douangchai lovan – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສວສສຊ ສຳມະນາວິທະຍາສາດທີ່ ແຂວງຫຼວງພະບາງ

ຈໍານວນຜູ້ເຂົ້າຊົມ: 24

ສວສສຊ ສຳມະນາວິທະຍາສາດທີ່ ແຂວງຫຼວງພະບາງ

ໃນຕອນເຊົ້າຂອງວັນທີ 08 ພຶດສະພາ 2026 ທີ່ຜ່ານມາ, ທີ່ຫ້ອງປະຊຸມຫ້ອງວ່າການປົກຄອງແຂວງຫຼວງພະບາງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມສຳມະນາວິທະຍາສາດ ແລະ ເຜີຍແຜ່ຜົນການຄົ້ນຄວ້າທີ່ພົ້ນເດັ່ນ ຕິດພັນກັບພາລະບົດບາດຂອງ ສວສສຊ. ໃຫ້ກຽດເປັນປະທານໂດຍ ທ່ານ ປອ. ສະຖາບັນດິດ ອິນສີຊຽງໃຫມ່, ຮອງປະທານ ສວສສຊ. ມີບັນດານັກຄົ້ນຄວ້າຈາກ ສວສສຊ, ພະນັກງານຫຼັກແຫຼ່ງຈາກພະແນກການອ້ອມຂ້າງແຂວງ, ມີອາຈານ ແລະ ນັກສຶກສາຈາກມະຫາວິທະຍາໄລສຸພານຸວົງ ເຂົ້າຮ່ວມ. ຈຸດປະສົງຂອງກອງປະຊຸມແມ່ນເພື່ອສ້າງຄວາມຮັບຮູ້ກ່ຽວກັບພາລະບົດບາດຂອງ ສວສສຊ ພ້ອມທັງເຜີຍແຜ່ຜົນງານການຄົ້ນຄວ້າທີ່ພົ້ນເດັ່ນ ຕິດພັນກັບສະພາບເສດຖະກິດຂອງລາວ, ພາກພື້ນ ແລະ ຂອງໂລກ.

ກອງປະຊຸມໄດ້ນໍາສະເໜີທີ່ຕັ້ງພາລະບົດບາດໜ້າທີ່ ແລະ ເຜີຍແຜ່ຜົນງານການຄົ້ນຄວ້າວິທະຍາສາດທີ່ພົ້ນເດັ່ນຂອງ ສວສສຊ ເຊັ່ນ: ຫົວຂໍ້ຍົກສູງຄວາມສັກສິດຂອງກົດໝາຍ ໃນການປົກຄອງອໍານາດລັດຂັ້ນທ້ອງຖິ່ນ ຕາມແນວທາງຂອງພັກ, ຜົນກະທົບຕໍ່ເສດຖະກິດ ຈາກການປະລະການຮຽນ ແລະ ການຄ້າງຫ້ອງ ຍ້ອນພາວະຂາດສານອາຫານ, ບົດປະເມີນເສດຖະກິດມະຫາພາກຂອງ ສປປ ລາວ ແລະ ທ່າອ່ຽງ 2026 . ກອງປະຊຸມຄັ້ງນີ້ ເປັນການສ້າງໂອກາດການຮ່ວມມື ແລະ ພົວພັນແລກປ່ຽນລະຫວ່າງທ້ອງຖິ່ນກັບສູນກາງ ກໍຄືແຂວງຫຼວງພະບາງ ແລະ ສວສສຊ ໃນການສະໜອງຂໍ້ມູນຂ່າວສານເຊິ່ງກັນ ແລະ ກັນ, ເປັນຂົວຕໍ່ທີ່ສຳຄັນໃນການນຳເອົາຂໍ້ມູນວິທະຍາສາດ ແລະ ຜົນການຄົ້ນຄວ້າຕົວຈິງມາຮັບໃຊ້ໃຫ້ແກ່ການຊີ້ນຳ-ນຳພາຂອງອຳນາດການປົກຄອງແຂວງ, ເພື່ອຊ່ວຍໃນການແກ້ໄຂບັນຫາດ້ານເສດຖະກິດ ແລະ ການພັດທະນາສັງຄົມຢູ່ພາຍໃນແຂວງ ໃຫ້ສອດຄ່ອງກັບສະພາບຄວາມເປັນຈິງມີລັກສະນະວິທະຍາສາດ.

ໃນໂອກາດດັ່ງກ່າວ ທ່ານ ຄິນຄຳ ເລັ່ງສະຫວັດ, ຫົວໜ້າຫ້ອງວ່າການປົກຄອງແຂວງຫຼວງພະບາງ ໄດ້ກ່າວຕອນຮັບຄະນະຈາກ ສວສສຊ, ພ້ອມດຽວກັນນັ້ນ ຍັງໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ການດຳເນີນກອງປະຊຸມສຳມະນາໃນຄັ້ງນີ້ ເພາະຈະເປັນຄວາມຮູ້, ເປັນບົດຮຽນອັນດີ ແລະ ສາມາດນໍາໄປຈັດຕັ້ງປະຕິບັດວຽກງານຕົວຈິງ ເພື່ອເປັນບ່ອນອີງທີ່ມີລັກສະນະວິທະຍາສາດໃນການວາງແຜນພັດທະນາທ້ອງຖິ່ນ; ການຄົ້ນຄວ້າທ່າແຮງບົ່ມຊ້ອນຂອງແຂວງ ເພື່ອວາງມາດຕະການຮັບມືກັບສິ່ງທ້າທາຍຕ່າງໆຢ່າງທັນສະພາບ, ເພີ່ມຊ່ອງທາງສ້າງລາຍຮັບ ແລະ ສົ່ງເສີມການຜະລິດພາຍໃນໃຫ້ເຂັ້ມແຂງ; ເພີ່ມທະວີການຕິດຕາມ ແລະ ຄຸ້ມຄອງລາຄາສິນຄ້າຕົວຈິງຢູ່ຕາມທ້ອງຕະຫຼາດພາຍໃນແຂວງ ເພື່ອບໍ່ໃຫ້ກະທົບຕໍ່ຊີວິດການເປັນຢູ່ຂອງພໍ່ແມ່ປະຊາຊົນຫຼາຍເກີນໄປ ຕິດພັນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ຮັບປະກັນຄວາມເປັນລະບຽບຮຽບຮ້ອຍໃນສັງຄົມ ແລະ ຫວັງຢ່າງຍິ່ງວ່າຈະໄດ້ຮັບການຮ່ວມມື, ການຊ່ວຍເຫຼືອທາງດ້ານວິຊາການຈາກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນຕໍ່ໜ້າ.

ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ມີການສົນທະນາແລກປ່ຽນຄຳຄິດຄຳເຫັນຢ່າງກົງໄປກົງມາ ຖືເປັນບາດກ້າວທີ່ສຳຄັນໃນການນຳເອົາຜົນການຄົ້ນຄວ້າທາງວິທະຍາສາດ ມາໝູນໃຊ້ເຂົ້າໃນການວາງແຜນຍຸດທະສາດ ເຊິ່ງຈະເປັນຂໍ້ມູນອັນສໍາຄັນໃນການປັບປຸງວຽກງານການຄົ້ນຄວ້າວິທະຍາສາດ ແລະ ປຶກສາຫາລືກ່ຽວກັບຄວາມເປັນໄປໄດ້ໃນການຮ່ວມມືໃນຂົງເຂດການຄົ້ນຄວ້າທາງດ້ານວິຊາການລະຫວ່າງ ສວສສຊ ແລະ ແຂວງຫຼວງພະບາງ ເພື່ອເຮັດໃຫ້ແຂວງຫຼວງພະບາງ ສືບຕໍ່ເປັນສູນກາງທາງດ້ານວັດທະນະທຳ ແລະ ການທ່ອງທ່ຽວ ທີ່ມີການເຕີບໂຕທາງເສດຖະກິດຢ່າງແຂງແຮງ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ເສີມສ້າງຄວາມສາມາດດ້ານການຄົ້ນຄວ້າ ໃນການດຳເນີນທຸລະກິດທີ່ມີຄວາມຮັບຜິດຊອບຢູ່ ສປປ ລາວ

