douangchai lovan – ໜ້າ 2 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສວສສຊ ຈັດກອງປະຊຸມເຜີຍແຜ່ພາລະບົດບາດ ແລະ ຜົນງານການຄົ້ນຄວ້າ ທີ່ແຂວງຫົວພັນ

ຈໍານວນຜູ້ເຂົ້າຊົມ: 571

ສວສສຊ ຈັດກອງປະຊຸມເຜີຍແຜ່ພາລະບົດບາດ ແລະ ຜົນງານການຄົ້ນຄວ້າ ທີ່ແຂວງຫົວພັນ

ໃນຕອນເຊົ້າຂອງວັນທີ 23 ທັນວາ 2025, ທີ່ ພະແນກ ການເງິນ ແຂວງຫົວພັນ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ພາລະບົດບາດ ແລະ ຜົນງານການຄົ້ນຄວ້າວິທະຍາສາດ ໂດຍການເປັນປະທານຮ່ວມຂອງ ທ່ານ ປອ. ສະຖາບັນດິດ ອິນສີຊຽງໃໝ່, ຮອງປະທານ ສວສສຊ ແລະ ທ່ານ ປອ. ບຸນວິໄຊ ກົງປະລີ, ຮອງປະທານຄະນະກຳມະການປົກຄອງແຂວງຫົວພັນ. ມີບັນດານັກຄົ້ນຄວ້າຈາກ ສວສສຊ ແລະ ພະນັກງານຫຼັກແຫຼ່ງຈາກ 17 ພະແນກການອ້ອມຂ້າງແຂວງ ເຂົ້າຮ່ວມທັງໝົດ 55 ທ່ານ, ຍິງ 30 ທ່ານ. ກອງປະຊຸມໃນຄັ້ງນີ້ ໄດ້ຈັດຂຶ້ນ ເພື່ອສ້າງຄວາມຮັບຮູ້ກ່ຽວກັບພາລະບົດບາດຂອງສະຖາບັນ ພ້ອມທັງໄດ້ເຜີຍແຜ່ຜົນງານການຄົ້ນຄວ້າທີ່ພົ້ນເດັ່ນ ຂອງ ສວສສຊ ທີ່ຕິດພັນກັບສະພາບເສດຖະກິດລາວໃນປັດຈຸບັນ ແລະ ສະພາບການຂອງໂລກທີ່ມີການປ່ຽນແປງທີ່ຈະສົ່ງຜົນກະທົບຕໍ່ ສປປ ລາວ ໃຫ້ແກ່ພະນັກງານ-ລັດຖະກອນ ພາຍໃນແຂວງຫົວພັນ. ໃນຕອນທ້າຍກອງປະຊຸມຍັງໄດ້ປຶກສາຫາລືກ່ຽວກັບຄວາມເປັນໄປໄດ້ໃນການຮ່ວມມືໃນຂົງເຂດການຄົ້ນຄວ້າ ດ້ານວິຊາການລະຫວ່າງສະຖາບັນ ແລະ ແຂວງຫົວພັນ ເພື່ອນໍາໃຊ້ຜົນການຄົ້ນຄວ້າໃຫ້ແກ່ການວາງແຜນພັດທະນາຂອງແຂວງ.

ທ່ານ ປອ. ສະຖາບັນດິດ ອິນສີຊຽງໃໝ່ ໄດ້ມີຄໍາເຫັນໃນວາລະເປີດກອງປະຊຸມວ່າ “ກອງປະຊຸມໃນຄັ້ງນີ້ ນອກຈາກຈະເປັນການນໍາສະເໜີພາບລວມກ່ຽວກັບພາລະບົດບາດ–ໜ້າທີ່ ແລະ ຜົນງານການຄົ້ນຄວ້າພົ້ນເດັ່ນຂອງ ສວສສຊ ໃນໄລຍະຜ່ານແລ້ວ ແຕ່ຍັງແມ່ນເວທີສຳຄັນທີ່ພວກເຮົາຈະໄດ້ປຶກສາຫາລືກັນກ່ຽວກັບກົນໄກກການຮ່ວມມືການຄົ້ນຄວ້າຮ່ວມກັນໃນຕໍ່ໜ້າ ເພື່ອນໍາເອົາຜົນການຄົ້ນຄວ້າວິທະຍາສາດ ໄປຮັບໃຊ້ການວາງແຜນພັດທະນາເສດຖະກິດ-ສັງຄົມຂອງແຂວງຢ່າງມີປະສິດທິພາບ ແລະ ເກີດປະໂຫຍດສູງສູງໃຫ້ແຂວງ” ແລະ ໃນຕອນທ້າຍກອງປະຊຸມ

ທ່ານ ປອ. ບຸນວິໄຊ ກົງປະລີ ໄດ້ຕີລາຄາສູງຕໍ່ຜົນກອງປະຊຸມໃນຄັ້ງນີ້ ແລະ ມີຄຳເຫັນເພີ່ມຕືມວ່າ “ເພື່ອສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ, ພວກເຮົາຕ້ອງມີການຄົ້ນຄວ້າ ແລະ ອີງໃສ່ຜົນຂອງການຄົ້ນຄວ້າ, ວິເຄາະ-ວິໄຈ ຢ່າງມີຫຼັກວິທະຍາສາດ ເພື່ອວາງແຜນພັດທະນາໃຫ້ໄປຖືກທິດ. ສະນັ້ນ ການນຳເອົາຜົນການຄົ້ນຄວ້າມາເຜີຍແຜ່ໃນຄັ້ງນີ້ ໄດ້ຊ່ວຍສ້າງຄວາມເຂົ້າໃຈໃຫ້ແກ່ພະນັກງານຫຼັກແຫຼ່ງຂອງແຂວງ ຮັບຮູ້ ແລະ ກຳໄດ້ສະພາບການຕົວຈິງທາງດ້ານເສດຖະກິດ ແລະ ການເມືອງ ເພື່ອນຳໄປໝູນໃຊ້ເຂົ້າໃນການກຳນົດແຜນງານ, ປັບປຸງຂໍ້ຄົງຄ້າງ ແລະ ເສີມຂະຫຍາຍທ່າແຮງຂອງແຂວງຢ່າງມີປະສິດທິພາບ ແລະ ປະສິດທິຜົນ.” ແລະ ທ່ານຍັງໄດ້ຮຽກຮ້ອງໃຫ້ສະຖາບັນສືບຕໍ່ປະສານງານ ແລະ ຊ່ວຍສ້າງຄວາມເຂັ້ມແຂງທາງດ້ານວິຊາການໃຫ້ພະນັກງານໃນວຽກງານຄົ້ນຄວ້າວິທະຍາສາດ ເພື່ອຮັບໃຊ້ການພັດທະນາຂອງແຂວງຫົວພັນ.

ເວົ້າລວມແລ້ວ, ກອງປະຊຸມໃນຄັ້ງນີ້ ຖືເປັນນິມິດໝາຍອັນດີ ແລະ ເປັນບາດກ້າວສຳຄັນ ໃນການຮັດແໜ້ນການຮ່ວມມືທາງດ້ານວິຊາການ ລະຫວ່າງ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກັບ ອົງການປົກຄອງແຂວງຫົວພັນ, ຜົນສຳເລັດຈາກກອງປະຊຸມ ຈະກາຍເປັນພື້ນຖານທາງທິດສະດີ ແລະ ພຶດຕິກຳທີ່ສຳຄັນ ໃຫ້ແກ່ບັນດາພະແນກການຂອງແຂວງ ນຳໄປຜັນຂະຫຍາຍເຂົ້າໃນວຽກງານຕົວຈິງ ເພື່ອແກ້ໄຂບັນຫາເສດຖະກິດ-ສັງຄົມ ແລະ ຄວາມທຸກຍາກຂອງປະຊາຊົນ ບົນພື້ນຖານວິທະຍາສາດ ຢ່າງມີປະສິດທິຜົນໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ຈັນທູ ແກ້ວອ່ອນວົງໄຊ

ສຄມຍ ຈັດກອງປະຊຸມສຳມະນາວິທະຍາສາດ ປະຈຳປີ 2025

ຈໍານວນຜູ້ເຂົ້າຊົມ: 604

ສຄມຍ ຈັດກອງປະຊຸມສຳມະນາວິທະຍາສາດ ປະຈຳປີ 2025

ໃນວັນທີ 17 ທັນວາ 2025, ສະຖາບັນຄົ້ນຄວ້າການເມືອງວິທະຍາ (ສຄມຍ) ໄດ້ຈັດກອງປະຊຸມສຳມະນາວິທະຍາສາດປະຈຳປີ 2025 ພາຍໃຕ້ຫົວຂໍ້: “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໃນການເສີມຂະຫຍາຍແນວທາງນະໂຍບາຍຂອງພັກ ແລະ ລັດ: ທິດສະດີ ແລະ ພຶດຕິກຳ”. ກອງປະຊຸມໄດ້ຈັດຂຶ້ນພາຍໃຕ້ການເປັນປະທານຂອງ ທ່ານ ປອ. ແກ້ວວິຈິດ ໄຂຄຳພິທູນ, ຫົວໜ້າສະຖາບັນຄົ້ນຄວ້າການເມືອງວິທະຍາ, ມີບັນດາທ່ານຜູ້ຕາງໜ້າຈາກສະຖາບັນຄົ້ນຄວ້າ, ນັກຄົ້ນຄວ້າ ແລະ ພະນັກງານພາຍໃນ ສຄມຍ ເຂົ້າຮ່ວມຢ່າງພ້ອມພຽງ.

