douangchai lovan – ໜ້າ 4 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ຣາຊາອານາຈັກກຳປູເຈຍ

ຈໍານວນຜູ້ເຂົ້າຊົມ: 502

ຄະນະຜູ້ແທນ ສວສສຊ ເຂົ້າຮ່ວມກອງປະຊຸມສຳມະນາວິທະຍາສາດສາກົນຢູ່ ຣາຊາອານາຈັກກຳປູເຈຍ

ໃນລະຫວ່າງວັນທີ 29-30 ກັນຍາ 2025 ຄະນະຜູ້ແທນ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ນໍາໂດຍທ່ານ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານ ສວສສຊ ໄດ້ເດີນທາງເຂົ້າຮ່ວມກອງປະຊຸມສໍາມະນາວິທະຍາສາດສາກົນ ຄັ້ງທີ XII ເຊິ່ງຈັດຂຶ້ນທີ່ນະຄອນຫຼວງພະນົມເປັນ ຣາຊາອານາຈັກກຳປູເຈຍ ພາຍໃຕ້ຫົວຂໍ້: “ການພັດທະນາເສດຖະກິດ, ສັງຄົມ ແລະ ວັດທະນະທຳ ທີກົມກຽວ ຢູ່ ລາວ, ຫວຽດນາມ ແລະ ກຳປູ ເຈຍ” ໂດຍການເປັນເຈົ້າພາບຂອງຣາຊະບັນດິດສະພາກໍາປູເຈຍ (RAC). ຄະນະປະທານກອງປະຊຸມປະກອບມີ ທ່ານ Sok Touch ປະທານສະພາບັນດິດ ແຫ່ງຣາຊາອານາຈັກກຳປູເຈຍ (RAC), ທ່ານ ປອ. ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ທ່ານ ປອ. ດັ້ງ ຊວນ ແທ່ງ ຮອງປະທານສະຖາບັນດິດວິທະຍາສາດສັງຄົມຫວຽດນາມ (VASS), ເຊິ່ງເປັນກຽດເຂົ້າເປັນປະທານເປີດກອງປະຊຸມສຳມະນາວິທະຍາສາດສາກົນ ຄັ້ງນີ້ແມ່ນ ທ່ານ ບັນດິດ Hing Thoraxy, ເລຂາທິການແຫ່ງລັດ, ລັດຖະມົນຕີປະຈຳຫ້ອງການສະພາລັດຖະມົນຕີ, ມີບັນດາຄະນະຜູ້ແທນ, ນັກຄົ້ນຄວ້າ, ນັກວິທະຍາສາດຂອງ 3 ສະຖາບັນ, ມະຫາວິທະຍາໄລ, ສະຖາບັນການສຶກສາຂັ້ນສູງ, ສະຖາບັນຄົ້ນຄວ້າຕ່າງໆ, ຜູ້ຕາງໜ້າຈາກບັນດາພາກລັດ ແລະ ຂະແໜງການກ່ຽວຂ້ອງ ຂອງຣາຊາອານາຈັກກຳປູເຈຍ ເຂົ້າຮ່ວມ.

ຈຸດປະສົງ ຂອງກອງປະຊຸມ ສຳມະນາວິທະຍາສາດຄັ້ງນີ້ ແມ່ນເພື່ອປຶກສາຫາລື, ແລກປ່ຽນບົດຮຽນ ແລະ ປະສົບການ ເຊິ່ງກັນ ແລະ ກັນ ກ່ຽວກັບການພັດທະນາເສດຖະກິດ-ສັງຄົມ ທີ່ກົມກຽວ ຢູ່ ສປປ ລາວ, ສສ ຫວຽດນາມ ແລະ ກຳປູເຈຍ.

ທ່ານ Sok Touch, ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງກອງປະຊຸມໃນຄັ້ງນີ້ ຖືເປັນໂອກາດໃໝ່ ທີ່ພວກເຮົາຈະໄດ້ຮ່ວມກັນແລກປ່ຽນຄວາມຄິດເຫັນ ແລະ ຍົກລະດັບຄວາມຮ່ວມມືໃຫ້ມີປະສິດທິຜົນຫຼາຍຂຶ້ນ ທ່າມກາງບໍລິບົດການປ່ຽນແປງ ຂອງ ພູມິລັດທະສາດ ແລະ ຄວາມທ້າທາຍ ທັງພູມິພາກ ແລະ ທົ່ວໂລກ ເຊິ່ງໄດ້ກຳນົດຄວາມທ້າທາຍ ແລະ ໂອກາດໃໝ່ໆ ໃນຄວາມສຳພັນລະຫວ່າງສາມປະເທດ, ການແລກປ່ຽນຄວາມຄິດເຫັນ ແລະ ຍຸດທະສາດ ເພື່ອເສີມສ້າງສັນຕິພາບຄວາມສາມັກຄີ ແລະ ຄວາມໝັ້ນຄົງ, ນຳສະເໜີແນວທາງຄວາມຮ່ວມມື ທີ່ສາມາດປະຕິບັດໄດ້ຈິງ, ສົ່ງເສີມການເຊື່ອມໂຍງ ລະຫວ່າງນັກຄົ້ນຄວ້າ ແລະ ຜູ້ກຳນົດນະໂຍບາຍ, ສ້າງຈິດສຳນຶກ ດ້ານສັນຕິພາບ ແລະ ຄວາມເປັນເອກະພາບ ໃນຫມູ່ປະຊາຊົນ, ເສີມສ້າງຄວາມສຳພັນໃຫ້ເປັນມິດຕະພາບ ແລະ ຄວາມຮ່ວມມືທີ່ຍືນຍົງ, ຜັກດັນເຂດຊາຍແດນ ໃຫ້ເປັນຕົວຢ່າງ ຂອງຄວາມຮ່ວມມື, ສົ່ງເສີມຄວາມສຳພັນທາງວັດທະນະທຳ ເພື່ອສ້າງຄວາມເຂົ້າໃຈ ແລະ ການຢູ່ຮ່ວມກັນຢ່າງກົມກຽວ. ສະນັ້ນຄວາມສຳພັນລະຫວ່າງ ກຳປູເຈຍ–ລາວ–ຫວຽດນາມ ຈິງມີຮາກຖານຜູກພັນ ຢູ່ໃນ 3 ດ້ານຄື: ພູມິສາດ: ມີຊາຍແດນຕິດກັນ ປະຊາຊົນສາມາດເດີນທາງໄປມາຫາກັນໄດ້, ປະຫວັດສາດ: ເຄີຍຮ່ວມກັນຕໍ່ສູ້ເພື່ອອິດສະຫຼະ, ທຳມະຊາດ: ມີແມ່ນ້ຳ ແລະ ພູເຂົາ ຮ່ວມກັນ ເຊັ່ນ ແມ່ນ້ຳໂຂງດັ່ງນັ້ນ; ພວກເຮົາບໍ່ສາມາດແຍກອອກຈາກກັນໄດ້ ແລະ ຈະຕ້ອງສ້າງຄວາມໄວ້ວາງໃຈເຊິ່ງກັນ ແລະ ກັນເພື່ອເສີມສ້າງສັນຕິພາບ ມິດຕະພາບ ແລະ ການພັດທະນາທີ່ຍືນຍົງ