ຈໍານວນຜູ້ເຂົ້າຊົມ: 16

ເສີມສ້າງຄວາມສາມາດດ້ານການຄົ້ນຄວ້າ ໃນການດຳເນີນທຸລະກິດທີ່ມີຄວາມຮັບຜິດຊອບຢູ່ ສປປ ລາວ

ຫ້ອງການຄຸ້ມຄອງວິທະຍາສາດ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮ່ວມກັບຫ້ອງການຂ້າຫຼວງໃຫຍ່ແຫ່ງສະຫະປະຊາຊາດດ້ານສິດທິມະນຸດ (OHCHR) ແລະ ອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ (UNDP) ຈັດກອງປະຊຸມຝຶກອົບຮົມພາຍໃຕ້ຫົວຂໍ້ “ການເສີມສ້າງຂີດຄວາມສາມາດໃນການສົ່ງເສີມແນວທາງການດຳເນີນທຸລະກິດຢ່າງມີຄວາມຮັບຜິດຊອບ ແລະ ດ້ານສິດທິມະນຸດ” ທີ່ໂຮງແຮມເສດຖາພາເຣດ, ໃນວັນທີ 6-7 ພຶດສະພາ 2026; ໂດຍການເປັນປະທານຮ່ວມຂອງທ່ານ ປອ. ນ. ແກ້ວວິວອນ ອຸດທະຈັກ ຮອງປະທານ ສວສສຊ, ທ່ານ ນາງ ມາຕີນ ເທເຣ ເຣີ (Ms. Martine Thérer) ຜູ້ຕາງໜ້າອົງການ UNDP ປະຈຳ ສປປ ລາວ ແລະ ທ່ານ ນາງ ລໍຣາ ມາຊິນີ (Ms. Laura Macini) ເຈົ້າໜ້າທີ່ດ້ານສິດທິມະນຸດຂອງ OHCHR, ມີບັນດາທ່ານຜູ້ຕາງໜ້າຈາກສະພາແຫ່ງຊາດ, ກະຊວງການເງິນ, ກະຊວງອຸດສະຫະກຳ ແລະ ການຄ້າ, ສະຖາບັນການເມືອງ ແລະ ການປົກຄອງແຫ່ງຊາດ, ມະຫາວິທະຍາໄລແຫ່ງຊາດ, ຄູ່ຮ່ວມພັດທະນາ, ຊ່ຽວຊານ ແລະ ຂະແໜງການທີ່ກ່ຽວຂ້ອງ ເຂົ້າຮ່ວມຫຼາຍກວ່າ 45 ທ່ານ.

ກອງປະຊຸມໄດ້ນໍາສະເໜີບັນດາຫົວຂໍ້ທີ່ສໍາຄັນ ເປັນຕົ້ນແມ່ນການດຳເນີນທຸລະກິດ ແລະ ຫຼັກການສິດທິມະນຸດ ພາຍໃຕ້ກອບວຽກສາກົນ ສູ່ການເຊືີ່ອມສານລົງສູ່ບໍລິບົດລາວ; ຂໍ້ມູນພື້ນຖານຂອງ BHR ແຫ່ງຊາດ; ຜົນການຄົ້ນຄວ້າກ່ຽວກັບຜົນກະທົບທາງທຸລະກິດຕໍ່ສິດທິມະນຸດ; ບັນດາກົດໝາຍ, ນະໂຍບາຍ ແລະ ສະຖາບັນກ່ຽວຂ້ອງທີ່ຕ້ອງປະເມີນ; ກິດຈະກຳອອກແບບການຄົ້ນຄວ້າຂໍ້ມູນພື້ນຖານ ທີ່ເນັ້ນໃສ່ບໍລິບົດ ສປປ ລາວ ແລະ ຈາກການຄົ້ນຄວ້າ ກາຍເປັນຜົນໄດ້ຮັບທີີ່ດີ ເຮັດໃຫ້ຜູ້ເຂົ້າຮ່ວມຝຶກອົບຮົມມີຄວາມສົນໃຈ ແລະ ແລກປ່ຽນປະກອບຄໍາຄິດຄໍາເຫັນຢ່າງສ້າງສັນ.

ໃນໂອກາດດັ່ງກ່າວ ທ່ານ ປອ.ນ. ແກ້ວວິວອນ ອຸດທະຈັກ ໄດ້ກ່າວວ່າ: ການຂະຫຍາຍຕົວທາງເສດຖະກິດ ຕ້ອງຕິດພັນກັບຄວາມຍຸດຕິທຳທາງສັງຄົມ ບົນພື້ນຖານຍຶດຖືຫຼັກການສິດທິມະນຸດ, ການດຳເນີນທຸລະກິດໄດ້ກາຍເປັນເຄືີ່ອງມືທີີ່ສ້າງຄວາມບໍ່ສະເໝີພາບ, ມີການຂູດຮີດ ແລະ ມີຄວາມເຊື່ອມໂຊມຂອງຊີວິດຊຸມຊົນ. ກົງກັນຂ້າມ ເວລາທຸລະກິດຖືກປະເມີນວິເຄາະ, ໃຫ້ຄໍາແນະນໍາ ແລະ ຈັດຕັ້ງປະຕິບັດ ພາຍໃຕ້ຂອບສິດທິມະນຸດ, ມັນຈະກາຍເປັນພະລັງຊຸກຍູ້ການພັດທະນາແບບຍືນຍົງ ທີີ່ບໍ່ປະຖິ້ມໃຜໄວ້ເບື້ອງຫຼັງ.

ທ່ານ ນາງ ມາຕີນ ເທເຣ ເຣີ (Ms. Martine Thérer), ຜູ້ຕາງໜ້າອົງການ UNDP ປະຈຳ ສປປ ລາວ ໄດ້ກ່າວວ່າ: ນະໂຍບາຍທີ່ເຂັ້ມແຂງ ແລະ ແນວປະຕິບັດທາງທຸລະກິດທີ່ຮັບຜິດຊອບ ບໍ່ສາມາດສ້າງຂຶ້ນໄດ້ຈາກການຄາດເດົາ ແຕ່ຈຳເປັນຕ້ອງອີງໃສ່ຫຼັກຖານຂໍ້ມູນທີ່ໜ້າເຊື່ອຖື ແລະ ຂັບເຄື່ອນໂດຍພາຍໃນປະເທດ.

ທ່ານ ນາງ ລໍຣາ ມາຊິນີ (Ms. Laura Macini), ເຈົ້າໜ້າທີ່ດ້ານສິດທິມະນຸດຂອງ OHCHR ໄດ້ກ່າວວ່າ: ດ້ວຍຫຼັກການຊີ້ນຳແຫ່ງສະຫະປະຊາຊາດ ວ່າດ້ວຍທຸລະກິດ ແລະ ສິດທິມະນຸດ ພວກເຮົາມີກອບການດຳເນີນງານທີ່ຊັດເຈນ ແລະ ໄດ້ຮັບການຍອມຮັບຢ່າງກວ້າງຂວາງ ເຊິ່ງກຳນົດໜ້າທີ່ຂອງລັດ ແລະ ຄວາມຮັບຜິດຊອບຂອງວິສາຫະກິດ. ປັດຈຸ ບັນ, ຈຸດສຸມແມ່ນການນຳຫຼັກການເຫຼົ່ານີ້ໄປປະຕິບັດໃຫ້ເກີດຜົນຢ່າງເປັນຮູບປະທຳໃນບໍລິບົດຂອງແຕ່ລະປະເທດ”. UNDP ແລະ OHCHR ຍັງຄົງຢືນຢັນຄວາມມຸ່ງໝັ້ນໃນການສະໜັບສະໜູນລັດຖະບານ ສປປ ລາວ ແລະ ບັນດາພາກສ່ວນພາຍໃນປະເທດ ໃນການສົ່ງເສີມແນວປະຕິບັດທາງທຸລະກິດຢ່າງຮັບຜິດຊອບ ຜ່ານການເສີມສ້າງວຽກຄົ້ນຄວ້າ, ການສົນທະນານະໂຍບາຍແບບມີສ່ວນຮ່ວມ ແລະ ການປັບໃຫ້ສອດຄ່ອງກັບມາດຕະຖານສາກົນ.

ກອງປະຊຸມຝຶກອົບຮົມຄັ້ງນີ້ໄດ້ສ້າງຄວາມຮັບຮູ້ທີ່ສໍາຄັນກ່ຽວກັບເຄື່ອງມື ແລະ ຫຼັກການຕ່າງໆ ທີ່ຕິດພັນກອບວຽກທຸລະກິດ ແລະ ສິດທິມະນຸດ, ສາມາດຊ່ວຍອອກແບບວິທີການໃນການຄົ້ນຄວ້າ ເພື່ອສ້າງຂໍ້ມູນພື້ນຖານທາງດ້ານນະໂຍບາຍ ແລະ ການຄຸ້ມຄອງທຸລະກິດທີ່ເໝາະສົມສອດຄ່ອງກັບສະພາບຕົວຈິງຂອງລາວ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ສຳມະນາວິທະຍາສາດທີ່ ແຂວງຊຽງຂວາງ

ຈໍານວນຜູ້ເຂົ້າຊົມ: 100

ສວສສຊ ສຳມະນາວິທະຍາສາດທີ່ ແຂວງຊຽງຂວາງ

ໃນຕອນເຊົ້າຂອງວັນທີ 05 ພຶດສະພາ 2026 ທີ່ຜ່ານມາ, ທີ່ຫ້ອງປະຊຸມຫ້ອງວ່າການປົກຄອງແຂວງຊຽງຂວາງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄ333ດ້ຈັດກອງປະຊຸມສຳມະນາວິທະຍາສາດ ແລະ ເຜີຍແຜ່ຜົນການຄົ້ນຄວ້າພົ້ນເດັ່ນ ຕິດພັນກັບພາລະບົດບາດຂອງ ສວສສຊ. ໃຫ້ກຽດເປັນປະທານຮ່ວມໂດຍ ທ່ານ ປອ. ສະຖາບັນດິດ ອິນສີຊຽງໃຫມ່, ຮອງປະທານ ສວສສຊ ແລະ ທ່ານ ຫົງຄຳ ພິມມະສານ, ຮອງປະທານຄະນະກຳມະການປົກຄອງແຂວງຊຽງຂວາງ. ມີບັນດານັກຄົ້ນຄວ້າ ສວສສຊ, ພະນັກງານຫຼັກແຫຼ່ງຈາກພະແນກການ, ນັກສຶກສາ ທິດສະດີການເມືອງຂັ້ນກາງ ຮຸ່ນທີ V ໂຮງຮຽນການເມືອງ ແລະ ການປົກຄອງແຂວງເຂົ້າຮ່ວມ. ຈຸດປະສົງຂອງກອງປະຊຸມແມ່ນເພື່ອສ້າງຄວາມຮັບຮູ້ກ່ຽວກັບພາລະບົດບາດຂອງ ສວສສຊ ພ້ອມທັງເຜີຍແຜ່ຜົນງານການຄົ້ນຄວ້າພົ້ນເດັ່ນ ຕິດພັນກັບສະພາບເສດຖະກິດຂອງລາວ ແລະ ສະພາບການຂອງໂລກທີ່ມີການປ່ຽນແປງທີ່ຈະສົ່ງຜົນກະທົບໃນປັດຈຸບັນ.

ກອງປະຊຸມໄດ້ຮັບຟັງການນໍາສະເໜີທີ່ຕັ້ງພາລະບົດບາດໂດຍລວມຂອງ ສວສສຊ ແລະ ບົດບາດຂອງ ສູນຂໍ້ມູນຂ່າວສານ ແລະ ຝຶກອົບຮົບ ໃນຖານະເປັນຄັງສາງຂໍ້ມູນຂອງສະຖາບັນ, ໃນວາລະດຽວກັນ ກໍໄດ້ເຜີຍແຜ່ຜົນງານການຄົ້ນຄວ້າວິທະຍາສາດທີ່ພົ້ນເດັ່ນຂອງ ສວສສຊ ເຊັ່ນ: ຫົວຂໍ້ຍົກສູງຄວາມສັກສິດຂອງກົດໝາຍ ໃນການປົກຄອງອໍານາດລັດຂັ້ນທ້ອງຖິ່ນ ຕາມແນວທາງຂອງພັກ, ຜົນກະທົບຕໍ່ເສດຖະກິດ ຈາກການປະລະການຮຽນ ແລະ ການຄ້າງຫ້ອງ ຍ້ອນພາວະຂາດສານອາຫານ, ບົດປະເມີນເສດຖະກິດມະຫາພາກຂອງ ສປປ ລາວ ແລະ ທ່າອ່ຽງ 2026 . ກອງປະຊຸມຄັ້ງນີ້ ເປັນການສ້າງໂອກາດການຮ່ວມມື ແລະ ພົວພັນແລກປ່ຽນລະຫວ່າງທ້ອງຖິ່ນກັບສູນກາງ ກໍຄືແຂວງຊຽງຂວາງ ແລະ ສວສສຊ ໃນການສະໜອງຂໍ້ມູນຂ່າວສານເຊິ່ງກັນ ແລະ ກັນ, ເປັນຂົວຕໍ່ທີ່ສຳຄັນໃນການນຳເອົາຂໍ້ມູນວິທະຍາສາດ ແລະ ຜົນການຄົ້ນຄວ້າຕົວຈິງມາຮັບໃຊ້ໃຫ້ແກ່ການຊີ້ນຳ-ນຳພາຂອງອຳນາດການປົກຄອງແຂວງ, ເພື່ອຊ່ວຍໃນການແກ້ໄຂບັນຫາດ້ານເສດຖະກິດ ແລະ ການພັດທະນາສັງຄົມຢູ່ພາຍໃນແຂວງຊຽງຂວາງ ໃຫ້ສອດຄ່ອງກັບສະພາບຄວາມເປັນຈິງມີລັກສະນະວິທະຍາສາດ.

ໃນໂອກາດດັ່ງກ່າວ ທ່ານ ຫົງຄຳ ພິມມະສານ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ບັນຍາກາດການດຳເນີນກອງປະຊຸມ ທີ່ເຕັມໄປດ້ວຍເນື້ອໃນອັນເລິກເຊິ່ງ ແລະ ມີຄຸນຄ່າທາງດ້ານວິທະຍາສາດ ສອດຄ່ອງກັບທິດທາງການພັດທະນາຂອງແຂວງຊຽງຂວາງ ໂດຍສະເພາະເປັນບ່ອນອີງທາງດ້ານທິດສະດີ ແລະ ພຶດຕິກຳ; ຂໍ້ມູນເຫຼົ່ານີ້ ຈະຊ່ວຍໃຫ້ແຂວງສາມາດສ້າງເສດຖະກິດເອກະລາດເປັນເຈົ້າຕົນເອງ ຕິດພັນກັບການເຊື່ອມໂຍງຢ່າງເປັນເຈົ້າການໄດ້ຢ່າງມີປະສິດທິຜົນ, ເພື່ອເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງມີຄວາມສອດຄ່ອງກັບທິດທາງລວມຂອງສູນກາງ ແລະ ແທດເໝາະກັບຈຸດພິເສດທ່າແຮງທີ່ແທ້ຈິງຂອງທ້ອງຖິ່ນ, ເປັນກ້າວເລີ່ມຕົ້ນຂອງການນຳເອົາຜົນການຄົ້ນຄວ້າໄປໝູນໃຊ້ເຂົ້າໃນວຽກງານຕົວຈິງໃຫ້ມີປະສິດທິພາບ.

ກອງປະຊຸມດຳເນີນໄປດ້ວຍບັນຍາກາດທີ່ຟົດຟື້ນ ແລະ ມີການສົນທະນາແລກປ່ຽນຄຳຄິດຄຳເຫັນຢ່າງກົງໄປກົງມາ ເຊິ່ງຈະເປັນຂໍ້ມູນອັນສໍາຄັນໃນການປັບປຸງວຽກງານການຄົ້ນຄວ້າວິທະຍາສາດ ແລະ ປຶກສາຫາລືກ່ຽວກັບຄວາມເປັນໄປໄດ້ໃນການຮ່ວມມືໃນຂົງເຂດການຄົ້ນຄວ້າທາງດ້ານວິຊາການລະຫວ່າງ ສວສສຊ ແລະ ແຂວງຊຽງຂວາງໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ມຸນິນ ພົນສັກດາ

ສວສສຊ ພົບປະແລກປ່ຽນບົດຮຽນກັບຄະນະນັກຄົ້ນຄວ້າ ສສ. ຫວຽດນາມ

ຈໍານວນຜູ້ເຂົ້າຊົມ: 93

ສວສສຊ ພົບປະແລກປ່ຽນບົດຮຽນກັບຄະນະນັກຄົ້ນຄວ້າ ສສ. ຫວຽດນາມ

ກອງປະຊຸມພົບປະແລກປ່ຽນ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກັບຄະນະຜູ້ແທນຈາກສະຖາບັນບັນດິດວິທະຍາສາດສັງຄົມແຫ່ງຊາດຫວຽດນາມ (VASS) ໄດ້ຈັດຂຶ້ນໃນຕອນເຊົ້າຂອງວັນທີ 4 ພຶດສະພາ 2026 ທີ່ ສວສສຊ. ຝ່າຍລາວນຳໂດຍທ່ານ ປອ. ວັນໄຊ ໄຊຍະວົງ, ຮອງຫົວໜ້າສະຖາບັນຄົ້ນຄວ້າເສດຖະ ກິດມະຫາພາກ ພ້ອມດ້ວຍຄະນະ, ຝ່າຍຫວຽດນາມນຳໂດຍສະຫາຍ ຮສ.ປອ. ເຍືອງ ວັນ ຮຸຍ (Assoc. Prof. Duong Van Huy), ຫົວໜ້າພະແນກຮ່ວມມືສາກົນ ສະຖາບັນຄົ້ນຄວ້າອາຊີປາຊີຟິກ ພ້ອມດ້ວຍຄະນະຈາກ ສະຖາບັນບັນດິດວິທະຍາ ສາດສັງຄົມແຫ່ງຊາດຫວຽດນາມ ເຂົ້າຮ່ວມ.

