admin_lases00
ສິດທິມະນຸດ ແລະ ການພັດທະນາສັງຄົມຊົນເຜົ່າ
ເຂົ້າເບິ່ງເອກະສານສະບັບເຕັມໄດ້ທີ່ ຖານຂໍ້ມູນຫໍສະໝຸດເອເລັກໂຕຣນິກ
ສ້າງສັງຄົມສາມັກຄີປອງດອງໃນການສ້າງສັງຄົມນິຍົມ
ເຂົ້າເບິ່ງເອກະສານສະບັບເຕັມໄດ້ທີ່ ຖານຂໍ້ມູນຫໍສະໝຸດເອເລັກໂຕຣນິກ
ກອງປະຊຸມໃຫຍ່ສະມາຊິກພັກ ຄັ້ງທີ I ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ
ກອງປະຊຸມໃຫຍ່ສະມາຊິກພັກ ຄັ້ງທີ I ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ໄຂຂຶ້ນຢ່າງເປັນທາງການໃນ, ວັນທີ 28 ເມສາ 2022 ແລະ ດຳເນີນເປັນເວລາ 1 ວັນ, ຈັດຂຶ້ນຢູ່ຫ້ອງປະຊຸມໃຫຍ່ຂອງຫ້ອງວ່າການສູນກາງພັກ; ໂດຍການເປັນປະທານ ຂອງ ສະຫາຍ ປອ. ສອນທະນູ ທໍາມະວົງ, ກໍາມະການສູນກາງພັກ, ເລຂາຄະນະພັກ, ປະທານສະຖາບັນເສດຖະກິດ ແລະ ສັງຄົມແຫ່ງຊາດ
ກອງປະຊຸມໃຫຍ່ມີຄວາມປິຕິຊົມຊື່ນເປັນຢ່າງຍິ່ງທີ່ໄດ້ຕ້ອນຮັບ ສະຫາຍ ປອ. ຄໍາພັນ ພົມມະທັດ, ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທີ່ໄດ້ເຂົ້າຮ່ວມເປັນກຽດໃຫ້ແກ່ກອງປະຊຸມໃນຄັ້ງນີ້; ເຂົ້າຮ່ວມກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກ ສວສສຊ ປະກອບມີສະມາຊິກພັກສົມບູນ 121 ສະຫາຍ, ສະມາຊິກພັກສໍາຮອງ 20 ສະຫາຍ ແລະ ແຂກຖືກເຊີນອ້ອມຂ້າງສູນກາງພັກຈຳນວນນຶ່ງ ທີ່ເປັນຕົວແທນຈາກຄະນະພັກຕ່າງໆ ອ້ອມຂ້າງເປັນຕົ້ນ: ຄະນະພັກຄະນະຈັດຕັ້ງສູນກາງພັກ, ຄະນະພັກຄະນະໂຄສະນາອົບຮົມສູນກາງພັກ, ຄະນະພັກຫ້ອງວ່າການສູນກາງພັກ, ຄະນະພັກຄະນະກວດກາສູນກາງພັກ, ຄະນະພັກສະຖາບັນການເມືອງ-ການປົກຄອງແຫ່ງຊາດ.
