ສວສສຊ ຕ້ອນຮັບຄະນະຊ່ຽວຊານສະຖາບັນທະນາຄານພັດທະນາອາຊີ
ໃນຕອນບ່າຍວັນທີ 04 ກັນຍາ 2026 ທີ່ຜ່ານມາ, ທ່ານ ປອ. ລີເບີ ລີບົວປາວ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ສຈ. ໂທຊິໂຣ ນິຊິຊາວະ (Prof. Toshiro Nishizawa), ທີ່ປຶກສາປະຈຳຫ້ອງການແຜນການ ແລະ ປະສານງານ, ນັກຄົ້ນຄວ້າອະວຸໂສ ມະຫາວິທະຍາໄລໂຕກຽວ ເຊິ່ງເປັນຜູ້ຊ່ຽວຊານດ້ານການເງິນ ແລະ ເສດຖະກິດມະຫາພາກຂອງຍີ່ປຸ່ນ ເນື່ອງໃນໂອກາດນໍາພາຄະນະຊ່ຽວຊານສະຖາບັນທະນາຄານພັດທະນາອາຊີ (ADBI) ເດີນທາງມາຢ້ຽມຢາມ ແລະ ປະຕິບັດໜ້າທີ່ຢູ່ ສປປ ລາວ.
ປອ. ລີເບີ ລີບົວປາວ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງການຮ່ວມມືຕະຫຼອດໄລຍະຜ່ານມາ ຂອງຄະນະຊ່ຽວຊານຍີ່ປຸ່ນໃນການໃຫ້ຄຳປືກສາດ້ານເສດຖະກິດມະຫາພາກ ແລະ ການສະເໜີບາງແນວທາງແກ້ໄຂບັນຫາໜີ້ສິນຂອງ ສປປ ລາວ. ທັງສອງຝ່າຍຍັງໄດ້ແລກປ່ຽນທັດສະນະຢ່າງກົງໄປກົງມາກ່ຽວກັບສະພາບລວມຂອງສະພາບເສດຖະກິດມະຫາພາກໃນປະຈຸບັນ ແລະ ທິດທາງການສ້າງນະໂຍບາຍໃນຕໍ່ໜ້າ ໂດຍເນັ້ນໃສ່ປັດໄຈຂັບເຄື່ອນເສດຖະກິດທີ່ສໍາຄັນ ເປັນຕົ້ນແມ່ນການຂະຫຍາຍຕົວຂອງເສດຖະກິດ (GDP), ການພັດທະນາທ່າເຮືອ, ໂຄງການສ້າງທາງດ່ວນ ລາວ-ຫວຽດນາມ ແລະ ແຜນການສ້າງໂຮງງານໂຕໂຍຕ້າຢູ່ ສປປ ລາວ.
ທັງສອງຝ່າຍເຫັນດີສືບຕໍ່ຮັດແໜ້ນຄວາມຮ່ວມມືໃນການເປັນຄູ່ຮ່ວມງານຍຸດທະສາດທີ່ສໍາຄັນ ເພື່ອໃຫ້ຄໍາປຶກສາ, ສ້າງແຜນ, ວິເຄາະປະເມີນຜົນ ແລະ ແລກປ່ຽນບົດຮຽນຕົວຈິງທາງດ້ານນະໂຍບາຍເສດຖະກິດມະຫາພາກ ແລະ ຍົກສູງຂີດຄວາມສາມາດຂອງບຸກຄະລາກອນພາຍໃນ ສວສສຊ ກໍ່ຄື ສປປ ລາວ ໃຫ້ກ້າວຂຶ້ນສູ່ສາກົນຢ່າງແຂງແຮງ.
ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ
