Month: ເດືອນສິງຫາ 2024

1

ປະທານ ສວສສຊ ຕ້ອນຮັບການມາຢ້ຽມຢາມຂອງ ທ່ານ ຈຸງ ຢູງຊູ, ເອກອັກຄະລັດຖະທູດ ສ.ເກົາຫຼີ

1

     ໃນຕອນເຊົ້າຂອງວັນທີ 28 ສິງຫາ 2024 ທີ່ຜ່ານມານີ້ ທ່ານ ປອ ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບ  ທ່ານ ຈຸງ ຢູງຊູ, ເອກອັກຄະລັດຖະທູດ ສ.ເກົາຫຼີ; ເຊິ່ງການມາຢ້ຽມຢາມໃນຄັ້ງນີ້ມີຈຸດປະສົງເພື່ອມາສະແດງຄວາມຍິນດີໃນໂອກາດໄດ້ຮັບໜ້າທີ່ໃໝ່ຂອງທ່ານປະທານ ສວສສຊ ແລະ ເພື່ອມາປຶກສາຫາລື ກ່ຽວກັບທິດທາງການຮ່ວມມືລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກັບສະຖານທູດເກົາຫຼີປະຈໍາ ສປປ ລາວ.

2
4

     ໃນໂອກາດນີ້ ທ່ານ ປອ. ກອງແກ້ວ ໄຊສົງຄາມ ໄດ້ລາຍງານບາງຈຸດພິເສດຂອງສະຖາບັນວ່າ: ສວສສຊ ມີພາລະບົດບາດ ໃນການເປັນເສນາທິການໃຫ້ແກ່ພັກ ແລະ ລັດຖະບານ ໃນການ ຄົ້ນຄ້ວາ, ສະໜອງຂໍ້ມູນຂ່າວສານທາງດ້ານວິທະຍາສາດເສດຖະກິດ ແລະ ສັງຄົມ, ເພື່ອຮັບໃຊ້ການວາງແນວທາງນະໂຍບາຍຂອງພັກ, ວິໄສທັດ, ແຜນຍຸດທະສາດ, ແຜນພັດທະນາເສດຖະກິດ ແລະ ສັງຄົມ ໃນແຕ່ລະໄລຍະ; ມີໜ້າທີ່ໃນການຄົ້ນຄ້ວາບັນຫາເສດຖະກິດ-ສັງຄົມ, ການເມືອງ ແລະ ບັນຫາອື່ນໆຕາມການມອບໝາຍຂອງພັກ-ລັດ; ທ່ານຍັງໄດ້ກ່າວອີກວ່າສາຍພົວພັນລະຫວ່າງ ສປປ ລາວ ແລະ ສ. ເກົາຫຼີ ໄດ້ມີການພົວພັນກັນມາແຕ່ເຫິງນານແລ້ວ; ການປະກາດສ້າງຕັ້ງສາຍພົວພັນການທູດນຳກັນ ແມ່ນເປັນພາລະກິດສືບຕໍ່ ທີ່ສອງປະເທດພວກເຮົາຕ້ອງໄດ້ຮ່ວມກັນເຮັດເປັນປົກກະຕິ.

     ທັງສອງຝ່າຍຍັງໄດ້ປຶກສາຫາລືກ່ຽວກັບທິດທາງໃນການຄົ້ນຄວ້າຮ່ວມກັນ, ການຈັດກອງປະຊຸມສໍາມະນາວິທະຍາສາດປະຈໍາປີ ແລະ ການພົວພັນທາງດ້ານວິຊາການໃນຫຼາຍດ້ານ ຝ່າຍລາວຍັງໄດ້ສະເໜີ ຕໍ່ຝ່າຍ ສ.ເກົາຫຼີ ກ່ຽວກັບການສະໜອງທຶນການສຶກສາ ໃນລະດັບປະລິນຍາໂທ ແລະ ປະລິນຍາເອກ ໃຫ້ແກ່ນັກຄົ້ນຄວ້າ ສວສສຊ ໃຫ້ສອດຄ່ອງຕາມຂະແໜງການຕ່າງໆ. ພ້ອມທັງສະເໜີເປີດໂອກາດໃຫ້ຄະນະຜູ້ແທນທັງສອງຝ່າຍ ແລະ ນັກຄົນຄວ້າໄດ້ແລກປ່ຽນບົດຮຽນຮ່ວມກັນຢ່າງເປັນປົກກະຕິ.

3

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

1

ກອງປະຊຸມແລກປ່ຽນກັບອະດີດການນຳຂັ້ນສູງ ກ່ຽວກັບ ການແກ້ໄຂບັນຫາ ລາຄາສິນຄາ້ ແລະ ອັດຕາເງິນເຟີ້ ທີ່ເພີ່ມຂຶ້ນສູງ

1

      ໃນວັນທີ 19 ສິງຫາ 2024, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຄະນະສະເພາະກິດ ເພື່ອລົງເລິກຄົ້ນຄວ້າບັນຫາ ລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂຶ້ນ (ຄະນະສະເພາະກິດ83/ນຍ) ໄດ້ຈັດກອງປະຊຸມ ປຶກສາຫາລື ແລກປ່ຽນຄວາມຄິດເຫັນຮ່ວມກັບອະດີດການນຳຂັ້ນສູງ ແລະ ຜູ້ຊົງຄຸນວຸດທິກ່ຽວກັບ ການແກ້ໄຂບັນຫາລາຄາສິນຄ້າ ແລະ ອັດຕາເງິນເຟີ້ ທີ່ສູງຂຶ້ນ ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະບໍລິຫານງານພັກ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຫົວໜ້າຄະນະສະເພາະກິດດັ່ງກ່າວ. 