ກອງປະຊຸມໃຫຍ່ ໄດ້ດຳເນີນໄປພາຍໃຕ້ບັນຍາກາດແຫ່ງຄວາມສາມັກຄີ, ເປັນເອກະພາບໃນການຄົ້ນຄວ້າບັນຫາສຳຄັນທີ່ກອງປະຊຸມໄດ້ຍົກຂຶ້ນດ້ວຍຄວາມຮັບຜິດຊອບສູງ
ໃນວາລະກອງປະຊຸມ ມີການປະກອບຄຳຄິດເຫັນໃສ່ຮ່າງບົດລາຍງານການເມືອງ, ແຜນພັດທະນາການຄົ້ນຄວ້າຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທິດທາງຄາດໝາຍສູ້ຊົນກ່ຽວກັບວຽກງານກໍ່ສ້າງພັກ, ພະນັກງານ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ, ຊຶ່ງພາຍໃຕ້ການນຳພາຂອງອົງຄະນະພັກຊຸດຜ່ານມາ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຍາດໄດ້ຜົນງານເບື້ອງຕົ້ນທີ່ສຳຄັນຈຳນວນໜຶ່ງ ເປັນຕົ້ນແມ່ນ: ກົງຈັກການຈັດຕັ້ງ ພ້ອມດ້ວຍກົນໄກ, ລະບອບ-ລະບຽບໃນການຈັດຕັ້ງການຄົ້ນຄວ້າວິທະຍາສາດ ດ້ານເສດຖະກິດ ແລະ ສັງຄົມ ໄດ້ຮັບການປັບປຸງເຂົ້າສູ່ແບບແຜນເທື່ອລະກ້າວ; ໂຄງການຄົ້ນຄວ້າວິທະຍາສາດທີ່ວາງອອກສ່ວນຫຼາຍໄດ້ສຳເລັດຕາມຄາດໝາຍ, ຄຸນນະພາບຂອງການຄົ້ນຄວ້າກໍໄດ້ຮັບການຍົກສູງຂຶ້ນເທື່ອລະກ້າວ. ແຕ່ເຖິງຢ່າງໃດກໍດີ ການຄົ້ນຄວ້າທິດສະດີ, ວິທະຍາສາດຍັງຈຳກັດບາງດ້ານ, ຍັງບໍ່ທັນຕອບສະໜອງໄດ້ຄວາມຮຽກຮ້ອງຕ້ອງການ ຂອງສູນກາງພັກ ແລະ ລັດຖະບານ ກໍຄືຄວາມຕ້ອງການຂອງສັງຄົມ. ຖັນແຖວພະນັກງານ, ນັກຄົ້ນຄວ້າຍັງອ່ອນນ້ອຍ; ນະໂຍບາຍສົ່ງເສີມການຄົ້ນຄວ້າບາງດ້ານຍັງບໍ່ທັນເໝາະສົມ; ຄວາມຮັບຜິດຊອບຂອງພະນັກງານຕໍ່ໜ້າທີ່ວຽກງານຍັງຕ້ອງໄດ້ປັບປຸງຕື່ມ.
ກອງປະຊຸມໄດ້ຮັບຟັງລາຍງານ ແລະ ບົດປະກອບຄຳເຫັນຈາກຜູ້ຕາງໜ້າຂອງ 3 ອົງການຈັດຕັ້ງມະຫາຊົນ ແລະ ຜູ້ຕາງໜ້າຈາກຂົງເຂດການຄົ້ນຄວ້າ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານ ແລະ ປະກອບຄຳຄິດເຫັນສ່ວນຫຼາຍໄດ້ລົງເລິກ ລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ແລະ ຜັນຂະຫຍາຍມະຕິກອງປະຊຸມໃຫຍ່ຂອງພັກຄັ້ງທີ XI ເຂົ້າໃນຂົງເຂດການຄົ້ນຄວ້າວິທະຍາສາດເສດຖະກິດ ແລະ ສັງຄົມ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນ.
ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາ ຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງຕາມມາດຕະຖານເງື່ອນໄຂທີ່ກຳນົດໄວ້ ຊຶ່ງມີຜູ້ອອກສະໝັກເລືອກຕັ້ງທັງໝົດ 12 ສະຫາຍ ແລະ ເລືອກໄດ້ 9 ສະຫາຍ, ຍິງ 2 ສະຫາຍ
ກອງປະຊຸມຄົບຄະນະ ຄັ້ງປະຖົມມະລຶກຂອງຄະນະບໍລິຫານງານພັກ ອົງຄະນະສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ໄດ້ເປັນເອກະສັນກັນເລືອກເອົາເລຂາ, ຮອງເລຂາຄະນະພັກ, ປະທານ ແລະ ຮອງປະທານກວດກາພັກ ຄື:
1). ເລືອກຕັ້ງເອົາຄະນະປະຈໍາ ດັ່ງນີ້:
1. ສະຫາຍ ປອ. ສອນທະນູ ທໍາມະວົງ.
2. ສະຫາຍ ປອ. ກິແກ້ວ ຈັນທະບູລີ.
3. ສະຫາຍ ປອ. ນ. ອໍາໄພວັນ ຄໍາແສງສີວິໄລ
2). ເລືອກຕັ້ງເອົາເລຂາ ແລະ ຮອງເລຂາຄະນະພັກ ດັ່ງນີ້:
1. ສະຫາຍ ປອ. ສອນທະນູ ທໍາມະວົງ ເປັນເລຂາຄະນະພັກ.