ຈຸດປະສົງຫຼັກຂອງການສຳມະນາຄັ້ງນີ້ ແມ່ນເພື່ອຮ່ວມກັນແລກປ່ຽນທັດສະນະທາງດ້ານທິດສະດີ ກ່ຽວກັບການຫັນປ່ຽນແນວຄິດ ແລະ ການນໍາພາໃຫ້ທັນສະໄໝ ຕາມແນວທາງຂອງພັກ. ພ້ອມທັງວິເຄາະບັນຫາ ແລະ ຖອດຖອນບົດຮຽນຕົວຈິງຈາກການປະຕິບັດໜ້າທີ່ຂອງນັກຄົ້ນຄວ້າ ເພື່ອແນໃສ່ປັບປຸງກົນໄກການເຮັດວຽກໃຫ້ມີປະສິດທິພາບສູງຂຶ້ນ, ເຊື່ອມໂຍງທິດສະດີເຂົ້າສູ່ພຶດຕິກຳຕົວຈິງ ໂດຍຍົກສູງລະບຽບວິໄນ, ຄຸນສົມບັດສິນທຳປະຕິ ວັດ ແລະ ຄວາມຮັບຜິດຊອບການເມືອງຂອງພະນັກງານ.ໃນກອງປະຊຸມ, ບັນດານັກວິທະຍາກອນໄດ້ນໍາສະເໜີບົດຄົ້ນຄວ້າວິທະຍາສາດທີ່ສຳຄັນທັງໝົດ 05 ບົດ ຄື: (1) ການເພີ່ມທະວີການຝຶກຝົນຮໍ່າຮຽນ ແລະ ຈັດຕັ້ງປະຕິບັດຄຸນສົມບັດສິນທຳປະຕິວັດ. (2) ການປະຕິບັດໜ້າທີ່ການເມືອງໃນວຽກງານຄົ້ນຄວ້າວິທະຍາສາດ ໄລຍະປີ 2021-2025. (3) ການຍົກສູງສະຕິການປະຕິບັດກົດໝາຍໃນແຕ່ລະໄລຍະ. (4) ການສົ່ງເສີມການຜະລິດກະສິກໍາເປັນສິນຄ້າ ເພື່ອສົ່ງອອກໄປ ສປ ຈີນ ຢ່າງແຂງແຮງ. (5) ການປັບປຸງ ແລະ ບູລະນະຄວາມເຊື່ອໝັ້ນຕໍ່ການນໍາພາຂອງພັກ ໃນສະພາບການປັດຈຸບັນ.

ກອງປະຊຸມສຳມະນາວິທະຍາສາດໃນຄັ້ງນີ້, ຜູ້ເຂົ້າຮ່ວມໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ສ້າງສັນ ເຮັດໃຫ້ບັນຍາກາດເປັນໄປຢ່າງຟົດຟື້ນ. ຖືເປັນບາດກ້າວສຳຄັນໃນການແບ່ງປັນຄວາມຮູ້ ແລະ ປະສົບການ ເພື່ອຂັບເຄື່ອນວຽກງານຄົ້ນຄວ້າຂອງແຕ່ລະພາກສ່ວນໃຫ້ມີຄວາມຊັດເຈນ, ສອດຄ່ອງ ແລະ ທັນກັບສະພາບການ.

ຂຽນຂ່າວ ແລະ ຖ່າຍພາບ: ສາຍເພັດ ພັດກົມຄຳ

ສຄສ ຈັດກອງປະຊຸມສະຫຼຸບຜົນງານປະຈຳປີ 2025 ແລະ ທິດທາງແຜນການ ປີ 2026

ຈໍານວນຜູ້ເຂົ້າຊົມ: 784

ສຄສ ຈັດກອງປະຊຸມສະຫຼຸບຜົນງານປະຈຳປີ 2025 ແລະ ທິດທາງແຜນການ ປີ 2026

ໃນວັນທີ 16 ທັນວາ 2025, ທີ່ຫ້ອງປະຊຸມ 111, ສະຖາບັນຄົ້ນຄວ້າສັງຄົມວິທະຍາ (ສຄສ) ໄດ້ຈັດກອງປະຊຸມສະຫຼຸບວຽກງານປະຈຳປີ 2025 ແລະ ວາງທິດທາງແຜນການປີ 2026. ໂດຍພາຍໃຕ້ການເປັນປະທານຂອງ ທ່ານ ປອ. ບຸນສີ ພຸດທະວົງ, ຫົວໜ້າສະຖາບັນຄົ້ນຄວ້າສັງຄົມວິທະຍາ ແລະ ໃຫ້ກຽດເຂົ້າຮ່ວມເປັນປະທານຮ່ວມຂອງ ທ່ານ ປອ. ນາງ ແກ້ວວິວອນ ອຸດທະຈັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ຜູ້ຊີ້ນຳວຽກງານ ສຄສ, ພ້ອມດ້ວຍຄະນະໜ່ວຍພັກ, ຄະນະນຳ, ຫົວໜ້າ-ຮອງພະແນກ ແລະ ພະນັກງານ-ລັດຖະກອນ ພາຍໃນ ສຄສ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມ ແມ່ນເພື່ອສັງເກດຕີລາຄາຜົນສຳເລັດທີ່ ສຄສ ຍາດມາໄດ້ໃນໄລຍະ 1 ປີຜ່ານມາ ແລະ ຖອດຖອນບົດຮຽນຈາກຂໍ້ຄົງຄ້າງ ເພື່ອນຳມາປັບປຸງແກ້ໄຂ ໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີປະສິດທິຜົນຍິ່ງຂຶ້ນ, ມຸ່ງເນັ້ນໃຫ້ບັນລຸ ແລະ ລື່ນຄາດໝາຍຕາມມະຕິກອງປະຊຸມໃຫຍ່ໜ່ວຍພັກ ສຄສ ຄັ້ງທີ II ທີ່ໄດ້ວາງໄວ້.

ໃນກອງປະຊຸມ ໄດ້ມີການຜ່ານບົດສະຫຼຸບຜົນງານປະຈຳປີ 2025 ແລະ ທິດທາງແຜນການປີ 2026. ພ້ອມດຽວກັນນັ້ນ, ຍັງໄດ້ຮັບຟັງການນຳສະເໜີວິໄສທັດໃນການພັດທະນາ ສຄສ ຈາກບັນດາຫົວໜ້າ ແລະ ຮອງພະແນກ, ລວມທັງໄດ້ເປີດກວ້າງການສົນທະນາ, ປະກອບຄຳຄິດຄຳເຫັນ ແລະ ແລກປ່ຽນບົດຮຽນຢ່າງກົງໄປກົງມາ ເພື່ອເປັນພື້ນຖານໃຫ້ແກ່ການຄົ້ນຄວ້າໃນຄັ້ງຕໍ່ໄປ.

ພິເສດ, ໃນວາລະພາກບ່າຍ ໄດ້ມີການເຜີຍແຜ່ຜົນງານການຄົ້ນຄວ້າທີ່ສຳເລັດຂອງ ສຄສ ຈໍານວນ 6 ຫົວຂໍ້ ດັ່ງນີ້: 1) ການທ່ອງທ່ຽວຕິດພັນກັບການຫຼຸດຜ່ອນຄວາມທຸກຍາກຢູ່ເມືອງວັງວຽງ; 2) ສຶກສາຄົ້ນຄວ້າຊົນເຜົ່າກະຕາງຢູ່ແຂວງສະຫວັນນະເຂດ ແລະ ແຂວງສາລະວັນ; 3) ການນຳໃຊ້ສື່ສັງຄົມອອນລາຍຂອງໄວໜຸ່ມ; 4) ຜົນກະທົບຂອງການພັດທະນາຕໍ່ການນຳໃຊ້ທີ່ດິນຢູ່ແຂວງວຽງຈັນ; 5) ການປ່ຽນແປງຄ່ານິຍົມຄວາມເຊື່ອໃນພິທີກຳທາງພຸດທະສາສະໜາ ຢູ່ນະຄອນຫຼວງວຽງຈັນ ແລະ 6) ຜົນກະທົບຈາກໂຄວິດ 19 ຕໍ່ການດຳລົງຊີວິດຂອງປະຊາຊົນຢູ່ 3 ແຂວງພາກໃຕ້ຂອງລາວ, ເຊິ່ງຜູ້ເຂົ້າຮ່ວມໄດ້ປະກອບຄໍາເຫັນໃສ່ຜົນການຄົ້ນຄວ້າດັ່ງກ່າວ ດ້ວຍບັນຍາກາດທີ່ຟົດຟື້ນ ແລະ ສ້າງສັນ, ສະແດງໃຫ້ເຫັນເຖິງຄວາມເອົາໃຈໃສ່ໃນການຍົກລະດັບຄຸນນະພາບວຽກງານວິຊາການຂອງສະຖາບັນ.