ໃນໂອກາດດັ່ງກ່າວ ທ່ານ ປອ. ກອງແກ້ວ ໄຊສົງຄາມ, ໄດ້ມີຄໍາເຫັນຕໍ່ກອງປະຊຸມບາງຕອນວ່າ ການຈັດກອງປະຊຸມສຳມະນາວິທະຍາສາດສາກົນໃນຄັ້ງນີ້ ແມ່ນເພື່ອປຶກສາຫາລື, ແລກປ່ຽນບົດຮຽນ ແລະ ຄຳຄິດຄຳເຫັນ ເຊິ່ງກັນ ແລະ ກັນ ກ່ຽວກັບທິດສະດີ ແລະ ພຶດຕິກຳຕົວຈິງຂອງການພັດທະນາເສດຖະກິດ-ສັງຄົມ ແລະ ສິ່ງແວດລ້ອມ ທີ່ກົມກຽວ ຢູ່ ສປປ ລາວ, ຫວຽດນາມ ແລະ ກຳປູເຈຍ ປະຈຸບັນນີ້ ສູນກາງພັກ ແລະ ລັດຖະບານ ໄດ້ເຫັນຄວາມສຳຄັນ ອອກນະໂຍບາຍ, ນິຕິກຳ ແລະ ກົນໄກການຄຸ້ມຄອງ ແລະ ໄດ້ກຳນົດເອົາ ການພັດທະນາເສດຖະກິດ-ສັງຄົມ ແລະ ສິ່ງແວດລ້ອມທີ່ກົມກຽວກັນ ເປັນແນວທາງລວມຂອງການພັດທະນາເສດຖະກິດ-ສັງຄົມ ໃຫ້ໄປຕາມທິດທາງດັ່ງ ກ່າວ ອັນໄດ້ເຮັດໃຫ້ ການພັດທະນາເສດຖະກິດ-ສັງຄົມ ຢູ່ ສປປ ລາວ ຕາມແນວທາງດັ່ງກ່າວ ປະສົບຜົນສຳເລັດໃນລະດັບໃດໜຶ່ງ, ເປັນຕົ້ນແມ່ນ ໃນການພັດທະນາທາງດ້ານເສດຖະກິດ ແລະ ຫຼຸດຜ່ອນຄວາມທຸກຍາກ. ຄຽງຄູ່ກັບຜົນສຳເລັດ ກໍ່ຍັງມີຂໍ້ຄົງຄ້າງ ແລະ ສິ່ງທ້າທາຍຫຼາຍຢາງທີ່ຈະຕ້ອງໄດ້ປັບປຸງ ແລະ ແກ້ໄຂ ເປັນຕົ້ນແມ່ນ: ການຂະຫຍາຍຕົວຂອງເສດຖະກິດຍັງມີຫຼັກສະນະກະຕຸກຕົວສູງໃນຂະແໜງການທີ່ຕິດພັນກັບຊັບພະຍາກອນທຳມະຊາດ, ການບົກແຫ້ງຂອງຊັບພະຍາກອນທຳມະຊາດ ແລະ ການເສືອມໂຊມຂອງສິ່ງແວດລ້ອມ, ການເພີ່ມຂຶ້ນຂອງຄວາມບໍ່ສະເໜີພາບໃນສັງຄົມ, ການອະນຸລັກ-ຮັກສາເອກະລັກ ແລະ ວັດທະນາທຳອັນດີງາມຂອງຊາດ.

ກອງປະຊຸມໄດ້ຮັບຟັງການສະເໜີບົດສຳມະນາວິທະຍາສາດ, ສົນທະນາ, ປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ໂດຍແບ່ງອອກເປັນ 3 ວາລະຄື: ວາລະທີ 1: ໄດ້ຮັບຟັງການສະເໜີບົດສຳມະນາວິທະຍາສາດ, ສົນທະນາ, ປືກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນກ່ຽວກັບການ ຊຸກຍູ້ການເຊື່ອມໂຍງເສດຖະກິດພາກພື້ນ ເພື່ອການພັດທະນາເສດຖະກິດ-ສັງຄົມທີກົມກຽວ; ວາລະທີ 2: ກ່ຽວກັບການປົກປັກຮັກສາເອກະລັກຂອງຊາດທາງດ້ານວັດທະນາທຳພາຍໃຕ້ເງື່ອນໄຂການເຊື່ອມໂຍງພາກພື້ນ ແລະ ສາກົນ; ແລະ ວາລະທີ 3: ກ່ຽວກັບນະໂຍບາຍສັງຄົມເພື່ອຊຸກຍູ້ການພັດທະນາເສດຖະກິດ, ສັງຄົມ ແລະ ວັດທະນະທຳ ທີ່ກົມກຽວ ຢູ່ ລາວ, ຫວຽດນາມ ແລະ ກຳປູເຈຍ. ບົດສຳມະນາວິທະຍາສາດ ແລະ ປະກອບຄຳຄິດ ຄໍາເຫັນຂອງບັນດານັກວິທະຍາກອນ ແລະ ສຳມະນາກອນ ໄດ້ຊີ້ໃຫ້ເຫັນກ່ຽວກັບຜົນສຳເລັດ, ຂໍ້ຄົງຄ້າງ, ກາລະລະໂອກາດ, ສິ່ງທ້າຍທາຍ ແລະ ມີຂໍ້ສະເໜີແນະໃນການເພີ່ມທະວີ ການຮ່ວມມືຊຸກຍູ້ການພັດທະນາເສດຖະກິດ-ສັງຄົມ ທີກົມກຽວ ຢູ່ ສປປ ລາວ, ສສ ຫວຽດນາມ ແລະ ຣາຊາອານາຈັກ ກຳປະເຈຍ. ນອກນັ້ນ, ກອງປະຊຸມຍັງໄດ້ປຶກສາຫາລື ແລະ ຕົກລົງເປັນເອກະພາບກັນ ຈະສືບຕໍ່ຈັດກອງປະຊຸມສຳມະນາວິທະຍາສາດສາກົນ ຄັ້ງທີ XIII ພາຍໄຕ້ຫົວຂໍ້: “ການເຊື່ອມໂຍງທາງດ້ານພື້ນຖານໂຄງລ່າງ ລະຫວ່າ ລາວ, ຫວຽດນາມ ແລະ ກຳປູເຈຍ” ໃນລະຫວ່າງເດືອນ ກັນຍາ-ທັນວາ 2026, ຢູ່ທີ່ ສສ ຫວຽດນາມ, ພາຍໃຕ້ການເປັນເຈົ້າພາບ ຂອງ ສະຖາບັນ ບັນດິດວິທະຍາສາດສັງຄົມ ຂອງ ສສ ຫວຽດນາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ພົບປະແລກປ່ຽນບົດຮຽນກັບຄະນະຜູ້ແທນ ສສ. ຫວຽດນາມ

ຈໍານວນຜູ້ເຂົ້າຊົມ: 476

ສວສສຊ ພົບປະແລກປ່ຽນບົດຮຽນກັບຄະນະຜູ້ແທນ ສສ. ຫວຽດນາມ

ກອງປະຊຸມພົບປະແລກປ່ຽນ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກັບ ຄະນະຜູ້ແທນຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ສສ. ຫວຽດນາມ ໄດ້ຈັດຂຶ້ນໃນຕອນບ່າຍຂອງວັນທີ 22 ກັນຍາ 2025 ທີ່ ສວສສຊ. ຝ່າຍລາວນຳໂດຍ ປອ. ສາຍຄຳ ວໍລະເດດ ກຳມະການຄະນະພັກ, ຫົວໜ້າຫ້ອງການຄຸ້ມຄອງວິທະຍາສາດ ພ້ອມດ້ວຍຄະນະ, ຝ່າຍຫວຽດນາມນຳໂດຍ ສະຫາຍ ຫງວຽນ ແມ່ງ ດົງ ຮອງຜູ້ອຳນວຍການວິທະຍາຄານການທູດ ກະຊວງການຕ່າງປະເທດ ສສ. ຫວຽດນາມ ພ້ອມດ້ວຍຄະນະຕາງໜ້າຈາກ ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບຫວຽດນາມ ເຂົ້າຮ່ວມ.