      ທ່ານ ປອ. ກອງແກ້ວ ໄຊສົງຄາມ ກ່າວວ່າ: ກອງປະຊຸມຄັ້ງນີ້, ຖືວ່າເປັນກອງປະຊຸມ ທີ່ມີຄວາມສຳຄັນຢ່າງຍິ່ງ ເພື່ອຈະໄດ້ຮັບຟັງຄຳຄິດຄຳເຫັນ ແລະ ຄຳແນະນໍາຕ່າງໆຈາກບັນດາທ່ານທີ່ມີບົດຮຽນ ແລະ ປະສົບປະການສູງ ເພື່ອເຮັດໃຫ້ການຄົ້ນຄວ້າລົງເລິກຂອງຄະນະສະເພາະກິດດຳເນີນໄປຢ່າງຖືກທິດ, ມີລັກສະນະຄົບຊຸດ ແລະ ມີປະສິດທິພາບສູງ ເພື່ອບັນລຸເປົ້າໝາຍ ເຮັດໃຫ້ການຄົ້ນຄວ້າລົງເລິກລົງເລິກສາມາດຊອກເຫັນໄດ້ຈຸດສຸມທີ່ຈະຕ້ອງແກ້ໄຂ ແລະ ນຳສະເໜີບັນດາວິທີການ ແລະ ມາດຕະການທີ່ເໝາະສົມໃນຂັ້ນຕໍ່ໄປ.

      ໃນກອງປະຊຸມ, ທ່ານ ປອ. ກອງແກ້ວ ໄຊສົງຄາມ ໄດ້ລາຍງານຜົນໄດ້ຮັບຈາກກອງປະຊຸມປຶກສາຫາລືຮ່ວມກັບພາກທຸລະກິດໃນວັນທີ 2 ສິງຫາ ຜ່ານມາ ທີ່ໄດ້ລົງເລິກ 2 ບັນຫາໃຫຍ່ຄື: “ການຫຼຸດຜ່ອນຕົ້ນທຶນການຜະລິດສິນຄ້າ ແລະ ບໍລິການ” ແລະ “ການປະຢັດເງິນຕາຕ່າງປະເທດ ເພື່ອຫຼຸດຜ່ອນແຮງກົດດັນຕໍ່ຄ່າເງິນກີບ” ແນໃສ່ເພື່ອການແກ້ໄຂສະພາບເຄັ່ງຮ້ອນສະເພາະໜ້າ. ພ້ອມທັງໃຫ້ຮູ້ກ່ຽວກັບສະພາບ, ສາເຫດ ແລະ ແນວທາງແກ້ໄຂທີ່ພາກທຸລະກິດຍົກຂຶ້ນ ເປັນຕົ້ນ: ບັນດາປັດໄຈການຜະລິດ, ປູກຝັງ ແລະ ລ້ຽງສັດ; ສະພາບການຂາດແຄນແຮງງານ; ຂອດພໍ່ຄ້າຄົນກາງໃນການຈໍາໜ່າຍ ແລະ ກະຈາຍສິນຄ້າໃນຕະຫຼາດ ທີ່ເປັນອີກປັດໄຈສໍາຄັນຕໍ່ກັບການກຳນົດ ແລະ ການເພີ່ມຂຶ້ນຂອງລາຄາສິນຄ້າ; ລາຄານໍ້າມັນທີ່ແພງຂຶ້ນ; ບັນດາຂະແໜງການທີ່ມີຄວາມຕ້ອງການນຳໃຊ້ເງິນຕາຕ່າງປະເທດຫຼາຍກວ່າໝູ່ ແລະ ໄດ້ຮັບບຸລິມະສິດໃນການເຂົ້າເຖິງເງິນຕາ ເພື່ອຊໍາລະການນຳເຂົ້າສິນຄ້າ; ການຊື້-ຂາຍເງິນຕາຜ່ານລະບົບອອນລາຍຂອງທະນາຄານ, ນອກນີ້ກໍໄດ້ໃຫ້ຮູ້ເຖິງແນວທາງແກ້ໄຂທີ່ພາກທຸລະກິດຍົກຂຶ້ນ.