ຂຽນຂ່າວ ແລະ ຖ່າຍພາບ: ເພັດ ສາຍທານ

ສວສສຊ ຈັດພິທີປະດັບຫຼຽນກາລະນຶກ 70 ປີ ວັນສ້າງຕັ້ງພັກ ແລະ 50 ປີ ວັນສະຖາປານາ ສປປ ລາວ ໃຫ້ແກ່ພະນັກງານ-ລັດຖະກອນ ຜູ້ທີ່ມີຜົນງານດີເດັ່ນ

ຈໍານວນຜູ້ເຂົ້າຊົມ: 414

ສວສສຊ ຈັດພິທີປະດັບຫຼຽນກາລະນຶກ 70 ປີ ວັນສ້າງຕັ້ງພັກ ແລະ 50 ປີ ວັນສະຖາປານາ ສປປ ລາວ ໃຫ້ແກ່ພະນັກງານ-ລັດຖະກອນ ຜູ້ທີ່ມີຜົນງານດີເດັ່ນ

ໃນຕອນເຊົ້າວັນທີ 15 ທັນວາ 2025, ທີ່ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດພິທີປະດັບຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ ແລະ 50 ປີ ວັນສະຖາປານາ ສປປ ລາວ ຢ່າງສົມກຽດ. ໂດຍການໃຫ້ກຽດເຂົ້າຮ່ວມ ແລະ ປະທານຂອງ ສະຫາຍ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານ ສວສສຊ; ມີບັນດາຄະນະພັກ, ຄະນະນຳ, ຫົວໜ້າ, ຮອງຫົວໜ້າກົມ, ຫ້ອງການ, ສະຖາບັນຄົ້ນຄວ້າ ແລະ ສູນ, ພະນັກງານບຳນານ ແລະ ສະມາຊິກພັກ-ພະນັກງານ ພາຍໃນ ສວສສຊ ເຂົ້າຮ່ວມຢ່າງພ້ອມພຽງ.

ໃນພິທີ, ສະຫາຍ ປອ. ສະຖາບັນດິດ ອິນສີຊຽງໃໝ່, ຮອງເລຂາຄະນະພັກ ໄດ້ຂຶ້ນຜ່ານລັດຖະດຳລັດຂອງປະທານປະເທດ ສະບັບເລກທີ 294/ປປທ, ລົງວັນທີ 20 ພະຈິກ 2025 ວ່າດ້ວຍການປະດັບຫຼຽນກາລະນຶກ ແລະ ໃບມອບສິດຂອງນາຍົກລັດຖະມົນຕີ ສະບັບເລກທີ 251/ນຍ, ລົງວັນທີ 20 ພະຈິກ 2025. ການປະດັບຫຼຽນໃນຄັ້ງນີ້ ແມ່ນເພື່ອມອບໃຫ້ແກ່ບັນດາພະນັກງານ-ລັດຖະກອນ ທີ່ພວມປະຈຳການ ແລະ ບຳນານ ຜູ້ທີ່ມີຜົນງານອັນໃຫຍ່ຫຼວງ, ມີວິລະກໍາອັນລໍໍ້າເລີດ, ໄດ້ປະກອບສ່ວນອຸທິດເຫືີ່ອແຮງ ແລະ ສະຕິປັນຍາເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ.

ສຳລັບຜູ້ທີ່ໄດ້ຮັບການປະດັບຫຼຽນໃນຄັ້ງນີ້ ມີຈຳນວນທັງໝົດ 131 ສະຫາຍ, ຍິງ 36 ສະຫາຍ; ໃນນັ້ນ, ມີພະນັກງານບຳນານ ຈຳນວນ 58 ສະຫາຍ, ຍິງ 8 ສະຫາຍ.

ການປະດັບຫຼຽນກາລະນຶກ 70 ປີ ແລະ 50 ປີ ຖືເປັນການຍ້ອງຍໍສັນລະເສີນ ແລະ ສະແດງຄວາມຮູ້ບຸນຄຸນຢ່າງສຸດຊຶ້ງ ຂອງພັກ ແລະ ລັດຖະບານ ທີ່ມີຕໍ່ຄຸນງາມຄວາມດີຂອງສະມາຊິກພັກ ແລະ ພະນັກງານ. ຜົນງານດັ່ງກ່າວ ຈະຖືກຈາລຶກໄວ້ໃນປະຫວັດສາດຂອງ ສວສສຊ ກໍຄືປະຫວັດສາດຂອງພັກ ແລະ ຂອງຊາດລາວຕະຫຼອດໄປ. ພ້ອມດຽວກັນນີ້, ຍັງເປັນການສ້າງແຮງບັນດານໃຈໃຫ້ແກ່ພະນັກງານຮຸ່ນສືບທອດ ໄດ້ຮໍໍ່າຮຽນເອົາແບບຢ່າງຄຸນສົມບັດສິນທໍາປະຕິວັດ, ຄວາມຊືີ່ສັດບໍລິສຸດ ແລະ ຄວາມຈົົ່ງຮັກພັກດີ ເພື່ອສືບຕໍໍ່ປົກປັກຮັກສາ, ເສີມຂະຫຍາຍມູນເຊື້ອອັນດີງາມ, ສ້າງຄວາມສາມັກຄີພາຍໃນໃຫ້ເປັນປຶກແຜ່ນ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ໃຫ້ບັນລຸຜົນສຳເລັດຕາມຈຸດໝາຍທີ່ວາງໄວ້.

ຂຽນຂ່າວ ແລະ ຖ່າຍພາບ: ເພັດ ສາຍທານ

ປະທານ ສວສສຊ ຕ້ອນຮັບ ຄະນະຜູ້ແທນຈາກ ສະຖາບັນວິທະຍາສາດສັງຄົມ ແຂວງກວາງຊີ ສປ ຈີນ

ຈໍານວນຜູ້ເຂົ້າຊົມ: 556

ປະທານ ສວສສຊ ຕ້ອນຮັບ ຄະນະຜູ້ແທນຈາກ ສະຖາບັນວິທະຍາສາດສັງຄົມ ແຂວງກວາງຊີ ສປ ຈີນ

ໃນຕອນບ່າຍຂອງ ວັນທີ 8 ທັນວາ 2025, ທີ່ຫ້ອງຮັບແຂກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ແລະ ເຮັດວຽກຂອງ ທ່ານ ຈາງຫົງສື (Zhang Hongshi), ເລຂາບໍລິຫານງານພັກ, ປະທານສະຖາບັນວິທະຍາສາດສັງຄົມ ແຂວງກວາງຊີ ສປ ຈີນ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ສປປ ລາວ ເປັນຄັ້ງທຳອິດ ພາຍຫຼັງທີ່ໄດ້ຮັບໜ້າທີ່ໃໝ່.

ທ່ານ ປອ. ກອງແກ້ວ ໄຊສົງຄາມ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມຂອງ ສະຫາຍ ຈາງຫົງສື ພ້ອມດ້ວຍຄະນະ, ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນການຮ່ວມມື “4 ດີ” ລະຫວ່າງ ສອງພັກ-ສອງລັດ ລາວ-ຈີນ ໃຫ້ໄດ້ຮັບການຍົກລະດັບຂຶ້ນຕື່ມອີກກ້າວໜຶ່ງ. ພ້ອມດຽວກັນນັ້ນ, ຍັງເປັນການເສີມຂະຫຍາຍການພົວພັນລະຫວ່າງສອງສະຖາບັນ ໃຫ້ແໜ້ນແຟ້ນຍິ່ງຂຶ້ນ, ສອດຄ່ອງກັບການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ແລະ ຄູ່ຮ່ວມຊະຕາກຳດຽວກັນ.