ຈຸດປະສົງຂອງການພົບປະໃນຄັ້ງນີ້ ແມ່ນເພື່ອແລກປ່ຽນທັດສະນະທາງດ້ານນະໂຍບາຍການຕ່າງປະເທດຂອງ ລາວຕໍ່ຜົນກະທົບຈາກສະພາບການພາກພື້ນ ແລະ ໂລກ ຕໍ່ບັນຫາດ້ານຄວາມໝັ້ນຄົງ ແລະ ການພັດທະນາຢູ່ພາກພື້ນ ລວມທັງບັນຫາທະເລຈີນໃຕ້ ໃນປັດຈຸບັນ; ທັງສອງຝ່າຍໄດ້ສົນທະນາລົງເລິກໃນຫຼາຍບັນທີ່ສຳຄັນເປັນຕົ້ນແມ່ນການແຂ່ງຂັນລະຫວ່າງບັນດາປະເທດໃຫຍ່ຢູ່ເຂດອາຊີຕາເວັນອອກສ່ຽງໃຕ້, ນະໂຍບາຍການຕ່າງປະເທດຂອງຈີນ, ການພົວພັນລະຫວ່າງອາເມລິກາ-ອາຊີຕາເວັນອອກສ່ຽງໃຕ້, ບົດບາດ ແລະ ການພົວພັນລະຫວ່າງບັນດາປະເທດປານກາງກັບອາຊີຕາເວັນອອກສ່ຽງໃຕ້; ບັນຫາທະເລຈີນໃຕ້, ການຮ່ວມມືແມ່ນ້ຳຂອງ ແລະ ການພົວພັນຮ່ວມມືສອງຝ່າຍ ລະຫວ່າງລາວ-ຫວຽດນາມ ໃນຂົງເຂດຕ່າງໆ. ໃນໂອກາດນີ້ ຕາງໜ້າຜູ້ແທນຝ່າຍລາວ ໄດ້ຢັ້ງຢືນຢ່າງໜັກແໜ້ນ ສປປ ລາວ ຍຶດໝັ້ນແນວທາງການຕ່າງເທດໃນການສ້າງສັນຕິພາບ, ເອກກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປີດກວ້າງການພົວພັນຮ່ວມມືແບບສອງຝ່າຍ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດຫລຸດຜ່ອນສັດຕູ” ເວົ້າລວມ, ເວົ້າສະເພາະກໍຄືການຍົກລະດັບ ແລະ ເສີມຂະຫຍາຍສາຍພົວພັນສາມັກຄີແບບພິເສດ, ຮອບດ້ານ ລະຫວ່າງສອງປະເທດ ລາວ-ຫວຽດນາມ ໃຫ້ໝັ້ນຄົງທະນົງແກ່ນ ແລະ ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ປຶກສາຫາທາງດ້ານວິຊາການ ຕໍ່ບັນຫາແຮງງານ ແລະ ອັດຕາແລກປ່ຽນ

ຈໍານວນຜູ້ເຂົ້າຊົມ: 704

ສວສສຊ ປຶກສາຫາທາງດ້ານວິຊາການ ຕໍ່ບັນຫາແຮງງານ ແລະ ອັດຕາແລກປ່ຽນ

ໃນຕອນເຊົ້າຂອງວັນທີ 19 ກັນຍາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປີດກອງປະຊຸມປຶກສາຫາລືທາງດ້ານວິຊາການ ພາຍໃຕ້ຫົວຂໍ້: ສະພາບບັນຫາແຮງງານໃນ ສປປ ລາວ ແລະ ການເໜັງຕີງຂອງອັດຕາແລກປ່ຽນ ໂດຍການເປັນປະທານຂອງ ທ່ານ ບົວສອນ ບຸບຜາວັນ, ອາດີດກົມການເມືອງສູນກາງພັກ, ອາດີດນາຍົກລັດຖະມົນຕີ; ເຂົ້າຮ່ວມກອງປະຊຸມມີທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານ ສວສສຊ; ທ່ານ ປອ. ສະຖາບັນດິດ ອິນສີຊຽງໃໝ່ ຮອງເລຂາຄະນະພັກ, ຮອງປະທານ ສວສສຊ; ມີບັນດາຫົວໜ້າສະຖາບັນຄົ້ນຄວ້າ ພ້ອມດ້ວຍທີມງານນັກຄົ້ນຄວ້າເຂົ້າຮ່ວມຈໍານວນໜຶ່ງ.

ກອງປະຊຸມໄດ້ຮັບຟັງການນໍາສະເໜີສະພາບການເຄື່ອນຍ້າຍແຮງງານໄວໜຸ່ມໄປເຮັດວຽກຢູ່ຕ່າງປະເທດ; ສະ ພາບການຂາດແຄນແຮງງານ ແລະ ສະພາບການເໜັງຕີງຂອງອັດຕາແລກປ່ຽນໃນລາວ ເຊິ່ງເນື້ອໃນບາງຕອນກ່າວວ່າ: ເສດຖະກິດຂອງລາວລິເລີ່ມຟື້ນຕົວ ແລະ ຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ, ໝັ້ນທ່ຽງ ເປັນປັດໄຈພື້ນຖານອັນສໍາຄັນ ເອື້ອອໍານວຍໃຫ້ແກ່ການພັດທະນາ, ການດໍາເນີນທຸລະກິດ, ການຜະລິດ ແລະ ການບໍລິການ; ໃນນັ້ນ ກໍາລັງແຮງງານຖືວ່າມີຄວາມສຳຄັນຫຼາຍ ໃນການປະກອບສ່ວນຊຸກຍູ້ໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ ແລະ ການຫັນເປັນອຸດສາຫະກໍາທັນສະໄໝເທື່ອລະກ້າວ. ປັດຈຸບັນ, ສປປ ລາວ ລາວມີປະຊາກອນຢູ່ໃນເກນອາຍຸໄວອອກແຮງງານ ຈໍານວນ 5,3 ລ້ານຄົນ. ໃນນັ້ນ, ຜູ້ທີ່ມີວຽກເຮັດງານທໍາກວມເອົາ 2,4 ລ້ານຄົນ ຂອງກໍາລັງແຮງງານທັງໝົດ. ຢ່າງໃດກໍຕາມ ໃນໄລຍະ 2-3 ປີທີ່ຜ່ານມາ ເສດຖະກິດຂອງລາວຍັງມີຄວາມບອບບາງ ແລະ ປະເຊີນກັບຄວາມສ່ຽງຫຼາຍດ້ານ ທັງພາຍໃນ ແລະ ພາຍນອກ ເຊັ່ນ: ບັນຫາໄພເງິນເຟີ້, ອັດຕາແລກປ່ຽນ ແລະ ຄ່າຄອງຊີບທີ່ສູງຂຶ້ນ ເຮັດໃຫ້ຕະຫຼາດແຮງງານພາຍໃນຂະຫຍາຍຕົວຈໍາກັດ ຍ້ອນຄ່າຈ້າງແຮງງານທີ່ຕໍ່າບໍ່ດຸນດ່ຽງກັບຄ່າຄອງຊີບ ຈຶ່ງສົ່ງຜົນກະທົບໂດຍກົງຕໍ່ຜູ້ອອກແຮງງານ ເຮັດໃຫ້ໄວໜຸ່ມ-ໄວອອກແຮງງານຕັດສິນໃຈໄປຂາຍແຮງງານຕ່າງປະເທດສູງເຖິງ 500.000 ກວ່າຄົນ, ໃນປີ 2022-2024 ມີຈໍານວນຜູ້ອອກແຮງງານລົງທະບຽນທີ່ຜ່ານລະບົບທາງການປະມານ 255.700 ຄົນ ແລະ ປະ ມານ 96% ແມ່ນເຄື່ອນຍ້າຍໄປຂາຍແຮງງານຢູ່ປະເທດໄທ, 54% ຂອງແຮງງານແມ່ນເຮັດວຽກຢູ່ໃນຂະແໜງບໍລິການ.