      ທ່ານ ປອ. ກອງແກ້ວ ໄຊສົງຄາມ ກ່າວຕື່ມວ່າ: ຈາກຜົນໄດ້ຮັບຂອງກອງປະຊຸມຮ່ວມກັບພາກທຸລະກິດເຫັນວ່າ ໄດ້ຮັບຂໍ້ມູນຂ່າວສານ ແລະ ການສະເໜີແນວທາງແກ້ໄຂທີ່ເປັນປະໂຫຍດຫຼາຍດ້ານ, ຕາມທັດສະນະວິຊາການພວກເຮົາເຫັນວ່າ ຫຼາຍມາດຕະການທີ່ພາກທຸລະກິດຍົກຂຶ້ນ ແມ່ນມີຄວາມສຳຄັນ ແລະ ຕ້ອງນໍາເອົາໄປສືບຕໍ່ຄົ້ນຄວ້າລົງເລິກ ເພື່ອໃຫ້ເຫັນແນວທາງໃນການຈັດຕັ້ງປະຕິບັດເປັນຕົ້ນແມ່ນ ຄວນລົງເລິກຄົ້ນຄວ້າກ່ຽວກັບຕ່ອງໂສ້ການຜະລິດ ແລະ ໂຄງປະກອບລາຄາສິນຄ້າທີ່ຈຳເປັນ ແລະ ກະທົບຕໍ່ຊິວີິດການເປັນຢູ່ຂອງປະຊາຊົນ (ເຂົ້າສານໜຽວປະເພດ 2, ຊີ້ນໝູ, ໄຂ່, ປາ, ຜັກ), ໂດຍສະເພາະແມ່ນຂອດ ພໍ່ຄ້າຄົນກາງ ທີ່ເຫັນວ່າມີຜົນເຮັດໃຫ້ລາຄາສິນຄ້າຂັ້ນສຸດທ້າຍ ຫຼື ລາຄາຜູ້ບໍລິໂພກສູງຫຼາຍ; ຄວນລົງເລິກຄົ້ນຄວ້າແນວທາງການຊຸກຍູ້ສົ່ງເສີມການຜະລິດພາຍໃນຢ່າງມີເປົ້າໝາຍ ແລະ ເປັນລະບົບຕ່ອງໂສ້ ເພື່ອຮັບປະກັນໃຫ້ສາມາດແກ້ຖືກຈຸດ. ເນື່ອງຈາກນະໂຍບາຍສົ່ງເສີມການຜະລິດພາຍໃນ ຜ່ານມາ ຍັງເປັນລັກສະນະລວມໆ ແລະ ກົນໄກການຈັດຕັ້ງປະຕິບັດ ຍັງເປັນລັກສະນະ ພໍໃຜ ພໍລາວ; ຄວນລົງເລິກຄົ້ນຄວ້າ ກ່ຽວກັບການອຸດໜູນລາຄາ ນໍ້າປະປາ, ໄຟຟ້າ, ນໍ້າມັນເຊື້ອໄຟ, ຖ້າປັບໃຫ້ສອດຄ່ອງຕາມຄວາມເປັນຈິງຈະກະທົບແນວໃດ? ຈະມີກົນໄກອຸດໜູນຜູ້ມີລາຍຮັບຕໍ່າ ຫຼື ກຸ່ມເປົ້າໝາຍແນວໃດ?.

      ທ່ານ ປອ. ກອງແກ້ວ ໄຊສົງຄາມ  ຍັງກ່າວອີກວ່າ: ເຖິງຢ່າງໃດກໍຕາມ, ການສະຫຼຸບສັງລວມຂອງຄະນະວິຊາການພວກເຮົາໃນຄັ້ງນີ້, ອາດຈະຍັງບໍ່ມັນຄົບຖ້ວນສົມບູນ. ສະນັ້ນ, ນອກຈາກ 3 ປະເດັນຂ້າງເທິງ ທີ່ຄະນະວິຊາການພວກເຮົາສະເໜີມາ, ບັນດາທ່ານອະດີດການນໍາຂັ້ນສູງ ແລະ ຜູ້ຊົງຄຸນວຸດທິ ເຫັນວ່າ ພວກເຮົາຄວນຈະເບິ່ງບັນຫາຫຍັງຕື່ມ? ຫຼື ຄວນເອົາໃຈໃສ່ບັນຫາຫຍັງຕື່ມ ໂດຍສະເພາະຕິດພັນກັບ 2 ເນື້ອໃນສຳຄັນຄື: “ການຫຼຸດຜ່ອນຕົ້ນທຶນການຜະລິດສິນຄ້າ ແລະ ບໍລິການ” ແລະ “ການປະຢັດເງິນຕາຕ່າງປະເທດ ເພື່ອຫຼຸດຜ່ອນແຮງກົດດັນຕໍ່ຄ່າເງິນກີບ” ແນໃສ່ເພື່ອການແກ້ໄຂສະພາບເຄັ່ງຮ້ອນສະເພາະໜ້າ.   

2

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

2bd4e558-f54e-457f-94de-e60f45b5f8bd

ພິທີປະກາດການຈັດຕັ້ງ ແລະ ທາບທາມຄະນະໜ່ວຍພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

2bd4e558-f54e-457f-94de-e60f45b5f8bd

     ໃນຕອນເຊົ້າຂອງວັນທີ 16 ສິງຫາ 2024 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປະກາດການຈັດຕັ້ງ ແລະ ທາບທາມຄະນະໜ່ວຍພັກອ້ອມຂ້າງທີ່ຂຶ້ນກັບ ສວສສຊ ພາຍໃຕ້ການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານ ສວສສຊ; ມີຫົວໜ້າຫ້ອງການ, ກົມ, ບັນດາຫົວໜ້າສະຖາບັນຄົ້ນຄວ້າ ແລະ ສູນ ຕະຫຼອດຮອດສະມາຊິກພັກສົມບູນ-ສໍາຮອງ ທົ່ວ ສວສສຊ ເຂົ້າຮ່ວມ.

     ກອງປະຊຸມໃນຄັ້ງນີ້ມີສອງຈຸດປະສົງຄື ເພື່ອປະກາດການຈັດຕັ້ງຂັ້ນຮອງປະທານ ສວສສຊ ແລະ ທາບທາມຄະນະໜ່ວຍພັກ 11 ພາກສ່ວນອ້ອມຂ້າງ ສວສສຊ ເພື່ອກະກຽມໃສ່ກອງປະຊຸມໃຫຍ່ຄັ້ງທີ 2 ຂອງບັນດາໜ່ວຍພັກ ກໍ່ຄືກຽມຄວາມພ້ອມດ້ານບຸດຄະລາກອນ ໃນການກະກຽມກອງປະຊຸມໃຫຍ່ ສະມາຊິກພັກຄັ້ງທີ 2 ຂອງອົງຄະນະພັກ ສວສສຊ ທີ່ຈະໄດ້ໄຂຂຶ້ນໃນປີ 2025 ນີ້; ໃນພິທີ ທ່ານ ພູຂົງ ພິລາເພັດ, ຄະນະພັກ, ຫົວໜ້າກົມກໍ່ສ້າງພັກ ຄະນະຈັດຕັ້ງສູນກາງພັກ ໄດ້ຂຶ້ນຜ່ານຄໍາສັ່ງວ່າດ້ວຍການຍົກຍ້າຍ ພະນັກງານໄປຮັບໜ້າທີ່ໃໝ່ ສະບັບເລກທີ 10/ນຍ ລົງວັນທີ 31 ກໍລະກົດ 2024 ວ່າດ້ວຍການຍົກຍ້າຍທ່ານ ປອ. ນ. ແກ້ວວິວອນ ອຸດທະຈັກ ຫົວໜ້າສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ ກະຊວງກະສິກໍາ ແລະ ປ່າໄມ້ ໄປຮັບໜ້າທີ່ໃໝ່ຢູ່ ສວສສຊ ແລະ ດໍາລັດຂອງນາຍົກລັດຖະມົນຕີ ເລກທີ 341/ນຍ, ລົງວັນທີ 31 ກໍລະກົດ 2024 ວ່າດ້ວຍການແຕ່ງຕັ້ງ ທ່ານ ປອ. ນ. ແກ້ວວິວອນ ອຸດທະຈັກ ເປັນຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ.