2. ສະຫາຍ ປອ. ກິແກ້ວ ຈັນທະບູລີ. ເປັນຮອງເລຂາຄະນະພັກ
3). ເລືອກຕັ້ງປະທານ ແລະ ຮອງປະທານກວດກາພັກ ດັ່ງນີ້:
1.ສະຫາຍ ປອ. ນ. ອໍາໄພວັນ ຄໍາແສງສີວິໄລເປັນປະທານກວດກາ
2. ສະຫາຍ ເພັດໃສ ເພຍເທບ ເປັນຮອງປະທານກວດກາ
ກອງປະຊຸມໃຫຍ່ໄດ້ຮັບຟັງການໂອ້ລົມຈາກສະຫາຍ ປອ. ຄໍາພັນ ພົມມະທັດ, ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ອົງຄະນະພັກຊຸດເກົ່າຍາດມາໄດ້ໃນໄລຍະຜ່ານມາ, ພ້ອມກັນນັ້ນ ສະຫາຍຍັງໄດ້ຊີ້ນໍາປັບປຸງແກ້ໄຂຕໍ່ດ້ານອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະບໍລິຫານງານພັກຊຸດໃໝ່ຈະຕ້ອງໄດ້ສືບຕໍ່ປັບປຸງ, ແກ້ໄຂຢ່າງຕໍ່ເນື່ອງ ເຊິ່ງໃນຊຸມປີຕໍ່ໜ້ານີ້ ສະພາບການຂອງໂລກ ແລະ ພາກພື້ນ ຍັງຈະຜັນແປຢ່າງສະຫຼັບຊັບຊ້ອນ, ຫຼໍ່ແຫຼມ, ຄາດຄະເນໄດ້ຍາກ, ທັງສ້າງກາລະໂອກາດ ແລະ ສິ່ງທ້າທາຍບໍ່ໜ້ອຍ ເປັນຕົ້ນແມ່ນ ສົງຄາມລັດເຊຍ-ຢູເຄຼນ, ສົງຄາມການຄ້າ ລະຫວ່າງປະເທດມະຫາອຳນາດ, ບັນຫາການກໍ່ການຮ້າຍ, ສົງຄາມກາງເມືອງ, ຂໍ້ຂັດແຍ່ງດ້ານເຊື້ອຊາດເຜົ່າພັນ, ການແຂ່ງຂັນກັນ ສະສົມອາວຸດ, ບັນຫາການແຜ່ລະບາດພະຍາດ Covid-19 ຍັງຈະສົ່ງຜົນກະທົບຕໍ່ກັບພື້ນຖານເສດຖະກິດໂລກໃນໄລຍະຍາວ ແລະ ອື່ນໆ. ສະພາບການພາຍໃນປະເທດ ກໍຍັງ ມີຄວາມຫຍຸ້ງຍາກ ຫຼາຍປະການເຊັ່ນ: ການເຕີບໂຕທາງດ້ານເສດຖະກິດຍັງບໍ່ທັນໝັ້ນທ່ຽງ, ສະພາບ ຄວາມຫຍຸ້ງຍາກ ທາງດ້ານເສດຖະກິດ-ການເງິນ, ບັນຫາໄພທຳມະຊາດ, ພະຍາດລະບາດ ຍັງຈະສືບຕໍ່ສົ່ງຜົນກະທົບ ໂດຍກົງກັບຊີວິດການເປັນຢູ່ ແລະ ຈິດໃຈຂອງປະຊາຊົນລາວບັນດາເຜົ່າ ເວົ້າລວມ, ເວົ້າສະເພາະແມ່ນ ຕໍ່ກັບພະນັກງານ, ສະມາຊິກພັກ, ລັດຖະກອນຂອງສະຖາບັນ. ການຂະຫຍາຍຕົວ ຂອງວິທະຍາສາດ, ເຕັກໂນໂລຢີ, ການປະຕິວັດອຸດສາຫະກຳ 4.0 ໃຫ້ຖືໂອກາດສ້າງພະນັກງານ, ລັດຖະກອນນັກຄົ້ນຄວ້າ ໜຸ່ມນ້ອຍໃຫ້ມີຄຸນນະພາບ, ພວກສະຫາຍ ພະນັກງານ, ສະມາຊິກພັກ ແລະ ລັດຖະກອນຂອງສະຖາບັນ ທີ່ມີມູນເຊື້ອໃນການຄົ້ນຄວ້າ, ໃຫ້ສະແຫວງຫາຄວາມຮູ້, ສືບຕໍ່ມູນເຊື້ອຄວາມສາມັກຄີອັນໜັກແໜ້ນ ຕ້ອງເປັນກໍາລັງແຮງອັນສຳຄັນໃຫ້ແກ່ການພັດທະນາ ສະຖາບັນໃນຕໍ່ໜ້າ. ຈາກນັ້ນ ສະຫາຍໄດ້ໃຫ້ທິດຊີ້ນຳ-ນຳພາວຽກງານແຕ່ລະດ້ານໃນທາງທີ່ສ້າງສັນ. ສະຫາຍ ມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ ທີ່ຈະສືບຕໍ່ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກ ຄັ້ງທີ I ອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃຫ້ຍາດໄດ້ຜົນງານ ແລະ ມີຜົນສຳເລັດຍິ່ງໃຫຍ່ກວ່າເກົ່າ.
