ໃນຕອນເຊົ້າວັນທີ 14 ຕຸລາ 2026 ທີ່ຜ່ານມາ, ທີ່ຫ້ອງປະຊຸມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ປອ. ນາງ ແກ້ວວິວອນ ອຸດທະຈັກ, ຮອງປະທານ ສະຖາບັນວິທະຍາສາດເສດຖະກິດ  ແລະ ສັງຄົມແຫ່ງຊາດ ໄດ້ໃຫ້ກຽດຕ້ອນຮັບ ທ່ານ ສາດສະດາຈານ ປອ. ເຊີເກ ບອດຣູນອບ (Sergey Bodrunov), ປະທານສະມາຄົມ ໂນໂອໂນມີໂລກ (World Noonomy Association) ຈາກສະຫະພັນຣັດເຊຍ ພ້ອມດ້ວຍຄະນະ ເນື່ອງໃນໂອກາດເດີນ ທາງມາເຂົ້າຮ່ວມກອງປະຊຸມສໍາມະນາວິທະຍາສາດາກົນ ລະຫວ່າງລາວ-ລັດເຊຍ.

        ທັງສອງຝ່າຍໄດ້ປຶກສາຫາລື ແລະ ແລກປ່ຽນຄໍາຄິດເຫັນກ່ຽວກັບພາລະບົດບາດໜ້າທີ່, ການຄົ້ນຄວ້າທາງດ້ານວິຊາການ, ການແລກປ່ຽນຂໍ້ມູນຂ່າວສານ ແລະ ການສ້າງເຄືອຂ່າຍຄວາມຮ່ວມມື ລະຫວ່າງນັກຄົ້ນຄວ້າ ແລະ ບຸກຄະລາກອນວິທະຍາສາດ ເພື່ອສົ່ງເສີມການຮ່ວມມືດ້ານວິທະຍາສາດເສດຖະກິດ ແລະ ສັງຄົມຮ່ວມກັນ ລະຫວ່າງ ສປປ ລາວ ແລະ ສະຫະພັນຣັດເຊຍ ໃຫ້ມີຄວາມແໜ້ນແຟ້ນ ແລະ ນໍາໄປສູ່ພາກປະຕິບັດຕົວຈິງ. ພ້ອມນັ້ນ ຍັງໄດ້ລົງເລິກສົນທະນາເນື້ອໃນບາງປະເດັ່ນທີ່ສໍາຄັນຂອງຫົວຂໍ້ “ທິດສະດີ ໂນໂອໂນມີ (Noonomy): ແນວທາງໃໝ່ ເພື່ອການຫັນປ່ຽນ ເສດຖະກິດ-ສັງຄົມ” ທີ່ຈະບັນລະຍາຍຂຶ້ນທີີ່ ສະຖາບັນຂົງຈື້ ມະຫາວິທະຍາໄລແຫ່ງຊາດ.