34e0c38e-cfb5-4ee0-9cca-3d91b3839039

      ໃນໂອກາດນີ້ ທ່ານ ປອ. ກອງແກ້ວ ໄຊສົງຄາມ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ພັກ-ລັດເຮົາ ຍາມໄດກໍ່ຖືວຽກພັກ-ພະນັກງານ ເປັນວຽກທີ່ສໍາຄັນ ແລະ ມີລັກສະນະຕັດສິນເຖິງຜົນສໍາເລັດ ແລະ ຄຸນນະພາບຂອງວຽກງານ, ເປັນວຽກທີ່ມີລັກສະນະມີຊີວິດ-ຊີວາ, ມີການເຄື່ອນເໜັງ, ມີການຂະຫຍາຍຕົວຢູ່ເລື້ອຍໆ ດັ່ງ ສວສສຊ ເຮົາໃນປັດຈຸບັນ ມີບາງສະຫາຍກໍ່ໄດ້ຖືກຊັບຊ້ອນໄປຮັບໜ້າທີ່ໃໝ່ ແລະ ກໍ່ມີບາງສະຫາຍອອກຮັບອຸດໜູນບໍານານ ສະນັ້ນກໍ່ຕ້ອງແຕ່ງຕັ້ງຜູ້ໃໝ່ມາປ່ຽນແທນ ກໍ່ຄືທ່ານ ປອ. ນ. ແກ້ວວິວອນ ອຸດທະຈັກ ຮອງປະທານ ສວສສຊ ຜູ້ໃໝ່ທີ່ພວກເຮົາໄດ້ປະກາດຢ່າງເປັນທາງການໃນມື້ນີ້ ເຊິ່ງເປັນວຽກປົກກະຕິຂອງພັກເຮົາ; ພ້ອມດຽວກັນນີ້ ກໍ່ຍັງມີອີກໜຶ່ງວຽກທີ່ສໍາຄັນທີ່ພວກເຮົາຕ້ອງໄດ້ດໍາເນີນໃຫ້ສໍາເລັດ; ເຊິ່ງປັດຈຸບັນ ອົງຄະນະພັກ ສວສສຊ ປະກອບມີ 11 ໜ່ວຍພັກຮາກຖານທີ່ຂຶ້ນກັບ ສວສສຊ; ໃນນັ້ນຈໍານວນໜຶ່ງມີການຍົກຍ້າຍຊັບຊ້ອນ ແລະ ອອກພັກການຮັບອຸດໜູນບໍານານ ຈຶ່ງເຮັດໃຫ້ 11 ພາກສ່ວນນັ້ນ ມີ 9 ໜ່ວຍພັກ ທີ່ມີຄະນະພັກບໍ່ຄົບອົງປະກອບ ກໍ່ຄືຄະນະໜ່ວຍພັກບໍ່ຄົບ 3 ສະຫາຍ ເຊິ່ງຕາມລະບຽບຂອງພັກ ແຕ່ລະໜ່ວຍ ຖ້າຈະໃຫ້ສົມບູນແທ້ໃນຄະນະໜ່ວຍຕ້ອງມີ 3 ສະຫາຍ ສະນັ້ນມື້ນີ້ ພວກເຮົາຈະໄດ້ດໍາເນີນການທາບທາມ ເພື່ອນໍາເອົາຜົນການທາບທາມສົມທົບກັບແຜນກໍານົດພະນັກງານນໍາພາ-ຄຸ້ມຄອງ ລາຍງານຕໍ່ຄະນະຈັດຕັ້ງສູນກາງພັກ ເພື່ອຂໍອະນຸຍາດແຕ່ງຕັ້ງຄະນະໜ່ວຍພັກໃຫ້ສົມບູນຂຶ້ນຕື່ມ; ພ້ອມທັງໄດ້ເນັ້ນໜັກໃຫ້ບັນດາຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ໃຊ້ສິດຂອງຕົນເລືອກເຟັ້ນເອົາຜູ້ທີ່ເໝາະສົມ ແລະ ມີຄຸນນະພາບເພື່ອມາເປັນຜູ້ຊີ້ນໍາ-ນໍາພາໃນການກະກຽມກອງປະຊຸມໃຫຍ່ຂັ້ນໜ່ວຍພັກຂອງຕົນ.

af7ae505-e996-488e-b433-b66cfe8e1401
92a0e576-82b1-4426-bc12-9cf15c6cb21b

ພາບ ແລະ ຂ່າວ: ພວງເພັດ ຈັນທະລີວົງ

1

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຜີຍແຜ່ນິຕິກໍາກ່ຽວກັບ ວຽກງານປະເມີນ ພະນັກງານ-ລັດຖະກອນ ແລະ ວຽກງານແຂ່ງຂັນ-ຍ້ອງຍໍ