ບັນດານັກຄົ້ນຄວ້າໄດ້ພ້ອມກັນປຶກສາຫາລື ແລະ ແລກປ່ຽນຄຳຄິດຄໍາເຫັນຕໍ່ກັບສະພາບບັນຫາແຮງງານໃນ ລາວ ແລະ ການເໜັງຕີງຂອງອັດຕາແລກປ່ຽນຢ່າງກົງໄປກົງມາ, ມີການຄົ້ນຄວ້າ, ວິເຄາະ, ໄຈ້ແຍກ ແລະ ຕັ້ງຄໍາຖາມ ເພື່ອຊອກຫາວິທີການແກ້ໄຂສະເໜີຕໍ່ຂັ້ນເທິງ ນໍາໄປຈັດຕັ້ງຜັນຂະຫຍາຍເປັນນະໂຍບາຍ ແລະ ມາດຕະການໃຫ້ແທດ ເໝາະຕາມສະພາບການຕົວຈິງໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ຄະນະພັກ-ຄະນະນຳ ສວສສຊ ວາງພວງມາລາຕໍ່ຄອບຄົວພະນັກງານບໍານານ

ຈໍານວນຜູ້ເຂົ້າຊົມ: 390

ຄະນະພັກ-ຄະນະນຳ ສວສສຊ ວາງພວງມາລາຕໍ່ຄອບຄົວພະນັກງານບໍານານ

ຕອນເຊົ້າຂອງວັນທີ 12 ກໍລະກົດ 2024 ທີ່ຜ່ານນີ້, ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະພັກ-ຄະນະນໍາ, ພະນັກງານລັດຖະກອນ ທີ່ມາຈາກພາກສ່ວນຕ່າງໆພາຍໃນ ສວສສຊ ໄດ້ເຂົ້າວາງພວງມາລາ ແລະ ຮ່ວມກິນທານຕໍ່ການເສຍຊີວິດຂອງ ສະຫາຍ ບຸນຍັງ ໄຊຊະນະວົງ ເຊິ່ງເປັນຄອບຄົວຂອງ ສະຫາຍ ປອ. ນ. ອຳໄພວັນ ຄໍາແສງສີວິໄລ ພະນັກງານບຳນານ, ອະດີດຄະນະປະຈໍາພັກ, ອະດີດກຳມະການຄະນະພັກ, ອະດີດຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ນະໂອກາດດັ່ງກ່າວນີ້ ຄະນະພັກ-ຄະນະນໍາ ພ້ອມ ດ້ວຍພະນັກງານລັດຖະກອນທຸກສະຫາຍ ຂໍສະແດງຄວາມເສຍໃຈຢ່າງສຸດຊຶ້ງ ແລະ ຂໍແບ່ງເບົາຄວາມໂສກເສົ້າມາ ຍັງຄອບຄົວໄຊຊະນະວົງ, ຄອບຄົວຄໍາແສງສີວິໄລ ດ້ວຍ.

ຂຽນຂ່າວ ແລະ ຖ່າຍພາບ: ເພັດທະນູໄຊ

ສວສສຊ ຢ້ຽມຊົມຫໍພິພິຕະພັນສິລະປະລາວ (Lao Art Museum)

ຈໍານວນຜູ້ເຂົ້າຊົມ: 393

ສວສສຊ ຢ້ຽມຊົມຫໍພິພິຕະພັນສິລະປະລາວ (Lao Art Museum)

ຕອນບ່າຍຂອງວັນທີ 11 ກໍລະກົດ 2025 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເຂົ້າຢ້ຽມຊົມ ຫໍພິພິຕະພັນ ສິລະປະລາວ ນຳພາໂດຍທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ, ມີຄະນະພັກ-ຄະນະນຳແຕ່ລະຂັ້ນ ພ້ອມດ້ວຍຍສະມາຊິກພັກ, ພະນັກງານລັດຖະກອນ ເຂົ້າຮ່ວມທັງໝົດ 90 ກ່ວາຄົນ. ຈຸດປະສົງຂອງການຢ້ຽມຊົມຄັ້ງນີ້ ເພື່ອສ້າງໂອກາດໃຫ້ບັນດານັກຄົ້ນຄວ້າວິທະຍາສາດໄດ້ສຶກສາສິລະປະ, ເອກະລັກ ແລະ ວັດທະນາທໍາຂອງລາວ ຈາກຜົນງານການແກະສະຫຼັກ, ຫຼໍ່, ປັ້ນ ແລະ ແຕ້ມປະເພດຕ່າງໆ, ເປັນການສ້າງຂະບວນການຕ້ອນຮັບກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສວສສຊ ທີ່ ຈະຈັດຂຶ້ນໃນມໍ່ໆນີ້.

ໃນໂອກາດນີ້, ທ່ານ ພິສິດ ໄຊຍະທິດ ປະທານຫໍພິພິຕະພັນ ສິລະປະລາວ ໄດ້ກ່າວສະແດງຄວາມຍິນດີຕ້ອນຮັບ ແລະ ເລົ່າປະຫວັດຄວາມເປັນໃນການສ້າງຫໍພິພິຕະພັນ ສິລະປະລາວ ບາງຕອນວ່າ: ສປປ ລາວ ເປັນປະທດທີ່ອຸດົມສົມ ບູນໄປດ້ວຍໄມ້ນາໆຊະນິດ, ຫາຍາກ ແລະ ມີຄຸນຄ່າທາງເສດຖະກິດ, ດ້ວຍຄວາມມັກຮັກໃນການສະສົມໄມ້ ແລະ ສິລະ ປະ ຈຶ່ງໄດ້ນໍາເອົາໄມ້ທີ່ມີມາແກະສະຫຼັກເປັນຮູບຕ່າງໆ ຈັດເປັນຫໍວາງສະແດງຜະລິດຕະພັນໄມ້ໄວ້ທີ່ບ້ານຂອງຕົນເອງ. ຕໍ່ມາດ້ວຍການສະໜັບສະໜູນຂອງຄອບຄົວ, ໝູ່ຄູ່, ອົງການຈັດຕັ້ງຂອງລັດ ແລະ ສັງຄົມ ຈຶ່ງໄດ້ຕັດສິນໃຈສ້າງຫໍພິພິຕະພັນ ສິລະປະລາວແຫ່ງນີ້ຂຶ້ນມາ ເພື່ອຮັບໃຊ້ສັງຄົມ, ຊຸກຍູ້ສົ່ງເສີມການທ່ອງທ່ຽວ ແລະ ເປັນແລນມາກທາງດ້ານ ວັດທະນະທໍາຂອງນະຄອນຫຼວງວຽງຈັນ.

ຕໍ່ການລາຍງານດັ່ງກ່າວ, ປອ. ກອງແກ້ວ ໄຊສົງຄາມ ໄດ້ກ່າວສະແດງຄວາມຊົມເຊີຍ ແລະ ຂອບໃຈຕໍ່ການຕ້ອນຮັບດ້ວຍຄວາມອົບອຸ່ນ ທັງໃຫ້ກຽດລາຍງານສະພາບຂອງການກໍ່ສ້າງຫໍພິພິຕະພັນສິລະປະລາວແຫ່ງນີ້ ທີ່ມີ ຄວາມສວຍງາມ, ອະລັງການ, ວິຈິດສິນ ແລະ ມີສະຖາປັດຍະກຳສາດ, ເຕັມໄປດ້ວຍເອກະລັກວັດທະນະທຳລາວ ເພື່ອ ເປັນແຫຼ່ງຮຽນຮູ້ໃຫ້ລູກຫຼານໃນອະນາຄົດ. ຫໍພິພິຕະພັນ ສິລະປະລາວ ແມ່ນວິໄສທັດທີ່ກວ້າງໄກ, ເປັນທຸລະກິດທີ່ມີ ຄວາມຍືນຍົງ-ສີຂຽວ ທີ່ໄດ້ນໍາໃຊ້ຖຸດິບພາຍໃນມາປະສົມປະສານກັບພູມປັນຍາຂອງບັນພະບູລຸດລາວ ທີ່ສືບທອດກັນ ມາເປັນຜົນງານຕ່າງໆສະແດງໃນພິພິດຕະພັນ, ເປັນສິ່ງສົນໃຈທີ່ດຶງດູດນັກທ່ອງທ່ຽວພາຍໃນ ແລະ ຕ່າງປະເທດມາຢ້ຽມຊົມສ້າງຊື່ສຽງ ແລະ ແຫຼ່ງລາຍຮັບໃຫ້ທຸກພາກສ່ວນ, ຊ່ວຍພັດທະນາເສດຖະກິດ-ສັງຄົມຂອງລາວນັບມື້ດີຂຶ້ນ.