ໃນໂອກາດນີ້, ທ່ານ ຈາງຫົງສື ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ເຕັມໄປດ້ວຍໄມຕີຈິດມິດຕະພາບ. ພ້ອມທັງໄດ້ຕີລາຄາສູງຕໍ່ສາຍພົວພັນການຮ່ວມມື ລາວ-ຈີນ ທີ່ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ກ້າວເຂົ້າສູ່ລວງເລິກ ບົນພື້ນຖານການເປັນຄູ່ຮ່ວມຊະຕາກຳ ລາວ-ຈີນ, ຈີນ-ລາວ ຢ່າງແທ້ຈິງ. ສາຍພົວພັນດັ່ງກ່າວ ບໍ່ພຽງແຕ່ສະແດງອອກໃນລະດັບ ສອງພັກ-ສອງລັດ ເທົ່ານັ້ນ, ແຕ່ຍັງລວມໄປເຖິງລະດັບປະຊາຊົນ ແລະ ພາກທຸລະກິດ ທີ່ມີການໄປມາຫາສູ່ ແລະ ຮ່ວມມືກັນຢ່າງແໜ້ນແຟ້ນ ຕະຫຼອດມາ. ສຳລັບການຮ່ວມມືລະຫວ່າງສອງສະຖາບັນ, ທ່ານໄດ້ຕີລາຄາວ່າ ເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນຂອງສອງຊາດ ໂດຍຜ່ານການຈັດຕັ້ງປະຕິບັດ ບົດບັນທຶກຄວາມເຂົ້າໃຈ (MOU) ຮ່ວມກັນ, ປຽບສະເໝືອນຄອບຄົວດຽວກັນ ທີ່ມີການແລກປ່ຽນຄະນະຜູ້ແທນ ແລະ ຖອດຖອນບົດຮຽນເຊິ່ງກັນ ແລະ ກັນ ຢ່າງເປັນປົກກະຕິ. ເຖິງແມ່ນວ່າ ໂຄງການຄົ້ນຄວ້າບາງສ່ວນໃກ້ຈະສຳເລັດລົງ, ແຕ່ນັ້ນບໍ່ແມ່ນຈຸດສິ້ນສຸດ ຫາກແຕ່ເປັນພື້ນຖານອັນດີ ໃຫ້ແກ່ການສືບຕໍ່ຂະຫຍາຍການຄົ້ນຄວ້າຮ່ວມກັນໃນຕໍ່ໜ້າ. ທ່ານຍັງໄດ້ຖືໂອກາດນີ້ ເຊື້ອເຊີນ ທ່ານປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ເຂົ້າຮ່ວມກອງປະຊຸມສຸດຍອດຄັງປັນຍາອາຊຽນ’ (ASEAN Think Tank Summit) ທີ່ຈະຈັດຂຶ້ນ ທີ່ນະຄອນໜານໜິງ, ແຂວງກວາງຊີ, ສປ ຈີນ ໃນທ້າຍເດືອນທັນວານີ້.

ການພົບປະຄັ້ງນີ້, ທັງສອງຝ່າຍໄດ້ປຶກສາຫາລື ແລະ ແລກປ່ຽນເນື້ອໃນທີ່ສຳຄັນ 3 ບັນຫາຫຼັກ ຄື: 1) ສືບຕໍ່ເສີມຂະຫຍາຍການຈັດຕັ້ງປະຕິບັດ ບົດບັນທຶກຄວາມເຂົ້າໃຈ (MOU) ທີ່ໄດ້ລົງນາມຮ່ວມກັນຜ່ານມາ; 2) ສືບຕໍ່ປັບປຸງຫົວຂໍ້ການຄົ້ນຄວ້າຮ່ວມກັນ ກ່ຽວກັບໂຄງການ “ບອກເລົ່າໂຮງຮຽນນ້ອງນ້ອຍ 67 ໜານໜິງ” ລະຫວ່າງ ສະຖາບັນຄົ້ນຄວ້າປະຫວັດສາດ ແລະ ບູຮານວິທະຍາ (ສວສສຊ) ກັບ ສະຖາບັນຄົ້ນຄວ້າປະຫວັດສາດ ຂອງສະຖາບັນວິທະຍາສາດສັງຄົມ ແຂວງກວາງຊີ; 3) ກຳນົດຫົວຂໍ້ຄົ້ນຄວ້າໃໝ່ ສຳລັບປີ 2026 ໃນຫົວຂໍ້ “ປະຫວັດແລວທາງລົດໄຟ ລາວ-ຈີນ”.

ໃນຕອນທ້າຍ, ທ່ານ ປອ. ກອງແກ້ວ ໄຊສົງຄາມ ໄດ້ສະແດງຄວາມປິຕິຍິນດີເປັນຢ່າງຍິ່ງ ທີ່ມີການພົວພັນຮ່ວມມືກັບ ສະຖາບັນວິທະຍາສາດສັງຄົມ ແຂວງກວາງຊີ, ເຊິ່ງຖືເປັນເພື່ອນຮ່ວມອຸດົມການ ແລະ ເປັນພາກສ່ວນທີ່ສຳຄັນໃນການແລກປ່ຽນບົດຮຽນດ້ານຕ່າງໆ. ພ້ອມທັງໄດ້ຕີລາຄາສູງຕໍ່ໝາກຜົນຂອງການພົບປະ ແລະ ອວຍພອນໃຫ້ການຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງຈາກ ແຂວງກວາງຊີ ຄັ້ງນີ້ ຈົ່ງປະສົບຜົນສຳເລັດຢ່າງຈົບງາມ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ກອງປະຊຸມຄະນະຊີ້ນໍາລວມຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN)

ຈໍານວນຜູ້ເຂົ້າຊົມ: 258

ກອງປະຊຸມຄະນະຊີ້ນໍາລວມຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN)

ໃນຕອນເຊົ້າ, ວັນທີ 25 ພະຈິກ 2025 ຜ່ານມາ ທີ່ຫ້ອງປະຊຸມຂອງໂຮງແຮມ ຄຮາວພຮາຊາ. ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສວສສຊ ໄດ້ຈັດກອງປະຊຸມຄະນະຊີ້ນໍາລວມຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ປະຈໍາປີ 2025 ພາຍໃຕ້ການເປັນປະທານຂອງທ່ານ ປອ ນາງ ແກ້ວວິວອນ ອຸດທະຈັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ການເຂົ້າເປັນປະທານຮ່ວມຂອງທ່ານ ນາງ Karina Lopez, ຮັກສາການຫົວໜ້າພະແນກໂພຊະນາການ, ອົງການ UNICEF ປະຈໍາ ສປປ ລາວ. ມີບັນດາທ່ານທີ່ມາຈາກຫ້ອງການ, ກົມ, ສະຖາບັນ, ສູນຄົ້ນຄວ້າ, ທິມງານໃນຄະນະຊີ້ນໍາລວມໂຄງການ, ຜູ້ຕາງໜ້າຈາກອົງການ UNICEF ປະຈໍາ ສປປ ລາວ ພ້ອມທັງທິມງານຈາກ 6 ແຂວງເປົ້າໝາຍໂຄງການ ຄື: ແຂວງຜົ້ງສາລີ, ອຸດົມໄຊ, ຄໍາມ່ວນ, ສະຫວັນນະເຂດ, ສາລະວັນ ແລະ ເຊກອງ, ເຊິ່ງມີ 4 ຂະແໜງການຫຼັກ ປະກອບດ້ວຍ ພະແນກການເງິນ, ພະແນກສາທາລະນະສຸກ, ພະແນກສຶກສາທິການ ແລະ ກິລາ ແລະ ພະແນກກະສິກໍາ ແລະ ສິ່ງແວດລ້ອມ ທີ່ເຂົ້າຮ່ວມຜ່ານຊ່ອງທາງລະບົບອອນລາຍ. ມີຜູ່ເຂົ້າຮ່ວມທັງໝົດ 114 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ ເພື່ອຮຽກຮ້ອງໃຫ້ປະກອບຄໍາຄິດ-ເຫັນ ແລະ ຄຳແນະນຳຈາກຄະນະກຳມະການຊີ້ນໍາລວມໂຄງການ (NIPN), ກວດສອບຄວາມຖືກຕ້ອງ ແລະ ຮັບຮອງແຜນຄວາມຍືນຍົງຂອງ (NIPN) ພ້ອມທັງ ສະເໜີບາດກ້າວໃນຕໍ່ໜ້າ ສຳລັບການຈັດຕັ້ງປະຕິບັດແຜນການດັ່ງກ່າວ ຫຼັງຈາກການສະໜັບສະໜູນດ້ານງົບປະມານຂອງຜູ້ໃຫ້ທຶນທີ່ຈະສິ້ນສຸດລົງໃນທ້າຍປີ 2025. ເນື່ອງຈາກວ່າ ໂຄງການ (NIPN) ເປັນລະບົບຂໍ້ມູນຂ່າວສານດ້ານໂພຊະນາການແບບຫຼາຍຂະແໜງການ ຂອງ ສປປ ລາວ, ທີ່ສາມາດສະໜອງຂໍ້ມູນຂ່າວສານ ທີ່ມີຄຸນນະພາບ ແລະ ທັນເວລາ ເພື່ອສະໜັບສະໜູນບັນດານະໂຍບາຍ, ຍຸດທະສາດ ແລະ ແຜນງານດ້ານໂພຊະນາການຂອງຫຼາຍຂະແໜງການ ເພື່ອໃຫ້ສາມາດນໍາໄປປະຕິບັດໄດ້ ແລະ ສອດຄ່ອງກັບ ຍຸດທະສາດ ແລະ ແຜນປະຕິບັດງານແຫ່ງຊາດດ້ານໂພຊະນາການ. ພ້ອມກັນນັ້ນ, ເພື່ອເສີມສ້າງຄວາມເປັນເຈົ້າການຂອງພາກລັດ ແລະ ຮັບປະກັນຄວາມຍືນຍົງຂອງວຽກງານດັ່ງກ່າວໃນໄລຍະຍາວ. ສະນັ້ນ, ລັດຖະບານແຫ່ງ ສປປ ລາວ ຈຶ່ງພະຍາຍາມທີ່ຈະຮັກສາຜົນສຳເລັດ ແລະ ໜ້າທີ່ຫຼັກຂອງໂຄງການ NIPN ໃຫ້ມີຄວາມຍືນຍົງ ໂດຍການນໍາພາ ແລະ ເປັນເຈົ້າການຂອງລັດຖະບານ.

