douangchai lovan – ໜ້າ 7 – ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ

ສໍາເລັດກອງປະຊຸມໃຫຍ່ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າສັງຄົມວິທະຍາ

ຈໍານວນຜູ້ເຂົ້າຊົມ: 730

ສໍາເລັດກອງປະຊຸມໃຫຍ່ ຄັ້ງທີ II ຂອງໜ່ວຍພັກສະຖາບັນຄົ້ນຄວ້າສັງຄົມວິທະຍາ

ເພື່ອຈັດຕັ້ງຜັນຂະຫຍາຍແຜນຍຸດທະສາດ, ແຜນພັດທະນາວຽກງານຄົ້ນຄວ້າວິທະຍາສາດຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໃຫ້ປະກົດຜົນເປັນຈິງ ກໍຄືການກໍ່ສ້າງປັບປຸງວຽກງານພັກໃຫ້ມີຄວາມໜັ້ກແໜ້ນ, ເຂັ້ມແຂງຂຶ້ນເທື່ອລະກ້າວ. ໜ່ວຍພັກສະຖາບັນຄົ້ນຄວ້າສັງຄົມວິທະຍາຈຶ່ງໄດ້ຈັດກອງປະຊຸມໃຫຍ່ສະມາຊິກພັກ ຄັ້ງທີ II ຂອງຕົນຂຶ້ນຢ່າງເປັນທາງການໃນວັນທີ 04 ເມສາ 2025 ທີ່ຜ່ານມາ, ພາຍໃຕ້ການເປັນປະທານຂອງ ສະຫາຍ ປອ. ບຸນສີ ພຸດທະວົງ ຮັກສາການເລຂາໜ່ວຍພັກ ສະຖາບັນຄົ້ນຄວ້າສັງຄົມວິທະຍາ, ໃຫ້ກຽດເຂົ້າຮ່ວມຂອງສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍບັນດາກຳມະການຄະນະພັກ, ເລຂາໜ່ວຍພັກຈາກບັນດາສະຖາບັນຄົ້ນຄວ້າ, ຫ້ອງການ, ກົມ; ຜູ້ຕາງໜ້າ 3 ອົງການຈັດຕັ້ງມະຫາຊົນ ແລະ ຜູ້ແທນສົມບູນເຂົ້າຮ່ວມ ທັງໝົດ 27 ສະຫາຍ.

ກອງປະຊຸມໄດ້ຮັບຟັງການຜ່ານຮ່າງບົດລາຍງານການເມືອງ ທັງສອງພາກ, ແຜນພັດທະນາ ສຄສ 5 ປີ ຄັ້ງທີ II ແລະ ບົດສໍາຫຼວດການນໍາພາລວມ ຂອງຄະນະໜ່ວຍພັກ ເຊິ່ງໄດ້ຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນຫຼາຍດ້ານ ໂດຍສະເພາະດ້ານການເມືອງ-ແນວຄິດ, ການຈັດຕັ້ງ, ແບບແຜນນຳພາ-ວິທີເຮັດວຽກ, ການນໍາພາຈັດຕັ້ງປະຕິບັດພາລະບົດບາດ, ໜ້າທີ່, ສິດ ແລະ ຄວາມຮັບຜິດຊອບຕໍ່ໜ້າທີ່ການເມືອງ ແລະ ວຽກງານຂະບວນການຕ່າງໆ ພ້ອມທັງຍົກໃຫ້ເຫັນບັນດາຈຸດອ່ອນຂໍ້ຄົງຄ້າງ ແລະ ສາເຫດທີ່ພາໃຫ້ມີຈຸດດີ-ຈຸດອ່ອນຂໍ້ຄົງຄ້າງ ໃນການນໍາພາ-ຊີ້ນຳຂອງຄະນະໜ່ວຍພັກໃນໄລຍະທີ່ຜ່ານມາ. ໃນກອງປະຊຸມຍັງໄດ້ນໍາໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງໃນກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາ ສະຫາຍ ປອ. ບຸນສີ ພຸດທະວົງ ເປັນເລຂາໜ່ວຍພັກ, ສະຫາຍ ປທ. ທັດປານີ ແພງຄໍາສີ ເປັນຮອງເລຂາໜ່ວຍພັກ, ສະຫາຍ ປອ. ນ. ເກດມະນີ ອິນທະວົງ ເປັນກໍາມະການ ທັງເປັນປະທານກວດກາໜ່ວຍພັກ.

ໂອກາດນີ້ ສະຫາຍ ປອ. ກອງແກ້ວ ໄຊສົງຄາມ ໄດ້ໃຫ້ກຽດມີຄຳເຫັນໂອ້ລົມ ແລະ ເນັ້ນໜັກໃຫ້ຄະນະໜ່ວຍພັກຊຸດໃໝ່ ເອົາໃຈໃສ່ຈັດຕັ້ງເຜີຍແຜ່, ເຊື່ອມຊືມ, ກຳແໜ້ນເນື້ອໃນມະຕິກອງປະຊຸມໃຫ່ຍຄັ້ງນີ້ ໃຫ້ໜັກແໜ້ນ, ເລິກ ເຊິ່ງ ເພື່ອເປັນບ່ອນອີງໃນການສ້າງເປັນແຜນງານ, ໂຄງການ ຕິດພັນກັບວຽກງານວິຊາສະເພາະຂອງສະຖາບັນໃນແຕ່ລະໄລຍະ ໂດຍຖືເອົາການຄົ້ນຄວ້າວິທະຍາສາດໃຫ້ເປັນໃຈກາງ ແລະ ເປັນບັນຫາຕົ້ນຕໍທີ່ສໍາຄັນ ປະກອບສ່ວນເຂົ້າໃນການວາງແນວທາງນະໂຍບາຍຂອງພັກ-ລັດ; ເພີ່ມທະວີການສຶກສາອົບຮົມສະມາຊິກພັກພະນັກງານໃຫ້ເຂົ້າໃຈແນວທາງນະ ໂຍບາຍຂອງພັກ, ລະບຽບກົດໝາຍຂອງລັດ ຢ່າງເປັນປົກກະຕິ, ຕໍ່ເນື່ອງ; ເປັນເຈົ້າການຝຶກຝົນຫຼໍ່ຫຼອມຕົນເອງ ໃຫ້ມີທັດສະນະຫຼັກໝັ້ນ ການເມືອງໜັກແໜ້ນ ແລະ ເສີມຂະຫຍາຍຫົວຄິດປະດິດສ້າງ ເຂົ້າໃນການປັບປຸງວຽກງານວິຊາສະ ເພາະຂອງຕົນໃຫ້ນັບມື້ນັບດີຂື້ນ. ພ້ອມດຽວກັນນັ້ນ, ຕ້ອງເອົາໃຈໃສ່ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ ແລະ ຮັກສາມູນເຊື້ອການເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດຕໍ່ກັນຢ່າງຕໍ່ເນື່ອງຕະຫຼອດໄປ. ຖືເອົາການປັບປຸງແບບແຜນນໍາພາ, ວິທີເຮັດວຽກ ໂດຍຍຶດໝັ້ນຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ມີການແບ່ງງານ ແລະ ຄວາມຮັບຜິດຊອບໃຫ້ທຸກຄົນຢ່າງຈະແຈ້ງ, ເຊີດຊູຄວາມຮັບຜິດຊອບທາງການເມືອງໃຫ້ສູງຂຶ້ນ, ຮັກສາຄວາມເປັນແບບຢ່າງນໍາໜ້າ, ຮ່ວມແຮງຮ່ວມໃຈກັນ ແລະ ຊ່ວຍເຫຼືອກັນ ເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ. ເອົາໃຈໃສ່ນຳພາ-ຊີ້ນຳ ແລະ ຊຸກຍູ້ໃຫ້ອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດໜ້າທີ່ ຂອງແຕ່ລະອົງການ, ເພື່ອເປັນກຳລັງແຮງໃຫ້ຄະນະໜ່ວຍພັກ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ II ຂອງສະຖາບັນຄົ້ນຄວ້າສັງຄົມວິທະຍາ ກໍ່ຄືມະຕິກອງປະຊຸມໃຫ່ຍຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງ ຄົມແຫ່ງຊາດ ໃຫ້ປະກົດຜົນເປັນຈິງ, ກອງປະຊຸມໄດ້ປິດລົງດ້ວຍຜົນສຳເລັດຢ່າງຈົບງາມ ຕາມຄາດໝາຍທີ່ວາງໄວ້

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ຈໍານວນຜູ້ເຂົ້າຊົມ: 656

ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II

ກອງປະຊຸມໃຫຍ່ສະມາຊິກພັກ ຄັ້ງທີ II ໜ່ວຍພັກສູນຂໍ້ມູນຂ່າວສານ ແລະ ຝຶກອົບຮົມ ໄດ້ສໍາເລັດລົງຢ່າງເປັນທາງການໃນ ວັນທີ 28 ມີນາ 2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທີ່ຜ່ານມາ ພາຍໃຕ້ການເປັນປະທານຂອງ ສະຫາຍ ເດືອນສະຫວັນ ພອນມີໄຊ ຮັກສາການເລຂາໜ່ວຍພັກ ສູນຂໍ້ມູນຂ່າວສານ ແລະ ຝຶກອົບຮົມ; ໃຫ້ກຽດເຂົ້າຮ່ວມຂອງສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະປະຈໍາພັກ, ກຳມະການຄະນະພັກ, ເລຂາໜ່ວຍພັກຈາກບັນດາສະຖາບັນຄົ້ນຄວ້າ, ຫ້ອງການ, ກົມ ແລະ ຜູ້ແທນສົມບູນເຂົ້າຮ່ວມ ທັງໝົດ 30 ກວ່າສະຫາຍ.

ກອງປະຊຸມໄດ້ຮັບຟັງການຜ່ານຮ່າງບົດລາຍງານການເມືອງ ທັງສອງພາກ, ຮ່າງແຜນພັດທະນາ ສຂຝ 5 ປີ ຄັ້ງທີ II ແລະ ຮ່າງບົດສໍາຫຼວດການນໍາພາລວມຂອງຄະນະໜ່ວຍພັກ ເຊິ່ງໄດ້ຍົກໃຫ້ເຫັນເຖິງຜົນສໍາເລັດທີ່ພົ້ນເດັ່ນຫຼາຍດ້ານ ໂດຍສະເພາະດ້ານການເມືອງ-ແນວຄິດ, ການຈັດຕັ້ງ, ແບບແຜນນຳພາ-ວິທີເຮັດວຽກ, ການນຳພາຈັດຕັ້ງປະຕິບັດວຽກງານຕາມພາລະບົດບາດ, ໜ້າທີ່, ສິດ ແລະ ຄວາມຮັບຜິດຊອບຕໍ່ໜ້າທີ່ການເມືອງ ແລະ ຂະບວນການຕ່າງໆ. ພ້ອມທັງຍົກໃຫ້ເຫັນບັນຫາທີ່ຍັງຄົງຄ້າງ ແລະ ສາເຫດທີ່ພາໃຫ້ມີຈຸດດີ – ຈຸດອ່ອນຂໍ້ຄົງຄ້າງ ໃນການນໍາພາ-ຊີ້ນຳ ຂອງຄະນະໜ່ວຍພັກໃນໄລຍະທີ່ຜ່ານມາ.

ກອງປະຊຸມໄດ້ນໍາໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີຜູ້ສະໝັກເລືອກຕັ້ງທັງໝົດ ຈຳນວນ 5 ສະຫາຍ, ຍິງ 2 ສະຫາຍ, ເລືອກເອົາ 3 ສະຫາຍ. ໃນກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາ ສະຫາຍ ເດືອນສະຫວັນ ພອນມີໄຊ ເປັນເລຂາໜ່ວຍພັກ, ສະຫາຍ ນ. ພູຄຽງ ໄຊສີລິ ເປັນຮອງເລຂາໜ່ວຍພັກ, ສະຫາຍ ສຸກນິລັນ ແສງພະຈັນ ເປັນກຳມະການ ທັງເປັນປະທານກວດກາໜ່ວຍພັກ.

ໃນໂອກາດດັ່ງກ່າວນີ້ ສະຫາຍ ປອ. ກອງແກ້ວ ໄຊສົງຄາມ ໄດ້ໃຫ້ກຽດມີຄຳເຫັນໂອ້ລົມ ແລະ ເນັ້ນໜັກໃຫ້ຄະນະໜ່ວຍພັກຊຸດໃຫມ່ ຈົ່ງເອົາໃຈໃສ່ວຽກງານສຶກສາອົບຮົມນຳພາ-ການເມືອງແນວຄິດໃຫ້ແກ່ສະມາຊິກພັກ-ພະນັກ ງານພາຍໃຕ້ການຄຸ້ມຄອງຂອງຕົນໃຫ້ເປັນປົກກະຕິ, ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະທີ່ໄດ້ກຳນົດໃນບົດລາຍງານການເມືອງກໍ່ຄືແຜນການສູ້ຊົນ 5 ປີ ໃຫ້ປະກົດຜົນເປັນຈິງ, ປັບປຸງແບບແຜນວິທີເຮັດວຽກວິທີນໍາພາ-ຄຸ້ມຄອງໃຫ້ໜັກແໜ້ນ, ເຂັ້ມແຂງ, ເອົາໃຈໃສ່ໃກ້ຊິດຕິດແທດກັບສະມາຊິກພັກພະນັກງານ, ເຕົ້າໂຮມຄວາມສາມາມັກຄີພາຍໃນພັກໃຫ້ເປັນປຶກແຜນ. ຄະນະໜ່ວຍພັກຕ້ອງເອົາໃຈໃສ່ນຳພາຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນແຕ່ລະປີ ຕິດພັນກັບການນໍາພາຊຸກຍູ້ວຽກງານ 3 ອົງການຈັດຕັ້ງມະຫາຊົນ, ເພີ່ມທະວີວຽກງານກວດກາໃຫ້ເຂັ້ມແຂງກວ່າເກົ່າ ໂດຍສະເພາະແມ່ນການກຳແໜ້ນແນວຄິິດຂອງສະມາຊິກພັກພະນັກງານ, ການແບ່ງຄວາມຮັບຜິດຊອບໃຫ້ແຕ່ລະບຸກຄົນຢ່າງລະອຽດຈະແຈ້ງ, ການຍົກສູງຄວາມຮັບຜິດຊອບຂອງຕົນ, ການສຸມສະຕິປັນ ຍາຄວາມຮູ້, ຄວາມສາມາດ ເພື່ອເປັນກຳລັງແຮງໃນການຈັດຕັ້ງປະຕິບັດວຽກງານໃຫ້ສຳເລັດຕາມຄາດໝາຍທີ່ກຳນົດໄວ້.

ຂຽນຂ່າວ: ເພັດທະນູໄຊ ວົງຍະໄຊ

ຖ່າຍພາບ: ມູນນິນ ພົນສັກດາ

ກອງປະຊຸມວິຊາການລະດົມຄວາມຄິດເຫັນ ຕໍ່ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ

ຈໍານວນຜູ້ເຂົ້າຊົມ: 716

ກອງປະຊຸມວິຊາການລະດົມຄວາມຄິດເຫັນ ຕໍ່ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ

ໃນວັນທີ 5 ມີນາ 2025 ທີ່ຜ່ານມາ ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ສວສສຊ ຮ່ວມກັບອົງການ ສະຫະປະຊາຊາດ ສໍາລັບເດັກ (UNICEF), ໄດ້ຈັດກອງປະຊຸມວິຊາການລະດົມຄວາມຄິດເຫັນ ໃສ່ກອບເນື້້ອໃນການຄົ້ນຄວ້າ ຫົວຂໍ້ “ສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ” ພາຍໃຕ້ການເປັນປະທານຂອງ ທ່ານ ປອ. ນາງ ແກ້ວວິວອນ ອຸດທະຈັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ທ່ານ ບິນລາລ ອູແຣັງ ເຊັບ ດູຣານິ ຜູ້ຕາງໜ້າຈາກອົງການສະຫະປະຊາຊາດ ສໍາລັບເດັກ ພ້ອມດ້ວຍແຂກທີ່ຖືກເຊີນເຂົ້າຮ່ວມຈາກບັນດາຂະແໜງການຕ່າງໆເປັນຕົ້ນແມ່ນ: ກະຊວງສາທາລະນະສຸກ, ສະພາແຫ່ງຊາດ, ກະຊວງສຶກສາທິການ ແລະ ກິລາ, ກະຊວງການເງິນ, ກະຊວງແຜນການ ແລະ ການລົງທຶນ, ແນວລາວສ້າງຊາດ, ສະຫະພັນແມ່ຍິງ, ສູນກາງຊາວໜຸ່ມ, ຄະນະກໍາມະທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແລະ ຂະແໜງການອື່ນໆທີ່ກ່ຽວຂ້ອງ; ນອກນັ້ນຍັງມີຜູ້ຕາງໜ້າຈາກອົງການ UNICEF, ອົງການສະຫະປະຊາຊາດ ສໍາລັບປະຊາກອນ (UNFPA), ສະຖານທູດອົດສະຕາລີ ປະຈໍາ ສປປ ລາວ, ຊ່ຽວຊານຕ່າງປະເທດ ແລະ ພະນັກງານສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ, ເຂົ້າຮ່ວມຫຼາຍກວ່າ 30 ທ່ານ.

ຈຸດປະສົງກອງປະຊຸມ ເພື່ອລະດົມຄວາມຄິດເຫັນຈາກບັນດາພາກສ່ວນທີ່ກ່ຽວຂ້ອງ ໃສ່ກອບແນວຄວາມຄິດໃນການຄົ້ນຄວ້າ ແລະ ບັນດາເຄື່ອງມື ເພື່ອຮັບປະກັນໃຫ້ການຄົ້ນຄວ້າມີປະສິດທິພາບ, ປະສິດທິຜົນ ແລະ ບັນລຸຕາມຈຸດປະສົງ ແລະ ເປົ້າໝາຍໃນການຄົ້ນຄວ້າ. ພ້ອມທັງປຶກສາຫາລືລະດົມຄວາມຄິດເຫັນຕໍ່ການມີສ່ວນຮ່ວມຂອງທຸກພາກສ່ວນເຂົ້າໃນການປະກອບບຸກຄະລາກອນໃສ່ທີມງານຄົ້ນຄວ້າອີກດ້ວຍ; ເຊິ່ງບົດສະເໜີທີ່ສໍາຄັນນຳມາສະ ເໜີຄັ້ງນີ້ມີ: 1). ການສຶກສາຜົນກະທົບທາງເສດຖະກິດຂອງການແຕ່ງງານກ່ອນໄວຂອງເດັກນ້ອຍຢູ່ ສປປ ລາວ, ນໍາສະເໜີໂດຍ ທ່ານ ລາດຊະວົງ ບຸນສີພົມ, ຮອງຫົວໜ້າສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ ແລະ 2). ພາບລວມຂອງອົງປະກອບດ້ານຄຸນນະພາບຂອງການສຶກສາ ແລະ ເຄື່ອງມືໃນການເກັບກຳຂໍ້ມູນ ນໍາສະເໜີໂດຍ ທ່ານ ນ. ສຸລິຕາ ສຸກມົນຕີ, ຮອງຫົວໜ້າພະແນກສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ.