1

     ໃນວັນທີ 15 ສິງຫາ 2024 ທີ່ຫ້ອງປະຊຸມໃຫຍ່ຊັ້ນ 03 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ນິຕິກໍາກ່ຽວກັບວຽກງານປະເມີນ ພະນັກງານ-ລັດຖະກອນ ແລະ ວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ຂຶ້ນໂດຍການເປັນປະທານຂອງ ທ່ານ ປອ. ກິແກ້ວ ຈັນທະບູຣີ ຮອງເລຂາຄະນະບໍລິຫານງານພັກ, ຮອງປະທານສະຖະາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ມີບັນດາຫົວໜ້າສະຖາບັນຄົ້ນຄວ້າ, ກົມ, ຫ້ອງການ, ສູນ ແລະ ພະນັກງານ-ລັດຖະກອນ ທົ່ວ ສວສສຊ ເຂົ້າຮ່ວມ.

2

     ຈຸດປະສົງຂອງກອງປະຊຸມເພື່ອຜັນຂະຫຍາຍ ແລະ ຈັດຕັ້ງປະຕິບັດດໍາລັດຂອງລັດຖະບານ, ໂດຍໄດ້ເຊື້ອເຊີນຜູ້ຕາງໜ້າຈາກກະຊວງ ພາຍໃນມາເຜີຍແຜ່ ດໍາລັດສະບັບເລກທີ 300/ລບ, ລົງວັນທີ 13 ກັນຍາ 2017 ວ່າດ້ວຍການປະເມີນຜົນການປະຕິບັດວຽກງານ ຂອງພະນັກງານ-ລັດຖະກອນ; ຄໍາແນະນໍາ ຂອງກະຊວງ ພາຍໃນ ວ່າດ້ວຍການຈັດຕັ້ງປະຕິບັດ ດຳລັດ 300/ລບ ແລະ ດໍາລັດ ສະບັບເລກທີ 116/ລບ, ລົງວັນທີ  22/04/2019 ວ່າດ້ວຍການແຂ່ງ-ຍ້ອງຍໍ ແລະ ຄໍາແນະນໍາ ຂອງກະຊວງພາຍໃນ ກ່ຽວກັບການຈັດຕັ້ງ-ຜັນຂະຫຍາຍ ດຳລັດ ເລກທີ 116/ລບ; ຄໍາແນະນໍາຂອງກົມຈັດຕັ້ງ ແລະ ພະນັກງານ ກ່ຽວກັບມາດຕະຖານ, ເງື່ອນໄຂການຍ້ອງຍໍ ພະນັກງານ-ລັດຖະກອນ ສວສສຊ. ໃນໄລຍະຜ່ານມາ ເຊິ່ງໃນໄລຍະຜ່ານມາມີພະນັກງານ-ລັດຖະກອນ ທີ່ມີຜົນງານດີເດັ່ນໄດ້ຮັບການຍ້ອງຍໍ ເປັນຈຳນວນຫລາຍ ສິ່ງດັ່ງກ່າວໄດ້ຢັ້ງຢືນວ່າ ການຈັດຕັ້ງປະຕິບັດວຽກງານປະເມີນຜົນ ພະນັກງານ-ລັດຖະກອນ ແລະ ວຽກງານແຂ່ງຂັນ-ຍ້ອງຍໍຂອງ  ສວສສຊ ໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດ, ເຫັນໄດ້ຈາກມີບຸກຄົນດີເດັ່ນເພີ່ມຂຶ້ນເລື້ອຍໆ.

     ໃນໂອກາດດັ່ງກ່າວ ທ່ານ ປອ. ກິແກ້ວ ຈັນທະບູຣີ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ໃຫ້ເອົາໃຈໃສ່ສືບຕໍ່ຄົ້ນຄວ້າໃຫ້ເລິກເຊິ່ງ, ເຊື່ອມຊຶມ ແລະ ກຳໃຫ້ແໜ້ນ, ຮູ້ຫັນ ແລະ ຈັດຕັ້ງຜັນຂະຫຍາຍໃຫ້ເຂົ້າສູ່ລວງເລິກກວ່າເກົ່າ, ທັງເສີມຂະຫຍາຍຫົວຄິດປະດິດສ້າງ, ໃນການພັດທະນາວຽກງານໃຫ້ຫລາຍຂື້ນ, ສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ການເມືອງ, ຍົກສູງຄວາມສາມາດ ແລະ ຄຸນນະພາບໃນການນຳພາ-ຊີ້ນຳ ໃນໄລຍະໃໝ່, ໃຫ້ຖືເອົາການຕິດຕາມຊຸກຍູ້, ກວດກາ ແລະ ຕີລາຄາວຽກງານ ຕິດພັນກັບການຍ້ອງຍໍໃຫ້ຖືກຄົນ, ຖືກວຽກ ແລະ ທັນການ ເປັນນຶ່ງໃນບັນດາມາດຕະການກະຕຸ້ນ ເພື່ອສົ່ງເສີມຂະບວນການໃຫ້ຂະຫຍາຍຕົວກວ້າງຂວາງ ແລະ ແຂງແຮງ ເຮັດໃຫ້ກາຍເປັນການປຸກລະດົມຄວາມຟົດຟື້ນ, ຫ້າວຫັນແທ້, ບັນດາພາກສ່ວນ ພາຍໃນ ສວສສຊ ຕ້ອງໄດ້ເພີ່ມທະວີການນໍາພາ-ຊີ້ນໍາ ຜັນຂະ ຫຍາຍເປັນທິດທາງແຜນການວຽກງານຂອງຕົນ, ຖືເປັນຫລັກການ ແລະ ເປັນຄວາມຮັບຜິດຊອບໜ້າທີ່ການເມືອງຂອງຕົນ, ພວກເຮົາຈະໄດ້ສຸມໃສ່ ກະກຽມ ແລະ ດໍາເນີນກອງປະຊຸມ 2 ຂັ້ນຂອງຕົນໃຫ້ສໍາເລັດຕາມແຜນການທີ່ວາງໄວ້ ແລະ ກະກຽມຄັດເລືອກຜົນງານ 5 ປີ (2020-2025) ເພື່ອນໍາສະເໜີລັດຖະບານ ພິຈາລະນາການຍ້ອງຍໍໃຫ້ທັນຕາມກຳນົດເວລາ.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນິນ ພົນສັກດາ

