ແມ່ນການສູນເສຍໂອກາດການສຶກສາ ການຫຼຸດລົງຂອງຜົນຜະລິດຕະພັນພາຍໃນ ແລະ ການເພີ່ມຂຶ້ນຂອງຄ່າໃຊ້ຈ່າຍດ້ານສຸຂະພາບ ແລະ ສັງຄົມ. ສປປ ລາວ ໄດ້ມີຫຼາຍມາດຕະການກຳນົດເຂົົ້າຫຼາຍນະໂຍບາຍ ແລະ ແຜນງານ ເປັນຕົ້ນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ, ຍຸດທະສາດການພັດທະນາເຍົາວະຊົນ ແລະ ໄວໜຸ່ມ, ແຜນປະຕິບັດງານແຫ່ງຊາດກ່ຽວກັບການຕ້ານ ແລະ ລຶບລ້າງຄວາມຮຸນແຮງຕໍ່ແມ່ຍິງ, ແຜນປະຕິບັດງານແຫ່ງຊາດກ່ຽວກັບແມ່ ແລະ ເດັກ, ນະໂຍບາຍທາງດ້ານປະຊາກອນ ແລະ ການພັດທະນາແຫ່ງຊາດ ແລະ ແຜນງານນາງນ້ອຍ ແຕ່ກໍຍັງບໍ່ສາມາດຢຸດຕິການແຕ່ງງານກ່ອນໄວ. ຜົນການຄົ້ນຄວ້ານີ້ ໄດ້ນໍາສະເໜີເຫດຜົນທາງດ້ານເສດຖະກິດທີ່ຊັດເຈນໃນການຢຸດຕິບັນຫາດັ່ງກ່າວ ແລະ ຍັງສະແດງໃຫ້ເຫັນການເຊື່ອມໂຍງລະຫວ່າງການຂາດແຄນໂອກາດດ້ານການສຶກສາ, ການຈຳກັດທາງເລືອກໃນຕະຫຼາດແຮງງານ, ບັນຫາທາງສັງຄົມ ແລະ ວົງຈອນແຫ່ງຄວາມທຸກຍາກທີ່ສືບຕໍ່ກັນໄປ.

ກອງປະຊຸມໄດ້ຮັບຟັງການນໍາສະເໜີຜົນການຄົ້ນຄວ້າກ່ຽວກັບຜົນກະທົບທາງດ້ານເສດຖະກິດຈາກການແຕ່ງດອງໃນໄວເດັກໃນ ສປປ ລາວ, ການແຕ່ງດອງໃນໄວເດັກ ແລະ ການຖືພາຂອງໄວໝຸ່ມຢຸ່ ສປປ ລາວ ແລະ ການແຕ່ງດອງໃນໄວເດັກ: ຫຼຸດຜ່ອນວົງຈອນຂອງຄວາມທຸກຍາກ, ການປະລະການຮຽນ, ບັນຫາສຸຂະພາບ ແລະ ການສູນເສຍໂອກາດຂອງເດັກໃນ ສປປ ລາວ. ການວິເຄາະຜົນກະທົບທາງດ້ານເສດຖະກິດຂອງການແຕ່ງດອງຂອງເດັກນ້ອຍ ໃນ ສປປ ລາວ ສະແດງໃຫ້ເຫັນວ່າ: ເກືອບ 1/3 ຂອງແມ່ຍິງອາຍຸ 20-24 ປີ (30.5 %) ໄດ້ແຕ່ງດອງກ່ອນອາຍຸ 18 ປີ ເຊິ່ງເປັນອັດຕາທີ່ສູງທີ່ສຸດໃນບັນດາປະເທດສະມາຊິກອາຊຽນ. ການແຕ່ງດອງຂອງເດັກແມ່ນຕິດພັນກັບການເກີດລູກໄວ, ການອອກໂຮງຮຽນ ແລະ ການຫຼຸດຜ່ອນລາຍຮັບຕະຫຼອດຊີວິດ, ການປະກອບສ່ວນເຂົ້າໃນຮອບວຽນຂອງຄວາມທຸກຍາກ ແລະ ຄວາມບໍ່ສະເໝີພາບ. ກອງປະຊຸມໄດ້ພ້ອມກັນປຶກສາຫາລື ແລະ ສົນທະນາຕໍ່ກັບຜົນການສຶກສາກ່ຽວກັບຜົນກະທົບທາງເສດຖະກິດການແຕ່ງງານໃນໄວເດັກຢ່າງກົງໄປກົງມາ, ມີບັນຍາກາດ ແລະ ເປັນເອກະພາບສູງ.