ກອງປະຊຸມໄດ້ຮັບຟັງການລາຍງານຜົນສໍາເລັດທີ່ສໍາຄັນຂອງໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໃນໄລຍະຜ່ານມາ, ພ້ອມທັງຂໍ້ສະດວກ ແລະ ສິ່ງທ້າທາຍ, ບົດຮຽນທີ່ຖອດຖອນໄດ້; ແຜນຄວາມຍືນຍົງຂອງໂຄງການ (NIPN) ແລະ ການນໍາສະເໜີໜ້າທີ່ຫຼັກຂອງແຕ່ລະພາກສ່ວນລັດ ທີ່ຈະປະກອບສ່ວນຮ່ວມມື ແລະ ສືບຕໍ່ສະໜັບສະໜູນການຈັດຕັ້ງປະຕິບັດວຽກງານດັ່ງກ່າວ ໃຫ້ມີຄວາມຍືນຍົງ.

ກອງປະຊຸມໄດ້ມີການແລກປ່ຽນຄໍາຄິດເຫັນຢ່າງກົງໄປກົງມາ ແລະ ເຫັນດີເປັນເອກະພາບຮັບຮອງເອົາແຜນຄວາມຍືນຍົງສະບັບນີ້ ແລະ ພ້ອມກັນຊຸກຍູ້ໃຫ້ເຊື່ອມສານເອົາບັນດາຄໍາໝັ້ນສັນຍາທີ່ໄດ້ຕົກລົງກັນຄື: ທາງດ້ານວິຊາການ, ສະຖາບັນ ແລະ ການເງິນ ເຂົ້າໃນແຜນການ, ແຜນຂອງຂະແໜງການ ແລະ ແຜນງານ ປະຈຳປີຂອງຕົນ. ເຖິງແມ່ນວ່າຄວາມຍືນຍົງທາງດ້ານການເງິນຍັງຄົງເປັນສິ່ງທ້າທາຍ. ດັ່ງນັ້ນ, ພາກລັດຈະຮັບຮອງເອົາແນວທາງທີ່ຄ່ອຍຫັນໄປເທື່ອລະກ້າວ ແລະ ຄວາມເປັນຈິງຕາມທີ່ໄດ້ກໍານົດໄວ້ໃນເອກະສານທີ່ບັນດາຂະແໜງການໄດ້ໃຫ້ຄໍາໝັ້ນສັນຍາໄວ້. ນັບແຕ່ນີ້ເປັນຕົ້ນໄປ, ບັນດາກະຊວງຄວນເລີ່ມຕົ້ນດ້ວຍການຈັດສັນງົບປະມານເລັກນ້ອຍທີ່ເປັນໄປໄດ້ ແລະ ຄ່ອຍໆເພີ່ມຂຶ້ນຕາມທີ່ງົບປະມານເອື້ອອໍານວຍໃຫ້. ນອກຈາກນັ້ນ, ກອງປະຊຸມ ຍັງຮຽກຮ້ອງໃຫ້ຄູ່ຮ່ວມພັດທະນາສືບຕໍ່ໃຫ້ການສະໜັບສະໜູນດ້ານຍຸດທະສາດ ທີ່ມີກອບເວລາ, ໂດຍສະເພາະໃນການເສີມສ້າງຄວາມອາດສາມາດ, ການດໍາເນີນງານຂອງຂໍ້ມູນຂັ້ນສູງ ແລະ ການສະໜັບສະໜູນແຜນການ ແລະ ແຜນງານນະໂຍບາຍ ໃຫ້ສອດຄ່ອງກັບແຜນຄວາມຍືນຍົງ. ໄດ້ຮັບຄໍາເຫັນໃນທາງບວກຫຼາຍຈາກຜູ້ເຂົ້າຮ່ວມ ວ່າໜ້າທີ່ຫຼັກຂອງ (NIPN) ສາມາດເຊື່ອມສານເຂົ້າໃນແຜນວຽກງານຂອງຂະແໜງການໄດ້ ໂດຍອີງໃສ່ມູນຄ່າຄາດຄະເນຕົ້ນທຶນທີ່ນໍາສະເໜີນັ້ນ ມີຄວາມເປັນໄປໄດ້ສຳລັບແຕ່ລະຂະແໜງການ. ດັ່ງນັ້ນ, ຈິ່ງໄດ້ຊຸກຍູ້ໃຫ້ບັນດາຂະແໜງການຫຼັກເຊື່ອມສານວຽກງານດັ່ງກ່າວເຂົ້າໃນແຜນການຂອງຕົນ, ໄດ້ມີການຮຽກຮ້ອງໃຫ້ແຂວງເປົ້າໝາຍພິຈາລະນາຄຳໝັ້ນສັນຍາເຫຼົ່ານີ້ ແລະ ອາດຈະໄດ້ຜັນຂະຫຍາຍໄປສູ່ແຂວງອື່ນໆໃນອະນາຄົດ, ເຫັນວ່າໂພຊະນາການມີຄວາມສຳຄັນຫຼາຍ ແລະ ຖືວ່າເປັນບູລິມະສິດຂອງລັດຖະບານ ແລະ ເປັນໜຶ່ງໃນ 26 ຂົງເຂດການລົງທຶນໃນ NSEDP ໃນ 5 ປີຕໍ່ໜ້າ, ເຖິງຢ່າງໃດກໍຕາມ, ສະເໜີໃຫ້ຕິດຕາມກວດກາ, ຕິດຕາມຄວາມຄືບໜ້າ ແລະ ລາຍງານຂໍ້ມູນສຳຄັນໂດຍອີງໃສ່ຫຼັກຖານທີ່ຖືກຕ້ອງ, ຊັດເຈນ, ໜ້າເຊື່ອຖື ແລະ ທັນເວລາ ເພື່ອໃຫ້ສາມາດແກ້ໄຂບັນຫາໄດ້ຢ່າງວ່ອງໄວ. ພ້ອມກັນນັ້ນ, ຍັງສະເໜີໃຫ້ສະໜັບສະໜູນຢ່າງຕໍ່ເນື່ອງຈາກຄູ່ຮ່ວມພັດທະນາ ກ່ຽວກັບຂໍ້ມູນສະຖິຕິ ແລະ ການນຳໃຊ້ແຫຼ່ງຂໍ້ມູນດ້ານໂພຊະນາການຈາກແຫຼ່ງດຽວ ພ້ອມທັງ ຕິດຕາມກວດກາຢ່າງຕໍ່ເນື່ອງ.

ຂຽນຂ່າວ ແລະ ຖ່າຍພາບ: ສຄນສ

ສວສສຊ ຕ້ອນຮັບການມາຢ້ຽມຢາມຂອງຄະນະຜູ້ແທນ ສະຖາບັນວິທະຍາສາດສັງຄົມແຂວງຢູນນານ

ຈໍານວນຜູ້ເຂົ້າຊົມ: 376

ສວສສຊ ຕ້ອນຮັບການມາຢ້ຽມຢາມຂອງຄະນະຜູ້ແທນ ສະຖາບັນວິທະຍາສາດສັງຄົມແຂວງຢູນນານ

ໃນຕອນເຊົ້າຂອງວັນທີ 17 ພະຈິກ 2025 ທີ່ຜ່ານມາ; ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການຢ້ຽມຢາມ ແລະ ເຮັດວຽກຂອງ ທ່ານ ໂຫ ເຊິງ (Hou Sheng), ຮອງປະທານສະຖາບັນວິທະຍາສາດສັງຄົມແຂວງຢູນນານ ພ້ອມດ້ວຍຄະນະ, ໂດຍມີທ່ານ ປອ. ນ. ແກ້ວວິວອນ ອຸດທະຈັກ ຮອງປະທານ ສວສສຊ ໄດ້ກ່າວຕ້ອນຮັບ ແລະ ສະແດງຄວາມຍິນດີຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສວສສຊ ເພື່ອພັດທະນາສາຍສໍາພັນຮ່ວມມືລະຫວ່າງທັງສອງສະຖາບັນພວກເຮົາ. ການເດີນທາງມາໃນຄັ້ງນີ້ໄດ້ສະແດງເຖິງຄວາມສາມັກຄີແບບພິເສດ, ເປັນສາຍເຊື່ອມມິດຕະພາບ, ຄວາມຕັ້ງໃຈຮ່ວມມື, ຮ່ວມພັດທະນາ ແລະ ຮ່ວມກັນສ້າງຄວາມຝັນ. ການປຶກສາຫາລືແລກປ່ຽນໃນຄັ້ງນີ້ຈະສ້າງຜົນປະໂຫຍດໃຫ້ແກ່ການພັດທະນາຂອງທັງສອງຝ່າຍໃຫ້ເກີດປະສິດທິຜົນ ແລະ ອວຍພອນໃຫ້ຄະນະຜູ້ແທນມາຢ້ຽມຢາມເຮັດວຽກຢູ່ ສປປ ລາວ ຈົ່ງມີຜົນສຳເລັດ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