ຈາກຂໍ້ມູນເບື້ອງຕົ້ນພົບວ່າ: ສປປ ລາວ ມີອັດຕາການແຕ່ງງານໃນໄວເດັກສູງທີ່ສຸດໃນບັນດາປະເທດສະມາຊິກອາຊຽນ. ໃນຂະນະດຽວກັນ, ຄວາມຄືບຫນ້າໃນການຈັດຕັ້ງປະຕິບັດຍັງມີໜ້ອຍໃນທົດສະວັດທີ່ຜ່ານມາ ເຊິ່ງ ສປປ ລາວ ກໍຄືຫຼາຍປະເທດ ທີ່ໄດ້ປະສົບກັບວິກິດການຢ່າງຕໍ່ເນື່ອງ ເຮັດໃຫ້ມີຄວາມສ່ຽງ ຫຼື ຜົນກະທົບຮ້າຍແຮງຕໍ່ເດັກຍິງ ແລະ ເດັກຊາຍ ໃນ ສປປ ລາວ. ໃນນີ້, ການແຕ່ງງານກ່ອນໄວອັນຄວນຍັງມີການແຜ່ຫຼາຍ ໂດຍສະເພາະແມ່ນເດັກຍິງບາງຊົນເຜົ່າ ທີ່ມີອັດຕາສ່ວນການແຕ່ງງານໃນໄວເດັກຈໍານວນຫຼາຍ ແລະ ມີຄວາມແຕກຕ່າງກັນໄປໃນແຕ່ລະເຂດພື້ນທີ່ຂອງ ສປປ ລາວ ໂດຍເຫັນໄດ້ວ່າ ອັດຕາສ່ວນແມ່ຍິງອາຍຸ 20-24 ປີ ທີ່ແຕ່ງງານກ່ອນອາຍຸ 18 ປີ ສູງທີ່ສຸດ ແມ່ນຢູ່ເຂດພາກເໜືອ ກວມ 40.4% ແລະ ເຂດຫ່າງໄກສອກຫຼີກກວມ 36.3%, ເຊິ່ງນອນຢູ່ໃນແຂວງຫົວພັນ ກວມ 53.2%, ແຂວງໄຊສົມບູນ ກວມ 42.9%, ແຂວງຫຼວງພະບາງ ກວມ 42.2%, ແຂວງອຸດົມໄຊ ກວມ 41.7%, ແຂວງຜົ້ງສາລີ ກວມ 39.7% ແລະ ແຂວງບໍລິຄໍາໄຊ ກວມ 38.2%.

ການປຶກສາຫາລືດັ່ງກ່າວ ໄດ້ຮັບຄວາມສົນໃຈ ແລະ ມີບັນຍາກາດຟົດຟື້ນ ບັນດາແຂກທີ່ເຂົ້າຮ່ວມໄດ້ເອົາໃຈໃສ່ປະກອບຄຳຄິດຄຳເຫັນຢ່າງກົງໄປກົງມາ, ມີເນື້ອໃນ ແລະ ມີຄວາມຮັບຜິດຊອບສູງ ແນໃສຮັບປະກັນໃຫ້ ຜົນການຄົ້ນຄວ້າມີຄຸນນະພາບ, ສາມາດນໍາໄປເປັນແນວທາງໃນການຈັດຕັ້ງປະຕິບັດ ແລະ ນໍາເອົາຜົນປະໂຫຍດ ມາສູ່ການພັດທະນາເສດຖະກິດ-ສັງຄົມຂອງ ສປປ ລາວ.

ການສຶກສາຄັ້ງນີ້ ເປັນການຮ່ວມມືກັນກັບອົງການ UNICEF ເພື່ອສຶກສາຄົ້ນຄວ້າດ້ານນະໂຍບາຍ ໂດຍໄດ້ຮັບການສະໜັບສະໜູນງົບປະມານ ແລະ ການຊ່ວຍເຫຼືອທາງດ້ານວິຊາການ ຈາກອົງການ UNICEF ປະຈໍາ ສປປ ລາວ.

ຂຽນຂ່າວ: ອານຸວົງ ຫຼວງໄຊ, ສຄນສ, ສວສສຊ.

ຖ່າຍພາບ: ມູນິນ ພົນສັກດາ

ສວສສຊ ຈັດພິທີປະກາດການຈັດຕັ້ງຂັ້ນກົມ

ຈໍານວນຜູ້ເຂົ້າຊົມ: 641

ສວສສຊ ຈັດພິທີປະກາດການຈັດຕັ້ງຂັ້ນກົມ

ເພື່ອຜັນຂະຫຍາຍຍຸດທະສາດ ແລະ ແຜນພັດທະນາວຽກງານຄົ້ນຄວ້າວິທະຍາສາດເສດຖະກິດ-ສັງຄົມ ໃຫ້ມີການຫັນປ່ຽນຢ່າງເລິກເຊິ່ງ, ຮອບດ້ານ ແລະ ເຂັ້ມແຂງ ໃນຕໍ່ໜ້າພ້ອມທັງເປັນການກະກຽມບຸກຄະລາກອນໃນການດຳເນີນກອງປະຊຸມໃຫຍ່ 2 ຂັ້ນ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ໃນວັນທີ 5 ມີນາ2025 ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ມີພີທີປະກາດການຈັດຕັ້ງພະນັກງານ ນໍາພາຂັ້ນກົມ ພາຍໃຕ້ການເປັນປະທານຂອງທ່ານ ປອ. ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກ, ປະທານ ສວສສຊ; ມີທ່ານ ປອ. ນາງ ແກ້ວວິວອນ ອຸດທະຈັກ ຄະນະປະຈໍາ, ຮອງປະທານ ສວສສຊ, ມີກໍາມະການຄະນະພັກ, ຄະນະໜ່ວຍພັກ ພ້ອມດ້ວຍສະມາຊິກພັກ-ພະນັກງານລັດຖະກອນ ຈາກ 11 ພາກສ່ວນເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ບຸນລັດ ແກ້ວອາສາ, ກຳມະການພັກ, ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານເອກະສານດຳລັດຂອງນາຍົກລັດຖະມົນຕີ ຈຳນວນ 6 ສະບັບ ແລະ ມະຕິຕົກລົງຂອງເລຂາຄະນະພັກ ສວສສຊ ຈຳນວນ 1 ສະບັບ ດັ່ງນີ້: 1) ດຳລັດວ່າດ້ວຍການແຕ່ງຕັ້ງ ທ່ານ ປອ. ແກ້ວວິຈິດ ໄຂຄຳພິທູນ ເປັນຫົວໜ້າສະຖາບັນການເມືອງວິທະຍາ; 2) ດຳລັດວ່າດ້ວຍການແຕ່ງຕັ້ງ ທ່ານ ປອ. ບຸນສີ ພຸດທະວົງ ເປັນຫົວໜ້າສະຖາບັນສັງຄົມວິທະຍາ; 3) ດຳລັດວ່າດ້ວຍການແຕ່ງຕັ້ງ ທ່ານ ປອ. ເດັ່ງຢ່າງ ກົງຈີ ເປັນຫົວໜ້າສະຖາບັນຄົ້ນຄວ້າວັດທະ ນະທຳ; 4) ດຳລັດວ່າດ້ວຍການແຕ່ງຕັ້ງ ທ່ານ ປອ. ນາງ ກິນນະລອນ ພິມມະວົງ ເປັນຫົວໜ້າສະຖາບັນຄົ້ນຄວ້າພັດ ທະນາວິສາຫະກິດ; 5) ດຳລັດວ່າດ້ວຍການແຕ່ງຕັ້ງ ທ່ານ ປອ. ວິໄລວອນ ພົມມະຈັນ ເປັນຫົວໜ້າສະຖາບັນຄົ້ນຄວ້າປະຫວັດສາດ ແລະ ບູຮານ; 6) ດຳລັດວ່າດ້ວຍການແຕ່ງຕັ້ງ ທ່ານ ເດືອນສະຫວັນ ພອນມີໄຊ ເປັນຫົວໜ້າສູນຂໍ້ມູນຂ່າວສານ ແລະ ຝຶກອົບຮົມ; 7) ມະຕິຕົກລົງວ່າດ້ວຍການແຕ່ງຕັ້ງ ທ່ານ ປອ. ວິໄລວອນ ພົມມະຈັນ ເປັນຮັກສາການເລຂາໜ່ວຍພັກ ສະຖາບັນຄົ້ນຄວ້າປະຫວັດສາດ ແລະ ບູຮານ.

ທ່ານ ປອ. ກອງແກ້ວ ໄຊສົງຄາມ ໄດ້ກ່າວວ່າ: ໂດຍອິງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ-ລັດໃນໄລຍະໃໝ່ ກໍຄືຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ມີຄວາມຈຳເປັນຕ້ອງໄດ້ມີການປັບປຸງກົງຈັກການຈັດຕັ້ງ, ປັບປຸງພາລະບົດບາດ ແລະ ສັບຊ້ອນຈັດວາງຕໍາແໜ່ງພະນັກງານຄືນໃໝ່ ໂດຍສະເພາະແມ່ນພະນັກງານນຳພາຂັ້ນຕ່າງໆໃຫ້ເປັນລະບົບຄົບຊຸດ. ເຫດຜົນທີ່ສໍາຄັນອັນໜຶ່ງແມ່ນເພື່ອກະກຽມບຸກຄະລາກອນເຂົ້າສູ່ກອງປະຊຸມໃຫຍ່ ຄັ້ງທີ 2 ຂອງອົງຄະນະພັກ ສວສສຊ ທີ່ຈະຈັດຂຶ້ນໃນທ້າຍປີນີ້ ເຊິ່ງບັນດາສະຫາຍທີ່ໄດ້ຮັບການແຕ່ງຕັ້ງໜ້າທີ່ໃໝ່ນີ້ ລ້ວນແລ້ວແຕ່ເປັນຜູ້ທີ່ມີຄວາມຮູ້ຄວາມສາມາດ, ມີປະສົບການ ແລະ ມີຜົນງານຫຼາຍດ້ານໃນໄລຍະຜ່ານມາທັງເປັນຜູ້ທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ມີຄວາມດຸໝັ່ນອົດທົນ, ມີຄວາມສາມັກຄີ, ມີລະບຽບວິໄນ ແລະ ເຄົາລົບກົດລະບຽບຂອງພັກ, ກົດໝາຍຂອງລັດໄດ້ດີ ຈຶ່ງໄດ້ຮັບຄວາມເຊື່ອໝັ້ນ ແລະ ໄວ້ວາງໃຈຈາກຄະນະພັກ-ຄະນະນຳ ສະເໜີໃຫ້ຂັ້ນເທິງພິຈາລະນາແຕ່ງຕັ້ງ ແລະ ສັບຊ້ອນບັນດາສະຫາຍເຂົ້າຮັບໜ້າທີ່ຕຳແໜ່ງທີ່ມີຄວາມສຳຄັນດັ່ງກ່າວ. ການແຕ່ງຕັ້ງຄັ້ງນີ້ ເປັນການມອບໝາຍໜ້າທີ່ຄວາມຮັບ ຜິດຊອບສູງຂຶ້ນກວ່າເກົ່າແລ້ວຍັງເປັນການທົດສອບ, ຝຶກຝົນຫຼໍ່ຫຼອມກໍ່ສ້າງພະນັກງານນໍາພາໃຫ້ມີຄວາມຮູ້, ປະສົບການ ແລະ ບົດຮຽນຈາກພຶດຕິກຳຕົວຈິງ ເພື່ອນໍາພາພະນັກງານໃນການຄຸ້ມຄອງຂອງຕົນປະຕິບັດໜ້າທີ່ໃຫ້ສໍາເລັດ.