1

ກອງປະຊຸມລະດົມຄວາມຄິດເຫັນຮ່ວມກັບພາກທຸລະກິດ ກ່ຽວກັບບັນຫາລາຄາສິນຄ້າ ແລະ ອັດຕາແລກປ່ຽນ

1

       ຕອນເຊົ້າວັນທີ 2 ສິງຫາ 2024 ນີ້  ຄະນະສະເພາະກິດ ເພື່ອລົງເລິກຄົ້ນຄວ້າບັນຫາ ລາຄາສິນຄ້າ ແລະ ອັດຕາເງິນເຟີ້ທີ່ເພີ້ມຂຶ້ນສູງ ໄດ້ຈັດກອງປະຊຸມລະດົມຄວາມຄິດເຫັນຈາກພາກທຸລະກິດກ່ຽວກັບ ບັນຫາລາຄາ ສິນຄ້າ ແລະ ອັດຕາແລກປ່ຽນເງິນຕາຕ່າງປະເທດ ທີ່ເພີ່ມສູງຂຶ້ນ ຢູ່ຫ້ອງປະຊຸມຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທັງເປັນຫົວຫນ້າຄະນະສະເພາະກິດດັ່ງກ່າວ; ມີບັນດາທ່ານໃນຄະນະສະເພາະກິດ ແລະ ການນໍາຂອງສະຖາບັນຄົ້ນຄວ້າ, ຂະແຫນງການ, ຜູ້ຕາງໜ້າຂອງສະມາຄົມທຸລະກິດ, ນັກທຸລະກິດ  ແລະ ແຂກຮັບເຊີນເຂົ້າຮ່ວມ.   

2

      ກອງປະຊຸມ ທ່ານ ປອ. ກອງແກ້ວ ໄຊສົງຄາມ ກ່າວວ່າ:  ສປປ ລາວ ຂອງພວກເຮົາກໍາລັງປະເຊີນກັບບັນຫາ ຂາດສະຖຽນລະພາບທາງດ້ານເສດຖະກິດມະຫາພາກ ໂດຍສະເພາະການເພີ່ມຂຶ້ນຂອງລາຄາສິນຄ້າ ຫຼື ອັດຕາແລກປ່ຽນເງິນຕາບໍ່ຄົງທີ (ເງິນເຟີ້)ສະພາບເງິນກີບ ຍັງສືບຕໍ່ອ່ອນຄ່າ ເຮັດໃຫ້ຄ່າຄອງຊີບສູງຂຶ້ນ ສົ່ງຜົນກະທົບໂດຍກົງຕໍ່ຊີວິດການເປັນຢູ່ ຂອງພະນັກງານ, ທະຫານ, ຕໍ່າຫຼວດ ແລະ ປະຊາຊົນລາວບັນດາເຜົ່າ, ລວມທັງ ພາກທຸລະກິດ ແລະ ພາກລັດ ຢ່າງ ຫລີກລ້ຽງບໍ່ໄດ້. ສະພາບບັນຫາອັດຕາເງິນເຟີ້ ແລະ ອັດຕາແລກປ່ຽນ ຢູ່ສປປ ລາວ ເພີ່ມຂຶ້ນຢ່າງຕໍ່ເນື່ອງ. ນັບແຕ່ຕົ້ນ ປີ 2022 ຈົນມາຮອດປັດຈຸບັນ ກໍ່ຍັງເຫັນວ່າ ບໍ່ທັນມີຖ່ວງທ່າ ທີ່ຈະສະຫງົບ ແລະ ຫຼຸດລົງ, ເຖິງແມ່ນວ່າ ໃນໄລຍະຜ່ານມາ,ພັກ- ລັດຖະບານ ກໍ່ຄືພາກສ່ວນກ່ຽວຂ້ອງ ໄດ້ມີຄວາມພະຍາຍາມນໍາໃຊ້ຫຼາຍມາດຕະການແກ້ໄຂ ແຕ່ ຍັງບໍ່ສາມາດແກ້ໄຂໄດ້ ຢ່າງຂາດຕົວ. ສືບເນື່ອງມາຈາກຫຼາຍປັດໄຈ ທີ່ເປັນສິ່ງທ້າທາຍ ແລະ ຂໍ້ຈໍາກັດ ທີ່ຕິດພັນກັບບັນຫາໂຄງສ້າງພື້ນຖານ ຂອງເສດຖະກິດລາວ ເຊັ່ນ: ການຜະລິດ ພາຍໃນ ຍັງບໍ່ເຂັ້ມແຂງ ແລະ ບໍ່ຫຼາກຫຼາຍເທົ່າທີ່ຄວນ ຍັງອາໄສແຕ່ການນໍາເຂົ້າສິນຄ້າເປັນສ່ວນໃຫຍ່, ເຮັດໃຫ້ ລາວ ເຮົາຂາດດຸນການຄ້າຢ່າງຕໍ່ເນື່ອງ ສົ່ງຜົນກະທົບໂດຍກົງ ຕໍ່ຄັງສໍາຮອງເງິນຕາຕ່າງປະເທດ ຢູ່ໃນລະດັບບໍ່ພຽງພໍ ກັບຄວາມຕ້ອງການຊໍາລະຕ່າງປະເທດ. ອີກຢ່າງ, ການນໍາໃຊ້ເຄື່ອງມືທາງນະໂຍບາຍການເງິນ ແລະ ເງິນຕາ ໃນການດັດສົມບັນຫາເງິນເຟີ້ ແລະ ອັດຕາແລກປ່ຽນ ຍັງມີຂໍ້ຈໍາກັດຫຼາຍ. ພວກເຮົາຕົກຢູ່ໃນສະພາບຂາດດູນທາງດ້ານງົບປະມານ ຕໍ່ເນື່ອງ ເຮັດໃຫ້ເກີດມີໜີ້ສິນສະສົມ ນັບມື້ນັບເພີ່ມສູງຂຶ້ນ. ນອກນີ້, ລາວເຮົາ ກໍ່ເປັນປະເທດທີ່ນໍາໃຊ້ ຫຼາຍສະກຸນເງິນຕາ ເຂົ້າໃນການຊໍາລະສະສາງ ທັງຢູ່ພາຍໃນ ແລະ ຕ່າງປະເທດ ເຊັ່ນ: ໂດລາ, ບາດ ແລະ ຢວນ ກວມຫຼາຍກວ່າ ເຄິ່ງຫນຶ່ງຂອງປະລິມານເງິນທັງຫມົດ ໃນລະບົບເສດຖະກິດ, ເຮັດໃຫ້ການນໍາໃຊ້ເຄື່ອງມືດ້ານນະໂຍບາຍເງິນຕາຂາດປະສິດທິຜົນ. ເພື່ອຊ່ວຍລົງເລີກຄົ້ນຄວ້າຢ່າງພາວະວິໄສ ແລະ ແທດເຫມາະກັບສະພາບຄວາມເປັນຈິງ, ກໍານົດມາດຕະການແກ້ໄຂບັນຫາອັດຕາເງິນເຟີ້ ແລະ ອັດຕາແລກປ່ຽນ, ລັດຖະບານ ໄດ້ແຕ່ງຕັ້ງຄະນະສະເພາະກິດ 83/ນຍ ປະກອບມີຫຼາຍພາກສ່ວນ ໂດຍມີຄະນະຮັບຜິດຊອບ ທີ່ມາຈາກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ກະຊວງແຜນການ ແລະ ການລົງທຶນ, ກະຊວງອຸດສາຫະກໍາ ແລະ ການຄ້າ, ກະຊວງກະສິກໍາ ແລະ ປ່າໄມ້, ທະນາຄານແຫ່ງ ສປປລາວ, ກະຊວງການເງິນ, ສະຖາບັນຄົ້ນຄວ້າຈາກຂະແຫນງການກ່ຽວຂ້ອງເຂົ້າ ຮ່ວມການຄົ້ນຄວ້າ ເພື່ອກໍານົດບັນດາມາດຕະການແກ້ໄຂ ທັງໄລຍະສັ້ນ, ໄລຍະກາງ ແລະ ໄລຍະຍາວ.