ໂອກາດມາຢ້ຽມຍາມຄັ້ງນີ້ ທັງສອງສະຖາບັນໄດ້ແລກປ່ຽນບົດຮຽນກ່ຽວກັບພາລະບົດບາດ ແລະ ໜ້າທີ່ຂອງສະຖາບັນຕົນ ພ້ອມທັງໄດ້ ປຶກສາຫາລືກ່ຽວກັບຄວາມເປັນໄດ້ໃນການຜັນຂະຫຍາຍບົດບັນທຶກ (MoU) ທີ່ 2 ສະຖາບັນໄດ້ເຊັນຮ່ວມກັນໃນໄລຍະຜ່ານມາ ໂດຍສະເພາະແມ່ນການຮ່ວມມືກັນຈັດສຳມະນາ ແລະ ຈັດຕັ້ງປະຕິບັດໂຄງການຄົ້ນຄວ້າໃນຫົວຂໍ້່ຕ່າງໆທີ່ທັງ 2 ຝ່າຍມີຄວາມສົນໃຈຮ່ວມກັນ.

ໃນເວລາດຽວກັນ, ຄະນະຜູ້ແທນ ແຂວງຢຸນນານ ໄດ້ເຮັດວຽກຮ່ວມກັບສະຖາບັນຄົ້ນຄວ້າເສດຖະກິດມະຫາພາກ ນຳໂດຍ ທ່ານ ນ. ລັດດາວັນ ຊົງວິໄລ, ຫົວໜ້າສະຖາບັນຄົ້ນຄວ້າເສດຖະກິດມະຫາພາກ ໂດຍທັງສອງຝ່າຍ ໄດ້ສືບຕໍ່ແລກປ່ຽນບົດຮຽນທາງດ້ານວິຊາການຢ່າງກົງໄປກົງມາ ທີ່ຕິດພັນກັບການພັດທະນາຂອບເຂດພື້ນທີ່ຕາມແລວທາງລົດໄຟຈີນ-ລາວ ພາຍຫຼັງສຳເລັດການກໍ່ສ້າງ, ການຮ່ວມມືສອງຝ່າຍຕາມແລວທາງລົດໄຟ, ບົດບາດຂອງການຮ່ວມມືດ້ານສື່ມວນຊົນໃນການກ້າວໄປສູ່ການສ້າງຄູ່ຮ່ວມຊາຕາກຳຈີນ-ລາວ ແລະ ການປະກອບສ່ວນຂອງຊາວຈີນໃນຕ່າງປະເທດ ກໍ່ຄື ໃນ ສປປ ລາວ ຕໍ່ການຮ່ວມກັນສ້າງຂໍ້ລິເລີ່ມໜຶ່ງແລວໜຶ່ງເສັ້ນທາງ. ໃນຕອນທ້າຍຂອງກອງປະຊຸມ ທັງສອງຝ່າຍກໍ່ໄດ້ພ້ອມກັນຍົກຫົວຂໍ້ທີ່ຍາກສຶກສາຄົ້ນຄວ້າຮ່ວມກັນໃນຕໍ່ໜ້າເປັນຕົ້ນແມ່ນ ຫົວຂໍ້ກ່ຽວກັບການຫຼຸດຜ່ອນຜົນກະທົບຂອງທຸລະກິດລາວ-ຈີນຈາກຄວາມຂັດແຍ້ງທາງພູມິລັດຖະສາດ, ກ່ຽວກັບພຸດທະສາດສະໜາ ແລະ ບຸນປະເພນີຕ່າງໆທີ່ເປັນເອກະລັກເພື່ອສະເໜີເປັນມໍລະດົກຂອງພາກພື້ນ ແລະ ສາກົນ.

ຂຽນຂ່າວ ແລະ ຖ່າຍພາບ: ນິນ ພົນສັກດາ

ສຂຝ ຈັດຝຶກອົບຮົມຫົວຂໍ້: ເຕັກນິກການວິເຄາະຂໍ້ມູນດ້ວຍການນຳໃຊ້ໂປຼແກຼມ Excel

ຈໍານວນຜູ້ເຂົ້າຊົມ: 330

ສຂຝ ຈັດຝຶກອົບຮົມຫົວຂໍ້: ເຕັກນິກການວິເຄາະຂໍ້ມູນດ້ວຍການນຳໃຊ້ໂປຼແກຼມ Excel

ໃນວັນທີ 13 ພະຈິກ 2025 ທີ່ຜ່ານມາ, ສູນຂໍ້ມູນຂ່າວສານ ແລະ ຝຶກອົບຮົມ ໄດ້ຈັດຝຶກອົບຮົມໃນຫົວຂໍ້: ເຕັກ ນິກການວິເຄາະຂໍ້ມູນດ້ວຍການນຳໃຊ້ໂປຼແກຼມ Excel, ໃຫ້ກຽດເປັນປະທານໂດຍ ທ່ານ ສຸກນິລັນ ແສງພະຈັນ ຮອງຫົວໜ້າ ສູນຂໍ້ມູນຂ່າວສານ ແລະ ຝຶກອົບຮົມ ເຊິ່ງຕາງໜ້າຈາກບັນດາສະຖາບັນ, ກົມ, ຫ້ອງ ທີ່ອ້ອມຂ້າງ ສວສສຊ ເຂົ້າຮ່ວມຈໍານວນ 25 ທ່ານ.

ຈຸດປະສົງຂອງການຝຶກອົບຮົມໃນຄັ້ງນີ້ແມ່ນເພື່ອພັດທະນາທັກສະ ແລະ ເປັນການສືບຕໍ່ຍົກລະດັບຄວາມຮູ້ສິ່ງ ໃໝ່ໆ ໃຫ້ແກ່ພະນັກງານພາຍໃນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແນ່ໃສ່ການຫັນໃຫ້ເຂົ້າສູ່ທັນສະໄໝໃນຕໍ່ໜ້າ; ການນໍາໃຊ້ເຕັກໂນໂລຊີທີ່ກ້າວໜ້າ ແລະ ປ່ຽນແປງຢ່າງໄວວາ ເຊິ່ງສ້າງຄວາມສະດວກໃນການດໍາລົງຊີວິດຂອງຄົນຍຸກໃໝ່ເວົ້າລວມ ເວົ້າສະເພາະມັນສາມາດຍົກລະດັບວຽກງານໃຫ້ສູງຂຶ້ນ. ການຫັນເປັນທັນສະໄໝໃນທຸກຂົງເຂດວຽກງານຄຸ້ມຄອງລັດ ແມ່ນສິ່ງຈຳເປັນ ແລະ ມີຄວາມສຳຄັນເປັນຢ່າງຍິ່ງ. ການຝຶກອົບຮົມຄັ້ງນີ້ແມ່ນເພື່ອຊຸກຍູ້, ສົ່ງເສີມ ຄວາມຮູ້ ແລະ ທັກສະການນໍາໃຊ້ເຄື່ອງມືເຕັກນິກການວິເຄາະຂໍ້ມູນດ້ວຍການໍາໃຊ້ໂປຼແກມ Excel ໃຫ້ມີປະສິດທິຜົນສູງຂຶ້ນ ໃນຍຸກທີ່ຂໍ້ມູນເປັນສີ່ງທີມີຄວາມສໍາຄັນຢ່າງຫຼວງຫລາຍ, ການມີຄວາມຮູ້ດ້ານການວິເຄາະຂໍ້ມູນຈະຊ່ວຍໃຫ້ເຮົາສາມາດຕັດສິນໃຈໃນການເຮັດວຽກ ແລະ ວາງແຜນໄດ້ຢ່າງຖືກຕ້ອງ ແລະ ທັນເວລາ, ດ້ວຍເຫດນີ້ພວກເຮົາຈຶ່ງໄດ້ເຊື້ອເຊີນບັນດາທ່ານມາຮ່ວມແລກປ່ຽນ, ຖອດຖອນບົດຮຽນ, ສ້າງຄວາມເຂົ້າໃຈຢ່າງເປັນເອກະພາບ ໃຫ້ພະນັກງານຫຼັກແຫຼ່ງພາຍໃນ ສວສສຊ ເພື່ອນໍາໄປໝູນໃຊ້ໃນວຽກງານຕົວຈິງຢ່າງມີປະສິດທິພາບ ແລະ ປະສິດທິຜົນ.