ຈຸດປະສົງຂອງການພົບປະໃນຄັ້ງນີ້ ແມ່ນເພື່ອແລກປ່ຽນຂໍ້ມູນກ່ຽວກັບການພັດທະນາເສດຖະກິດ-ສັງຄົມຂອງລາວ, ພ້ອມທັງໂອກາດ ແລະ ສິ່ງທ້າທາຍຈາກການເຊື່ອມຈອດພື້ນຖານໂຄງລ່າງ ແລະ ການແຂ່ງຂັນທາງພູມສາດການ ເມືອງໃນອະນຸພາກພື້ນແມ່ນ້ຳຂອງ. ທັງສອງຝ່າຍໄດ້ລົງເລິກສົນທະນາປືກສາຫາລືກ່ຽວກັບບົດບາດຂອງ ສປ ຈີນ ໃນການຊຸກຍູ້ສົ່ງເສີມຍຸດທະສາດການພັດທະນາຂອງ ສປປ ລາວ ໃນການຫັນຈາກປະເທດທີ່ “ບໍ່ມີຊາຍແດນຕິດກັບທະເລ (Land-locked)” ໄປສູ່ປະເທດທີ່ “ເຊື່ອມຕໍ່ພາກພື້ນ (Land-linked)” ຜ່ານໂຄງການລົດໄຟລາວ-ຈີນ, ພ້ອມທັງວິເຄາະຜົນກະທົບ ແລະ ສິ່ງທ້າທາຍດ້ານອື່ນໆ ເຊັ່ນ: ເສດຖະກິດ, ການແຂ່ງຂັນດ້ານການຄ້າ, ການພັດທະນາຊັບພະ ຍາກອນມະນຸດ, ການນຳໃຊ້ເຕັກໂນໂລຊີ, ດ້ານສັງຄົມ ແລະ ສິ່ງແວດລ້ອມ. ນອກນີ້, ຍັງໄດ້ສົນທະນາກ່ຽວກັບການຄ້າ ແລະ ລົງທຶນຂອງ ສປ. ຈີນ, ອາເມລິກາ, ຫວຽດນາມ ແລະ ໄທ ຢູ່ ສປປ ລາວ ໂດຍເຫັນວ່າ ສປ. ຈີນ ຜ່ານມາໄດ້ຊ່ວຍ ສປປ ລາວ ໃນການພັດທະນາພື້ນຖານໂຄງລ່າງຂະໜາດໃຫຍ່ຫຼາຍໂຄງການ ແລະ ສສ ຫວຽດນາມ ກໍ່ເປັນຄູ່ຮ່ວມມືຍຸດທະສາດທີ່ສຳຄັນໃນການຊຸກຍູ້ສົ່ງເສີມຍຸດທະສາດ “ເຊື່ອມຕໍ່ພາກພື້ນ (Land-linked)” ຂອງ ສປປ ລາວ ໃນຕໍ່ໜ້າ ໂດຍຜ່ານໂຄງການກໍ່ສ້າງພື້ນຖານໂຄງລ່າງ ເຊັ່ນ: ທາງລົດໄຟລາວ-ຫວຽດ, ທາງດ່ວນ ແລະ ທ່າເຮືອ.

ຄະນະທັງສອງຝ່າຍ ຍັງເຫັນດີເພີ່ມທະວີການແລກປ່ຽນສົນທະນາກ່ຽວກັບທ່າອ່ຽງພູມສາດການເມືອງ ແລະ ຜົນກະທົບຕໍ່ການພັດທະນາໃນຂົງເຂດອະນຸພາກພື້ນແມ່ນ້ຳຂອງໃນຕໍ່ໜ້າ. ການພົບປະໄດ້ສິ້ນສຸດລົງດ້ວຍບັນຍາກາດອັນອົບອຸ່ນ ດ້ວຍການແລກປ່ຽນຂອງທີ່ລະນຶກ ແລະ ຖ່າຍຮູບຮ່ວມກັນທີ່ສະແດງເຖິງມິດຕະພາບອັນເປັນມູນເຊື້ອການຮ່ວມມືທີ່ແໜ້ນແຟນ ລະຫວ່າງ ສວສສຊ ແລະ VASS.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສະຫະພັນກຳມະບານ ສວສສຊ ເປີດຂະບວນການແຂ່ງຂັນ 5 ເປັນເຈົ້າ

ຈໍານວນຜູ້ເຂົ້າຊົມ: 103

ສະຫະພັນກຳມະບານ ສວສສຊ ເປີດຂະບວນການແຂ່ງຂັນ 5 ເປັນເຈົ້າ

ໃນຕອນເຊົ້າຂອງວັນທີ 30 ເມສາ 2026 ທີ່ຜ່ານມາ ສະຫະພັນກໍາມະບານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດພິທີເປີດຂະບວນການແຂ່ງຂັນ 5 ເປັນເຈົ້າ ພາຍໃຕ້ການເປັນປະທານຂອງ ທ່ານ ປອ. ແກ້ວວິຈິດ ໄຂຄຳພິທູນ ກໍາມະການຄະນະບໍລິຫານງານສະຫະພັນກໍາມະບານລາວ, ກຳມະການພັກ, ປະທານສະຫະພັນກຳມະບານ ສວສສຊ, ພິທີດັ່ງກ່າວ ໄດ້ເປັນກຽດຕ້ອນຮັບ ທ່ານ ໄຊສົງຄາມ ມະໂນທັມ ຄະນະປະຈຳພັກ, ປະທານກວດກາພັກ, ຮອງປະທານ ສວສສຊ, ຜູ້ຊີ້ນຳວຽກງານກຳມະບານ, ພ້ອມດ້ວຍຜູ້ຕາງໜ້າຈາກກົມຂະບວນການ ສູນກາງສະຫະພັນກຳມະບານລາວ, ຕາງໜ້າອົງການຈັດຕັ້ງຊາວໜຸ່ມ, ອົງການຈັດຕັ້ງແມ່ຍິງ, ບັນດາຄະນະສະຫະພັນກຳມະບານ ແລະ ສະມາຊິກກຳມະບານພາຍໃນ ສວສສຊ ເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ ໄດ້ພ້ອມກັນຮັບຟັງການຕີລາຄາ ການເຄື່ອນໄຫວວຽກງານກໍາມະບານໂດຍຫຍໍ້ ເຊິ່ງໄດ້ຍົກໃຫ້ເຫັນຜົນງານຫຼາຍດ້ານທີ່ພົ້ນເດັ່ນ ພ້ອມທັງໄດ້ຕີລາຄາດ້ານດີ, ບັນຫາຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອພ້ອມກັນຊອກຫາສາເຫດເພື່ອແກ້ໄຂໃນຕໍ່ໜ້າ ໄປພ້ອມກັບການວາງທິດທາງໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ. ໃນພິທີ ທີ່ມີຄວາມໝາຍສໍາຄັນດັ່ງກ່າວ ປະທານກໍາມະບານ ສວສສຊ ໄດ້ກ່າວເປີດຂະບວນການແຂ່ງຂັນ ໂດຍກ່າວເນັ້ນເນື້ອໃນ 5 ເປັນເຈົ້າ ປະກອບມີ: (1). ເປັນເຈົ້າການຝຶກຝົນ ຫຼໍ່ຫຼອມທາງດ້ານການເມືອງ-ແນວຄິດ, (2). ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ, (3). ເປັນເຈົ້າການພັດທະນາຕົນເອງ ແລະ ການຈັດຕັ້ງ, (4). ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທຳ, (5). ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະດິດສ້າງ; ເພື່ອເປັນການທົບທວນຄືນເນື້ອໃນການແຂ່ງຂັນ ແລະ ເປັນການໃຫ້ຄໍາໝັ້ນສັນຍາໃນການຈັດຕັ້ງປະຕິບັດຕາມທິດທາງແຜນການ ບັນດາກຳມະບານຮາກຖານ 11 ພາກສ່ວນ ໄດ້ຂຶ້ນຈັບມືແຂ່ງຂັນກັນຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ.

ໃນໂອກາດທີ່ມີຄວາມໝາຍຄວາມສໍາຄັນນີ້, ທ່ານ ປອ ໄຊສົງຄາມ ມະໂນທັມ ໄດ້ໃຫ້ກຽດ ປາຖະກະຖາເລົ່າມູນເຊື້ອຂອງສະຫະພັນກໍາມະບານລາວ ຕິດພັນກັບວັນກໍາມະກອນສາກົນ ຄົບຮອບ 140 ປີ (1 ພຶດສະພາ 1886 ຫາ 1 ພຶດສະພາ 2026) ໂດຍໄດ້ຫວນຄືນປະຫວັດສາດແຫ່ງການຕໍ່ສູ້ຂອງຊົນຊັ້ນກໍາມະກອນໃນໂລກ ແລະ ຄວາມໝາຍຄວາມສຳຄັນຂອງວັນດັ່ງກ່າວ. ພ້ອມດຽວກັນນັ້ນ ກໍຮຽກຮ້ອງໃຫ້ຄະນະບໍລິຫານງານສະຫະພັນກໍາມະບານ ສວສສຊ ສືບຕໍ່ເສີມຂະຫຍາຍມູນເຊື້ອອັນດີ, ເຊີດຊູສະຕິຄວາມຮັບຜິດຊອບໃນການນຳພາ-ຊີ້ນຳ ແລະ ສຶກສາອົບຮົມການເມືອງ-ແນວຄິດ, ເອົາໃຈໃສ່ຄົ້ນຄວ້າ, ເຊື່ອມຊຶມກໍາແໜ້ນ ພ້ອມທັງຮູ້ຫັນ ແລະ ຈັດຕັ້ງຜັນຂະຫຍາຍບົດແນະນໍາ ຂອງສູນກາງສະຫະພັນກໍາມະບານລາວ ກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ຖືເອົາການປະເມີນຜົນຂະບວນການແຂ່ງຂັນ 5 ເປັນເຈົ້າ ເປັນບັ້ນດໍາເນີນຊີວິດການເມືອງ ເພື່ອປັບປຸງ, ປົວແປງການຈັດຕັ້ງກຳມະບານໃຫ້ມີຄວາມໜັກແໜ້ນເຂັ້ມແຂງສາມາດຊອກໃຫ້ເຫັນສະມາຊິກກໍາມະບານ ທີ່ດີເດັ່ນ ເພື່ອຍ້ອງຍໍ ແລະ ສ້າງເປັນພະນັກງານສືບທອດປ່ຽນແທນ, ຄຽງຄູ່ກັນນັ້ນ ສະມາຊິກກໍາມະບານທຸກທ່ານ ຕ້ອງເປັນເຈົ້າການໃນການພັດທະນາຕົນເອງ ແລະ ສູ້ຊົນຝຶກຝົນຫຼໍ່ຫຼອມຕົນເອງຢ່າງຮອບດ້ານ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ຝຶກອົບຮົມວຽກງານພົວພັນຕ່າງປະເທດ