ນອກຈາກນັ້ນກອງປະຊຸມຍັງໄດ້ຮຽກຮ້ອງມາຍັງ ບັນດາສະຫາຍສະມາຊິກພັກ, ພະນັກງານ, ລັດຖະກອນ ທົ່ວສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຈົ່ງຄົ້ນຄວ້າເຊື່ອມຊຶມ ກຳແໜ້ນຈິດໃຈເນື້ອໃນມະຕິກອງປະຊຸມໃຫຍ່ຄັ້ງນີ້ ເພື່ອເປັນແຜນການ, ແຜນງານລະອຽດ ແລະ ພ້ອມກັນເຊີດຊູສະຕິປັນຍາ ແລະ ຄວາມຮັບຜິດຊອບ, ເປັນເຈົ້າການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ເກີດໝາກຜົນຕົວຈິງ.
ກອງປະຊຸມໃຫຍ່ສະມາຊິກພັກຄັ້ງທີ I ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນສຸກ, ທີ 25 ມີນາ 2022 ໃນເວລາ 8:30 ໂມງ ໂດຍໃຫ້ກຽດເປັນປະທານ ແລະ ກ່າວເປີດກອງປະຊຸມຂອງ ສະຫາຍ ປອ ທະນົງສອນ ສີບຸນເຮືອງ ຮັກສາການເລຂາໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ. ກອງປະຊຸມຍັງໄດ້ຮັບກຽດຢ່າງສູງຂ່ຳນັບຮັບຕ້ອນ ສະຫາຍ ປອ. ນ. ອຳໄພວັນ ຄຳແສງສີວິໄລ ຮອງເລຂາຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮ່ວມເປັນປະທານໃນກອງປະຊຸມ. ເຂົ້າຮ່ວມກອງປະຊຸມໃຫຍ່ໃນຄັ້ງນີ້ ມີຜູ້ແທນສະມາຊິກພັກສົມບຸນຈຳນວນ 15 ສະຫາຍ, ເພດຍິງ 9 ສະຫາຍ, ສະມາຊິກພັກສຳຮອງ 4 ສະຫາຍ, ເພດຍິງ 1 ສະຫາຍ, ລວມຜູ້ແທນເຂົ້າຮ່ວມກອງປະຊຸມໃຫຍ່ສະມາຊິກພັກຄັ້ງທີ I ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມມີທັງໝົດ 19 ສະຫາຍ, ເພດຍິງ 10 ສະຫາຍ, ຜູ້ມີສິດປ່ອນບັດເລືອກຕັ້ງ 14 ສະຫາຍ, ເພດຍິງ 8 ສະຫາຍ (1 ສະຫາຍ ໄດ້ໃຊ້ສິດໃນໜ່ວຍພັກສະຖາບັນຄົ້ນຄວ້າວັດທະນະທຳ). ກອງປະຊຸມໄດ້ດຳເນີນເປັນເວລາເຄິ່ງວັນ ດ້ວຍບັນຍາກາດຂອງຄວາມຕັ້ງອົກຕັ້ງໃຈ ແລະ ເອົາໃຈໃສ່ຮັບຝັງຮ່າງບົດລາຍງານການເມືອງ ເຊິ່ງໄດ້ສະຫຼຸບຕີລາຄາການຈັດຕັ້ງປະຕິບັດວຽກງານນຳພາ-ຊີ້ນຳ ໃນໄລຍະ 5 ປີຜ່ານມາ ແລະ ທິດທາງໜ້າທີ່, ຄາດໝາຍສູ້ຊົນໃນການນຳພາ ໄລຍະປີ 2022-2026 ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ.
