ໃນລະຫວ່າງວັນທີ 23 ມິຖຸນາ ຫາ 06 ກໍລະກົດ 2026, ຄະນະຜູ້ແທນຈາກ ສປປ ລາວ ຈຳນວນ 12 ທ່ານ, ເຊິ່ງໃນນັ້ນລວມມີຜູ້ຕາງໜ້າຈາກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ຈຳນວນ 4 ທ່ານ, ໄດ້ເດີນທາງເຂົ້າຮ່ວມໂຄງການສຳມະນາ ໃນຫົວຂໍ້: “ການວາງແຜນເສດຖະກິດອຸດສາຫະກຳການບິນເພດານຕ່ຳ ສຳລັບບັນດາປະເທດອາຊຽນ” (Low-Altitude Economy) ທີ່ນະຄອນໜານໜິງ, ເຂດປົກຄອງຕົນເອງແຂວງກວາງຊີ, ສປ ຈີນ.

        ໂຄງການສຳມະນາໃນຄັ້ງນີ້ ແມ່ນໃຫ້ກຽດຈັດຕັ້ງຂຶ້ນໂດຍ ວິທະຍາໄລວິຊາຊີບທຸລະກິດສາກົນກວາງຊີ (Guangxi International Business Vocational College) ພາຍໃຕ້ການໃຫ້ທຶນສະໜັບສະໜຸນຂອງກະຊວງການຄ້າ ສປ ຈີນ, ມີຜູ້ເຂົ້າຮ່ວມຈາກ 4 ປະເທດອາຊຽນຄື: ສປປ ລາວ, ມາເລເຊຍ, ມຽນມາ ແລະ ໄທ. ຕະຫຼອດໄລຍະເວລາ 15 ວັນຂອງການດຳເນີນໂຄງການ, ຄະນະຜູ້ແທນໄດ້ຮັບຟັງການບັນຍາຍທາງວິຊາການ ເຊັ່ນ: ບົດແນະນຳເບື້ອງຕົ້ນກ່ຽວກັບສະພາບເງື່ອນໄຂພື້ນຖານ ແລະ ສະພາບການແຫ່ງຊາດຂອງຈີນ ແລະ ແຂວງກວາງຊີ, ສຶກສາຄຳໂອ້ລົມທີ່ສຳຄັນຂອງເລຂາທິການໃຫຍ່ ສີ ຈິ້ນຜິງ ກ່ຽວກັບການເສີມສ້າງຄວາມເຂັ້ມແຂງ, ການຂະຫຍາຍຕົວ ແລະ ການເພີ່ມປະສິດ ທິພາບຂອງເສດຖະກິດຕົວຈິງ, ປະຫວັດການພັດທະນາ ແລະ ຜົນສຳເລັດຂອງເສດຖະກິດຕ່ຳຂອງຈີນ, ນະວັດຕະກຳເຕັກໂນໂລຊີ UAV (ໂດຣນ), ການນຳໃຊ້ໃນອຸດສາຫະກຳ ແລະ ການປະສົມປະສານນະວັດຕະກຳຂອງເສດຖະກິດຕ່ຳ ແລະ ການທ່ອງທ່ຽວ ແລະ ເສດຖະກິດການບິນເພດານຕ່ຳ, ວິໄສທັດອັດສະລິຍະ ແລະ ຕ່າງຝ່າຍຕ່າງມີຜົນປະໂຫຍດທາງນິເວດວິທະຍາ; ແລກປ່ຽນຄຳຄິດຄຳເຫັນ ແລະ ທັດສະນະສຶກສາຕົວຈິງ ຢູ່ບັນດາສະຖາບັນ ແລະ ວິສາຫະກິດຊັ້ນນຳ ທີ່ກ່ຽວຂ້ອງກັບການພັດທະນາເສດຖະກິດການບິນເພດານຕ່ຳ ເຊັ່ນ: ວິທະຍາໄລເຕັກນິກວິຊາຊີບທາງລົດໄຟ ຫລິວໂຈວ, ບໍລິສັດ ເຕັກໂນໂລຊີ ເຟິງຢີ (ເຊີນເຈີ້ນ) ຈຳກັດ, ບໍລິສັດ ເຕັກໂນໂລຊີອັດສະລິຍະ ກວາງໂຈວ ອີຮັງ (EHang) ຈຳກັດ, ຢ້ຽມຢາມການນຳໃຊ້ໂດຣນໃນວຽກງານກະສິກຳ ແລະ ການປົກປັກຮັກສາປ່າໄມ້ ທີ່ສວນອຸດສາຫະກຳ ຈີນ-ເຢຍລະມັນ (ຫລິວໂຈວ). ນອກຈາກນັ້ນ, ຍັງໄດ້ຮ່ວມກິດຈະກຳແລກປ່ຽນວັດທະນະທຳອັນດີງາມ ແລະ ສ້າງສາຍພົວພັນມິດຕະພາບອັນແໜ້ນແຟ້ນ ຮ່ວມກັບຄະນະຜູ້ຈັດງານ ແລະ ຊ່ຽວຊານຝ່າຍຈີນ ຢ່າງອົບອຸ່ນ.