ໃນຕອນທ້າຍກອງປະຊຸມ ທ່ານ ປອ. ນາງ ແກ້ວວິວອນ ອຸດທະຈັກ ໄດ້ກ່າວສະຫຼຸບວ່າ: ການແຕ່ງດອງໃນເດັກ ເຮັດໃຫ້ເດັກຍິງຂາດສິດທິໃນການສຶກສາ, ສຸຂະພາບ ແລະ ເສຍໂອກາດທາງສັງຄົມ. ການລົງທຶນໃນເດັກຍິງ ເປັນການສ້າງກໍາລັງແຮງງານໃນອະນາຄົດ ແລະ ການຂະຫຍາຍຕົວແບບຍືນຍົງຂອງ ສປປ ລາວ. ລັດຖະບານໄດ້ມຸ່ງຫມັ້ນທີ່ຈະເລັ່ງຄວາມພະຍາຍາມໃນທຸກຂະແໜງການ ເພື່ອຮັບປະກັນວ່າເດັກຍິງທຸກຄົນສາມາດບັນລຸຄວາມສາມາດຂອງຕົນ. ການແຕ່ງດອງຂອງເດັກນ້ອຍ ເຮັດໃຫ້ ສປປ ລາວ ເສຍມູນຄ່າທາງເສດຖະກິດເປັນເງິນຫຼາຍ 10 ລ້ານໂດລາຕໍ່ປີ ໂດຍສະເພາະຈາກການສຶກສາ ແລະ ຜະລິດຕະພັນທີ່ຫຼຸດລົງ. ການຢຸດຕິການແຕ່ງດອງກ່ອນໄວສາມາດສ້າງຜົນປະໂຫຍດສູງ 41.2 ລ້ານໂດລາ ຫຼື 790 ຕື້ກີບໃນແຕ່ລະປີ; ໃນນີ້, ຜົນປະໂຫຍດຈາກການຫຼຸດຜ່ອນການອອກໂຮງ ຮຽນເທົ່າກັບ 21.9 ລ້ານໂດລາສະຫະລັດ ຫຼື 473 ຕື້ກີບ, ຜົນປະໂຫຍດຈາກການຫຼຸດການຂາດສານອາຫານແບບຊໍາເຮື້ອໃນເດັກອາຍຸຕໍ່າກວ່າ 5 ປີ ເທົ່າກັບ 13.9 ລ້ານໂດລາສະຫະລັດ ຫຼື 299 ຕື້ກວ່າກີບ ແລະ ຜົນປະໂຫຍດຈາກການຫຼຸດອັດຕາການຕາຍຂອງເດັກຕໍ່າກວ່າ 5 ປີ ເທົ່າກັບ 5.4 ລ້ານໂດລາ ຫຼື 116 ຕື້ກວ່າກີບ.

ທ່ານ ບິນລາລ ອຸລັງ ເຊັບ ດູລານີ ຜູ້ຕາງໜ້າຈາກອົງການຢູນີເຊັບ ປະຈໍາ ສປປ ລາວ ກ່າວມີຄຳເຫັນວ່າ: ໃນແຕ່ລະປີ ເດັກຍິງທີ່ໄດ້ຮັບການສຶກສາ ແລະ ຮຽນຈົບ ຈະສາມາດເພີ່ມລາຍຮັບຕະຫຼອດຊີວິດ ແລະ ເສີມສ້າງຊຸມຊົນຂອງເຂົາເຈົ້າໃຫ້ເຂັ້ມແຂງ ແລະ ຍືນຍົງ. ນອກຈາກດ້ານເສດຖະກິດ, ການສຶກສາແລ້ວ ເດັກຍິງທີ່ແຕ່ງດອງກ່ອນໄວອັນຄວນ ຍັງປະເຊີນກັບຄວາມສ່ຽງດ້ານສຸຂະພາບທີ່ສູງຂຶ້ນ, ໂອກາດທີ່ຈໍາກັດ ແລະ ອໍານາດໃນການຕັດສິນໃຈຕໍ່າ. ການຢຸດຕິການແຕ່ງດອງຂອງເດັກບໍ່ພຽງແຕ່ແມ່ນບຸລິມະສິດດ້ານສິດທິມະນຸດເທົ່ານັ້ນ ແຕ່ມັນຍັງເປັນການລົງທຶນທີ່ດີ ເພື່ອການພັດທະນາປະເທດຊາດແບບຍືນຍົງ. ອົງການ UNICEF ພ້ອມສະໜັບສະໜູນລັດຖະບານ ແລະ ຄູ່ຮ່ວມງານ ເພື່ອປົກປ້ອງສິດທິຂອງເດັກຍິງ, ຂະຫຍາຍການເຂົ້າເຖິງການສຶກສາ, ສາທາລະນະສຸກ ແລະ ສົ່ງເສີມຄວາມສະເໝີພາບ ສຳລັບທຸກຄົນ.