ໃນຕອນທ້າຍພິທີ ທ່ານ ສຸກນິລັນ ແສງພະຈັນ ໄດ້ກ່າວສະແດງຄວາມຊົມເຊີຍຕໍ່ບັນດາຜູ້ເຂົ້າຮ່ວມຝຶກອົບຮົມ, ທີ່ໄດ້ເສຍສະຫຼະເວລາເຂົ້າຮ່ວມ ແລະ ຫວັງວ່າບົດຮຽນທັງໝົດຂອງກອງປະຊຸມໃນຄັ້ງນີ້ ຈະເປັນປະໂຫຍດໃຫ້ແກ່ບັນດາທ່ານຜູ້ເຂົ້າຮ່ວມບໍ່ໜ້ອຍກໍ່ຫຼາຍ ແລະ ຫວັງວ່າບັນດາທ່ານຈະນໍາເອົາບົດຮຽນໃນຄັ້ງນີ້ໄປນໍາໃຊ້ເຂົ້າໃນວຽກງານຕົວຈິງຂອງພວກທ່ານໃນຕໍ່ໜ້າ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ຕ້ອນຮັບການມາຢ້ຽມຢາມຂອງຄະນະຜູ້ແທນ ສະຖາບັນວິທະຍາສາດສັງຄົມ ແຂວງ ກວາງຕຸງ

ຈໍານວນຜູ້ເຂົ້າຊົມ: 251

ສວສສຊ ຕ້ອນຮັບການມາຢ້ຽມຢາມຂອງຄະນະຜູ້ແທນ ສະຖາບັນວິທະຍາສາດສັງຄົມ ແຂວງ ກວາງຕຸງ

ໃນຕອນເຊົ້າຂອງວັນທີ 27 ພະຈິກ 2027 ທີ່ຜ່ານມາ; ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທ່ານ ປອ ນ. ແກ້ວວິວອນ ອຸດທະຈັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ສຈ. ທິງຫຸຍ (wang Tinghui), ປະທານສະຖາບັນວິທະຍາສາດສັງຄົມ ແຂວງ ກວາງຕຸ່ງ ພ້ອມດ້ວຍຄະນະ.

ໃນໂອກາດດັ່ງກ່າວ ທ່ານ ປອ. ນ. ແກ້ວວິວອນ ອຸດທະຈັກ ໄດ້ກ່າວສະແດງຄວາມຍິນດີຕ້ອນຮັບ, ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກໃນຄັ້ງນີ້ ໄດ້ສະແດງເຖິງຄວາມສາມັກຄີແບບພິເສດ, ເປັນສາຍເຊື່ອມມິດຕະພາບ, ຄວາມຕັ້ງໃຈຮ່ວມມື, ຮ່ວມພັດທະນາ ແລະ ຮ່ວມກັນສ້າງຄວາມຝັນ ລະຫວ່າງສອງສະຖາບັນ.

ພ້ອມນັ້ນ, ທັງສອງຝ່າຍໄດ້ ປຶກສາຫາລື ແລະ ແລກປ່ຽນບົດຮຽນທາງດ້ານວິຊາການກ່ຽວກັບ ສະຖານະພາບເສດຖະກິດ-ສັງຄົມ, ບົດຮຽນການປະຕິຮູບ ແລະ ແຜນບູລິມະສິດໃນອະນາຄົດ, ທີ່ມີ 5 ຫົວຂໍ້ຍ່ອຍ ຄື: 1. ການປະຕິຮູບຮອບດ້ານ ມີຫຼັກການ; 2. ຫັນເສດຖະກິດທໍາມະຊາດໄປສູ່ເສດຖະກິດສິນຄ້າ; 3. ນະໂຍບາຍ ແລະ ຮູບແບບການຄຸ້ມຄອງໃນການລົງທຶນຂອງຕ່າງປະເທດ; 4. ພັດທະນາເຂດພື້ນທີ່ຕາມແລວທາງລົດໄຟລາວ-ຈີນ; 5. ບາງບົດຮຽນໃນການປະຕິຮູບຮອບດ້ານ ມີຫຼັກການ ທີ່ຕິດພັນກັບສະຖາບັນ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ຄະນະຜູ້ແທນ ສວສສຊ ເຂົ້າຮ່ວມສຳມະນາສາກົນສັງຄົມນິຍົມ ຄັ້ງທີ XII ທີ່ ສສ. ຫວຽດນາມ

ຈໍານວນຜູ້ເຂົ້າຊົມ: 480

ຄະນະຜູ້ແທນ ສວສສຊ ເຂົ້າຮ່ວມສຳມະນາສາກົນສັງຄົມນິຍົມ ຄັ້ງທີ XII ທີ່ ສສ. ຫວຽດນາມ

ໃນວັນທີ 17 ພະຈິກ 2025 ທີ່ຜ່ານມາ, ທ່ານ ໄຊສົງຄາມ ມະໂນທັມ ຄະນະປະຈໍາພັກ, ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ນໍາພາຄະນະຜູ້ແທນສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ເຂົ້າຮ່ວມກອງປະຊຸມສໍາມະນາວິທະຍາສາດສາກົນສັງຄົມນິຍົມ ຄັ້ງທີ XII ພາຍໃຕ້ຫົວຂໍ້ “ການບໍລິຫານລັດສັງຄົມນີຍົມໃນສະພາບການຍຸກໃໝ່” ທີ່ນະຄອນຫຼວງຮ່າໂນ້ຍ ສສ.ຫວຽດນາມ ໂດຍການເປັນເຈົ້າ ພາບຂອງສະຖາບັນບັນດິດວິທະຍາສາດສັງຄົມຫວຽດນາມ; ປະທານກອງປະຊຸມຮ່ວມຄັ້ງນີ້ມີ ທ່ານ ປອ. ດັ່ງ ຊວັ່ນແທ່ງ (Dang Xuan Thanh) ຮອງປະທານສະຖາບັນບັນດິດວິທະຍາສາດສັງຄົມຫວຽດນາມ (VASS), ທ່ານ ໄຊສົງຄາມ ມະໂນທັມ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (LASES) ແລະ ທ່ານ ປອ. ໂລ້ ເວິນຕົ້ງ (Luo Wen Dong) ຮອງຫົວໜ້າສະຖາບັນຄົ້ນຄວ້າລັດທິມາກ, ສະຖາບັນບັນດິດວິທະຍາສາດສັງຄົມຈີນ (CASS) ພ້ອມດ້ວຍມີນັກວິທະຍາກອນ, ນັກສຳມະນາກອນຂອງສາມປະເທດເຂົ້າຮ່ວມ.