ພ້ອມດຽວກັນນັ້ນ, ທ່ານຍັງໄດ້ມີບາງຄຳເຫັນໂອ້ລົມຕໍ່ຜູ້ທີ່ໄດ້ຮັບການແຕ່ງຕັ້ງຕື່ມວ່າ: ກ່ອນອື່ນໝົດ ບັນດາສະຫາຍຕ້ອງໄດ້ກຳແໜ້ນ ແລະ ຄົ້ນຄວ້າພາລະບົດບາດຂອງຕົນໃຫ້ເຂົ້າໃຈເລິກເຊິ່ງ, ມີຄວາມເປັນເອກະພາບສູງ ຕໍ່ການກຳນົດທິດທາງ ແລະ ເປົ້າໝາຍຂອງວຽກງານໃນແຕ່ລະໄລຍະ; ຕ້ອງຍຶດໝັ້ນຕາມຫຼັກການລວມສູນປະຊາທິ ປະໄຕ, ມີການແບ່ງງານແບ່ງຄວາມຮັບຜິດຊອບ, ປະຕິບັດຕາມມະຕິ ແລະ ສຽງສ່ວນຫຼາຍທີ່ໄດ້ຕົກລົງກັນ, ສ້າງຄວາມສາມັກຄີກັບໝູ່ເພື່ອນໃຫ້ໜັກແໜ້ນ, ເອົາໃຈໃສ່ສຶກສາອົບຮົມແນວຄິດການເມືອງໃຫ້ກັບພະນັກງານ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ, ມີແບບແຜນໃນການດຳລົງຊີວິດທີ່ດີ, ປະພຶດຕົນເປັນແບບຢ່າງ ແລະ ຍົກສູງຄວາມຮູ້ຄວາມສາມາດ, ຊ່ວຍເຫຼືອເຊິ່ງກັນແລະກັນຢ່າງຈິງໃຈ, ຍຸຕິທຳ. ພ້ອມທັງຮຽກຮ້ອງໃຫ້ສະມາຊິກພັກ, ພະ ນັກງານລັດຖະກອນທົ່ວ ສວສສຊ ຈົ່ງໃຫ້ຄວາມຮ່ວມມື, ຊ່ວຍເຫຼືອ ແລະ ສະໜັບສະໜູນຜູ້ທີ່ໄດ້ຮັບການແຕ່ງຕັ້ງໃໝ່ ສາມາດປະຕິບັດໜ້າທີ່ຢ່າງສະດວກ.

ຂຽນຂ່າວ ແລະ ຖ່າຍພາບ: ເພັດທະນູໄຊ ວົງຍະໄຊ

ສວສສຊ ຢ້ຽມຊົມຫໍພິພິທະພັນປະຫວັດສາດກອງທັບປະຊາຊົນລາວ

ຈໍານວນຜູ້ເຂົ້າຊົມ: 604

ສວສສຊ ຢ້ຽມຊົມຫໍພິພິທະພັນປະຫວັດສາດກອງທັບປະຊາຊົນລາວ

ໃນຕອນເຊົ້າຂອງວັນທີ 28 ກຸມພາ 2025, ທ່ານ ເພັດໃສ ເພຍເທບ ຄະນະພັກ, ຫົວໜ້າຫ້ອງການ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍຄະນະນຳ ແລະ ສະມາຊິກພັກ, ພະນັກງານ-ລັດຖະກອນ 3 ພາກສ່ວນຄື: ຫ້ອງການ ສວສສຊ, ກົມຈັດຕັ້ງ ແລະ ພະນັກງານ, ສູນຂໍ້ມູນຂ່າວສານ ແລະ ຝຶກອົບຮົມ ເຂົ້າຢ້ຽມຊົມ ຫໍພິພິທະພັນປະຫວັດສາດກອງທັບປະຊາຊົນລາວ, ເພື່ອເປັນການສ້າງຂະບວນການຕ້ອນຮັບກອງປະຊຸມຂອງໜ່ວຍພັກ.ການຢ້ຽມຊົມຄັ້ງນີ້ແມ່ນໄດ້ຮັບຟັງການບັນຍາຍຈາກຄະນະຮັບຜິດຊອບຫໍພິພິທະພັນ ສະແດງເຖິງການປະກອບສ່ວນອັນສຳຄັນ ແລະ ສົມກຽດ ໃນການປະຕິບັດໜ້າທີ່ຍຸດທະສາດ, ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມ, ເຊີດຊູສະຕິລະວັງຕົວກຽມພ້ອມສູ້ຮົບ, ເປັນກຳລັງຫຼັກແຫຼ່ງເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນຂອງຊາດໄວ້ໄດ້ຢ່າງໝັ້ນຄົງ. ຫຼັງຈາກນຳພາຢ້ຽມຊົມສຳເລັດແລ້ວ ກໍ່ຍັງໄດ້ຮັບຊົມຮູບເງົາປະຫວັດສາດການກອບກູ້ເອົາເອກະລາດຂອງພັກປະຊາຊົນປະຕິວັດລາວ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສະຫະພັນກຳມະບານ ສວສສຊ ສຳເລັດກອງປະຊຸມໃຫຍ່ ຄັ້ງທີ I

ຈໍານວນຜູ້ເຂົ້າຊົມ: 740

ສະຫະພັນກຳມະບານ ສວສສຊ ສຳເລັດກອງປະຊຸມໃຫຍ່ ຄັ້ງທີ I

ກອງປະຊຸມໃຫຍ່ສະມາຊິກກຳມະບານ ສະຖາບັນວິທະຍາສາດເສດຖະກິດ ແລະ ສັງຄົມ ແຫ່ງຊາດ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 27 ກຸມພາ 2025, ທີ່ຫ້ອງປະ ຊຸມໃຫຍ່ ຊັ້ນ 3 ຕຶກວິຊາການ ພາຍໃຕ້ການເປັນປະທານຂອງສະຫາຍ ພອນ ວິພົນຮຽນ ປະທານສະຫະພັນກຳມະບານ ສວສສຊ ແລະ ໃຫ້ກຽດເຂົ້າຮ່ວມຂອງສະຫາຍ ປອ. ກອງແກ້ວ ໄຊສົງຄາມ, ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ສະຫາຍ ເລັດ ໄຊຍະພອນ ກຳມະການສູນກາງພັກ, ເລຂາຄະນະພັກ, ປະທານ ສູນກາງສະຫະພັນກຳມະການລາວ; ກອງປະຊຸມຍັງໄດ້ໃຫ້ກຽດເຂົ້າຮ່ວມຂອງສະຫາຍ ປອ. ກິ ແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ, ຜູ້ຊີ້ນໍາວຽກງານອົງການຈັດ ຕັ້ງມະຫາຊົນ; ພ້ອມນັນ, ຍັງມີບັນດາສະຫາຍຄະນະພັກ, ບັນດາເລຂາໜ່ວຍພັກ, ຕາງໜ້າສະຫະ ພັນແມ່ຍິງ ສວສສຊ, ຄະນະຊາວໜຸ່ມ ສວສສຊ, ສະຫະພັນກໍາມະບານອ້ອມຂ້າງຫຼັກ 6, ແຂກຖືກເຊີນຈາກສູນກາງສະຫະພັນກຳມະບານລາວ ແລະ ສະມາຊິກກໍາມະບານ ເຂົ້າຮ່ວມທັງໝົດ 150 ກວ່າສະຫາຍ.

ກອງປະຊຸມຄັ້ງນີ້ ໄດ້ຮັບຟັງການບົດລາຍງານການເມືອງ ໂດຍ ສະຫາຍ ປອ. ບຸນສີ ພຸດທະວົງ ຮອງປະທານກໍາມະບານ ສວສສຊ ເຊິ່ງໄດ້ຍົກໃຫ້ເຫັນເຖິງຜົນສໍາເລັດຮອບດ້ານ ທີ່ສະຫະພັນກຳມະບານ ສວສສຊ ສາມາດຍາດມາໄດ້ ໃນໄລຍະຜ່ານມາ ແລະ ວາງທິດທາງຄາດໝາຍສູ້ຊົນໃນຕໍ່ໜ້າ ໂດຍສະເພາະແມ່ນການຍົກສູງຄວາມເປັນເຈົ້າການ ໃນການປົກປ້ອງສິດຜົນປະໂຫຍດອັນຊອບທຳຂອງສະມາຊິກກຳມະບານ, ການສ້າງຖັນແຖວສະມາຊິກກຳມະບານໃຫ້ເຂັ້ມແຂງ, ກ້າວໜ້າ ແລະ ປະຕິບັດຂໍ້ແຂ່ງ 5 ເປັນເຈົ້າ ຂອງສູນກາງກຳມະບານລາວໃຫ້ປະກົດຜົນເປັນຈິງ. ໃນກອງປະຊຸມ ສະຫາຍ ພອນ ວິພົນຮຽນ ປະທານສະຫະພັນກຳມະບານ ສວສສຊ ໄດ້ຜ່ານບົດສໍາຫຼວດ ການນໍາພາລວມຂອງຄະນະບໍລິຫານງານສະຫະພັນກໍາມະບານ ຕະຫຼອດໄລຍະ 4 ປີຜ່ານມາ ໂດຍໄດ້ຕີລາຄາໃຫ້ເຫັນຈຸດດີ, ຈຸດອ່ອນ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ເພື່ອປັບປຸງແກ້ໄຂໃນຕໍ່ໜ້າ. ພ້ອມນັ້ນ ຍັງໄດ້ຈັດພິທີປະດັບຫຼຽນກາໃຫ້ແກ່ ຄະນະສະຫະພັນກຳມະບານຊຸດເກົ່າ ແລະ ຄະ ນະພັກ-ຄະນະນໍາ ສວສສຊ ອີກດ້ວຍ.

ກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິ ຫານງານສະຫະພັນກໍາມະບານ ສວສສຊ ຊຸດໃໝ່ ຈໍານວນ 9 ສະຫາຍ, ຍິງ 2 ສະຫາຍ; ກອງປະ ຊຸມຄັ້ງປະຖົມມະລຶກ ໄດ້ຕົກລົງເລືອກເອົາສະຫາຍ ປອ. ແກ້ວວິຈິດ ໄຂຄຳພິທູນ ເປັນປະທານສະຫະ ພັນກໍາມະບານ ສວສສຊ; ສະຫາຍ ຄຳສຸກ ພອນໄຊສະຫວັດ ເປັນຮອງປະທານ ທັງເປັນປະທານ ກວດກາ ແລະ ສະຫາຍ ເພັດທະນູໄຊ ວົງຍະໄຊ ເປັນຮອງປະທານ

ກອງປະຊຸມໃຫຍ່ດັ່ງກ່າວ ໄດ້ຮັບຟັງການໂອ້ລົມຂອງ ສະຫາຍ ປອ. ກອງແກ້ວ ໄຊສົງຄາມ ແລະ ສະຫາຍ ເລັດ ໄຊຍະພອນ ເຊິ່ງໄດ້ຕີລາຄາສູງ ແລະ ຊົມເຊີຍບັນດາຜົນສໍາເລັດ, ຜົນງານຂອງຄະນະບໍລິຫານງານກຳມະບານ ສວສສຊ ທີ່ຍາດມາໄດ້ໃນໄລຍະຜ່ານມາ ແລະ ໃຫ້ທິດຊີ້ນຳໃນການເຄື່ອນໄຫວວຽກງານຂອງຄະນະບໍລິຫານງານກຳມະບານ ສວສສຊ ຊຸດໃໝ່ ໄດ້ນຳໄປຄົ້ນຄວ້າ ແລະ ຜັນຂະຫຍາຍ ເຂົ້າໃນການນຳພາ-ຊີ້ນຳວຽກງານກຳມະບານ ຂອງສະຖາບັນວິທະຍາສາດ ເສດຖະກິດ ແລະ ສັງຄົມ ແຫ່ງຊາດ ໃນຕໍ່ໜ້າ ໃຫ້ມີຜົນສໍາເລັດໃໝ່ ຍິ່ງໃຫຍ່ກວ່າເກົ່າ.

ຂຽນຂ່າວ ແລະ ຖ່າຍພາບ: ຄະນະຂ່າວສານ ສຂຝ

ກອງປະຊຸມໃຫຍ່ສະມາຊິກຊາວໜຸ່ມ ສະຖາບັນວິທະຍາສາດເສດຖະກິດ ແລະ ສັງຄົມ ຄັ້ງທີ I

ຈໍານວນຜູ້ເຂົ້າຊົມ: 696

ກອງປະຊຸມໃຫຍ່ສະມາຊິກຊາວໜຸ່ມ ສະຖາບັນວິທະຍາສາດເສດຖະກິດ ແລະ ສັງຄົມ ຄັ້ງທີ I

ກອງປະຊຸມໃຫຍ່ສະມາຊິກຊາວໜຸ່ມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຄັ້ງ I ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 21 ກຸມພາ 2025, ທີ່ຫ້ອງປະຊຸມໃຫຍ່ ຊັ້ນ 3 (ຕຶກວິຊາການ) ພາຍໃຕ້ການເປັນປະທານຂອງ ສະຫາຍ ນາງ ກຽງຄຳ ກັນຫາວົງ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ສວສສຊ. ກອງປະຊຸມໄດ້ເປັນກຽດຕ້ອນຮັບ ສະຫາຍ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ສະຫາຍ ທອງລີ ສີສຸລິດ ຄະນະພັກ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ; ສະຫາຍ ປອ. ກິແກ້ວ ຈັນທະບູຣີ ຮອງເລຂາຄະນະພັກ, ຮອງປະທານ ສວສສຊ, ທັງເປັນຜູ້ຊີ້ນໍາ 3 ອົງການຈັດຕັ້ງມະຫາຊົນ. ມີບັນດາສະຫາຍຄະນະພັກ, ເລຂາໜ່ວຍພັກ, ຕາງໜ້າສະຫະພັນກຳມະບານ ສວສສຊ, ສະຫະພັນແມ່ຍິງ ສວສສຊ, ຕາງໜ້າຄະນະຊາວໜຸ່ມຈາກບັນດາອົງການອ້ອມຂ້າງຫຼັກ 6, ບັນດາສະມາຊິກຊາວໜຸ່ມພາຍໃນ ສວສສຊ ແລະ ແຂກທີ່ມີກຽດຈາກສູນກາງຊາວໜຸ່ມປະຊາຊົນປະຕິວັດລາວ ເຂົ້າຮ່ວມທັງໝົດ 119 ກວ່າສະຫາຍ.

ກອງປະຊຸມຄັ້ງນີ້ ຍັງໄດ້ຜ່ານເອກະສານລາຍງານການເມືອງ ແລະ ບົດສໍາຫຼວດການນໍາພາ ພ້ອມກັນພິຈາລະນາ ແລະ ປະກອບຄໍາເຫັນຕໍ່ເອກະສານດັ່ງກ່າວ ທີ່ໄດ້ຢັ້ງຢືນໃຫ້ເຫັນເຖິງຜົນງານອັນໃຫຍ່ຫຼວງແຫ່ງການຈັດຕັ້ງປະຕິບັດຕາມສິດ ແລະ ໜ້າທີ່ວິຊາສະເພາະວຽກງານວິຊາສະເພາະຂອງຕົນ ຕິດພັນກັບການຈັດຕັ້ງປະຕິບັດວຽກງານ 4 ບຸກຂອງຊາວໜຸ່ມຢ່າງເປັນຂະບວນການຟົດຟື້ນ. ໃນບົດລາຍງານການເມືອງໄດ້ສະຫຼຸບຕີລາຄາບັນດາຜົນສໍາເລັດຂອງການຈັດຕັ້ງປະຕິບັດແຜນພັດທະນາຊາວໜຸ່ມຄັ້ງທີ I ຂອງຄະນະຊາວໜຸ່ມ ສວສສຊ ໃນໜຶ່ງສະໄໝຜ່ານມາ ແລະ ຮັບຮອງເອົາທິດທາງແຜນການຄາດໝາຍສູ້ຊົນໃນຕໍ່ໜ້າ. ນອກຈາກນັ້ນ, ກອງປະຊຸມ ຍັງໄດ້ມີພິທີມອບທຸງໄຊນໍາໜ້າ 4 ບຸກ, ຫຼຽນຊາວໜຸ່ມຕະລຸມບອນ, ຫຼຽນກາທີ່ລະນຶກຄົບຮອບ 65 ປີ ແລະ ໃບຍ້ອງຍໍໃຫ້ແກ່ຄະນະຊາວໜຸ່ມ, ໜ່ວຍຊາວໜຸ່ມ, ສະມາຊິກຊາວໜຸ່ມ ແລະ ບຸກຄົນ ທີ່ປະກອບສ່ວນເຂົ້າໃນວຽກງານຊາວໜຸ່ມໃນໄລຍະຜ່ານມາ.

ເພື່ອສືບຕໍ່ເສີມຂະຫຍາຍວຽກງານຊາວໜຸ່ມໃຫ້ເຂັ້ມແຂງຂຶ້ນຢ່າງບໍ່ຢຸດຢັ້ງ ຜູ້ແທນທີ່ເຂົ້າຮ່ວມກອງປະຊຸມ ຍັງໄດ້ໃຊ້ສິດປະຊາທິປະໄຕ ປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມ ສວສສຊ ຊຸດໃໝ່ ຕາມມາດຖານ, ເງື່ອນໄຂທີ່ໄດ້ກໍານົດໄວ້ ເຊິ່ງສາມາດເລືອກໄດ້ຄະນະບໍລິຫານງານຊາວໜຸ່ມ ຈໍານວນ 13 ສະຫາຍ, ໃນນັ້ນໄດ້ເລືອກເອົາ ສະຫາຍ ເດືອນສະຫວັນ ພອນມີໄຊ ເປັນເລຂາຄະນະບໍລິຫານງານຊາວໜຸ່ມ ສວສສຊ, ສະຫາຍ ປອ. ວັນໄຊ ໄຊຍະວົງ ເປັນຮອງເລຂາຄະນະບໍລິຫານງານຊາວໜຸ່ມ ສວສສຊ ແລະ ສະຫາຍ ນາງ ພູຄຽງ ໄຊສິລິ ເປັນຮອງເລຂາຄະນະບໍລິຫານງານຊາວໜຸ່ມ ສວສສຊ ທັງເປັນປະທານກວດກາ.

ກອງປະຊຸມໄດ້ຮັບຟັງການໂອ້ລົມຂອງ ສະຫາຍ ປອ. ກອງແກ້ວ ໄຊສົງຄາມ ເຊິ່ງສະຫາຍໄດ້ເນັ້ນໃຫ້ຄະນະຊາວໜຸ່ມ ແລະ ສະມາຊິກຊາວໜຸ່ມ ເຊີດຊູຄວາມຮັບຜິດຊອບ ຝຶກຝົນຫຼໍ່ຫຼອມຕົນເອງ ໃຫ້ເໝືອນກັບໂຕເຜິ້ງທີ່ມີລະບົບການຈັດຕັ້ງທີ່ເຂັ້ມແຂງ ແນໃສ່ກໍ່ສ້າງນັກຄົ້ນຄວ້າວິທະຍາສາດໃຫ້ມີຄຸນນະພາບເປັນເຈົ້າການປະຕິບັດຂໍ້ແຂ່ງຂັນ 4 ບຸກ ຂອງມະຕິກອງປະຊຸມຊາວໜຸ່ມຂອງຕົນທີ່ໄວ້ວາງອອກໃຫ້ປະກົດຜົນເປັນຈີງ ເຊິ່ງຄໍາເຫັນດັ່ງກ່າວ ມີຄວາມໝາຍຄວາມສຳຄັນ, ມີເນື້ອໃນອັນເລິກເຊິ່ງ ແລະ ເປັນເຂັມຊີ້ທິດເຍືອງທາງ ໃຫ້ແກ່ຄະນະບໍລິຫານງານຊາວໜຸ່ມ ສວສສຊ ຊຸດໃໝ່ ແລະ ສະມາຊິກຊາວໜຸ່ມທັງໝົດ ໃຫ້ນຳໄປຄົ້ນຄວ້າຈັດຕັ້ງເຊື່ອມຊຶມ ແລະ ຫັນລົງສູ່ພາກປະຕິບັດໃຫ້ເກີດຜົນເປັນຈິງ.