ຂຽນຂ່າວ: ສຸລິຕາ ສຸກມົນຕີ

ຖ່າຍພາບ: ຄໍາແສນ ໝື່ນຕາແສງ

ສວສສຊ ສຳເລັດການຝຶກອົບຮົມ ວິທີວິທະຍາການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າ

ຈໍານວນຜູ້ເຂົ້າຊົມ: 383

ສວສສຊ ສຳເລັດການຝຶກອົບຮົມ ວິທີວິທະຍາການນໍາໃຊ້ສະຖິຕິພື້ນຖານເຂົ້າໃນການຄົ້ນຄວ້າ

ໃນລະຫວ່າງວັນທີ 6-14 ຕຸລາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ສຳ ເລັດຊຸດຝຶກອົບຮົມສໍາລັບນັກຄົ້ນຄວ້າໜຸ່ມ ຊຸດທີ II; ໃຫ້ກຽດເປັນປະທານກ່າວເປີດຂອງ ທ່ານ ປອ. ສະຖາບັນດິດ ອິນສີຊຽງໃໝ່ ຮອງປະທານ ສວສສຊ ແລະ ໃຫ້ກຽດກ່າວປິດຂອງ ທ່ານ ໄຊສົງຄາມ ມະໂນທັມ ຮອງປະທານ ສວສສຊ; ມີບັນດານັກສໍາມະນາກອນຈາກສະຖາບັນຄົ້ນຄວ້າອ້ອມຂ້າງ ສວສສຊ ເຂົ້າຮ່ວມ ຈໍານວນ 24 ທ່ານ.

ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ກ່າວວ່າ: ການຝຶກອົບຮົມໃນຄັ້ງນີ້ ແມ່ນແນ່ໃສ່ສົ່ງເສີມຄວາມອາດສາມາດ ໃຫ້ແກ່ພະນັກງານ-ລັດຖະກອນ, ກໍ່ຄືບັນດານັກຄົ້ນຄວ້າໄວໜຸ່ມຂອງ ສວສສຊ ໃຫ້ມີທັກສະ, ຂີດຄວາມສາມາດທາງດ້ານການຂີດຂຽນບົດຄົ້ນຄວ້າວິທະຍາສາດເສດຖະກິດ ແລະ ສັງຄົມ ຢ່າງມີປະສິດທິພາບ, ປະສິດທິຜົນ ແລະ ຄຸນນະພາບທີ່ສູງຂຶ້ນ, ເຊິ່ງການຝຶກອົບຮົມກໍ່ແມ່ນວຽກງານໜຶ່ງທີ່ຈໍາເປັນ ແລະ ມີຄວາມສໍາຄັນ ສໍາລັບຂະບວນການຮຽນຮູ້ໃນບັນດາຫຼັກການຕ່າງໆ ຂອງການຄົ້ນຄວ້າວິທະຍາສາດ ພ້ອມທັງເປັນການສ້າງຄັງຄວາມຮູ້, ຄວາມເຂົ້າໃຈໃຫ້ເລິກເຊິ່ງໃນການເຮັດວຽກຕົວຈິງຂອງນັກຄົ້ນຄວ້າໄວໜຸ່ມຂອງ ສວສສຊ; ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ເຂົ້າຮ່ວມເອົາໃຈໃສ່ ຫ້າວຫັນແລກປ່ຽນຄໍາຄິດເຫັນ ແລະ ຕັ້ງຄໍາຖາມເຈາະຈີ້ມຖ້າຫາກບັນຫາໃດບໍ່ເຂົ້າໃຈ, ໂດຍອີງໃສ່ບົດຮຽນຕົວຈິງທີ່ໄດ້ປະຕິບັດຢ່າງສ້າງສັນ ແລະ ກົງໄປກົງມາ ສາມາດກໍາແໜ້ນເນື້ອໃນບົດຮຽນ ແລະ ສາມາດນໍາເອົາໄປໃຊ້ເຂົ້າໃນພຶດຕິກໍາຕົວຈິງ ໂດຍສະເພາະການຂຽນໂຄງການຄົ້ນຄວ້າ ໃຫ້ມີປະສິດທິພາບທີ່ສູງຂຶ້ນກວ່າເກົ່າ.