ພາຍຫຼັງກ່າວຕ້ອນຮັບແລ້ວ, ທີມງານຫໍພິພິດຕະພັນໄດ້ນໍາຄະນະ ສວສສຊ ເຂົ້າຢ້ຽມຊົມການວາງສະແດງ ຜົນງານສິລະປະເພດຕ່າງໆ ເຊັ່ນ: ໄມ້ແກະສະຫຼັກ, ພຸດທະຮູບ, ສີລາຈາລຶກ ແລະ ອື່ນໆ ທີ່ຫຼາຍກວ່າພັນລາຍການ. ຫໍພິພິຕະພັນ ສິລະປະລາວ ຕັ້ງຢູ່ເຂດພັດທະນາໜອງເຊື່ອມ, ເມືອງໄຊທານີ, ນະຄອນຫຼວງວຽງຈັນ ໄດ້ເປີດການວາງ ສະແດງຄັ້ງທຳອິດໃນວັນທີ 05 ມັງກອນ 2025 ມາຮອດປັດຈຸບັນໄດ້ໃຫ້ບໍລິການແລ້ວປະມານ 6 ເດືອນ, ຈຳນວນນັກ ທ່ອງທ່ຽວທີ່ມາຢ້ຽມຊົມ ສະເລ່ຍມື້ລະ 1.300 ຄົນ. ໃນອານາຄົດ ຫໍພິພິດຕະພັນສິລະປະລາວ ມີແຜນຈະປັບປຸງຂະ ຫຍາຍພື້ນທີ່ວາງສະແດງໃຫ້ກວ້າງຂວາງ ແລະ ສ້າງລະບົບສິ່ງອຳນວຍຄວາມສະດວກຄົບວົງຈອນຕື່ມອີກ.

ຂຽນຂ່າວ ແລະ ຖ່າຍພາບ: ເພັດທະນູໄຊ

ສວສສຊ ມອບປື້ມໃຫ້ຫໍສະໝຸດ ກອງທັບປະຊາຊົນລາວ

ຈໍານວນຜູ້ເຂົ້າຊົມ: 331

ສວສສຊ ມອບປື້ມໃຫ້ຫໍສະໝຸດ ກອງທັບປະຊາຊົນລາວ

ວັນທີ 9 ກໍລະກົດ 2025 ທີ່ຜ່ານມາ, ສະຫາຍ ເພັດໃສ ເພຍເທບ, ກຳມະການຄະນະພັກ, ຫົວໜ້າຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະ ໄດ້ນຳເອົາປື້ມ, ວາລະສານ ແລະ ຜົນງານຄົ້ນຄວ້າ ຈໍານວນ 1.960 ຫົວ ໄປມອບໃຫ້ຫໍສະໝຸດກອງທັບປະຊາຊົນລາວ. ໃນໂອກາດນີ້, ສະຫາຍ ພັທ ນາງ ຄູນທອງ ທຳມະວົງ ຮັກສາການອຳນວຍການ ຫໍສະໝຸດກອງທັບປະຊາຊົນລາວ ໄດ້ກ່າວຮັບ ແລະ ສະແດງຄວາມຂອບໃຈມາຍັງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ໄດ້ນຳເອົາປື້ມຈຳນວນດັ່ງກ່າວ ທີ່ມີຄຸນຄ່າສູງ ຖືວ່າເປັນສົມບັດທາງປັນຍາອັນລ້ຳຄ່າ ມາມອບໃຫ້ຫໍສະໝຸດກອງທັບປະຊາຊົນລາວ. ພ້ອມທັງໃຫ້ຄໍາໝັ້ນສັນຍາວ່າ ຈະນຳເອົາປື້ມດັ່ງກ່າວໄປໝູນໃຊ້ໃຫ້ເກີດປະໂຫຍດສູງສຸດ ໂດຍຈະຮີບໂຮມໄວ້ໃນຫໍສະໝຸດກອງທັບ ແລະ ຈັດແບ່ງໃຫ້ຫໍສະໝຸດກົມກອງຮາກຖານ ທີ່ຂຶ້ນກັບຈຳນວນ 57 ຫົວໜ່ວຍ ເພື່ອໃຫ້ພະນັກງານ-ນັກຣົບໃນຖັນແຖວກອງ ທັບ ແລະ ປັນຍາຊົນທົ່ວໄປໄດ້ມາຄົ້ນຄວ້າສຶກສາຮ່ຳຮຽນ. ໃນຕອນທ້າຍ ທັງສອງຝ່າຍໄດ້ຖ່າຍຮູບຮ່ວມກັນ ແລະ ຈະ ເພິ່ມທະວີການຮ່ວມມືເຊິ່ງກັນ ແລະ ກັນ ໃຫ້ແໜ້ນແຟ້ນຂຶ້ນກວ່າເກົ່າໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ຍົກຍ້າຍ ແລະ ແຕ່ງຕັ້ງຮອງປະທານ ສວສສຊ

ຈໍານວນຜູ້ເຂົ້າຊົມ: 430

ຍົກຍ້າຍ ແລະ ແຕ່ງຕັ້ງຮອງປະທານ ສວສສຊ

ວັນທີ 01 ກໍລະກົດ 2025 ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີປະກາດການຈັດຕັ້ງ ພາຍໃຕ້ການເປັນປະທານຂອງທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຮອງປະທານ ແລະ ພະນັກງານ-ລັດຖະກອນ ພາຍໃນເຂົ້າຮ່ວມ.

ໃນພິທີທ່ານ ນາງ ກັນຍາ ແສງແກ້ວວົງພະຈັນ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງນາຍຍົກລັດຖະມົນຕີ ສະບັບເລກທີ 14/ນຍ, ລົງວັນທີ 23 ມີຖຸນາ 2025 ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ ໂດຍຍົກຍ້າຍ ທ່ານ ປອ. ກິແກ້ວ ຈັນທະບູຣີ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄປຮັບໜ້າທີ່ໃໝ່ຢູ່ຫ້ອງວ່າການສູນກາງພັກ ພ້ອມກັນນັ້ນກໍໄດ້ຜ່ານ ດຳລັດຂອງນາຍົກລັດຖະມົນຕີ ສະບັບເລກທີ 327/ນຍ, ລົງວັນທີ 17 ມີຖຸນາ 2025 ວ່າດ້ວຍການແຕ່ງຕັ້ງຮອງປະທານ ສວສສຊ ໂດຍແຕ່ງຕັ້ງທ່ານ ປອ ສະຖາບັນດິດ ອິນສີຊຽງໃໝ່ ເປັນຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ບົ່ງຕົວແຕ່ງຕັ້ງ ປອ ສະຖາບັນດິດ ອິນສີຊຽງໃໝ່ ເປັນກໍາມະການຄະນະບໍລິຫານງານພັກ, ກໍາມະການປະຈໍາພັກ ສວສສຊ ຕາມມະຕິຕົກລົງ ເລກທີ 561/ຄລສພ, ລົງວັນທີ 16 ມີຖຸນາ 2025.