ຈໍານວນຜູ້ເຂົ້າຊົມ: 267

ສວສສຊ ຝຶກອົບຮົມວຽກງານພົວພັນຕ່າງປະເທດ

ໃນວັນທີ 19 ກຸມພາ 2026 ທີ່ຜ່ານມາ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດຝຶກອົບຮົມ ໃນຫົວຂໍ້ “ຍົກລະດັບວຽກງານພົວພັນຕ່າງປະເທດ” ຂື້ນທີ່ມະຫາວິທະຍາໄລຈຳປາສັກ, ແຂວງຈໍາປາສັກ, ໂດຍການເປັນປະທານຂອງທ່ານ ເພັດໃສ ເພຍເທບ, ຫົວໜ້າຫ້ອງການ ສວສສຊ; ມີບັນດາພະນັກງານຈາກກົມ, ສະຖາບັນຄົ້ນຄວ້າ, ຫ້ອງການ ແລະ ສູນ; ຫ້ອງວ່າການແຂວງຈໍາປາສັກ, ຄູອາຈານ ແລະ ນັກສຶກສາມະຫາວິທະຍາ ໄລຈໍາປາສັກ ເຂົ້າຮ່ວມທັງໝົດ 40 ກວ່າທ່ານ.

ຈຸດປະສົງຕົ້ນຕໍການຝຶກອົບຮົມຄັ້ງນີ້ ແມ່ນເພື່ອສ້າງຄວາມເຂັ້ມແຂງ ແລະ ເພີ່ມທັກສະຄວາມສາມາດໃຫ້ແກ່ ພະນັກງານວິຊາການ ໄດ້ມີຄວາມຮູ້ຄວາມເຂົ້າໃຈເລິກເຊິ່ງກ່ຽວກັບວຽກງານການທູດ ແລະ ການພົວພັນສາກົນ ເຊິ່ງໄດ້ຮັບກຽດຈາກ ທ່ານ ແສງແກ້ວ ປວງປະດິດ ອະດີດເອກອັກລະລັດຖະທູດ, ກົມພິທີການທູດ, ກະຊວງການຕ່າງ ປະເທດ ມາເປັນວິທະຍາກອນ ໃນການບັນຍາຍບົດບາດຄວາມສໍາຄັນຂອງວຽກງານພິທີການທູດ, ລະບຽບຫຼັກການ ແລະ ຂັ້ນຕອນການປະສານງານກັບຕ່າງປະເທດ. ການຝຶກອົບຮົມໄດ້ສ້າງຄວາມສົນໃຈ ແລະ ເປີດໂອກາດໃຫ້ຜູ້ເຂົ້າ ຮ່ວມໄດ້ສົນທະນາແລກປ່ຽນຄໍາຄິດຄໍາເຫັນ ແລະ ຖອດຖອນບົດຮຽນຈາກປະສົບການຕົວຈິງຂອງວິທະຍາກອນ ເຊິ່ງເປັນປະໂຫຍດຫຼາຍໃນການນໍາໄປຜັນຂະຫຍາຍເຂົ້າໃນວຽກງານພົວພັນຕ່າງປະເທດຂອງຕົນໃຫ້ມີປະສິດທິຜົນ ສູງສຸດ.

ໃນໄລຍະຜ່ານ, ສວສສຊ ໄດ້ຖືເອົາວຽກງານພົວພັນຕ່າງປະເທດ ເປັນວຽກງານຍຸດທະສາດໜື່ງທີ່ສຳຄັນ ໃນການສ້າງທ່າແຮງຕໍ່ວຽກງານຄົ້ນຄວ້າວິທະຍາສາດຂອງລາວ ໂດຍສະເພາະການຮ່ວມມືກັບບັນດາປະເທດເພື່ອນມິດຍຸດທະສາດ, ການຮ່ວມມືແບບພາຄີ ແບບສອງຝ່າຍ, ຫຼາຍຝ່າຍ ແລະ ພາຍໃຕ້ອະນຸສັນຍາຕ່າງໆ ຕາມແນວທາງນະ ໂຍບາຍການຕ່າງເທດຂອງພັກ ກໍຄືຂອງ ສປປ ລາວ ໄດ້ວາງອອກ ເຮັດໃຫ້ ສວສສຊ ສາມາດຂະຫຍາຍການຮ່ວມມືກັບບັນດາສະຖາບັນຄົ້ນຄວ້າ, ສະຖາບັນການສຶກສາ ລວມທັງຄູ່ຮ່ວມມືພັດທະນາຂອງອົງການສາກົນ ເຊັ່ນ: ສະຖາບັນດິດວິທະຍາສາດສັງ ຄົມຫວຽດນາມ, ສະຖາບັນການເມືອງແຫ່ງຊາດໂຮ່ຈີມິນ; ສະຖາບັນດິດວິທະຍາສາດສັງຄົມແຫ່ງຊາດຈີນ ແລະ ແຂວງຢຸນນານ, ກວາງຊີ, ນະຄອນຊຽງໄຮ້; ສະມາຄົມນັກວິທະຍາສາດສັງຄົມ ສປປ ເກົາຫຼີ; ລາດສະາບັນດີດວທະຍາສາດສັງຄົມກຳປູເຈຍ; ສະຖາບັນສິ່ງແວດລ້ອມ ສ. ເກົາຫຼີ, ສູນສຶກສາອາຊີຕາເວັນອອກສ່ຽງ ໃຕ້ ມະຫາວິທະຍາໄລກຽວໂຕ ຍີ່ປຸ່ນ, ອົງການຢູນິເຊັບ (UNICEF), ອົງການຮ່ວມມືສາກົນ ສ. ເກົາຫຼີ (KOICA), ສູນເພື່ອການພັດທະນາ ແລະ ສິ່ງແວດລ້ອມມະຫາວິທະຍາໄລເບີນ ປະເທດສະວິດເຊີແລນເປັນຕົ້ນ.

ທ່ານ ເພັດໃສ ເພຍເທບ ໄດ້ກ່າວຕື່ມວ່າ: ຊຸດຝຶກອົບຮົມນີ້ຈະເປັນບາດກ້າວອັນໜຶ່ງສໍາຄັນໃນການພັດທະນາພະນັກງານ ສວສສຊ ໃຫ້ມີທັກສະ ແລະ ຄວາມພ້ອມໃນການປະຕິບັດໜ້າທີ່ວຽກງານການທູດ ແລະ ການປະສານ ງານສາກົນ ໃຫ້ມີຄວາມເປັນມືອາຊີບ ແລະ ຖືກຕ້ອງ, ເປັນເສນາທິການໃຫ້ຂັ້ນເທິງໃນການຜັນຂະຫຍາຍວຽກງານຮ່ວມມືສາກົນ ເພື່ອຍາດແຍ່ງຄວາມຊ່ວຍເຫຼືອດ້ານຕ່າງໆ ຊຸກຍູ້ການປະຕິບັດຍຸດທະສາດ, ແຜນງານ ແລະ ໂຄງການຂອງ ສວສສຊ ໃຫ້ປະກົດຜົນເປັນຈິງ.

ຂຽນຂ່າວ ແລະ ຖ່າຍພາບ: ສຂຝ

ສວສສຊ ແລະ ແຂວງບໍລິຄຳໄຊ ຮ່ວມມືຄົ້ນຄວ້າສ້າງແຜນຍຸດທະສາດ ແລະ ມາດຕະການ ເພື່ອບັນລຸເປົ້າໝາຍການພັດທະນາ

ຈໍານວນຜູ້ເຂົ້າຊົມ: 394

ສວສສຊ ແລະ ແຂວງບໍລິຄຳໄຊ ຮ່ວມມືຄົ້ນຄວ້າສ້າງແຜນຍຸດທະສາດ ແລະ ມາດຕະການ ເພື່ອບັນລຸເປົ້າໝາຍການພັດທະນາ

(ສວສສຊ) ເພື່ອຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ໂຄງການການເມືອງຄັ້ງທີ III ກໍຄືການຈັດຕັ້ງປະຕິບັດມະຕິຂອງກອງປະຊຸມໃຫຍ່ ແລະ ແຜນພັດທະນາເສດຖະກິດສັງຄົມຂອງແຂວງບໍລິຄຳໄຊ ເຂົ້າສູ່ຕົວຈິງ ແລະ ຮັບປະກັນໄດ້ຜົນສຳເລັດຕາມຄາດໝາຍທີ່ວາງໄວ້ນັ້ນ; ຄະນະພັກ-ຄະນະນໍາທັງສອງຝ່າຍຈຶ່ງໄດ້ເຫັນດີເອກະພາບຕົກລົງເຊັນບົດບັນທຶກຄວາມເຂົ້າໃຈ ວ່າດ້ວຍຄວາມຮ່ວມມືໃນການຄົ້ນຄວ້າສ້າງ “ແຜນຍຸດທະສາດ ແລະ ມາດຕະການເພື່ອບັນລຸເປົ້າໝາຍ” ຂອງມະຕິຂອງປະຊຸມໃຫຍ່ຄັ້ງ VIII ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ຂອງແຂວງບໍລິຄໍາໄຊ ຂຶ້ນໃນຕອນບ່າຍຂອງວັນທີ 04 ກຸມພາ 2026 ທີ່ຫ້ອງວ່າການຄະນະປົກຄອງແຂວງບໍລິຄຳໄຊ.