ໃນໂອກາດດຽວກັນນີ້ ສະຫາຍ ທອງລີ ສີສຸລິດ ໄດ້ກ່າວບາງຕອນຕໍ່ກອງປະຊຸມວ່າ: ສະມາຊິກຊາວໜຸ່ມທຸກສະຫາຍຕ້ອງເອົາໃຈໃສ່ຝຶກຝົນຫຼໍ່ຫຼອມກໍ່ສ້າງຕົນເອງໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ມີຄວາມເສຍສະຫຼະ ເພື່ອປະເທດຊາດ ເພື່ອປະຊາຊົນ; ເອົາໃຈໃສ່ປະຕິບັດໜ້າທີ່ການເມືອງຂອງຕົນໃນຖານະນັກຄົ້ນຄວ້າວິທະຍາສາດໃຫ້ສຳເລັດ; ເພີ່ມທະວີການປະສານສົມທົບກັບບັນດາສະມາຊິກຊາວໜຸ່ມ, ຄະນະຊາວໜຸ່ມບັນດາພາກສ່ວນອື່ນໆ ເພື່ອແລກປ່ຽນບົດຮຽນທີ່ດີເຂົ້າຮັບໃຊ້ໃນການພັດທະນາຊາວໜຸ່ມ ແລະ ການ ຈັດຕັ້ງໃຫ້ເຂັ້ມແຂງຂຶ້ນເທື່ອລະກ້າວ. ພ້ອມກັນນັ້ນ ສະຫາຍຍັງໄດ້ຮຽກຮ້ອງມາຍັງຄະນະຊາວໜຸ່ມ ແລະ ສະມາຊິກຊາວໜຸ່ມທົ່ວ ສວສສຊ ຈົ່ງໄດ້ສືບຕໍ່ເອົາໃຈໃສ່ປະກອບສ່ວນເຂົ້າໃນການເຄື່ອນໄຫວວຽກງານຊາວໜຸ່ມ ເພື່ອເສີມຂະຫຍາຍມູນເຊື້ອຂອງອົງການຈັດຕັ້ງຊາວໜຸ່ມໃຫ້ພົ້ນເດັ່ນ, ປຸກລະດົມຄວາມສາມັກພາຍໃນພາຍນອກໃຫ້ເປັນປຶກແຜ່ນ ພ້ອມກັນເຮັດຫຼ້ອນໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້ ກໍຄືການຈັດຕັ້ງຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມໃຫຍ່ສະມາຊິກຊາວໜຸ່ມ ສວສສຊ ຄັ້ງທີ I ນີ້ ໃຫ້ປະກົດຜົນເປັນຈິງ ແລະ ມີປະສິດທິຜົນສູງ.

ຂຽນຂ່າວ ແລະ ຖ່າຍພາບ: ຄະນະຮັບຜິດຊອບໂຄສະນາຊາວໜຸ່ມ ສວສສຊ

ສວສສຊ ປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ

ຈໍານວນຜູ້ເຂົ້າຊົມ: 1,015

ສວສສຊ ປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ

ໃນວັນທີ 5 ກຸມພາ 2025 ນີ້ ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດພິທີປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22/3/1955-22/3/2025) ຂຶ້ນ, ໂດຍການໃຫ້ກຽດເຂົ້າຮ່ວມ ແລະ ກ່າວປາຖະກະຖາຂອງ ສະຫາຍ ປອ. ຄຳພັນ ເຜີຍຍະວົງ ຄະນະເລຂາທິການສູນກາງພັກ ປະທານສະພາທິດສະດີສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ມີ ສະຫາຍ ປອ. ກອງແກ້ວ ໄຊສົງຄາມ ກຳມະການສູນກາງພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີຄະນະປະຈຳພັກ, ກຳມະການພັກ, ຫົວໜ້າ-ຮອງຫົວໜ້າຫ້ອງການ, ກົມ, ສະຖາບັນຄົ້ນຄວ້າ, ສູນ ພ້ອມທັງພະນັກງານທົ່ວ ສວສສຊ ເຂົ້າຮ່ວມ.

ສະຫາຍ ປອ. ຄຳພັນ ເຜີຍຍະວົງ ໄດ້ຍົກໃຫ້ເຫັນ ຂະບວນວິວັດແຫ່ງການກຳເນີດຂອງພັກປະຊາຊົນປະຕິວັດລາວ, ຕະຫຼອດໄລຍະເວລາ 70 ປີ ແຫ່ງການນໍາພາຂອງພັກ, ບໍ່ວ່າຈະເປັນໄລຍະຕໍ່ສູ້ກູ້ຊາດ, ນັບແຕ່ມື້ສ້າງຕັ້ງພັກໃນວັນທີ 22 ມີນາ 1955 ເປັນຕົ້ນມາ ພັກເຮົາໄດ້ມີການຊີ້ນໍາ-ນໍາພາຢ່າງພິລະອາດຫານ, ເດັດດ່ຽວ, ມີວິທະຍາສາດ ແລະ ມີຄວາມສະຫຼາດສ່ອງໃສ, ອັນໄດ້ນໍາພາປວງຊົນລາວບັນດາເຜົ່າຜູ້ຮັກຊາດ ຕໍ່ສູ້ກັບອິດທິກຳລັງປໍລະປັກ ທີ່ໂຫດຮ້າຍປ່າເຖື່ອນ, ມີກຳລັງບໍ່ວ່າຈະເປັນຈຳນວນພົນ, ອາວຸດ ແລະ ເຕັກນິກທີ່ທັນສະໄໝ ເໜືອກວ່າເປັນຫຼາຍເທົ່າ; ແຕ່ດ້ວຍຄວາມສະຫຼາດສ່ອງໃສ ແລະ ຄວາມມີໄຫວພິບປະຕິພານຂອງພັກ ບວກກັບນໍ້າໃຈຮັກຊາດອັນດູດດື່ມ ບໍ່ຍອມຈໍານົນຕໍ່ສັດຕູຜູ້ຮຸກຮານຂອງຄົນລາວ ແລະ ການຊ່ວຍເຫຼືອຂອງເພື່ອນມິດສາກົນທີ່ກ້າວໜ້າ, ພັກປະຊາຊົນລາວ ໃນເມື່ອກ່ອນ ກໍ່ຄືພັກປະຊາຊົນປະຕິວັດລາວ ໃນປັດຈຸບັນ ຈຶ່ງສາມາດນໍາພາປວງຊົນລາວປົດປ່ອຍຊາດ, ອະທິປະໄຕ ແລະ ປະກາດເອກະລາດຂອງຕົນຂຶ້ນໃນວັນທີ 2 ທັນວາ 1975. ພາຍຫຼັງປົດປ່ອຍຊາດ ພັກເຮົາກໍໄດ້ນໍາພາປວງຊົນລາວ ດໍາເນີນການປົວແປງ ຮຳບາດແຜສົງຄາມ ແລະ ປະຕິບັດໜ້າທີ່ສອງຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ໝັ້ນຄົງ ແລະ ສີວິໄລ. ຕະຫຼອດ70 ປີ ແຫ່ງການສ້າງຕັ້ງພັກປະຊາຊົນປະຕິວັດລາວ ແລະ 50 ປີ ແຫ່ງ ການສະຖາປະນາ ສປປ ລາວ ພັກເຮົາໄດ້ມີຜົນງານອັນຍິ່ງໃຫຍ່ ແລະ ມະຫາສານ ເປັນຕົ້ນແມ່ນ ດ້ານການເມືອງ ສາມາດປົກປັກຮັກສາເອກະລາດ ແລະ ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ; ພັກໄດ້ນໍາພາການພັດທະນາເສດຖະກິດ ແລະ ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ດ້ານວັດທະນະທໍາ-ສັງຄົມ ໄດ້ມີການປົກປັກຮັກສາ ແລະ ເສີມຂະຫຍາຍ, ສປປ ລາວ ໄດ້ມີບົດບາດ ແລະ ໃບໜ້າໃໝ່ ໃນເວທີສາກົນ ປະກອບສ່ວນໃຫ້ແກ່ການພັດທະນາຢູ່ພາກພື້ນ ແລະ ໃນໂລກ.

ການປາຖະກະຖາວັນສຳຄັນດັ່ງກ່າວ ແມ່ນເພື່ອທົບທວນຄືນມູນເຊື້ອ ແຫ່ງການນຳພາຕໍ່ສູ້ປົດປ່ອຍຊາດຢ່າງມີໄຊ ແລະ ຢັ້ງຢືນໝາກຜົນຕົວຈິງ ທີ່ພັກປະຊາຊົນປະຕີວັດລາວ ຍາດມາໄດ້ຕະຫຼອດໄລຍະ 70 ປີ, ການປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະ 50 ປີ, ທັງເປັນການເຊື່ອມຊຶມປະຫວັດສາດແຫ່ງການນຳພາຂອງພັກ ໃຫ້ແກ່ພະນັກງານ-ສະມາຊິກພັກ ທົ່ວອົງຄະນະພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຮັບຮູ້, ເຂົ້າໃຈກ່ຽວກັບ ປະຫວັດສາດ ແລະ ມູນເຊື້ອການນຳພາຂອງພັກເຮົາ.