ໂອກາດດັ່ງກ່າວ, ທ່ານປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີຄໍາເຫັນ ແລະ ໂອ້ລົມ ໂດຍທ່ານໃຫ້ຮູ້ວ່າ: ການຍົກຍ້າຍ, ແຕ່ງຕັ້ງ, ການສັບຊ້ອນ-ຈັດວາງ ພະນັກງານທຸກປະເພດ ໂດຍສະເພາະ ພະນັກງານ ນໍາພາ-ຄຸ້ມຄອງ ແຕ່ລະຂັ້ນ, ທັງແມ່ນຄວາມຮຽກຮ້ອງຕ້ອງການ ຂອງໜ້າທີ່ການເມືອງ ຢູ່ແຕ່ລະບ່ອນ ແລະ ທັງແມ່ນການປະຕິບັດລະບຽບ ການສັບປ່ຽນໜູນວຽນໜ້າທີ່ວຽກງານ ຂອງພະນັກງານການນໍາ ໃນລະບົບການຈັດຕັ້ງຂອງພັກ, ລັດ ແລະ ອົງການຈັດຕັ້ງມະຫາຊົນຄືເຄີຍປະຕິບັດຜ່ານມາ, ຖືເປັນວຽກງານປົກກະຕິ ແລະ ແມ່ນຫຼັກການອັນໜຶ່ງຂອງພັກເຮົາ ໃນວຽກງານພະນັກງານກໍຄືຫຼັກການ “ມີຂຶ້ນ-ມີລົງ,ມີເຂົ້າ-ມີອອກ” ເພື່ອປັບປຸງໃຫ້ດີຂຶ້້ນໄປເລື້ອຍໆ ທັງເປັນການຍົກລະດັບພະນັກງານການນໍາ-ຄຸ້ມຄອງ ຂອງພວກເຮົາ ໃຫ້ມີຄວາມຮູ້, ຄວາມສາມາດ ນໍາພາຮອບດ້ານ.

ຂຽນຂ່າວ:ເພັດທະນູໄຊ ວົງຍະໄຊ

ຖ່າຍພາບ: ມູນິນ ພົນສັກດາ

ກອງປະຊຸມເຜີຍແຜ່ ບົດປະເມີນສະພາບເສດຖະກິດມະຫາພາກ ປະຈໍາປີ 2024 ແລະ ທ່າອຽງປີ 2025

ຈໍານວນຜູ້ເຂົ້າຊົມ: 577

ກອງປະຊຸມເຜີຍແຜ່ ບົດປະເມີນສະພາບເສດຖະກິດມະຫາພາກ ປະຈໍາປີ 2024 ແລະ ທ່າອຽງປີ 2025

ສະຖາບັນຄົ້ນນຄວ້າເສດຖະກິດມະຫາພາກ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ ບົດປະເມີນເສດຖະກິດມະຫາພາກ ຂອງ ສປປ ລາວ ປີ 2024 ແລະ ທ່າອ່ຽງ 2025 ຂື້ນໃນຕອນບ່າຍຂອງວັນທີ 27 ມິຖຸນາ 2024 ທີີ່ຫ້ອງປະຊຸມຊັົ້ນ 3 ຕິກວິຊາການຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໂດຍການເປັນປະທານຂອງ ທ່ານ ປອ. ກິແກ້ວ ຈັນທະບູຣີ, ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES), ມີບັນດາທ່ານຜູ້ຕາງໜ້າຈາກ ບັນດາຂະແໜງ ການກ່ຽວຂ້ອງ ພາກລັດ, ພາກເອກະຊົນ, ມະຫາວິທະຍາໄລແຫ່ງຊາດ, ບັນດາສະຖານທູດປະຈໍາ ສປປ ລາວ ແລະ ອົງການຈັດຕັ້ງສາກົນປະຈໍາ ສປປ ລາວ ເຂົ້າຮ່ວມຫຼາຍວ່າ 60 ທ່ານ.

ກອງປະຊຸມຄັ້ງນີ້ ໄດ້ຮັບຟັງການນໍາສະເໜີຜົນການປະເມີນສະພາບເສດຖະກິດມະຫາພາກຂອງ ສປປ ລາວ ໃນປີ 2024 ແລະ ທ່າອ່ຽງເສດຖະກິດປີ 2025 ຈາກ ທ່ານ ນ. ລັດດາວັນ ຊົງວິໄລ ຫົວໜ້າສະຖາບັນຄົົ້ນຄວ້າເສດຖະກິດມະຫາພາກ (MRI) ເຊິີ່ງສະແດງໃຫ້ຮູ້ວ່າ ສະພາບເສດຖະກິດມະຫາພາກ ເຫັນວ່າ ມີສະຖຽນລະພາບຂື້ນ ເນື່ອງຈາກວ່າ ອັດຕາເງິນເຟີ້ ໄດ້ຄ່ອຍເລີີ່ມສະລໍຕົວລົງ ແລະ ການເໜັງຕີງຂອງອັດຕາແລກປ່ຽນ ມີຄວາມສະຫງົບຂື້ນ ໂດຍສະເພາະ ໃນທ້າຍປີ 2024 ເປັນຕົ້ນມາ ຍ້ອນການຈັດຕັ້ງປະຕິບັດຫຼາຍມາດຕະການສໍາຄັນຂອງລັດຖະບານ. ອັດຕາການເຕີບໂຕເສດຖະກິດ (GDP) ໃນປີ 2024 ຢູ່ໃນລະດັບ 4.3% ເພີ່ມຂື້ນເລັກນ້ອຍຈາກ 4.2% ໃນປີ 2023 ເຊິີ່ງຂະແໜງການສົ່ງອອກ ເປັນຕົວຂັບເຄື່ອນຕົ້ນຕໍທີ່ສໍາຄັນໃຫ້ແກ່ການຂະຫຍາຍຕົວຂອງເສດຖະກິດລາວ ໂດຍສະເພາະການສົ່ງອອກພະລັງງານໄຟຟ້າ, ສິນຄ້າປະເພດອຸດສາຫະກໍາ ແລະ ພືດ. ໃນຂະນະດຽວກັນ, ການນໍາເຂົ້າສິນຄ້າ ໄດ້ສະລໍຕົວລົງ ຕາມທ່າອ່ຽງຂອງການລົງທຶນໂດຍກົງຈາກຕ່າງປະເທດ (FDI) ແລະ ຄວາມຕ້ອງການພາຍໃນ ຈາກການປະຕິບັດນະໂຍບາຍຮັດກຸມທາງດ້ານການເງິນ-ເງິນຕາຂອງລັດຖະບານ. ເຖິງຢ່າງໃດກໍ່ຕາມ, ເສດຖະກິດມະຫາພາກຂອງ ສປປ ລາວ ຍັງຢູ່ໃນສະພາບທີີ່ມີຄວາມບອບບາງ ແລະ ປະເຊີນກັບຄວາມຫຍຸ້ງຍາກ ຍ້ອນອັດຕາເງິນເຟີ້ ແລະ ລາຄາສິນຄ້າຍັງຢູ່ໃນລະດັບສູງ ໃນຂະນະທີີ່ ລາຍໄດ້ຕົວຈິງຍັງບໍ່ທັນເພີີ່ມຂື້ນຢ່າງສົມສ່ວນ ແລະ ພາລະໜີ້ສາທາລະນະຍັງຢູ່ໃນລະດັບສູງ. ໃນຕໍ່ໜ້າ, ເສດຖະກິດຂອງ ສປປ ລາວ ຍັງຈະປະເຊີນກັບສະພາບຄວາມບໍ່ແນ່ນອນຂອງສາກົນ ໂດຍສະເພາະ ຄວາມຂັດແຍ່ງດ້ານການຄ້າ ແລະ ຄວາມບໍ່ສະຫງົບໃນຂົງເຂດຕາເວັນອອກກາງ ເຊິີ່ງຄາດວ່າ ຈະສົ່ງຜົນໃຫ້ເສດຖະກິດຂອງສາກົນ ເຕີບໂຕຊ້າລົງ, ອັດຕາເງິນເຟີ້ມີທ່າອ່ຽງເພີ່ມສູງຂື້ນ ແລະ ຄ່າເງິນຂອງຫຼາຍປະເທດມະຫາອໍານາດມີທ່າອ່ຽງເພີ່ມຂື້ນ. ອີງຕາມທ່າອ່ຽງດັ່ງກ່າວ, ສວສສຊ ຄາດວ່າ ເສດຖະກິດຂອງ ສປປ ລາວ ຈະເຕີບໂຕຊ້າລົງ ຢູ່ໃນລະດັບ 3.9% ໃນປີ 2025 ແລະ 4.0% ໃນປີ 2026.