ຊຸດຝຶກອົບຮົມໃນຄັ້ງນີ້ ນັກສໍາມະນາກອນໄດ້ຮຽນຮູ້ກ່ຽວກັບການເກັບກໍາ ແລະ ສ້າງຖານຂໍ້ມູນດ້ານປະລິ ມານ; ການວິເຄາະຂໍ້ມູນແບບພັນລະນາ; ທິດສະດີການປະເມີນຄ່າ; ການທົດສອບສົມມຸດຕິຖານ; ການວິເຄາະຄວາມສໍາພັນ ແລະ ການວິເຄາະເສັ້ນທົດຖອຍແບບງ່າຍດາຍ, ມີການນຳສະເໜີໂຄງຮ່າງບົດສະເໜີການຄົ້ນຄວ້າ, ນັກສໍາມະນາກອນໄດ້ປະຕິບັດຕົວຈິງໃນການຂຽນບົດສະເໜີຫົວຂໍ້ໂຄງການຄົ້ນຄວ້າ ແລະ ມີການແບ່ງກຸ່ມຄົ້ນຄວ້າ ພ້ອມທັງຂຶ້ນນໍາສະເໜີຜົນງານຂອງກຸ່ມຕົນ;

ທ່ານ ໄຊສົງຄາມ ມະໂນທັມ ໄດ້ກ່າວວ່າ: ການຝຶກອົບຮົມຄັ້ງນີ້ ແມ່ນມີຄວາມຈຳເປັນ ແລະ ສຳຄັນເປັນຢ່າງຍິ່ງ, ທັງເປັນການສົ່ງເສີມທັກສະການຄົ້ນຄວ້າວິທະຍາສາດເສດຖະກິດ-ສັງຄົມ ໃຫ້ມີຄຸນນະພາບທີ່ດີຂຶ້ນເທື່ອລະກ້າວ ໂດຍສະເພາະແມ່ນການເສີມສ້າງຄວາມອາດສາມາດໃຫ້ບັນດານັກຄົ້ນຄວ້າໜຸ່ມ ພາຍໃນ ສວສສຊ ໃຫ້ໄດ້ຮັບຮູ້ເຖິງຂະບວນການຄົ້ນຄວ້າ ແລະ ບັນດາໂປຣແກມ ທີ່ນໍາມາໃຊ້ສຳລັບການວິເຄາະຂໍ້ມູນຕ່າງໆ ທີ່ເປັນປະໂຫຍດໃຫ້ແກ່ຜົນຂອງການຄົ້ນຄວ້າ. ບັນດານັກສໍາມະນາກອນ ສາມາດຮັບຮູ້, ເຂົ້າໃຈ ແລະ ກຳໄດ້ເຖິງບົດຮຽນຕ່າງໆທີ່ກ່າວມານັ້ນ ເພື່ອນໍາໄປໝູນໃຊ້ເຂົ້າໃນການຄົ້ນຄວ້າໃນຂົງເຂດທີ່ກ່ຽວຂ້ອງກັບສະຖາບັນຄົ້ນຄວ້າຂອງຕົນໃຫ້ປະກົດຜົນເປັນຈິງ ແລະ ໃນຕອນທ້າຍຂອງພິທີ ທ່ານຍັງໄດ້ໃຫ້ກຽດມອບມອບໃບຢັ້ງຢືນໃຫ້ກັບນັກສຳມະນາກອນທີ່ເຂົ້າຮ່ວມຊຸດຝຶກອົບຮົມອີກດ້ວຍ.