ໃນໂອກາດນີ້, ທ່ານ ເລື່ອນວິໄລ ຈັນທະລາພັນ, ຮອງເລຂາພັກແຂວງບໍລິຄຳໄຊ ໄດ້ກ່າວວ່າ: ເພື່ອຜັນຂະ ຫຍາຍມະຕິຂອງປະຊຸມໃຫຍ່ຄັ້ງ VIII ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ຂອງແຂວງບໍລິຄໍາໄຊ ໃຫ້ມີລັກສະນະວິິທະຍາສາດ, ສາມາດກໍານົດຍຸດດທະຍາດ ແລະ ມາດຕະການແກ້ໄຂຢ່າງເໝາະສົມຕໍ່ການພັດທະນາຂອງທ້ອງຖິ່ນ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໂດຍສະເພາະການແກ້ໄຂຄວາມທຸກຍາກຂອງປະຊາຊົນໃຫ້ມີຄຸນນະພາບສູງຂຶ້ນ, ການປັບປຸງໂຄງລ່າງພື້ນຖານທີ່ສໍາຄັນ ເພື່ອບໍລິການຂົນສົ່ງ, ໄຟຟ້າ ແລະ ນໍ້າສະອາດ, ການຜະລິດເປັນສິນຄ້າຂອງປະຊາຊົນ ກ້າວໄປສູ່ການເພິ່ງຕົນເອງກຸ້ມຕົນເອງ ຕາມທິດສ້າງເສດຖະກິດເອ ກະລາດເປັນເຈົ້າຕົນເອງ ແລະ ອື່ນໆ ເຊິ່ງໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ນີ້ໄດ້ກໍານົດວາງຈຸດສຸມພັດທະນາ 6 ຂົງເຂດສຳຄັນຄື: ການພັດທະນາກະສິກຳໃຫ້ທັນສະໄໝ, ການຂະຫຍາຍພື້ນຖານອຸດສາຫະຫຳປຸ່ງແຕ່ງ, ການສ້າງເຂດບໍລິການຂົນສົ່ງ (ທ່າບົກ), ການພັດທະນາເຂດທ່ອງທ່ຽວ, ການສ້າງແຫຼ່ງພະລັງງານໄຟຟ້າ ແລະ ການຂຸດຄົ້ນ-ປຸງແຕ່ງແຮ່ທາດ ຊຸກຍູ້ໃຫ້ເສດຖະກິດຂອງແຂວງຂະຫຍາຍຕົວສະເລ່ຍໃນລະດັບ 5% ຕໍ່ປີ, ລາຍໄດ້ສະເລ່ຍຫົວຄົນບໍ່ຫຼຸດ 49 ລ້ານກີບ ຫຼື ປະມານ 2.100 ໂດລາສະຫະລັດໃນຊຸມປີຕໍ່ໜ້າ. ທ່ານຍັງໄດ້ກ່າວຕື່ມວ່າ ດ້ວຍຄວາມຮ່ວມມືຊ່ວຍເຫຼືອທາງດ້ານວິຊາການທີ່ເຂັ້ມແຂງຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈະຊ່ວຍຮັບປະກັນໃຫ້ແຂວງບໍລິຄຳໄຊສາມາດບັນລຸຄາດໝາຍທີ່ວາງໄວ້.

ທ່ານ ປອ. ສະຖາບັນດິດ ອິນສີຊ່ຽງໃໝ່, ຮອງເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ກ່າວວ່າ: ຕາງໜ້າໃຫ້ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີຄວາມຍິນດີທີ່ໄດ້ເຂົ້າຮ່ວມເປັນຄູ່ຮ່ວມມືກັນ ເຊິ່ງເປັນໝາກຜົນ ແລະ ຄວາມເອົາໃຈໃສ່ຂອງຄະນະພັກ-ຄະນະນໍາຂັ້ນສູງທັງສອງຝ່າຍ, ເປັນຂີດໝາຍອັນສໍາຄັນໜຶ່ງໃນວຽກງານຄົ້ນຄວ້າໂດຍກົງ ຕາມໜ້າທີ່ພາລະບົດບາດຂອງສະຖາບັນ. ການເຊັນບົດບັນທຶກຄວາມເຂົ້າໃຈຄັ້ງນີ້ ແມ່ນການກຳນົດຂອບຂອງການປະຕິບັດວຽກຮ່ວມກັນ ໃນການສ້າງແຜນຍຸດທະສາດ ແລະ ມາດຕະການເພື່ອບັນລຸເປົ້າໝາຍ” ຂອງມະຕິຂອງປະຊຸມໃຫຍ່ຄັ້ງ VIII ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VI ຂອງແຂວງບໍລິຄໍາໄຊ ໃຫ້ມີຄວາມຮັດກຸມ; ຖືກຕ້ອງ ແລະ ສາມາດນໍາໄປສູ່ການປະຕິິບັດຕົວຈິງ. ເພື່ອຮັບປະກັນໃຫ້ການຄົ້ນຄວ້າໄດ້ຮັບຜົນດີ ທັງສອງຝ່າຍຈຳເປັນຕ້ອງໄດ້ມີກົນໄກປະສານງານ, ຄະນະຮັບຜິດຊອບ, ແຜນການເຄື່ອນໄຫວ ແລະ ສະໜອງຂໍ້ມູນຕົວຈິງ ເຮັດໃຫ້ທີມງານຄົ້ນຄວ້າສາມາດກໍາໄດ້ສະພາບ, ບັນຫາ ແລະ ຊອກມາດຕະການແກ້ໄຂທີ່ເໝາະສົມ ເປັນທິດທາງໃຫ້ແຂວງຈັດໃນການຕັ້ງປະຕິບັດ ພ້ອມທັງຈະຊ່ວຍສ້າງຄວາມເຂັ້ມແຂງທາງດ້ານວິຊາການໃຫ້ແຂວງບໍລິຄຳໄຊ.

ພິທີເຊັນບົດບັນທຶກຄວາມເຂົ້າໃຈລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ແຂວງບໍລິຄຳໄຊ ໄດ້ຮັບເປັນກຽດລົງລາຍເຊັນໂດຍ ປອ. ກອງແກ້ວ ໄຊສົງຄາມ, ເລຂາຄະນະພັກສະຖາບັນວິທະຍາ ສາດເສດຖະກິດ ແລະ ສັງຄົມແຫ່ງຊາດ ແລະ ປອ. ສອນທະນູ ທໍາມະວົງ ເລຂາຄະນະບໍລຫານງານພັກແຂວງບໍລິຄຳໄຊ, ມີບັນດາຄະນະພັກ ສວສສຊ, ຄະນະພັກແຂວງບໍລິຄຳໄຊ, ຫ້ອງການ, ກົມ, ສະຖາບັນຄົ້ນຄວ້າ, ສູນ ແລະ ພະແນກການຕ່າງໆອ້ອມຂ້າງແຂວງ ເຂົ້າຮ່ວມເປັນສັກຄີພະຍານໃນພິທີຄັ້ງນີ້.

ຂຽນຂ່າວ : ສຂຝ

ສວສສຊ ສະເຫຼີມສະຫຼອງວັນຕ້ານການສໍ້ລາດບັງຫຼວງ

ຈໍານວນຜູ້ເຂົ້າຊົມ: 332

ສວສສຊ ສະເຫຼີມສະຫຼອງວັນຕ້ານການສໍ້ລາດບັງຫຼວງ

ໃນຕອນເຊົ້າຂອງວັນທີ 22 ມັງກອນ 2026 ທີ່ຜ່ານມາ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີໂຮມຊຸມນຸມສະເຫຼີມສະຫຼອງວັນຕ້ານການສໍ້ລາດບັງຫຼວງສາກົນ ຄົບຮອບ 23 ປີ ພາຍໃຕ້ຄຳຂັວນ “ຮ່ວມກັນຕ້ານການສໍ້ລາດບັງຫຼວງ ເພື່ອສ້າງອານາຄົດທີ່ສົດໃສ ແລະ ໂປ່ງໃສ” ໂດຍການເປັນປະທານຂອງ ທ່ານ ໄຊສົງຄາມ ມະໂນທັມ ຄະນະປະຈຳພັກ, ປະທານກວດກາພັກ, ຮອງປະທານ ສວສສຊ, ມີບັນດາຄະນະພັກ-ຄະນະນໍາ, ຫົວໜ້າສະຖາບັນຄົ້ນຄວ້າ, ກົມ, ຫ້ອງການ, ສູນ ແລະ ຜູ້ຕາງໜ້າອົງການຕ້ານການສໍ້ລາດບັງຫຼວງ ພ້ອມດ້ວຍພະນັກງານທົ່ວ ສວສສຊ ເຂົ້າຮ່ວມ.

