ຕອນບ່າຍວັນທີ 21 ຕຸລາ 2026 ທີ່ຜ່ານມາ, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທ່ານ ຈັນສະໝອນ ວົງໄພສິດ, ຮອງຫົວໜ້າສະຖາບັນຄົ້ນຄວ້າພັດທະນາວິສາຫະກິດ ໄດ້ຕ້ອນຮັບທ່ານ ດຣ. ຟ່ານ ຢີ່ຈຽງ (Fan Yijiang), ຮອງຫົວໜ້າສະຖາບັນຄົ້ນຄວ້າຂົນສົ່ງ, ຄະນະກຳມະການພັດທະນາ ແລະ ປະຕິຮູບແຫ່ງຊາດ ສປ. ຈີນ ພ້ອມດ້ວຍຄະນະ ໃນໂອກາດເດີນທາງມາພົບປະແລກປ່ຽນບົດຮຽນ ກ່ຽວກັບການເຊື່ອມຈອດຄົມມະນາຄົມ-ຂົນສົ່ງ ລາວ-ຈີນ.

        ໃນໂອກາດນີ້, ທ່ານ ຈັນສະໝອນ ວົງໄພສິດ ໄດ້ນໍາສະເໜີເປົ້າໝາຍທີ່ສໍາຄັນຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ແລະ ແຜນພັດທະນາຂະແໜງໂຍທາທິການ ແລະ ຂົນສົ່ງ ໄລຍະປີ 2026-2030 ເພື່ອຍົກລະດັບການເຊື່ອມຈອດຄົມມະນາຄົມ-ຂົນສົ່ງລະດັບອະນຸພາກພື້ນ ແລະ ພາກພື້ນ. ພ້ອມນີ້ ຍັງໄດ້ລາຍງານຄວາມຄືບໜ້າ ແລະ ຜົນສໍາເລັດຂອງທາງລົດໄຟລາວ-ຈີນ ທີ່ຊ່ວຍຊຸກຍູ້ການຄ້າ, ການທ່ອງທ່ຽວ ແລະ ການລົງທຶນຂະຫຍາຍຕົວສູງຂຶ້ນ ເຮັດ ໃຫ້ເສດຖະກິດມະຫາພາກມີສະເຖຍລະພາບ ແລະ  ໝັ້ນທ່ຽງ. ສອງຝ່າຍຍັງໄດ້ລົງເລິກປຶກສາຫາລືກ່ຽວກັບໂຄງການເຊື່ອມຈອດຍຸດທະສາດຄື: ການຂະຫຍາຍທາງລົດໄຟ ລາວ-ຈີນ, ທາງດ່ວນວຽງຈັນ-ບໍ່ເຕັນ ແລະ ທາງດ່ວນນະຄອນ ຫຼວງວຽງຈັນ-ປາກເຊ. ການເຊື່ອມຈອດທາງລົດໄຟ ແລະ ທາງດ່ວນ ລາວ-ຫວຽດນາມ ເພື່ອຫັນປ່ຽນ ສປປ ລາວ ຈາກປະເທດທີ່ບໍ່ມີທາງອອກສູ່ທະເລ ໄປສູ່ປະເທດເຊື່ອມໂຍງ-ເຊື່ອມຈອດພາກພື້ນຢ່າງຄົບວົງຈອນ.

        ການພົບປະແລກປ່ຽນຄັ້ງນີ້ ເປັນການແລກປ່ຽນທັດສະນະທາງດ້ານນະໂຍບາຍໃນການກຳນົດທິດທາງການພັດ ທະນາຮ່ວມກັນຂອງແລວການຄ້າທາງບົກ-ທາງທະເລສາກົນໃໝ່ ທັງເປັນບົດຮຽນໃຫ້ ສວສສຊ ໃນການຄົ້ນຄວ້າຕົວຊີ້ວັດໃນການຕິດຕາມປະເມີນຜົນປະສິດທິພາບດ້ານໂລຈິສຕິກ, ການຫຼຸດຕົ້ນທຶນການຂົນສົ່ງ ແລະ ການຄຸ້ມຄອງຄວາມສ່ຽງດ້ານການເງິນໃນໄລຍະປີ 2026-2030.