ຂຽນຂ່າວ ແລະ ຖ່າຍພາບ: ມູນິນ ພົນສັກດາ

ສວສສຊ ເຂົ້າວາງກະຕ່າດອກໄມ້ ແລະ ຢ້ຽມຊົມ ຫໍພິພິທະພັນ ໄກສອນ ພົມວິຫານ

ຈໍານວນຜູ້ເຂົ້າຊົມ: 839

ສວສສຊ ເຂົ້າວາງກະຕ່າດອກໄມ້ ແລະ ຢ້ຽມຊົມ ຫໍພິພິທະພັນ ໄກສອນ ພົມວິຫານ

ໃນຕອນເຊົ້າຂອງວັນທີ 3 ກຸມພາ 2025, ທ່ານ ປອ. ນ. ແກ້ວວິວອນ ອຸດທະຈັກ ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ພ້ອມດ້ວຍສະມາຊິກພັກ, ພະນັກງານລັດຖະກອນ ໄດ້ນໍາກະຕ່າດອກໄມ້ເຂົ້າຢ້ຽມຄໍານັບຕໍ່ໜ້າຮູບປັ້ນຂອງ ປະທານ ໄກສອນ ພົມວິຫານ ແລະ ເຂົ້າຊົມການວາງສະແດງຮູບພາບການເຄື່ອນໄຫວຕ່າງໆຂອງການນໍາພັກ-ລັດແຕ່ອະດີດຈົນຮອດປັດຈຸບັນ ທີ່ພິພິຕະພັນ ປະທານ ໄກສອນ ພົມວິ ຫານ. ການຢ້ຽມຊົມຄັ້ງນີ້ ສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຕໍ່ຜົນງານ ແລະ ຄຸນງາມຄວາມ ດີອັນໃຫຍ່ຫຼວງຂອງ ປະທານ ໄກສອນ ພົມວິຫານ ວິລະບູລຸດທີ່ຍິ່ງໃຫຍ່ ທີ່ໄດ້ອຸທິດເຫື່ອແຮງ ແລະ ສະຕິປັນຍາ ຂອງຕົນ ເຂົ້າໃນການປະຕິວັດຊາດ, ປະຊາທິປະໄຕ ແລະ ນໍາເອົາຜົນປະໂຫຍດລວມມາສູ່ປະຊາຊົນບັນດາເຜົ່າ ໃນໄລຍະຜ່ານມາ, ພ້ອມນັ້ນ ເປັນການຮໍ່າຮຽນເອົາແນວຄິດ, ຄຸນສົມບັດສິນທໍາປະຕິວັດ ແລະ ແບບແຜນວິທີການ ເຮັດວຽກທີ່ດີ ເຂົ້າໝູນໃຊ້ໃນການນໍາພາຊີ້ນໍາວຽກງານໃຫ້ມີຜົນສຳເລັດ ແລະ ສ້າງຂະບວນຄໍານັບຮັບຕ້ອນກອງປະຊຸມໃຫຍ່ສະມາຊິກພັກຄັ້ງທີ II ຂອງບັນດາໜ່ວຍພັກ ແລະ ອົງຄະນະພັກ ສວສສຊ ທີ່ຈັດຂຶ້ນໃນປີນີ້.

ຂຽນຂ່າວ ແລະ ຖ່າຍພາບ: ພວງເພັດ ຈັນທະລີວົງ

ກອງປະຊຸມເຜີຍແຜ່ຜົນການຄົ້ນຄວ້າ ປະຈໍາປີ 2024

ຈໍານວນຜູ້ເຂົ້າຊົມ: 696

ກອງປະຊຸມເຜີຍແຜ່ຜົນການຄົ້ນຄວ້າ ປະຈໍາປີ 2024

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ເປັນໃຈກາງປະສານກັບ ສມປຊ ແລະ ສະຖາບັນຄົ້ນຄວ້າອື່ນໆ ຈັດກອງປະຊຸມເຜີຍແຜ່ຜົນການຄົ້ນຄວ້າ ປະຈໍາປີ 2024 ໃນລະຫວ່າງວັນທີ 30-31 ມັງກອນ 2025 ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ, ພາຍໃຕ້ຫົວຂໍ້: ກາລະໂອກາດ ແລະ ສິ່ງທ້າທາຍ ຂອງການພັດທະນາແບບຍືນຍົງ ແລະ ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ພາຍໃຕ້ເງື່ອນໄຂແຫ່ງການຄຸ້ມຄອງລັດ ແລະ ສັງຄົມດ້ວຍກົດໝາຍ ຢູ່ ສປປ ລາວ, ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ; ພ້ອມນັ້ນ, ກໍ່ມີບັນດາຫົວໜ້າ-ຮອງຫົວໜ້າຄະນະກໍາມາທິການ ຂອງສະພາແຫ່ງຊາດ, ລັດຖະມົນຕີ-ຮອງລັດຖະມົນຕີກະຊວງ, ອົງການ, ອະທິການບໍດີມະຫາວິທະຍາໄລແຫ່ງຊາດ, ຜູ້ຕາງໜ້າຈາກສະຖານທູດ, ອົງການຈັດຕັ້ງສາກົນ ແລະ ອົງການຈັດຕັ້ງສັງຄົມ ເຂົ້າຮ່ວມ 140 ທ່ານ.

ໃນກອງປະຊຸມ ທ່ານ ປອ. ກອງແກ້ວ ໄຊສົງຄາມ ໄດ້ກ່າວຕ້ອນຮັບ ແລະ ເປີດພິທີວ່າ: ການຈັດກອງປະຊຸມໃນຄັ້ງນີ້ ມີຈຸດປະສົງເພື່ອເຜີຍແຜ່ຜົນງານການຄົ້ນຄວ້າປະຈໍາປີ 2024 ພ້ອມທັງເປັນເວທີສົນທະນາປຶກສາຫາລື ແລະ ແລກປ່ຽນຂໍ້ມູນ, ຄຳຄິດຄຳເຫັນເຊິ່ງກັນ ແລະ ກັນ ລະຫວ່າງນັກຄົ້ນຄວ້າ, ສະຖາບັນຄົ້ນຄວ້າ, ຜູ້ວາງນະໂຍບາຍ ເຊິ່ງຈັດຂຶ້ນໃນທ່າມກາງບັນຍາກາດທີ່ທົ່ວປວງຊົນລາວ ກໍາລັງອອກແຮງແຂ່ງຂັນກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ກໍ່ຄືວິໄສທັດ ຮອດປີ 2030, ຍຸດທະສາດຮອດປີ 2025 ແລະ ແຜນພັດທະນາເສດຖະກິດແຫ່ງຊາດ 5 ປີ ຄັ້ງທີ IX (2021-2025) ແລະ ກະກຽມຮ່າງມະຕິ ຂອງກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X (2026-2030) ຢ່າງເປັນຂະບວນຟົດຟື້ນ.

ການພັດທະນາແບບຍືນຍົງພາຍໃຕ້ເງື່ອນໄຂການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ກໍ່ແມ່ນຈຸດສຸມໃຈກາງໜຶ່ງໃນມະຕິ ຂອງປະຊຸມໃຫຍ່ຄັ້ງທີ XI ຂອງພັກ ແລະ ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ແມ່ນວາລະແຫ່ງຊາດທີ່ທົ່ວພັກ, ທົ່ວລັດ ແລະ ປະຊາຊົນທັງຊາດພວກເຮົາສຸມໃສ່. ເພາະສະນັ້ນ, ເພື່ອເປັນການປະກອບສ່ວນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່, ວິໄສທັດ, ຍຸດທະສາດ ແລະ ແຜນພັດທະນາເສດຖະກິດ-ສັງຄົມ; ພວກເຮົາຈຶ່ງໄດ້ຈັດກອງປະຊຸມເຜີຍແຜ່ຜົນການຄົ້ນຄວ້າດັ່ງກ່າວ ເຊິ່ງໄດ້ໄດ້ນໍາສະເໜີ ຜົນການຄົ້ນຄວ້າ ແລະ ຂໍ້ສະເໜີແນະ ດ້ານການປັບປຸງນະໂຍບາຍຕ່າງໆ ທີ່ຕິດພັນ ແລະ ໄດ້ປຶກສາຫາລືລະຫວ່າງນັກຄົ້ນຄວ້າວິທະຍາສາດ ແລະ ຜູ້ວາງນະໂຍບາຍ ລວມທັງຜູ້ມີສ່ວນຮ່ວມໃນການພັດທະນາ.

ພ້ອມດຽວກັນນັ້ນ, ທ່ານຍັງໄດ້ກ່າວສະແດງຄວາມຊົມເຊີຍ ແລະ ຂອບໃຈຢ່າງສູງມາຍັງຄະນະຈັດຕັ້ງກອງປະຊຸມ ທີ່ໄດ້ເອົາໃຈໃສ່ ກະກຽມກອງປະຊຸມໃນຄັ້ງນີ້ ດ້ວຍຄວາມຮັບຜິດຊອບສູງ; ແລະ ກ່າວສະເເດງຄວາມຂອບໃຈມາຍັງກອງທຶນອະນຸລັກທຳມະຊາດສາກົນ ປະຈຳລາວ (WWF-Laos), ອົງການອ໋ອກຟາມສາກົນ (Oxfam-PMU), ອົງການ CCFD ປະຈໍາພາກພື້ນ, ສະຫະພາບ ເອີຣົບ (EU) ເເລະ ສະມາຄົມສົ່ງເສີມຊຸມຊົນສີຂຽວ ທີ່ໄດ້ໃຫ້ການສະໜັບສະໜູນ ທາງດ້ານງົບປະມານໃນການຈັດກອງປະຊຸມໃນຄັ້ງນີ້ນໍາອີກ.

ໃນກອງປະຊຸມໄດ້ຮັບຟັງການສະເໜີບົດຄົ້ນຄວ້າວິທະຍາສາດທັງໝົດ 28 ບົດ, ຈາກບັນດານັກຄົ້ນຄວ້າຂອງສະຖາບັນຄົ້ນຄວ້າ, ມະຫາວິທະຍາໄລແຫ່ງຊາດ ແລະ ສະຖາບັນອື່ນໆ ທີ່ກ່ຽວຂ້ອງ. ເຊິ່ງໄດ້ແບ່ງອອກເປັນ 5 ວາລະ ຫຼື ເນື້ອໃນໃຫຍ່ ຄື: (1) ກາລະໂອກາດ ແລະ ສິ່ງທ້າທາຍ ຂອງການຄຸ້ມຄອງລັດ ແລະ ສັງຄົມດ້ວຍກົດໝາຍ ຢູ່ ສປປ ລາວ; (2) ການລະໂອກາດ ແລະ ສິ່ງທ້າທາຍ ຂອງການຄຸ້ມຄອງນຳໃຊ້ຊັບພະຍາກອນທຳມະຊາດແບບຍືນຍົງ ຢູ່ ສປປ ລາວ; (3) ທ່າອ່ຽງການປ່ຽນແປງສະພາບດິນຟ້າອາກາດ ແລະ ຜົນກະທົບທາງດ້ານເສດຖະກິດ-ສັງຄົມ ຢູ່ ສປປ ລາວ; (4) ສະພາບ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢູ່ ສປປ ລາວ ແລະ (5) ຜົນກະທົບທາງສັງຄົມ ຂອງສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ຢູ່ ສປປ ລາວ. ພາຍຫຼັງ ຮັບຟັງການສະເໜີ ແຕ່ລະວາລະແລ້ວ ຜູ້ເຂົ້າຮ່ວມກອງປະຊຸມທັງໝົດກໍ່ໄດ້ສົນທະນາ, ປຶກສາຫາລື ແລະ ປະກອບຄຳຄິດຄຳເຫັນຕໍ່ກັບເນື້ອໃນບົດຄົ້ນຄວ້າດັ່ງກ່າວ ຢ່າງກົງໄປກົງມາ, ສ້າງສັນ ແລະ ມີບັນຍາກາດຟົດຟື້ນ.

