ໃນຕອນເຊົ້າຂອງວັນທີ 7 ກຸມພາ 2023 ເວລາ 9:00ໂມງ ຢູ່ຫ້ອງຮັບແຂກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ທ່ານ ປອ. ສອນທະນູ ທໍາມະວົງ, ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ເອັນນາ ເອສ໌ເທີ ໄວແອ້ນ ວານເດດ (Enna Esther Viant Valdés) ເນື່ອງໃນໂອກາດທີ່ມາຮັບໜ້າທີ່ເປັນ ເອກອັກຄະລັດຖະທູດ ສ. ກູບາ ປະຈໍາ ສປປ. ລາວ.  

     ສປປ. ລາວ ແລະ ສ. ກູບາ ເປັນປະເທດເພື່ອນມິດຍຸດທະສາດ, ມີການພົວພັນ ແລະ ຮ່ວມມືອັນເປັນມູນເຊື້ອທີ່ດີງາມມາແຕ່ດົນນານ, ເຊິ່ງໄດ້ເກີດຂຶ້ນບົນພື້ນຖານອຸດົມການສັງຄົມນິຍົມ. ສອງປະເທດໄດ້ສ້າງຕັ້ງສາຍພົວພັນການທູດ ແຕ່ວັນທີ 4 ພະຈິກ 1974. ການພົວພັນທີ່ເປັນພື້ນຖານ ແມ່ນການສະໜັບສະໜູນເຊິ່ງກັນ ແລະ ກັນໃນເວທີສາກົນ ເປັນຕົ້ນແມ່ນ ໃນຂອບຂອງອົງການສະຫະປະຊາຊາດ, ໃນກອງປະຊຸມສະມັດຊາໃຫຍ່ ຂອງອົງການສະຫະປະຊາຊາດ. 

     ໃນການພົບປະຄັ້ງນີ້, ທ່ານ ປອ. ສອນທະນູ ທໍາມະວົງ, ໄດ້ແຈ້ງສະພາບການຈັດຕັ້ງ ແລະ ເຄື່ອນໄຫວ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນໄລຍະທີ່ຜ່ານມາຈົນມາເຖິງປັດຈຸບັນ ຕໍ່ທ່ານ ນາງ Enna Esther Viant Valdés, ເອກອັກຄະລັດຖະທູດ ສ. ກູບາ ປະຈໍາ ສປປ. ລາວ. ພ້ອມທັງຕີລາຄາສູງ ຕໍ່ກັບສາຍພົວພັນ, ຮ່ວມມື ລະຫວ່າງ ສປປ. ລາວ ແລະ ສ. ກູບາ ເຊິ່ງເວລາໃດກໍ່ເນັ້ນການຮ່ວມມືດ້ານເສດຖະກິດໄປຄຽງຄູ່ກັບການພົວພັນອັນດີງາມທາງດ້ານການເມືອງ. ໃນນັ້ນ, ສາຍພົວພັນຮ່ວມມືທີ່ພົ້ນເດັ່ນ ເປັນຮູບປະທໍາແມ່ນຂະແໜງ ສາທາລະນະສຸກ, ການສຶກສາ ແລະ ກິລາ.  

    ນອກນີ້, ທັງສອງຝ່າຍຍັງໄດ້ມີການປຶກສາຫາລື ເພື່ອຊອກຫາໂອກາດການຮ່ວມມືໃນຂົງເຂດຕ່າງໆ ໂດຍສະເພາະ ແມ່ນໃນຂົງເຂດການຄົ້ນຄວ້າວິທະຍາສາດຂົງເຂດເສດຖະກິດ-ສັງຄົມ.

   ສະເພາະການພົວພັນຂອງ ສວສສຊ ກັບ ສ. ກູບາ ແມ່ນມີການພົວພັນໂດຍຜ່ານ ເວທີສໍາມະນາສາກົນ ກ່ຽວກັບສັງຄົມນິຍົມ ເຊິ່ງລິເລີ່ມມາແຕ່ປີ 2013 ເປັນຕົ້ນມາ. ໂດຍມີຄະນະຜູ້ແທນ ແລະ ນັກຄົ້ນຄວ້າຈາກ 5 ປະເທດເຂົ້າຮ່ວມຄື: ສປປ. ລາວ, ສປ. ຈີນ, ສສ. ຫວຽດນາມ, ສ. ກູບາ ແລະ ສປປ. ເກົາຫຼີ. ມາເຖິງປັດຈຸບັນ, ເວທີສໍາມະນາສາກົນກ່ຽວກັບສັງຄົມນິຍົມນີ້ ໄດ້ຈັດຕັ້ງຂຶ້ນ ຈໍານວນ 9 ຄັ້ງ ໂດຍການຜັດປ່ຽນກັນເປັນເຈົ້າພາບຂອງແຕ່ລະປະເທດ.