ທ່ານ ໄຊສົງຄາມ ມະໂນທັມ ໄດ້ກ່າວວ່າ: ການສະເຫຼີມສະຫຼອງວັນຕ້ານການສໍ້ລາດບັງຫຼວງໃນຄັ້ງນີ້ ແມ່ນຈັດຂຶ້ນເພື່ອສະແດງເຖິງຜົນກະທົບຂອງການສໍ້ລາດບັງຫຼວງ ໃນໂອກາດວັນຕ້ານການສໍ້ລາດບັງຫຼວງສາ ກົນ ຄົບຮອບ 23 ປີ ເຊິ່ງ ສປປ ລາວ ເຮົາໄດ້ລົງນາມ ແລະ ໃຫ້ສັດຕະຍາບັນໃນປີ 2003. ຕະຫຼອດໄລຍະເວລາຜ່ານມາ ສປປ ລາວ ແລະ ສາກົນ ໄດ້ຮ່ວມມື ແລະ ປະຕິບັດສິດ-ພັນທະຂອງຕົນຢ່າງຕັ້ງໜ້າ ໃນຖານະເປັນປະເທດພາຄີຂອງສົນທິສັນຍາ ເຮັດໃຫ້ລາວໄດ້ມີຜົນສຳເລັດຫຼາຍດ້ານ ເປັນຕົ້ນໄດ້ວາງແນວທາງນະໂຍ ບາຍ, ມະຕິ, ຄໍາສັ່ງ ແລະ ນິຕິກຳຕ່າງໆຫຼາຍສະບັບ ທີ່ເປັນພື້ນຖານໃນການສະກັດກັ້ນ ແລະ ຕ້ານການສໍ້ລາດບັງຫຼວງ ໂດຍປັບປຸງກົງຈັກການຈັດຕັ້ງລັດໃຫ້ກະທັດຮັດ, ໂຮມກະຊວງ, ກົມ ແລະ ພະແນກກ່ຽວຂ້ອງ; ຫຼຸດຜ່ອນຂັ້ນຕອນບໍລິຫານ; ເອົາໃຈໃສ່ວຽກງານໂຄສະນາສຶກສາອົບຮົມ, ສ້າງສະຕິຕໍ່ກົດໝາຍໃຫ້ແກ່ພະນັກ ງານ-ລັດຖະກອນ, ທະຫານ-ຕໍາຫຼວດ, ນັກຮຽນ-ນັກສຶກສາ, ປັນຍາຊົນ ແລະ ປະຊາຊົນ ຊັ້ນຄົນຕ່າງໆ ດ້ວຍຫຼາຍຮູບການ ເພື່ອສ້າງຮັບຮູ້ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍຮ້າຍແຮງຂອງການສໍ້ລາດບັງຫຼວງ. ພ້ອມນັ້ນ ກໍຍົກສູງຖານະບົດບາດ, ສິດໜ້າທີ່ຂອງອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງ ແຕ່ລະຂັ້ນໃຫ້ສູງຂຶ້ນ, ເອົາໃຈໃສ່ເພີ່ມທະວິການເຄື່ອນໄຫວສະກັດກັ້ນ, ຕິດຕາມກວດກາ ແລະ ສືບສວນສອບສວນຕໍ່ເປົ້າໝາຍທີ່ມີພຶດຕິກຳສໍ້ລາດບັງຫຼວງ, ປະຕິບັດມາດຕະການທາງວິໄນ ແລະ ພິຈາລະນາສັ່ງຟ້ອງສານຕັດສິນຕາມກົດໝາຍ.

ໃນພິທີສະເຫຼີມສະຫຼອງນີ້ ທ່ານ ເທບພະໄທ ພັນກ້າ ຮອງຫົວໜ້າກົມຕ້ານ ແລະ ສອບສອນການສໍ້ລາດບັງຫລວງ, ອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ໃຫ້ກຽດຂຶ້ນນໍາສະເໜີ ແລະ ເຜີຍແຜ່ເອກະສານຄວາມຮູ້ພື້ນຖານຕ້ານການສໍ້ລາດບັງຫຼວງ, ວຽກງານກວດກາພັກ, ກວດກາລັດ; ຜົນຮ້າຍໄພອັນຕະລາຍຂອງການສໍ້ລາດບັງຫຼວງ ໃຫ້ສະມາຊິກພັກ-ພະນັກງານ ສວສສຊ ໄດ້ມີຄວາມເຂົ້າໃຈ ແລະ ປະຕິບັດໃຫ້ຖືກຕ້ອງຕາມລະບຽບທີ່ວາງໄວ້ ພ້ອມທັງມີກິດຈະກຳຖາມ-ຕອບ ແລະ ສົນທະນາແລກປ່ຽນບົດຮຽນຮ່ວມກັນ ເຮັດໃຫ້ມີບັນຍາກາດຟົດຟື້ນດີ.

ເພື່ອສ້າງຄວາມເປັນເອກະພາບໃນການຈັດຕັ້ງປະຕິບັດວຽກງານຕ້ານສໍ້ລາດບັງຫຼວງຂອງ ສວສສຊ ກໍຄືທົ່ວພັກທົ່ວລັດ, ປະທານກອງປະຊຸມໄດ້ຮຽກຮ້ອງໃຫ້ພະນັກງານລັດຖະກອນທົ່ວ ສວສສຊ ຈົ່ງພ້ອມຍົກສູງຄວາມເປັນເຈົ້າການ, ເປັນແບບຢ່າງທີ່ດີໃນການປະຕິບັດກົດໝາຍ, ມີຈັນຍາບັນ, ຈັນຍາທຳ ແລະ ດຳລົງຊີວິດສັດຊື່ບໍລິສຸດ, ສະກັດກັ້ນແຕ່ຫົວທີ: ຖືເອົາການສະກັດກັ້ນເປັນບັນຫາພື້ນຖານຍາວນານ, ເພີ່ມທະວີການຕິດ ຕາມ-ກວດກາ ເພື່ອອັດຊ່ອງຫວ່າງທີ່ອາດກໍ່ໃຫ້ເກີດການສໍ້ລາດບັງຫຼວງໃນທຸກຂົງເຂດວຽກງານ, ສ້າງສະຕິເຄົາ ລົບກົດໝາຍ: ສືບຕໍ່ໂຄສະນາເຜີຍແຜ່ແນວທາງນະໂຍບາຍ ແລະ ມາກຕະຖານຕ່າງໆ ພາຍໃຕ້ຄຳຂັວນ “ຮ່ວມແຮງ ຮ່ວມໃຈ ກັບໄວໜຸ່ມ ໃນການຕ້ານການສໍ້ລາດບັງຫຼວງ”, ໃຫ້ການຮ່ວມມືກັບອົງການກວດກາ ແລະ ພາກສ່ວນທີ່ກ່ຽວຂ້ອງ ເພື່ອສ້າງ ສວສສຊ ໃຫ້ເປັນອົງການທີ່ໂປ່ງໃສ ແລະ ເຂັ້ມແຂງ.

ຂຽນຂ່າວ ແລະ ຖ່າຍພາບ: ເພັດ ສາຍທານ

ກອງປະຊຸມສະຫຼຸບວຽກງານ ຫ້ອງການ ສວສສຊ ປະຈຳປີ 2025 ທີ່ ເມືອງວັງວຽງ

ຈໍານວນຜູ້ເຂົ້າຊົມ: 594

ກອງປະຊຸມສະຫຼຸບວຽກງານ ຫ້ອງການ ສວສສຊ ປະຈຳປີ 2025 ທີ່ ເມືອງວັງວຽງ

ໃນຕອນບ່າຍຂອງວັນທີ 29 ທັນວາ 2025, ທີ່ ເມືອງວັງວຽງ ແຂວງວຽງຈັນ, ຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ ປະຈຳປີ 2025 ແລະ ວາງທິດທາງແຜນການ ປີ 2026, ໂດຍພາຍໃຕ້ການເປັນປະທານຂອງ ທ່ານ ປອ ກອງແກ້ວ ໄຊສົງຄາມ, ປະທານ ສວສສຊ, ມີຄະນະນຳ, ຫົວໜ້າຫ້ອງການ ແລະ ພະນັກງານ-ລັດຖະກອນ ເຂົ້າຮ່ວມ.

ກອງປະຊຸມໄດ້ຕີລາຄາຜົນງານພົ້ນເດັ່ນໃນ 1 ປີຜ່ານມາ ເຊິ່ງຫ້ອງການ ສວສສຊ ໄດ້ປະຕິບັດບົດບາດເສນາທິການ ແລະ ບໍລິຫານຮັບໃຊ້ຢ່າງມີປະສິດທິຜົນ, ສາມາດຄຸ້ມຄອງວຽກງານເອກະສານຂາເຂົ້າ-ຂາອອກ ຢ່າງເປັນລະບົບ ແລະ ບໍລິຫານງົບປະມານໄດ້ຢ່າງຖືກຕ້ອງຕາມລະບຽບການ. ພິເສດແມ່ນວຽກງານການຕ່າງປະເທດ ທີ່ມີຜົນສຳເລັດສູງ ໂດຍໄດ້ມີການເຊັນບົດບັນທຶກຄວາມເຂົ້າໃຈ (MOU) ຮ່ວມກັບຄູ່ຮ່ວມມືຍຸດທະສາດ ແລະ ມີການແລກປ່ຽນຄະນະຜູ້ແທນທັງພາຍໃນ ແລະ ຕ່າງປະເທດ ຢ່າງເປັນຂະບວນຟົດຟື້ນ.