      ກອງປະຊຸມຄັ້ງນີ້, ບັນດາພາກທຸລະກິດ ໄດ້ລົງເລີກ ສະເຫນີບັນຫາ ແລະ ປຶກສາຫາລື ແລກປ່ຽນຄໍາຄິດເຫັນ ກ່ຽວກັບ ການຫຼຸດຜ່ອນຕົ້ນທຶນການຜະລິດສິນຄ້າ ແລະ ບໍລິການ. ການປະຢັດເງິນຕາ ເພື່ອຫຼຸດຜ່ອນແຮງກົດດັນ ຕໍ່ຄ່າເງິນກີບ ແລະ ບັນຫາອື່ນໆ ປິ່ນອ້ອມບັນຫາລາຄາ ແລະ ອັດຕາແລກປ່ຽນເງິນຕາຕ່າງປະເທດ(ເງິນເຟີ້)ເພື່ອຈະໄດ້ສັງລວມເອົາບັນຫາທັງໝົດໃຫ້ແກ່ຄະນະສະເພາະກິດ ນໍາໄປລົງເລິກຄົ້ນຄວ້າຢ່າງຖີ່ຖ້ວນ ເພື່ອກໍານົດມາດຕະການແກ້ໄຂບັນຫາໄດ້ຢ່າງຖືກຕ້ອງ ແລະ ສອດຄ່ອງ ຕາມສະພາບຕົວຈິງໃນຕໍ່ໜ້າ.

3
4

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

1

ກອງປະຊຸມສໍາມະນາ ພາຍໃຕ້ຫົວຂໍ້ “ໂອກາດ ແລະ ສິ່ງທ້າທາຍຈາກການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ”