ກອງປະຊຸມໃຫຍ່ສະມາຊິກພັກຄັ້ງທີ I ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໄດ້ເປັນເອກະພາບກັນຢ່າງສົມບຸນຮັບຮອງເອົາບັນດາເນື້ອໃນຂອງກອງປະຊຸມດັ່ງນີ້:
1. ກອງປະຊຸມໃຫຍ່ໄດ້ຮັບຮອງເອົາບົດລາຍງານການເມືອງ ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໃນໄລຍະຜ່ານມາ ແລະ ຮັບຮອງເອົາທິດທາງລວມ, ຄາດໝາຍສູ້ຊົນ ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໃນ 5 ປີຕໍ່ໜ້າ 2022-2026.
2. ກອງປະຊຸມໃຫຍ່ໄດ້ຮັບຮອງເອົາບົດສຳຫຼວດການນຳພາ ຂອງຄະນະໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໃນໄລຍະຜ່ານມາ ເຊິ່ງໄດ້ຕີລາຄາຕໍ່ການຊີ້ນຳໜ່ວຍພັກ ຕາມພາລະບົດບາດໜ້າທີ່ຂອງຄະນະໜ່ວຍພັກ ຕາມກົດລະບຽບພັກ.
3. ກອງປະຊຸມຄັ້ງປະຖົມມະລຶກ ໄດ້ຕົກລົງເປັນເອກະສັນຢ່າງສົມບູນ ເລືອກເອົາ ເລຂາ, ຮອງເລຂາ ແລະ ກຳມະການກວດກາໜ່ວຍພັກຊຸດໃໝ່ ຈຳນວນ 3 ສະຫາຍ ຄື:
1). ສະຫາຍ ປອ ທະນົງສອນ ສີບຸນເຮືອງ ເປັນເລຂາໜ່ວຍພັກ
2). ສະຫາຍ ປທ ນ. ວັນນະສິນ ເທບສີເມືອງ ເປັນຮອງເລຂາໜ່ວຍພັກ
3). ສະຫາຍ ປທ ໄຊສົມພອນ ຫາວັນນະລາດ ເປັນກຳມະການກວດກາໜ່ວຍພັກ
4. ກອງປະຊຸມໃຫຍ່ ໄດ້ຮັບຟັງການປະກອບຄວາມເຫັນໂອ້ລົມຂອງ ສະຫາຍ ປອ. ນ. ອຳໄພວັນ ຄຳແສງສີວິໄລ ຮອງເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ເຊິ່ງໄດ້ເນັ້ນໜັກໃຫ້ຄະນະໜ່ວຍພັກ ກໍຄືສະມາຊິກພັກ ເອົາໃຈໃສ່ໃນການປະຕິບັດກົດລະບຽບພັກປະຊາຊົນປະຕິວັດລາວ ສະໄໝທີ XI ຢ່າງເຂັ້ມງວດ ຕາມ 5 ຫຼັກການ ແລະ 3 ທິດນຳ ສ້າງຄວາມສາມັກຄີພາຍໃນໃຫ້ເປັນປຶກແຜ່ນ ພ້ອມທັງນຳພາ ສູນຂໍ້ມູນຂ່າວສານ ແລະ ຝຶກອົບຮົມ ປະຕິບັດໜ້າທີ່ຕາມພາລະບົດບາດຂອງຕົນໃຫ້ມີຜົນສຳເລັດຕາມຄາດໝາຍທີ່ວາງໄວ້. ການໂອ້ລົມດັ່ງກ່າວ ສຸດທີ່ມີຄວາມ ໝາຍຄວາມສຳຄັນ, ເປັນເຂັມຊີ້ທິດເຍືອງທາງໃຫ້ແກ່ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມໃນການຜັນຂະຫຍາຍເຂົ້າໃນວຽກງານຂອງຕົນໃນຕໍ່ໜ້າ.
5. ກອງປະຊຸມໃຫຍ່ໄດ້ພ້ອມກັນລົງປະຊາມະຕິເພື່ອຮັບຮອງເອົາຜົນຂອງການດຳເນີນກອງປະຊຸມໃຫຍ່ສະມາຊິກພັກຄັ້ງທີ I ຂອງໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ດ້ວຍການຍົກບັດສະມາຊິກພັກລົງປະຊາມະຕິ ເຊິ່ງໄດ້ເຫັນດີເປັນເອກະພາບຮ້ອຍສ່ວນຮ້ອຍ ຈາກຜູ້ແທນກອງປະຊຸມ.
ພາບ: ສິລິສິດ ໄຊສົມແພງ; ຂ່າວ: ພວງເພັດ ຈັນທະລີວົງ