ສຳລັບທິດທາງປີ 2026, ກອງປະຊຸມໄດ້ເຫັນດີສູ້ຊົນຫັນວຽກງານຫ້ອງການສູ່ຄວາມທັນສະໄໝ (E-Office), ເອົາໃຈໃສ່ຄຸ້ມຄອງແຜນງົບປະມານໃຫ້ເກີດປະໂຫຍດສູງສຸດ ແລະ ສືບຕໍ່ຂະຫຍາຍການຮ່ວມມືກັບບັນດາສະຖາບັນຄົ້ນຄວ້າຕ່າງປະເທດຢ່າງແຂງແຮງ.

ໃນວາລະທີ່ມີຄວາມໝາຍສຳຄັນນີ້, ຍັງໄດ້ຈັດພິທີ ຈັບມືແຂ່ງຂັນ ລະຫວ່າງ ບັນດາຄະນະພະແນກ ແລະ 3 ອົງການຈັດຕັ້ງມະຫາຊົນ ຂອງຫ້ອງການ ສວສສຊ, ເພື່ອເປັນການສ້າງຂະບວນການ ແລະ ຄຳໝັ້ນສັນຍາໃນການຈັດຕັ້ງປະຕິບັດວຽກງານວິຊາສະເພາະ ແລະ ວຽກງານການເມືອງ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້ໃນປີ 2026.

ໃນຕອນທ້າຍ, ທ່ານ ປອ ກອງແກ້ວ ໄຊສົງຄາມ ໄດ້ໃຫ້ກຽດໂອ້ລົມຊີ້ນຳ ໂດຍເນັ້ນໜັກໃຫ້ຄະນະຫ້ອງການ, ຄະນະພະແນກ ແລະ ພະນັກງານທຸກຄົນ ຈົ່ງສືບຕໍ່ຮັກສາມູນເຊື້ອຄວາມສາມັກຄີ, ຍົກສູງຄວາມຮັບຜິດຊອບທາງດ້ານການເມືອງ ແລະ ວິຊາສະເພາະ ຕາມເນື້ອໃນຂໍ້ແຂ່ງຂັນທີ່ໄດ້ຕົກລົງກັນ, ພ້ອມທັງປັບປຸງແກ້ໄຂຈຸດຄົງຄ້າງ ເພື່ອເຮັດໃຫ້ການຈັດຕັ້ງປະຕິບັດແຜນການປີ 2026 ບັນລຸຜົນສຳເລັດຢ່າງຈົບງາມ.

ຂຽນຂ່າວ ແລະ ຖ່າຍພາບ: ວິໄຈ ເດດວົງສອນ

ກອງປະຊຸມເຜີຍແຜ່ຜົນການຄົ້ນຄວ້າວິທະຍາສາດຂອງສະຖາບັນວິທະຍາສາເສດຖະກິດ ແລະ ສັງຄົມແຫ່ງຊາດ

ຈໍານວນຜູ້ເຂົ້າຊົມ: 588

ກອງປະຊຸມເຜີຍແຜ່ຜົນການຄົ້ນຄວ້າວິທະຍາສາດຂອງສະຖາບັນວິທະຍາສາເສດຖະກິດ ແລະ ສັງຄົມແຫ່ງຊາດ

ໃນຕອນເຊົ້າ ຂອງວັນທີ 25 ທັນວາ 2025 ຜ່ານມາ, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມເຜີຍແຜ່ຜົນການຄົ້ນຄວ້າວິທະຍາສາດ ປະຈໍາປີ 2025 ພາຍໃຕ້ຫົວຂໍ້: “ກາລະໂອກາດ ແລະ ສິ່ງທ້າທາຍຂອງການພັດທະນາແບບຍືນຍົງ ແລະ ການອະນຸລັກ, ສົ່ງເສີມວັດທະນະທຳ ພາຍໃຕ້ເງື່ອນໄຂການເຊື່ອມໂຍງສາກົນ”. ພາຍໃຕ້ການເປັນປະທານຂອງ ທ່ານ ໄຊສົງຄາມ ມະໂນທັມ, ຮອງປະທານ ສວສສຊ. ມີບັນດາທ່ານທີ່ມາຈາກຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນຄົ້ນຄວ້າ, ນັກວິທະຍາກອນ, ສຳມະນາກອນ, ພະນັກງານພາຍໃນ ສວສສຊ ແລະ ຜູ້ຕາງໜ້າຈາກຂະແໜງການກ່ຽວຂ້ອງຕ່າງໆ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມໃນຄັ້ງນີ້ ເພື່ອສ້າງໂອກາດໃຫ້ບັນດານັກຄົ້ນຄວ້າໄດ້ເຜີຍແຜ່ຜົນງານການຄົ້ນຄວ້າອອກສູ້ສັງຄົມ ກໍ່ຄື ເພື່ອໃຫ້ສັງຄົມພິຈາລະນາເອົາໄປໝູນໃຊ້ເຂົ້າໃນວຽກງານຕາມຄວາມເໝາະສົມ ແລະ ຕ້ອງການຕົວຈິງ, ຈະໄດ້ຮັບຟັງການປະກອບຄໍາຄິດຄໍາເຫັນ ເພື່ອຈະໄດ້ນໍາໄປພິຈາລະນາປັບປຸງການຄົ້ນຄວ້າໃຫ້ມີປະສິດທິພາບ, ປະສິດທິຜົນ ແລະ ສອດຄ່ອງກັບຄວາມຕ້ອງການຂອງສັງຄົມສູງຂຶ້ນໃນຕໍ່ໜ້າ ແລະ ສິ່ງສຳຄັນທີ່ສຸດກໍ່ເພື່ອເສີມສ້າງຂີດຄວາມສາມາດໃນການສະເໜີ/ປະຊາສໍາພັນຜົນງານການຄົ້ນຄວ້າ ຂອງນັກຄົ້ນຄວ້າຢູ່ ສວສສຊ ໃຫ້ສູງຂື້ນເທື່ອລະກ້າວ.

ກອງປະຊຸມໄດ້ຮັບຟັງການນຳສະເໜີບົດຄົ້ນຄວ້າທັງໝົດ 12 ບົດ, ໂດຍແບ່ງອອກເປັນ 3 ວາລະສຳຄັນ ຄື: ວາລະທີ 1: ການຫັນປ່ຽນພຶດຕິກຳທາງເສດຖະກິດ ເພື່ອຫຼຸດຜ່ອນຄວາມທຸກຍາກ ແລະ ສ້າງຄວາມຍືນຍົງຢູ່ ສປປ ລາວ; ວາລະທີ 2: ກາລະໂອກາດ ແລະ ສິ່ງທ້າທາຍ ໃນການຄຸ້ມຄອງ, ອະນຸລັກຮີດຄອງປະເພນີ ແລະ ວັດທະນະທຳລາວ; ວາລະທີ 3: ສະພາບການ ແລະ ຜົນກະທົບຕໍ່ສັງຄົມໃນປະຈຸບັນ.

ພາຍຫຼັງຮັບຟັງການສະເໜີ ແຕ່ລະວາລະບັນດານັກວິທະຍາກອນ, ສຳມະນາກອນ ແລະ ແຂກທີ່ມີກຽດທຸກໆ ທ່ານໄດ້ມີການສົນທະນາ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາຢ່າງສ້າງສັນ ແລະ ມີບັນຍາກາດຟົດຟື້ນ. ໃນກອງປະຊຸມຄັ້ງນີ້ ສາມາດຮັບຮູ້, ເຂົ້າໃຈ ແລະ ເຫັນໄດ້ ກາລະໂອກາດ ແລະ ສິ່ງສຳຄັນຫຼາຍປະການໃນການພັດທະນາເສດຖະກິດ-ສັງຄົມ ຢູ່ປະເທດເຮົາພາຍໃຕ້ເງື່ອນໄຂເຊື່ອມໂຍງສາກົນ, ໂດຍສະເພາະດ້ານການສຶກສາ, ການປ່ຽນແປງພາສາ, ວັດທະນະທຳ ແລະ ປະກົດການຫຍໍ້ທໍ້ທາງສັງຄົມອື່ນໆ ທີ່ ສປປ ລາວ ຈະໄດ້ສືບຕໍ່ແກ້ໄຂ. ພ້ອມກັນນັ້ນ, ບົດຄົ້ນຄວ້າຍັງໄດ້ສະເໜີວິທີການ ແລະ ມາດຕະການແກ້ໄຂທີ່ເປັນຮູບປະທຳ ເພື່ອເປັນບ່ອນອີງໃຫ້ແກ່ການວາງນະໂຍບາຍໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ສຂຝ