ຜ່ານການຮັບຟັງການນໍາສະເໜີຂອງ ທ່ານ ນ. ລັດດາວັນ ຊົງວິໄລ ຫົວໜ້າສະຖາບັນຄົົ້ນຄວ້າເສດຖະກິດມະຫາພາກ (MRI), ຜູ້ເຂົ້າຮ່ວມກອງປະຊຸມ ແມ່ນໄດ້ສົນທະນາແລກປ່ຽນຄໍາຄິດເຫັນຢ່າງກົງໄປກົງມາ ເຊິີ່ງໂດຍລວມແມ່ນເຫັນດີຕໍ່ກັບການຕີລາຄາຂອງທີມງານ. ກອງປະຊຸມດັ່ງກ່າວ ແມ່ນດໍາເນີນເປັນເວລາເຄິ່ງວັນ ເຊິີ່ງຜູ້ເຂົ້າຮ່ວມກໍ່ໄດ້ປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນ ດ້ວຍບັນຍາກາດທີ່ຟົດຟື້ນ ເຊິ່ງເຮັດໃຫ້ກອງປະຊຸມປະສົບຜົນສໍາເລັດຕາມລະດັບຄາດໝາຍທີີ່ໄດ້ກໍານົດໄວ້ຢ່າງຈົບງາມ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ກອງປະຊຸມປຶກສາຫາລືແລກປ່ຽນຄຳຄິດເຫັນຕໍ່ກັບການປະເມີນຜົນເບື້ອງຕົ້ນ ໃນການເກັບກຳຂໍ້ມູນກ່ຽວກັບລາຄາຊີ້ນໝູ ແລະ ເຂົ້າ ຢູ່ ແຂວງ ຈຳປາສັກ

ຈໍານວນຜູ້ເຂົ້າຊົມ: 533

ກອງປະຊຸມປຶກສາຫາລືແລກປ່ຽນຄຳຄິດເຫັນຕໍ່ກັບການປະເມີນຜົນເບື້ອງຕົ້ນ ໃນການເກັບກຳຂໍ້ມູນກ່ຽວກັບລາຄາຊີ້ນໝູ ແລະ ເຂົ້າ ຢູ່ ແຂວງ ຈຳປາສັກ

ຕອນເຊົ້າໃນວັນທີ 20 ມິຖຸນາ 2025 ທີ່ຜ່ານມາ ທີ່ຫ້ອງວ່າການປົກຄອງແຂວງຈຳປາສັກ ໄດ້ຈັດກອງປະຊຸມປຶກສາຫາລືແລກປ່ຽນຄຳຄິດເຫັນຕໍ່ກັບການສະເຫນີຜົນເບື້ອງຕົ້ນຈາກການລົງໄປເກັບກຳຂໍ້ມູນກ່ຽວກັບລາຄາຊີ້ນໝູ ແລະ ເຂົ້າ ຂອງທີມງານຄົ້ນຄວ້າກອງເລຂາຊ່ວຍວຽກຄະນະ 83/ນຍ ໂດຍການເປັນປະທານຮ່ວມຂອງ ທ່ານ ປອ ບຸນຍົງ ສູນທອນ ຮອງຫົວໜ້າຫ້ອງວ່າການແຂວງ ຈຳປາສັກ ແລະ ທ່ານ ປອ ວັນໄຊ ໄຊຍະວົງ ຮອງຫົວຫນ້າສະຖາບັນຄົ້ນຄວ້າເສດຖະກິດມະຫາພາກ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ແລະ ແຂກທີ່ຖືກເຊີນຈາກພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າ, ທະນາຄານແຫ່ງ ສປປ ລາວ ຂາສາຈຳປາສັກ, ຫ້ອງການກະສິກຳ ແລະ ປ່າໄມ້ ເມືອງ, ຫ້ອງການອຸດສາຫະກຳ ແລະ ການຄ້າ ເມືອງ ແລະ ພາກສ່ວນທີ່ກ່ຽວຂ້ອງອ້ອມຂ້າງແຂວງຈຳປາສັກ ເຂົ້າຮ່ວມ. ຈຸດປະສົງຂອງກອງປະຊຸມ ໃນຄັ້ງນີ້ ແມ່ນເພື່ອສະເຫນີຜົນເບື້ອງຕົ້ນຈາກການລົງເກັບກຳຂໍ້ມູນຂອງທີມງານຄົ້ນຄວ້າໃນໄລຍະ 4 ວັນຜ່ານມາ ແລະ ປຶກສາຫາລືສົນທະນາກ່ຽວກັບການຕີລາຄາບັນຫາດ້ານຕົ້ນທຶນ ແລະ ລາຄາສິນຄ້າ ໃນຫົວຂໍ້: ການສຶກສາຄວາມເປັນໄປໄດ້, ຜົນກະທົບ ແລະ ຜົນໄດ້ຈາກການຫຼຸດຜ່ອນຕົ້ນທຶນ ແລະ ລາຄາຂອງບາງລາຍການສິນຄ້າຈຳເປັນ ແລະ ກະທົບໄວຕໍ່ເງິນເຟີ້, ກໍລະນີສຶກສາ: ລາຄາ ເຂົ້າ ແລະ ຊີ້ນໝູ ຢູ່ ແຂວງຈຳປາສັກ. ເຊິ່ງຄະນະທີມງານ ຄົ້ນຄວ້າຈາກກອງເລຂາຊ່ວຍວຽກດ້ານເນື້ອໃນ ໃຫ້ແກ່ຄະນະສະເພາະກິດ 83/ນຍ ທີ່ລົງເລິກຄົ້ນຄວ້າບັນຫາອັດຕາເງິນເຟີ້ ແລະ ລາຄາສິນຄ້າທີ່ເພີ່ມຂຶ້ນສູງ ນຳທີມໂດຍ ປອ. ວັນໄຊ ໄຊຍະວົງ ໄດ້ລົງມາເກັບກຳຂໍ້ມູນຕົວຈິງນຳຂະແໜງການຕ່າງໆເຊັ່ນ: ພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າ, ຟາມໝູ, ໂຮງງານຂ້າສັດ, ຕະຫຼາດ, ກຸ່ມຊາວນາ, ໂຮງສີເຂົ້າ, ບໍລິສັດສົ່ງອອກ-ນໍາເຂົ້າ ແລະ ທະນາຄານທຸລະກິດ ຢູ່ບັນດາເມືອງຕ່າງໆ ທີ່ຂຶ້ນກັບແຂວງຈຳປາສັກ.

ການສະເໜີການຕີລາຄາເບື້ອງຕົ້ນຂອງທີມງານ ໃຫ້ຮູ້ວ່າ ລາຄາເຂົ້າ ແລະ ຊີ້ນໝູ ແມ່ນໄດ້ມີທ່າອ່ຽງເພີ່ມຂຶ້ນສູງໃນໄລຍະຜ່ານມາ ໂດຍມີຫຼາຍປັດໄຈທີ່ພາໃຫ້ລາຄາເພີ່ມຂຶ້ນສູງ. ໃນຂອດຟາມ ເຫັນວ່າ ການເໜັງຕີງຂອງອັດຕາແລກປ່ຽນທີ່ອ່ອນຄ່າ ແລະ ຄ່າຄອງຊີບທີ່ເພີ່ມຂຶ້ນສູງເປັນປັດໄຈຕົ້ນຕໍທີ່ເຮັດໃຫ້ລາຄາແນວພັນ, ປຸ້ຍ, ຫົວອາຫານ, ຄ່າແຮງງານ ແລະ ໄຟຟ້າ ທີ່ເພີ່ມຂຶ້ນສູງກະທົບຕໍ່ຕົ້ນທຶນການຜະລິດ ສົ່ງຜົນໃຫ້ຊາວນາ ແລະ ຊາວກະສິກອນ ຕ້ອງໄດ້ຂຶ້ນລາຄາໃນຂອດນີ້. ໃນຂອດໂຮງສີເຂົ້າ ແລະ ໂຮງຂ້າສັດ ເຫັນວ່າ ຕົ້ນທຶນຄ່າໄຟຟ້າ ແລະ ແຮງງານ ແມ່ນເປັນສາເຫດຕົ້ນຕໍທີ່ພາໃຫ້ລາຄາໃນຂອດນີ້ເພີ່ມຂຶ້ນສູງ. ນອກນັ້ນ, ການຂາດແຄນວັດຖຸດິບທີ່ຈະປ້ອນໂຮງງານ ກໍ່ເປັນບັນຫາສຳຄັນໃນຂອດນີ້ ເຊິ່ງກະທົບຕໍ່ການສະໜອງຊີ້ນໝູໃນຕະຫຼາດ. ໃນຂອດພໍ່ຄ້າຄົນກາງ ແລະ ໜ້າຂຽງໃນຕະຫຼາດ ເຫັນວ່າ ຕົ້ນທຶນຄ່າເຊົ່າຮ້ານ ແລະ ຄ່າແຮງງານ ແມ່ນມີຜົນຕໍ່ການເພີ່ມຂຶ້ນຂອງລາຄາ. ສຳຄັນສຸດໃນຂອດນີ້ ເຫັນວ່າ ການເໜັງຕີງຂອງລາຄາເຂົ້າ ແລະ ຊີ້ນໝູ ສ່ວນໃຫຍ່ແມ່ນຖືກກຳນົດໂດຍພໍ່ຄ້າຄົນກາງ.