ທ່ານ ໄຊສົງຄາມ ມະໂນທັມ ໄດ້ກ່າວມີຄຳເຫັນໃນພິທີເປີດບາງຕອນວ່າ: ຜົນສຳເລັດຂອງກອງປະຊຸມສຳມະນາວິທະຍາສາດສາກົນສັງຄົມນິຍົມ ແມ່ນບົດຮຽນທີ່ສໍາຄັນທາງດ້ານທິດສະດີ ແລະ ພຶດຕະກຳ ເປັນຂໍ້ມູນໃຫ້ພັກ ແລະ ລັດຖະບານ ໃນການວາງແນວທາງນະໂຍບາຍ ໂດຍສະເພາະ ໃນການຮ່າງມະຕິຂອງກອງປະຊຸມໃຫຍ່ ຄັ້ງທີ່ XII ຂອງ ພັກປະຊາຊົນປະຕິວັດລາວ ເວົ້າລວມ, ເວົ້າສະເພາະແມ່ນການປັບປຸງການຄຸ້ມຄອງລັດຢູ່ ສປປ ລາວ ທີ່ຈະສົນທະນາ ແລະ ແລກປ່ຽນບົດຮຽນໃນກອງປະຊຸມສໍາມະນາເທື່ອນີ້. ພັກ ແລະ ລັດຖະບານ ແຫ່ງ ສປປ ລາວ ເຫັນໄດ້ຄວາມສໍາຄັນ ແລະ ມີແນວທາງປັບປຸງການຄຸ້ມຄອງລັດ-ຄຸ້ມຄອງສັງຄົມ ໃຫ້ທັນສະໄໝ, ມີປະສິດທິພາບ ແລະ ມີປະສິດທິຜົນ ເພື່ອຫຼຸດຜ່ອນພາລະແບກຫາບ, ເສີມຂະຫຍາຍສິດເປັນເຈົ້າ ແລະ ການມີສ່ວນຮ່ວມຂອງປະຊາຊົນ ໃຫ້ນັບມື້ນັບຫຼາຍຂຶ້ນ. ການປັບປຸງການຄຸ້ມຄອງລັດ ແລະ ສັງຄົມຂອງ ສປປ ລາວ ໃນໄລຍະຜ່ານ ປະສົບຜົນສຳເລັດໃນຫຼາຍດ້ານ ເປັນຕົ້ນກົງຈັກການຈັດຕັ້ງຂອງພັກ ແລະ ລັດຖະບານໄດ້ຮັບການປັບປຸງໃຫ້ກະທັດຮັດ, ເຄື່ອນໄຫວຄ່ອງຕົວ, ມີປະສິດທິພາບ ແລະ ປະສິດທິຜົນສູງຂຶ້ນ; ຈຳນວນພະນັກງານ-ລັດຖະກອນຫຼຸດລົງທຽບກັບຈຳນວນປະຊາກອນ ແລະ ເງິນເດືອນຂອງພະນັກງານ-ລັດຖະກອນ ກັບຂະໜາດເສດຖະກິດ ແລະ ລາຍຮັບເຂົ້າງົບປະມານຂອງລັດ ອັນໄດ້ຫຼຸດຜ່ອນພາລະແບກຫາບຂອງປະຊາຊົນລົງ, ເຕັກນິກ ແລະ ເຕັກໂນໂລຊີດີຈີຕ້ອນ ໄດ້ຮັບການຂະຫຍາຍຕົວສູງຂຶ້ນ, ປະກອບສ່ວນເຮັດໃຫ້ ການຄຸ້ມຄອງລັດ ແລະ ສັງຄົມມີຄວາມວ່ອງໄວ ແລະ ໂປ່ງໃສຂຶ້ນ; ບົດບາດຂອງອໍານາດການປົກຄອງທ້ອງຖິ່ນ ແລະ ການມີສ່ວນຮ່ວມຂອງປະຊາຊົນ ໃນການຄຸ້ມຄອງລັດ ແລະ ສັງຄົມ ໄດ້ຮັບການປັບປຸງໃຫ້ດີຂຶ້ນ ແລະ ອື່ນໆ. ແຕ່ເຖິງຢ່າງໃດກໍຕາມ ສປປ ລາວ ກໍຍັງມີບັນຫາ, ຂໍ້ຫຍຸ້ງຍາກ, ຂໍ້ຈຳກັດ ແລະ ສິ່ງທ້າທາຍນຳມາປຶກສາຫາລື ແລະ ແລກປ່ຽນບົດຮຽນໃນກອງປະຊຸມສຳມະນາຄັ້ງນີ້ ເຊັ່ນ: ການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ, ລະຫວ່າງຂະແໜງການຍັງບໍ່ທັນຈະແຈ້ງ, ຍັງມີລັກສະນະຊໍ້າຊ້ອນກັນ; ການສຶກສາອົບຮົມທາງດ້ານການເມືອງແນວຄິດ, ຄຸນສົມບັດສິນທຳປະຕິວັດ ແລະ ຄວາມຮູ້-ຄວາມສາມາດຂອງພະນັກງານ-ລັດຖະກອນ ໃຫ້ທັນກັບການປ່ຽນແປງຂອງສະພາບການຂອງໂລ; ການເສີມຂະຫຍາຍສິດເປັນເຈົ້າ ແລະ ການມີສ່ວນຮ່ວມຂອງປະຊາຊົນ ໃນການຄຸ້ມຄອງລັດ ແລະ ສັງຄົມ, ການແກ້ໄຂປະກົດການຫຍໍ້ທໍ້, ການສໍ້ລາດບັງຫຼວງ ແລະ ພະຍາດອາດຍາສິດ ໃນຖັນແຖວສະມາຊິກພັກ ແລະ ພະນັກງານ-ລັດຖະກອນ ແລະ ອື່ນໆ.

ກອງປະຊຸມໄດ້ຮັບຟັງການສະເໜີບົດວິທະຍາສາດທີ່ກ່ຽວຂ້ອງ ທັງໝົດ 11 ຫົວຂໍ້ ເຊິ່ງຈັດເປັນສອງວາລະຄື: ວາລະທີໜຶ່ງແມ່ນບັນຫາລວມກ່ຽວກັບການບໍລິຫານລັດທິສັງຄົມນິຍົມ ແລະ ວາລະທີສອງ ແມ່ນການບໍລິຫານລັດສັງຄົມນິຍົມທັນສະໄໝ ແລະ ມີປະສິດທິຜົນໃນສະພາບການໃໝ່ຂອງຍຸກປະຈຸບັນ. ໃນນັ້ນ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ນຳສະເໜີບົດຈຳນວນ 03 ຫົວຂໍ້ຄື: ຮູບແບບກົງຈັກບໍລິຫານລັດ ທີ່ມີປະສິດທິ ພາບໃນ ສປປ ລາວ; ບົດຮຽນການຈັດຕັ້ງກົງຈັກຂອງການປົກຄອງທ້ອງຖີ່ນໃນ ສປປ ລາວ ແລະ ວິທີແກ້ໄຂເພື່ອປັບປຸງປະສິດທິຜົນຂອງການປະຕິຮູບກົງຈັກລັດ ຢູ່ ສປປ ລາວ ໃນຂະບວນການເຊື່ອມໂຍງສາກົນ ເພື່ອສົນທະນາ ແລະ ແລກ ປ່ຽນບົດຮຽນໃນກອງປະຊຸມ.

ຜ່ານບັນດາບົດປະກອບຄໍາເຫັນ ແລະ ການສົນທະນາເຈາະຈີ້ມບັນຫາທີ່ກ່ຽວຂ້ອງສາມາດເຫັນໄດ້ວ່າ ບັນ ດານັກວິທະຍາສາດໄດ້ວິເຄາະ ແລະ ໄຂຄວາມກະຈ່າງແຈ້ງຫຼາຍບັນຫາລວມກ່ຽວກັບການບໍລິຫານລັດ, ເຊິ່ງເປັນພື້ນ ຖານການບໍລິຫານເອົາມະນຸດເປັນສູນກາງ, ພາຍໃຕ້ການນໍາພາຂອງພັກ, ການຄຸ້ມຄອງຂອງລັດ ແລະ ສິດເປັນເຈົ້າຕົນເອງຂອງປະຊາຊົນຈາກບົດຮຽນຂອງສາມປະເທດ, ຊີ້ໃຫ້ເຫັນຄວາມຫຼາກຫຼາຍໃນວິທີການເຂົ້າເຖິງການບໍລິຫານລັດສັງຄົມນິຍົມ, ຄວາມແຕກຕ່າງກັນໃນທິດທາງໃຫ້ບູລິມະສິດທີ່ກ່ຽວຂ້ອງເຖິງໜ້າທີ່ຈຸດສຸມຂອງແຕ່ລະປະເທດ. ກອງປະຊຸມໄດ້ພ້ອມກັນສະຫຼຸບ ແລະ ຕີລາຄາສູງຕໍ່ຜົນສຳເລັດຂອງສຳມະນາວິທະຍາສາດສາກົນຄັ້ງນີ້ ເຊິ່ງໄດ້ສ້າງຄວາມກະຈ່າງແຈ້ງຫຼາຍບັນຫາຕໍ່ກັບທິດທາງການເຂົ້າເຖິງແບບໃໝ່ ແລະ ການຄົ້ນຄວ້າທິດສະດີກ່ຽວກັບການບໍລິຫານລັດສັງຄົມນິຍົມ ແລະ ເຮັດໃຫ້ຄະນະຜູ້ແທນຈາກ ສປປ ລາວ ໄດ້ມີຄວາມເຂົ້າໃຈ ແລະ ບົດຮຽນອັນໃໝ່ທີ່ມີຄຸນຄ່າທາງດ້ານທິດສະດີ ແລະ ພືດຕິກຳ ຈາກ ສສ. ຫວຽດນາມ ແລະ ສປ. ຈີນ ເປັນຕົ້ນແມ່ນບົດຮຽນໃນການບໍລິຫານລັດຕາມທິດຫັນເປັນທັນສະໄໝ, ການນຳໃຊ້ເຕັກໂນໂລຊີດີຈີຕ້ອນ, ການປັບປຸງກົງຈັກການຈັດຕັ້ງ ແລະ ການຄວບຄຸມອຳນາດລັດສັງ ຄົມນິຍົມ ເພື່ອເປັນບົດຮຽນໃນການໝູນໃຊ້ເຂົ້າໃນການປັບປຸງການປົກຄອງລັດຢູ່ ສປປ ລາວ. ທັງສາມຝ່າຍໄດ້ເຫັນດີເປັນເອກະພາບຈັດຕັ້ງກົນໄກປະສານງານ ເພື່ອປຶກສາຫາລືກຳນົດຫົວຂໍ້ກອງປະຊຸມສໍາມະນາວິທະຍາສາດສາກົນສັງ ຄົມນິຍົມ ຄັ້ງທີ XIII ທີ່ສະຖາບັນດິດວິທະຍາສາດສັງຄົມຈີນ ຈະເປັນເຈົ້າພາບໃນປີ 2026 ທີ່ຈະມາເຖິງນີ້.