1

      ຕອນເຊົ້າຂອງວັນທີ 31 ກໍລະກົດ 2024 ທີ່ໂຮງແຮມລາວພຣາຊ່າ ໄດ້ມີກອງປະຊຸມສຳມະນາວິຊາການຮ່ວມລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ສະຖາບັນການພັດທະນາເສດຖະ ກິດ-ການຄ້າສາກົນ (IDE-JETRO) ແລະ ສະຖາບັນຄົ້ນຄວ້າເສດຖະກິດສໍາລັບອາຊຽນ ແລະ ອາຊີຕາເວັນອອກສ່ຽງ ໃຕ້ (ERIA) ພາຍໃຕ້ຫົວຂໍ້: “ກາລະໂອກາດ ແລະ ສິ່ງທ້າທາຍຈາກການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຂອງ ສປປ ລາວ” ໂດຍການເປັນປະທານຮ່ວມຂອງທ່ານ ປອ. ກິແກ້ວ ຈັນທະບູຣີ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ລີເບີ ລີບົວປາວ, ປະທານກໍາມະທິການແຜນການ, ການເງິນ ແລະ ການກວດສອບ ສະພາແຫ່ງຊາດລາວ, ແລະ ສາດສະດາຈານ ຄີມມູລະ ຟູກຸນາຣິ, ປະທານສະຖາບັນການພັດທະ ນາເສດຖະກິດ-ການຄ້າສາກົນ (IDE-JETRO); ມີບັນດາທ່ານຜູ້ຕາງໜ້າຈາກກະຊວງ, ອົງການ, ສະຖາບັນ, ສະຖານທູດ ແລະ ພາກສ່ວນນັກທຸລະກິດທັງພາຍໃນ ແລະ ຕ່າງປະເທດ, ຄະນະຊ່ຽນຊານຈາກ IDE-JETRO ແລະ ERIA ເຂົ້າຮ່ວມ. ຈຸດປະສົງຂອງກອງປະຊຸມ ແມ່ນເພື່ອສ້າງຄວາມເຂົ້າໃຈກ່ຽວກັບກາລະໂອກາດ ແລະ ສິ່ງທ້າທາຍ ໃນການກະກຽມຄວາມພ້ອມຫຼຸດພົ້ນອອກຈາກສະຖານະພາບດ້ວຍພັດທະນາ (LDC) ໂດຍຜ່ານການສຶກສາຄົ້ນຄວ້າ  ແລະ ການສົນທະນາປຶກສາຫາລືຂອງຫຼາຍພາກສ່ວນທັງພາກລັດ, ເອກະຊົນ, ນັກວິຊາການ ແລະ ຜູ້ວາງນະໂຍບາຍ.

      ໃນໂອກາດນີ້ ທ່ານ ປອ. ກິແກ້ວ ຈັນທະບູຣີ  ໄດ້ມີຄຳເຫັນບາງຕອນວ່າ: ການອອກຈາກສະຖານະພາບປະເທດດ້ອຍພັດທະນາ ມີທັງກາລະໂອກາດ ແລະ ສິ່ງທ້າທາຍ ເພາະຈະຊ່ວຍເຮັດໃຫ້ຖານະບົດບາດ ແລະ ອິດທິພົນຂອງ ສປປ ລາວ ພົ້ນເດັ່ນຂຶ້ນໃນເວທີສາກົນ. ໃນດ້ານການຄ້າ ແລະ ການເຊື່ອມໂຍງເສດຖະກິດກັບພາກພື້ນ ແລະ ສາກົນ ກໍ່ຈະສ້າງຄວາມເຊື່ອໝັ້ນໃຫ້ແກ່ນັກລົງທຶນຕ່າງປະເທດ, ສ້າງໂອກາດໃຫ້ສາມາດເຂົ້າເຖິງແຫຼ່ງທຶນໃໝ່ໆໄດ້. ແຕ່ໃນທາງກົງ ກັນຂ້າມ, ພາຍຫຼັງຫຼຸດພົ້ນ ສປປ ລາວ ກໍ່ອາດປະເຊີນກັບຄວາມສ່ຽງຢ່າງຫຼີກລ່ຽງບໍ່ໄດ້ ເປັນຕົ້ນແມ່ນການສູນເສຍບາງສິດທິພິເສດດ້ານການຄ້າ ສໍາລັບປະເທດດ້ອຍພັດທະນາ, ການເຂົ້າເຖິງທຶນຊ່ວຍເຫຼືອລ້າ ແລະ ເງິນກູ້ຢືມດອກເບ້ຍຕໍ່າ, ການຊ່ວຍເຫຼືອທາງການເພື່ອການພັດທະນາທີ່ຫຼຸດລົງ ແລະ ການສະໜັບສະໜູນ ສຳລັບເຂົ້າຮ່ວມກອງປະຊຸມສາກົນ ລວມທັງອັດຕາເພດານການຈ່າຍເງິນພັນທະປະກອບສ່ວນໃຫ້ແກ່ອົງການຈັດຕັ້ງສາກົນຕ່າງໆ ທີ່ລາວເປັນສະມາຊິກ/ພາຄີ ຈະມີອັດຕາທີ່ເພີ່ມສູງຂຶ້ນ.

      ກອງປະຊຸມໄດ້ຮັບຟັງການສະເໜີກ່ຽວກັບ ຜົນສຳເລັດໃນການການຈັດຕັ້ງປະຕິບັດແຜນຍຸດທະສາດການຂ້າມຜ່ານຂອງ ສປປ ລາວ ເພື່ອອອກຈາກສະຖານະພາບດ້ອຍພັດທະນາຢ່າງໂລ່ງລ່ຽນ, ຜົນການຄົ້ນຄວ້າຈາກນັກວິຊາ ການ ພ້ອມທັງມີການສົນທະນາແລກປ່ຽນບົດຮຽນທາງດ້ານວິຊາການຢ່າງກົງໄປກົງມາ ໂດຍສະເພາະກ່ຽວກັບການພັດທະນາ ແລະ ການສ້າງຄວາມເຂັ້ມແຂງໃຫ້ອຸດສາຫະກໍາສົ່ງອອກຂອງ ສປປ ລາວ ເພື່ອໃຫ້ສາມາດຍາດແຍ່ງກາ ລະໂອກາດ ແລະ ຫຼຸດຜ່ອນສິ່ງທ້າທາຍຈາກການຫຼຸດພົ້ນອອກຈາກສະຖານະປະເທດດ້ອຍພັດທະນາຂອງ ສປປ ລາວ ໃນອີກບໍ່ດົນທໍ່ໃດປີ. 

2
3

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