ນອກນັ້ນ, ທີມງານຄົ້ນຄວ້າຍັງໄດ້ມີຂໍ້ສະເໜີແນະທາງເລືອກ ແລະ ມາດຕະການໃນການແກ້ໄຂ ໃນໄລຍະສັ້ນ,ໄລຍະກາງ ແລະ ຍາວ ຈາກການວິເຄາະໃນເບື້ອງຕົ້ນ.

ຜ່ານການຮັບຟັງການນຳສະເໜີຂອງທີມງານຄົ້ນຄວ້າ, ຜູ້ເຂົ້າຮ່ວມກອງປະຊຸມ ແມ່ນໄດ້ສົນທະນາແລກປ່ຽນຄຳຄິດເຫັນຢ່າງກົງໄປກົງມາ ແລະ ເຫັນດີຕໍ່ກັບການຕີລາຄາຂອງທີມງານ ເຊິ່ງເຮັດໃຫ້ກອງປະຊຸມປະສົບຜົນສຳເລັດຕາມລະດັບຄາດໝາຍທີ່ໄດ້ກຳນົດໄວ້ຢ່າງຈົບງາມ.

ຂຽນຂ່າວ ແລະ ຖ່າຍພາບ: ພຸດສະຫວັນ ບຸບຜາວັນ

ສວສສຊ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI

ຈໍານວນຜູ້ເຂົ້າຊົມ: 565

ສວສສຊ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI

ໃນວັນທີ 18 ມິຖຸນາ 2025 ທີ່ຜ່ານມາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດຕັ້ງກອງປະຊຸມເຊື່ອມຊຶມ ແລະ ຜັນຂະຫຍາຍຜົນສຳເລັດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ພາຍໃຕ້ການເປັນປະທານຂອງ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີຄະນະພັກ-ຄະນະນໍາ ແລະ ມີບັນດາເລຂາໜ່ວຍພັກ, ສະມາຊິກພັກ ແລະ 3 ອົງການຈັດຕັ້ງມະຫາຊົນ ທົ່ວ ສວສສຊ ເຂົ້າຮ່ວມຢ່າງພ້ອມພຽງ. ຈຸດປະສົງຂອງປະຊຸມແມ່ນຮັບຟັງການເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝ XI, ແຈ້ງການຂອງຄະນະຈັດຕັ້ງສູນກາງພັກກ່ຽວກັບການກະກຽມດຳເດີນກອງປະຊຸມໃຫຍ່ຂອງອົງຄະນະພັກສະຖາບັນຄົ້ນຄວ້າວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ບົດສະຫຼຸບການດຳເນີນກອງປະຊຸມໃຫຍ່ຂັ້ນໜ່ວຍຂອງບັນດາໜ່ວຍພັກ ແລະ ອົງການຈັດຕັ້ງມະຫາຊົນ.

ສະຫາຍ ປອ. ກອງແກ້ວ ໄຊສົງຄາມ ໄດ້ໃຫ້ກຽດເຜີຍແຜ່ເນື້ອໃນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝ XI ເຊິ່ງຍົກໃຫ້ເຫັນຜົນສຳເລັດ ແລະ ບົດຮຽນໃນການຊີ້ນຳ-ນຳພາຂອງສູນກາງພັກ ໃນໄລຍະ ຜ່ານມາ ເປັນຕົ້ນແມ່ນການຕີລາຄາກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ການປະ ຕິບັດແຜນງົບປະມານແຫ່ງລັດ ແລະ ແຜນເງິນຕາ, ການປະຕິບັດ 2 ວາລະແຫ່ງຊາດ ລວມທັງການກະກຽມກອງປະຊຸມໃຫຍ່ຄັ້ງທີ XI ຂອງພັກ ພ້ອມທັງກໍານົດທິດທາງຄາດໝາຍ ແລະ ວຽກງານຈຸດສຸມໃນຕໍ່ໜ້າ ເພື່ອສືບຕໍ່ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ ແລະ ຄວາມໝັ້ນຄົງຢ່າງໜັກແໜ້ນ, ສູ້ຊົນຈັດຕັ້ງປະຕິບັດບັນດາຄາດໝາຍຂອງມະຕິ ຂອງແຜນການໃຫ້ບັນລຸຜົນ, ສ້າງພື້ນຖານ ແລະ ທວງທ່າໃໝ່ ໃນການນຳພາປະເທດຊາດຫຼຸດພົ້ນຈາກສະຖານະພາບດ້ອຍພັດທະນາ, ຍົກສູງບົດບາດນຳພາ ແລະ ລັກສະນະນຳໜ້າຂອງພັກ ເພື່ອຍູ້ແຮງການຜັນຂະຫຍາຍແນວທາງການປ່ຽນແປງໃໝ່ສູ່ລ່ວງເລິກ, ສ້າງການຫັນປ່ຽນແປງໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານ ເປັນອຸປະທານ ພ້ອມທັງເນັ້ນໜັກໃຫ້ສະມາຊິກພັກ-ພະນັກງານ ຈົ່ງພ້ອມກັນນຳເອົາເນື້ອໃນຈິດໃຈອັນສຳຄັນຂອງບັນດາມະຕິ, ຄຳແນະນຳດັ່ງກ່າວ ໄປຈັດຕັ້ງຜັນຂະຫຍາຍເຂົ້າໃນການປະຕິບັດວຽກງານຕົວຈິງໃຫ້ມີປະສິດທິພາບ ແລະ ປະສິດທິຜົນສູງຂຶ້ນເລື້ອຍໆ. ກອງປະຊຸມຍັງໄດ້ຮັບຟັງການຜ່ານບົດສະຫຼຸບການດຳເນີນກອງປະຊຸມໃຫຍ່ຂອງບັນດາໜ່ວຍພັກ ແລະ ອົງການຈັດຕັ້ງມະຫາຊົນ ໂດຍ ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ ເຊິ່ງຍົກໃຫ້ເຫັນບັນດາຜົນສໍາເລັດ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອນໍາໄປປັບປຸງເຂົ້າໃນຂະບວນການດໍາເນີນກອງປະຊຸມໃຫຍ່ອົງຄະນະພັກ ສວສສຊ ຕໍ່ໜ້າ. ພ້ອມນັ້ນ ຍັງໄດ້ຮັບຟັງແຈ້ງການຂອງຄະນະຈັດຕັ້ງສູນກາງພັກກ່ຽວກັບການກະກຽມດຳເດີນກອງປະຊຸມໃຫຍ່ ແລະ ລາຍງານກະກຽມຄວາມຮັບຜິິດຊອບຂອງບັນດາອະນຸກໍາມະການຕ່າງໆ ໃນກອງປະຊຸມອີກດ້ວຍ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