ສືບຕໍ່ມື້ທີ 2 ຂອງກອງປະຊຸມວັນທີ 31 ມັງກອນ 2025 ທ່ານ ປອ. ກອງແກ້ວ ໄຊສົງຄາມ ໄດ້ສະຫຼຸບສັງລວມຜົນຂອງກອງປະຊຸມສຳມະນາວິທະຍາສາດໃນ 1 ມື້ທີ່ຜ່ານມາໂດຍຫຍໍ້ ດັ່ງນີ້: (1) ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍກົດໝາຍແມ່ນນະໂຍບາຍ, ຍຸດທະສາດ ແລະ ເປົ້າໝາຍໜຶ່ງຂອງພັກ ແລະ ລັດຖະບານຂອງ ສປປ ລາວ; ພັກ ແລະ ລັດຖະບານຂອງພວກເຮົາໄດ້ສຸມໃສ່ ສ້າງລັດແຫ່ງກົດໝາຍ ເທື່ອລະກ້າວ ແລະ ໄດ້ປະສົບຜົນສຳເລັດໃນຫຼາຍໆດ້ານ, ເປັນຕົ້ນແມ່ນການສ້າງລະບຽບກົດໝາຍ ແລະ ນິຕິກຳຕ່າງໆ; ປະຈຸບັນ ສປປ ລາວ ພວກເຮົາ ມີລັດຖະທຳມະນູນ, ກົດໝາຍ ແລະ ນິຕິກໍາລຸ່ມກົດໝາຍ ເປັນຈໍານວນຫຼວງຫຼາຍ; (2) ແຕ່ເຖິງຢ່າງໃດກໍ່ຕາມການຈັດຕັ້ງປະຕິບັດ ຫຼື ການບັງຄັບໃຊ້ກົດໝາຍ ແລະ ນິຕິກຳລຸ່ມກົດໝາຍຕ່າງໆ ດັ່ງກ່າວຍັງບໍ່ທັນເຂັ້ມງວດ ແລະ ມີປະສິດທິພາບສູງເທົ່າທີ່ຄວນ; (3) ການຈັດຕັ້ງປະຕິບັດ ຫຼື ການບັງຄັບໃຊ້ກົດໝາຍ ແລະ ນິຕິກໍາລຸ່ມກົດໝາຍ ທີ່ມີປະສິດທິພາບ ແລະ ປະສິດທິຜົນດັ່ງກ່າວ ແມ່ນປັດໃຈໜຶ່ງທີ່ສຳຄັນ ສົ່ງຜົນເຮັດໃຫ້ພວກເຮົາມີຄວາມຫຍຸ້ງ ຍາກ ໃນການພັດທະນາເສດຖະກິດ-ສັງຄົມ, ເວົ້າລວມ ແລະ ເວົ້າສະເພາະແມ່ນ ເຮັດໃຫ້ພວກເຮົາມີຄວາມຫຍຸ້ງຍາກໃນການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ ຢ່າງມີປະສິດທິພາບ, ປະສິດທິຜົນ ແລະ ຄວາມຍືນຍົງ, ການບັນເທົາ ແລະ ປັບຕົວເຂົ້າກັບສະພາບການປ່ຽນແປງດິນຟ້າອາກາດ ກໍ່ຄືການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມແນວທາງນະໂຍບາຍຂອງພັກ ແລະ ລັດຖະບານ ຂອງ ສປປ ລາວ ແລະ (4) ການສືບຕໍ່ສ້າງລັດແຫ່ງກົດໝາຍທີ່ເຂັ້ມແຂງແມ່ນເງື່ອນໄຂ ແລະ ປັດໃຈໜຶ່ງທີ່ສຳຄັນ ແລະ ມີລັກສະນະຕັດສິນພາໃຫ້ພວກເຮົາຈະສາມາດຜ່ານຜ່າ ສະພາບຄວາມຫຍຸ້ງຍາກທາງດ້ານເສດຖະກິດ-ການເງິນຄັ້ງນີ້ໄປໄດ້ ແລະ ບັນລຸເປົ້າໝາຍ ການພັດທະນາເສດຖະກິດ-ສັງຄົມ ຕາມແນວທາງຂອງພັກ ແລະ ລັດຖະບານ ຂອງ ສປປ ລາວ.

ໃນໂອກາດດັ່ງກ່າວ, ຍັງໄດ້ຮັບຟັງຄໍາເຫັນໂອ້ລົມຈາກ ທ່ານ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ ໂດຍທ່ານໄດ້ເນັ້ນໜັກເຖິງຄວາມສໍາຄັນ ແລະ ຄວາມຈໍາເປັນ ຂອງການຄົ້ນຄວ້າວິທະຍາສາດ ວ່າ: ວິທະຍາສາດ ເປັນມາດຕະເກນອັນໜຶ່ງ ທີ່ນັບມື້ມີບົດບາດ ແລະ ມີທ່າກ້າວຂະຫຍາຍຕົວຄວບຄູ່ກັບການພັດທະນາເສດຖະກິດ-ສັງຄົມໃນແຕ່ລະໄລຍະ ໂດຍສະເພາະແມ່ນຍຸກ 4.0 ແລະ ນັບມື້ມີບົດບາດສໍາຄັນຕໍ່ກັບການດໍາລົງຊີວິດ ຂອງຄົນເຮົາ ໃນດ້ານອຸດສາຫະກໍາ ຫຼື ການຄ້າ, ດ້ານກະສິກໍາ, ການອະນຸລັກສິ່ງແວດລ້ອມທໍາມະຊາດ, ການພັດທະນາສັງຄົມ ເຊິ່ງສູນກາງພັກ ແລະ ລັດຖະບານ ແຫ່ງ ສປປ ລາວ ກໍ່ເຫັນໄດ້ໃຫ້ຄວາມສໍາຄັນ ຂອງການຄົ້ນຄວ້າວິທະຍາສາດຕະຫຼອດມາ ແລະ ພ້ອມທັງມີການສົ່ງເສີມໃຫ້ມີບັນດານັກຄົ້ນຄວ້າຫຼາຍຂຶ້ນ ໃນແຕ່ລະສາຂາວິຊາເປັນກ້າວໆ ເຊິ່ງໄດ້ເນັ້ນໃສ່ການພັດທະນາແຕ່ລະດ້ານໃຫ້ມີຄວາມຍືນຍົງ. ສະນັ້ນ, ບົນພື້ນຖານການກໍາແໜ້ນທັດສະນະຕ່າງໆ ກ່ຽວກັບການຄົ້ນຄວ້າວິທະຍາສາດ ສູນກາງພັກ ແລະ ລັດຖະບານ ແຫ່ງ ສປປ ລາວ ກໍ່ໄດ້ກໍານົດບັນດາໂຄງການຄົ້ນຄວ້າວິທະຍາສາດ ເພື່ອຮັບໃຊ້ບັນດາແຜນງານລະດັບຊາດ ແລະ ຫວັງຢ່າງຍິ່ງວ່າຜົນ ຂອງກອງປະຊຸມ ຂອງພວກເຮົາໃນຄັ້ງນີ້ ຈະຖືກນໍາໄປໃຊ້ ຫຼື ພິຈາລະນາເຂົ້າໃນວຽກງານການວາງແນວທາງນະໂຍບາຍ ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດໃນຊຸມປີຕໍ່ໜ້າ.

ສືບຕໍ່ໂດຍການຮັບຟັງບົດບັນຍາຍພິເສດຈາກ ທ່ານ ລັດຖະມົນຕີ ກະຊວງພາຍໃນ, ທ່ານຮອງລັດຖະມົນຕີ ກະຊວງຍຸດຕິທໍາ, ປະທານກຳມະທິການແຜນການ, ການເງິນ ແລະ ການກວດສອບ, ສະພາແຫ່ງຊາດ ແລະ ທ່ານ ຮອງປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ. ຮັບຟັງຄຳຄິດຄຳເຫັນ ແລະ ບົດບັນຍາຍພິເສດ ຈາກທ່ານອຸປະທູດ ສະຫະພາບ ເອີຣົບ ປະຈຳ ສປປ ລາວ, ທ່ານ ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ແລະ ທ່ານ ຜູ້ອໍານວຍການອົງການ ອະນຸລັກທຳມະຊາດສາກົນ ປະຈຳ ສປປ ລາວ; ຮັບຟັງການຂຶ້ນນໍາສະເໜີບົດຄົ້ນຄວ້າທັງໝົດ 5 ບົດ ທີ່ມີເນື້ອໃນກ່ຽວກັບ ກາລະໂອກາດ ແລະ ການຄຸ້ມຄອງນໍາໃຊ້ຊັບພະຍາກອນທໍາມະຊາດແບບຍືນຍົງຢູ່ ສປປ ລາວ, ສະພາບ ແລະ ການແກ້ໄຂຄວາມຍຸ້ງຍາກທາງດ້ານເສດຖະກິດການເງິນ ແລະ ສິ່ງທ້າທາຍຂອງການຄຸ້ມຄອງລັດ ແລະ ສັງຄົມດ້ວຍກົດໝາຍ ຢູ່ ສປປ ລາວ.

ໃນວາລະຕອນທ້າຍໄດ້ມີການສະຫຼຸບຜົນຂອງກອງປະຊຸມໃນໄລຍະ 4 ປີ ຜ່ານມາ ພ້ອມທັງປຶກສາຫາລືໃນຫົວຂໍ້ໃຫຍ່ປີ 2025 ແລະ ມອບໃບຢັ້ງຢືນ, ໃບກຽດຕິຄຸນໃຫ້ແກ່ຜູ້ໃຫ້ທຶນ, ຜູ້ດໍາເນີນວາລະ ແລະ ນັກຄົ້ນຄວ້າ ພ້ອມທັງຢ້ຽມຊົມການວາງສະແດງຜົນງານການຄົ້ນຄວ້າ.